Конда́к 1.

Избра́нней от все́х родо́в Бо́жией Ма́тери и Цари́це, пред пречи́стым Ея́ о́бразом, Неруши́мая Стена́ имену́емым, благода́рственное хвале́бное пе́ние прино́сим Ти́, Благода́тная. Ты́ же, я́ко иму́щая си́лу непостижи́мую и любо́вь несказа́нную, от все́х на́с бе́д и скорбе́й сохрани́, да зове́м Ти́:

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

И́кос 1

А́нгел предста́тель по́слан бы́сть от Бо́га к Тебе́, Пречи́стая, благовести́ти Тебе́ ра́дость всеми́рную, я́ко зачне́ши от Ду́ха Свя́та во утро́бе Твое́й Бо́га Сло́ва, Спаси́теля ми́ра. Мы́ же, ве́дуще исполне́ние сего́ благове́щения, ве́руем, я́ко Госпо́дь Тебе́, Преблагослове́нная, яви́ Стено́ю Неруши́мою и огражде́нием на́с от вся́каго греха́, бе́д и напа́стей. Сего́ ра́ди ублажа́ем Тя́, Богоро́дице, и ра́достно вопие́м:

Ра́дуйся, я́ко Госпо́дь с Тобо́ю и Тобо́ю с на́ми; ра́дуйся, я́ко в Ка́не Галиле́йстей Предста́тельницею к Сы́ну Твоему́ о лю́дех яви́лася еси́.

Ра́дуйся, я́ко омофо́ром Твои́м ши́ршим о́блака ве́рных покрыва́еши; ра́дуйся, я́ко ле́нтием Твои́м сле́зы стра́ждущих отира́еши.

Ра́дуйся, я́ко ру́це Твои́ во огражде́ние на́с от вся́кия скве́рны воздева́еши; ра́дуйся, я́ко по глаго́лу Твоему́ ны́не и при́сно ублажа́ешися.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 2.

Прови́дяще проро́цы у́мными очесы́ свои́ми благода́тное явле́ние Твое́, Рождество́ во пло́ти от Тебе́ Сы́на Бо́жия провозвести́ша, да вси́ сбытие́ проро́ческих веща́ний позна́вше, благогове́йно взыва́ют к Бо́гу: Аллилу́иа.

И́кос 2.

Ра́зум благопросвеще́н име́ющи, Иа́ков, Моисе́й, Дави́д и вся́ проро́цы в словесе́х, виде́ниих, со́ниих чу́дное Рождество́ Твое́ и та́йну Присноде́вства Твоего́ изобрази́ша. Мы́ же, всю́ си́лу проро́ческих веща́ний разуме́ти не могу́ще, из глубины́ ве́рующих серде́ц на́ших с любо́вию воспева́ем Ти́:

Ра́дуйся, Ле́ствице высо́кая, зе́млю с Не́бом соедини́вшая; ра́дуйся, Бо́га, на земле́ я́вльшагося, во чре́ве Твое́м поне́сшая и я́ко Неопали́мая Купина́ нетле́нною пребы́вшая.

Ра́дуйся, светоно́сный О́блаче, из Него́же все́х Влады́ка, я́ко до́ждь на руно́, на зе́млю сни́де; ра́дуйся, Живоно́сный Исто́чниче, а́лчбу и жа́жду ве́чныя пра́вды в лю́дех возгрева́ющая.

Ра́дуйся, Христа́, ма́нну жи́зни, во чре́во Свое́ вмести́вшая и ду́ши на́ша хле́бом безсме́ртия насыща́ющая; ра́дуйся, чу́дный Же́зле, цвета́ми доброде́телей ве́рных украша́ющая.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 3.

Си́ла Вы́шняго осени́ Тя́, Пречи́стая, соде́лавши Тя́ Ма́терию Го́спода, и по Рождестве́ Твое́м оби́льно пребыва́ет в Тебе́, Богома́ти. Ра́дующеся таково́му Бо́жию благоволе́нию, к Тебе́ бы́вшему, вси́, восхваля́юще Спаси́теля ми́ра, вопие́м Ему́ ра́достно: Аллилу́иа.

И́кос 3.

Иму́щи благода́ть Бо́жию преизоби́льно в Себе́, Ты́, Пренепоро́чная, все́ житие́ Твое́ благи́м попече́нием о Сы́не Твое́м и Го́споде отдала́ еси́, вся́ глаго́лы Его́ соблюда́ющи в се́рдце Твое́м. Мы́ же, гре́шнии, ско́рбное житие́ Твое́ на земли́ воспомина́юще, ублажа́ем Тя́ похвалы́ таковы́ми:

Ра́дуйся, Влады́ку вселе́нныя во убо́зем верте́пе роди́вшая; ра́дуйся, во Еги́пет от беззако́ннаго И́рода с Сы́ном Твои́м бежа́вшая.

Ра́дуйся, о́трока Сы́на Своего́ с вели́кою ско́рбию во Иерусали́ме во дни́ Па́схи иска́вшая; ра́дуйся, не́нависть и за́висть от враго́в Его́ ско́рбным се́рдцем созерца́вшая.

Ра́дуйся, страда́ния и сме́рть на Кресте́ Сы́на Твоего́ ви́девшая и матери́нским се́рдцем ему́ сраспина́ющаяся; ра́дуйся, во Иоа́нне Богосло́ве Сы́на Себе́ по глаго́лу Иису́са обре́тшая.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 4.

Бу́рею наше́ствия иноплеме́нников егда́ многокра́тно бы́сть страна́ на́ша Ру́сская испыту́ема, тогда́ отцы́ на́ши взыва́ху о по́мощи ко пресвяте́й Де́ве Богоро́дице. Та́ же, я́ко Стена́ Неруши́мая и кре́пкое забра́ло, предста́тельством свои́м у Престо́ла Сы́на Своего́ и Бо́га, си́лу и кре́пость на враги́ лю́дем ру́сским дарова́, и сии́ вся́ по́лчища вра́жеския от преде́лов ру́сских изгна́ша. Сего́ ра́ди, восхваля́юще Богома́терь, ра́достно воспева́ем Го́споду: Аллилу́иа.

И́кос 4.

Слы́шит и зна́ет ми́р ве́сь, я́ко Пресвята́я Богоро́дица му́жество в сердца́х ру́сских люде́й возжига́ет, и си́лу на по́двиги и защи́ту Оте́чества, бори́маго от иноплеме́нников, подае́т, и по́мощь Свою́ благода́тную посыла́ет всему́ во́инству ру́сскому. Испове́дующе такову́ю ве́ру на́шу и чуде́сное заступле́ние Цари́цы Небе́сныя во дни́ бра́нных наше́ствий на зе́млю на́шу, та́ко воспева́ем благода́тней:

Ра́дуйся, наро́ду Ру́сскому на враги́ поможе́ние; ра́дуйся, земли́ на́шей благода́тное охране́ние.

Ра́дуйся, вожде́й и во́инства на́шего та́йное вразумле́ние и умудре́ние; ра́дуйся, ненави́стников ро́да челове́ческаго посрамле́ние.

Ра́дуйся, пла́мень вражды́ разжига́ющих гро́зная наказа́тельнице; ра́дуйся, все́х пеку́щихся о ми́ре всего́ ми́ра необори́мая помо́щнице.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 5.

Боготе́чная Звезда́ яви́лася еси́, Присноблаже́нная, все́м блужда́ющым во тме́ страсте́й и поро́ков, Твои́м бо вразумле́нием мно́жество тя́жких гре́шников от беззако́нных де́л отвраща́ются и к Бо́гу с покая́ннием прибега́ют, вопию́ще Ему́: Аллилу́иа.

И́кос 5.

Ви́дящи Премилосе́рдая Влады́чица мно́гия христиа́ны, во вла́сть греха́ и скве́рны сатано́ю исхи́щенныя, по неизрече́нней любви́ к ро́ду челове́ческому на по́мощь и́м предваря́ет, от пути́ поги́бельнаго отвраща́ет и на пу́ть спасе́ния наставля́ет. Те́мже ра́дующеся ди́вному милосе́рдию Цари́цы Небе́сныя, вси́ ве́рнии глаго́лют си́це:

Ра́дуйся, пу́ть спасе́ния все́м на́м показу́ющая; ра́дуйся, от го́рдости и гне́ва сердца́ на́ша очища́ющая.

Ра́дуйся, чревоуго́дником и пия́ницам стро́гое вразумле́ние; ра́дуйся, лени́вым и безво́льным кре́пкое побужде́ние.

Ра́дуйся, живу́щих блу́дно к покая́ннию приводя́щая; ра́дуйся, гре́шников, к тебе́ с ве́рою прибега́ющих, ско́рое исправле́ние.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 6.

Пропове́дницы бы́ша чуде́с, от Твои́х ико́н явле́нных, благочести́вии отцы́ на́ши, Тобо́ю, Богоро́дице, спасе́ннии и от бе́д и напа́стей изба́вленнии. Те́мже благодаря́ще Бо́га, такову́ю благу́ю Засту́пницу ро́ду челове́ческому дарова́вшаго, немо́лчными усты́ воспева́ем Ему́: Аллилу́иа.

И́кос 6.

Возсия́ све́т неизрече́нный Твоея́ бла́гости, Благослове́нная, все́м скорбя́щим, пла́чущим, и все́м на́м, во искуше́нии су́щим: на́ша бо сле́зныя моли́твы слы́шащи, подае́ши на́м, Богоро́дице, чуде́сное от бе́д избавле́ние. Оба́че не име́юще слове́с досто́йных восхваля́ти Тя́ за ми́лости Твоя́ ко все́м, гре́шными усты́ восклица́ем Ти́ во умиле́нии та́ко:

Ра́дуйся, ско́рби и сле́зы на́ша в ра́дость претворя́ющая; ра́дуйся, изнемога́ющим во искуше́ниях Милосе́рдая Помо́щнице.

Ра́дуйся, до́мы на́ша от огня́ и и́ных разруше́ний спаса́ющая; ра́дуйся, от та́тей и злы́х люде́й ве́рныя огражда́ющая.

Ра́дуйся, клеветы́ и ко́зни враго́в на́ших разруша́ющая; ра́дуйся, стра́х сме́рти и внеза́пныя кончи́ны в душа́х на́ших побежда́ющая.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 7.

Хотя́ всеми́лостивый Госпо́дь яви́ти свою́ Боже́ственную любо́вь к на́м, недосто́йным, дарова́ на́м Твою́, Богома́ти ико́ну, Стена́ Неруши́мая имену́емую, да ви́дящи чудеса́, от святы́я ико́ны Твоея́ бы́вшая, вси́ лю́дие с ве́рою и наде́ждою умиле́нно взыва́ют Исто́чнику чуде́с Го́споду: Аллилу́иа.

И́кос 7.

Но́вое свиде́тельство прису́щия всегда́ Тебе́, Пречи́стая, благода́ти и чуде́сныя си́лы показа́ на́м Созда́тель, егда́ ди́вный о́браз Тво́й, на олта́рней стене́ дре́вняго Софи́йскаго собо́ра во гра́де Ки́еве изображе́нный, де́вять веко́в неврежде́н сохрани́, по́лчища бо пога́ных враго́в ве́ры правосла́вныя не дерзну́ша повреди́ти о́браз се́й благода́тный, си́лою Твое́ю охраня́емый. Вои́стинну и на́м, гре́шным и ско́рбным, Стено́ю Неруши́мою яви́ся свята́я ико́на сия́, подвиза́ющи возглаша́ти Тебе́:

Ра́дуйся, в хито́н, сия́ющий све́том Небе́сным облече́нная; ра́дуйся, воздея́нием ру́к Твои́х пречи́стых непреста́нную моли́тву о все́м ми́ре явля́ющая.

Ра́дуйся, я́ко честна́го о́браза Твоего́ и долгота́ веко́в не повреди́; ра́дуйся, я́ко о́браз се́й и по наше́ствии си́лы вра́жия во все́й свое́й ле́поте пребыва́ет.

Ра́дуйся, я́ко о́бразом си́м сердца́ моля́щихся благогове́йно умиля́ются; ра́дуйся, я́ко благода́тная си́ла, сему́ о́бразу Твоему́ прису́щая, бе́сы устраша́ет.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 8.

Стра́нно е́сть неве́рующым слы́шати, я́ко Ты́, Богома́ти, о младе́нцех осо́бое попече́ние и́маши. Мы́ же, воспомина́юще слова́ Го́спода на́шего, ре́кшаго: оста́вите дете́й приходи́ти ко мне́, таковы́х бо е́сть Ца́рствие Бо́жие, с тве́рдою ве́рою испове́дуем, я́ко Ты́, Пресвята́я Де́во, любо́вию Свое́ю охраня́еши младе́нцев и и́х ма́терей, и вопие́м Сы́ну Твоему́: Аллилу́иа.

И́кос 8.

Все́м се́рдцем Твои́м, Цари́це ми́ра, вся́кое Бо́жие созда́ние лю́бящи, о все́х к Сы́ну Твоему́ моли́твы возно́сиши, я́ко Ма́ти по пло́ти Сы́на Бо́жия, нете́сно вмеща́ющи в душе́ Твое́й ско́рби и труды́ ма́терей. Сего́ ра́ди, я́ко Ма́тери Богомладе́нца Иису́са, воспева́ем Ти́:

Ра́дуйся, ве́рная Помо́щнице и Прибе́жище ма́терей детородя́щих; ра́дуйся, Покро́ве и Кре́посте младе́нцев.

Ра́дуйся, матери́нския ско́рби утоля́ющая; ра́дуйся, вся́к во́зраст младе́нческий сохраня́ющая.

Ра́дуйся, благочести́вых ма́терей в воспита́нии дете́й блага́я Наста́внице; ра́дуйся, младе́нцев безпо́мощных в боле́зни Цели́тельнице.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 9.

Вся́кое естество́ а́нгельское и челове́ческое воспева́ет присноде́вственную чистоту́ Твою́, Пренепоро́чная, сего́ ра́ди почита́ем Тя́, я́ко неусы́пную Попечи́тельницу непоро́чности де́в, чистоты́ вдови́ц, целому́дрия ю́ношей: и вся́к во́зраст люде́й вверя́ем Тебе́, да сохрани́ши и́х в свя́тости, воспева́ющих Сы́ну Твоему́: Аллилу́иа.

И́кос 9.

Вети́я суему́дреннии не мо́гут в се́рдце свое́м вмести́ти и́стину Твоего́, Богоро́дице, присноде́вства. Мы́ же, ве́рующе в си́лу непостижи́мыя та́йны, с благогове́нием восхваля́ем Тя́ си́це:

Ра́дуйся, я́ко кра́сныя и све́тлыя добро́ты Твоея́ возжела́ Жени́х, Красне́йший па́че все́х сыно́в челове́ческих; ра́дуйся, я́ко Се́й Жени́х де́вство и рождество́ в Тебе́ сочета́.

Ра́дуйся, прему́драя Наста́внице непоро́чнаго де́вства; ра́дуйся, вдови́ц благочести́вых в безбра́чии соблюда́ющая.

Ра́дуйся, чи́стых де́в и вдови́ц рабо́тати во сла́ву Христа́ на бла́го бли́жних наставля́ющая; ра́дуйся, и́ноком и и́нокиням на пути́ целому́дрия споспе́шствующая.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 10.

Спасти́ хотя́щи лю́ди Своя́ от паде́ний грехо́вных, Ты́, Влады́чице, неусы́пно свя́тость честна́го бра́ка охраня́еши и пребыва́ющим в бра́це указу́еши храни́ти за́поведи Госпо́дни: де́ти своя́ в Бо́зе назида́ти и к дело́м милосе́рдия приуча́ти. Благодаря́ще Бо́га, дарова́вшаго на́м Такову́ю му́друю Наста́вницу, от всего́ се́рдца пое́м Ему́: Аллилу́иа.

И́кос 10.

Стена́ еси́ и храни́тельница христиа́нских семе́йств благочести́вых, Пресвята́я Де́во, наставля́ющи бра́чную жи́знь я́ко и́го благо́е приима́ти и ве́рность дру́г ко дру́гу до кончи́ны храни́ти. Сего́ ра́ди и мы́, ра́дующеся Твоему́ попече́нию о до́брем христиа́нстем супру́жестве, та́ко с умиле́нием Тебе́ глаго́лем:

Ра́дуйся, честны́й бра́к благословля́ющая; ра́дуйся, по уче́нию Христа́ и апо́столов жи́ти супру́гов наставля́ющая.

Ра́дуйся, живу́щим в супру́жестве любо́вь и единомы́слие в сердца́ влага́ющая; ра́дуйся, семе́йныя у́зы охраня́ющая.

Ра́дуйся, дома́шния це́ркве блага́я Попечи́тельнице; ра́дуйся, наруши́телей супру́жеския ве́рности гро́зная Обличи́тельнице.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 11.

Пе́ние всеумиле́нное прино́сит Ти́, Преблагослове́нная, ве́сь ро́д христиа́нский, всеси́льную Моли́твенницу за ве́сь ми́р Тя́ ве́дяще. Ты́ же, Богоро́дице, и ю́ных моли́твы прие́млеши, и моле́ния немощны́х ста́рцев и ста́риц не презира́еши, ю́ных на до́брыя дела́ ко спасе́нию наставля́еши, ста́рцем же о ско́ром и́х преселе́нии в жи́знь ве́чную напомина́еши. Сего́ ра́ди, моля́ще Го́спода о дарова́нии все́м на́м па́мяти сме́ртныя, взыва́ем Ему́: Аллилу́иа.

И́кос 11.

Свети́лом светоза́рным, на́м, во тме́ грехо́вной жи́зни блужда́ющым, уче́ние Христа́ Спаси́теля о жи́зни бу́дущаго ве́ка, явля́ется. Ты́ же, Всеми́лостивая, в сердца́х на́ших благода́тное жела́ние от грехо́в покая́нием очи́ститися и до́брыми дела́ми жи́знь свою́ украси́ти возгрева́еши. Ра́дующеся Твоему́ о на́с попече́нию, о е́же получи́ти на́м ве́чное спасе́ние, со слеза́ми умиле́ния взыва́ем Ти́:

Ра́дуйся, изря́дную любо́вь к ста́рцем немощны́м явля́ющая; ра́дуйся, ве́рным лю́дем, хотя́щим житие́ свое́ во благоче́стии сконча́ти, Всеблага́я Помо́щнице.

Ра́дуйся, престаре́лых роди́телей, ча́дами свои́ми оста́вленных, под кро́в Сво́й честны́й прие́млющая; ра́дуйся, таковы́х жесто́ких ча́д, небрегу́щих о роди́телех свои́х, гро́зная Наказа́тельнице.

Ра́дуйся, о стра́шнем второ́м Христо́вом прише́ствии все́м на́м напомина́ющая; ра́дуйся, о душа́х преста́вльшихся ве́рных рабо́в Бо́жиих Моли́твеннице те́плая.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 12.

Благода́ть Боже́ственная я́вно пребыва́ет в Твое́й чудотво́рней ико́не, досто́йно и пра́ведно во утеше́ние на́ше Стено́ю Неруши́мою имену́емою. Пред се́ю ико́ною ра́дости и печа́ли своя́ излива́юще, мо́лим Тя́, Ма́ти Го́спода на́шего Иису́са Христа́: не оста́ви на́с свои́м заступле́нием, да благода́рно о Тебе́ взыва́ем Го́споду: Аллилу́иа.

И́кос 12.

Пою́ще Твое́ всеси́льное предста́тельство за ми́р ве́сь, воспомина́юще чудеса́, явле́нная Тобо́ю чрез святу́ю ико́ну Твою́ Стена́ Неруши́мая, мо́лим Тя́, Засту́пнице усе́рдная: бу́ди стране́ на́шей непреста́нная Помо́щница, умоли́ Сы́на Твоего́, вся́ моле́ния Твоя́ исполня́ющаго, ми́р ми́рови дарова́ти, да вси́ благода́рно восхваля́ют Тя́ си́це:

Ра́дуйся, явле́нием Сы́на Своего́ и Его́ воскресе́нием обра́дованная; ра́дуйся, во успе́нии Твое́м ду́шу Твою́ ра́достно в ру́це Его́ преда́вшая.

Ра́дуйся, па́стырей до́брых на и́х кре́стнем пути́ укрепля́ющая; ра́дуйся, проводя́щих и́ноческую жи́знь незри́мое поможе́ние.

Ра́дуйся, (хра́м се́й и) моля́щихся (в не́м) благода́тию Свое́ю охраня́ющая; ра́дуйся, Оте́честву на́шему неизме́нный Покро́ве и Стено́ Неруши́мая.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 13.

О, всепе́тая ма́ти Го́спода на́шего Иису́са Христа́, приими́ ны́не сие́ ма́лое моле́ние, огради́ на́с от грехо́в и вся́кия скве́рны, изба́ви от находя́щих на на́с бе́д и ну́жд, сохрани́ от уны́ния и отча́яния, клеветы́ челове́ческия, боле́зней нестерпи́мых, да моли́твами Твои́ми ста́вше на пу́ть спасе́ния ве́чнаго, благода́рно воспое́м Сы́ну Твоему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1

А́нгел предста́тель по́слан бы́сть от Бо́га к Тебе́, Пречи́стая, благовести́ти Тебе́ ра́дость всеми́рную, я́ко зачне́ши от Ду́ха Свя́та во утро́бе Твое́й Бо́га Сло́ва, Спаси́теля ми́ра. Мы́ же, ве́дуще исполне́ние сего́ благове́щения, ве́руем, я́ко Госпо́дь Тебе́, Преблагослове́нная, яви́ Стено́ю Неруши́мою и огражде́нием на́с от вся́каго греха́, бе́д и напа́стей. Сего́ ра́ди ублажа́ем Тя́, Богоро́дице, и ра́достно вопие́м:

Ра́дуйся, я́ко Госпо́дь с Тобо́ю и Тобо́ю с на́ми; ра́дуйся, я́ко в Ка́не Галиле́йстей Предста́тельницею к Сы́ну Твоему́ о лю́дех яви́лася еси́.

Ра́дуйся, я́ко омофо́ром Твои́м ши́ршим о́блака ве́рных покрыва́еши; ра́дуйся, я́ко ле́нтием Твои́м сле́зы стра́ждущих отира́еши.

Ра́дуйся, я́ко ру́це Твои́ во огражде́ние на́с от вся́кия скве́рны воздева́еши; ра́дуйся, я́ко по глаго́лу Твоему́ ны́не и при́сно ублажа́ешися.

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Конда́к 1.

Избра́нней от все́х родо́в Бо́жией Ма́тери и Цари́це, пред пречи́стым Ея́ о́бразом, Неруши́мая Стена́ имену́емым, благода́рственное хвале́бное пе́ние прино́сим Ти́, Благода́тная. Ты́ же, я́ко иму́щая си́лу непостижи́мую и любо́вь несказа́нную, от все́х на́с бе́д и скорбе́й сохрани́, да зове́м Ти́:

Ра́дуйся, Богоро́дице, Стено́ Неруши́мая, Засту́пнице на́ша и утеше́ние.

Моли́тва.

О, благода́тная Влады́чице на́ша Богоро́дице присноде́во, приими́ от на́с сие́ благода́рственное хвале́бное пе́ние и вознеси́ ко Творцу́ и Зижди́телю на́шему те́плыя моли́твы Твоя́ о на́с недосто́йных, да прости́т О́н, милосе́рдый, на́м вся́ грехи́ на́ша, по́мыслы лука́выя и нечи́стыя, дела́ скве́рныя. О, Госпоже́ Пресвята́я, умилосе́рдися и низпосли́ да́р по коего́ждо потре́бе: боля́щыя исцели́, скорбя́щыя уте́ши, заблу́ждшия вразуми́, охрани́ младе́нцы, воспита́й и научи́ ю́ныя, обо́дри и наста́ви му́жи и жены́, поддержи́ и согре́й ста́рыя, бу́ди на́м и зде́, и в жи́зни ве́чней Стена́ Неруши́мая, изба́ви от вся́ких бе́д и напа́стей и от ве́чнаго муче́ния, да всегда́ воспева́юще Твою́ матери́нскую любо́вь, восхваля́ем все́м се́рдцем Сы́на Твоего́, со Отце́м Его́ и Святы́м Ду́хом, во ве́ки веко́в. Ами́нь.