Конда́к 1.

Взбра́нной Воево́де ро́да христиа́нскаго и страны́ на́шея изве́стней Изба́вительнице, хвале́бныя пе́сни принесе́м Ти́, Пресвята́я Де́во, но я́ко иму́щая милосе́рдие неизрече́нное, от вся́ких на́с ско́рбных обстоя́ний свободи́, да с любо́вию зове́м Ти́:

Ра́дуйся, похвало́ Табы́нская и всего́ ми́ра наде́ждо и утеше́ние.

И́кос 1.

А́нгели и Арха́нгели дивя́тся Твоему́ неизрече́нному милосе́рдию к ро́ду челове́ческому, Де́во Богоро́дице, я́ко благоволи́ла еси́ яви́ти святу́ю ико́ну Твою́ бли́з гра́да Уфы́, егда́ нечести́вии ага́ряне воздвиго́ша бра́нь на ми́рныя лю́ди, разоря́юще гра́ды и ве́си и́х. Ты́ же, Блага́я, хотя́щи уте́шити ра́б Твои́х, ско́рбь и́х на ра́дость преложи́ла еси́ прише́ствием Свои́м, сего́ ра́ди вопие́м Ти́ такова́я:

Ра́дуйся, благослове́нная в жена́х; ра́дуйся, обре́тшая благода́ть у Бо́га.

Ра́дуйся, десни́цею Созда́теля благослове́нная; ра́дуйся, Ду́хом Святы́м освяще́нная.

Ра́дуйся, Ма́ти Христа́ Бо́га на́шего; ра́дуйся, в рождестве́ и по рождестве́ Де́ва.

Ра́дуйся, А́нгельских чино́в удивле́ние; ра́дуйся, святы́х немо́лчное прославле́ние.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 2.

Ви́дящи, Ма́ти и Де́во, бе́ды и смяте́ния о́крест гра́да Уфы́, яви́ла еси́ святу́ю ико́ну Свою́, наипа́че же ми́лость Свою́, Влады́чице, лю́дем, да не оскуде́ет ве́ра, ниже́ уга́снет наде́жда, но да прославля́ется всегда́ И́мя свято́е Отца́ и Сы́на и Свята́го Ду́ха вопию́щими: Аллилу́иа.

И́кос 2.

Ра́зумом не уразуме́ диа́кон черне́ц Амвро́сий гла́с неземны́й на пути́ свое́м во святу́ю оби́тель: «Да потщи́тся правове́рная бра́тия богоспаса́емыя оби́тели прия́ти Мя́ в хра́м Го́спода Моего́», прельще́ния убоя́вся. Па́ки же на пути́ о́ном услы́шав: «Прииди́ и ви́ждь», узре́ о́браз святы́й Богома́тере на ка́мени ве́лием бли́з горы́ Табы́нския у исто́чника водна́го, возра́довася ду́хом. Мы́ же, дивя́щеся сему́, вопие́м Ти́, Влады́чице:

Ра́дуйся, явле́нием святы́я ико́ны Своея́ ми́лость Бо́жию на́м возвести́вшая; ра́дуйся, гла́сом Свои́м во́лю Свою́ изре́кшая.

Ра́дуйся, Ма́ти щедро́т и милосе́рдия; ра́дуйся, ми́лости сокро́вище многоце́нное.

Ра́дуйся, с Небе́сных высо́т на рабы́ Своя́ призира́ющая; ра́дуйся, покро́вом Свои́м на́с осеня́ющая.

Ра́дуйся, я́ко ми́лость Твоя́ посеща́ет христиа́нския ве́си и гра́ды; ра́дуйся, я́ко милосе́рдие Твое́ серде́ц на́ших отра́да.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 3.

Си́ла благода́ти Твоея́ осени́ се́рдце диа́кона благочести́ваго, внегда́ узре́ти ему́ святу́ю ико́ну Твою́, Влады́чице, и, объя́т бы́в стра́хом вели́чия Твоего́, возра́довася зело́, со тща́нием востече́ во оби́тель и возвести́ бра́тии о ди́вном обре́тении, ра́достно вопия́ Бо́гу: Аллилу́иа.

И́кос 3.

Иму́ще ра́дость ве́лию о ми́лости Твое́й, Пресвята́я Де́во, со стра́хом и тре́петом принесо́ша и́ноцы ико́ну Твою́ Табы́нскую во святу́ю оби́тель и пове́даша о чудесе́ явле́ния ея́ архиере́ю Каза́нскому и воево́де Уфи́мскому. Ны́не же благода́рственне вопие́м Ти́, Влады́чице:

Ра́дуйся, по́мощь Свою́ все́м притека́ющим к Тебе́ подаю́щая; ра́дуйся, сле́з на́ших не отверга́ющая.

Ра́дуйся, к Сы́ну Своему́ моле́ние о ве́рных вы́ну принося́щая; ра́дуйся, проше́ния на́ша во бла́го исполня́ющая.

Ра́дуйся, мона́шествующих покро́ве; ра́дуйся, де́вствующих огражде́ние.

Ра́дуйся, к Бо́гу ума́ и се́рдца на́шего направле́ние; ра́дуйся, ду́ш на́ших спасе́ние.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 4.

Бу́ря крамолы́, воздви́гнутыя от мяте́жник, наважде́нных Айда́ром и Кусю́мою, разори́ оби́тель Вознесе́нскую, бра́тию же изби́ и разсе́ятися пону́ди. Ты́ же, Всеблага́я, хотя́щи по вре́мени яви́тися во сла́ве ве́лией, сокры́ла еси́ ико́ну Свою́ чудотво́рную Табы́нскую; дивя́ще же ся́ таково́му промышле́нию Твоему́, Влады́чице, вопие́м Бо́гови: Аллилу́иа.

И́кос 4.

Слы́шащи, Богома́ти, стена́ния ра́б Твои́х ве́си Табы́нския и ско́рбь и́х ви́дящи, зане́ ве́ра Христо́ва поруга́ема бы́сть, во изобличе́ние неве́рных и во е́же позна́ти и́м И́стину благоволи́ла еси́ па́ки яви́ти Сво́й о́браз на ка́мени бли́з исто́чника водна́го. Ми́лость Твою́ воспева́юще, благода́рственно пое́м Ти́:

Ра́дуйся, явле́нием ико́ны Твоея́ Табы́нския све́т и́стинныя ве́ры земли́ Уфи́мской возврати́вшая; ра́дуйся, суеве́рием и злове́рием омраче́нных просвети́вшая.

Ра́дуйся, гре́шных исправле́ние; ра́дуйся, ка́ющихся с Бо́гом примире́ние.

Ра́дуйся, ми́лость согреши́вшим явля́ющая; ра́дуйся, ра́ны грехо́вныя исцеля́ющая.

Ра́дуйся, сердца́ ско́рбная наде́ждою возражда́ющая; ра́дуйся, любо́вию ма́тернею и́х согрева́ющая.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 5.

Боготе́чную звезду́ святу́ю ико́ну Твою́ ви́деша нечести́вии ага́ряне, не уразуме́ша Твоего́, Влады́чице, прише́ствия, ко́сни бо се́рдцем бе́ша; не́навистию ко христиа́ном распали́вшеся, надруга́шася над святы́нею, о́браз Тво́й разсе́кше. Слепото́ю за сие́ а́бие нака́зани бы́вше, блужда́ху по ле́су, не ве́дуще благоче́стно пе́ти: Аллилу́иа.

И́кос 5.

Ви́дети преста́вше, хули́тели убоя́хуся зело́, нача́ху скорбе́ти и пла́катися; юне́йший же, помоля́ся серде́чно, прозре́ и приведе́ единоплеме́нники своя́ ко исто́чнику. Те́ же, ка́ющеся, ли́ца умы́вше, прозре́ша та́кожде. Воспева́юще ми́лости Цари́цы Небе́сныя, вопие́м сицева́я:

Ра́дуйся, торжество́ ве́ры в стране́ на́шей явля́ющая; ра́дуйся, свято́ю ико́ною Твое́ю окамене́нная сердца́ умягча́ющая.

Ра́дуйся, злове́рныя я́вно обличи́вшая; ра́дуйся, и́стинную ве́ру утверди́вшая.

Ра́дуйся, ро́да христиа́нскаго возвыше́ние; ра́дуйся, святы́ни ди́вное прославле́ние.

Ра́дуйся, я́ко Тобо́ю беззако́ние наказу́ется; ра́дуйся, я́ко Тобо́ю хула́ на Бо́га истребля́ется.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 6.

Пропове́дницы благода́ти Твоея́ яви́шася прозре́вшии, возвести́вше жи́телем ве́си Табы́нския о́браза Твоего́, Богома́ти, явле́ние. Юне́йший от ни́х мудре́йший бы́сть: приня́в ве́ру правосла́вную, возра́довася зело́ и рече́ все́м притека́ющим ко исто́чнику исцеле́ний: «Се́, ны́не позна́х, я́ко ве́лий е́сть Бо́г земли́ Ру́сския», со умиле́нием вопия́ Ему́: Аллилу́иа.

И́кос 6.

Возсия́ све́т Боже́ственный, Влады́чице, егда́ свята́я ико́на Твоя́ чу́дне пренесе́на бы́сть от ме́ста явле́ния в ве́сь Табы́нскую, ве́рным да́ры целе́бныя излива́ющая и все́м по́мощь и утеше́ние с ве́рою к Тебе́ во вся́цей ско́рби притека́ющим подаю́щая, сего́ ра́ди вопие́м Ти́ сицева́я:

Ра́дуйся, отча́янных прибе́жище; ра́дуйся, скорбя́щих слы́шание.

Ра́дуйся, печа́льных утеше́ние; ра́дуйся, христиа́ном отра́да и огражде́ние.

Ра́дуйся, в беда́х и печа́лех ско́рое заступле́ние; ра́дуйся, я́ко немощны́м да́руеши укрепле́ние.

Ра́дуйся, ско́рбь на́шу на ра́дость претворя́ющая; ра́дуйся, наве́ты вра́жия от на́с отгоня́ющая.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 7.

Хотя́ще ми́лость Бо́жию и благоволе́ние Цари́цы Небе́сныя просла́вити, положи́ша ве́рнии чествова́ти па́мять явле́ния ико́ны Табы́нския в пято́к девя́тый по Па́сце, благодаря́ще Засту́пницу усе́рдную, Бо́гу же воспева́юще: Аллилу́иа.

И́кос 7.

Но́вое чу́до яви́ла еси́, Богоро́дице, изба́вивши гра́д Стерлитама́к от боле́зни сме́ртныя, егда́, с благослове́ния архиере́я Иоанни́кия, взе́мше святу́ю ико́ну Твою́ Табы́нскую, принесо́ша во гра́д се́й и сле́зно пред не́ю моля́хуся. Сего́ ра́ди лю́дие благода́рнии возопи́ша Ти́:

Ра́дуйся, за лю́ди согреши́вшия пред Сы́ном Твои́м и Бо́гом при́сно хода́тайствующая; ра́дуйся, пра́ведный гне́в Бо́жий на ми́лость преклоня́ющая.

Ра́дуйся, прекраще́нием холе́ры благода́тную си́лу от ико́ны Своея́ па́ки яви́вшая; ра́дуйся, ми́лость Бо́жию согреши́вшим дарова́вшая.

Ра́дуйся, наде́ждо ненаде́жных; ра́дуйся, опо́ро немощны́х.

Ра́дуйся, заблу́ждших на пу́ть покая́ния наставля́ющая; ра́дуйся, ве́ру в жи́знь бу́дущаго ве́ка в ни́х пробужда́ющая.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 8.

Стра́нное чу́до яви́ла еси́, Богома́ти, егда́ ико́на Твоя́ Табы́нская принесе́на бы́сть во гра́д Оренбу́рг во вре́мя мо́ра сме́ртнаго и а́бие мо́р преста́. Сего́ ра́ди утверди́ся кре́стный хо́д принесе́ния ра́ди свята́го о́браза в Оренбу́рг к пра́зднику Рождества́ Твоего́, Всенепоро́чная, во е́же па́мятовати и воспева́ти ми́лости Бо́жия: Аллилу́иа.

И́кос 8.

Ве́сь кра́й Приура́льский возра́довася покрови́тельству ми́лостивому Твоему́, Влады́чице, и ико́на Твоя́ Табы́нская из гра́да во гра́д доны́не прено́сится, во е́же коему́ждо припа́сти Ти́ возмо́жно е́сть и воспева́ти сицева́я:

Ра́дуйся, стезе́ю Госпо́днею ше́ствовати на́с науча́ющая; ра́дуйся, на пути́ ко Го́споду на́с укрепля́ющая.

Ра́дуйся, жестосе́рдия в лю́дех искорене́ние; ра́дуйся, милосе́рдия в сердца́х насажде́ние.

Ра́дуйся, к по́двигу целому́дрия на́с призыва́ющая; ра́дуйся, венцы́ Небе́сными непоро́чных венча́ющая.

Ра́дуйся, земны́х сокро́вищ на́с отвраща́ющая; ра́дуйся, да́ры духо́вными обогаща́ющая.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 9.

Вси́ лю́дие земли́ Уфи́мския, за́сухе ве́лией бы́вшей, моля́ху усе́рдно Засту́пницу Небе́сную, да испро́сит ми́лость Сы́на Своего́ и Бо́га на́шего, и, взе́мше ико́ну Ея́ Табы́нскую, обнесо́ша се́ла своя́, и одожди́ Госпо́дь до́ждь на зе́млю и́х на ра́дость скорбя́щим и во утеше́ние пла́чущим, да воспою́т Го́сподеви благода́рным се́рдцем: Аллилу́иа.

И́кос 9.

Вети́й глаго́лы не довле́ют ко изглаго́ланию чуде́с Твои́х, Влады́чице Небесе́, во спасе́ние бо жи́телем Стерлитама́ка до́ждь испроси́вши, изба́вила еси́ вся́ от гла́да и запале́ния о́гненнаго, сего́ ра́ди вопие́м Ти́:

Ра́дуйся, обурева́емых ти́хое приста́нище; ра́дуйся, ми́лостей Госпо́дних исто́чниче.

Ра́дуйся, в уны́ние впа́дших ободря́ющая; ра́дуйся, моле́ния скорбя́щих ко Го́споду вознося́щая.

Ра́дуйся, хода́тайством Свои́м от зно́я и жа́жды спаса́ющая; ра́дуйся, моли́твами Твои́ми от запале́ния о́гненнаго избавля́ющая.

Ра́дуйся, а́лчущих пита́тельнице; ра́дуйся, от сту́жи погиба́ющих спаси́тельнице.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 10.

Спасти́ хотя́щи Васи́лия во́ина, в Оренбу́рге тряса́вицею стра́ждущаго, двукра́ты во сне́ показа́ ему́ пу́ть в ве́сь Табы́нскую, Богоро́дице; уразуме́в же во́лю Твою́, по́йде немощны́й, тружда́яся на пути́ зело́ и мно́жицею на зе́млю па́дая. Погрузи́вся же в исто́чник святы́й на ме́сте явле́ния ико́ны Табы́нския, а́бие исцеле́н бы́сть и, ра́дуяся, возопи́ ко Го́споду: Аллилу́иа.

И́кос 10.

Стена́ еси́, Влады́чице, все́х ве́рных от бе́д огражда́ющая, дала́ еси́ си́лу ве́лию ка́мени, на не́мже яви́ся ико́на Твоя́ Табы́нская. О́трок же не́кий боголюби́вый ча́сти ка́мене сего́ сохраня́ше. Боля́щии же омыва́ху водо́ю и́х и, пию́ще ю́ и ма́жуще е́ю ра́ны своя́, а́бие исцеле́ние приима́ху. Чу́дная сия́ соде́янная воспева́юще, пое́м Ти́ сицева́я:

Ра́дуйся, клю́ч сла́ный целе́бною си́лою надели́вшая; ра́дуйся, ка́мени благода́ть дарова́вшая.

Ра́дуйся, с ве́рою притека́ющим ко ико́не Табы́нской исцеле́ние подаю́щая; ра́дуйся, благодаре́ние и́х ко Го́споду вознося́щая.

Ра́дуйся, я́ко разсла́беннии пред ли́ком Твои́м подыма́ются; ра́дуйся, я́ко инове́рнии по́мощь от Тебе́ прие́млют.

Ра́дуйся, страсте́й душе́вных изгна́ние; ра́дуйся, умо́в помраче́нных просветле́ние.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 11.

Пе́ние хвале́бное возсыла́ху Ти́, Ма́ти Бо́жия, вси́, во хра́ме ви́девше покая́ние Гаврии́ла во́ина. То́й бо обе́т Тебе́ нару́шил е́сть и в разсла́бление вве́ржен бы́сть; в соде́янном же раска́явся и свята́го та́инства Елеопома́зания сподо́бився, к о́бразу Твоему́ припаде́ и а́бие исцеле́ние получи́. Мы́ же, гре́шнии, мно́гажды Го́спода прогневля́ющии, мо́лим Тя́: и на́м проще́ние грехо́в испроси́, со упова́нием пою́щим: Аллилу́иа.

И́кос 11.

Све́т очи́ма дарова́ла еси́, Влады́чице, ста́рице, о́смь ле́т сле́пе су́щей: егда́ идя́ше та́ в Оренбу́рге в сре́тение о́бразу Твоему́, сро́дницею свое́ю оста́влена бы́сть стесне́ния ра́ди наро́да мно́га, и, печа́лящися зело́ и пла́чущи, я́ко ника́коже возмо́жет поклони́тися святы́не, внеза́пу прозре́ и, ико́ну Табы́нскую ви́дящи, возра́довася зело́. Сего́ ра́ди со тре́петом вопие́м Ти́ сицева́я:

Ра́дуйся, я́ко по́мощь боля́щим источа́еши; ра́дуйся, я́ко неду́ги прося́щих исцеля́еши.

Ра́дуйся, слепы́х прозре́ние; ра́дуйся, глухи́х слы́шание.

Ра́дуйся, немы́х глаго́лание; ра́дуйся, вдо́в и сиро́т заступле́ние.

Ра́дуйся, ду́ш на́ших освяще́ние; ра́дуйся, земноро́дных упова́ние.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 12.

Благода́ть Свою́ яви́ на́м, Пресвята́я Де́во, моля́щимся Тебе́ пред честно́ю ико́ною Твое́ю Табы́нскою, изле́й щедро́ты Твоя́ градо́м и ве́сем не то́кмо кра́я Приура́льскаго, но все́м, честны́й о́браз Тво́й почита́ющим и пою́щим Бо́гови: Аллилу́иа.

И́кос 12.

Пою́ще чудеса́, от ико́ны Твоея́ Табы́нския явле́нная, мо́лим Тя́, Влады́чице, ли́ка Твоего́ от страны́ на́шея не отврати́ и все́м приходя́щим к чудотво́рному о́бразу Твоему́ и ми́лости от Тебе́ ожида́ющим во блага́я вся́ проше́ния испо́лни, да пое́м Ти́:

Ра́дуйся, ико́ною Свое́ю благослове́ние Бо́жие Приура́льскому кра́ю принося́щая; ра́дуйся, исто́чник Сво́й во спасе́ние в ве́си Табы́нской оста́вившая.

Ра́дуйся, смире́нных се́рдцем богове́дением просвеща́ющая; ра́дуйся, сла́ву Бо́жию воспева́ти на́с науча́ющая.

Ра́дуйся, я́ко чрез Тебе́ па́дшии покая́ние обрета́ют; ра́дуйся, я́ко призыва́ющии и́мя Твое́ свято́е от паде́ния грехо́внаго возстаю́т.

Ра́дуйся, чту́щих Тя́ и в ча́с сме́ртный не оставля́ющая; ра́дуйся, по сме́рти во оби́тели Небе́сныя ду́ши и́х сопровожда́ющая.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 13.

О Всепе́тая Ма́ти Христа́ Бо́га на́шего, приими́ моли́твы ра́б Твои́х и ми́р испроси́ все́м, с ве́рою и любо́вию ко ико́не Твое́й Табы́нской притека́ющим, и живо́т ве́чный да́руй на́м, со умиле́нием пою́щим: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгели и Арха́нгели дивя́тся Твоему́ неизрече́нному милосе́рдию к ро́ду челове́ческому, Де́во Богоро́дице, я́ко благоволи́ла еси́ яви́ти святу́ю ико́ну Твою́ бли́з гра́да Уфы́, егда́ нечести́вии ага́ряне воздвиго́ша бра́нь на ми́рныя лю́ди, разоря́юще гра́ды и ве́си и́х. Ты́ же, Блага́я, хотя́щи уте́шити ра́б Твои́х, ско́рбь и́х на ра́дость преложи́ла еси́ прише́ствием Свои́м, сего́ ра́ди вопие́м Ти́ такова́я:

Ра́дуйся, благослове́нная в жена́х; ра́дуйся, обре́тшая благода́ть у Бо́га.

Ра́дуйся, десни́цею Созда́теля благослове́нная; ра́дуйся, Ду́хом Святы́м освяще́нная.

Ра́дуйся, Ма́ти Христа́ Бо́га на́шего; ра́дуйся, в рождестве́ и по рождестве́ Де́ва.

Ра́дуйся, А́нгельских чино́в удивле́ние; ра́дуйся, святы́х немо́лчное прославле́ние.

Ра́дуйся, похвало́ Табы́нская и всего́ ми́ра наде́ждо и утеше́ние.

Конда́к 1.

Взбра́нной Воево́де ро́да христиа́нскаго и страны́ на́шея изве́стней Изба́вительнице, хвале́бныя пе́сни принесе́м Ти́, Пресвята́я Де́во, но я́ко иму́щая милосе́рдие неизрече́нное, от вся́ких на́с ско́рбных обстоя́ний свободи́, да с любо́вию зове́м Ти́:

Ра́дуйся, похвало́ Табы́нская и всего́ ми́ра наде́ждо и утеше́ние.

Моли́тва.

О Пресвята́я Влады́чице Богоро́дице, Ма́ти Го́спода на́шего Иису́са Христа́, непреста́нная о на́с пред Бо́гом моли́твеннице и хода́таице, вся́ лю́ди при Кресте́ Сы́на Своего́ усынови́вшая! Благодари́м Тя́, безчи́сленная блага́ моли́твами Свои́ми все́м испроша́ющая. Благодари́м Тя́, мно́жество ико́н Твои́х чудотво́рных стране́ на́шей дарова́вшая. Благодари́м Тя́, ди́вную ико́ну Табы́нскую в годи́ну скорбе́й кра́ю Ура́льскому посла́вшая. Мо́лим Тя́, на ка́мени ве́лием ико́ну яви́вшая, окамене́нная сердца́ на́ша росо́ю моли́тв Свои́х умягчи́. Явле́нием ико́ны Своея́ у исто́чника сла́наго благоволе́ние ме́сту сему́ показа́вшая, помози́ на́м со́лию земли́ бы́ти, во е́же сло́во Сы́на Твоего́ и Бо́га на́шего испо́лнити. Ми́лостивно дарова́вшая на́м исто́чник водны́й, боле́зни теле́сныя исцеля́яй, да́руй на́м покая́нных сле́з пото́ки, тиме́ние гре́х на́ших омыва́ющия. Ли́к Сво́й све́тлый омраче́нным грехми́ яви́вшая, просвети́ тьму́ грехо́вную, освяти́ пу́ть жи́зни и приведи́ на́с к ти́хому приста́нищу в ве́чныя оби́тели, угото́ванныя от Го́спода лю́бящим Его́, иде́же при́сно сла́вится велеле́пое И́мя Отца́ и Сы́на и Свята́го Ду́ха во ве́ки веко́в. Ами́нь.