Конда́к 1.

Избра́нней от все́х родо́в Засту́пнице на́шей и Цари́це, покро́вом Своея́ бла́гости покрыва́ющей преде́лы земли́ Дальнеросси́йския, благода́рственная пе́ния прино́сим Ти́, раби́ Твои́, Богоро́дице. Ты́ же я́ко Всеми́лостивая Влады́чице, от вся́ких на́с бе́д спаси́ и ве́чных му́к свободи́, да ра́дующеся зове́м Ти́:

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

И́кос 1.

А́нгелов Творе́ц избра́ Тя́, Влады́чице, к благода́тному челове́ков спасе́нию и дарова́ Тя́, помо́щницу правосла́вным лю́дем, избавля́ющую на́с от хи́нских наше́ствий, от гла́да и вся́ких напа́стей и житие́ на́ше устроя́ющую во вся́ком благоче́стии и чистоте́. Те́мже и мы́ воспомина́юще таково́е о лю́дех Твое́ благопромышле́ние, со благодаре́нием вопие́м Ти́ си́це:

Ра́дуйся, непристу́пнаго Божества́ селе́ние; ра́дуйся, непреста́нное люде́й удивле́ние.

Ра́дуйся, достоя́нию Твоему́ по́мощь и заступле́ние; ра́дуйся, хода́таице на́шего спасе́ния.

Ра́дуйся, благода́тное от ну́жд избавле́ние; ра́дуйся, несокруши́мый щи́те во́инов на́ших.

Ра́дуйся, мечу́ и броне́ и́х неуязви́мая; ра́дуйся, враго́в пораже́ние и устраше́ние.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 2.

Ви́дящи Пресвята́я Влады́чице, ско́рби серде́чныя, му́ки душе́вныя и и́скреннее покая́ние люде́й Твои́х, благоволи́ла еси́ яви́ти ико́ну Твою́, в благослове́ние и зна́мение торжества́ христолюби́вому во́инству Да́льния Росси́и. Мы́ же к не́й припа́дающе с ве́рою и сокруше́нным се́рдцем, из глубины́ души́ вопие́м Бо́гу: Аллилу́иа.

И́кос 2.

Ра́зум небе́сный дарова́ся и́ноком и богомо́льцем земли́ Ки́евския, во е́же сооруди́ти ико́ну Пресвяты́я Богоро́дицы, и нарещи́ ю́ «По́рт-Арту́рскою», да яви́тся Дальнеросси́йская Врата́рница и Сора́тница христолюби́вому во́инству на́шему. Те́мже со умиле́нием вопие́м Ти́ такова́я:

Ра́дуйся, от гра́да Ки́ева прише́дшая к на́м в заступле́ние; ра́дуйся, правосла́вныя ве́ры утвержде́ние.

Ра́дуйся, почита́ния святы́х ико́н освяще́ние; ра́дуйся, хи́нскаго злове́рия обличе́ние.

Ра́дуйся, горды́ни и́х низложе́ние; ра́дуйся, ско́рбь на́шу в ра́дость претворя́ющая.

Ра́дуйся, де́монския полки́ побежда́ющая; ра́дуйся, несумне́нною наде́ждою на́с увеселя́ющая.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 3.

Си́ла Вы́шняго и благода́ть Влады́чицы укрепля́ше в виде́нии не́коего челове́ка и подви́же его́ к собира́нию сре́дств, во е́же написа́ти Ея́ Пречи́стый о́браз. И с ве́рою дерза́я о Го́споде, приступи́ к труду́ и исполня́я повеле́ние Богоро́дицы, обре́те подая́ния от вели́каго мно́жества и́ноков и богомо́льцев. И по́мощию Богома́тере, сооруди́ ико́ну и воззва́ к Бо́гу: Аллилу́иа.

И́кос 3.

Иму́щи благоутро́бное промышле́ние о лю́дех Дальнеросси́йския земли́, в виде́нии яви́ла во́лю Свою́, Влады́чице: да прие́млют ико́ну Мою́ христолюби́вии во́и По́рт-Арту́ра и Тоя́ по́мощию одоле́ют злочести́вых хи́нов! Те́мже и мы́ вопие́м:

Ра́дуйся, моли́твеннице неусыпа́ющая ко Христу́ Бо́гу, и на ми́лость Его́ к на́м приклоня́ющая; ра́дуйся, чрез благочести́вых люде́й сла́ву чуде́с Твои́х гре́шным открыва́ющая.

Ра́дуйся, гне́в Бо́жий предста́тельством Твои́м от на́с отводя́щая; ра́дуйся, Держа́вная Скоропомо́щнице, во дни́ тя́жких испыта́ний спаса́ющая.

Ра́дуйся, Матери́нским покро́вом Твои́м от несча́стий на́с сохраня́ющая; ра́дуйся, от ро́ва поги́бели безнаде́жных милосе́рдием Твои́м исхища́ющая.

Ра́дуйся, от наше́ствия иноплеме́нных зе́млю на́шу сохраня́ющая; ра́дуйся, всеми́лостивая услы́шательнице моле́ний на́ших в ско́рби и обстоя́ниих.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 4.

Бу́рю смяте́ний и бра́нь врага́ми воздви́гнутую в стране́ на́шей утоли́ти потща́шася благочести́вии лю́дие гра́да Ки́ева, исполня́юще повеле́ние Богома́тере, не обину́шася посла́ти ико́ну Твою́ в осажде́нную Кванту́нскую во́лость, я́ко щи́т и побе́дное зна́мение над супоста́ты, вопию́ще Бо́гу: Аллилу́иа.

И́кос 4.

Слы́шавше правосла́внии лю́дие, я́ко ико́на Цари́цы Небе́сныя, ше́ствоваше чрез мно́гия гра́ды и ве́си и богомо́льцы в вели́ком мно́жестве стека́хуся срета́ти и поклоня́тися Е́й, в моли́твах со слеза́ми умиле́ния испроша́ти стране́ на́шей на враги́ одоле́ние, от гла́да и па́губы избавле́ние, ми́ра умире́ние. Те́мже и мы́ вопие́м к Преблагослове́нней:

Ра́дуйся, го́рняго ми́ра украше́ние; ра́дуйся, до́льняго ми́ра заступле́ние.

Ра́дуйся, Дщи́ благослове́нная Отца́ Небе́снаго; ра́дуйся, Сы́на Предве́чнаго неискусому́жная Роди́тельнице.

Ра́дуйся, Боже́ственныя благода́ти Пода́тельнице; ра́дуйся, теле́с на́ших безме́здная Цели́тельнице.

Ра́дуйся, ду́ш на́ших к Ца́рствию го́рнему Путеводи́тельнице; ра́дуйся, от ве́чныя сме́рти на́ша Свободи́тельнице.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 5.

Боготе́чная звезда́ яви́ся, Твоя́, Богома́ти, ико́на, всю́ страну́ Росси́йскую от за́пад до восто́к обтека́ющая луча́ми чуде́с Твои́х, осиява́ющая блужда́ющих во тьме́ неве́рия и к покая́нию и́х приводя́щая, тьму́ неду́г и скорбе́й отгоня́ющая и наставля́ющая на пу́ть спасе́ния все́х с ве́рою к Тебе́ прибега́ющих и вопию́щих к Бо́гу: Аллилу́иа.

И́кос 5.

Во дни́ лю́тых скорбе́й и злы́х обстоя́ний яви́ла еси́, Влады́чице, ве́лию ми́лость обре́тением честны́я ико́ны Твоея́ «По́рт-Арту́рския», да вси́ с ве́рою моля́щеся пред не́ю прии́мут здра́вие и ду́ш спасе́ние. Сего́ ра́ди и мы́, прославля́юще милосе́рдие Твое́ неизрече́нное, усе́рдно вопие́м Ти́ си́це:

Ра́дуйся, свети́ло незаходи́мое, све́том и́стиннаго богопозна́ния на́с просвеща́ющее; ра́дуйся, Врата́рнице, две́ри ра́йския ве́рным отверза́ющая.

Ра́дуйся, неистощи́мый исто́чниче святы́ни; ра́дуйся, многотеку́щая реко́ Боже́ственныя благосты́ни.

Ра́дуйся, грехо́в на́ших очище́ние; ра́дуйся, ка́ющихся гре́шников с Бо́гом примире́ние.

Ра́дуйся, до́брыя обе́ты прие́млющая; ра́дуйся, благи́м начина́нием спосо́бствующая.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 6.

Пропове́дует Це́рковь Христо́ва чудеса́ Твоя́, Богороди́тельнице, и не́сть гра́да или́ страны́ иде́же не соверша́шеся Тобо́ю де́йство си́лы Бо́жия: во избавле́ние, спасе́ние, просвеще́ние и исцеле́ние люде́й христоимени́тых, наипа́че же чрез ико́ны Твоя́ святы́я обы́кла еси́ чудотвори́ти, излива́ющи от ни́х бе́здну милосе́рдия и щедро́т бе́дствующему челове́ческому ро́ду. Сего́ ра́ди славосло́вяще Тя́, Сы́ну Твоему́ и Бо́гу на́шему вопие́м: Аллилу́иа.

И́кос 6.

Возсия́ла еси́, от И́стиннаго Со́лнца пра́вды, Де́во Богоотрокови́це, Твоя́ свята́я ико́на «По́рт-Арту́рская», дости́гшая гра́да Владивосто́ка и яви́ся я́ко звезда́ пресве́тлая: просвеща́ющая помраче́нныя о́чи и окамене́нныя сердца́ и влага́ющая разуме́ние суде́б Бо́жиих христоимени́тым лю́дем. Те́мже с ни́ми и мы́ вопие́м:

Ра́дуйся, я́ко о Тебе́ ра́дуется а́нгельский собо́р; ра́дуйся, я́ко о Тебе́ торжеству́ет челове́ческий ро́д.

Ра́дуйся, я́ко Твоя́ сла́ва превосхо́дит похвалы́ земны́я и небе́сныя; ра́дуйся, Ра́досте на́ша, услажда́ющая ско́рбныя сердца́ к Тебе́ отве́рстыя.

Ра́дуйся, блага́я Засту́пнице, на по́мощь к на́м ускоря́ющая; ра́дуйся, зало́г спаси́тельный на́м в ико́не Твое́й дарова́вшая.

Ра́дуйся, гра́д Владивосто́к прише́ствием Свои́м от враго́в сохраня́вшая; ра́дуйся, пренесе́нием ико́ны Твоея́ в По́рт-Арту́р, побе́ду Росси́и обеща́вшая.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 7.

Хотя́ челове́к не́кий испо́лнити Во́лю Бо́жию, и доста́вити в осажде́нную ва́рварами кре́пость ико́ну Пресвяты́я Богоро́дицы «По́рт-Арту́рскую», отпра́вися в пу́ть и дости́гл то́кмо гра́да Да́льняго, не обре́те ве́ры у во́ев на́ших в по́мощь Богома́тере, и со слеза́ми воззва́ к Бо́гу: Аллилу́иа.

И́кос 7.

Но́вую показа́ ми́лость все́х Творе́ц и Влады́ка на́ш Госпо́дь, егда́ положи́ во гне́ве Свое́м наказа́ти челове́ческий ро́д: огне́м, мече́м, гла́дом и боле́зньми, и сотвори́ в наказа́ние пораже́ние ру́сских во́ев и плене́ние безбо́жными япо́нцами ико́ны Твоея́ «По́рт-Арту́рския». Сего́ ра́ди, Влады́чице, припа́даем и усе́рдно мо́лим Тя́: не да́ждь на́м до конца́ поги́бнути, но две́ри милосе́рдия Твоего́ отве́рзи на́м, вопию́щим:

Ра́дуйся, Спаси́теля ми́ра ро́ждшая; ра́дуйся, спасе́ния на́шего глави́зно.

Ра́дуйся, Ма́ти Бо́жия, обрече́нная на страда́ние; ра́дуйся, Ма́ти милосе́рдия, отъе́млющая вся́кую сле́зу от лю́те стра́ждущих.

Ра́дуйся, сле́зы умиле́ния на́м подаю́щая; ра́дуйся, от страсте́й на́с избавля́ющая.

Ра́дуйся, погиба́ющих гре́шников спаса́ющая; ра́дуйся, Цари́це небеси́ и земли́, моли́твы ра́б Свои́х прие́млющая.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 8.

Стра́нни и прише́льцы есмы́ на земли́ се́й, житие́ на́ше су́етно и маловре́менно е́сть. Мы́ же сме́рти безве́стное во у́м никогда́же прие́млем, ни помышля́ем о Стра́шнем Суди́щи Христо́ве, в не́м же и́мамы пра́ведному Судии́ предста́ти и да́ти отве́т о вся́ком де́ле же и сло́ве. Те́мже мо́лим Тя́, Влады́чице, возбуди́ ны́ от сна́ грехо́внаго, да сподо́бимся Твои́м хода́тайством получи́ти проще́ние грехо́в и во гла́се ра́дования воспева́ти Христу́ Бо́гу: Аллилу́иа.

И́кос 8.

Вся́ бы́вше горе́, к небе́сным взята́ и земны́х не оставля́еши, Пресвята́я Богоро́дице, святы́м Твои́м предста́тельством и и́маши ве́лие дерзнове́ние к Сы́ну Твоему́ и Бо́гу на́шему. Те́мже утверди́ в ми́ре глубо́це правосла́вных житие́ и вся́ поле́зная да́руй рабо́м Твои́м, да велича́юще воспева́ем Ти́:

Ра́дуйся, у́мным очесе́м на́шим го́рький и стра́шный ча́с сме́ртный представля́ющая; ра́дуйся, на ки́йждо де́нь, а́ки уже́ на после́дний жития́ на́шего взира́ти на́с науча́ющая.

Ра́дуйся, люби́ти ми́р и я́же в ми́ре на́м воспреща́ющая; ра́дуйся, пристра́стие к тле́нному бога́тству из се́рдца на́шего искореня́ющая.

Ра́дуйся, сла́вы челове́чи, а́ки те́ни преходя́щия иска́ти на́м возбраня́ющая; ра́дуйся, я́ко сладча́йшее И́мя Го́спода Иису́са Христа́ усты́ непреста́нно произноси́ти и в уме́ держа́ти на́с побужда́еши.

Ра́дуйся, я́ко от праздносло́вия, многоглаго́лания, па́че же от кощу́нства на́с удержава́еши; ра́дуйся, я́ко Твое́ за на́с хода́тайство си́льно е́сть пред Бо́гом, е́же не вве́рженным бы́ти на́м во тьму́ кроме́шнюю.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 9.

Вся́кое естество́ а́нгельское удиви́ся вели́кому де́лу Твоего́ милосе́рдия, Го́споди, егда́ во дни́ гне́внаго посеще́ния Своего́, не хотя́ да́ти поги́бнути до конца́ правосла́вней Росси́и, дарова́ держа́вную Засту́пницу наро́ду правосла́вному, неви́димо сопребыва́ющу и слы́шащу Тебе́ пою́щих: Аллилу́иа.

И́кос 9.

Вети́и суему́дрии, непросвеще́ннии све́том и́стиннаго богопозна́ния поклони́шася злато́му тельцу́. Сего́ ра́ди гне́вное Бо́жие посеще́ние всему́ ми́ру зря́ще, мы́ гре́шнии смире́нно мо́лим Тя́, Влады́чице, уми́лостиви Созда́теля, преложи́ти гне́в Сво́й пра́ведный на ми́лость и поми́ловати на́с вопию́щих:

Ра́дуйся, Твоея́ по́мощи и заступле́ния никогда́же на́с лиша́еши; ра́дуйся, у́м на́ш, помраче́нный небреже́нием, све́тлым Твои́м покро́вом озаря́еши.

Ра́дуйся, душе́вныя на́ши ра́ны спаси́тельным еле́ем умаща́еши; ра́дуйся, из ро́ва беззако́ний на́ших руко́ю Твоея́ по́мощи исхища́еши.

Ра́дуйся, грехо́вный со́н душе́вныя на́шея ле́ности отряса́еши; ра́дуйся, душе́вное умиле́ние и серде́чное сокруше́ние в на́с ражда́еши.

Ра́дуйся, к покая́нию и исправле́нию на́с возбужда́еши; ра́дуйся, я́ко все́м твори́ши спасти́ся, в держа́вный Тво́й покро́в прибега́ющим.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 10.

Спасти́ хотя́ лю́ди Дальнеросси́йския земли́ погиба́ющия во тьме́ неве́рия, Пресвята́я Богоро́дице, в пу́ть упра́ви не́кия и́ноки во Святы́й Гра́д поклоне́ния ра́ди Иерусали́мским святы́ням и та́мо на Кре́стнем Пути́, у ме́ста рече́ннаго Лифострото́н, благоволи́ла еси́ яви́ти ми́лость Свою́ обре́тением честны́я ико́ны Твоея́ «По́рт-Арту́рския», те́мже и мы́ с ни́ми ра́достно вопие́м Бо́гу: Аллилу́иа.

И́кос 10.

Не благоволи́ла еси́ ико́ну Твою́, Влады́чице, пре́жде возврати́ти в преде́лы земли́ Дальнеросси́йския, но уте́шила еси́ се́стры оби́тели Го́рненския Свои́м посеще́нием и в не́й пребы́вши три́ ме́сяцы, я́коже пе́рвее у сро́дницы Своея́ Елисаве́ты, и ны́не обновле́нием ико́ны Своея́ вои́стину показа́ла еси́, Богоро́дице, сте́ну милосе́рдия и щедро́т христолюби́вым лю́дем нело́жно обеща́вши покро́в Своея́ бла́гости в возсозда́нии Росси́йския страны́, да врата́ а́дова не одоле́ют Правосла́вныя Це́ркве Христо́вы. Сего́ ра́ди припа́даем к вно́вь обре́тенней ико́не Твое́й «По́рт-Арту́рстей» и ра́достно вопие́м Ти́ си́це:

Ра́дуйся, Росси́йския страны́ покро́ве и огражде́ние; ра́дуйся, Дальнеросси́йския земли́ забра́ло и похвале́ние.

Ра́дуйся, правосла́вныя Це́ркве сто́лп и утвержде́ние; ра́дуйся, вся́кия святы́ни защи́то и поклоне́ние.

Ра́дуйся, су́щих в плене́нии свобожде́ние; ра́дуйся, за пра́вду гони́мых дерзнове́ние.

Ра́дуйся, за ве́ру страда́вших терпе́ние; ра́дуйся, от гла́да и боле́зней на́ше спасе́ние.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 11.

Пе́нием хвале́бным и благода́рственным моле́нием вно́вь срета́ют ико́ну Твою́, Влады́чице, «По́рт-Арту́рскую», Святи́тель Бо́жий, свяще́нницы, мона́си и лю́дие гра́да Владивосто́ка, я́ко зарю́ со́лнечную и непосты́дную Наде́жду свою́. И мы́ вси́ упова́ние на Тя́ возложи́вше, ра́достно вопие́м Бо́гу: Аллилу́иа.

И́кос 11.

Святы́й Убру́с Сы́на Своего́, я́ко светообра́зный омофо́р неви́димо простира́еши над на́шею земле́ю, Влады́чице, нече́стия безлу́нную но́щь прогоня́ющи, зарю́ же пакибытия́ возсиява́ющи, да в ра́дости немо́лчно зове́м:

Ра́дуйся, вои́стину в Со́лнце облаче́нная; ра́дуйся, венце́м от зве́зд увязе́нная.

Ра́дуйся, ря́сны златы́ми преиспещре́нная; ра́дуйся, красото́ неизрече́нная.

Ра́дуйся, теплото́ со́лнца любе́знейшая; ра́дуйся, Све́те невече́рний а́нгелов и челове́ков.

Ра́дуйся, те́мныя де́монския полки́ дале́че отгоня́ющая; ра́дуйся, тьму́ неве́рия просвеща́ющая.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 12.

Ико́на Твоя́ благода́ти прича́стная, я́ко сокро́вище драгоце́нное Це́ркве Христо́вы от Тебе́, Богоро́дице, подаде́ся, в не́й бо обеща́лася еси́ пребыва́ти с на́ми до сконча́ния ве́ка, ре́кши к первопи́санней ико́не Твое́й: с не́ю Моя́ благода́ть и си́ла! Ве́руем, Пречи́стая, я́ко не оскуде́ет глаго́л се́й и во ико́не Твое́й «По́рт-Арту́рстей», на вся́цем ме́сте и зде́ с на́ми пребыва́еши, иде́же ве́рно пое́тся Сы́ну Твоему́ и Бо́гу хвале́бная пе́снь: Аллилу́иа.

И́кос 12.

Пою́ще Твоя́ чудеса́, бы́вшая в дре́вняя и настоя́щая времена́, хва́лим Тя́, Влады́чице, и усе́рдно припа́даем к ико́не Твое́й «По́рт-Арту́рстей», с любо́вию лобыза́ем ю́ и я́ко при́сно су́щей с на́ми мо́лим Ти ся: ми́лостиво воззри́ на ны́, Ма́ти Бо́жия, и я́коже ны́не зри́м Тя́ на ико́не изображе́нную, та́ко сподо́би на́с узре́ти Тя́ в гро́зный ча́с сме́ртный от руки́ диа́воли на́с исхища́ющую и в Ца́рствие Небе́сное приводя́щую держа́вною десни́цею Твое́ю, да Тебе́ благода́рственно воззове́м:

Ра́дуйся, Це́ркве небе́сныя и земны́я украше́ние; ра́дуйся, по Бо́зе на́ше пе́рвое прибе́жище и утеше́ние.

Ра́дуйся, де́вства честны́й покро́ве и огражде́ние; ра́дуйся, во святе́м житии́ ве́рных утвержде́ние.

Ра́дуйся, в Ца́рствие Небе́сное лю́бящим Тя́ хода́тайствуеши вхожде́ние; ра́дуйся, от вла́сти лю́таго мироде́ржца упова́ющих на Тя́ избавле́ние.

Ра́дуйся, на возду́шных мыта́рствах, сла́вящих Тя́ избавле́ние; ра́дуйся, на́м ра́йских вра́т отверзе́ние.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 13.

О Всепе́тая Ма́ти, ро́ждшая все́х святы́х Святе́йшее Сло́во, от а́нгел восхваля́емая на небеси́, от челове́к воспева́емая на земли́! При́зри на смире́нное на́ше моле́ние пред пречи́стым Твои́м о́бразом и вся́ поле́зная да́руй рабо́м Твои́м, да спаса́емии Тобо́ю, вопие́м Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов Творе́ц избра́ Тя́, Влады́чице, к благода́тному челове́ков спасе́нию и дарова́ Тя́, помо́щницу правосла́вным лю́дем, избавля́ющую на́с от хи́нских наше́ствий, от гла́да и вся́ких напа́стей и житие́ на́ше устроя́ющую во вся́ком благоче́стии и чистоте́. Те́мже и мы́ воспомина́юще таково́е о лю́дех Твое́ благопромышле́ние, со благодаре́нием вопие́м Ти́ си́це:

Ра́дуйся, непристу́пнаго Божества́ селе́ние; ра́дуйся, непреста́нное люде́й удивле́ние.

Ра́дуйся, достоя́нию Твоему́ по́мощь и заступле́ние; ра́дуйся, хода́таице на́шего спасе́ния.

Ра́дуйся, благода́тное от ну́жд избавле́ние; ра́дуйся, несокруши́мый щи́те во́инов на́ших.

Ра́дуйся, мечу́ и броне́ и́х неуязви́мая; ра́дуйся, враго́в пораже́ние и устраше́ние.

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Конда́к 1.

Избра́нней от все́х родо́в Засту́пнице на́шей и Цари́це, покро́вом Своея́ бла́гости покрыва́ющей преде́лы земли́ Дальнеросси́йския, благода́рственная пе́ния прино́сим Ти́, раби́ Твои́, Богоро́дице. Ты́ же я́ко Всеми́лостивая Влады́чице, от вся́ких на́с бе́д спаси́ и ве́чных му́к свободи́, да ра́дующеся зове́м Ти́:

Ра́дуйся, Цари́це Препросла́вленная, преде́лы Дальнеросси́йския земли́ ми́лостию Свое́ю не оставля́ющая.

Моли́тва ко Пресвяте́й Богоро́дице.

О Пресвята́я Госпоже́ Де́во Богоро́дице, превы́шшая Херуви́мов и Серафи́мов и Святе́йшая все́х святы́х! Припа́дающе к святе́й ико́не Твое́й, смире́нно мо́лимся: вонми́ гла́су моле́ния на́шего, ви́ждь ско́рби, ви́ждь беды́ на́ша, и я́ко любвеоби́льная Ма́ти, потщи́ся на по́мощь на́м безпомо́щным, умоли́ Сы́на Твоего́ и Бо́га на́шего: да не преда́ст земли́ на́шея на поруга́ние ва́рваров, да не погуби́т на́с за беззако́ния на́ша, но яви́т человеколю́бно на́м ми́лость Свою́. Испроси́ на́м, Влады́чице, у бла́гости Его́: теле́сное здра́вие и душе́вное спасе́ние, ми́рное житие́ и земли́ плодоно́сие, возду́ха благорастворе́ние и благослове́ние свы́ше на вся́ блага́я дела́ и начина́ния на́ша. И я́коже дре́вле ми́лостиво яви́ла на́м ико́ну Свою́ «По́рт-Арту́рскую», я́ко защи́тницу земли́ Дальнеросси́йския, но за неве́рие и неблагогове́ние к святы́ням церко́вным язы́чники плене́нную, та́ко и ны́не припа́даем к вно́вь обре́тенному Твоему́ о́бразу и прино́сим на́ше усе́рдное молитвосло́вие.

О Цари́це Всепе́тая! Простри́ ко Го́споду богоно́сныя ру́це Твои́, и́миже Богомладе́нца Иису́са Христа́ носи́ла еси́ и умоли́ Его́ изба́вити на́с от вся́каго зла́. Яви́, Влады́чице, ми́лость Твою́ на́м: боля́щия исцели́, скорбя́щия уте́ши, бе́дствующим помози́ и сподо́би на́с благоче́стно житие́ земно́е соверши́ти, христиа́нскую кончи́ну получи́ти и Ца́рствие Небе́сное насле́дити, Ма́терним Твои́м хода́тайством к Ро́ждшемуся от Тебе́ Христу́ Бо́гу на́шему. Ему́же со Безнача́льным Его́ Отце́м и Пресвяты́м Ду́хом, подоба́ет вся́кая сла́ва, че́сть и поклоне́ние, ны́не и при́сно и во ве́ки веко́в. Ами́нь.