Конда́к 1.
Взбра́нной Воево́де не умолчи́м никогда́ глаго́лати, недосто́йнии: Всесвята́я Де́во, ро́ждшая на спасе́ние на́ше Ра́дость ве́чную, вся́кое уны́ние и печа́ль отжени́ от на́с, да зове́м Ти́:
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
И́кос 1.
Та́йну от ве́ка открыва́я Тебе́, Пренепоро́чная Де́во, Гаврии́л, безпло́тных Архистрати́г, со стра́хом вопия́ше: «Ра́дуйся, благода́тная, Госпо́дь с Тобо́ю!». Мы́ же, гре́шнии, нечи́стыми усты́ дерза́ем вопи́ти Тебе́ си́це:
Ра́дуйся, Благослове́нная в жена́х; ра́дуйся, Неве́сто Неискусобра́чная.
Ра́дуйся, виногра́дная лозо́; ра́дуйся, Пресла́вная Богоневе́сто.
Ра́дуйся, цве́те неувяда́емый; ра́дуйся, купино́ неопали́мая.
Ра́дуйся, кади́ло благово́нное; ра́дуйся, ми́ро многоце́нное.
Ра́дуйся, одушевле́нная трапе́зо; ра́дуйся, Све́та Невече́рняго жили́ще.
Ра́дуйся, всего́ ми́ра очище́ние; ра́дуйся, ду́ш на́ших освяще́ние.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 2.
Ви́дящи печа́ль на́шу, испо́лни весе́лия сердца́ на́ша, Пресвята́я Де́во! Просвети́ све́том нетле́нныя ра́дости ско́рбныя ду́ши, да взыва́ем Созда́телю вы́ну: Аллилу́иа.
И́кос 2.
Ра́зум челове́чь не мо́жет уразуме́ти, ка́ко Ты́, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, те́мже со стра́хом взыва́ем Ти́:
Ра́дуйся, село́ ненасе́янное; ра́дуйся, две́ре непроходи́мая.
Ра́дуйся, стено́ и покро́ве притека́ющих к Тебе́; ра́дуйся, мо́сте, к Небесе́м преводя́й.
Ра́дуйся, ле́ствице высо́кая, ю́же Иа́ков ви́де; ра́дуйся, ста́мно ма́нны Боже́ственныя.
Ра́дуйся, разреше́ние кля́твы; ра́дуйся, наде́ждо убо́гих.
Ра́дуйся, тьму́ грехо́вную разсе́явшая; ра́дуйся, врата́ а́дова сокруши́вшая.
Ра́дуйся, Ада́мово воззва́ние; ра́дуйся, сле́з Е́виных избавле́ние.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 3.
Си́лою свы́ше осени́ на́с, Богороди́тельнице, Ты́ бо еси́ предста́тельство и покро́в жи́зни, наде́жда и утвержде́ние все́х челове́к. Исцели́, Всепе́тая, ду́ши на́ша, пораже́нныя прока́зою грехо́вною, да воспое́м Небе́сному Жениху́: Аллилу́иа.
И́кос 3.
Иму́щи богоприя́тную, Де́во, утро́бу, Вы́шняго бы́сть освяще́нное боже́ственное селе́ние. Ра́дуйся, Тобо́ю бо даде́ся ра́дость, Богоро́дице, зову́щим:
Ра́дуйся, вы́шшая Небе́с; ра́дуйся, чисте́йшая све́тлостей со́лнечных.
Ра́дуйся, честне́йшая Херуви́м; ра́дуйся, сла́внейшая без сравне́ния Серафи́м.
Ра́дуйся, хра́мино Творца́ Не́ба и земли́; ра́дуйся, покро́ве ми́ру благи́й.
Ра́дуйся, на́м стено́ и защи́то; ра́дуйся, де́монов пораже́ние и ослепле́ние.
Ра́дуйся, две́ри ра́йския на́м отверза́ющая; ра́дуйся, ра́дость все́й вселе́нней даю́щая.
Ра́дуйся, А́нгелов ра́досте; ра́дуйся, Мари́е, все́х на́с Госпоже́.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 4.
Уны́нием и скорбьми́ мно́гими смуща́ется се́рдце челове́че. К кому́ возопие́м, Влады́чице, к кому́ прибе́гнем в го́рести, кому́ возвести́м печа́ль, ра́зве Тебе́, ро́ждшия на ра́дость Не́бу и земли́ Христа́ Бо́га на́шего? Да испроси́вше Тобо́ю ми́лости, воспое́м Царю́ все́х с Херуви́мы и Серафи́мы: Аллилу́иа.
И́кос 4.
Слы́шавше Твоя́ чудеса́, не умолчи́м никогда́ си́лы Твоя́ глаго́лати, Влады́чице, Твоя́ бо рабы́ спаса́еши при́сно от вся́ких лю́тых. Те́мже припа́даем к Тебе́ и со умиле́нием пое́м:
Ра́дуйся, все́х скорбя́щих ра́досте; ра́дуйся, взыска́ние поги́бших.
Ра́дуйся, печа́лей на́ших утоле́ние; ра́дуйся, оби́димых Засту́пнице.
Ра́дуйся, а́лчущих Пита́тельнице; ра́дуйся, стра́нных утеше́ние.
Ра́дуйся, обурева́емых приста́нище; ра́дуйся, больны́х исцеле́ние.
Ра́дуйся, немощны́х покро́ве и Помо́щнице; ра́дуйся, же́зле ста́рости.
Ра́дуйся, ро́ждшая Исто́чника ра́дости; ра́дуйся, чистоты́ сокро́вище.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 5.
Боготе́чная звездо́, ра́досте ми́ра, возвесели́ и просвети́ все́х, прибега́ющих к Тебе́; све́тлым Твои́м омофо́ром защити́ на́с от вся́ких бе́д, напа́стей, скорбе́й и боле́зней, да пое́м Бо́гу: Аллилу́иа.
И́кос 5.
Моле́ние те́плое, стено́ необори́мая, ми́лости исто́чниче, все́х правосла́вных прибе́жище, Богоро́дице Де́во! А́нгельское воспева́ем Ти́ пе́ние:
Ра́дуйся, ра́досте и сла́во ве́рных; ра́дуйся, чу́до чуде́с.
Ра́дуйся, все́х святы́х непрело́жное упова́ние; ра́дуйся, ско́рое в беда́х избавле́ние.
Ра́дуйся, в ну́ждах укрепле́ние; ра́дуйся, боговмести́мое жили́ще.
Ра́дуйся, бе́здно щедро́т и благосты́ни; ра́дуйся, одушевле́нный хра́ме.
Ра́дуйся, сиро́т и вдови́ц сла́достное весе́лие; ра́дуйся, неистощи́мое и́х бога́тство.
Ра́дуйся, Де́во све́тлая, Со́лнце возсия́вшая; ра́дуйся, пло́тию ро́ждшая пло́ть Созда́вшаго.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 6.
Пропове́дуем Тебе́, Ма́ти Бо́жия, ско́рую в беда́х Засту́пницу; во вре́мя живота́ не оста́ви ны́ и и́же по кончи́не отве́т благи́й получи́ти сподо́би, да взыва́ем Спаси́телю Бо́гу: Аллилу́иа.
И́кос 6.
Возсия́й, Всенепоро́чная, све́т избавле́ния от искуше́ний и страсте́й, уще́дри, спаси́, возвесели́ ны и от лю́тых вра́г изба́ви и защити́ на́с, с любо́вию пою́щих Ти́:
Ра́дуйся, кре́пкое и непоколеби́мое упова́ние на́ше; ра́дуйся, все́х Цари́це и Влады́чице.
Ра́дуйся, всея́ вселе́нныя ве́лие сокро́вище; ра́дуйся, все́х ве́рных кре́пкое утвержде́ние.
Ра́дуйся, Засту́пнице усе́рдная ро́да христиа́нскаго; ра́дуйся, ро́ждшая все́х святы́х святе́йшее Сло́во.
Ра́дуйся, Небе́сный престо́ле; ра́дуйся, исто́чниче неизсяка́емый воды́ живы́я.
Ра́дуйся, огражде́ние и прибе́жище на Тя́ наде́ющихся; ра́дуйся, предста́тельство христиа́н непосты́дное.
Ра́дуйся, в рождестве́ и по рождестве́ Де́во; ра́дуйся, смотре́ния Зижди́телева исполне́ние.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 7.
Хотя́щи все́м спасти́ся, Всеблага́я, в ча́с кончи́ны умилосе́рди о на́с Сы́на Своего́ и Бо́га на́шего, во е́же обра́довати ду́ши на́ша во исхо́де от бре́ннаго телесе́, да воспое́м Победи́телю сме́рти и а́да: Аллилу́иа.
И́кос 7
Ди́внаго лица́ Твоего́ ра́достнаго не отврати́, Богороди́тельнице! Услы́ши мольбы́ на́ша, и во́пль на́ш к Тебе́ да прии́дет, Де́во Пресвята́я! Во́ньже а́ще де́нь призове́м Тя́, ско́ро услы́ши пою́щих Ти́ сицева́я:
Ра́дуйся, торже́ственное пе́ние А́нгелов; ра́дуйся, покро́ве и защище́ние челове́ков.
Ра́дуйся, неудобозри́мая глубино́; ра́дуйся, апо́столов похвало́.
Ра́дуйся, пресви́теров красото́; ра́дуйся, страда́льцев венча́ние.
Ра́дуйся, сто́лпе де́вства; ра́дуйся, по́стников воздержа́ние.
Ра́дуйся, мона́хов умиле́ние; ра́дуйся, святи́телей удобре́ние.
Ра́дуйся, Тобо́ю бо су́щим Вездесу́щий яви́ся; ра́дуйся, ро́ждшая Зижди́теля.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 8.
Стра́нствие земно́е соверши́вши и де́лу спасе́ния послужи́вши, со све́тлою свеще́ю доброде́телей Твои́х изшла́ еси́, Пречи́стая, в сре́тение Жениха́ Небе́снаго. Да́руй и на́м бо́дренным се́рдцем и тре́звенною мы́слию но́щь настоя́щаго жития́ прейти́ и в ра́достный черто́г сла́вы Его́ совни́ти и пе́ти Судии́ все́х Бо́гу: Аллилу́иа.
И́кос 8.
Вси́ есмы́ в ни́жних, но Небе́снаго весе́лия со все́ми святы́ми улучи́ти жела́ем. Всеси́льными Твои́ми моли́твами, Пречи́стая, сподо́би ны́ и сро́дники на́ша, и дру́ги, и зна́емыя по преставле́нии на́шем всели́тися в ме́сте све́тле, иде́же не́сть боле́знь, ни печа́ль, ни воздыха́ние, но жи́знь безконе́чная. Да прости́т на́м Госпо́дь вся́кое согреше́ние, соде́янное от ю́ности до сме́ртнаго часа́, да взыва́ем вси́ ку́пно:
Ра́дуйся, во успе́нии Свое́м ми́р не оста́вльшая; ра́дуйся, Ма́ти су́щи живота́.
Ра́дуйся, избавля́ющая от сме́рти ду́ши на́ша; ра́дуйся, в моли́твах неусыпа́ющая Богоро́дице.
Ра́дуйся, ра́йския ра́дости на́с приобща́ющая; ра́дуйся, Бо́га пло́тию ро́ждшая.
Ра́дуйся, от ро́ва поги́бели на́с спаса́ющая; ра́дуйся, милосе́рдия две́ри на́м отверза́ющая.
Ра́дуйся, ра́достное упокое́ние все́х, в ве́ре и наде́жде сконча́вшихся; ра́дуйся, наде́ждо ненаде́жных.
Ра́дуйся, непреста́нная о на́с Предста́тельнице; ра́дуйся, милосе́рдая гре́шных Засту́пнице.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 9.
Вся́кия му́ки а́дския, гее́нны о́гненныя, тьмы́ несвети́мыя изба́ви гре́шных рабо́в Твои́х, Богороди́тельнице; сподо́би ны́ жи́зни нестаре́ющияся, да пое́м всегда́ Сладча́йшему Иису́су: Аллилу́иа.
И́кос 9.
Вети́йства доброхудо́жнаго не возмога́ем возда́ти Ти́, Пречи́стая Де́во, оба́че Свои́м хода́тайством пред Престо́лом Всевы́шняго освяти́ на́ш у́м и се́рдце, ду́шу и те́ло; обнови́ ны, украси́, уцелому́дри, спаси́, просвети́ и благослови́ Свои́м Небе́сным благослове́нием, да неосужде́нно прино́сим Ти́ неиску́сное моле́ние на́ше:
Ра́дуйся, Неневе́стная Ма́ти и Неискусобра́чная; ра́дуйся, я́ко Тобо́ю Сы́на Бо́жия позна́хом.
Ра́дуйся, неруши́мая стено́; ра́дуйся, ду́ш на́ших всесоверше́нное спасе́ние.
Ра́дуйся, Ма́ти Изба́вителя от ве́чныя сме́рти; ра́дуйся, грехо́вную отъе́млющая скве́рну.
Ра́дуйся, я́ко вои́стину из Тебе́ произы́де в ле́поту Облече́нный; ра́дуйся, свире́пую бу́рю страсте́й челове́ческих укроща́ющая.
Ра́дуйся, А́нгелов святы́х святе́йшая; ра́дуйся, у́тра весе́нняго светле́йшая.
Ра́дуйся, на Небесе́х благослове́нная; ра́дуйся, на земли́ славосло́вимая.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 10.
Спасти́ся все́м хотя́щи, утверди́, Богоро́дице Де́во, в Правосла́вии лю́ди земли́ Ру́сския, покры́й на́с Твои́м честны́м омофо́ром от вся́каго зла́, да пое́м в Тро́ице Еди́ному Бо́гу: Аллилу́иа.
И́кос 10.
Стена́ еси́ все́м, боголюби́вая Де́во Мари́е, Госпоже́ Богоро́дице Безневе́стная, ве́рных спасе́ние и наде́жда, я́ко иму́щи мно́гое дерзнове́ние к Небе́сному Царю́, вопло́щшемуся из Тебе́, изба́ви ны́ скорбе́й и печа́лей. Утеше́ния и ра́дости взыску́юще у Тебе́, ра́досте на́ша, наипа́че же спасе́ния ве́чнаго тре́бующе, умиле́нно взыва́ем:
Ра́дуйся, Боже́ственнаго А́гнца ро́ждшая; ра́дуйся, лозо́, возрасти́вшая на́м Пло́д Живота́.
Ра́дуйся, вино́м Небе́сныя ра́дости на́с напая́ющая; ра́дуйся, святы́х Небе́сных Та́ин ве́рных сподобля́ющая.
Ра́дуйся, Таи́ннице неизрече́нная Све́та Невече́рняго; ра́дуйся, све́те помраче́нных ду́ш на́ших.
Ра́дуйся, покро́ве и наде́ждо все́х челове́к; ра́дуйся, ра́дование ми́ра.
Ра́дуйся, утеше́ние безуте́шных; ра́дуйся, прибе́жище безприю́тных.
Ра́дуйся, земноро́дных спасе́ние; ра́дуйся, Бо́га на́шего Ма́ти.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 11.
Пе́ние на́ше умиле́нное приими́, Богоро́дице, и покая́ния две́ри отве́рзи на́м, да поми́лует Пра́веднейший Судия́ рабо́в Свои́х, врата́ Небе́сная ве́рным отверза́яй, и не посрами́т пред А́нгелы Свои́ми, во е́же пе́ти Ему́ во ве́ки: Аллилу́иа.
И́кос 11.
Светоза́рно просвети́ на́м о́чи серде́чныя, пода́ждь па́мять сме́ртную, сохрани́ се́рдце от по́хотей лука́вых, очи́сти, Пречи́стая, от вся́кия скве́рны пло́ти и ду́ха, отжени́ от на́с уны́ние и услы́ши вопию́щих Ти́:
Ра́дуйся, Цари́це Преблага́я; ра́дуйся, Засту́пнице Преблагослове́нная.
Ра́дуйся, Помо́щнице тружда́ющихся; ра́дуйся, отра́до пла́чущих.
Ра́дуйся, оби́димых Засту́пнице; ра́дуйся, все́х христиа́н утеше́ние.
Ра́дуйся, весе́лие ду́ш на́ших; ра́дуйся, просвеще́ние ума́.
Ра́дуйся, ро́ждшая Творца́ Твоего́ и Го́спода; ра́дуйся, к Бо́гу Моли́твеннице и Предста́тельнице кре́пкая.
Ра́дуйся, ро́ждшая спасе́ние заблу́ждшим; ра́дуйся, ро́ждшая сме́рть Победи́вшаго.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 12.
Благода́тную све́тлую ри́зу Креще́ния оскверни́вше, во све́тлостех святы́х Твои́х ка́ко вни́дем, недосто́йнии? Бо́же, Бо́же на́ш! А́ще бо дерзне́м совни́ти в черто́г, оде́жда ны́ облича́ет, я́ко не́сть бра́чна. Просвети́ одея́ние ду́ш на́ших, Светода́вче, моли́твами Богоро́дицы, да пое́м Ти́: Аллилу́иа.
И́кос 12.
Пою́ще ми́лости Твоя́, Де́во Богоро́дице, взыва́ем: о Небе́снаго, о любе́знаго, о сладча́йшаго Твоего́ гла́са, веселя́щаго сердца́ на́ша! С на́ми бо нело́жно обеща́лася еси́ бы́ти до сконча́ния ве́ка. Моли́твами Твои́ми слепи́и ви́дят, глуси́и слы́шат, хроми́и хо́дят, прокаже́ннии очища́ются, а́лчущии пита́ются, нази́и одева́ются, вдови́цы утеша́ются, сироты́ ра́дуются, ни́щии веселя́тся, убо́зии лику́ют, гре́шницы спаса́ются, воспева́юще:
Ра́дуйся, одушевле́нный Бо́жий киво́те; ра́дуйся, боголюби́вая Цари́це и Влады́чице.
Ра́дуйся, от гла́да и губи́тельства, тру́са и пото́па на́с спаса́ющая; ра́дуйся, от огня́, меча́, наше́ствия иноплеме́нных и междоусо́бныя бра́ни на́с защища́ющая.
Ра́дуйся, бу́рныя во́лны жите́йскаго мо́ря укроща́ющая; ра́дуйся, вся́кую сле́зу от оче́с на́ших отира́ющая.
Ра́дуйся, любо́вию Ма́тернею лю́ди возлюби́вшая; ра́дуйся, во чре́ве Свое́м Ра́дость Ве́чную носи́вшая.
Ра́дуйся, Пода́тельнице Боже́ственныя бла́гости; ра́дуйся, все́х родо́в несконча́емое весе́лие.
Ра́дуйся, вмести́вшая в Себе́ Невмести́маго; ра́дуйся, сподо́бльшаяся бы́ти Ма́ти Бо́жия.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 13.
О Всепе́тая Ма́ти, Пречи́стая Госпоже́ Де́во Богоро́дице! Приими́ моле́ние на́ше, Засту́пнице кре́пкая су́щих в ско́рбех и печа́лех; мо́лим Тя́, пода́ждь на́м ду́ха сокруше́ние, се́рдца смире́ние, сле́зы умиле́ния, мно́гих согреше́ний на́ших проще́ние и ра́дость неувяда́емую, да пое́м в го́рнем Иерусали́ме Спаси́телю Бо́гу: Аллилу́иа.
И́кос 1.
Та́йну от ве́ка открыва́я Тебе́, Пренепоро́чная Де́во, Гаврии́л, безпло́тных Архистрати́г, со стра́хом вопия́ше: «Ра́дуйся, благода́тная, Госпо́дь с Тобо́ю!». Мы́ же, гре́шнии, нечи́стыми усты́ дерза́ем вопи́ти Тебе́ си́це:
Ра́дуйся, Благослове́нная в жена́х; ра́дуйся, Неве́сто Неискусобра́чная.
Ра́дуйся, виногра́дная лозо́; ра́дуйся, Пресла́вная Богоневе́сто.
Ра́дуйся, цве́те неувяда́емый; ра́дуйся, купино́ неопали́мая.
Ра́дуйся, кади́ло благово́нное; ра́дуйся, ми́ро многоце́нное.
Ра́дуйся, одушевле́нная трапе́зо; ра́дуйся, Све́та Невече́рняго жили́ще.
Ра́дуйся, всего́ ми́ра очище́ние; ра́дуйся, ду́ш на́ших освяще́ние.
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Конда́к 1.
Взбра́нной Воево́де не умолчи́м никогда́ глаго́лати, недосто́йнии: Всесвята́я Де́во, ро́ждшая на спасе́ние на́ше Ра́дость ве́чную, вся́кое уны́ние и печа́ль отжени́ от на́с, да зове́м Ти́:
Ра́дуйся, ра́досте на́ша, во объя́тиих Свои́х Ра́дость всего́ ми́ра носи́вшая.
Моли́тва.
О Пресвята́я Де́во, Всеблага́го Сы́на Ма́ти Всеблага́я, первопресто́льнаго гра́да и свята́го хра́ма сего́ покро́ве, все́м же су́щим во гресе́х, ско́рбех, беда́х и боле́знех ве́рная Предста́тельнице и Засту́пнице! Не пре́зри моле́ния недосто́йных ра́б Твои́х, но умоли́ Сы́на Твоего́ и Бо́га на́шего, да все́м на́м, с ве́рою и умиле́нием покланя́ющимся пред чудотво́рным о́бразом Твои́м си́м, да́рует по коего́ждо потре́бе ра́дость: су́щим в ско́рбех и печа́лех – утеше́ние; в беда́х и озлобле́ниих пребыва́ющим – соверше́нное си́х избы́тие; малоду́шным и ненаде́жным – наде́жду и терпе́ние; в ра́дости и изоби́лии живу́щим – непреста́нное Бо́гу благодаре́ние; су́щим в многонеду́жии – неча́емое исцеле́ние и укрепле́ние; все́м на́м – вседе́йственное вразумле́ние, покая́ние же и спасе́ние.
О Госпоже́ Пресвята́я, умилосе́рдися о все́х, чту́щих всечестно́е и́мя Твое́, и яви́ на́м всемо́щный покро́в Тво́й и заступле́ние. Вся́кому де́лу, Сы́ну Твоему́ уго́дному, споспе́шествуй; вся́кое де́ло зло́е разруши́; в недоуме́нии и тру́дных и опа́сных обстоя́ниих обрета́ющимся незри́мую по́мощь и вразумле́ние с Небесе́ низпосли́. И все́м на́м да́ждь любо́вь дру́г ко дру́гу, благоче́стие и здра́вие с долгоде́нствием. Преста́вльшихся в ве́ре и покая́нии от жития́ сего́ со А́нгелы и все́ми святы́ми жи́ти сотвори́, да вси́ на земли́, я́ко на Небеси́, ве́дуще Тя́ тве́рдую и непосты́дную Предста́тельницу ро́да христиа́нскаго, сла́вят Безнача́льнаго Отца́ со Единоро́дным Его́ Сы́ном и Всесвяты́м и Животворя́щим Его́ Ду́хом ны́не и при́сно и во ве́ки веко́в. Ами́нь.
