Конда́к 1.

Взбра́нная Воево́до, всего́ ми́ра уте́шительнице и наде́ждо спасе́ния ро́да христиа́нскаго, к Тебе́ припа́даем во вся́ дни́ жи́зни на́шея, я́ко к исто́чнику все́х духо́вных дарова́ний, и мо́лим Тя́: услы́ши на́с, вопию́щих к Тебе́ в часы́ дневны́я и нощны́я, в боле́знех и ско́рбех, в ну́ждах и напа́стех, всегда́ в ра́дости зову́щих:

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

И́кос 1.

А́нгелом предста́телем наче́нши, восхваля́ет Тя́, Ма́терь Бо́жию, вселе́нная вся́, я́ко Ты́ еси́ све́т просвеще́ния ра́зума на́шего, Ты́ посре́дница на́ша между́ на́ми и Бо́гом, Твоя́ Ма́терния моли́твы мно́го мо́гут пред Престо́лом Вседержи́теля, Ты́ десни́цею Свое́ю приво́диши на́с от земли́ к Небеси́, Ты́ неизглаго́ланное и непостижи́мое спасе́ния на́шего сокро́вище, и сего́ ра́ди не ве́мы, гре́шнии, ки́ими похвала́ми воспе́ти благода́рная Тебе́; приими́ же от благи́х серде́ц велича́ния сия́:

Ра́дуйся, в ра́йской сла́дости всегда́ пребыва́ющая; ра́дуйся, таковы́я ра́дости все́м жела́ющая.

Ра́дуйся, лю́бящих Сы́на Твоего́ ча́да Своя́ имену́ющая; ра́дуйся, милосе́рдия Бо́жия на́м хода́таице.

Ра́дуйся, о продле́нии жи́зни на земли́ Сы́на Своего́ умоля́ющая; ра́дуйся, за уме́рших все́х без покая́ния вы́ну скорбя́щая.

Ра́дуйся, со А́нгелом храни́телем Храни́тельнице на́ша усе́рдная; ра́дуйся, на Стра́шнем Суде́ Сы́на Твоего́ еди́на наде́ждо спасе́ния на́шего.

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

Конда́к 2.

Ви́диши, о Преблагослове́нная Ма́ти Бо́жия, ка́ко вели́ко беззако́ние ро́да челове́ческаго, и того́ ра́ди попусти́ Госпо́дь на зе́млю и живу́щия на не́й гла́ды, мо́ры, тру́сы, су́хости и потопле́ния. Ты́ же, Всеми́лостивая, умоли́ Всеблага́го Бо́га, да удали́т от ро́да сего́ фараони́тское жестокосе́рдие, и да бу́дет о́н покоре́н десни́це Госпо́дней, да прии́дет в соверше́нное покая́ние, возопи́в Ему́ согла́сно: Аллилу́иа.

И́кос 2.

Ра́зумом соверше́нным Небе́снаго ве́стника Гаврии́ла, благовеству́ющаго Тебе́ во́лю Бо́жию, я́ко Тебе́ Еди́ней бы́ти блаже́нней в жена́х, восприя́ла еси́, Ма́ти Бо́жия. Та́же предрекла́ еси́, я́ко ублажа́ти Тя́ бу́дут вси́ ро́ди, и от того́ часа́ возопию́т Тебе́ свято́е хвале́ние сицево́е:

Ра́дуйся, от Преве́чнаго Бо́га всего́ ми́ра избра́нная Отрокови́це; ра́дуйся, Невмести́маго Бо́га вмести́лище, Спаси́теля на́шего во утро́бу Свою́ прие́мшая.

Ра́дуйся, Ма́терию Того́ от Го́спода наимено́ванная; ра́дуйся, от того́же вре́мене ве́сь ми́р Богома́тернею любо́вию покрыва́ющая.

Ра́дуйся, живы́х наде́ждо и усо́пших упова́ние в стра́шный ча́с Суда́ Бо́жия; ра́дуйся, к отве́ту на Стра́шнем Суде́ на́с приуготовля́ющая.

Ра́дуйся, от рождества́ до разлуче́ния души́ от те́ла на́шего на́с не оставля́ющая; ра́дуйся, побо́рнице на́ша на ра́ти зло́бных си́л поднебе́сных.

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

Конда́к 3.

Си́ла Вы́шняго спа́се ми́р от потопле́ния грехо́внаго воплоще́нием от Тебе́ Сы́на Бо́жия, Цари́це Небе́сная, и́бо вра́г ро́да на́шего диа́вол восхоте́ погуби́ти в отчужде́нии от и́стиннаго Бо́га ве́сь ро́д челове́ческий, в беззако́нии и идолослуже́нии ходи́ти поуча́я. Госпо́дь же разруби́ се́ти его́ посла́нием в ми́р Сы́на Своего́ Единоро́днаго и Тя́, Ма́терь чи́стую, дарова́ на́м, да побежде́на бу́дет си́ла вра́жия, и да обратя́тся вси́ лю́дие к Творцу́ своему́ и Бо́гу вопию́ще: Аллилу́иа.

И́кос 3.

Иму́ще такову́ю Посре́дницу спасе́ния на́шего, моля́щеся не престае́м взыва́ти к Тебе́: бу́ди же на́м огражде́ние и стена́ кре́пкая и необори́мая, сохрани́ на́с в ве́ре правосла́вной оте́ческой во вся́ дни́ жи́зни на́шея, научи́ ны поко́рству, ча́д Це́ркве Сы́на Твоего́, ю́же стяжа́ Христо́с Кро́вию Свое́ю честно́ю. Сподо́би на́с благода́рными бы́ти Бо́гу за вели́кия ми́лости Его́, научи́ исполня́ти за́поведи Его́ и уста́вы святооте́ческия, направля́ющи на́с, Всеблага́я, на пу́ть спасе́ния. Изба́ви от греха́ и гне́ва Бо́жия, во е́же воспева́ти Тебе́ благодаре́ния такова́я:

Ра́дуйся, неусыпа́ющая Моли́твеннице и Хода́таице на́ша пред Престо́лом Бо́жиим; ра́дуйся, на Небесе́х ца́рствующая и на́с до́ле не оставля́ющая.

Ра́дуйся, все́х ра́достей неисчерпа́емый исто́чниче; ра́дуйся, сокро́вище, жи́знь на́шу услажда́ющее.

Ра́дуйся, недре́млющая, на́с же спя́щих сохраня́ющая; ра́дуйся, на труды́ дневны́я на́с благословля́ющая.

Ра́дуйся, благодаре́ния Бо́гу приноси́ти на́с науча́ющая; ра́дуйся, во дни́ пра́здников на пу́ть к хра́му Бо́жию стопы́ на́ша направля́ющая.

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

Конда́к 4.

Бу́рю вну́трь иму́ще помышле́ний сумни́тельных, слы́шаша лю́дие, о́крест живу́щии, о вели́цей си́ле благода́тней, исходя́щей от ико́ны Богома́тере во гра́де Изю́ме, притеко́ша, припа́дающе ко о́бразу с ра́достию вели́кою, я́ко к Саме́й су́щей Цари́це Небе́сней, иму́ще наде́жду на Тя́, Пречи́стая, и в весе́лии серде́ц возопи́ша Бо́гу: Аллилу́иа.

И́кос 4.

Слы́шаша лю́дие вси́, я́ко ве́рный Бо́гу и Тебе́, Богома́тери, служи́тель Тво́й святи́тель Иоаса́ф, узре́в во сне́ ико́ну Твою́, в неве́домом хра́ме в со́рном ме́сте лежа́щую, и лучеза́рное сия́ние из нея́ исходя́щее, потща́ся воспомина́нием чу́днаго виде́ния напра́вити стопы́ своя́ на пу́ть иска́ния святы́ни сея́ во все́й обши́рней епа́рхии свое́й. Егда́же гра́да Изю́ма дости́же, вше́д в це́рковь, ви́де ико́ну Твою́, Богома́ти, в притво́ре у́гли кади́льныя огражда́ющую, и а́бие помяну́ е́сть нощно́е виде́ние, и благода́ть от нея́ исходя́щую ощути́, и па́д на коле́на, пред не́ю си́це моля́шеся: Прости́, Цари́це Небе́сная, небре́жность Твои́х служи́телей, не ве́дят бо, что́ творя́т, Тебе́ же Само́й во умиле́нии се́рдца возопи́ такова́я:

Ра́дуйся, ико́н Свои́х чудотво́рных храни́тельнице усе́рдная; ра́дуйся, в со́нных виде́ниих от ико́н Свои́х мно́гим си́лу благода́тную показу́ющая.

Ра́дуйся, ве́тхия ико́ны лучеза́рным сия́нием обновля́ющая; ра́дуйся, христиа́ном, в беда́х су́щим, ко святы́м ико́нам Твои́м обраща́тися повелева́ющая.

Ра́дуйся, святи́теля Иоаса́фа от ра́нния ю́ности возлюби́вшая; ра́дуйся, ему́же чудотво́рную си́лу в ико́не Твое́й Песча́нской откры́вшая.

Ра́дуйся, пе́рвая его́ моле́ния пред святы́нею се́ю прия́вшая; ра́дуйся, сокро́вище в хра́ме Вознесе́ния Сы́на Твоего́ ико́ною Твое́ю яви́вшая.

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

Конда́к 5.

Стра́нно и сумни́тельно неве́рующим слы́шати, о Пресла́вная Ма́ти Царя́ Небе́снаго, ка́ко на Тво́й святы́й о́браз ве́рнии лю́дие очи́ма свои́ма и умиле́нными душа́ми взира́юще, и от скорбе́й избавля́ются, и от бе́д сохраня́ются. Бу́ди же на́м, Всеблага́я, хода́таица о спасе́нии на́шем, да ве́чно сла́вим Тя́ со все́ми небожи́тели, вопию́ще пе́снь: Аллилу́иа.

И́кос 5.

Ви́дев исполне́ние Про́мысла Бо́жия на себе́ во обре́тении святы́ни Песча́нския, пребы́сть святи́тель Иоаса́ф во гра́де Изю́ме три́ дни́ и три́ но́щи, по вся́к ча́с вознося́ в це́ркви благода́рственное моле́бное пе́ние пред пречи́стым о́бразом Богома́тере, за е́же удосто́ися чу́днаго виде́ния и гла́с слы́шати: се́ю ико́ною Пресвята́я Влады́чица явля́ет осо́бое зна́мение Своего́ засту́пничества гра́да сего́ и страны́ це́лыя, чесого́ ра́ди Богоро́дице возопии́м:

Ра́дуйся, ми́ра неизсяка́емый исто́чниче; ра́дуйся, сердца́ на́ша неизрече́нною ра́достию наполня́ющая.

Ра́дуйся, наде́жду иму́щих на Тя́ не посрамля́ющая; ра́дуйся, ико́нам Свои́м си́лу чудоде́йствовати да́рующая.

Ра́дуйся, земны́х и малоду́шных на́с не оставля́ющая; ра́дуйся, печа́ль жите́йскую от серде́ц на́ших прогоня́ющая.

Ра́дуйся безро́дных сиро́т заступа́ющая Свои́м покро́вом и благода́тно сохраня́ющая; ра́дуйся, ра́йскою ра́достию ду́ши на́ша озаря́ющая.

Ра́дуйся, Влады́чице ми́ра, ико́ною Твое́ю Песча́нскою се́рдца на́ша утеша́ющая.

Конда́к 6.

Я́ко Боготе́чную звезду́ изю́мстии лю́дие ико́ну Твою́ от ру́к святи́теля восприе́мше, потща́шася но́вый хра́м Бо́гу устро́ити. И бы́сть между́ созда́тельми его́ ра́спря на вре́мя не́кое; из загро́бнаго же ми́ра уме́ршая жена́ боля́рина не́коего бога́таго, три́щи явля́ющися му́жу своему́ в со́нном виде́нии, повеле́ ему́ оста́вити ску́пость свою́, ея́же ра́ди поги́бель души́ его́ бы́сть, и сооруди́ти хра́м на бога́тство свое́. О́н же, со стра́хом прии́м вразумле́ние свы́ше, созда́ хра́м в че́сть Вознесе́ния Сы́на Твоего́, Пречи́стая, и в весе́лии се́рдца возопи́ Бо́гу: Аллилу́иа.

И́кос 6.

Возсия́ ико́на Твоя́ чудотво́рная, Богома́ти, егда́ принесе́на бы́сть в новосозда́нный хра́м. Лю́дие ве́рнии стека́хуся со все́х стра́н от жили́щ свои́х и наполня́ху не то́кмо хра́м, но и огра́ду, и в ра́дости духо́вной взыва́ху Ти́ си́це:

Ра́дуйся, пе́рвейшая помо́щнице в созда́нии хра́ма на́шего; ра́дуйся, обогати́вшая о́ный ико́ною Твое́ю чудотво́рною.

Ра́дуйся, поклоне́ния на́ша прие́млющая; ра́дуйся, тве́рдое основа́ние упова́ния на́шего.

Ра́дуйся, гра́д на́ш покро́вом Твои́м при́сно покрыва́ющая; ра́дуйся, неусы́пная Попечи́тельнице на́ша.

Ра́дуйся, Богома́тернею любо́вию на́с согрева́ющая; ра́дуйся, на вся́кий ча́с в моли́твах на́с прие́млющая.

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

Конда́к 7.

Бы́сть не́кий учи́тель во гра́де Изю́ме, у него́же младе́нцы еди́н по еди́ному умира́ху. Егда́ же после́дний бы́сть одержи́м боле́знию ве́лией, взе́мше роди́тели его́ и несо́ша к ико́не Твое́й, Богома́ти, иму́ще еди́ну наде́жду на Тя́. Еще́ же на пути́ и́м су́щу, коне́ц пости́же младе́нца сего́. Роди́тели же его́, иму́ще вели́кую ве́ру Тебе́, Пречи́стая, положи́ша младе́нца уме́ршаго пред ико́ною Твое́ю. Во вре́мя же пе́ния моле́бнаго нача́ша со слеза́ми и во́плем го́рьким взыва́ти: Ма́ти Бо́жия, помози́ на́м, спаси́ ча́до на́ше. Ты́ же, Всеми́лостивая, ви́дящи тве́рдую ве́ру и́х и упова́ние на Тя́, возврати́ла жи́знь младе́нцу. Тогда́ же и лю́дие, о́крест стоя́щии, в ра́дости неизрече́нней прославля́ху Тя́, Пречи́стая, и Вседержи́теля Го́спода хваля́ху пе́снию: Аллилу́иа.

И́кос 7.

Но́вое показа́ чу́до Цари́ца Небе́сная, егда́ во вре́мя пе́ния «О Всепе́тая Ма́ти» воскре́сшему младе́нцу уста́ отве́рзе и повеле́ ему́ гла́сом возда́ти хвалу́ Тебе́. Вси́ же, зря́ще зна́мение сие́, во умиле́нии серде́чнем возопи́ша Тебе́ та́ко:

Ра́дуйся, уме́рших оживле́ние; ра́дуйся, рыда́ющих роди́телей увеселе́ние.

Ра́дуйся, чудеса́ми от ико́ны Твоея́ к Себе́ призыва́ющая; ра́дуйся, безнаде́жных Наде́ждо кре́пкая.

Ра́дуйся, Пода́тельнице утеше́ния уныва́ющим; ра́дуйся, в ско́рбех су́щих прие́млющая.

Ра́дуйся, у Сы́на Твоего́ и Бо́га на́шего вся́ких бла́г на́м испроша́ющая; ра́дуйся, всю́ жи́знь на́шу земну́ю во бла́го на́м устроя́ющая.

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

Конда́к 8.

Хотя́щи яви́ти ко все́м притека́ющим милосе́рдие Свое́, вразуми́ла еси́ служи́теля Олтаря́ Госпо́дня, и́же во искуше́ние впаде́ от врага́ ро́да челове́ческаго и за́вистию му́чимь, дерзну́ запрети́ти моле́бное пе́ние Цари́це Небе́сней пред ико́ною Ея́, порази́ла еси́ того́ боле́знею. Егда́ же принесо́ша его́ на одре́ и положи́ша пред чудотво́рным о́бразом Твои́м, нача́ моли́ти Тя́: Ма́ти Милосе́рдная, прости́ ожесточе́ние се́рдца моего́ и воздви́гни мя́ от одра́ боле́зни. По сконча́нии же пе́ния моле́бнаго, исцеле́ние восчу́вствовав, воста́в, облобыза́ честны́й о́браз, со слеза́ми благода́рне вопия́ Бо́гу: Аллилу́иа.

И́кос 8.

Вся́ бы́вши горе́, и земны́х не оставля́еши, о Всеблага́я и Всеми́лостивая Ма́ти Бо́жия: Ты́, я́коже и Сы́н Тво́й, не хо́щеши сме́рти гре́шника, но е́же обрати́тися и жи́ву ему́ бы́ти. За такову́ю Твою́ ми́лость взыва́ем вси́ Тебе́:

Ра́дуйся, иере́ев Бо́жиих вразумле́ние; ра́дуйся, вре́менно наказу́ющая и ве́чно ми́лующая.

Ра́дуйся, в боле́знех су́щих к Себе́ призыва́ющая; ра́дуйся, и́стинному покая́нию науча́ющая.

Ра́дуйся, неусыпа́ющая Моли́твеннице и Хода́таице на́ша пред Престо́лом Бо́жиим; ра́дуйся, наде́жду иму́щих на Тя́ никогда́же посрамля́ющая.

Ра́дуйся, разсла́бленным те́лом и ду́хом ско́рое врачева́ние подава́ющая; ра́дуйся, во вся́кой беде́ и ну́жде на́с не оставля́ющая.

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

Конда́к 9.

Вся́кое естество́ а́нгельское удиви́ся о неопису́емом мо́ри чуде́с, излива́емом от ико́н Твои́х, Богоро́дице: Тебе́ ублажа́ют вси́ ро́ди, Тебе́ велича́ют вся́ Небе́сныя Си́лы, и мы́, земноро́днии, Тебе́, еди́ну отра́ду и утеше́ние в жи́зни се́й вре́менней, прославля́юще, о Тебе́ Сы́ну Твоему́ вопие́м: Аллилу́иа.

И́кос 9

Вети́и многовеща́ннии яви́шася лю́дие, обре́тше по́мощь в вели́цем озлобле́нии свое́м, егда́ за беззако́ния и́х попусти́ Госпо́дь вели́цей боле́зни во гра́де Изю́ме бы́ти и во все́х ве́сех его́, и мно́жество люде́й погибо́ша. Стра́х же нападе́ на вся́к во́зраст. Те́мже лю́дие, взе́мше Пречи́стый о́браз Тво́й, несо́ша его́ освяще́ния ра́ди у́лиц и домо́в, с моли́твою сле́зною взыва́юще: О Всеблага́я Цели́тельнице, спаси́ на́с от сме́рти лю́тыя. Ты́ же, Всеми́лостивая, укроти́ла бу́рю сме́ртную, лю́ди же научи́ла еси́ благода́рственно воспева́ти Бо́гу сла́ву подоба́ющую, Тебе́ же Само́й взыва́ти си́це:

Ра́дуйся, сле́зы на́ша изсуша́ющая; ра́дуйся, бе́здно врачева́ний неистощи́мая.

Ра́дуйся, ра́дость в хра́мины на́ша принося́щая; ра́дуйся, роди́телей ми́лующая и дете́й сохраня́ющая.

Ра́дуйся, весе́лие ве́чное на́м уготовля́ющая; ра́дуйся, с на́ми при́сно су́щая.

Ра́дуйся, в земно́м уде́ле на́с не оставля́ющая; ра́дуйся, к небе́сному насле́дию на́с руково́дствующая.

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

Конда́к 10.

Спасти́ хотя́щи лю́ди Своя́ от зо́л мно́гих, дарова́ла еси́ ико́ну Твою́, Влады́чице, слепы́м в прозре́ние, хромы́м в хожде́ние, разсла́бленным в воста́ние, бесну́ющимся в исцеле́ние, го́рдым в смире́ние, нераска́янным в покая́ние, все́м коего́ждо неду́га исцеле́ние, зо́л и скорбе́й, и боле́зней отгна́ние, градо́в утвержде́ние, земли́ плодоно́сие, за ня́же никто́же от земноро́дных возмо́жет восхвали́ти Тя́ по достоя́нию, по вели́честву ми́лости Твоея́ к ро́ду челове́ческому. Мы́ же, любо́вию понужда́еми, дерза́ем взыва́ти Бо́гу, усынови́вшему на́с Тебе́ при Кресте́ Свое́м и дарова́вшему на́м такову́ю Путеводи́тельницу на Не́бо: Аллилу́иа.

И́кос 10.

Стена́ еси́ все́м прибега́ющим к Тебе́, Де́во, всегда́ явля́ешися, и почита́телю ико́ны Твоея́ Игна́тию, име́вшему благо́е наме́рение посети́ти святы́й гра́д Иерусали́м и Святу́ю Зе́млю, ю́же освяти́ Госпо́дь стопа́ми Свои́ми, Помо́щница еси́ яви́лася, егда́ то́й, па́д пред о́бразом Твои́м, проша́ше на пу́ть благослове́ния и по́мощи Твоея́. Ты́ же, Всеще́драя, неотло́жно чрез рабу́ не́кую зла́та дово́льно подала́ еси́ ему́, да испо́лнит благо́е жела́ние свое́. О́н же умиле́нною душе́ю вознесе́ Тебе́ благода́рственное хвале́ние сицево́е:

Ра́дуйся, до́брая наме́рения благословля́ющая; ра́дуйся, на пу́ть к Ца́рствию Небе́сному на́с наставля́ющая.

Ра́дуйся, спаси́тельною и́стиною на́с вразумля́ющая; ра́дуйся, к благоче́стию и целому́дрию жи́знь на́шу направля́ющая.

Ра́дуйся, на опа́сных путе́х на́с охраня́ющая; ра́дуйся, от собла́знов ми́ра сего́ му́дро отводя́щая.

Ра́дуйся, от поги́бельнаго пути́ сохраня́ющая; ра́дуйся, посеща́ющих свята́я места́ оби́льно благословля́ющая.

Ра́дуйся, Влады́чице ми́ра, ико́ною Твое́ю Песча́нскою се́рдца на́ша утеша́ющая.

Конда́к 11.

Пе́ние хвалебноблагода́рственное принося́ще Тебе́, Влады́чице, ве́мы, какову́ю ско́рбь прино́сим гре́шнии Сы́ну Твоему́ отсту́пствы свои́ми, малове́рием, суеве́рием и про́чим злове́рием. Моли́ти у́бо Тебе́, Всеми́лостивая, не престае́м: Свои́м предста́тельством и хода́тайством пред Престо́лом Бо́жиим сохрани́ на́с в ло́не Святе́й Собо́рней и Апо́стольстей Це́ркви, да бу́дем вси́ еди́но, я́коже Оте́ц, Сы́н и Святы́й Ду́х. Да в еди́нстве ве́ры воспева́ем Бо́гу: Аллилу́иа.

И́кос 11.

Я́ко светоприе́мную свещу́ яви́ла еси́, Влады́чице, ико́ну Твою́ во гра́де се́м Изю́ме, исто́чник благода́тныя воды́ откры́ла еси́ бли́з хра́ма Сы́на Твоего́, иде́же ико́на Твоя́ чудотво́рная Песча́нская пребыва́ет, слепорожде́нному младе́нцу прозре́ние от нея́ дарова́ла еси́, за е́же лю́дие от вре́мене того́ почерпа́ют благи́й да́р се́й на по́льзу душе́вную и теле́сную. Тебе́ же Само́й, Влады́чице, от усе́рдия своего́ взыва́ют:

Ра́дуйся, жи́зни на́шея укрепле́ние; ра́дуйся, водо́ю свято́ю не́мощи на́ша врачу́ющая.

Ра́дуйся, поче́рплющим ея́ си́лы обновля́ющая; ра́дуйся, беззако́ния на́ша истребля́ющая.

Ра́дуйся, с ве́рою прие́млющим исцеле́ние неду́гов подава́ющая; ра́дуйся, неистощи́мый кла́дезю сокро́вищ духо́вных.

Ра́дуйся, скве́рну нечистоты́ на́шея умыва́ющая; ра́дуйся, чудотво́рною си́лою водны́й исто́чник доны́не сохраня́ющая.

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

Конда́к 12.

Благода́ть исхо́дит всегда́, Пречи́стая, от ико́ны Твоея́ Песча́нския: я́ко непобеди́мая Воево́да на враги́ на́ша, ви́димыя и неви́димыя, нечи́стыя ду́хи прогоня́еши, вражду́ющия ми́ром и любо́вию умудря́еши, непоко́рныя наказу́еши, раздо́ры семе́йныя соу́зом любве́ связу́еши, неве́дущия и неве́рующия на пу́ть и́стинный наставля́еши; мы́ же, прославля́юще Тя́, Всеблагу́ю Помо́щницу в жи́зни на́шей, благода́рне воспева́ем Бо́гу: Аллилу́иа.

И́кос 12.

Пое́м Твое́ из дре́вних време́н ди́вное защище́ние Оте́чества на́шего, егда́ постиго́ша его́ гла́ды и мо́ры, о́гнь и опустоше́ние, наше́ствия иноплеме́нных и междоусо́бныя бра́ни. У Тебе́, Влады́чице, отцы́ и ма́тери, и ма́лая де́ти со слеза́ми по́мощи проша́ху, Ты́ же, Всеблага́я, спасе́ние дарова́ла еси́ неотло́жно, покрыва́ющи омофо́ром Твои́м Оте́чество на́ше. Мы́ же Тебе́, Изба́вительнице на́шей, вопие́м сие́ благодаре́ние и похвалы́ сицева́я:

Ра́дуйся, правове́рных ве́рная Храни́тельнице; ра́дуйся, пра́выя бра́ни Спобо́рнице.

Ра́дуйся, христиа́нских оби́телей и все́х святы́нь Храни́тельнице; ра́дуйся, о Оте́честве на́шем пред Бо́гом Моли́твеннице.

Ра́дуйся, Оте́чества на́шего Небе́снаго Зижди́тельнице; ра́дуйся, во времена́ наше́ствия инове́рных на́ша Свободи́тельнице.

Ра́дуйся, во вре́мя гла́да на́ша Корми́тельнице; ра́дуйся, во вре́мя бе́дствий на́с не оставля́ющая.

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

Конда́к 13.

О Всепе́тая Ма́ти, приими́ от на́с благода́рное пе́ние сие́, Тебе́ возноси́мое. Бу́ди на́м в жи́зни се́й Хода́таица пред Бо́гом о Жи́зни Ве́чной, да вы́ну благода́рно восхваля́ем Тя́ и Бо́гу пое́м: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом предста́телем наче́нши, восхваля́ет Тя́, Ма́терь Бо́жию, вселе́нная вся́, я́ко Ты́ еси́ све́т просвеще́ния ра́зума на́шего, Ты́ посре́дница на́ша между́ на́ми и Бо́гом, Твоя́ Ма́терния моли́твы мно́го мо́гут пред Престо́лом Вседержи́теля, Ты́ десни́цею Свое́ю приво́диши на́с от земли́ к Небеси́, Ты́ неизглаго́ланное и непостижи́мое спасе́ния на́шего сокро́вище, и сего́ ра́ди не ве́мы, гре́шнии, ки́ими похвала́ми воспе́ти благода́рная Тебе́; приими́ же от благи́х серде́ц велича́ния сия́:

Ра́дуйся, в ра́йской сла́дости всегда́ пребыва́ющая; ра́дуйся, таковы́я ра́дости все́м жела́ющая.

Ра́дуйся, лю́бящих Сы́на Твоего́ ча́да Своя́ имену́ющая; ра́дуйся, милосе́рдия Бо́жия на́м хода́таице.

Ра́дуйся, о продле́нии жи́зни на земли́ Сы́на Своего́ умоля́ющая; ра́дуйся, за уме́рших все́х без покая́ния вы́ну скорбя́щая.

Ра́дуйся, со А́нгелом храни́телем Храни́тельнице на́ша усе́рдная; ра́дуйся, на Стра́шнем Суде́ Сы́на Твоего́ еди́на наде́ждо спасе́ния на́шего.

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

Конда́к 1.

Взбра́нная Воево́до, всего́ ми́ра уте́шительнице и наде́ждо спасе́ния ро́да христиа́нскаго, к Тебе́ припа́даем во вся́ дни́ жи́зни на́шея, я́ко к исто́чнику все́х духо́вных дарова́ний, и мо́лим Тя́: услы́ши на́с, вопию́щих к Тебе́ в часы́ дневны́я и нощны́я, в боле́знех и ско́рбех, в ну́ждах и напа́стех, всегда́ в ра́дости зову́щих:

Ра́дуйся, Влады́чице ми́ра, ико́ною Твое́ю Песча́нскою сердца́ на́ша утеша́ющая.

Моли́тва.

О преми́лостивая и премилосе́рдая Ма́ти Бо́жия, Покрови́тельнице держа́вы на́шея, ку́пно же и о все́м ми́ре Моли́твеннице, приими́ се́рдца на́шего воздыха́ния, и услы́ши коленопреклоне́нныя моли́твы, во умиле́нии ду́ш на́ших Тебе́ возсыла́емыя, я́коже издре́вле принима́ла еси́ моли́твы лю́бящих ду́ш зде́, пред ико́ною Твое́ю возноси́мыя. Помози́ на́м в побежде́нии пре́лестей и собла́знов ми́ра сего́, не попусти́ на́м отве́рженным бы́ти ве́чнаго Небе́снаго блаже́нства. Ты́ Еди́на на́ша ра́дость и утеше́ние в жи́зни се́й вре́менней, Ты́ на́ша наде́жда и в Жи́зни Ве́чней. Ве́руем, я́ко Ты́ Свое́ю Ма́тернею любо́вию и снисхожде́нием удосто́иши на́с вожделе́ннаго Ца́рствия Сы́на Твоего́. Тебе́ у́бо про́сим: не отступа́й от на́с, Всеблага́я, защища́й от все́х ко́зней вра́жиих, не попусти́ на́м чрез грехи́ на́ша лиши́тися милосе́рдия Бо́жия, изжени́ из на́с ле́ность в моли́тве и посеще́нии хра́ма Бо́жия. Изба́ви на́с от малоду́шия, уны́ния, вражды́, гне́ва, подозре́ния, за́висти, клеветы́, не́нависти и го́рдости бесо́вския. Вразуми́ попра́вших за́поведи Це́ркве Христо́вы. Сро́дником на́шим да́руй ми́р и любо́вь, да согла́сно поживу́т роди́тели и де́ти. Да бу́дет в стране́ на́шей пра́вда Бо́жия, да сохраня́тся в наро́де на́шем благочести́вии обы́чаи. Вознеси́, о Всеблага́я, усе́рдныя моли́твы пред Бо́гом о всего́ ми́ра умире́нии, да не поги́бнет ро́д людски́й в пла́мени опустоше́ния всеми́рнаго, да позна́ют вси́ наро́ди Отца́ Своего́ Небе́снаго и Тя́, Ма́терь Бо́жию, Засту́пницу ро́да христиа́нскаго. Приведи́ вся́ наро́ды к и́стинному покая́нию и жи́зни грехо́вныя исправле́нию, да не осу́димся в де́нь Стра́шнаго Суда́ Бо́жия, но да сподо́бит на́с Госпо́дь ве́чныя ра́дости в Небе́сных селе́ниих, Ему́же подоба́ет вся́кая сла́ва, че́сть и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.