Конда́к 1.

Избра́нней от все́х родо́в Помо́щнице ро́да христиа́нскаго, к богоуго́дней жи́зни ражда́ющей, благода́рственная пе́ния прино́сим Ти́, Богоро́дице, о дарова́нии чу́дныя ико́ны Твоея́. Ты́ же, я́ко ско́рая и всеми́лостивая ве́рных Засту́пнице, не оста́ви на́с в ско́рбех, да зове́м Ти́:

Ра́дуйся, Помо́щнице в ро́дах, ча́д Свои́х к Царю́ сла́вы приводя́щая.

И́кос 1.

А́нгел предста́тель по́слан бы́сть рещи́ Богоро́дице: Ра́дуйся,— егда́ Бо́г Сло́во воплоща́шеся во утро́бе Ея́; и мы́, гре́шнии, дивя́щеся Свято́му Рождеству́, пред ико́ною чу́дною Твое́ю с ве́рою и наде́ждою вопие́м Ти́:

Ра́дуйся, ра́дость Христо́ва Рождества́ позна́вшая; ра́дуйся, Сы́на Све́та на́м дарова́вшая.

Ра́дуйся, ско́рби гоне́ний с Плодо́м во чре́ве претерпе́вшая; ра́дуйся, в по́двигах матери́нских на земли́ преуспе́вшая.

Ра́дуйся, ско́рби ро́дов в ра́дость претворя́ющая; ра́дуйся, Твое́ю любо́вию на́с для Не́ба созида́ющая.

Ра́дуйся, по́двигом жития́ Твоего́ на́с просвети́вшая; ра́дуйся, чу́дными ро́дами ве́сь ми́р удиви́вшая.

Ра́дуйся, Помо́щнице в ро́дах, ча́д свои́х к Царю́ сла́вы приводя́щая.

Конда́к 2.

Ви́дящи, Всенепоро́чная, во сла́ве Сы́на Твоего́ пред на́ми пребыва́ющая, ско́рби ве́рных рабо́в Твои́х, я́же гне́внаго ра́ди Бо́жия вразумле́ния посыла́емыя, благоволи́ла еси́ яви́ти ико́ну Твою́, чудесы́ ю́ прославля́ющи, да, покрыва́емии Твое́ю любо́вию, с наде́ждою вопие́м Бо́гу: Аллилу́иа.

И́кос 2.

Жизнода́теля ро́ждшая, Пресвята́я Богоро́дице, благода́тное попече́ние жена́м в ро́дах утверди́ла еси́, ра́зуму на́шему просвеще́ние свы́ше исхода́тайствовала еси́, да позна́ем, что́ е́сть во́ля Бо́жия блага́я, уго́дная и соверше́нная. Мы́ же, дивя́щеся свы́ше благода́тному укрепле́нию со слеза́ми ра́дости вопие́м Ти́:

Ра́дуйся, от грехо́в на́с отвраща́ющая; ра́дуйся, тру́дную до́лю же́н облегча́ющая.

Ра́дуйся, сердца́ на́ша любо́вию Твое́ю умягча́ющая; ра́дуйся, моли́твами Твои́ми Сы́на на́м в по́мощь призыва́ющая.

Ра́дуйся, Рождество́ Сы́на Твоего́ никогда́ не забыва́ющая; ра́дуйся, в ро́дах же́н христиа́нских не оставля́ющая.

Ра́дуйся, в духо́вном рожде́нии все́х благословля́ющая; ра́дуйся, в све́т Сы́на Твоего́ неизме́нно призыва́ющая.

Ра́дуйся, Помо́щнице в ро́дах, ча́д свои́х к Царю́ сла́вы приводя́щая.

Конда́к 3.

Си́ла Вы́шняго благода́тию Богома́тере зе́млю Ру́сскую освяща́ет, ча́д духо́вных Свои́х измла́да любо́вию умудря́ющи и во́инов Христо́вых к чистоте́ Правосла́вия непреста́нно призыва́ющи; мы́ же с ве́рою прибега́ем ко Го́споду, пред ико́ною Твое́ю, Богоро́дице, вопие́м Ему́: Аллилу́иа.

И́кос 3.

И́мамы Тя́, Засту́пнице усе́рдная ро́да христиа́нскаго, я́ко Ма́терь, ча́д Твои́х покая́нию и смире́нию науча́ющую, то́ки чуде́с на́м во укрепле́ние от пречестны́я ико́ны Твоея́ ми́лостиво источа́ющую, благода́тию от Бо́га во спасе́ние все́х на́с осеня́ющую. Сего́ ра́ди зове́м Ти́ си́це:

Ра́дуйся, явле́нием ико́ны Твоея́ мглу́ лю́тых обстоя́ний отгоня́ющая; ра́дуйся, во святе́й Руси́ ве́рных ча́д правосла́вною ве́рою окрыля́ющая.

Ра́дуйся, бо́ли при ро́дах благода́тию Свята́го Ду́ха ослабля́ющая; ра́дуйся, любо́вь Твою́ всегда́ на́м источа́ющая.

Ра́дуйся, в ско́рбех мно́гим жена́м прозре́ние; ра́дуйся, да́рующая лю́бящим Сы́на Твоего́ моли́твенное попече́ние.

Ра́дуйся, сердца́ на́ша ра́достию ро́дов умягча́ющая; ра́дуйся, в свя́тость и чистоту́ де́тства на́с возвраща́ющая.

Ра́дуйся, Помо́щнице в ро́дах, ча́д Свои́х к Царю́ сла́вы приводя́щая.

Конда́к 4.

Бу́рю лю́тых смяте́ний в стране́ на́шей воздви́гнутых врага́ми Це́ркви, Пресвята́я Де́во, укроща́еши, ча́д Твои́х заблу́ждших в покая́нии умудря́еши, ду́ши же́н во́инов Христо́вых в ро́дах наде́ждою све́тлою укрепля́еши, науча́я те́м лю́ди Твоя́ благода́рственно пе́ти Бо́гу: Аллилу́иа.

И́кос 4.

Слы́шавше правосла́внии лю́дие сокрове́нную та́йну, я́ко предста́тельством Твои́м, Богоро́дице, су́д о Оте́честве на́шем преложе́н на ми́лость, и дивя́щеся свы́ше благода́тному Твоему́ попече́нию, благогове́йно вопие́м Ти́ си́це:

Ра́дуйся, на́ша семьи́ от уны́ния избавля́ющая; ра́дуйся, благода́тным Твои́м покро́вом младе́нцы осеня́ющая.

Ра́дуйся, ско́рби ра́ди покры́тия грехо́в на́м попуска́ющая; ра́дуйся, ча́д на́ших в свя́тости охраня́ющая.

Ра́дуйся, ю́ность на́шу све́том и́стины просвеща́ющая; ра́дуйся, супру́жества венча́нныя пред Бо́гом с любо́вию храня́щая.

Ра́дуйся, к Та́инству венча́ния супру́ги призыва́ющая; ра́дуйся, от блуда́ сме́ртнаго все́х ве́рных предостерега́ющая.

Ра́дуйся, Помо́щнице в ро́дах, ча́д Свои́х к Царю́ сла́вы приводя́щая.

Конда́к 5.

Боготе́чная звезда́ яви́ся на́м, Богоро́дице, честна́я Твоя́ ико́на, все́х скорбя́щих в ро́дах же́н луча́ми чуде́с Твои́х осиява́ющая, блужда́ющих в духо́внем мра́це к све́ту Сы́на Твоего́ призыва́ющая, в грехо́вных страсте́х утопа́ющих в благода́тный ми́р ми́лостию Бо́га Отца́ облека́ющая и на пу́ть спасе́ния утеше́нием Свята́го Ду́ха наставля́ющая. Мы́ же, ве́рою обре́тше ра́дости сия́, вопие́м к Бо́гу: Аллилу́иа.

И́кос 5.

Слы́шавше правосла́внии лю́дие, я́ко святу́ю ико́ну Твою́, Богоро́дице, Госпо́дь мно́гими чудесы́ прославля́ет: ско́рби же́н христиа́нских в ро́дах облегча́ет, сердца́ оте́ц и ма́терей во сла́ву Бо́жию ра́достию наполня́ет,— я́ко освяще́ние, я́ко щи́т и вспоможе́ние почита́ют ю́. Сего́ ра́ди вопие́м Ти́ си́це:

Ра́дуйся, жили́ще и до́ме Христа́ Бо́га на́шего; ра́дуйся, спасе́ние ру́сскаго наро́да, в отчужде́ние от Бо́га ду́хом впа́вшаго.

Ра́дуйся, христиа́н непобеди́мая Храни́тельнице; ра́дуйся, Искупи́теля грехо́в на́ших ро́ждшая.

Ра́дуйся, благода́тней наде́ждой сердца́ же́н в ро́дах наполня́ющая; ра́дуйся, к духо́вному рожде́нию в Та́инстве Креще́ния неуста́нно призыва́ющая.

Ра́дуйся, доброде́телей вели́кое стяжа́ние; ра́дуйся, Бо́жие к немощны́м благоволе́ние.

Ра́дуйся, Помо́щнице в ро́дах, ча́д Свои́х к Царю́ сла́вы приводя́щая.

Конда́к 6.

Пред пречи́стым Твои́м о́бразом пропове́даем, Госпоже́ Богоро́дице, вели́кия Твоя́ ми́лости, я́ко семьи́ христиа́н огражда́еши, це́ркви дома́шния благода́тию Свята́го Ду́ха покрыва́еши, же́н со ча́ды защища́еши, и, ве́дуще Тя́ вои́стину Помо́щницу непобеди́му, прино́сим Ти́ славосло́вия сия́ и ра́достно вопие́м Бо́гу: Аллилу́иа.

И́кос 6.

Возсия́вши просвеще́ние и́стинное, Пречи́стая Богоро́дице, яви́ся чу́дная ико́на Твоя́, роди́телем на утеше́ние, разсе́янным се́мьям в возсоедине́ние, возстаю́щим на Го́спода неве́рием в предупрежде́ние, все́м на́м во укрепле́ние и ве́чное блаже́нство во Христе́, Го́сподом дарова́нное искупле́нием. Мы́ же, дивя́щеся о на́с попече́нию, благода́рно вопие́м Ти́:

Ра́дуйся, от внеза́пныя сме́рти на́с избавля́ющая; ра́дуйся, мра́чных духо́в свя́тостию Твое́ю отгоня́ющая.

Ра́дуйся, покро́вом Твои́м на́с осеня́ющая; ра́дуйся, и́стинно на́с моли́тися науча́ющая.

Ра́дуйся, к долготерпе́нию в ско́рбех и неду́зех на́с приклоня́ющая; ра́дуйся, богоно́снеи ру́це Твои́ за на́с, гре́шных, к Сы́ну в моли́тве непреста́нно вознося́щая.

Ра́дуйся, николи́же ве́рных Сы́ну Твоему́ заступле́нием не оставля́ющая; ра́дуйся, немощны́х благода́тным Покро́вом Твои́м покрыва́ющая.

Ра́дуйся, Помо́щнице в ро́дах, ча́д Свои́х к Царю́ сла́вы приводя́щая.

Конда́к 7.

Хотя́й все́м челове́ком спасти́ся и во и́стине просвети́тися, Премилосе́рдый Госпо́дь, усынови́ на́с Ма́тери Свое́й и дарова́ Ю́ жена́м христиа́нским в ро́дах в поможе́ние, ча́дом на́шим в благода́тное Небе́сное окормле́ние. Мы́ же, обре́тше от Бо́га ра́дости сия́, со слеза́ми вопие́м Вседержи́телю: Аллилу́иа.

И́кос 7.

Но́ву показа́ ми́лость все́х Творе́ц и Влады́ка на́ш Госпо́дь, егда́ положи́ во гне́ве Свое́м за гре́х наказа́ти ро́д челове́ческий и рече́ жене́ Ада́ма: В боле́знех роди́ши ча́да твоя́,— я́ко сотвори́ сие́ для мно́гих челове́ков ко вразумле́нию спасе́ния ра́ди ду́ш и́х. Сего́ ра́ди и мы́, Влады́чице, припа́дающе к пречи́стому о́бразу Твоему́, усе́рдно мо́лим Тя́: милосе́рдия две́ри отве́рзи на́м, вопию́щим Ти́ си́це:

Ра́дуйся, непристу́пнаго Божества́ селе́ние; ра́дуйся, А́нгельское и на́ше непреста́нное удивле́ние.

Ра́дуйся, Бо́жия ми́лости и любве́ исполне́ние; ра́дуйся, Пода́тельнице спаси́тельнаго в ро́дах вспоможе́ния.

Ра́дуйся, пра́вды святы́я Попечи́тельнице; ра́дуйся, любве́ и добро́ты непоколеби́мая Храни́тельнице.

Ра́дуйся, в го́рдости закосне́вших заступле́ния Твоего́ лиша́ющая; ра́дуйся, от креще́ных младе́нцев ра́достный взо́р Тво́й не отвраща́ющая.

Ра́дуйся, Помо́щнице в ро́дах, ча́д Свои́х к Царю́ сла́вы приводя́щая.

Конда́к 8.

Стра́нно малове́рующим слы́шати, ка́ко о́браз Тво́й святы́й то́ки благода́ти источа́ет, гре́шным, в покая́нии к Тебе́ прише́дшим, ра́дость да́рит, исцеле́нием скорбя́щих и боля́щих же́н в ро́дах Бо́га прославля́ет, мы́ же с ве́рою покланя́емся Тебе́: о́браз бо че́стию к первоо́бразу восхо́дит, и, всеме́рно прославля́юще Тя́, с ра́достию пое́м Бо́гу: Аллилу́иа.

И́кос 8.

Вся́ еси́ горе́ и земны́х не оставля́вши, Пресвята́я Богоро́дице, у́зы страсте́й благода́тным попече́нием ослабля́еши, в покая́нии притека́ющим к Тебе́ предста́тельством пред Бо́гом очища́еши, искупле́нием Христо́вым сердца́ на́ша преобража́еши. Сего́ ра́ди, велича́юще, воспева́ем Ти́ та́ко:

Ра́дуйся, чрез покая́ние к Бо́гу, приводя́щая; ра́дуйся, покая́нием на́шим две́ри ра́йския отверза́ющая.

Ра́дуйся, роди́тельским покая́нием от ча́д боле́зни отвраща́ющая; ра́дуйся, покая́нием ми́р духо́вный в се́мьях ве́рных утвержда́ющая.

Ра́дуйся, покая́нием бесо́вския разла́ды в се́мьях угаша́ющая; ра́дуйся, покая́нием церко́вным со Христо́м на́с вно́вь соединя́ющая.

Ра́дуйся, в покая́нии приходя́щих преобража́ющая; ра́дуйся, чрез покая́ние заступле́нием Твои́м пред Сы́ном спаса́ющая.

Ра́дуйся, Помо́щнице в ро́дах, ча́д Свои́х к Царю́ сла́вы приводя́щая.

Конда́к 9.

Вся́каго естества́ а́нгельскаго превы́сшая яви́лася еси́, Пресвята́я Де́во, Бо́га бо зачала́ еси́ пло́тию, Го́спода во утро́бе Твое́й вмести́ла еси́, те́мже я́ко Святе́йшую и Сла́внейшую у Престо́ла Царя́ царе́й велича́юще Тя́, вопие́м о Тебе́ Бо́гу: Аллилу́иа.

И́кос 9.

Вити́йства боговеща́нных прорече́ний ны́не зри́м о Тебе́ сбы́вшаяся, Богоро́дице, я́ко вои́стину Бо́га пло́тию родила́ еси́ на́м. И бу́дущаго Ца́рствия Бо́жия не лиши́ на́с, Покро́вом Твои́м на́с от ко́зней ми́ра сего́ оберега́ющи. Мы́ же обетова́нное блаже́нство во Христе́ в моли́твах призыва́ем и в покая́нии вопие́м Ти́:

Ра́дуйся, тве́рдое Правосла́вия укрепле́ние; ра́дуйся, ду́ш на́ших ско́рое спасе́ние.

Ра́дуйся, отчужде́нных от Бо́га к ве́ре возрожде́ние; ра́дуйся, духо́вное на́ше прозре́ние.

Ра́дуйся, в чистоте́ Правосла́вия на́с оберега́ющая; ра́дуйся, от грехо́внаго паде́ния на́с изводя́щая.

Ра́дуйся, вопию́щих к Тебе́ ско́рое услы́шание; ра́дуйся, чадоро́дие благословля́ющая.

Ра́дуйся, Помо́щнице в ро́дах, ча́д Свои́х к Царю́ сла́вы приводя́щая.

Конда́к 10.

Спасти́ хотя́щи мно́гия жены́ в ро́дах от обдержа́щих и́х страсте́й и напа́стей, чу́дную ико́ну Твою́, Богома́ти, дарова́ла еси́, ея́же ра́ди ко́зни диа́вола утиха́ют, смертоно́сныя боле́зни исчеза́ют, бо́ли в ро́дах ослабева́ют, да вси́, ви́дяще явля́емую Тобо́ю ми́лость, вопию́т со умиле́нием Бо́гу: Аллилу́иа.

И́кос 10.

Стена́ еси́, Богоро́дице Де́во, Святе́й Руси́ и наро́ду ея́ огражде́ние, враго́в Правосла́вия обличе́ние, жена́м-ма́терем сугу́бое утеше́ние, ма́лым ча́дом благода́тное попече́ние. Те́мже, благодаря́ще Тя́, вопие́м Бо́гу:

Ра́дуйся, прославля́ющих Тя́ от бе́д избавля́ющая; ра́дуйся, позабы́вших Тя́ посрамля́ющая.

Ра́дуйся, правосла́вных ма́терей сла́во и попече́ние; ра́дуйся, сохраня́ющих целому́дрие ве́рное огражде́ние.

Ра́дуйся, спаси́тельный Еле́ю ка́ющихся; ра́дуйся, Цари́це Небе́сная все́х во Христе́ ражда́ющихся.

Ра́дуйся, ра́дости на́ша умножа́ющая; ра́дуйся, младе́нцев и ма́терей сугу́бою любо́вию Твое́й защища́ющая.

Ра́дуйся, Помо́щнице в ро́дах, ча́д Свои́х к Царю́ сла́вы приводя́щая.

Конда́к 11.

Пе́ние хвале́бное и благода́рственное прино́сим Ти́, Пресвята́я Влады́чице: под Покро́вом Твои́м в Правосла́вней Це́ркви по ми́лости Бо́жией ражда́емся, в благода́тном окормле́нии Твое́м неизме́нно умудря́емся, заступле́нием Твои́м во Христе́ искони́ спаса́емся, и возложи́вше на Тя́ упова́ние, ра́достно вопие́м Бо́гу: Аллилу́иа.

И́кос 11.

Светоприе́мная свеща́ и́стиннаго Све́та су́щим на́м на земли́ я́вльшися, ду́ши просвеща́еши, чту́щих Тя́ в ве́ре во спасе́ние наставля́еши, младе́нцев во утро́бах ма́терей охраня́еши, да пое́м Ти́ си́це:

Ра́дуйся, в рожде́нии ча́д ско́рби ослабля́ющая; ра́дуйся, грехи́ на́ша Твои́ми моли́твами к Сы́ну отпуска́ющая.

Ра́дуйся, во́ином Христо́вым же́н смире́нных посыла́ющая; ра́дуйся, непоро́чность отрокови́ц охраня́ющая.

Ра́дуйся, духо́вно все́х неви́димо окормля́ющая; ра́дуйся, Твое́ю любо́вию в беда́х на́с покрыва́ющая.

Ра́дуйся, от ху́льных мы́слей предостерега́ющая; ра́дуйся, от умерщвле́ния нероди́вшихся младе́нцев все́х отвраща́ющая.

Ра́дуйся, Помо́щнице в ро́дах, ча́д Свои́х к Царю́ сла́вы приводя́щая.

Конда́к 12

Благода́ть Небе́сныя сла́вы Твоея́ да́ти восхоте́вши почита́ющим Тя́ с любо́вию, Влады́чице, по ве́ре да́руеши чрез ико́ну Твою́ богообще́ние, зна́мения и чудеса́ исцеле́ния, от духо́вных скорбе́й избавле́ние. Мы́ же, ве́девше сокро́вища сия́, велегла́сно вопие́м к Бо́гу: Аллилу́иа.

И́кос 12.

Пою́ще Твоя́ чудеса́, бы́вшая в дре́вняя и настоя́щая времена́, хва́лим Тя́, Богоро́дице, ве́рным врата́ в жи́знь ве́чную моли́твами Твои́ми отверза́ющая, благода́тию Свята́го Ду́ха в земно́й жи́зни защища́ющая, ко Го́споду люде́й избра́нных Твое́ю любо́вию привлека́ющая; мы́ же, упова́ние по Бо́зе возлага́юще на Тя́, с покая́нием вопие́м си́це:

Ра́дуйся, отча́янных спасе́ние; ра́дуйся, погиба́ющих оживле́ние.

Ра́дуйся, от бе́д избавле́ние; ра́дуйся, духо́вныя ра́дости утвержде́ние.

Ра́дуйся, оби́димых Уте́шительнице; ра́дуйся, гони́мых Покрови́тельнице.

Ра́дуйся, в ма́лом ве́рных укрепля́ющая; ра́дуйся, возлюби́вших Го́спода окормля́ющая.

Ра́дуйся, Помо́щнице в ро́дах, ча́д Свои́х к Царю́ сла́вы приводя́щая.

Конда́к 13.

О Всепе́тая Ма́ти, Помо́щнице в ро́дах, ро́ждшая все́х святы́х Святе́йшее Сло́во, наде́ждо духо́внаго на́шего пробужде́ния и во все́м блага́го поспеше́ния, в ро́дах теле́сных, Благода́тная, жена́м правосла́вным утеше́ние, Ца́рствия Небе́снаго насле́дники все́х сотвори́, ве́рно вопию́щих Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел предста́тель по́слан бы́сть рещи́ Богоро́дице: Ра́дуйся,— егда́ Бо́г Сло́во воплоща́шеся во утро́бе Ея́; и мы́, гре́шнии, дивя́щеся Свято́му Рождеству́, пред ико́ною чу́дною Твое́ю с ве́рою и наде́ждою вопие́м Ти́:

Ра́дуйся, ра́дость Христо́ва Рождества́ позна́вшая; ра́дуйся, Сы́на Све́та на́м дарова́вшая.

Ра́дуйся, ско́рби гоне́ний с Плодо́м во чре́ве претерпе́вшая; ра́дуйся, в по́двигах матери́нских на земли́ преуспе́вшая.

Ра́дуйся, ско́рби ро́дов в ра́дость претворя́ющая; ра́дуйся, Твое́ю любо́вию на́с для Не́ба созида́ющая.

Ра́дуйся, по́двигом жития́ Твоего́ на́с просвети́вшая; ра́дуйся, чу́дными ро́дами ве́сь ми́р удиви́вшая.

Ра́дуйся, Помо́щнице в ро́дах, ча́д свои́х к Царю́ сла́вы приводя́щая.

Конда́к 1.

Избра́нней от все́х родо́в Помо́щнице ро́да христиа́нскаго, к богоуго́дней жи́зни ражда́ющей, благода́рственная пе́ния прино́сим Ти́, Богоро́дице, о дарова́нии чу́дныя ико́ны Твоея́. Ты́ же, я́ко ско́рая и всеми́лостивая ве́рных Засту́пнице, не оста́ви на́с в ско́рбех, да зове́м Ти́:

Ра́дуйся, Помо́щнице в ро́дах, ча́д Свои́х к Царю́ сла́вы приводя́щая.

Моли́тва пе́рвая.

Приими́, Госпоже́ Богороди́тельнице, сле́зная моле́ния рабо́в Твои́х, к Тебе́ притека́ющих. Зри́м Тя́ на святе́й ико́не во чре́ве нося́щую Сы́на Твоего́ и Бо́га на́шего, Го́спода Иису́са Христа́. А́ще и безболе́зненно родила́ еси́ Его́, оба́че ма́терния ско́рби ве́си и не́мощи сыно́в и дще́рей челове́ческих зри́ши. Те́мже те́пле припа́дающе к цельбоно́сному о́бразу Твоему́ и умиле́нно се́й лобыза́юще, мо́лим Тя́, Всеми́лостивая Влады́чице: на́с, гре́шных, осужде́нных в боле́знех роди́ти и в печа́лех пита́ти ча́да на́ша, ми́лостивно пощади́ и сострада́тельно заступи́. Младе́нцы же на́ша, та́кожде и роди́вшия и́х, от тя́жкаго неду́га и го́рькия ско́рби изба́ви; да́руй и́м здра́вие и благомо́щие, да и пита́емии от си́лы в си́лу возраста́ти бу́дут, и пита́ющия и́х испо́лнятся ра́достию и утеше́нием, я́ко да и ны́не предста́тельством Твои́м из у́ст младе́нец и ссу́щих Госпо́дь соверши́т хвалу́ Свою́.

О Ма́ти Сы́на Бо́жия! Умилосе́рдися на ма́тери сыно́в челове́ческих и на немощны́я лю́ди Твоя́: постига́ющия на́с боле́зни ско́ро исцели́, належа́щия на на́с ско́рби и печа́ли утоли́ и не пре́зри сле́з и воздыха́ний рабо́в Твои́х. Услы́ши на́с в де́нь ско́рби, пред ико́ною Твое́ю припа́дающих, и в де́нь ра́дости и избавле́ния приими́ благода́рная хвале́ния серде́ц на́ших. Вознеси́ мольбы́ на́ша ко Престо́лу Сы́на Твоего́ и Бо́га на́шего, да ми́лостив бу́дет ко грехо́м и не́мощем на́шим и проба́вит ми́лость Свою́ ве́дущим и́мя Его́, я́ко да и мы́, и ча́да на́ша, просла́вим Тя́, Милосе́рдную Засту́пницу и ве́рную Наде́жду ро́да на́шего, во ве́ки веко́в. Ами́нь.

Моли́тва втора́я.

О Пресвята́я Госпоже́ Влады́чице Богоро́дице, в земно́й жи́зни на́с не оставля́ющая! К кому́ моли́твы вознесу́, к кому́ сле́зы и воздыха́ния принесу́, а́ще не к Тебе́, все́х ве́рных утеше́ние! Со стра́хом, ве́рою, любо́вию, Ма́ти Живота́, молю́: да вразуми́т Госпо́дь лю́ди правосла́вныя во спасе́ние, да да́ст ражда́ти на́м ча́д Тебе́ и Сы́ну Твоему́ во благоугожде́ние, да соблюде́т на́с в чистоте́ смире́ния, в наде́жде о Христе́ спасе́ния, и да́рует на́м все́м, в покро́вех благода́ти Твоея́, земно́е утеше́ние. Храни́ на́с под се́нию ми́лости Твоея́, Пречи́стая, моля́щимся о ро́дах помози́, наве́тов злы́х свободи́, тя́жких бе́д, напа́стей и смерте́й отврати́. Да́ждь благода́тное прозре́ние, ду́х сокруше́ния о гресе́х, да́ждь зре́ти всю́ высоту́ и чистоту́ дарова́ннаго на́м Христо́ва уче́ния; храни́ на́с от поги́бельнаго отчужде́ния, да вси́, благода́рне воспева́юще вели́чия Твоя́, сподо́бимся Небе́снаго успокое́ния и та́мо с возлю́бленными Твои́ми, со все́ми святы́ми просла́вим в Тро́ице Еди́наго Бо́га: Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.