Конда́к 1.

Избра́нней от все́х родо́в Бо́жией Ма́тери, Небесе́ и земли́ Цари́це, врачевство́ духо́вное всему́ ми́ру подаю́щей, благода́рная пе́ния прино́сим о дарова́нии Боже́ственнаго сокро́вища, чудотво́рныя ико́ны Ея́, Прибавле́ние ума́ нарече́нныя, е́юже огражда́еми, ра́дуемся све́тло и с любо́вию взыва́ем:

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

И́кос 1.

А́нгел предста́тель по́слан бы́сть во гра́д Назаре́т к чи́стей Отрокови́це Мари́и рещи́: «Ра́дуйся, Тобо́ю бо Сы́н Бо́жий воплоти́тся». Пречи́стая же Де́ва, благове́стие Арха́нгела слы́шавши, во смире́нии се́рдца отвеща́: «Се́, Раба́ Госпо́дня, бу́ди Мне́ по глаго́лу твоему́». Мы́ же гре́шнии, благогове́йно чту́ще Ма́терь Христа́ Бо́га на́шего, я́ко от А́нгела научи́хомся, та́ко со умиле́нием вопие́м Благода́тней:

Ра́дуйся, Благослове́нная в жена́х; ра́дуйся, у Го́спода обре́тшая благода́ть.

Ра́дуйся, си́лою Всевы́шняго осене́нная; ра́дуйся, Ду́хом Святы́м освяще́нная.

Ра́дуйся, ве́рная Рабо́ Госпо́дня; ра́дуйся, Спаси́теля ми́ра ро́ждшая.

Ра́дуйся, Богоизбра́нная Отрокови́це; ра́дуйся, Небесе́ и земли́ Цари́це.

Ра́дуйся, Ма́ти Све́та, все́х просвеща́ющаго; ра́дуйся, ве́рных смы́слы озаря́ющая.

Ра́дуйся, прему́дрых превосходя́щая ра́зум; ра́дуйся, я́ко Тя́ ублажа́ют вси́ ро́ди.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 2.

Ви́дящи, Всенепоро́чная, жела́ние люде́й новопросвеще́нных, благослови́ла еси́ ева́нгельских та́ин благове́стника апо́стола Луку́ написа́ти пречи́стаго ли́ка Твоего́ изображе́ние и проглаго́лала еси́: «С си́м о́бразом благода́ть Моя́ и си́ла да бу́дет». Те́мже благогове́йно покланя́ющеся пред святы́ми ико́нами Твои́ми, и́миже ве́сь ми́р христиа́нский украси́ла еси́, благода́рственно вопие́м о Тебе́ Бо́гу: Аллилу́иа.

И́кос 2.

Ра́зум Небе́сный открыва́ющи, Пречи́стая Де́во, мно́гажды благоволи́ла еси́ яви́ти все́м ве́рным, какова́ е́сть во́ля Бо́жия, блага́я и соверше́нная, и вся́к у́м превосходя́щая. При́зри на на́с, Всепе́тая Богоро́дице, озари́ све́том и́стины, уте́ши на́с я́ко Ма́ти, наста́ви на́с на пу́ть пра́вды, да возопие́м моля́щеся Тебе́ та́ко:

Ра́дуйся, Бо́жию Прему́дрость, Христа́, роди́вшая; ра́дуйся, Бо́га челове́ком соедини́вшая.

Ра́дуйся, све́том ра́зума ду́ши на́ша просвеща́ющая; ра́дуйся, неизрече́нную сла́ву Бо́жию вмеща́ющая.

Ра́дуйся, почита́ющих святы́я ико́ны освяща́ющая; ра́дуйся, духо́вная сокро́вища ще́дро раздаю́щая.

Ра́дуйся, честны́м Твои́м ико́нам благода́ть да́рующая; ра́дуйся, поклоне́ние пред о́бразы Твои́ми Сама́ прие́млющая.

Ра́дуйся, исцеле́ния от ико́н Твои́х излива́ющая; ра́дуйся, к Небесе́м умы́ и сердца́ на́ша возводя́щая.

Ра́дуйся, всю́ вселе́нную луча́ми Твоея́ благода́ти озаря́ющая; ра́дуйся, с Сы́ном Твои́м и Бо́гом ве́чно ца́рствующая.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 3.

Си́лою благода́тною осеня́еми, благочести́вии лю́дие во гра́д Назаре́т приидо́ша и обрето́ша та́мо до́м Богоро́дичен, иде́же Пречи́стая Де́ва роди́ся и благове́стие Арха́нгела прия́т, и пренесо́ша до́м то́й в зе́млю Итали́йскую, во гра́д Лоре́то. Верху́ же до́ма о́наго доны́не е́сть о́браз Богоро́дичен, от дре́ва ре́зан, его́же А́нгельския Небе́сныя Си́лы неви́димо окружа́ют и благоле́пно честву́ют, ра́достне вопию́ще Бо́гу: Аллилу́иа.

И́кос 3.

Иму́щи к ро́ду христиа́нскому Ма́тернее милосе́рдие, вся́ концы́ земли́ ко спасе́нию призыва́еши, Пречи́стая, те́мже у́бо наро́ди разноязы́чнии от мно́гих стра́н прихо́дят в до́м Тво́й, и пред ико́ною Твое́ю покая́ние прино́сят, и к жи́зни но́вей благода́тное укрепле́ние прие́млют. Сего́ ра́ди от восто́ка до за́пада просла́влена бы́сть ико́на Твоя́ чудесы́ мно́гими, и изба́вленнии от боле́зней, скорбе́й и напа́стей лю́дие прино́сят Ти́ благодаре́ния, взыва́юще:

Ра́дуйся, до́ме, его́же созда́ Себе́ Прему́дрость Бо́жия; ра́дуйся, гра́де Бо́жий, и́же от ма́лаго гра́да Назаре́та произы́де.

Ра́дуйся, до́м Бо́жий вхожде́нием Твои́м озари́вшая; ра́дуйся, Отрокови́це, Свята́я Святы́х бо́льшая.

Ра́дуйся, с Предве́чным Богомладе́нцем в Назаре́т прише́дшая; ра́дуйся, та́инству спасе́ния ро́да челове́ческаго послужи́вшая.

Ра́дуйся, ле́ствице, е́юже восхо́дим от земли́ на Не́бо; ра́дуйся, всему́ ми́ру преди́вный покро́ве.

Ра́дуйся, я́ко с ве́рою покланя́емся пречи́стаго ли́ка Твоего́ изображе́нию; ра́дуйся, я́ко от него́ прие́млем благода́тныя да́ры во спасе́ние.

Ра́дуйся, ди́вная зна́мения ико́нами Твои́ми соверша́ющая; ра́дуйся, ро́д христиа́нский держа́вно заступа́ющая.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 4.

Бу́рею ско́рби ве́лия одержи́мь бе́ изо́граф не́кий в помраче́нии ра́зума, от земны́х враче́й по́льзы не получи́вый. Тогда́ Пречи́стая Ма́ти Го́спода яви́ся боля́щему в то́м же о́бразе, и́же и до́м Ея́ во гра́де Лоре́то освяща́ет, и запове́да ико́ну написа́ти. Сие́ испо́лнив, изо́граф исцели́ся и от сего́ ико́ну новопи́санную Прибавле́ние ума́ нарече́, поя́ пред не́ю хвале́бную пе́снь Бо́гу: Аллилу́иа.

И́кос 4.

Слы́шавше лю́дие земли́ Ру́сския, я́ко благоизво́ли Пресвята́я Богоро́дица да́ти и́м в ра́дость и утеше́ние ико́ну Свою́, Прибавле́ние ума́ нарече́нную, украси́ша хра́мы и до́мы своя́ мно́гими спи́сками ея́, от ни́хже ди́вная зна́мения и чудеса́ оби́льно содева́ются все́м притека́ющим с ве́рою и пою́щим Преблагослове́нней такова́я:

Ра́дуйся, о́браз Тво́й честны́й во утеше́ние и освяще́ние на́м дарова́вшая; ра́дуйся, со ико́нами Твои́ми благода́тными неви́димо в до́мы на́ша входя́щая.

Ра́дуйся, боле́зни душе́вныя и теле́сныя ико́ною Твое́ю ско́ро врачу́ющая; ра́дуйся, лю́бящия и чту́щия Тво́й о́браз от вся́ких бе́д избавля́ющая.

Ра́дуйся, оста́вленных врача́ми на Свои́ всемо́щнеи ру́це прие́млющая; ра́дуйся, благослове́ние, здра́вие и ра́дование те́м подаю́щая.

Ра́дуйся, я́ко от восто́ка и до за́пада и́мя Твое́ ублажа́ется; ра́дуйся, зе́млю на́шу покро́вом ми́лости Твоея́ осеня́ющая.

Ра́дуйся, помраче́нных умо́в исцеле́ние; ра́дуйся, по́мыслов на́ших просвеще́ние.

Ра́дуйся, позна́ния и́стины чи́стое зерца́ло; ра́дуйся, ве́ры пра́выя кре́пкое забра́ло.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 5.

Боготе́чней звезде́ подо́бна яви́ся ико́на Твоя́, Богома́ти: страну́ бо на́шу и гра́ды ея́ освяща́ет, су́щих во тьме́ неве́жества све́том богове́дения озаря́ет, ра́зум на́ш, страстьми́ помраче́нный, просвеща́ет, заблу́ждшия наставля́ет на пу́ть де́лания за́поведей Сы́на Твоего́ и Бо́га, Ему́же благода́рственно вопие́м: Аллилу́иа.

И́кос 5.

Ви́девше ди́вную ико́ну Богома́тере и позна́вше ю́ и́стинное Боже́ственное сокро́вище, к не́й усе́рдно притека́ем, в неду́зех исцеле́ние, в ско́рбех утеше́ние, в беда́х избавле́ние прие́млем и ра́достно пое́м Засту́пнице на́шей:

Ра́дуйся, Ма́ти Све́та присносу́щнаго, благода́тию всю́ вселе́нную озари́вшаго; ра́дуйся, Со́лнце Пра́вды, Христа́ Бо́га на́шего, яви́вшая.

Ра́дуйся, мра́к неве́дения на́шего разгоня́ющая; ра́дуйся, заря́ми благода́ти на́с просвеща́ющая.

Ра́дуйся, свеще́ неугаси́мая, пла́мень ве́ры возжига́ющая; ра́дуйся, све́т богове́дения все́м пролива́ющая.

Ра́дуйся, доброде́тели пу́ть освеща́ющая; ра́дуйся, ве́сну спасе́ния на́м возвеща́ющая.

Ра́дуйся, явле́нием ико́ны Твоея́ ве́рных осиява́ющая; ра́дуйся, от бе́д и напа́стей кре́пкою руко́ю изыма́ющая.

Ра́дуйся, любве́ Боже́ственныя свети́льниче; ра́дуйся, святы́ни преми́рныя исто́чниче.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 6.

Пропове́дует ми́р ве́сь ми́лости Твоя́, Ма́ти Го́спода на́шего, во все́х бо конце́х земли́ ико́на Твоя́, Прибавле́ние ума́ имену́емая, луча́ми чуде́с сия́ет, просвеща́ющи ду́ши на́ша све́том Бо́жия благода́ти и подвиза́ющи пе́ти просла́вльшему Тя́ Бо́гу: Аллилу́иа.

И́кос 6.

Возсия́ в честне́й ико́не Твое́й, Богоро́дице, све́т спасе́ния все́м блужда́ющим во тьме́ грехо́в и страсте́й, и все́м моля́щимся пред не́ю с ве́рою и благогове́нием ско́рая по́мощь подае́тся. Умо́в на́ших омраче́ние све́том Твои́м отжени́, Всепе́тая, и да́руй и́стинный Све́т узре́ти все́м с любо́вию вопию́щим Ти́ си́це:

Ра́дуйся, звездо́ незаходи́мая, Со́лнце Пра́вды в ми́р вводя́щая; ра́дуйся, Ма́ти Све́та и́стиннаго, ду́ши ве́рных просвеща́ющаго.

Ра́дуйся, све́тлым покро́вом у́м на́ш омраче́нный осеня́ющая; ра́дуйся, заре́ невече́рняя, мглу́ на́ших грехо́в разгоня́ющая.

Ра́дуйся, во благода́тнем уче́нии наставля́ющая; ра́дуйся, тьмы́ и ве́чных му́к на́с избавля́ющая.

Ра́дуйся, от сете́й вра́жиих свобожда́ющая; ра́дуйся, безу́мие ми́ра побежда́ющая.

Ра́дуйся, душевре́дных уче́ний низложе́ние; ра́дуйся, душеполе́зных зна́ний дарова́ние.

Ра́дуйся, ико́ною Твое́ю на́с утеша́ющая; ра́дуйся, све́том ра́дости ду́ши веселя́щая.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 7.

Хотя́щи все́м челове́ком спасти́ся и в ра́зум и́стины приити́, Пречи́стая Ма́ти Сво́й о́браз, Прибавле́ние ума́ имену́емый, дарова́ла е́сть на́м, да вси́ с ве́рою моля́щиися пред ни́м, кре́пость сло́ва, и ра́зум, и му́дрость прии́мше, в тишине́ помысло́в Царю́ и Бо́гу на́шему пою́т: Аллилу́иа.

И́кос 7.

Но́вая и пресла́вная чудеса́ явля́еши, Ма́ти Бо́жия, ве́рным лю́дем свято́ю ико́ною Твое́ю: си́лою благода́ти Христо́вы помраче́нныя умо́м просвеща́еши, от безу́мия отвраща́еши, разсла́бленныя укрепля́еши и все́м притека́ющим к целе́бному Твоему́ о́бразу ско́рую по́мощь подае́ши, подвиза́ющи пе́ти Тебе́ такова́я:

Ра́дуйся, из глубины́ неве́дения извлача́ющая; ра́дуйся, мно́гия в ра́зуме просвеща́ющая.

Ра́дуйся, сло́во прему́дрости прося́щим да́рующая; ра́дуйся, несмы́сленных разу́мны содева́ющая.

Ра́дуйся, грехо́вныя по́мыслы отгоня́ющая; ра́дуйся, сердца́ ожесточе́нная умягча́ющая.

Ра́дуйся, у́м к Бо́гу возвыша́ющая; ра́дуйся, нему́дрыя умудря́ющая.

Ра́дуйся, ко благоче́стию наставля́ющая; ра́дуйся, ве́чною ра́достию одаря́ющая.

Ра́дуйся, к Сы́ну Твоему́ и Бо́гу моли́твы ве́рных принося́щая; ра́дуйся, и Сама́ непреста́нно у Престо́ла Вседержи́теля о все́х моля́щаяся.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 8.

Стра́нно е́сть ви́дети, ка́ко ико́на Твоя́, Пречи́стая Богоро́дице Де́во, руко́ю челове́ческою напи́санная, си́лою Твое́ю Боже́ственною духо́в тьмы́ прогоня́ет, не́мощию ума́ одержи́мым ра́зум подае́т и все́х неудо́бь уча́щихся све́тло умудря́ет; те́мже и мы́, во гресе́х погиба́ющии, мо́лим Тя́ со слеза́ми: изба́ви на́с от вра́г ви́димых и неви́димых, от тьмы́ неразу́мия и мра́ка пре́лести, да всегда́ пое́м Спаси́телю и Бо́гу на́шему: Аллилу́иа.

И́кос 8.

Вся́ земля́ на́ша преиспо́лнена е́сть, а́ки звезда́ми богосве́тлыми, чудотво́рными о́бразами Твои́ми, Богоро́дице Де́во, в не́йже и сия́ ико́на Твоя́, Прибавле́ние ума́ нарече́нная, благода́тию сия́ет и согрева́ет оледене́вшая сердца́ на́ша зна́меньми ми́лости Твоея́ к на́м гре́шным. Сего́ ра́ди пред ли́ком Твои́м святы́м прекло́ньше коле́на, воспева́ем Тя́, Всепречи́стая Ма́ти на́ша, та́ко:

Ра́дуйся, ско́рби на́ша в ра́дость претворя́ющая; ра́дуйся, от разжже́нных стре́л лука́ваго на́с защища́ющая.

Ра́дуйся, ве́рных ра́зум просвеща́ющая; ра́дуйся, неве́рныя посрамля́ющая.

Ра́дуйся, младе́нцев воспита́ние и благода́тное охране́ние; ра́дуйся, ю́ных наставле́ние и целому́дренное огражде́ние.

Ра́дуйся, неудо́бь уча́щимся ра́зум подаю́щая; ра́дуйся, помраче́нныя умо́м исцеля́ющая.

Ра́дуйся, вра́жия се́ти разруша́ющая; ра́дуйся, благода́тию де́моны прогоня́ющая.

Ра́дуйся, Ма́ти щедро́т и милосе́рдия; ра́дуйся, спасе́ния на́шего наде́ждо.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 9.

Вся́кое естество́ А́нгельское благогове́йно Тебе́ слу́жит, Небесе́ и земли́ Цари́це, челове́ческий же ро́д хвалы́ Тебе́ прино́сит и Твою́ святу́ю ико́ну почита́ет, сию́ бо во отра́ду и утеше́ние дарова́ла еси́ на́м. Научи́ на́с, о Всеблага́я, досто́йно сла́вити Тя́ и воспева́ти ро́ждшемуся от Тебе́ Спаси́телю ми́ра: Аллилу́иа.

И́кос 9.

Вети́и челове́честии недоумева́ют позна́ти та́йну служе́ния Твоего́ ро́ду христиа́нскому, Богоро́дице, ниже́ мо́гут изъясни́ти си́лу чудотво́рную, от ико́н Твои́х происходя́щую на вся́ку по́льзу душе́вную и теле́сную челове́ком. Мы́ же правосла́внии, со слеза́ми ра́дости пред ико́ною Твое́ю свято́ю предстоя́ще, прославля́ем Тя́, Благода́тная, и глаго́лем:

Ра́дуйся, А́нгелов ра́дование; ра́дуйся, Арха́нгелов ликова́ние.

Ра́дуйся, Ю́же на возду́се срета́ют Херуви́ми; ра́дуйся, Е́йже похва́льная прино́сят Серафи́ми.

Ра́дуйся, све́тлое Це́ркве Небе́сныя и земны́я украше́ние; ра́дуйся, все́х челове́к и безпло́тных удивле́ние.

Ра́дуйся, от во́инств Небе́сных почита́емая; ра́дуйся, от земноро́дных поклоне́нием прославля́емая.

Ра́дуйся, о́бразом Твои́м умы́ на́ша возводя́щая к ми́ру Го́рнему; ра́дуйся, Путеводи́тельнице на́ша ко Оте́честву Небе́сному.

Ра́дуйся, все́х на́с при Кресте́ Сы́на Твоего́ усынови́вшая; ра́дуйся, сия́нием души́ Твоея́ всю́ зе́млю просвети́вшая.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 10.

Спасти́ хотя́ ми́р от безу́мия и пре́лести вра́жия, Человеколю́бец Госпо́дь чу́дную ико́ну Твою́, Богома́ти, дарова́, пред не́юже помраче́ннии умо́м исцеля́ются, бесну́ющиися от де́монов свобожда́ются, скорбя́щии утеше́ние и ра́дость обрета́ют. Те́мже прославля́юще Бо́га, подаю́щаго на́м таковы́я ми́лости, вопие́м Ему́ благода́рне: Аллилу́иа.

И́кос 10.

Стена́ еси́ необори́мая и покро́в на́м, Всенепоро́чная, сопроти́в ополче́ний ви́димых и неви́димых вра́г, огражда́ющи на́с от вся́ких бе́д и боле́зней. Сего́ ра́ди припа́дающе ко ико́не Твое́й с ве́рою в по́мощь благода́тную и врачевство́ все́х неду́гов душе́вных и теле́сных, ра́достно вопие́м Ти́ си́це:

Ра́дуйся, от путе́й поги́бельных на́с удаля́ющая; ра́дуйся, на вся́ку и́стину и пра́вду наставля́ющая.

Ра́дуйся, ду́ха боле́зни и уны́ния отгна́ние; ра́дуйся, ду́ха ра́зума и кре́пости стяжа́ние.

Ра́дуйся, враги́ си́лою Бо́жиею посрамля́ющая; ра́дуйся, сове́ты нечести́вых разоря́ющая.

Ра́дуйся, бесну́ющимся здра́вие подаю́щая; ра́дуйся, вся́ лю́тыя неду́ги врачу́ющая.

Ра́дуйся, от сме́рти духо́вныя на́с избавля́ющая; ра́дуйся, слеза́ми Твои́ми грехи́ на́ша омыва́ющая.

Ра́дуйся, ра́достию духо́вною на́с ди́вно насыща́ющая; ра́дуйся, в жи́знь бу́дущаго ве́ка на́с вводя́щая.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 11.

Пе́ние благода́рственное прино́сим пред пречи́стым о́бразом Твои́м, Пренепоро́чная, за неизрече́нное Твое́ милосе́рдие и мо́лимся, о Богоблагода́тная: огради́ у́м на́ш и се́рдце от тлетво́рных уче́ний, неве́рия и суеве́рия, сохрани́ зе́млю на́шу от вся́ких нестрое́ний, врага́ми ве́ры воздвиза́емых, и сподо́би на́с чи́стым се́рдцем сла́вити Созда́теля на́шего, пою́ще пе́снь: Аллилу́иа.

И́кос 11.

Я́ко светоприе́мную свещу́ зри́м ико́ну Твою́, Богома́ти, сия́нием чуде́с зе́млю на́шу просвеща́ющую, на пу́ть спасе́ния на́с наставля́ющую и сердца́ на́ша любо́вию воспламеня́ющую к Тебе́, Пречи́стей Ма́тери Го́спода. Мы́ же, ве́дуще си́лу благода́ти Твоея́, пе́сньми ра́достными прославля́ем Тя́ си́це:

Ра́дуйся, прему́дростию Соломо́на превы́шшая; ра́дуйся, сокрове́нныя та́йны Бо́жия ве́рным открыва́ющая.

Ра́дуйся, любому́дрыя нему́дрыя явля́ющая; ра́дуйся, мо́лние, ду́ши просвеща́ющая.

Ра́дуйся, су́етную му́дрость ве́ка сего́ посрамля́ющая; ра́дуйся, ослепле́нныя е́ю на пу́ть пра́вый наставля́ющая.

Ра́дуйся, и́скренне моля́щимся у́м обновля́ющая; ра́дуйся, в ча́с недоуме́ний мы́сль бла́гу на се́рдце полага́ющая.

Ра́дуйся, прему́дрости и бла́гости Бо́жия открове́ние; ра́дуйся, яви́вшая на́м ди́вную ико́ну Твою́ я́ко да́р Небе́сный.

Ра́дуйся, исто́чниче ра́дости непреста́нныя; ра́дуйся, Го́рняго ми́ра красото́ неизрече́нная.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 12.

Благода́ть Боже́ственную испроси́ у Сы́на Твоего́ и Бо́га, о Всеблага́я, пода́ждь на́м ру́ку по́мощи, да не поги́бнем во гресе́х на́ших; согре́й на́с любо́вию Твое́ю, очи́сти умы́ на́ша от гордели́вых помысло́в, просвети́ серде́чныя о́чи на́ши к зре́нию пути́ смире́ния и сподо́би на́с в жи́зни се́й и в Ца́рстве Небе́снем воспева́ти Творцу́ и Созда́телю на́шему: Аллилу́иа.

И́кос 12.

Пою́ще чудеса́, от ико́ны Твоея́ явле́нная, Влады́чице, хва́лим, сла́вим и велича́ем Тя́, честне́йшую вои́стину Херуви́м и сла́внейшую без сравне́ния Серафи́м. При́зри с Небесе́, Богоро́дице, на предстоя́щия пред свято́ю ико́ною Твое́ю и благода́ть Твою́ низпосли́ на́м, изба́ви от вся́ких бе́д и искуше́ний вра́жиих все́х я́ко Засту́пнице и Храни́тельнице на́шей вопию́щих Ти́:

Ра́дуйся, моли́твами Твои́ми ве́сь ми́р спаса́ющая; ра́дуйся, све́том чистоты́ Твоея́ все́х просвеща́ющая.

Ра́дуйся, ны́нешняго ско́рбнаго ве́ка утеше́ние; ра́дуйся, во́ли Госпо́дни открове́ние.

Ра́дуйся, зе́млю Ру́сскую в достоя́ние Себе́ избра́вшая; ра́дуйся, явле́нием чудотво́рных ико́н Твои́х сию́ благослови́вшая.

Ра́дуйся, чудесы́ от о́браза Твоего́ к Све́ту и́стины на́с возводя́щая; ра́дуйся, почита́ющих ли́к Тво́й незри́мо благода́тию осеня́ющая.

Ра́дуйся, ра́дость благода́тную в сердца́ боголюби́вая излива́ющая; ра́дуйся, две́ри милосе́рдия Бо́жия хода́тайством Твои́м отверза́ющая.

Ра́дуйся, в стяжа́нии даро́в Свята́го Ду́ха на́м поможе́ние; ра́дуйся, Же́но, еди́на Чи́стая и Благослове́нная.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 13.

О всепе́тая Ма́ти Присносу́щнаго Све́та и О́тчия Прему́дрости! Ты́ еси́ све́т омраче́нных, прибавле́ние ума́ и ра́дость серде́ц на́ших; услы́ши и приими́ моле́ние на́с гре́шных, умудри́ на́с неразу́мных и наста́ви на пе́ние и моли́тву пред ико́ною Твое́ю ди́вною. Не преста́й моли́ти Сы́на Твоего́ и Бо́га о на́с, недосто́йных рабе́х Твои́х, сла́вящих Тя́ и пою́щих Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел предста́тель по́слан бы́сть во гра́д Назаре́т к чи́стей Отрокови́це Мари́и рещи́: «Ра́дуйся, Тобо́ю бо Сы́н Бо́жий воплоти́тся». Пречи́стая же Де́ва, благове́стие Арха́нгела слы́шавши, во смире́нии се́рдца отвеща́: «Се́, Раба́ Госпо́дня, бу́ди Мне́ по глаго́лу твоему́». Мы́ же гре́шнии, благогове́йно чту́ще Ма́терь Христа́ Бо́га на́шего, я́ко от А́нгела научи́хомся, та́ко со умиле́нием вопие́м Благода́тней:

Ра́дуйся, Благослове́нная в жена́х; ра́дуйся, у Го́спода обре́тшая благода́ть.

Ра́дуйся, си́лою Всевы́шняго осене́нная; ра́дуйся, Ду́хом Святы́м освяще́нная.

Ра́дуйся, ве́рная Рабо́ Госпо́дня; ра́дуйся, Спаси́теля ми́ра ро́ждшая.

Ра́дуйся, Богоизбра́нная Отрокови́це; ра́дуйся, Небесе́ и земли́ Цари́це.

Ра́дуйся, Ма́ти Све́та, все́х просвеща́ющаго; ра́дуйся, ве́рных смы́слы озаря́ющая.

Ра́дуйся, прему́дрых превосходя́щая ра́зум; ра́дуйся, я́ко Тя́ ублажа́ют вси́ ро́ди.

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Конда́к 1.

Избра́нней от все́х родо́в Бо́жией Ма́тери, Небесе́ и земли́ Цари́це, врачевство́ духо́вное всему́ ми́ру подаю́щей, благода́рная пе́ния прино́сим о дарова́нии Боже́ственнаго сокро́вища, чудотво́рныя ико́ны Ея́, Прибавле́ние ума́ нарече́нныя, е́юже огражда́еми, ра́дуемся све́тло и с любо́вию взыва́ем:

Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая.

Моли́тва.

О Пречи́стая Богоро́дице, даро́в духо́вных Пода́тельнице, до́ме, его́же созда́ Себе́ Прему́дрость Бо́жия, от ми́ра к преми́рным у́м на́ш возводя́щая и все́х к позна́нию ра́зума приводя́щая! Приими́ моле́бное пе́ние от на́с, недосто́йных рабо́в Твои́х, с ве́рою и умиле́нием покланя́ющихся пред пречи́стым о́бразом Твои́м. Умоли́ Сы́на Твоего́ и Бо́га на́шего, да да́рует власте́м на́шим му́дрость и си́лу, судия́м пра́вду и нелицеприя́тие, па́стырем му́дрость духо́вную и ре́вность, наста́вником смиренному́дрие, ча́дом послуша́ние, все́м же на́м ду́х ра́зума и благоче́стия, ду́х смире́ния и кро́тости, ду́х чистоты́ и пра́вды. Пода́ждь на́м, всепе́тая Ма́ти, ума́ прибавле́ние, умири́, соедини́ во вражде́ и разделе́нии су́щия и положи́ и́м сою́з любве́ неразруши́мый, все́х заблу́ждших от неразу́мия к све́ту и́стины Христо́вы обрати́, на пу́ть стра́ха Бо́жия, воздержа́ния и трудолю́бия наста́ви, сло́во прему́дрости и душа́м поле́зное зна́ние прося́щим да́руй, осени́ на́с ве́чною ра́достию, Херуви́мов честне́йшая и Серафи́мов сла́внейшая су́щи. Мы́ же, ди́вная дела́ и многоразу́мную прему́дрость Бо́жию в ми́ре и жи́зни на́шей ви́дяще, устрани́мся земны́я суеты́ и лука́вых попече́ний, и умы́ и сердца́ на́ша на Небеса́ возведе́м, я́ко да Твои́м заступле́нием и по́мощию сла́ву, хвалу́, благодаре́ние и поклоне́ние за вся́ в Тро́ице сла́вимому Бо́гу и все́х Созда́телю воздади́м, ны́не и при́сно, и во ве́ки веко́в. Ами́нь.