Конда́к 1.

Взбра́нной Воево́де, Влады́чице на́шей Богоро́дице, пресла́вным явле́нием ико́ны Ея́ святы́я, лю́ди богоспаса́емаго гра́да Ки́ева ди́вно посети́вшей, благода́рственное возглаша́ем пе́ние. Ты́ же, я́ко Всеблага́я Засту́пнице ро́да христиа́нскаго, от вся́ких на́с бе́д свободи́, и от все́х вра́г ви́димых и неви́димых защити́, да с ве́рою Тебе́ зове́м:

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

И́кос 1.

А́нгелов Цари́це и всея́ тва́ри Влады́чице, Пречи́стая Де́во Богоро́дице, ми́лостивым явле́нием на́м о́браза Твоего́ Свята́го, дре́вле богоспаса́емый гра́д Пско́в, а ны́не гра́д Ки́ев благода́тно озари́ла еси́ и струи́ чуде́с от него́ источи́ла еси́ ве́рным. Те́мже со усе́рдием и любо́вию припа́дающе ко Пречи́стому Твоему́ о́бразу, умиле́нныя моле́ния возсыла́ем милосе́рдому Твоему́ к на́м заступле́нию и со стра́хом зове́м:

Ра́дуйся, Цари́це на́ша Преблага́я, Наде́ждо на́ша Богоро́дице; ра́дуйся, Прия́телище си́рых и стра́нных Предста́тельнице.

Ра́дуйся, скорбя́щих Ра́досте и оби́димых Покрови́тельнице; ра́дуйся, я́ко зри́ши на́шу беду́, зри́ши на́шу ско́рбь.

Ра́дуйся, я́ко помога́еши на́м, я́ко немощны́м, окормля́еши на́с, я́ко стра́нных; ра́дуйся, я́ко не и́мамы ины́я по́мощи, ра́зве Тебе́, ни ины́я Предста́тельницы.

Ра́дуйся, я́ко не и́мамы Благи́я Уте́шительницы, то́кмо Тебе́, о Богома́ти; ра́дуйся, я́ко да сохраня́еши на́с и покрыва́еши во ве́ки веко́в.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 2.

Ви́дящи милосе́рдие Твое́ неисче́тное, Всенепоро́чная Влады́чице, и мно́гая чудеса́, Тобо́ю явле́нная и присноявля́емая чрез святы́я ико́ны Твоя́, и́миже, я́ко звезда́ми богосве́тлыми, ве́сь ми́р христиа́нский украси́ла еси́, велича́ем Тя́, возвели́чившую ро́д на́ш Твои́м благоволе́нием, и с любо́вию припа́даем к чудотво́рному о́бразу Твоему́, пою́ще Сы́ну Твоему́ Христу́ Бо́гу: Аллилу́иа.

И́кос 2.

Ви́деша вси́ ве́рнии лю́ди ки́евския, я́ко святы́й о́браз Бо́жия Ма́тери чуде́сно отобрази́ся на стекле́ киво́та, зело́ удиви́шася и, со благогове́нием взира́юще на цельбоно́сную ико́ну теле́сныма очи́ма, потща́шася си́це возопи́ти Честне́йшей Херуви́м и Сла́внейшей без сравне́ния Серафи́м:

Ра́дуйся, я́ко о́браз Тво́й честны́й преди́вно, без соде́йствия ру́к челове́ческих на стекле́ киво́та отобрази́ся; ра́дуйся, все́х ве́рных явле́нием си́м зело́ возра́довавшая и умили́вшая.

Ра́дуйся, Пречи́стая, я́ко призира́я на смире́ние, слы́шиши гла́с на́ш и очища́еши вся́ беззако́ния на́ша; ра́дуйся, Де́во, ме́ртва зми́я живоно́сным Рождество́м Твои́м соде́лавшая.

Ра́дуйся, Богороди́тельнице, я́ко жи́знь нестаре́ющую улучи́ти на́м помога́еши моли́твами Твои́ми; ра́дуйся, Сло́во О́тчее ро́ждшая, пла́мень страсте́й на́ших росо́ю моли́тв Твои́х угаша́ющая.

Ра́дуйся, Блага́я Уте́шительнице, ма́терними моли́твами Твои́ми бу́ри серде́ц на́ших утиша́ющая; ра́дуйся, исправля́я моли́твы рабо́в Твои́х, разреше́ние мно́гих на́ших прегреше́ний подаю́щая.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 3.

Си́ла Вы́шняго соде́ла Тя́, Благода́тная, исто́чник неоскудева́ющ утеше́ния бе́дствующим: мно́ги бо ско́рби претерпе́вши, мо́жеши и искуша́емым по́мощи. Лю́дем же на́шим, лю́те стра́ждущим от неве́рия и заблужде́ния, благоволи́ла еси́ ми́лостивно яви́ти благода́тное сокро́вище сие́ – чудотво́рный о́браз Тво́й во хра́ме Свя́то-Введе́нском, в зна́мение ми́лости Твоея́ ко земле́ на́шей, в защи́ту от вра́г ви́димых и неви́димых; те́мже, по́мощию Бо́жиею подкрепля́еми, Спаси́телю Бо́гу пои́м: Аллилу́иа.

И́кос 3.

Я́коже дре́вле ца́рь повеле́ при Ти́хвинской ико́не бра́тии посели́тися и сла́ву, Тебе́ Пречи́стей, воспева́ти и о все́м ми́ре моли́тву приноси́ти, та́ко и ны́не повеле́ митрополи́т Ки́евский Влади́мир оби́тели бы́ти и бра́тиям собра́вшимся пред Твои́м новоявле́нным чуде́сным о́бразом моле́ния о все́х лю́дех приноси́ти и воспева́ти Ти́:

Ра́дуйся, освяти́вшая зе́млю Ки́евскую Свои́м явле́нием; ра́дуйся, утесня́емым осла́бу и свобо́ду да́рующая.

Ра́дуйся, ненака́занных Ми́лостивая Наказа́тельнице; ра́дуйся, неразу́мных Прему́драя Вразуми́тельнице.

Ра́дуйся, оби́дящих Всегро́зная Устраши́тельнице; ра́дуйся, оби́димым Всеблага́я Засту́пнице.

Ра́дуйся, ду́ха уны́ния и боя́зни отгна́ние.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 4.

Я́ко лучеза́рную звезду́, я́ко но́вое зна́мение ми́лости Своея́ яви́ла еси́ ны́не, Пренепоро́чная Де́во, ве́рным богоспаса́емаго гра́да Ки́ева, честну́ю ико́ну Твою́ «При́зри на смире́ние» в годи́ну но́вых испыта́ний, нестрое́ний и злы́х развраще́ний, врага́ми ве́ры и Оте́чества на́шего воздвиза́емых, да утверди́тся благоче́стие и да укрепи́тся ве́ра Правосла́вная в лю́дех. Мы́ же в се́м явле́нии уразуме́в зна́мение ве́лия попече́ния Бо́жия о ме́сте се́м, со тре́петом и благогове́нием глаго́лем Ти́, Цари́це Небесе́ и земли́: «Ты́ еси́ на́м щи́т непобеди́мый и стена́ необори́мая восхваля́ющим Тя́ и воспева́ющим Бо́гу пе́снь: Аллилу́иа».

И́кос 4.

Слы́шавше о ди́внем чудеси́ явле́ния святы́я ико́ны Твоея́ во гра́де Ки́еве, Преблагослове́нная Цари́це Не́ба и земли́, вси́ лю́дие подвиго́шася во хра́м Тво́й, взира́юще и дивя́щеся чудеси́ сему́, и со благогове́нием и ра́достию покланя́шеся чудотво́рному о́бразу Твоему́, хвале́бно зову́ще Ти́:

Ра́дуйся, обре́тшая благода́ть у Бо́га и бо́льше А́нгелов и все́х святы́х возвели́ченная; ра́дуйся, Ма́ти Бо́жия, кре́пкаго во бране́х Христа́ ро́ждшая, избавля́ющая на́с от печа́лей и лю́тых нападе́ний вра́жиих.

Ра́дуйся, ро́ждшая Живода́вца Христа́ несказа́нно, ме́ртвых на́с душа́ми оживотворя́ющая; ра́дуйся, Влады́чице, освяща́ющая оскверне́нныя сердца́ на́ша, Я́же Пресвято́е Сло́во ро́ждшая.

Ра́дуйся, Ми́лостивая, простира́ющая на́м ру́ку по́мощи, да спаса́еми, вы́ну ублажа́ем Тя́; ра́дуйся, Де́во Богора́дованная, кропле́нием ми́лости Твоея́ погаша́ющая у́глие страсте́й на́ших.

Ра́дуйся, уга́сший свети́льник серде́ц на́ших возжига́ющая; ра́дуйся, сотворя́ющая ми́лостива на́м Судию́, Сы́на Твоего́.

Ра́дуйся, нечи́стых страсте́й на́с свобожда́ющая и сла́вы ве́чныя сподобля́ющая.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 5.

Егда́ яви́ся чу́до от ико́ны Твоея́, ве́рнии возра́довашася, а неве́рнии удивля́хуся ка́ко сие́ мо́жет бы́ти, и, изуча́юще сие́, познава́ху си́лу Пречи́стыя, и по недо́лзе вре́мени возгласи́ша я́ко сие́ нерукотво́рно бы́сть. Мы́ же па́ки и па́ки ми́лости Твое́й дивля́хуся, упова́ем, я́ко на на́шу недосто́йную моли́тву при́зрит Госпо́дь, Ца́рь Сла́вы, и послу́шает проше́ния все́х с ве́рою призыва́ющих и́мя Твое́ свято́е, Сы́ну же Твоему́ зову́щих: Аллилу́иа.

И́кос 5

Возсия́ на́м благода́ть светоза́рная от чудотво́рныя ико́ны Твоея́, Богоизбра́нная Отрокови́це, пред не́юже со слеза́ми припа́дающе, мо́лимтися: отжени́ о́блак наше́дших на ны́ искуше́ний и бе́д, да вопие́м Ти́ ра́достно:

Ра́дуйся, Всепе́тая, Две́рь Небе́сная, отверза́ющая на́м две́рь спасе́ния; ра́дуйся, Чи́стая, ру́ку по́мощи на́м простира́ющая и из глубины́ боле́зней возводя́щая.

Ра́дуйся, Святе́йшая, Све́т Невеще́ственный ро́ждшая, тьмы́ страсте́й на́с свобожда́ющая; ра́дуйся, А́нгелов Ра́досте, пра́ведников Добро́та, ве́рных Наде́жда и соблюде́ние на́ше.

Ра́дуйся, мо́сте, к жи́зни несостаре́ющейся приводя́щий ве́рою и любо́вию Тя́ велича́ющия; ра́дуйся, вознося́щая ро́г ве́рных пою́щих Тя́, Де́во, и покланя́ющихся честно́му о́бразу Твоему́.

Ра́дуйся, наставля́ющая к доброде́тели Небе́снаго Ца́рствия и поко́я Боже́ственнаго; ра́дуйся, ру́ку по́мощи на́м подаю́щая и ко приста́нищу спаси́тельному направля́ющая.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 6.

Пропове́дник неизрече́нных чуде́с Твои́х, Ма́ти Бо́жия, яви́ся святы́й хра́м Тво́й во гра́де Ки́еве, в не́м бо да́внее Бо́жие смотре́ние о на́с Тобо́ю, Де́во Чи́стая, испо́лнися, егда́ сокрове́нное жела́ние се́рдца на́шего украси́ти пречу́дный ли́к Тво́й, Цари́це Небе́сная, драгоце́нным венце́м из ка́меней честны́х ми́лостивно услы́шала еси́, на́с же гре́шных и недосто́йных, приле́жно притека́ющих к пресла́вному о́бразу Твоему́, в покая́нии зову́щих из глубины́ души́: «Влады́чице, спаси́ ны́ погиба́ющия от мно́жества прегреше́ний на́ших», да вы́ну благодари́м и велича́ем Тя́, на́шу ско́рую и ди́вную Помо́щницу, поя́ Бо́гу: Аллилу́иа.

И́кос 6

Я́коже дре́вле иуде́и для ски́нии приноша́ху зла́то и сребро́, та́ко и лю́дие на́ши получа́юще Тобо́ю исцеле́ния, приноша́ху Ти́ сребро́ и зла́то, Пречи́стая Ски́ние, и по се́м о́браз Тво́й святы́й украси́ благоле́пными да́ры, ри́зою драго́ю и венце́м, припа́дающе Ти́ и со слеза́ми вопию́ще та́ко:

Ра́дуйся, Богоро́дице Де́во, я́ко и ражда́еши, и чи́ста по рождестве́ яви́лася еси́; ра́дуйся, Блага́я, ду́х сокруше́ния и смире́ние серде́ц на́м подаю́щая, уму́ же чистоту́ и житию́ исправле́ние.

Ра́дуйся, Всенепоро́чная, прегреше́ний оставле́ние и сле́з исто́чники на́м да́рующая; ра́дуйся, си́лою моли́тв Твои́х я́звы ду́ш на́ших исцеля́ющая.

Ра́дуйся, Ча́ше жи́зни и безсме́ртия, ко врата́м ве́чныя жи́зни на́с приводя́щая; ра́дуйся, избавля́ющая на́с от мно́гих бе́д, скорбе́й и бу́дущаго Суда́ Стра́шнаго.

Ра́дуйся, Живоно́сный Исто́чниче нетле́ния и ра́дости, жа́ждущия ду́ши на́ша напоя́ющая; ра́дуйся, Всеми́лостивая, кро́тким сия́нием Твои́м мра́к страсте́й и поро́ков на́ших разгоня́ющая.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 7.

Хотя́й Долготерпели́вый Госпо́дь яви́ти Своего́ человеколю́бия неизсле́димую щедро́т бе́здну, избра́ Тебе́ еди́ну в Ма́терь Себе́ и сотвори́ Тя́ лю́дем непреодоле́нное защище́ние: да кто́ от ни́х пра́ведным судо́м Бо́жиим осужде́ния досто́ин яви́тся, Твои́м оба́че держа́вным покро́вом сохраня́ется на покая́ние, зовы́й: Аллилу́иа.

И́кос 7

Но́вая купе́ль Силоа́мская па́че о́ныя дре́вния, яви́ся, Пречи́стая Влады́чице, хра́м Свята́го Введе́ния Твоего́, в не́мже вси́ ве́рнии покланя́ются чудотво́рней ико́не Твое́й и моле́бныя пе́ния вы́ну пред то́ю соверша́ют, да не сокры́т бу́дет исто́чник благода́тных врачева́ний все́м тре́бующим. Сего́ ра́ди и мы́ не таи́м Твои́х благодея́ний, Всенепоро́чная, но благода́рственне вопие́м:

Ра́дуйся, А́гнице, ро́ждшая А́гнца, взе́млющаго грехи́ ми́ра; ра́дуйся, красна́ душе́ю, красна́ те́лом, красна́ помышле́нием, Де́во Пречи́стая, скве́рну ду́ш на́ших очища́ющая.

Ра́дуйся, все́х Освяще́нная Се́не, исцеле́ния от дла́ней Твои́х точа́щая на́м вы́ну; ра́дуйся, виногра́д Боже́ственный, Кра́сный Гро́зд израсти́вшая, душа́м на́шим даю́щая питие́ незави́стное.

Ра́дуйся, реко́ приснотеку́щая исцеле́ний и мо́ре, вся́ на́ша стра́сти потопля́ющее; ра́дуйся, еди́на нетле́нная, в земно́м житии́ се́м покро́вом ми́лости Своея́ на́с покрыва́ющая.

Ра́дуйся, я́ко ма́терними моли́твами Твои́ми избавля́емся боле́зненных напа́стей и вся́каго вре́да душе́внаго и теле́снаго; ра́дуйся, Всеблага́я на́ша Наста́внице, за вся́ благодея́ния Твоя́ благодаре́нию на́с науча́ющая.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 8.

Все́ житие́ на́ше на земли́ боле́зненно и печа́ли испо́лнено от клеветы́, досажде́ния, укоре́ния и ины́х многови́дных бе́д и напа́стей: немоществу́ет бо те́ло, изнемога́ет и ду́х на́ш. К Тебе́ у́бо прибега́ем, Благода́тная, пред пречи́стым о́бразом Твои́м припа́дающе: испо́лни ра́дости и весе́лия ско́рбныя сердца́ на́ша, да вопие́м вы́ну Бо́гу: Аллилу́иа.

И́кос 8

Стра́нное виде́ние бы́сть челове́ку не́коему, егда́ то́й стоя́ на моли́тве и за сро́дницу, без покая́ния почи́вшую, моли́тву принося́, внеза́пу узре́ святы́й о́браз Тво́й, Влады́чице, на стене́ явле́нный, а посе́м на то́м же ме́сте саму́ почи́вшую ви́дев, Небе́сною ра́достию осия́нную. В виде́нии же се́м уразуме́в Тя́, Ма́терь Све́та, в Вы́шних пребыва́ющую и хода́тайства за живы́х и ме́ртвых Сы́ну Твоему́ вы́ну принося́щую, испо́лнися духо́вныя ра́дости и весе́лия ско́рбное се́рдце его́, и возопи́ такова́я:

Ра́дуйся, от принося́щих Тебе́ благода́рныя да́ры ли́ка Твоего́ не отвраща́ющая и почи́вшим сро́дником и́х загро́бную у́часть облегча́ющая; ра́дуйся, упова́ющим на Тя́ живота́ непосты́дный коне́ц да́рующая.

Ра́дуйся, и по сме́рти за отше́дшую на су́д Госпо́день ду́шу пред Сы́ном Твои́м неотсту́пно хода́тайствующая; ра́дуйся, скорбя́щих роди́телей в лише́нии ча́д и́х утеша́ющая благода́тною Твое́ю по́мощию.

Ра́дуйся, неуста́нная Моли́твеннице на́ша, ти́хий и безболе́зненный отхо́д из се́й юдо́ли пла́ча и ско́рби на́м низпосыла́ющая; ра́дуйся, в гро́зный ча́с сме́рти за ве́рно чту́щих Тя́ предста́тельствующая и от возду́шных мыта́рств избавля́ющая.

Ра́дуйся, Ми́лостивая, ми́лость Свою́ на́м явля́ющая в де́нь испыта́ния, в о́ньже откры́ются вся́ дела́ на́ша до́брая же и зла́я; ра́дуйся, Милосе́рдая, покая́ния гре́шников не отверга́ющая и от ро́ва поги́бели милосе́рдием Твои́м исхища́ющая.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 9.

Все́ естество́ а́нгельское похва́льная пе́сни прино́сит Тебе́, и́стинней Ма́тери Бо́жией и Засту́пнице все́х приходя́щих к Тебе́ и прося́щих Твоея́ по́мощи, я́ко тве́рдым и кре́пким Твои́м предста́тельством пра́ведных весели́ши, гре́шных заступа́еши, печа́ли утоля́еши, сро́дником на́шим почи́вшим загро́бную у́часть облегча́еши и мо́лишися о все́х на́с, ве́рою зову́щих Сы́ну Твоему́: Аллилу́иа.

И́кос 9.

Челове́честии вети́и суему́дреннии недоумева́ют позна́ти Боже́ственную та́йну Твоего́ Присноде́вства, Богоро́дице, ниже́ мо́гут изъясни́ти си́лу чудотво́рную, от ико́н святы́х Твои́х проистека́ющую, во исцеле́ние неду́жных и на вся́кую по́льзу душе́вную и теле́сную челове́ком. Мы́ же благоче́стно Ма́терь и Де́ву Тя́ испове́дающе, досто́йно хва́лим сла́вный, Влады́чице, ико́ны Твоея́ пра́здник, ве́рно покланя́емся о́бразу Твоему́ свято́му и с любо́вию вопие́м:

Ра́дуйся, Богоневе́сто, Све́т ро́ждшая Боже́ственный и Преве́чный; ра́дуйся, Ма́ти и Де́во Преблагослове́нная.

Ра́дуйся, ма́терей при́сное ра́дование; ра́дуйся, Еди́на непоро́чная и до́брая в жена́х.

Ра́дуйся, А́нгелов сла́во, сто́лп утвержде́ния и сокро́вище спасе́ния; ра́дуйся, Цари́це Небе́сная, исто́чник нетле́ния и две́рь покая́ния.

Ра́дуйся, Благосе́рдая Ма́ти все́х скорбя́щих и обремене́нных; ра́дуйся, Держа́вная Засту́пнице ро́да христиа́нскаго.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 10.

Спаси́теля па́дшему челове́честву родила́ еси́, Всенепоро́чная Де́во, и Сего́, я́ко Младе́нца во объя́тиях Твои́х носи́ла еси́, Его́же Боже́ственное изображе́ние на честне́й ико́не Твое́й на́м явля́еши и мно́гая ми́лости и щедро́ты Твоя́ на́м да́руеши. Сего́ ра́ди с ве́рою и любо́вию честву́ем о́браз чудотво́рный Тво́й, Влады́чице, и мо́лимся Тебе́ приле́жно: бу́ди покро́в и защи́та на́м в де́нь Су́дный, да Твои́м ма́терним предста́тельством поми́лует на́с Судия́ пра́ведный, Сы́н Тво́й, и сподо́бит десна́го стоя́ния и пе́ния Ему́ со все́ми избра́нными: Аллилу́иа.

И́кос 10.

Стена́ и покро́в гра́ду Пско́ву даде́ся свята́я ико́на Твоя́, Цари́це и Влады́чице, е́юже мно́гажды гра́д се́й от разоре́ния ра́тнаго сохраня́ла еси́. И ны́не на́с, гре́шных и недосто́йных ча́д Твои́х, ми́лостивно посети́ла еси́ чу́дным явле́нием пречи́стаго Твоего́ о́браза и благоутро́бно прие́млеши пред Ни́м возноси́мыя Тебе́ от благода́рных серде́ц на́ших моли́твы с пе́нием таковы́м:

Ра́дуйся, я́коже дре́вле ико́ною Успе́ния сла́вный гра́д Ки́ев мно́гажды спаса́ла еси́, та́ко и ны́не на́с пречу́дною ико́ною Твое́ю от бе́д огражда́еши; ра́дуйся, Ла́вры Ки́ево-Пече́рския сла́вная Строи́тельнице и хра́мов ея́ Всечестна́я Украси́тельнице.

Ра́дуйся, Храни́тельнице ди́вная и ины́х оби́телей святы́х, я́ко Твое́ю благода́тною си́лою о́ныя зи́ждутся и преуспева́ют в благоче́стии; ра́дуйся, просла́вившая ме́сто явле́ния ико́ны Твоея́ ди́вным чудоде́йствием и те́м ми́лость преизоби́льную на́м показа́вшая.

Ра́дуйся, Богоневе́сто Пречи́стая, святы́й ли́к Тво́й чту́щих от осужде́ния и му́к многообра́зных избавля́ющая; ра́дуйся, Многоми́лостивая Покрови́тельнице на́ша, от пречу́дныя ико́ны Твоея́ ми́лости на́м неоску́дно источа́ющая.

Ра́дуйся, Влады́чице, ма́терними моли́твами Твои́ми ду́ши на́ша от мра́чнаго сна́ возставля́ющая к Твоему́ славосло́вию; ра́дуйся, Ра́досте ми́ру, я́ко о Тебе́ ра́дуется а́нгельский собо́р и челове́ческий ро́д.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 11.

Пе́ние моле́бное на́ше с ве́рою и любо́вию возноси́мое, ми́лостивно услы́ши, Госпоже́ Влады́чице, и утро́бу щедро́т Твои́х не затвори́ на́м, Всеще́драя Богоро́дице: се́ бо обнища́вше в до́брых де́лех, к сокро́вищнице ми́лости Твоея́ – чу́дней ико́не Твое́й, со усе́рдием притека́ем, Всеблага́я, и припа́дающе к Не́й, мо́лимся: сохрани́ ны́ от тлетво́рных уче́ний, изба́ви от лука́вых совраще́ний, спаси́ Оте́чество на́ше от нестрое́ний и злы́х нападе́ний вра́жиих и сподо́би в любви́ и единомы́слии со все́ми ве́рными ча́дами Святы́я Христо́вы Це́ркви благоприя́тно пе́ти Созда́телю на́шему пе́снь: Аллилу́иа.

И́кос 11.

Све́тлыми луча́ми чуде́с немерца́емо сия́ет свята́я ико́на Твоя́, Всенепоро́чная Богоро́дице Де́во: просвеща́еши бо на́с, помраче́нных грехо́вною мгло́ю и приво́диши к немо́лчному славосло́вию Твоего́ пресвята́го и́мене. Те́мже ра́дуемся, мы́ гре́шнии, иму́ще таковы́й зало́г Твоего́ к на́м благоволе́ния, и Тебе́, ско́рой Помо́щнице на́шей, благода́рственно взыва́ем:

Ра́дуйся, Цари́це и Влады́чице, све́том Твои́м небе́сным на́с освяща́ющая и под кро́вом Твои́м вы́ну сохраня́ющая; ра́дуйся, Благослове́нная и Препросла́вленная, Ма́ти Неискусому́жная, умерщвле́нныя греха́ми ду́ши на́ша оживотворя́ющая.

Ра́дуйся, Чи́стая и Непоро́чная Де́во, Ты́ бо родила́ еси́ Сы́на, избавля́ющаго на́с от искуше́ний; ра́дуйся, Всесла́вная Влады́чице Богоро́дице, от вся́ких ны́ зо́л и скорбе́й исхища́ющая и но́зе на́ша на ка́мене боже́ственнаго спасе́ния поставля́ющая.

Ра́дуйся, Чи́стая А́гнице, Де́во, Ма́ти, Отрокови́це, чи́сты ны́ сотворя́ющая от страсте́й теле́сных; ра́дуйся, я́ко да льсти́ваго избавля́ются сете́й вси́ песносло́вящия Тя́, Богора́дованная.

Ра́дуйся, гора́ ве́лия, Ю́же Дании́л прови́де, из Нея́же честны́й ка́мень – Христо́с пло́тию облече́ся; ра́дуйся, Де́во Чи́стая, же́зл из ко́рене Иессе́ова, цветовозрасти́вший на́м Всеси́льнаго Го́спода.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 12.

Благода́ти Бо́жия свято́е и непоро́чное жили́ще, Ма́ти Го́спода Вы́шних си́л, не возгнуша́йся на́с, гре́шных и недосто́йных, воспева́ющих ми́лости от всечестны́я ико́ны Твоея́ на́м явле́нныя, и Твои́м невече́рним сия́нием озари́ на́ша те́мныя ду́ши, приводя́щи к Све́ту Трисо́лнечнаго Божества́, в Правосла́вии укрепи́ на́с, Всеблага́я, и сподо́би до коне́чнаго издыха́ния на́шего пе́ти немо́лчную пе́снь Вседержи́телю: Аллилу́иа.

И́кос 12.

Пою́ще пе́снь хвалы́ и благодаре́ния Тебе́, Богора́дованная Де́во, пропове́дуем велегла́сно вели́чие чуде́с Твои́х и бога́тство ми́лости Твоея́, на на́с и Оте́честве на́шем явле́нных, и от глубины́ серде́чныя прино́сим Тебе́ со смире́нием похва́льныя да́ры сия́:

Ра́дуйся, Правосла́вия несокруши́мая кре́посте и огра́до; ра́дуйся, Непобеди́мая Воево́до вожде́й и во́инств христиа́нских.

Ра́дуйся, нело́жное спасе́ние и Предста́тельнице ми́ра, ро́ждшая Зижди́теля, И́мже от напа́стей и боле́зней спасе́ся ми́р; ра́дуйся, мы́сленныя две́ри Жи́зни, покая́ния на́м две́ри отверза́ющая.

Ра́дуйся, Еди́на Благослове́нная, в ча́с сме́рти те́мныя зра́ки лука́вых бесо́в дале́че от на́с прогоня́ющая; ра́дуйся, Еди́на Милосе́рдая, в стра́шный де́нь Суда́ ве́чныя му́ки на́с избавля́ющая и неизрече́нныя сла́вы Сы́на Твоего́ насле́дники ны́ показу́ющая.

Ра́дуйся, Всенепоро́чная, вы́ну человеколю́бие Твое́ явля́ющая и от собла́знов и сете́й вра́жиих на́с свобожда́ющая; ра́дуйся, Пречи́стая, сотвори́вшая с на́ми зна́мение во бла́го: да ви́дят ненави́дящии на́с и постыдя́тся, я́ко Ты́ вняла́ еси́ проше́ниям на́шим и уте́шила ны́.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 13.

О Всепе́тая Ма́ти Го́спода на́шего Иису́са Христа́, неисчерпа́емое мо́ре Боже́ственных даро́в Ты́ еси́, Всесвята́я Де́во! Я́ко светопода́тельную лампа́ду, еле́ем ми́лости испо́лненную, созерца́ем Тя́ оча́ми ве́ры и кро́тким сия́нием Твои́м озаря́еми, любо́вию же Твое́ю при́сно согрева́еми, Тебе́, я́ко Благо́й Засту́пнице на́шей, со умиле́нием глаго́лем: приими́ благоутро́бно моле́бное пе́ние на́ше, пред чу́дною ико́ною Твое́ю с ве́рою Тебе́ возноси́мое, и всеси́льными моли́твами Твои́ми умоли́, Влады́чице, изба́витися на́м, гре́шным, вре́менных бе́д и ве́чныя му́ки, да, спасе́ннии Тобо́ю, просла́вим и в бу́дущей жи́зни Всесвято́е и́мя Сы́на Твоего́ и Бо́га на́шего, ве́рно зову́ще Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов Цари́це и всея́ тва́ри Влады́чице, Пречи́стая Де́во Богоро́дице, ми́лостивым явле́нием на́м о́браза Твоего́ Свята́го, дре́вле богоспаса́емый гра́д Пско́в, а ны́не гра́д Ки́ев благода́тно озари́ла еси́ и струи́ чуде́с от него́ источи́ла еси́ ве́рным. Те́мже со усе́рдием и любо́вию припа́дающе ко Пречи́стому Твоему́ о́бразу, умиле́нныя моле́ния возсыла́ем милосе́рдому Твоему́ к на́м заступле́нию и со стра́хом зове́м:

Ра́дуйся, Цари́це на́ша Преблага́я, Наде́ждо на́ша Богоро́дице; ра́дуйся, Прия́телище си́рых и стра́нных Предста́тельнице.

Ра́дуйся, скорбя́щих Ра́досте и оби́димых Покрови́тельнице; ра́дуйся, я́ко зри́ши на́шу беду́, зри́ши на́шу ско́рбь.

Ра́дуйся, я́ко помога́еши на́м, я́ко немощны́м, окормля́еши на́с, я́ко стра́нных; ра́дуйся, я́ко не и́мамы ины́я по́мощи, ра́зве Тебе́, ни ины́я Предста́тельницы.

Ра́дуйся, я́ко не и́мамы Благи́я Уте́шительницы, то́кмо Тебе́, о Богома́ти; ра́дуйся, я́ко да сохраня́еши на́с и покрыва́еши во ве́ки веко́в.

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Конда́к 1.

Взбра́нной Воево́де, Влады́чице на́шей Богоро́дице, пресла́вным явле́нием ико́ны Ея́ святы́я, лю́ди богоспаса́емаго гра́да Ки́ева ди́вно посети́вшей, благода́рственное возглаша́ем пе́ние. Ты́ же, я́ко Всеблага́я Засту́пнице ро́да христиа́нскаго, от вся́ких на́с бе́д свободи́, и от все́х вра́г ви́димых и неви́димых защити́, да с ве́рою Тебе́ зове́м:

Ра́дуйся, Пренепоро́чная Богоро́дице Де́во «При́зри на смире́ние», с высоты́ небе́сной на смире́ние рабо́в Твои́х призира́ющая.

Моли́тва.

О Пресвята́я Госпоже́, Де́во Богоро́дице, вы́шшая Херуви́м и Честне́йшая Серафи́м, Богоизбра́нная Отрокови́це! При́зри с высоты́ небе́сныя ми́лостивным Твои́м о́ком на на́с, недосто́йных рабо́в Твои́х, со умиле́нием и слеза́ми моля́щихся пред пречи́стым о́бразом Твои́м; не лиши́ на́с Твоего́ заступле́ния и покро́ва держа́внаго в стра́нствии се́м земно́м, многоско́рбнем и многомяте́жнем. Спаси́ на́с, в поги́бели и ско́рби су́щих, воздви́гни из глубины́ грехо́вныя, просвети́ у́м на́ш, омраче́нный страстьми́ и уврачу́й я́звы ду́ш и теле́с на́ших! О Всеще́драя Ма́ти Человеколюби́ваго Влады́ки! Удиви́ на на́с пребога́тыя ми́лости Твоя́, укрепи́ немощну́ю во́лю на́шу к де́ланию за́поведей Христо́вых, умягчи́ окамене́лая сердца́ на́ша любо́вию к Бо́гу и бли́жним, да́руй на́м сокруше́ние серде́чное и покая́ние и́стинное, да очи́стившеся от скве́рны грехо́вныя, сподо́бимся ми́рныя христиа́нския кончи́ны и до́браго отве́та на Стра́шнем и нелицеприя́тнем Суде́ Го́спода на́шего Иису́са Христа́, Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом подоба́ет вся́кая сла́ва, че́сть и поклоне́ние, ны́не и при́сно и во ве́ки веко́в. Ами́нь.