Конда́к 1.

Избра́нней Де́ве Мари́и, превы́шшей все́х дще́рей земли́, Ма́тери Сы́на Бо́жия, Е́юже Спаси́тель в ми́р прии́де, со умиле́нием взыва́ем: воззри́ на многоско́рбное житие́ на́ше, воспомяни́ ско́рби и боле́зни, я́же претерпе́ла еси́, и сотвори́ с на́ми по милосе́рдию Твоему́, да зове́м Ти́:

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

И́кос 1.

А́нгел возвести́ па́стырем вифлее́мским о рождестве́ Спаси́теля ми́ра, и с ни́м мно́жество во́ев Небе́сных восхваля́ху Бо́га, пою́ще: сла́ва в вы́шних Бо́гу, и на земли́ ми́р, в челове́цех благоволе́ние. Ты́ же, о Ма́ти Бо́жия, не име́вши где́ главы́ приклони́ти, зане́ не бе́ ме́ста во оби́телех, родила́ еси́ Сы́на Своего́ пе́рвенца в верте́пе, пови́ла еси́ пелена́ми и положи́ла еси́ Его́ во я́слех. Те́мже ра́дость неизрече́нную се́рдца Твоего́ ве́дуще, вопие́м Ти́:

Ра́дуйся, от младе́нства гряду́щему Месси́и послужи́ти возжеле́вшая; ра́дуйся, чистоту́ па́че все́х челове́к возлю́бльшая.

Ра́дуйся, пречу́дное Благове́стие Арха́нгелом прии́мшая; ра́дуйся, Спаси́теля ми́ра ро́ждшая.

Ра́дуйся, воплоти́вшагося Бо́га слове́сный сосу́де; ра́дуйся, Царя́ ца́рствующих престо́ле.

Ра́дуйся, верте́п в Небеса́ прело́жшая; ра́дуйся, в рождестве́ и по рождестве́ Де́ва пребы́вшая.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 2.

Ви́дяще преве́чнаго Младе́нца пови́та, лежа́ща во я́слех, прише́дше, поклони́шася Ему́ па́стырие вифлее́мстии и глаго́лаша рече́нное и́м А́нгелы о Отроча́ти. Мариа́м же соблюда́ше вся́ глаго́лы сия́, слага́ющи в се́рдцы Свое́м. По проше́ствии же осми́ дне́й обре́зан бе́ Иису́с по зако́ну Моисе́ову я́ко Челове́к. Воспева́юще смире́ние и терпе́ние Твое́ в попече́ниих о Богомладе́нце Иису́се, Пресвята́я Богоро́дице, пое́м Всеблаго́му Бо́гу: Аллилу́иа.

И́кос 2.

Ра́зум иму́ща, в Бо́зе утвержде́нный, и соблюда́юща за́поведи Бо́жия, в четыредеся́тый де́нь, егда́ испо́лнишася дни́е очище́ния, вознесо́ста Иису́са во Иерусали́м роди́теля Его́, е́же поста́вити Его́ пред Го́сподем и да́ти за Него́ же́ртву, по рече́нному в Зако́не Госпо́дни. Мы́ же, со благогове́нием о се́м воспомина́юще, возглаша́ем Богоро́дице си́це:

Ра́дуйся, пре́жде рождества́ в Ма́терь Спа́су предызбра́нная; ра́дуйся, благода́ти преиспо́лненная.

Ра́дуйся, преве́чнаго Младе́нца пелена́ми пови́вшая; ра́дуйся, Творца́ вселе́нныя млеко́м пита́вшая.

Ра́дуйся, Созда́теля во хра́м Иерусали́мский прине́сшая; ра́дуйся, та́мо ста́рцем Симео́ном ра́достно сре́тенная.

Ра́дуйся, вся́ глаго́лы Бо́жия в се́рдцы Свое́м слага́вшая; ра́дуйся, го́рькому проро́честву о Страда́ниих Сы́на Твоего́ кро́тко вне́млющая.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 3.

Си́лою свы́ше укрепля́ема была́ еси́, Ма́ти Бо́жия, слы́шащи словеса́ пра́веднаго Симео́на: се́, лежи́т Се́й на паде́ние и на воста́ние мно́гим во Изра́или, и в зна́мение пререка́емо, и Тебе́ же Само́й ду́шу про́йдет ору́жие, я́ко да откры́ются от мно́гих серде́ц помышле́ния. Ско́рбь ве́лия уязви́ се́рдце Пресвяты́я Богоро́дицы, оба́че благода́тию Боже́ственною осеня́ема, возопи́ Бо́гу: Аллилу́иа.

И́кос 3.

Име́я зло́бу лю́тую в се́рдцы свое́м, тща́ся И́род погуби́ти Отроча́, и посла́ изби́ти вся́ младе́нцы, су́щия в Вифлее́ме и преде́лех его́, от двою́ ле́ту и нижа́йше. Оба́че веле́нием Бо́жиим, А́нгелом во сне́ возвеще́нным, поя́т Ио́сиф Отроча́ и Ма́терь Его́ но́щию и бежа́ во Еги́пет, и пребы́сть та́мо до сме́рти И́родовы. Сия́ многотру́дная стра́нствия, ра́ди Богомладе́нца подъя́тая, воспомина́юще, со умиле́нием воспое́м Ти́, Пресвята́я Богоро́дице:

Ра́дуйся, тяготы́ путеше́ствия да́льняго терпели́вно поне́сшая; ра́дуйся, и́долы, сокру́шшияся си́лою Сы́на Твоего́, зре́вшая.

Ра́дуйся, посреде́ нечести́вых язы́чник жи́ти не убоя́вшаяся; ра́дуйся, веле́нием Бо́жиим в Назаре́т с Сы́ном и Обру́чником возвра́щшаяся.

Ра́дуйся, в нищете́ и труде́х, благодаря́щи Бо́га, пребыва́вшая; ра́дуйся, пресла́дкаго Богомладе́нца во объя́тиих носи́вшая.

Ра́дуйся, преди́вная дела́ Боже́ственнаго Сы́на вы́ну созерца́вшая; ра́дуйся, та́инственным глаго́лом Его́ приле́жно внима́вшая.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 4.

Бу́ря ско́рби одержа́ Пречи́стую Ма́терь со Обру́чником, егда́ на пути́ от Иерусали́ма не обрето́ста во дружи́не О́трока Иису́са. Возврати́вшася же во Иерусали́м, по трие́х дне́х обрето́ста Его́ в це́ркви, седя́ща посреде́ учи́телей, послу́шающа и вопроша́юща и́х, и рече́ к Нему́ Ма́ти Его́: Ча́до, что́ сотвори́ на́ма та́ко? Се́ оте́ц Тво́й и А́з, боля́ща, иска́хома Тебе́. И рече́ к ни́ма Иису́с: что́ я́ко иска́ста Мене́? Не ве́ста ли, я́ко в те́х, я́же Отца́ Моего́, досто́ит бы́ти Ми́? Ты́ же, Пречи́стая, дивя́щися глаго́лом Сы́на Своего́, соблюда́ше сия́ в се́рдцы Свое́м, вопию́щи Бо́гу: Аллилу́иа.

И́кос 4.

Слы́шаша лю́дие, я́ко Госпо́дь Иису́с прохо́дит страну́ Галиле́йскую, уча́ на со́нмищих, пропове́дуя Ева́нгелие Ца́рствия и исцеля́я вся́к неду́г и вся́ку я́зю в лю́дех. Сего́ ра́ди приведо́ша к Нему́ вся́ боля́щия разли́чными неду́ги и бе́сы одержи́мыя, и исцели́ и́х. Ты́ же, Ма́ти Бо́жия, Симео́ново прорече́ние воспомина́ющи, разуме́ла еси́, я́ко ско́ро прии́дет ча́с, егда́ Сы́н Тво́й Себе́ в Же́ртву за грехи́ ми́ра принесе́т. Те́мже ублажа́ем Тя́ си́це:

Ра́дуйся, Цари́це Небесе́ и земли́; ра́дуйся, та́инственная духо́вная ски́ние.

Ра́дуйся, Себе́ в чи́стую же́ртву Бо́гу прине́сшая; ра́дуйся, Херуви́м честне́йшая и Серафи́м сла́внейшая.

Ра́дуйся, ми́р от пото́па грехо́внаго спа́сшая; ра́дуйся, главу́ дре́вняго зми́я сте́ршая.

Ра́дуйся, еди́на Чи́стая и Благослове́нная в жена́х; ра́дуйся, благода́ти Ду́ха Свята́го избра́нный сосу́де.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 5.

Бо́г Сы́й и́стинен и Челове́к соверше́н, облича́ше Иису́с го́рдость фарисе́ов, мне́вших себе́ пра́ведники бы́ти. Ти́и же, слы́шаще при́тчи Его́, разуме́ша, я́ко о ни́х глаго́лет, и иска́ша я́ти Его́, оба́че боя́шася наро́да, поне́же я́ко проро́ка Его́ име́яху. Сию́ зло́бу богоуби́йственную ве́дущи, боле́зноваше Богоро́дица о Сы́не Свое́м возлю́бленнем, да не ка́ко лю́тии врази́ убию́т Его́. Оба́че Бо́гу, та́инство спасе́ния на́шего содева́ющему, с наде́ждею взыва́ше: Аллилу́иа.

И́кос 5.

Ви́девше воскреше́ние Ла́зарево, идо́ша не́цыи от иуде́й к фарисе́ом и пове́даша, я́же сотвори́ Иису́с. Рече́ же Каиа́фа, архиере́й сы́й ле́ту тому́, в фарисе́йстем со́нмищи: у́не е́сть на́м, да еди́н Челове́к у́мрет за лю́ди, а не ве́сь язы́к поги́бнет. И от сего́ дне́ совеща́ша, да убию́т Его́. Иу́да же Искарио́тский, еди́н от обоюна́десяте, и́де ко архиере́ом, преда́ти хотя́ Учи́теля своего́; они́ же, слы́шавше, возра́довашася и обеща́ша ему́ сре́бреники да́ти. Сему́ беззако́нному сове́ту ужаса́ющеся, вопие́м Пречи́стей, Сы́ну Своему́ спострада́вшей:

Ра́дуйся, кре́ст скорбе́й ве́лиих поне́сшая; ра́дуйся, во́ли Бо́жия николи́же преслу́шавшая.

Ра́дуйся, смире́ния Боже́ственнаго чу́дный о́бразе; ра́дуйся, терпе́ния прему́драя Наста́внице.

Ра́дуйся, земны́я сла́дости и весе́лия не возлю́бльшая; ра́дуйся, Небе́снаго блаже́нства па́че А́нгел и челове́к испо́лненная.

Ра́дуйся, в моли́тве по́мощь вы́ну обрета́вшая; ра́дуйся, вся́ ны́ взыва́ти к Бо́гу в ско́рби научи́вшая.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 6.

Пропове́дником Сло́ва, боже́ственным ученико́м на та́йней Ве́чери умы́ Учи́тель но́ги, о́браз спаси́тельнаго смире́ния показу́я. Явля́я же любо́вь Свою́ к ро́ду челове́ческому, благослови́в и преломи́в хле́б, даде́ и́м, ре́к: приими́те, яди́те, сие́ е́сть Те́ло Мое́, и, прие́м ча́шу и хвалу́ возда́в, даде́ и́м, глаго́ля: сия́ е́сть Кро́вь Моя́ Но́ваго Заве́та, я́же за мно́гия излива́емая во оставле́ние грехо́в. Благодаря́ще ми́лостиваго Бо́га за милосе́рдие Его́ к на́м неизрече́нное, в та́инстве Боже́ственныя Евхари́стии явля́емое, пое́м Ему́: Аллилу́иа.

И́кос 6.

Возсия́ благода́ть и и́стина ученико́м, егда́ возвести́ и́м Христо́с: ны́не просла́вися Сы́н Челове́ческий, и Бо́г просла́вися о Не́м. Вне́млюще си́м словесе́м Боже́ственным и домострои́тельству спасе́ния на́шего дивя́щеся, Тебе́, Пречи́стей Ма́тери Спаси́теля на́шего, возглаша́ем:

Ра́дуйся, Отца́ Небе́снаго Дщи́ благослове́нная; ра́дуйся, черто́же Сло́ва всесвяты́й.

Ра́дуйся, Ду́ха Свята́го вмести́лище; ра́дуйся, Святы́я Тро́ицы оби́теле.

Ра́дуйся, Би́сер Боже́ственный произве́дшая; ра́дуйся, рождество́м Твои́м ра́йския две́ри отве́рзшая.

Ра́дуйся, зна́мения ми́лости Бо́жия Собо́ю явля́ющая; ра́дуйся, от ти́ны грехо́вныя на́с спаса́ющая.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 7.

Жела́нием возжеле́х сию́ па́сху я́сти с ва́ми, пре́жде да́же не прииму́ му́к, глаго́ла Христо́с ученико́м. Утвержда́я же и́х за́поведи Его́ храни́ти, обеща́ посла́ти ина́го Уте́шителя, Ду́ха и́стины, И́же от Отца́ исхо́дит, да наста́вит и́х на вся́ку и́стину. Егда́ же в де́нь святы́я пятьдеся́тницы испо́лни Ду́х Святы́й Пречи́стую Богоро́дицу и апо́столы, откры́шася и́м вся́ глаго́ланная от Го́спода, и возгласи́ша ти́и: Аллилу́иа.

И́кос 7.

Но́вую за́поведь даде́ Спаси́тель ученико́м Свои́м: да лю́бите дру́г дру́га; я́коже возлюби́х вы́, да и вы́ лю́бите себе́. О се́м разуме́ют вси́, я́ко Мои́ ученицы́ есте́, а́ще любо́вь и́мате между́ собо́ю. Ты́ же, о Ма́ти Госпо́дня, па́че все́х челове́к глаго́лом Сы́на Твоего́ внима́вшая и с любо́вию ты́я храни́вшая, милосе́рдие неисчерпа́емое к ро́ду челове́ческому и́маши, вы́ну о на́с пред Го́сподем хода́тайствуеши, дру́г дру́га люби́ти повелева́еши и сердца́ на́ша зла́я умягча́еши. Сего́ ра́ди пое́м Ти́:

Ра́дуйся, братолю́бия Наста́внице; ра́дуйся, вражду́ющих умире́ние.

Ра́дуйся, безчи́нных Обличи́тельнице; ра́дуйся, оби́димых Уте́шительнице.

Ра́дуйся, гони́мых защище́ние; ра́дуйся, все́х скорбя́щих ра́досте.

Ра́дуйся, утоле́ние все́х печа́лей; ра́дуйся, непреста́нно за ны́ моля́щаяся.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 8.

Стра́нствия Влады́чня и безсме́ртныя Трапе́зы причасти́вшиися, изыдо́ша ученицы́ со Учи́телем на го́ру Елео́нскую. Прии́де же та́мо Иу́да со спи́рою и слуги́ архиере́йскими, лобза́нием предая́ Сы́на Челове́ческаго. Ти́и я́ша Иису́са и связа́ша Его́, и ведо́ша ко А́нне пе́рвее, посе́м же к Каиа́фе архиере́ови и в прето́р к Пила́ту, глаго́люще Его́ злоде́я бы́ти. Ма́ти же Бо́жия, сме́ртнаго сове́та на Сы́на Своего́ возлю́бленнаго ожида́ющи, оба́че со смире́нием вся́ сия́ прие́млющи, вопия́ше Бо́гу: Аллилу́иа.

И́кос 8.

Ве́сь бе́ ра́нами уя́звен, Сло́ве Бо́жий, егда́ во́ини руга́хуся Тебе́, уже́ стра́шное бичева́ние претерпе́вшему, и спле́тше вене́ц от те́рния, возложи́ша на главу́ Твою́, и в ри́зу багря́ну обле́кше Тя́, глаго́лаху: ра́дуйся, Царю́ Иуде́йский, и бия́ху Тя́ по лани́тома. Иуде́и, я́ко зве́рие ди́вии, вопия́ху Пила́ту: распни́ Его́! Мы́ же Ма́тери Бо́жией, бие́ния и поноше́ния Сы́на Своего́ ви́девшей и го́рце страда́вшей, уми́льно взыва́ем:

Ра́дуйся, Сы́на Своего́ возлю́бленнаго на суди́ще пре́даннаго зре́вшая; ра́дуйся, беззако́нный су́д злочести́вых суде́й слы́шавшая.

Ра́дуйся, все́м боле́знем возлю́бленнаго Ча́да спострада́вшая; ра́дуйся, зре́ние нестерпи́мое Страсте́й Его́ претерпе́вшая.

Ра́дуйся, бли́з Сы́на и Бо́га стра́ждущаго вы́ну пребыва́вшая; ра́дуйся, ра́ны, багряни́цу и вене́ц терно́вен Нося́щаго ви́девшая.

Ра́дуйся, ро́пота ника́коже допусти́вшая; ра́дуйся, Искупле́ния челове́ков соверше́ние уразумева́вшая.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 9.

Вси́ ро́ди блажа́т Тя́, честне́йшую Херуви́м и сла́внейшую без сравне́ния Серафи́м, Влады́чицу и Ма́терь Изба́вителя на́шего, рождество́м бо Твои́м ра́дость всему́ ми́ру принесла́ еси́, последи́ же ско́рбь ве́лию име́ла еси́, ви́дящи Сы́на Своего́ возлю́бленнаго на поруга́ние, бие́ние и сме́рть пре́даннаго. Мы́ же умиле́нное пе́ние прино́сим Ти́, Пречи́стая, вопию́ще Всемогу́щему Бо́гу: Аллилу́иа.

И́кос 9.

Вети́и многовеща́ннии та́инства спаси́тельнаго Кре́стнаго разуме́ти не мо́гут. Кре́ст бо нося́, взы́де Госпо́дь на Голго́фу, иде́же во́ини пропя́ша Его́. Богома́ти же, ви́девши Сы́на Своего́ безсла́вна, на́га на дре́ве, возопи́: увы́ Мне́, Ча́до Мое́, увы́ Мне́, Све́те Мо́й, ду́шу про́йде Мне́ ору́жие по рече́нию пра́веднаго Симео́на. Иису́с же, ви́дев Ма́терь и ученика́, его́же любля́ше, глаго́ла Ма́тери Свое́й: Же́но, се́ сы́н Тво́й; пото́м глаго́ла ученику́: се́ Ма́ти твоя́. Сего́ ра́ди взыва́ем Ти́, челове́ки вся́ о Го́споде в сыновство́ прия́вшей:

Ра́дуйся, при Кресте́ Распя́таго неотсту́пно предстоя́вшая; ра́дуйся, оста́вленнаго все́ми Сы́на и Го́спода не оста́вльшая.

Ра́дуйся, го́рце се́рдцем боле́зновавшая; ра́дуйся, стена́ния и сле́зы те́плыя источа́вшая.

Ра́дуйся, А́гнца, за челове́ки закла́ннаго, Ма́ти; ра́дуйся, Страда́ний Спаси́теля Соприча́стнице.

Ра́дуйся, вся́кою я́звою с Ни́м уязвля́вшаяся; ра́дуйся, в му́ках го́рьких на Бо́га упова́вшая.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 10.

Спасти́ хотя́ ро́д челове́ческий, возше́л еси́ на Кре́ст, Иису́се Спа́се на́ш. Чи́стая же Де́ва, пла́чущи, глаго́лаше: Сы́не Мо́й и Бо́же Предве́чный, Тво́рче все́х тва́рей, Го́споди! Ка́ко терпи́ши на Кресте́ Стра́сть? О стра́шнем Твое́м рождестве́ и стра́ннем, Сы́не Мо́й, па́че все́х ма́терей возвели́чена бы́х А́з, но увы́ Мне́: ны́не Тя́ ви́дящи на Дре́ве, распала́юся утро́бою. Прославля́юще милосе́рдие Отца́ Небе́снаго, И́же та́ко возлюби́ ми́р, я́ко Сы́на Своего́ Единоро́днаго отдаде́ на кре́стную сме́рть, да иску́пит ны́ от ве́чныя сме́рти, вопие́м Ему́: Аллилу́иа.

И́кос 10.

Стена́ и огражде́ние бу́ди на́м, Влады́чице, изнемога́ющим в ско́рбех и боле́знех, Ты́ бо люте́йшую па́че все́х боле́знь претерпе́ла еси́, Сы́на Своего́ на Кресте́ уме́рша зря́щи и стеня́щи: се́, Све́т Мо́й сла́дкий, Наде́жда и Живо́т Мо́й благи́й, Бо́г Мо́й, угасе́ на Кресте́, и проси́ла еси́ благообра́знаго: потщи́ся, Ио́сифе, к Пила́ту приступи́ти и проси́ его́ сня́ти с Дре́ва Учи́теля твоего́. Мы́ же, со благогове́нием вели́чию терпе́ния Твоего́ вне́млюще, состра́ждем Ти́ и вопие́м:

Ра́дуйся, Све́та Своего́ сла́дкаго на́га и уя́звена мертвеца́ зре́вшая; ра́дуйся, ме́ртва и бездыха́нна Преблага́го Го́спода ви́девшая.

Ра́дуйся, те́ло Сы́на Твоего́ возлю́бленнаго лобыза́вшая; ра́дуйся, плащани́цею Обви́таго рыда́вшая.

Ра́дуйся, Сы́на Своего́ Гро́бу преда́вшая; ра́дуйся, вся́ я́же на земли́ ско́рбная претерпе́вшая.

Ра́дуйся, стра́ждущих благода́тная Уте́шительнице; ра́дуйся, та́йну кре́стнаго пути́ на́м открыва́ющая.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 11.

Пе́ние всеумиле́нное Тебе́, Спаси́телю ми́ра, прино́сим, на Кресте́ ду́х испусти́вшему и согреше́ний на́ших рукописа́ние растерза́вшему. Пречи́стей же Ма́тери в та́йне Ты́ провеща́л еси́: о, ка́ко утаи́лася Тебе́ е́сть бе́здна щедро́т? Тва́рь бо Мою́ хотя́ спасти́, изво́лих умре́ти. Но и воскре́сну, и Тебе́ возвели́чу, я́ко Бо́г Небесе́ и земли́. Богоро́дица же рече́: воспою́ милосе́рдие Твое́, Человеколю́бче, покланя́юся бога́тству ми́лости Твоея́, Влады́ко. Созда́ние бо Твое́ хотя́ спасти́, сме́рть подъя́л еси́, но Воскресе́нием Твои́м, Спа́се, поми́луй все́х на́с, вопию́щих Тебе́: Аллилу́иа.

И́кос 11.

Светоно́сный Арха́нгел ра́дуйся па́ки возвести́ Тебе́, Де́во: Тво́й Сы́н воскре́се тридне́вен от Гро́ба и ме́ртвыя воздви́гнувый! И печа́ль Твоя́ в ра́дость ве́лию преложи́ся. Ны́не же ико́на Твоя́, Семистре́льная имену́емая, страда́ния Твоя́ изобража́ющая, возвеща́ет на́м та́инство Креста́, в не́мже благода́тная ра́дость сокрове́на е́сть, и и́мже вси́ ка́ющиися Воскресе́ние срета́ют и на Небеса́ восхо́дят, Пресвяте́й Богоро́дице зову́ще:

Ра́дуйся, живоно́снаго Гро́ба отлучи́тися не восхоте́вшая; ра́дуйся, пре́жде все́х Воскре́сшаго сре́тившая.

Ра́дуйся, ра́дости неизрече́нныя испо́лнившаяся; ра́дуйся, мно́гажды Яви́вшагося ви́дети сподо́бившаяся.

Ра́дуйся, во блаже́нстве неизрече́ннем с Сы́ном Твои́м и Бо́гом пребыва́ющая; ра́дуйся, погиба́ющих гре́шников спаса́ющая.

Ра́дуйся, ка́ющихся милосе́рдая Предста́тельнице; ра́дуйся, сиро́т Небе́сная Ма́ти.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 12.

Благода́ть пода́ждь на́м, Пресвята́я Богоро́дице, честны́я ико́ны Твоя́ почита́ющим! С о́браза бо не́коего дре́вняго списа́ся ико́на Твоя́, Семистре́льная имену́емая, на не́йже седмию́ стрела́ми, се́рдце Твое́ уязвля́ющими, глубина́ страда́ния Твоего́ изобрази́ся. Оба́че нераде́ния ра́ди служи́телей Твои́х, небреже́на и попира́ема ходя́щими на колоко́льне в ве́си То́шенской в во́логодских преде́лех бе́ сия́. Егда́ же не́кий ра́б Бо́жий лю́те стражда́, открове́ния о целе́бней благода́ти о́браза сего́ сподо́бися, па́ки обре́тена и во хра́ме святе́м возложе́на бы́сть, да вси́ ве́рнии возглася́т Бо́гу: Аллилу́иа.

И́кос 12.

Пою́ще со умиле́нием моле́бное пе́ние Тебе́, Ма́ти Бо́жия, обнесо́ша о́крест гра́да лю́дие во́логодстии о́браз Тво́й, чудотворе́ния испо́лненный, егда́ мо́ром лю́тым премно́зии умира́ху. А́бие мо́р преста́, вси́ же ве́рнии, благодаря́ще Тя́, но́вый спи́сок Семистре́льнаго о́браза списа́ша, и́же та́кожде чудесы́ мно́гими просла́вися. О се́м ра́дующеся, зове́м Ти́:

Ра́дуйся, пречу́дными ико́нами в ми́ре чудотворя́щая; ра́дуйся, все́м прося́щим благода́ть изоби́льно излива́ющая.

Ра́дуйся, вдо́в неоскудева́ющая Пита́тельнице; ра́дуйся, благодея́ний живоно́сный исто́чниче.

Ра́дуйся, врачми́ оста́вленных Цели́тельнице; ра́дуйся, пра́вящих и ца́рствующих Всецари́це.

Ра́дуйся, мона́шествующих Пречи́стая Наста́внице; ра́дуйся, се́рдцу сокруше́нному отра́ду подаю́щая.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 13.

О всепе́тая Ма́ти, ско́рбь и боле́знь неизрече́нную у Креста́ Сы́на Твоего́ и Бо́га претерпе́вшая, и в ра́дости неизглаго́ланней Воскре́сшаго сре́тившая! Внемли́ воздыха́нием и слеза́м на́шим, умягчи́ сердца́ востаю́щих на на́с, изба́ви от скорбе́й, боле́зней и ве́чныя сме́рти все́х упова́ющих на неизрече́нное Твое́ милосе́рдие и вопию́щих Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел возвести́ па́стырем вифлее́мским о рождестве́ Спаси́теля ми́ра, и с ни́м мно́жество во́ев Небе́сных восхваля́ху Бо́га, пою́ще: сла́ва в вы́шних Бо́гу, и на земли́ ми́р, в челове́цех благоволе́ние. Ты́ же, о Ма́ти Бо́жия, не име́вши где́ главы́ приклони́ти, зане́ не бе́ ме́ста во оби́телех, родила́ еси́ Сы́на Своего́ пе́рвенца в верте́пе, пови́ла еси́ пелена́ми и положи́ла еси́ Его́ во я́слех. Те́мже ра́дость неизрече́нную се́рдца Твоего́ ве́дуще, вопие́м Ти́:

Ра́дуйся, от младе́нства гряду́щему Месси́и послужи́ти возжеле́вшая; ра́дуйся, чистоту́ па́че все́х челове́к возлю́бльшая.

Ра́дуйся, пречу́дное Благове́стие Арха́нгелом прии́мшая; ра́дуйся, Спаси́теля ми́ра ро́ждшая.

Ра́дуйся, воплоти́вшагося Бо́га слове́сный сосу́де; ра́дуйся, Царя́ ца́рствующих престо́ле.

Ра́дуйся, верте́п в Небеса́ прело́жшая; ра́дуйся, в рождестве́ и по рождестве́ Де́ва пребы́вшая.

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Конда́к 1.

Избра́нней Де́ве Мари́и, превы́шшей все́х дще́рей земли́, Ма́тери Сы́на Бо́жия, Е́юже Спаси́тель в ми́р прии́де, со умиле́нием взыва́ем: воззри́ на многоско́рбное житие́ на́ше, воспомяни́ ско́рби и боле́зни, я́же претерпе́ла еси́, и сотвори́ с на́ми по милосе́рдию Твоему́, да зове́м Ти́:

Ра́дуйся, многоско́рбная Ма́ти Бо́жия, печа́ль на́шу в ра́дость претворя́ющая.

Моли́тва.

О многоско́рбная Ма́ти Бо́жия, превы́шшая все́х дще́рей земли́ по чистоте́ Твое́й и по мно́жеству страда́ний, Тобо́ю на земли́ пренесе́нных! Приими́ многоболе́зненная воздыха́ния на́ша и сохрани́ на́с под кро́вом Твоея́ ми́лости. Ина́го бо прибе́жища и те́плаго предста́тельства, ра́зве Тебе́, не ве́мы, но, я́ко дерзнове́ние иму́щи ко И́же от Тебе́ Рожде́нному, помози́ и спаси́ ны моли́твами Твои́ми, да непреткнове́нно дости́гнем Ца́рствия Небе́снаго, иде́же со все́ми святы́ми бу́дем воспева́ти хвалу́ в Тро́ице сла́вимому Бо́гу, всегда́, ны́не и при́сно, и во ве́ки веко́в. Ами́нь.