Конда́к 1.

Взбра́нной Воево́де, Влады́чице на́шей, Богоро́дице, благогове́йное пе́ние прино́сим Ти́, Пресвята́я Де́во, ди́вным явле́нием Свои́м на горе́ Севери́новстей, цельбоно́сный исто́чник воды́ яви́вшая, излива́ющи вели́кую и бога́тую ми́лость Свою́ стра́ждущему. От вся́ких и на́с бе́д и злы́х обстоя́ний изба́ви, неду́ги на́ша исцеля́ющи и в ско́рбех утеша́ющи, да благода́рственно зове́м Ти́:

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

И́кос 1.

Арха́нгел и А́нгел мно́жество, недоумева́ют, ка́ко восхвали́ти Тя́ по достоя́нию, та́йне воплоще́ния Бо́га Сло́ва послужи́вшей, мы́ же, Честне́йшая Херуви́м и Сла́внейшая без сравне́ния Серафи́м, во умиле́нии о Твои́х благодея́ниих, на на́с бы́вших, дерза́ем зва́ти Тебе́:

Ра́дуйся, Влады́чице, Бо́гом Отце́м избра́нная; ра́дуйся, Ду́хом Святы́м осия́нная.

Ра́дуйся, о́гнь Божества́ неопа́льно вмести́вшая; ра́дуйся, ле́ствице, зе́млю и не́бо соедини́вшая.

Ра́дуйся, в жена́х благослове́нная; ра́дуйся, рождество́м Сы́на Бо́жия превознесе́нная.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 2.

Ви́дящи, Премилосе́рдая Ма́ти, камнере́за от трудо́в мно́гих изможде́ннаго и жа́ждою томи́маго, исто́чник воды́ явле́нием Твои́м во сне́ указа́ла еси́. Се́й обре́те и припа́дая к о́ному, возопи́ о Тебе́ Бо́гу: Аллилу́иа.

И́кос 2.

Разуме́вый Боже́ственный Тво́й гла́с во сне́, на горе́ Севери́нова име́ния, Влады́чице, исто́чник воды́ указу́ющий, позна́ его́ я́ко купе́ль Силоа́мскую, не то́кмо жа́ждущаго напоя́ющую, но и в ве́ре укрепля́ющую. У него́ же ми́лости Твоея́ и́щуще, взыва́ем Тебе́, си́це:

Ра́дуйся, чудеса́ми Твои́ми у исто́чника умы́ к го́рнему возводя́щая; ра́дуйся, открове́ния ве́рным Твои́м в виде́ниях и со́ниях явля́ющая.

Ра́дуйся, еди́ное в на́ших ско́рбех утеше́ние; ра́дуйся, от бе́д на́ших ско́рое избавле́ние.

Ра́дуйся, животво́рныя воды́ исто́чниче неистощи́мый; ра́дуйся, ба́не, омыва́ющая грехо́вную скве́рну.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 3.

Си́ла Вы́шняго осеня́ет все́х с ве́рою и благогове́нием притека́ющих к ме́сту явле́ния Твоего́ на горе́ Севери́новстей, Пресвята́я Влады́чице. Подвиза́я и на́с смире́нно о Тебе́ зва́ти Промысли́телю Бо́гу: Аллилу́иа.

И́кос 3.

Иму́щи бога́тство милосе́рдия неизрече́нное, все́м стра́ждущим, Влады́чице, простира́еши ру́ку по́мощи Твоея́, неду́ги врачу́ющи и стра́сти исцеля́ющи, обрета́ющим ми́лость в цельбоно́снем исто́чнице Твое́м. Сего́ ра́ди благода́рственно вопие́м Тебе́ си́це:

Ра́дуйся, все́х скорбя́щих утеше́ние; ра́дуйся, исполне́ние Зижди́телева смотре́ния.

Ра́дуйся, спасе́ния ве́рных Хода́таице; ра́дуйся, за ро́д челове́ческий Моли́твеннице.

Ра́дуйся, гре́шных серде́ц озаре́ние; ра́дуйся, богобоя́зненных челове́ков увеселе́ние.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 4.

Бу́рею недоуме́ния камнере́з смуща́шеся, воды́ ища́ жа́жду утоли́ти. И се́, я́коже дре́вле, си́лою Бо́жиею из ка́мене вода́ источи́ся, та́ко и ны́ не на горе́ безво́дней исто́чник яви́ся, та́мо Моисе́й источи́тель воды́, зде́сь же Ты́ Сама́, о Богома́ти, служи́тельнице чудесе́, те́мже мо́лимся: жа́ждущия ду́ши на́ша благоче́стия напо́й вода́ми, да зове́м о Тебе́: Аллилу́иа.

И́кос 4.

Слы́шаша лю́дие ве́си гра́фа Севери́на Пото́цкаго, о бы́вшем явле́нии Твое́м на горе́, Пречи́стая, и о яви́вшей чу́дный исто́чник воды́, я́же не то́кмо жа́ждущаго напои́ла еси́, но и мно́гих в ве́ре и́стинной укрепи́ша. Подвиза́я из глубины́ се́рдца возопи́ти Ти́ та́ко:

Ра́дуйся, исто́чник ди́вный на́м яви́ти благоволи́вшая; ра́дуйся, ве́сь на́шу чуде́сно освяти́вшая.

Ра́дуйся, сла́вою чуде́с Твои́х, ве́рных ра́зум озаря́ющая; ра́дуйся, все́х немощны́х врачу́ющая.

Ра́дуйся, бе́дствующим поможе́ние; ра́дуйся, уныва́ющих утеше́ние.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 5.

Боже́ственней си́ле, от Исто́чника Жи́зни Ве́чной, вода́ на ме́сте явле́ния твоего́ прича́стна бы́сть, Пресвята́я Де́ва, почерпа́ющии ю́ исцеле́ние неду́гов душе́вных и теле́сных прие́млют, благода́рственно воспева́юще: Аллилу́иа.

И́кос 5.

Ви́девше лю́дие, зело́ страда́ющаго му́жа, трудо́м тя́жким в каменоло́мне изнуре́ннаго, водо́ю свята́го исто́чника Твоего́ уте́шеннаго, Тебе́, я́ко исто́чнику непреста́нной ра́дости, возопи́ша:

Ра́дуйся, изнемога́ющих Засту́пнице и укрепле́ние; ра́дуйся, безнаде́жных благонаде́жное посеще́ние.

Ра́дуйся, в бе́дах ско́рое на́м заступле́ние; ра́дуйся, печа́лей на́ших утеше́ние.

Ра́дуйся, ве́рных прибе́жище и огражде́ние; ра́дуйся, Храни́тельнице все́х и утвержде́ние.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 6.

Пропове́дницы чу́да явле́ния Твоего́, Ма́ти Бо́жия, бы́ша лю́дие ве́си Пото́цкия, я́ко ди́вно, ско́рбнаго му́жа ве́си то́й, явле́нием Твои́м и водо́ю исто́чника ско́рбь услади́ла еси́, да вси́ непреста́нно воспева́ют ми́лости Твоя́, милосе́рдному Бо́гу зову́ще: Аллилу́иа.

И́кос 6.

Возсия́ на́м святы́й исто́чник Тво́й, Премилосе́рдая Ма́ти, многоразли́чну благода́ть Сы́на Твоего́ и Бо́га На́шего, Христа́ Жизнода́вца источа́ющи. Сего́ ра́ди, прино́сим Ти́ пе́ния сицева́я:

Ра́дуйся, Неве́сто Отца́ Безнача́льнаго; ра́дуйся, неискусобра́чная Роди́тельнице Преве́чнаго Сло́ва.

Ра́дуйся, ра́досте и умире́ние ми́ру; ра́дуйся, пода́тельнице Боже́ственныя бла́гости.

Ра́дуйся, купе́ль, в не́йже вся́ ско́рби на́ша погружа́ются; ра́дуйся, Предста́тельнице к Бо́гу, И́мже ми́р от бе́д спаса́ется.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 7.

Хотя́ще возблагодари́ти Тя́, Влады́чице, благочести́вии лю́дие ве́си Пото́цкия наименова́ша ме́сто явле́ния Твоего́ Бо́жией горо́ю, да вся́к, притека́я к исто́чнику на о́ной, по́мощь Твою́ име́я, вопие́т Бо́гу: Аллилу́иа.

И́кос 7.

Но́вая купе́ль Силоа́мская, па́че о́ныя дре́вния яви́ся, Пречи́стая

Влады́чице, ме́сто исто́чника Твоего́, на Сла́вней горе́ чуде́сно явле́ннаго, да вси́ ве́рнии дово́льно наслажда́яся зна́меньми ми́лости Твоея́, воспева́ют Ти́ согла́сно:

Ра́дуйся, боля́щих немздоприи́мная Цели́тельнице; ра́дуйся, скорбя́щих Ра́досте и оби́димых Засту́пнице.

Ра́дуйся, стра́ждущия и безпомо́щныя неви́димо укрепля́ющая; ра́дуйся, с ве́рою моля́щимся Тебе́ вели́кие ми́лости явля́ющая.

Ра́дуйся, во благи́х проше́ния на́ша ди́вно исполня́ющая; ра́дуйся, струи́ благода́тных исцеле́ний оби́льно на́м источа́ющая.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 8.

Стра́нное и пресла́вное чу́до, яви́ся ико́на Твоя́, Славного́рскою имену́емая, Влады́чице, у нея́же жа́жда духо́вная и теле́сная утоля́ется и боле́зньми одержи́мии исцеля́ются, да вси́ просла́вльшему Тя́, Го́споду и чуде́с Творцу́ воззову́т: Аллилу́иа.

И́кос 8.

Все́м, с ве́рою вся́ подае́ши, Пречи́стая, приходя́щим ко свято́му исто́чнику Твоему́ и ко о́бразу Твоему́ Славного́рскому, в пеще́ре поста́вленному, о си́х все́х, Влады́чице, благода́рственно вопие́м Ти́:

Ра́дуйся, зе́млю на́шу благослове́нием Твои́м осени́вшая; ра́дуйся, ико́ною Славного́рскою ми́лость Твою́ на́м яви́вшая.

Ра́дуйся, любве́ Боже́ственныя явле́ние; ра́дуйся, чуде́с пресла́вных соверше́ние.

Ра́дуйся, ве́ры правосла́вныя утвержде́ние; ра́дуйся, неве́рия и безбо́жия посрамле́ние.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 9.

Вся́кое естество́ а́нгельское и челове́ческое диви́тся милосе́рдию Твоему́, Пресвята́я Де́во, стои́ши бо пред Престо́лом Бо́жиим и воздви́гши ру́це Твои́ мо́лишися, я́ко да на́шу недосто́йную моли́тву прии́мет Госпо́дь Ца́рь Сла́вы и испо́лнит проше́ния призыва́ющих и́мя Твое́ свято́е, зову́щих Сы́ну Твоему́ Христу́ Бо́гу на́шему: Аллилу́иа.

И́кос 9.

Вити́йствующий язы́к не мо́жет изрещи́ досто́йно Живоно́сный Исто́чник неистощи́мыя бла́гости Твоея́, ниже́ изъясни́ти си́лу чуде́с Твои́х, от ико́ны и цели́тельныя воды́ Твоея́ на сла́вней горе́ бы́вшия. Те́мже и мы́, прославля́юще Бо́га, даю́щаго на́м таковы́я ми́лости, по предста́тельству Твоему́ взыва́ем:

Ра́дуйся, в сердца́х на́ших обита́лище Себе́ устро́ившая; ра́дуйся, прося́щих у Тебе́ по́мощи не отверга́ющая.

Ра́дуйся, животво́рныя воды́ исто́чник не истоща́ющийся; ра́дуйся, купе́ль, грехо́вную на́шу скве́рну омыва́ющая.

Ра́дуйся, Исто́чниче непрестаю́щия ра́дости; ра́дуйся, ча́ше неизрече́нныя бла́гости.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 10.

Спасти́ хотя́щи мно́гия от находя́щих на ны́ зо́л и боле́зней, дарова́ла еси́ на́м благода́ть, че́рплющим во́ду исто́чника Твоего́, Пресвята́я Богоро́дице, да вси в скорбе́х и печа́лех исцеле́ние и утеше́ние прие́млют, благода́рно зову́ще Бо́гу: Аллилу́иа.

И́кос 10.

Стена́ еси́ необори́мая и исто́чник ми́лости и чуде́с, Влады́чице, все́х к

Славного́рскому о́бразу Твоему́ прибега́ющих. Поста́влен бо бы́сть в пеще́ре му́жа, ка́мень добыва́вшаго, да из не́др ея́, све́тлыми луча́ми чуде́с Твои́х грехо́вною мгло́ю помраче́нных просвеща́ет, с любо́вию взыва́ющих Ти́, такова́я:

Ра́дуйся, явле́нием Свои́м на горе́ се́й лю́ди уте́шившая; ра́дуйся, пеще́рному хра́му ико́ну благослови́вшая.

Ра́дуйся, ве́рных при́сное дерзнове́ние; ра́дуйся, сумня́щихся до́брое утвержде́ние.

Ра́дуйся, сокро́вище бога́тное в святе́й ико́не Твое́й препода́вшая; ра́дуйся, по моли́твам к Тебе́ от нея́ здра́вие на́м подава́ющая.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 11.

Пе́ние всеумиле́нное пред ико́ною Твое́ю Славного́рскою у свята́го исто́чника Твоего́ прино́сим, Богоро́дице, в покая́нии из глубины́ души́ взыва́юще. Влады́чице, прости́ отступле́ния и беззако́ния на́ша и умоле́на бу́ди, по́мощи Твоея́ прося́щим, Бо́гу же поко́рно вопию́щим: Аллилу́иа.

И́кос 11.

Светоза́рною свеще́ю сия́ет в кра́е на́шем ико́на Твоя́ Славного́рская, Богоро́дице, мно́гими бо чудесы́ просла́влена на горе́ Севери́новстей, Влады́чице, просвеща́ющи все́х на́с, Ма́тернее милосе́рдие Твое́ испове́дующих и непосты́дную наде́жду иму́щих на Тя́, зову́щих во умиле́нии Ти́, такова́я:

Ра́дуйся, пода́тельнице Боже́ственныя бла́гости; ра́дуйся, вино́внице вся́кия ра́дости.

Ра́дуйся, наде́ющихся на Тя́ не посрамля́ющая; ра́дуйся, и́щущих Тя́ от вся́ких бе́д избавля́ющая.

Ра́дуйся, благода́тными луча́ми ми́лости Своея́ покрыва́ющая; ра́дуйся, упова́ющих на Тя́ не оставля́ющая.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 12.

Благода́ти Твоея́ прича́стны бы́ша, пеще́ра и исто́чник воды́, чуде́сне явле́нный, Влады́чице, любве́ ра́ди Твоея́, не то́кмо камнере́зу стра́ждущему ве́си Севери́новстей утеше́ние яви́ла еси́, но и вся́кому приходя́щему к ме́сту явле́ния Твоего́, печа́ли растворя́я, велегла́сно зову́щему: Аллилу́иа.

И́кос 12.

Пою́ще Твоя́ чудеса́, на ме́сте свята́го исто́чника Твоего́ явле́нныя, хва́лим и сла́вим Тя́, Благосе́рдая Ма́ти, и со усе́рдием воспева́ем Ти́ похвалы́ сицевы́я:

Ра́дуйся, Бо́гом да́нная христиа́ном Предста́тельнице; ра́дуйся, неусы́пная о на́с Моли́твеннице.

Ра́дуйся, прегреше́ния на́ша Богома́терней любо́вию покрыва́ющая; ра́дуйся, усе́рдно моля́щихся Тебе́ све́том благода́ти озаря́ющая.

Ра́дуйся, отра́до на́ша и ди́вное о на́с попече́ние; ра́дуйся, Правосла́вныя Це́ркви и ве́ры утвержде́ние.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 13.

О, Всепе́тая Ма́ти, Христа́ Живоно́сный Исто́чник ми́ру яви́вшая, от Него́же излива́еши на́м вели́кия и бога́тыя ми́лости Твоя́. Приими́ благода́рственныя моле́ния на́ша и я́коже о́наго му́жа, в пеще́ре ка́мень добыва́ющаго, по моли́твам к Тебе́ услы́шана сотво́рша. Яви́ и на́м по́мощь Твою́ Свы́ше, да прича́стницы бу́дем жи́зни ве́чныя, вы́ну взыва́юще Ему́ о Тебе́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Арха́нгел и А́нгел мно́жество, недоумева́ют, ка́ко восхвали́ти Тя́ по достоя́нию, та́йне воплоще́ния Бо́га Сло́ва послужи́вшей, мы́ же, Честне́йшая Херуви́м и Сла́внейшая без сравне́ния Серафи́м, во умиле́нии о Твои́х благодея́ниих, на на́с бы́вших, дерза́ем зва́ти Тебе́:

Ра́дуйся, Влады́чице, Бо́гом Отце́м избра́нная; ра́дуйся, Ду́хом Святы́м осия́нная.

Ра́дуйся, о́гнь Божества́ неопа́льно вмести́вшая; ра́дуйся, ле́ствице, зе́млю и не́бо соедини́вшая.

Ра́дуйся, в жена́х благослове́нная; ра́дуйся, рождество́м Сы́на Бо́жия превознесе́нная.

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Конда́к 1.

Взбра́нной Воево́де, Влады́чице на́шей, Богоро́дице, благогове́йное пе́ние прино́сим Ти́, Пресвята́я Де́во, ди́вным явле́нием Свои́м на горе́ Севери́новстей, цельбоно́сный исто́чник воды́ яви́вшая, излива́ющи вели́кую и бога́тую ми́лость Свою́ стра́ждущему. От вся́ких и на́с бе́д и злы́х обстоя́ний изба́ви, неду́ги на́ша исцеля́ющи и в ско́рбех утеша́ющи, да благода́рственно зове́м Ти́:

Ра́дуйся, Блага́я Влады́чице, цельбоно́сный исто́чник на горе́ Севери́новстей ве́рным излива́ющая.

Моли́тва.

О, Пресвята́я Влады́чице, Го́спода Иису́са Христа́ Преблага́я Ма́ти! При́зри ми́лостивым Твои́м о́ком на на́с, предстоя́щих пред свято́ю ико́ною Твое́ю, имену́емой Славного́рская, и святы́м исто́чником, на ме́сте явле́ния Твоего́. Тебе́, Пресвята́я Ма́ти, изво́лившей яви́ти ми́лость Свою́ му́жу селе́ния Севери́на Пото́цкаго, труда́ми мно́гими изможде́нному и ду́хом уныва́ющему, уми́льно взыва́ем. Умилосе́рдися и к на́м, Госпоже́, прини́кни с высо́т Твои́х го́рних, иде́же а́нгели тре́петно сла́вят Тя́. Воззри́ на на́шу нищету́ до́льнюю, укрепи́ немощну́ю во́лю на́шу к де́ланию за́поведей Сы́на Твоего́, Христа́ Бо́га на́шего. Освяти́ сердца́ на́ши любо́вию к Бо́гу и к бли́жним на́шим, наста́ви на́с на пу́ть вся́кия доброде́тели и благоче́стия. Изба́ви от ско́рби и печа́ли, отъими́ от на́с нестрое́ния и бе́ды и огради́ на́с от вся́каго зла́го обстоя́ния. Возве́й, Пречи́стая Ма́ти, ти́хое дыха́ние благода́ти Твоея́ на сесте́р оби́тели Славного́рския и все́х, благогове́йно притека́ющих к свято́му исто́чнику и о́бразу Твоему́. Да на ме́сте явле́ния Твоего́, во гра́дех и ве́сех земли́ на́шия, Правосла́вно сла́вится и́мя Трисвята́го Бо́га и Твое́ ми́лостивое на́м заступле́ние, всегда́, ны́ не и при́сно, и во ве́ки веко́в. Ами́нь.