Конда́к 1.

Избра́нную от все́х родо́в Бо́жию Ма́терь и Цари́цу Небе́сную, непреста́нно у Престо́ла Сы́на Твоего́ моля́щуюся о на́с, с любо́вию благода́рно восхва́лим. Восхоте́в во все́х конце́х земли́ ви́дети прославле́ние вели́чия Бо́жия, возблаговоли́ла еси́, Преблагослове́нная, воздви́гнути спаси́тельныя оби́тели Своя́. Та́ко и воззре́в на страда́ния правосла́вных страны́ Прибалти́йския, посети́ла еси́ кра́й се́й Свое́ю благода́тию; да уте́шенныя Тобо́ю зове́м Ти́ си́це:

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

И́кос 1.

А́нгели на небеси́ и па́стыри эстля́ндския ве́си зело́ удиви́шася, егда́ узре́ша Ма́терь Бо́жию на горе́ стоя́щую и ру́це до́лу простира́ющую, указу́юще на ме́сто сие́ свято́е, промысли́тельне име́ющее просла́витися. Те́м же и мы́, обра́дованнии вели́цею Твое́ю к на́м ми́лостию, вопие́м Ти́:

Ра́дуйся, жре́бием Свои́м го́ру Афо́нскую наименова́вшая; ра́дуйся, мно́гими чудесы́ ико́ны Твоя́ ознаменова́вшая.

Ра́дуйся, чудотво́рною ико́ною честна́го Успе́ния Твоего́ Ки́ево-Пече́рскую Ла́вру просла́вившая; ра́дуйся, зна́мением Своея́ боже́ственныя стопы́ Поча́евскую Ла́вру освяти́вшая.

Ра́дуйся, Богоро́дицкую го́ру в Пю́хтицах Сио́ном Прибалти́йскаго кра́я соде́лавшая; ра́дуйся, Успе́нскую оби́тель зде́ основа́вшая и вели́каго па́стыря свята́го пра́веднаго Иоа́нна Кроншта́дтскаго е́й дарова́вшая.

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 2.

Ви́дяще правосла́вных тве́рдое ве́ры испове́дание и же́ртвенное и́х, да́же до кро́ви, е́реси лю́теровой противостоя́ние, нечести́вии тевто́ны в эстля́ндстей стороне́ правосла́вие же́стоко угнета́ша, святи́и хра́мы сожига́ша и разоря́ша; и всу́е преща́ша ве́рным пра́во сла́вити Христа́ Бо́га на́шего и воспева́ти Ему́: Аллилу́иа.

И́кос 2.

Разуме́в Промышле́ние Бо́жие в ди́внем явле́нии Твое́м на горе́ эстля́ндским па́стырем, лю́дие го́ру ту́ Свято́ю, Пю́хтицкою, прозва́ша и милосе́рдие Твое́ ку́пно воспе́ша:

Ра́дуйся, ми́лостивым Твои́м О́ком на угнете́ние ве́рных рабо́в Твои́х призре́вшая; ра́дуйся, ско́рби и́х ско́ро отмсти́вшая.

Ра́дуйся, Пресвята́я Ма́ти Бо́жия, под благи́й покро́в все́х собира́ющая; ра́дуйся, без святы́я по́мощи Своея́ никого́ не оставля́ющая.

Ра́дуйся, мно́гая ле́та Отра́дою и Утеше́нием Пю́хтицкаго кра́я и окре́стных ве́сей пребыва́ющая; ра́дуйся, наде́жду спасе́ния все́м подаю́щая. Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 3.

Госпожу́ Пречу́дную узре́вши, лазу́рным све́том озаре́нную, устреми́ся к не́й эстля́ндский па́стырь. Но исчезнове́нием виде́ния и па́ки его́ появле́нием умудре́н бы́в в его́ Боже́ственности, возопи́ со стра́хом: Аллилу́иа.

И́кос 3.

Ди́вное виде́ние друго́м и сро́дником стремя́ся показа́ти, призва́ и́х па́стырь, вку́пе с ни́м, воззре́ти на Госпожу́ Пречу́дную, на верху́ горы́ стоя́щую. Ви́девше же Ея́ исчезнове́ние по и́х приближе́нии и светоза́рное Ея́ сия́ние по и́х удале́нии, со стра́хом Бо́жиим воспе́ша си́це:

Ра́дуйся, го́рдым проти́вящаяся; ра́дуйся, смире́нным благода́ть подаю́щая.

Ра́дуйся, де́тскую ве́ру лжеиме́нному ра́зуму предпочита́ющая; ра́дуйся, в чудесе́х и виде́ниях Свои́х то́кмо чи́стым душа́м открыва́ющаяся.

Ра́дуйся, Ве́ро, Наде́ждо, Любы́ и Му́дросте христиа́нския; ра́дуйся, Покро́ве, не кры́ющийся от притека́ния взыску́ющих Тя́.

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 4.

Бу́рю вну́трь име́я помышле́ний сумни́тельных, селя́не ве́си се́й на ве́рх горы́ теко́ша и, доше́дше до ме́ста стоя́ния Чу́дной Госпожи́ Лазо́ревой, в расще́лине ду́ба ико́ну Успе́ния Бо́жией Ма́тери обрето́ша и го́ру сию́ Богоро́дицкою прозва́ша. С то́й поры́ у ду́ба, явле́нием святы́я ико́ны Твоея́ просла́вленнаго, часо́вню для хране́ния ея́ лю́дие правосла́вныя воздвиго́ша и кре́стными хода́ми ю́ почита́ша, ку́пно Тя́, Пречи́стая, сла́вяще и воспева́юще Бо́гу: Аллилу́иа.

И́кос 4.

Слы́шавше о чу́де явле́ния Ма́тери Бо́жией на Богоро́дицкой горе́ в Эстляндии, стека́шася лю́дие со все́х сторо́н земли́ Ру́сския, ра́довахуся ви́девше но́вое явле́ние милосе́рдия Твоего́, о Богома́ти. Сего́ ра́ди благода́рственно вопие́м Ти́ си́це:

Ра́дуйся, Преди́вная Госпоже́, на спасе́ние правосла́вных эстля́ндскаго кра́я яви́вшаяся; ра́дуйся, ми́лость Свою́ лю́дем Твои́м ниспосла́вшая.

Ра́дуйся, ико́ну святу́ю Свою́ ве́рным на поклоне́ние дарова́вшая; ра́дуйся, зна́мением мно́гих чудотворе́ний ю́ просла́вившая.

Ра́дуйся, ме́стом благочести́вых размышле́ний ду́б, освяще́нный Твои́м явле́нием, соде́лавшая; ра́дуйся, приста́нищем ско́раго слы́шания та́йных и сокруше́нных моли́тв часо́вню, храни́вшую святу́ю ико́ну Твою́, ощути́мо яви́вшая.

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 5.

Хотя́щу правосла́вным лю́дем эстля́ндския стороны́ да́ти оби́лие ви́димыя благода́ти, чрез цельбоно́сную во́ду свята́го исто́чника подава́емой, пред оча́ми па́стырей на горе́ стоя́ща, просте́ртыми дла́ньми ру́к Твои́х на исто́чник се́й указа́ла еси́. Те́м же благода́рни су́ще за такову́ю ми́лость, от Тебе́ на́м явле́нную, воспева́ем Бо́гу: Аллилу́иа.

И́кос 5.

Вся́ испо́лнися ра́дости сла́вному исто́чнику, при горе́ Пю́хтицкой лю́дем дарова́нному, в купе́ли его́ с ве́рою омыва́ющимся благода́ть и цельбу́ ще́дро подаю́щему. Сего́ ра́ди, со благодаре́нием вопие́м Ти́, Ра́дости на́шей, из бе́здны греха́ на́с воскрыля́ющей:

Ра́дуйся, ми́лостиво прие́млющая ду́ши, к Бо́гу взыва́ющия; ра́дуйся, по́мощь смире́нным неви́димо подаю́щая.

Ра́дуйся, исцеле́ние не то́кмо теле́сных, но и душе́вных я́зв от свята́го исто́чника излива́ющая; ра́дуйся, благода́ть Свою́ во святе́й воде́, по все́й Росси́йстей земли́ богомо́льцами разноси́мой, подаю́щая.

Ра́дуйся, ве́ру чи́стых серде́ц у свята́го исто́чника укрепля́ющая; ра́дуйся, ду́ши жа́ждущих к Бо́гу кре́пкому, живо́му от коне́ц земли́ незри́мо в оби́тель Свою́ собира́ющая.

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 6.

Боготе́чную звезду́, ико́ну Твою́ чудотво́рную, тевто́ны зря́ху правосла́вными почита́ему, восхоте́ша е́ресь лю́терову зде́ насади́ти и свято́е ме́сто разори́ти. Лю́дие же правосла́внии к Тебе́, Ма́ти Милосе́рдная, возопи́ша и приня́ти го́ру сию́ под покро́в Сво́й проси́ша, воспе́в Бо́гу: Аллилу́иа.

И́кос 6.

Ви́дя правосла́вие в Эстля́ндии попира́емо, а наро́д тевто́нами угнета́емь, Ца́рь Росси́йский, Вели́кий Пе́тр, с полки́ свои́ми устреми́лся еси́ на кра́й Прибалти́йский и покори́ и́. Та́ко услы́шана бы́ша моли́тва к Цари́це Небе́сней о заступле́нии правосла́вия в стране́ се́й. Сего́ ра́ди ве́рнии возопи́ша Ти́ си́це:

Ра́дуйся, ве́ры правосла́вныя непобеди́мая побо́рнице; ра́дуйся, испове́дников ве́ры незри́мая укрепи́тельнице.

Ра́дуйся, уменьше́нием гоне́ний число́ правосла́вных хра́мов зело́ умно́жившая; ра́дуйся, увеличе́нием чудотворе́ний число́ коле́блющихся в правосла́вии зело́ уме́ньшившая.

Ра́дуйся, я́ко ико́на Твоя́ новоявле́нная усе́рдием богомо́льцев злато́ю ри́зою украси́ся; ра́дуйся, я́ко по́дле дре́вней часо́вни но́вая в хра́м обраще́на бы́сть.

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 7.

Восхоте́в спасе́ния ве́рных дще́рей под покро́вом Твои́м, Богоро́дице, заложи́ оби́тель зде́ святы́й пра́ведник Кроншта́дтский и предрече́ стоя́ти е́й до сконча́ния ве́ка благоукраше́нною и долголе́тнею. Те́мже со благодаре́нием пое́м Бо́гу: Аллилу́иа.

И́кос 7.

В труде́х и моли́тве на горе́ Богоро́дицкой монасты́рь возрасте́ся и любо́вь наро́дную дале́ко за преде́лы Эстля́ндскаго кра́я сниска́. Та́ко и на се́й оби́тели сбыва́ется проро́чество Иса́иино о горе́ Сио́нстей рече́нное: «Бу́дет в после́дния дни́ явле́на гора́ Госпо́дня и до́м Бо́жий на версе́ го́р, и возвы́сится превы́ше холмо́в, и прии́дут к не́й вси́ язы́цы. И по́йдут язы́цы мно́зи, и реку́т: прииди́те, и взы́дем на го́ру Госпо́дню, и в до́м Бо́га Иа́ковля, и возвести́т на́м пу́ть Сво́й, и по́йдем по нему́». Посему́ ра́достно зове́м Ти́:

Ра́дуйся, Благода́тная, промышле́нием Бо́жиим оби́тель Пю́хтицкую созда́вшая; ра́дуйся, те́м проро́честву Иса́иину испо́лнитися посо́бившая.

Ра́дуйся, в на́ши дни́ высо́кое христиа́нское подви́жничество в жития́х блаже́нных ста́риц лю́дем показа́вшая; ра́дуйся, приме́ру и́х сле́довати все́х люде́й призва́вшая.

Ра́дуйся, си́лу прозорли́ваго благослове́ния приснопа́мятнаго ба́тюшки Иоа́нна в изоби́лии ми́лостей Бо́жиих, на оби́тель излива́емых, я́вно показу́ющая; ра́дуйся, благода́ть духо́вную с ве́рою припа́дающим к чудотво́рному о́бразу Твоему́ ще́дро подаю́щая.

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 8.

Благода́рныя па́стырю возлю́бленному своему́ сестры́ пю́хтицкия светоза́рный о́браз явле́ния Твоего́, о Пречи́стая, написа́ша и родно́му ба́тюшке дарова́ша. Ико́на сия́ а́ки фи́никс красото́ю процвете́ и с пра́ведником ди́вным до сме́рти пребыла́ еси́. О́н же до кончи́ны своея́ к Тебе́, Влады́чице Небе́сней, Горя́чия моли́твы об оби́тели Успе́нстей возноси́л еси́. Не преста́нем сла́вити Сы́на Твоего́, Милосе́рдная, ра́дость сию́ на́м ниспосла́вшаго, умиле́нно поя́: Аллилу́иа.

И́кос 8.

Пла́менне возгоре́в любо́вию к Тебе́, Пречи́стей Бо́жией Ма́тери, па́стырь Кроншта́дтский сподо́бися зре́ти Тя́, Цари́цу Небе́сную, со ико́ны Своея́ соше́дшую и сладча́йшим гла́сом ему́ ре́кшую: «Миле́йшая есте́, ча́да Отца́ Небе́снаго». На пречи́стый ли́к Тво́й, Богоро́дице, моли́твенник земли́ Росси́йския со тре́петом взира́ и ви́де о́чи до́брыя, смире́нныя, голубы́я, голуби́ныя, взыва́ душе́ю умиле́нно:

Ра́дуйся, Звездо́ пресве́тлая, Влады́чице, вся́ в сия́нии Све́та-Бо́га пребыва́ющая; ра́дуйся, Свя́тость Ве́чная, чистоту́ боже́ственную от Небе́с прии́мшая.

Ра́дуйся, преблагоукраше́нный Хра́ме Бо́жий, избра́нная Неве́сто Ду́ха Свята́го; ра́дуйся, Ма́ти Живота́, в ско́рбех и ра́достех ти́хое на́ше приста́нище.

Ра́дуйся, Всеблага́я Помо́щнице, сердца́ челове́ческия смиря́ющая; ра́дуйся, Засту́пнице, духо́в зло́бы поднебе́сных прогоня́ющая.

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 9.

Ди́вное чу́до соверши́ся, егда́ ико́на Твоя́, Влады́чице, свято́му пра́веднику дарова́нная, Про́мыслом Бо́жиим во оби́тель вно́вь возврати́ся и луча́ми све́та невече́рняго собо́р Успе́нский озари́. Та́ко в не́когда откры́вшемся в виде́нии па́стырю Кроншта́дтскому собо́рнем хра́ме богосве́тлою свеще́ю возсия́ Пю́хтицкая ико́на Твоя́, Присноде́во Непоро́чная. Те́м же, дивя́шеся таково́му Твоему́ о се́й ико́не промышле́нию, я́вно показу́ющему Твое́ к не́й благоволе́ние, умиле́нно пое́м Бо́гу: Аллилу́иа.

И́кос 9.

Вити́йство лжеиме́ннаго ра́зума недоумева́ет прославля́ти неисче́тная чудеса́ Твоя́, во святы́х Твои́х ико́нах лю́дем правосла́вным явля́емая. Чи́стии же се́рдцем и просты́я ду́ши ви́дят в ни́х то́, что́ умо́м го́рдыя, ви́дя, не ви́дят, и слы́ша, не слы́шат. Сла́вяще Твое́ ко кро́тким и смире́нным Боже́ственное благоволе́ние, вопие́м Ти́:

Ра́дуйся, в де́нь Святы́я Па́схи ве́стию о но́вом обре́тении ико́ны Твоея́ насе́льниц оби́тели Пю́хтицкия обра́довавшая; ра́дуйся, ми́лости Своя́ чрез Твое́ предста́тельство сестра́м ниспосыла́ющая.

Ра́дуйся, та́йная жела́ния и́щущих духо́внаго моли́твеннаго обще́ния с Тобо́ю исполня́ющая; ра́дуйся, пути́ и́х ко оби́тели Твое́й чуде́сно направля́ющая.

Ра́дуйся, сокрове́нная благогове́йная помышле́ния чту́щих Тя́ ве́дущая; ра́дуйся, наме́рения безразде́льно служи́ти Ти́ во оби́тели Твое́й к исполне́нию вта́йне приводя́щая.

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 10.

Спасти́ хотя́ возлюби́вших чистоту́ теле́сную, а па́че и душе́вную, создала́ еси́ Ма́терь Бо́жия оби́тели мона́шествующих, я́ко зве́зды небе́сныя, сия́ющия в ми́ре се́м, прелюбоде́йнем и гре́шнем; и, я́ко кри́ны се́льныя, де́вственною чистото́ю укра́шенныя, с по́ля необъя́тнаго земно́й юдо́ли пла́ча и ско́рби ре́вностных служи́тельниц Себе́ избра́ла еси́ и во святы́х оби́телех Свои́х упасла́ еси́. Сего́ ра́ди ублажа́ем Тя́, Неувяда́емый Цве́те Чистоты́, и воспева́ем со стра́хом Бо́гу: Аллилу́иа.

И́кос 10.

Стена́ еси́ де́вственным лико́м и и́ноческим собо́ром, Богоро́дице Де́во. Сего́ ра́ди Ты́ ве́си, кого́ избра́ти в число́ безразде́льно сла́вящих и́мя Твое́, па́че же, кого́ почти́ти игу́менским жезло́м. Дивя́ся промышле́нию Твоему́ об избра́нных Твои́х, в де́нь прибы́тия вно́вь обре́тенныя ико́ны во оби́тель Пю́хтицкую, извести́вшему игу́мению Алекси́ю о исполне́нии ея́ многоле́тния про́сьбы о сня́тии с нея́ по не́мощи настоя́тельскаго послуша́ния, вопие́м Ти́:

Ра́дуйся, в де́нь пра́зднования Боголю́бския ико́ны Твоея́, на го́ру Святу́ю во о́бразе ико́ны Пю́хтицкия прибы́вшая; ра́дуйся, те́м сле́зы престаре́лыя игу́мении осуши́вшая.

Ра́дуйся, никого́ из земноро́дных в ты́я дни́ во оби́тели Пю́хтицкия во игу́мении не поста́вившая; ра́дуйся, же́зл игу́менский во оби́тели неви́димо прии́мшая.

Ра́дуйся, Утеше́ние на́ше и Наде́ждо спасе́ния; ра́дуйся, Ра́досте на́ша несказа́нная.

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 11.

Пе́ние хвале́бное вы́ну возно́сит Ти́ ли́к и́ноческий, восхваля́я но́вое чуде́сное явле́ние ико́ны Твоея́ вдове́ свяще́нника, мона́хине Евфроси́нии, в со́нном виде́нии о́браз Тво́й узре́вшей, дото́ле е́й неве́домый. Слы́шав же Боже́ственный гла́с, глаго́лющий: «Тебе́ помогу́ сию́ ико́ну найти́. Ищи́ ю́ на горе́», — до́лго иска́ла ю́ и обре́те во оби́тели Пю́хтицкой, и, ра́достно призна́в ви́денный во сне́ Тво́й светоза́рный ли́к, Пречи́стая, благода́рно возопи́: Аллилу́иа.

И́кос 11.

Светопода́тельную свещу́ су́щим во тьме́ греха́ и юдо́ли пла́ча яви́вшуюся, зри́м Святу́ю Де́ву, над горо́ю Богоро́дицкою стоя́щую и ру́це Своя́ до́лу простира́ющую, жела́я возвести́ все́х тружда́ющихся и обремене́нных из мра́ка богоотсту́пническаго живота́ сего́ к све́ту богопозна́ния. Упова́я на Твое́ всемо́щное предста́тельство у Престо́ла Сы́на Твоего́, Христа́ Бо́га на́шего, и на Твое́ нелицеприя́тное попече́ние о душе́ христиа́нстей, ко Го́споду стремя́щейся, вопие́м Ти́ си́це:

Ра́дуйся, и́щущих спасе́ния и уедине́ннаго сопребыва́ния с Го́сподом зря́щая; ра́дуйся, гла́д духо́вный а́лчущих и жа́ждущих пра́вды ще́дро утоля́ющая.

Ра́дуйся, роди́телей, оскорбля́емых ча́дами, отступи́вшими от Го́спода, еди́нственное утеше́ние; ра́дуйся, ча́д, гони́мых роди́телями, Бо́га забы́вших, необори́мое укрепле́ние.

Ра́дуйся, пла́чущих по усо́пшим христиа́нское упова́ние; ра́дуйся, ча́ющих жи́зни ве́чныя со Христо́м, непосты́дное в не́й увере́ние.

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 12.

Благода́ть Бо́жия пребыва́ет в чудесе́х пресла́вных от святы́х ико́н Твои́х по все́й земли́ Росси́йстей явле́нных, Пречи́стая и Преблагослове́нная Богоро́дице Де́во. Ви́дя благода́ть сию́, я́вно де́йствующую во о́бразех Твои́х, Пю́хтицкой оби́тели чуде́сно дарова́нных, и зря́ в се́м осо́бое промышле́ние Твое́ о Сио́не Прибалти́йскаго кра́я, благода́рно пое́м Промысли́телю Бо́гу: Аллилу́иа.

И́кос 12.

Пою́ще вся́ ди́вная чудеса́ Твоя́ от святы́х ико́н Твои́х, о Ма́ти Христа́ Бо́га на́шего, про́сим и мо́лим Тя́: не отыми́ от на́с ми́лости Твоя́ безме́рныя за отступле́ния, богохуле́ния, отрече́ние от ве́ры правосла́вныя и ины́я грехи́ во оскорбле́ние и́мени Бо́жия на́ми соверше́нныя, но сподо́би на́с до конца́ живота́ на́шего во гресе́х соде́янных раска́ятися и прославля́ти Тя́, Невмести́маго Вмести́вшую, воспева́я Тебе́ си́це:

Ра́дуйся, Цве́те Де́вства, же́зл игу́менский во святы́х оби́телех Твои́х незри́мо держа́щая; ра́дуйся, Богоро́дице Одиги́трие, христиа́н упова́ние.

Ра́дуйся, Блага́я Скоропослу́шнице, вся́ проше́ния на́ша во бла́го исполня́ющая; ра́дуйся, Ра́досте на́ша, ско́рби и печа́ли в ра́дость претворя́ющая.

Ра́дуйся, Благода́тная, луча́ми вели́кия Своея́ ми́лости все́х освеща́ющая; ра́дуйся, Обра́дованная, во Успе́нии Твое́м на́с не оставля́ющая.

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 13.

О Всепе́тая Ма́ти, Любвеоби́льная Засту́пнице правосла́вных люде́й Твои́х, стра́ждущих в безу́мнем ми́ре се́м. При́зри на ско́рби и ну́жды на́ша, услы́ши моле́ния на́ша, во смире́нии из глубины́ уста́лых серде́ц Тебе́ возноси́мыя. Очи́сти грехи́ на́ша и сподо́би на́с до конца́ дне́й на́ших нелицеме́рно взыва́ти Воплоти́вшемуся от Тебе́ Спаси́телю на́шему: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгели на небеси́ и па́стыри эстля́ндския ве́си зело́ удиви́шася, егда́ узре́ша Ма́терь Бо́жию на горе́ стоя́щую и ру́це до́лу простира́ющую, указу́юще на ме́сто сие́ свято́е, промысли́тельне име́ющее просла́витися. Те́м же и мы́, обра́дованнии вели́цею Твое́ю к на́м ми́лостию, вопие́м Ти́:

Ра́дуйся, жре́бием Свои́м го́ру Афо́нскую наименова́вшая; ра́дуйся, мно́гими чудесы́ ико́ны Твоя́ ознаменова́вшая.

Ра́дуйся, чудотво́рною ико́ною честна́го Успе́ния Твоего́ Ки́ево-Пече́рскую Ла́вру просла́вившая; ра́дуйся, зна́мением Своея́ боже́ственныя стопы́ Поча́евскую Ла́вру освяти́вшая.

Ра́дуйся, Богоро́дицкую го́ру в Пю́хтицах Сио́ном Прибалти́йскаго кра́я соде́лавшая; ра́дуйся, Успе́нскую оби́тель зде́ основа́вшая и вели́каго па́стыря свята́го пра́веднаго Иоа́нна Кроншта́дтскаго е́й дарова́вшая.

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Конда́к 1.

Избра́нную от все́х родо́в Бо́жию Ма́терь и Цари́цу Небе́сную, непреста́нно у Престо́ла Сы́на Твоего́ моля́щуюся о на́с, с любо́вию благода́рно восхва́лим. Восхоте́в во все́х конце́х земли́ ви́дети прославле́ние вели́чия Бо́жия, возблаговоли́ла еси́, Преблагослове́нная, воздви́гнути спаси́тельныя оби́тели Своя́. Та́ко и воззре́в на страда́ния правосла́вных страны́ Прибалти́йския, посети́ла еси́ кра́й се́й Свое́ю благода́тию; да уте́шенныя Тобо́ю зове́м Ти́ си́це:

Ра́дуйся, Любвеоби́льная, сле́зы серде́ц на́ших ми́лостивно осуша́ющая.

Моли́тва.

О Пресвята́я и Преблагослове́нная Ма́ти Сладча́йшаго Го́спода на́шего Иису́са Христа́! Припа́даем и покланя́емся Тебе́ пред светоза́рным о́бразом Твои́м и смире́нно мо́лим: прости́, Всеми́лостивая, вся́ заблужде́ния на́ша и вся́ оскорбле́ния, в ве́дении или́ в неве́дении Сы́ну Твоему́ и Спаси́телю на́шему от ю́ности оби́льно нанесе́нныя неисполне́нием за́поведей Его́ святы́х, небреже́нием к святы́не, нераде́нием в моли́тве и нетерпе́нием в несе́нии креста́ на́шего. При́зри на жа́жду спасе́ния и поси́льныя труды́ и пребу́ди с многогре́шным, но оста́вшимся ве́рным Сы́ну Твоему́ ма́лым Его́ стадо́м по нело́жному сло́ву Его́, во Святе́м Ева́нгелии рече́нному: «Не бо́йся, ма́лое ста́до: я́ко благоизво́ли Оте́ц ва́ш да́ти ва́м Ца́рство». О Животворя́щий Исто́чниче на́шего утеше́ния, к Тебе́ возно́сим смире́нное сие́ моле́ние и про́сим Ма́терняго Твоего́ о на́с заступле́ния пред Престо́лом Отца́ на́шего Небе́снаго. Не лиши́ на́с Ца́рства сего́ благода́тнаго за премно́гия грехи́ на́ша, и́бо ве́мы, я́ко ничто́ вне́шнее и самолюби́вое, го́рдое и тщесла́вное, ни сла́вныя достиже́ния мирски́я, ни доброде́тели, с та́йным самолюбова́нием соверша́емыя, ни степе́ни, ни чи́ны, ни са́мое и́ноческое зва́ние не возмо́гут возвести́ на́с в Ца́рствие Небе́сное, то́кмо се́рдце чи́стое и ду́х сокруше́нный и смире́нный, за мно́гия моли́твенныя труды́ Ду́хом Святы́м да́руемыя. Помози́ на́м оста́вшияся дни́ жи́зни на́шея в ду́хе и и́стине покланя́тися Сы́ну Твоему́, Милосе́рдная Богоро́дице, и, стяжа́в нелицеме́рную любо́вь к Бо́гу и бли́жнему, испо́лнити сию́ пе́рвейшую за́поведь Госпо́дню, еди́нственно приводя́щую в Ца́рство Небе́сное. Не взира́я на недосто́инство на́ше, сподо́би на́с соде́латися ча́дами Бо́жиими по благода́ти и насле́довати жи́знь ве́чную со все́ми, в покая́нии Бо́гу угоди́вшими, и введи́ на́с, Ма́ти Бо́жия, я́звами Сы́на Твоего́ Иису́са Прети́хаго в Небе́сный Черто́г Его́, дабы́ ве́чно сла́вити и воспева́ти Пречестно́е и Великоле́пое и́мя Всесвяты́я Тро́ицы Отца́ и Сы́на и Свята́го Ду́ха ны́не и при́сно и во ве́ки веко́в. Ами́нь.