Конда́к 1.
Взбра́нной Воево́де, Влады́чице на́шей Богоро́дице, ди́вным на реце́ Десне́ чудотво́рнаго о́браза Ея́ явле́нием от ве́чныя сме́рти и злы́х обстоя́ний избавля́ющей, благода́рственное прино́сим пе́ние. Ты́ же, о Богома́ти, я́ко иму́щая милосе́рдие неизрече́нное, от вся́ких на́с бе́д и зо́л свободи́, да зове́м Ти́:
Ра́дуйся, Ма́ти Бо́жия, Спаси́тельница утопа́ющих и во гресе́х погиба́ющих.
И́кос 1.
Арха́нгел Гаврии́л с небесе́ по́слан бы́сть к Тебе́, Богоро́дице, возвести́ти ра́дость ве́лию о рожде́нии от Тебе́ Спаси́теля ро́да челове́ческаго. Подража́я его́ приве́тствию, и мы́, гре́шнии, глаго́лати дерза́ем:
Ра́дуйся, Е́юже ра́дость ми́ру дарова́ся; ра́дуйся, Е́юже не́бо и земля́ соедини́ся.
Ра́дуйся, небе́сных чино́в ра́дование; ра́дуйся, богобоя́щихся челове́ков увеселе́ние.
Ра́дуйся, де́монов прогна́ние; ра́дуйся, все́х святы́х ликова́ние.
Ра́дуйся, неве́рующих вразумле́ние; ра́дуйся, уныва́ющих ободре́ние.
Ра́дуйся, боля́щих исцеле́ние; ра́дуйся, оби́димых заступле́ние.
Ра́дуйся, бе́дствующим внеза́пное вспоможе́ние; ра́дуйся, правосла́вных христиа́н покро́в и огражде́ние.
Ра́дуйся, Ма́ти Бо́жия, Спаси́тельнице утопа́ющих и во гресе́х погиба́ющих.
Конда́к 2.
Ви́дящи благочести́вии лю́дие ико́ну Твою́, вода́ми ре́чными носи́мую, умили́шася се́рдцем и взе́мши ю́ со благогове́нием, покланя́хуся Тебе́ и Боже́ственному Младе́нцу Христу́, на руку́ Твое́ю держи́му, поя́ со умиле́нием: Аллилу́иа.
И́кос 2.
Разуме́я та́йну Твоего́, Богоро́дице, заступле́ния люде́й, в вода́х Десны́ утопа́ющих и Тя́ в по́мощь призыва́ющих, в явле́нии чудотво́рныя ико́ны Твоея́ в ве́си Ленько́вской, «Спаси́тельница утопа́ющих» имену́емыя, сла́вим Твое́ ди́вное о на́с попече́ние, Влады́чице, и взира́я на о́браз Тво́й и моля́щеся Ти́, глаго́лем:
Ра́дуйся, Ма́ти Милосе́рдая; ра́дуйся, Цари́це не́ба и земли́, ми́р от бе́д спаса́ющая.
Ра́дуйся, Прему́драя Руководи́тельнице на́ша, житие́ на́ше до́бре устроя́ющая; ра́дуйся, от потопле́ния на вода́х спаса́ющая.
Ра́дуйся, во греха́х погиба́ющих от ве́чныя ги́бели избавля́юща; ра́дуйся, во все́ времена́ ве́рным помога́ющая.
Ра́дуйся, уны́ние и печа́ль от серде́ц на́ших отводя́щая; ра́дуйся, же́зле и опо́ро ста́рости.
Ра́дуйся, по́стников укрепле́ние; ра́дуйся, па́дших возста́ние.
Ра́дуйся, умо́в просвеще́ние; ра́дуйся, честны́х и́ноков покро́в и заступле́ние.
Ра́дуйся, Ма́ти Бо́жия, Спаси́тельница утопа́ющих и во гресе́х погиба́ющих.
Конда́к 3.
Си́лою Вы́шняго де́йствуя, Влады́чице Преблага́я, си́лу естества́ во́днаго укроща́еши свято́ю ико́ною Твое́ю и мно́гая чудеса́ е́ю содева́еши. Сего́ ра́ди, припа́дая пред о́бразом Твои́м, вопие́м просла́вльшему Тя́ Царю́ Сла́вы: Аллилу́иа.
И́кос 3.
Иму́щи попече́ние о стра́ждущих лю́дех, вы́ну явля́ла еси́, Цари́це Небе́сная, чудеса́ и зна́мения, спаса́ющи гра́ды и ве́си от нападе́ний вра́жиих и разоре́ния. Не преста́й и ны́не промышля́ти и спаса́ти на́с от бе́д и напа́стей, вопию́щих Ти́ си́це:
Ра́дуйся, Засту́пнице усе́рдная ро́да христиа́нскаго; ра́дуйся, Моли́твеннице неусы́пная.
Ра́дуйся, огражде́ние градо́в на́ших и ве́сей от разоре́ния и потопле́ния; ра́дуйся, Прибе́жище на́ше во дни́ ско́рби и нестрое́ния.
Ра́дуйся, по́мощи у Тебе́ прося́щих не отверга́ющая; ра́дуйся, боле́знующих се́рдцем утеша́ющая.
Ра́дуйся, ересе́й и раско́лов Искорени́тельнице; ра́дуйся, благоче́стия Насади́тельнице.
Ра́дуйся, вражду́ющих примире́ние; ра́дуйся, поги́бших Взыска́ние.
Ра́дуйся, отча́янных гре́шников спасе́ние; ра́дуйся, скорбя́щих отра́до и увеселе́ние.
Ра́дуйся, Ма́ти Бо́жия, Спаси́тельница утопа́ющих и во гресе́х погиба́ющих.
Конда́к 4.
Бу́ри бе́д и напа́стей отжени́ от на́с, Пресвята́я Де́во, и моле́ния на́ша, пред честны́м о́бразом Твои́м возноси́мыя, ско́ро услы́ши, да вы́ну вопие́м Тобо́ю спаса́ющему на́с Бо́гу: Аллилу́иа.
И́кос 4.
Слы́шавше бли́жнии и да́льнии о чудеса́х от ико́ны Твоея́, Влады́чице, «Спаси́тельница утопа́ющих» быва́емых, ра́довахуся о ми́лости Твое́й к ро́ду на́шему, воздаю́щему Тебе́ досто́йную че́сть сицеву́ю:
Ра́дуйся, Промышле́ния Сы́на Твоего́ о ро́де христиа́нстем Свята́я Служи́тельнице; ра́дуйся, о все́м ми́ре усе́рдная Предста́тельнице.
Ра́дуйся, Цве́те Неувяда́емый; ра́дуйся, скорбя́щих Ра́досте.
Ра́дуйся, Ми́лостивая, гре́шников ми́лующая; ра́дуйся, неча́янную ра́дость на́м подаю́щая.
Ра́дуйся, во Успе́нии Твое́м на́с не оставля́ющая; ра́дуйся, две́ри Ца́рствия Христо́ва ве́рным отверза́ющая.
Ра́дуйся, кла́дезю воды́ живи́тельныя; ра́дуйся, исто́чниче ми́лостей неисчерпа́емый.
Ра́дуйся, к жи́зни ве́чней на́ша Путеводи́тельнице; ра́дуйся, в земне́м житии́ на́шем незри́мая Охрани́тельнице.
Ра́дуйся, Ма́ти Бо́жия, Спаси́тельнице утопа́ющих и во гресе́х погиба́ющих.
Конда́к 5.
Боготе́чная звезда́ ико́на Твоя́, Ма́ти Бо́жия, яви́ся стра́ждущим лю́дем не то́кмо гра́да Но́вгород-Се́верска и ве́си Ленько́вския, но и все́й стране́ на́шей, луча́ми чуде́с Твои́х осиява́ющая все́х блужда́ющих по мо́рю стра́стнаго жития́, и наставля́ющая на пу́ть спасе́ния с ве́рою к Тебе́ притека́ющих, и вопию́щих Бо́гу: Аллилу́иа.
И́кос 5.
Ви́девше мно́гая и пресла́вная чудеса́ избавле́ния от потопле́ния в вода́х на реце́ Десне́, ра́дуемся вси́, я́ко Бо́жия Ма́терь вы́ну явля́ет ми́лость Свою́ и, благода́рнии су́ще, покланя́емся и велича́ем Ю́ си́це:
Ра́дуйся, всегда́ ма́тернюю любо́вь к на́м явля́ющая; ра́дуйся, с небожи́тели о лю́дех при́сно моля́щаяся.
Ра́дуйся, незри́мая Управи́тельнице на вода́х; ра́дуйся, на су́ше путеше́ствующих Блага́я Одиги́трие.
Ра́дуйся, земноро́дных у Престо́ла Сы́на Твоего́ помина́ющая; ра́дуйся, прославля́ющих Тя́ прославля́ющая.
Ра́дуйся, в чистоте́ и целому́дрии жи́ти на́с науча́ющая; ра́дуйся, подви́жников благоче́стия прославля́ющая.
Ра́дуйся, честны́х супру́жеств благослове́ние; ра́дуйся, де́вственников при́сное ра́дование.
Ра́дуйся, хвалу́ и сла́ву от небе́с слы́шащая; ра́дуйся, благодаре́ние от земли́ прие́млющая.
Ра́дуйся, Ма́ти Бо́жия, Спаси́тельнице утопа́ющих и во гресе́х погиба́ющих.
Конда́к 6.
Пропове́дуют спасе́ннии Тобо́ю, Де́во Чи́стая, ми́лости и чудеса́, от ико́ны Твоея́ святы́я быва́емыя. Сего́ ра́ди со благогове́нием почита́ем о́браз Тво́й святы́й и покланя́емся ему́, я́ко зало́гу Твоего́ к на́м благоволе́ния, вопию́ще Бо́гу: Аллилу́иа.
И́кос 6.
Возсия́ благода́ть лю́дем Твои́м от явле́нныя ико́ны Твоея́, Богома́ти, все́м притека́ющим в хра́м Тво́й и покланя́ющимся чудотво́рному о́бразу Твоему́. Не отри́ни у́бо моле́ний на́ших, но все́х на́с защити́, вопию́щих со умиле́нием си́це:
Ра́дуйся, непосты́дное на́ше упова́ние; ра́дуйся, ду́ш на́ших спасе́ние.
Ра́дуйся, от бе́д и печа́лей избавле́ние; ра́дуйся, грехо́вных я́зв на́ших врачева́ние.
Ра́дуйся, слепы́м зре́ние подаю́щая; ра́дуйся, глухи́м и немы́м слу́х и язы́к отверза́ющая.
Ра́дуйся, хромы́х хожде́ние и на пу́ть и́стинный Наста́внице; ра́дуйся, тьму́ лю́тых обстоя́ний от на́с отгоня́ющая.
Ра́дуйся, оби́димых заступа́ющая; ра́дуйся, оби́дящих гро́зно наказу́ющая.
Ра́дуйся, ве́ры утвержде́ние; ра́дуйся, благода́ти позна́ние.
Ра́дуйся, Ма́ти Бо́жия, Спаси́тельнице утопа́ющих и во гресе́х погиба́ющих.
Конда́к 7.
Хотя́ Человеколю́бец Госпо́дь спасти́ челове́ки от ве́чныя сме́рти и непрестаю́щия ско́рби, даде́ на́м в по́мощь и заступле́ние Ма́терь Свою́, да никто́же оты́дет от Нея́ то́щ и неуслы́шан. Мы́ же, Преблагослове́нная, со умиле́нием благода́рно покланя́емся чудотво́рному о́бразу Твоему́, ра́достно пою́ще: Аллилу́иа.
И́кос 7.
Ди́вно просла́вилася еси́, Богома́ти, в защище́нии люде́й правосла́вных. Сего́ ра́ди от ле́т дре́вних притека́ют ко о́бразу Твоему́ ве́рнии лю́дие, по́мощи и заступле́ния у Тебе́ прося́ще и со умиле́нием взыва́юще:
Ра́дуйся, Спаси́тельнице на вода́х утопа́ющих; ра́дуйся, Изба́вительнице во гресе́х погиба́ющих.
Ра́дуйся, а́лчущих Пита́тельнице; ра́дуйся, духо́вных сокро́вищ Пода́тельнице.
Ра́дуйся, го́рних умо́в непрестаю́щее удивле́ние; ра́дуйся, челове́ческаго ро́да возвыше́ние.
Ра́дуйся, гре́шников с Бо́гом примире́ние; ра́дуйся, враго́в неви́димых муче́ние.
Ра́дуйся, в недоуме́нии су́щим сове́ты до́брыя подаю́щая; ра́дуйся, житие́ на́ше до́бре устроя́ющая.
Ра́дуйся, к по́двигу целому́дрия ду́ши возводя́щая; ра́дуйся, оби́димых проща́ти науча́ющая.
Ра́дуйся, Ма́ти Бо́жия, Спаси́тельница утопа́ющих и во гресе́х погиба́ющих.
Конда́к 8.
Стра́нники и прише́льцы есмы́ на земли́ и, по глаго́лу Апо́стола, не и́мамы зде́ пребыва́ющаго гра́да. Но к кому́ прибе́гнем, Влады́чице, в ско́рбех жития́ на́шего, а́ще не к Тебе́, Небе́сная Цари́це? Укажи́ на́м пу́ть ко спасе́нию, Путеводи́тельнице на́ша, да вы́ну зове́м Бо́гу: Аллилу́иа.
И́кос 8.
Все́м ве́рным уте́шительно е́сть взира́ти на святу́ю ико́ну Твою́, Влады́чице, я́ко Ты́ еси́ оби́димым покро́в и защище́ние, а́лчущих Корми́тельница, наги́х одея́ние, боля́щих исцеле́ние и все́м вся́ блага́я и поле́зная да́руеши. Сего́ ра́ди вопие́м Ти́:
Ра́дуйся, неизглаго́ланная красото́; ра́дуйся, всехва́льная добро́то.
Ра́дуйся, младе́нцев Пита́тельнице; ра́дуйся, ско́рая Помо́щнице.
Ра́дуйся, Ма́ти сиро́тствующих; ра́дуйся, Наде́ждо ненаде́жных.
Ра́дуйся, благосе́рдая Услы́шательнице; ра́дуйся, всемо́щная Покрови́тельнице.
Ра́дуйся, любви́ Бо́жия исполне́ние; ра́дуйся, вражду́ющих примире́ние.
Ра́дуйся, Упова́ние все́м ве́рным; ра́дуйся, Заре́, сия́ющая во тьме́ блужда́ющим.
Ра́дуйся, Ма́ти Бо́жия, Спаси́тельнице утопа́ющих и во гресе́х погиба́ющих.
Конда́к 9.
Вся́к земноро́дный да взыгра́ется, ду́хом просвеща́емь, и да торжеству́ет, сла́вяще Твою́ ми́лость, Богома́ти Пречи́стая, и да вопие́т арха́нгельский гла́с: «Ра́дуйся, Благода́тная, Госпо́дь с Тобо́ю!», и Тобо́ю с на́ми, вопию́щими Ему́ пе́снь: Аллилу́иа.
И́кос 9.
Вети́йствующий язы́к не возмо́жет досто́йно восхвали́ти Тя́, Богоро́дице, за вели́кия благодея́ния, я́же излива́еши на на́с, гре́шных и недосто́йных. Оба́че, да не яви́мся лени́ви и неблагода́рни, приими́ от на́с усе́рдныя похвалы́ сия́:
Ра́дуйся, Блаже́нное Чре́во, Невмести́маго вмести́вшее; ра́дуйся, Купино́ Неопали́мая.
Ра́дуйся, Неруши́мая Стено́; ра́дуйся, Врата́рнице, две́ри ра́йския ве́рным отверза́ющая.
Ра́дуйся, Живоно́сный Исто́чниче; ра́дуйся, Скоропослу́шнице, проше́ния на́ша во бла́го исполня́ющая.
Ра́дуйся, гне́в Бо́жий от на́с отводя́щая; ра́дуйся, теплото́, ве́сь ми́р любо́вию согрева́ющая.
Ра́дуйся, земледе́льцев плода́ми оби́льными награжда́ющая; ра́дуйся, ве́рным во все́х ну́ждах пособля́ющая.
Ра́дуйся, хотя́щим жи́ти по за́поведем Бо́жиим помога́ющая; ра́дуйся, ра́зуму и му́дрости на́с науча́ющая.
Ра́дуйся, Ма́ти Бо́жия, Спаси́тельнице утопа́ющих и во гресе́х погиба́ющих.
Конда́к 10.
Спаси́ на́с, Влады́чице, от поги́бели ве́чныя, ма́терним предста́тельством Твои́м ко Христу́ Спаси́телю на́шему, и сподо́би на́с, по́мощию Твое́ю, дости́гнути Ца́рства Небе́снаго и в ра́дости ве́чней воспева́ти со все́ми святы́ми Человеколю́бцу Бо́гу: Аллилу́иа.
И́кос 10.
Стена́ и покро́в гра́ду Но́вгород-Се́верску и все́й стране́ на́шей свята́я ико́на Твоя́, Влады́чице, яви́ся; те́мже у́бо мо́лим Тя́, Пречи́стая: не оста́ви на́с, си́рых и безпомо́щных, но посли́ благода́ть Твою́ свы́ше на предстоя́щия лю́ди Твоя́ и от души́ вопию́щия:
Ра́дуйся, Ма́ти неискусобра́чная; ра́дуйся, Неве́сто Неневе́стная.
Ра́дуйся, Честне́йшая Херуви́м; ра́дуйся, Сла́внейшая Серафи́м.
Ра́дуйся, па́че все́х земны́х возвели́ченная; ра́дуйся, от а́нгельских чино́в ублажа́емая.
Ра́дуйся, во оби́тели ра́йския пу́ть указу́ющая; ра́дуйся, все́ми оста́вленных не оставля́ющая.
Ра́дуйся, сиро́тствующих незри́мая Воспита́тельнице; ра́дуйся, ско́рбных ма́терей утеше́ние.
Ра́дуйся, духо́вныя слепоты́ исцеле́ние; ра́дуйся, стра́нствующих христиа́н покро́в и огражде́ние.
Ра́дуйся, Ма́ти Бо́жия, Спаси́тельнице утопа́ющих и во гресе́х погиба́ющих.
Конда́к 11.
Пе́ния и моле́ния на́шего не отве́ргни, Блага́я, но просвети́ у́м на́ш и о́чи серде́чныя, и научи́ Творцу́ и Бо́гу пе́ти со благогове́нием пе́снь: Аллилу́иа.
И́кос 11.
Све́тлыми луча́ми чуде́с просвеща́еши ве́сь ми́р христиа́нский, Благода́тная, и заступа́еши лю́ди правосла́вныя; те́мже припа́дающе ко о́бразу Твоему́ взыва́ем Ти́:
Ра́дуйся, А́нгелов Цари́це; ра́дуйся, всея́ тва́ри Влады́чице.
Ра́дуйся, мра́чныя ду́ши просвеща́ющая; ра́дуйся, еретико́в и раско́льников облича́ющая.
Ра́дуйся, мо́лние, ду́ши све́том ве́ры озаря́ющая; ра́дуйся, гро́ме, враги́ устраша́ющий.
Ра́дуйся, сто́лпе, благоче́стие утвержда́ющий; ра́дуйся, свети́ло, всю́ зе́млю освеща́ющее.
Ра́дуйся, упова́ющих на Тя́ заступа́ющая; ра́дуйся, все́х к Тебе́ прибега́ющих спаса́ющая.
Ра́дуйся, прославля́ющих Тя́ прославля́ющая; ра́дуйся, не чту́щих Тя́ посрамля́ющая.
Ра́дуйся, Ма́ти Бо́жия, Спаси́тельнице утопа́ющих и во гресе́х погиба́ющих.
Конда́к 12.
Благода́ть Твою́ не отыми́ от на́с, ми́лости Исто́чниче, да избавле́нии Тобо́ю от бе́д, скорбе́й и напа́стей, в ми́ре и благоче́стии поживе́м, воспева́я немо́лчно: Аллилу́иа.
И́кос 12.
Пою́ще чудеса́ Твоя́ и ми́лости, Де́во Всепе́тая, хва́лим Тя́ вси́: я́ко вои́стину еси́ на́ша Помо́щница, Засту́пница, Пита́тельница и Домострои́тельница. Те́мже благодаря́ще Тя́ за вся́ я́вная и та́йная благодея́ния Твоя́, вопие́м:
Ра́дуйся, Моли́твеннице на́ша неусы́пная; ра́дуйся, ча́ше, че́рплющая на́м ра́дость.
Ра́дуйся, утоле́ние вся́кия печа́ли; ра́дуйся, неду́гующих ско́рая Цели́тельнице.
Ра́дуйся, духо́в лука́вых Прогони́тельнице; ра́дуйся, о спасе́нии на́шем Хода́таице.
Ра́дуйся, ни́щих Защи́тнице; ра́дуйся, тружда́ющихся Помо́щнице.
Ра́дуйся, невозде́ржных воздержа́нию науча́ющая; ра́дуйся, вою́ющим на пло́ть помога́ющая.
Ра́дуйся, Утвержде́ние на́ше незы́блемое; ра́дуйся, Наде́ждо на́ша непосты́дная.
Ра́дуйся, Ма́ти Бо́жия, Спаси́тельнице утопа́ющих и во гресе́х погиба́ющих.
Конда́к 13.
О Всепе́тая Ма́ти, Спаси́тельнице утопа́ющих, приими́ моле́ние сие́ на́ше и изба́ви на́с от вся́ких зо́л, боле́зней, бе́д и напа́стей, наше́ствия иноплеме́нников, междоусо́бныя бра́ни, и бу́дущия изми́ му́ки, о Тебе́ вопию́щих: Аллилу́иа.
И́кос 1.
Арха́нгел Гаврии́л с небесе́ по́слан бы́сть к Тебе́, Богоро́дице, возвести́ти ра́дость ве́лию о рожде́нии от Тебе́ Спаси́теля ро́да челове́ческаго. Подража́я его́ приве́тствию, и мы́, гре́шнии, глаго́лати дерза́ем:
Ра́дуйся, Е́юже ра́дость ми́ру дарова́ся; ра́дуйся, Е́юже не́бо и земля́ соедини́ся.
Ра́дуйся, небе́сных чино́в ра́дование; ра́дуйся, богобоя́щихся челове́ков увеселе́ние.
Ра́дуйся, де́монов прогна́ние; ра́дуйся, все́х святы́х ликова́ние.
Ра́дуйся, неве́рующих вразумле́ние; ра́дуйся, уныва́ющих ободре́ние.
Ра́дуйся, боля́щих исцеле́ние; ра́дуйся, оби́димых заступле́ние.
Ра́дуйся, бе́дствующим внеза́пное вспоможе́ние; ра́дуйся, правосла́вных христиа́н покро́в и огражде́ние.
Ра́дуйся, Ма́ти Бо́жия, Спаси́тельнице утопа́ющих и во гресе́х погиба́ющих.
Конда́к 1.
Взбра́нной Воево́де, Влады́чице на́шей Богоро́дице, ди́вным на реце́ Десне́ чудотво́рнаго о́браза Ея́ явле́нием от ве́чныя сме́рти и злы́х обстоя́ний избавля́ющей, благода́рственное прино́сим пе́ние. Ты́ же, о Богома́ти, я́ко иму́щая милосе́рдие неизрече́нное, от вся́ких на́с бе́д и зо́л свободи́, да зове́м Ти́:
Ра́дуйся, Ма́ти Бо́жия, Спаси́тельница утопа́ющих и во гресе́х погиба́ющих.
Моли́тва.
Засту́пница усе́рдная, Ма́ти Го́спода Вы́шняго! Ты́ еси́ все́м христиа́ном по́мощь и заступле́ние, па́че же в беда́х су́щим. При́зри ны́не с высоты́ святы́я Твоея́ и на ны́, с ве́рою поклоня́ющияся Пречи́стому о́бразу Твоему́, и яви́, мо́лим Тя́, ско́рую по́мощь Твою́ по мо́рю пла́вающим и от ве́тров бу́рных тя́жкия ско́рби терпя́щим. Подви́гни и вся́ правосла́вныя христиа́ны на спасе́ние в вода́х утопа́ющих, и возда́ждь подвиза́ющимся о се́м бога́тыя ми́лости и щедро́ты Твоя́. Се́ бо, на о́браз Тво́й взира́юще, Тебе́, я́ко ми́лостивно су́щей с на́ми, прино́сим смире́нная моле́ния на́ша. Не и́мамы бо ни ины́я по́мощи, ни ина́го предста́тельства, ни утеше́ния, то́кмо Тебе́, о Ма́ти все́х скорбя́щих и напа́ствуемых. Ты́ по Бо́зе на́ша Наде́жда и Засту́пница, и на Тя́ упова́юще, са́ми себе́, и дру́г дру́га, и ве́сь живо́т на́ш Тебе́ предае́м во ве́ки веко́в. Ами́нь.
