Конда́к 1.

Взбра́нной Воево́де, Влады́чице на́шей Богоро́дице, благода́рственное прино́сим пе́ние о дарова́нии чу́дныя Ея́ ико́ны Валаа́мския. Ты́ же, Всеми́лостивая Цари́це, я́ко иму́щая держа́ву непобеди́мую и милосе́рдие неизрече́нное, от вся́ких зо́л и бе́д на́с свободи́, да зове́м Ти́:

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

И́кос 1.

А́нгелов Цари́це и всея́ тва́ри Влады́чице, прославле́нием ико́ны Своея́ святы́я всю́ страну́ Росси́йскую благода́тию озари́ла еси́, те́мже ве́рнии лю́дие с любо́вию припа́дающе к ди́вному о́бразу Твоему́ Валаа́мскому, прино́сят похвалы́ сия́:

Ра́дуйся, Отца́ Небе́снаго Чи́стая А́гнице; ра́дуйся, Ма́ти Го́спода Вы́шняго.

Ра́дуйся, Це́ркве непоколеби́мый Сто́лпе; ра́дуйся, Ца́рствия Неруши́мая Стено́.

Ра́дуйся, зе́млю Ру́сскую в уде́л Себе́ избра́вшая; ра́дуйся, ико́ны Твоя́ чудотво́рныя, я́ко зве́зды, в не́й умно́жившая.

Ра́дуйся, страны́ Росси́йския Цари́це и Влады́чице; ра́дуйся, я́ко Тобо́ю лю́дие правосла́внии соблюда́ются.

Ра́дуйся, всю́ вселе́нную луча́ми Твоея́ благода́ти озаря́ющая; ра́дуйся, све́том ра́дости ду́ши на́ша просвеща́ющая.

Ра́дуйся, непобеди́мая Воево́до царе́й и во́инов правосла́вных; ра́дуйся, враго́в на́ших ви́димых и неви́димых побежда́ющая.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 2.

Ве́дый гряду́щую сла́ву ме́ста сего́, благослови́ Госпо́дь Ма́терь Свою́ простре́ти Покро́в Ея́ над о́стровом Валаа́мом, си́м Афо́ном се́верным, да вси́ спаса́ющиися на не́м от ле́т дре́вних, ны́не и до ве́ка взыва́ют непреста́нно Спаси́телю и Бо́гу на́шему: Аллилу́иа.

И́кос 2.

Ра́зум иму́ще Боже́ственный, преподо́бнии отцы́ на́ши Се́ргий и Ге́рман приидо́ша в зе́мли се́верныя во е́же Го́споду невозбра́нно послужи́ти, и дости́гше о́строва Валаа́ма, оби́тель и́ноческую та́мо устро́иша. Ты́ же, Пресвята́я Де́во, сохрани́ все́х в не́й подвиза́ющихся, еди́нем се́рдцем и еди́ными усты́ воспева́ющих Ти́:

Ра́дуйся, от младе́нства Бо́гу посвяще́нная; ра́дуйся, в хра́ме Иерусали́мском воспита́нная.

Ра́дуйся, я́ко житие́ Твое́ при хра́ме проо́браз жития́ мона́шескаго яви́ся; ра́дуйся, и́ноков чадолюби́вая Ма́ти.

Ра́дуйся, о́стров Валаа́м явле́нием благода́ти Твоея́ освяти́вшая; ра́дуйся, зе́млю Каре́льскую благоуха́нием свя́тости испо́лнившая.

Ра́дуйся, оби́тель Валаа́мскую, я́ко се́верный Афо́н, просла́вившая; ра́дуйся, хра́мы и ски́ты ея́ сла́вою чуде́с Твои́х осия́вшая.

Ра́дуйся, моли́твы преподо́бных Се́ргия и Ге́рмана к Свое́й присовокупи́вшая; ра́дуйся, ми́лостию Твое́ю на о́строве Валаа́ме ди́вный са́д духо́вный насади́вшая.

Ра́дуйся, святы́я оби́тели Валаа́мския Всечестна́я Игу́мения; ра́дуйся, Наста́внице и́ноков на пу́ть Небе́сныя жи́зни.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 3.

Си́ла Вы́шняго осени́ изо́графа, во оби́тель Валаа́мскую прите́кшаго и а́нгельский о́браз та́мо восприи́мшаго, и в че́сть свята́го иконопи́сца Пече́рскаго Али́пия нарече́ннаго. И дарова́ся ему́ благода́ть святы́я ико́ны писа́ти и хра́мы оби́тели ди́вно украша́ти, воспева́я Творцу́ и Го́споду: Аллилу́иа.

И́кос 3.

Иму́щи любо́вь ко оби́тели Твое́й избра́нней, Преблагослове́нная, сподо́била еси́ изо́графа о́наго созда́ти ико́ну Твою́ честну́ю, е́йже си́лу чудотво́рную дарова́ла еси́ во исцеле́ние и спасе́ние все́х с ве́рою и наде́ждою притека́ющих к не́й, да ви́дяще явля́емую Тобо́ю ми́лость, вопию́т со умиле́нием такова́я:

Ра́дуйся, свяще́ннаго иконописа́ния Покрови́тельнице; ра́дуйся, почита́ния святы́х ико́н утвержде́ние.

Ра́дуйся, ико́ны Твоя́ на моли́твенное обще́ние на́м дарова́вшая; ра́дуйся, чрез ни́х благода́тную си́лу источа́ющая.

Ра́дуйся, образо́в списа́телем благогове́йным любо́вь Твою́ святу́ю явля́ющая; ра́дуйся, в по́двизех и́ноческих и́х наставля́вшая.

Ра́дуйся, в труде́х иконописа́ния Али́пия укрепи́вшая; ра́дуйся, ико́ну Твою́ ди́вную созда́ти благослови́вшая.

Ра́дуйся, на ико́не се́й с Сы́ном и Бо́гом Твои́м изображе́нная; ра́дуйся, мно́гими чудесы́ ю́ просла́вившая.

Ра́дуйся, я́ко моли́твою пред не́ю прие́млем душе́вное утеше́ние; ра́дуйся, я́ко ико́ною Твое́ю Сама́ среди́ на́с пребыва́еши.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 4.

Бу́ря смуще́ний, воздвиза́емая враго́м спасе́ния, поколеба́ кора́бль смире́ния и́нока Али́пия, и пону́ди его́ оста́вити оби́тель Валаа́мскую. Оба́че моли́твами Твои́ми, Пречи́стая Богоро́дице, па́ки во оби́тель возврати́ся, и со слеза́ми к стопа́м игу́мена припа́д, вся́ ко́зни сопроти́внаго попра́ и всего́ себе́ Бо́гови предаде́. Те́мже в поще́нии, моли́твах и труде́х мно́гих во оби́тели жи́знь препроводи́в, сподо́бися в де́нь А́нгела своего́ пресели́тися во оби́тели Небе́сныя, иде́же с ли́ком А́нгельским пое́т Бо́гу: Аллилу́иа.

И́кос 4.

Слы́ша Госпо́дь ско́рбь жены́, двана́десять ле́т обурева́емыя тя́жкою боле́знию, дарова́ е́й по́мощь благода́тную Богома́тере, Я́же яви́ся боля́щей в со́ннем виде́нии и повеле́ е́й напра́вити стопы́ своя́ на Валаа́м, да просла́вится та́мо ико́на Ея́ чу́дная, дото́ле в небреже́нии пребыва́вшая, от нея́же мно́зи обрету́т ра́дость духо́вную и исцеле́ние, вопию́ще Преблагослове́нней:

Ра́дуйся, моли́тву серде́чную боля́щия рабы́ Бо́жия услы́шавшая; ра́дуйся, в со́ннем виде́нии троекра́тно е́й яви́вшаяся.

Ра́дуйся, неду́жную ста́рицу со одра́ боле́зни воздви́гшая; ра́дуйся, во оби́тель Валаа́мскую ю́ напра́вившая.

Ра́дуйся, чудотво́рную си́лу ико́ны Твоея́ откры́вшая; ра́дуйся, ико́ну Твою́ ди́вную во оби́тели показа́вшая.

Ра́дуйся, прославле́ние ико́ны Твоея́ исцеле́нием тя́жко боля́щия жены́ знаменова́вшая; ра́дуйся, сердца́ правосла́вных неизрече́нною ра́достию испо́лнившая.

Ра́дуйся, ико́ною Твое́ю в земли́ полу́нощней, я́ко со́лнце, просия́вшая; ра́дуйся, сию́ я́ко сокро́вище безце́нное на́м оста́вившая.

Ра́дуйся, я́ко пред не́ю ве́рнии благогове́йно покланя́ются; ра́дуйся, я́ко моля́щимся пред не́ю исцеле́ния подаю́тся.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 5.

Боготе́чней звезде́ подо́бна яви́ся всечестна́я ико́на Твоя́, Влады́чице, ю́же я́ко да́р небе́сный восприи́мше, и́ноцы оби́тели Валаа́мския поста́виша в собо́рнем хра́ме Преображе́ния Госпо́дня, благода́рственно взыва́юще Бо́гу: Аллилу́иа.

И́кос 5.

Ви́девше чу́до исцеле́ния боля́щия от ико́ны Твоея́, Пресвята́я Де́во, бра́тия оби́тели ра́дости испо́лнишася и пречи́стому Твоему́ о́бразу с любо́вию и благогове́нием поклони́шася. Мы́ же гре́шнии, зря́ще и ны́не во оби́тели сла́вней изображе́нную на ико́не Ма́терь Го́спода, ру́це к не́й простира́ем и умиле́нно зове́м:

Ра́дуйся, о́стров Валаа́м благослове́нием Твои́м осени́вшая; ра́дуйся, оби́тели Валаа́мския сокро́вище неоску́дное.

Ра́дуйся, любо́вь Твою́ ко оби́тели показа́вшая; ра́дуйся, благо́е промышле́ние о не́й яви́вшая.

Ра́дуйся, оби́тель сию́ ми́лостию Твое́ю посети́вшая; ра́дуйся, в зало́г любве́ ико́ну Твою́ чу́дную е́й дарова́вшая.

Ра́дуйся, во оби́тели дре́вней просла́вленная; ра́дуйся, и́ноков валаа́мских Покрови́тельнице.

Ра́дуйся, подвиза́ющимся в не́й наде́жное заступле́ние; ра́дуйся, приходя́щим в ню́ на поклоне́ние блага́я Предста́тельнице.

Ра́дуйся, и́ноков оби́тели на служе́ние Го́споду собира́ющая; ра́дуйся, в служе́нии се́м пу́ть показу́ющая.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 6.

Пропове́дница благода́тныя по́мощи Влады́чицы яви́ся исцеле́нная раба́ Бо́жия, и о чудеси́, на не́й бы́вшем, с ра́достию и благогове́нием все́м пове́да. Е́йже подража́юще, и мы́ прославля́ем ми́лости Твоя́, Де́во Пречи́стая, от ико́ны излива́емыя, я́ко гра́ды и ве́си огражда́еши, оби́тели и́ноческия защища́еши, неду́жныя исцеля́еши и вся́ блага́я низпосыла́еши все́м лю́бящим Тя́ и пою́щим Сы́ну Твоему́: Аллилу́иа.

И́кос 6.

Возсия́ на о́строве Валаа́ме о́браз равноа́нгельнаго жития́ все́м и́щущим спасе́ния дале́че от суеты́ мирски́я под держа́вным Покро́вом Богома́тере, Ея́же ико́на во оби́тели я́ко зна́мение попече́ния Пречи́стыя о все́х на́с зри́тся. Мы́ же, грехми́ помраче́ннии, толи́кую ми́лость ве́дуще, воспои́м Преблагослове́нней:

Ра́дуйся, Благода́тная, оби́тель святу́ю осени́вшая пречи́стым Твои́м о́бразом; ра́дуйся, я́ко па́че би́сер слеза́ми ра́дости ико́на Твоя́ украша́ется.

Ра́дуйся, си́лу Твою́ благода́тную в се́й ико́не оби́льно яви́вшая; ра́дуйся, во все́м ми́ре исто́чник исцеле́ний от святы́х ико́н Твои́х подаю́щая.

Ра́дуйся, покланя́ющимся ико́не Твое́й в печа́лех и беда́х ско́ро помога́ющая; ра́дуйся, и на́с гре́шных ко спасе́нию наставля́ющая.

Ра́дуйся, о все́х чту́щих о́браз Тво́й промышля́ющая; ра́дуйся, чудесы́ от него́ ве́ру и́стинную в лю́дех утвержда́ющая.

Ра́дуйся, Бо́гом дарова́нная отра́до стра́ждущим; ра́дуйся, сокро́вище благода́ти неоскудева́емое.

Ра́дуйся, ру́це Твои́ к Бо́гу о на́с простира́ющая; ра́дуйся, ве́чною ра́достию на́с одева́ющая.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 7.

Хотя́ вели́кий кня́зь Никола́й благода́рственная принести́ Тебе́, Богоро́дице, повеле́ в годи́ну бра́ни всеми́рныя устро́ити хра́м во и́мя Твое́, да вси́ и́ноцы оби́тели помина́ют вожде́й и во́инов за ве́ру, царя́ и Оте́чество живо́т сво́й положи́вших, во вся́ дни́ пою́ще Бо́гу: Аллилу́иа.

И́кос 7.

Но́вое чу́до показа́ Госпо́дь, егда́ ста́рец Валаа́мский Бори́с в виде́нии узре́ преподо́бных Се́ргия и Ге́рмана, ико́не Богома́тере предстоя́щих и моля́щихся во увере́ние пребыва́ния и́х во оби́тели со бра́тиею. Мы́ же ублажа́юще си́х уго́дников Бо́жиих мо́лимся, о е́же сподо́битися на́м, вку́пе с ни́ми досто́йно воспе́ти Всесвяту́ю Ма́терь Го́спода:

Ра́дуйся, Афо́н се́верный с преподо́бными Се́ргием и Ге́рманом охраня́ющая; ра́дуйся, ста́рца валаа́мскаго виде́ний сподо́бившая.

Ра́дуйся, Оте́чества на́шего Печа́льнице; ра́дуйся, держа́вная Покрови́тельнице на́ша во дни́ тя́жких испыта́ний.

Ра́дуйся, во дни́ бра́ни ско́рая на враги́ Помо́щнице; ра́дуйся, во дни́ ми́ра ко благоче́стию Наста́внице.

Ра́дуйся, во́инов правосла́вных на по́двиг ра́тный укрепля́ющая; ра́дуйся, му́жество неодоли́мое и́м да́рующая.

Ра́дуйся, си́лу ду́ха и́х возвыша́ющая; ра́дуйся, до́брым страти́гом и ра́тником венцы́ уготовля́ющая.

Ра́дуйся, со Архистрати́гом враги́ на́ша поража́ющая; ра́дуйся, моли́твами Твои́ми ве́сь ми́р спаса́ющая.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 8.

Стра́нное и ди́вное виде́ние дарова́ Госпо́дь ста́рцу Бори́су в преддве́рии низпроверже́ния Ца́рства Росси́йскаго: ви́де пра́ведник Тя́, Ма́терь Бо́жию, пред Сы́ном Твои́м и Го́сподем те́пле Его́ умоля́вшую со слеза́ми, да отве́рзет две́ри милосе́рдия Своего́ стране́ на́шей и лю́дем ея́. Те́мже у́бо воспла́чемся и мы́ о гресе́х свои́х и с наде́ждою возопии́м Бо́гу: Аллилу́иа.

И́кос 8.

Вся́ страна́ Росси́йская в стра́х и тре́пет прии́де, егда́ восхоте́ вра́г ро́да челове́ческаго ве́ру Христо́ву в не́й истреби́ти. Ты́ же, Всеми́лостивая, во дни́ лихоле́тия сохрани́ла еси́ зе́млю Ру́сскую от поги́бели и ве́ру правосла́вную от истребле́ния спасла́ еси́. Помози́ у́бо на́м, Влады́чице, с терпе́нием и благодаре́нием вся́кия ско́рби и беды́ претерпева́ти и взыва́ти Тебе́ ра́достно:

Ра́дуйся, избра́нным Твои́м виде́ния небе́сная открыва́ющая; ра́дуйся, ди́вная зна́мения ико́ною Твое́ю соверша́ющая.

Ра́дуйся, люде́й правосла́вных благода́тное утвержде́ние; ра́дуйся, в годи́ну испыта́ний держа́вною Твое́ю руко́ю от поги́бели на́с спа́сшая.

Ра́дуйся, Це́рковь Ру́сскую во дни́ гоне́ний омофо́ром Твои́м покрыва́ющая; ра́дуйся, в страда́ниих за Христа́ му́чеников и испове́дников ве́ры укрепля́ющая.

Ра́дуйся, во́инствующих на Це́рковь Бо́жию вразумля́ющая; ра́дуйся, зло́бу и кова́рство и́х посрамля́ющая.

Ра́дуйся, вражду́ и не́нависть ми́ром и любо́вию побежда́ющая; ра́дуйся, сле́зы ча́д Твои́х отира́ющая.

Ра́дуйся, луча́ми Боже́ственными тьму́ вра́жию попаля́ющая; ра́дуйся, во ору́жие све́та на́с облека́ющая.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 9.

Все́х в разсе́янии су́щих люде́й ру́сских уте́шила еси́, Ма́ти Бо́жия, ико́ною Твое́ю Валаа́мскою. И́ноцы бо оби́тели вку́пе с ве́рными ча́ды Це́ркве Правосла́вныя ско́рби разлуче́ния с Оте́чеством со смире́нием прие́млюще, к чудотво́рному о́бразу Влады́чицы притека́ху, в единомы́слии воспева́юще Бо́гу: Аллилу́иа.

И́кос 9.

Вети́и челове́честии недоуме́ют разуме́ти та́йну спасе́ния Оте́чества на́шего во дни́ вели́каго наше́ствия иноплеме́нник, егда́ сме́рть и у́жас по лицу́ земли́ Ру́сския проидо́ша, пла́ч и стена́ние ю́ огласи́ша. Тогда́ у́бо вси́ на Тя́, Пречи́стая, упова́ние возложи́вшии и от Тебе́ Еди́ныя спасе́ния ча́ющии, поя́ху со слеза́ми:

Ра́дуйся, Засту́пнице на́ша усе́рдная; ра́дуйся, от все́х враго́в Избавле́ние.

Ра́дуйся, на по́двиги бра́ни во́инския и духо́вныя на́с вдохновля́ющая; ра́дуйся, го́рдых си́лою Твое́ю со стыдо́м вспя́ть возвраща́ющая.

Ра́дуйся, я́ко Тобо́ю милосе́рдие Бо́жие улуча́ем; ра́дуйся, я́ко мно́го мо́жет моли́тва Твоя́ пред Сы́ном Твои́м и Бо́гом на́шим.

Ра́дуйся, ико́ну Твою́ святу́ю в беда́х и испыта́ниих невреди́мо сохрани́вшая; ра́дуйся, ру́сских люде́й в разсе́янии су́щих е́ю утеша́вшая.

Ра́дуйся, все́х разсе́янных воеди́но собира́ющая; ра́дуйся, раздо́ры и нестрое́ния умиря́ющая.

Ра́дуйся, Наде́ждо и Прибе́жище на́ше; ра́дуйся, Непобеди́мая Побе́до.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 10.

Спасти́ хотя́щи стра́ждущую страну́ на́шу, яви́лася еси́, Пречи́стая, в виде́нии ста́рцу Валаа́мскому Михаи́лу, я́ко Предста́тельница на́ша пред Бо́гом и Засту́пница, и в гро́зный ча́с беды́ враго́м противоста́ла еси́, кре́пость во́ином подала́ еси́, полки́ иноплеме́нных вспя́ть обраща́ющи, и побе́ду росси́йскому во́инству дарова́ла еси́, да вси́ лю́дие страны́ на́шея пою́т Спаси́телю Бо́гу: Аллилу́иа.

И́кос 10.

Стена́ необори́мая и исто́чник чуде́с ико́на Твоя́ свята́я яви́ся, Богоро́дице Де́во, не то́кмо оби́тели Валаа́мской, но и все́й стране́ на́шей, зе́млю на́шу огражда́ющая и в Руси́ Святе́й благогове́йне чти́мая. Спаси́ и поми́луй на́с, припа́дающих ко о́бразу Твоему́ чудотво́рному, да сподо́бимся вся́каго утеше́ния, воспева́юще Тебе́:

Ра́дуйся, в со́ниих и виде́ниих рабо́в Твои́х посеща́ющая; ра́дуйся, та́йны промышле́ния Бо́жия о стране́ на́шей и́м открыва́ющая.

Ра́дуйся, ста́рцу Михаи́лу зна́мение Твоего́ милосе́рдия к наро́ду на́шему яви́вшая; ра́дуйся, держа́ву Росси́йскую па́ки сла́вою Твое́ю осия́вшая.

Ра́дуйся, пред Го́сподем дерзнове́нная на́ша Предста́тельнице; ра́дуйся, гне́в Его́ пра́ведный, на ны́ дви́жимый, на ми́лость прелага́ющая.

Ра́дуйся, проти́ву слу́г сатани́нских ратобо́рствующая; ра́дуйся, несокруши́мый щи́те во́инов росси́йских.

Ра́дуйся, во́инство врага́ порази́вшая; ра́дуйся, от преде́л земли́ на́шея его́ отгна́вшая.

Ра́дуйся, во́ином Росси́и на по́ли бра́ни побе́ду дарова́вшая; ра́дуйся, страну́ на́шу от наше́ствия иноплеме́нных преди́вно изба́вившая.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 11.

Пе́ние моле́бное с любо́вию прино́сят бра́тия оби́тели Тебе́, о Всеблага́я Ма́ти, во хра́ме в че́сть ико́ны Твоея́ освяще́ннем. Услы́ши и на́с, моля́щихся пред пречи́стым о́бразом Твои́м, и сохрани́ жи́знь на́шу в чистоте́, от грехо́в изба́витися помози́, утоли́ боле́зни и печа́ли, на спасе́ния стези́ наста́ви и научи́ воспева́ти Человеколю́бцу Бо́гу а́нгельскую пе́снь: Аллилу́иа.

И́кос 11.

Све́тло сия́ет ди́вная ико́на Твоя́, Ма́ти Бо́жия, и Росси́йскую страну́ на́шу благода́тию озаря́ет. Сего́ ра́ди гряду́т во оби́тель Валаа́мскую на поклоне́ние правосла́вных собо́ри, умиле́нно воспева́юще из глубины́ души́ пред пречи́стым о́бразом Твои́м такова́я:

Ра́дуйся, о́стров Валаа́м све́том святы́ни озари́вшая; ра́дуйся, оби́тель Валаа́мскую благода́тию Твое́ю возроди́вшая.

Ра́дуйся, Домострои́тельнице, жи́знь оби́тели до́бре устроя́ющая; ра́дуйся, от все́х конце́в земли́ во оби́тель люде́й правосла́вных призыва́ющая.

Ра́дуйся, пало́мников благочести́вых непосты́дное упова́ние; ра́дуйся, и́ноков валаа́мских при́сное ра́дование.

Ра́дуйся, о́бразом Твои́м честны́м оби́тель и ны́не освяща́ющая; ра́дуйся, све́том Боже́ственным от ико́ны Твоея́ тьму́ неве́рия прогоня́ющая.

Ра́дуйся, Ма́ти Све́та, ду́ши ве́рных просвеща́ющая; ра́дуйся, к Све́ту и́стины на́с возводя́щая.

Ра́дуйся, О́гнь Божества́ в Себе́ вмести́вшая; ра́дуйся, любве́ Боже́ственныя свети́льниче неугаси́мый.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 12.

Благода́тное утеше́ние дарова́ла еси́ на́м, Пресвята́я Де́во, прославле́нием о́браза Твоего́ Валаа́мскаго в зна́мение ми́лости ко Оте́честву на́шему, в защи́ту от враго́в ви́димых и неви́димых. Да́руй Покро́в Тво́й, Благода́тная, на все́х путе́х жи́зни на́шея, да уразуме́ем, я́ко с на́ми Бо́г, Ему́же с любо́вию да пое́м: Аллилу́иа.

И́кос 12

Пою́ще Тя́, Преблагослове́нная, преклоня́ем коле́на пред чудотво́рным Твои́м о́бразом Валаа́мским и, моля́щеся пред ни́м, ве́руем и испове́дуем, я́ко Ты́ еси́ вои́стину Держа́вная Влады́чица страны́ на́шея и Засту́пница усе́рдная ро́да христиа́нскаго. Те́мже мо́лим Тя́, пода́ждь Оте́честву на́шему ми́р, тишину́, благоустрое́ние, и не оста́ви ве́рныя лю́ди Твоя́, во умиле́нии серде́ц принося́щия Ти́ похвалы́ сия́:

Ра́дуйся, ико́ну Твою́ Валаа́мскую ди́вно просла́вившая; ра́дуйся, но́вое зна́мение благода́ти в Це́ркви Правосла́вней те́м показа́вшая.

Ра́дуйся, я́ко от ико́ны Твоея́ зна́мения и чудеса́ соверша́ются; ра́дуйся, я́ко сердца́ благочести́вых люде́й ра́достию исполня́ются.

Ра́дуйся, страны́ Росси́йския несокруши́мое Огражде́ние; ра́дуйся, ны́нешняго ско́рбнаго ве́ка Утеше́ние.

Ра́дуйся, святы́х печа́льников земли́ Росси́йския возрасти́вшая; ра́дуйся, изнемога́ющих под тя́жестию креста́ укрепля́ющая.

Ра́дуйся, стра́х и уны́ние прогоня́ющая; ра́дуйся, ско́рбь на́шу в ра́дость претворя́ющая.

Ра́дуйся, стоя́ти за ве́ру правосла́вную на́с науча́ющая; ра́дуйся, две́ри ра́йския ве́рным отверза́ющая.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 13.

О Всепе́тая Ма́ти, Росси́йския страны́ ди́вная Засту́пнице, ми́лостивно приими́ сие́ ма́лое моле́ние, пред чудотво́рным Твои́м о́бразом возноси́мое. Сохрани́ Оте́чество на́ше, ве́ру правосла́вную в лю́дех укрепи́, изба́ви на́с от вся́ких бе́д, скорбе́й и напа́стей, и сподо́би чи́стым се́рдцем зде́ и в бу́дущем ве́це воспева́ти Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов Цари́це и всея́ тва́ри Влады́чице, прославле́нием ико́ны Своея́ святы́я всю́ страну́ Росси́йскую благода́тию озари́ла еси́, те́мже ве́рнии лю́дие с любо́вию припа́дающе к ди́вному о́бразу Твоему́ Валаа́мскому, прино́сят похвалы́ сия́:

Ра́дуйся, Отца́ Небе́снаго Чи́стая А́гнице; ра́дуйся, Ма́ти Го́спода Вы́шняго.

Ра́дуйся, Це́ркве непоколеби́мый Сто́лпе; ра́дуйся, Ца́рствия Неруши́мая Стено́.

Ра́дуйся, зе́млю Ру́сскую в уде́л Себе́ избра́вшая; ра́дуйся, ико́ны Твоя́ чудотво́рныя, я́ко зве́зды, в не́й умно́жившая.

Ра́дуйся, страны́ Росси́йския Цари́це и Влады́чице; ра́дуйся, я́ко Тобо́ю лю́дие правосла́внии соблюда́ются.

Ра́дуйся, всю́ вселе́нную луча́ми Твоея́ благода́ти озаря́ющая; ра́дуйся, све́том ра́дости ду́ши на́ша просвеща́ющая.

Ра́дуйся, непобеди́мая Воево́до царе́й и во́инов правосла́вных; ра́дуйся, враго́в на́ших ви́димых и неви́димых побежда́ющая.

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Конда́к 1.

Взбра́нной Воево́де, Влады́чице на́шей Богоро́дице, благода́рственное прино́сим пе́ние о дарова́нии чу́дныя Ея́ ико́ны Валаа́мския. Ты́ же, Всеми́лостивая Цари́це, я́ко иму́щая держа́ву непобеди́мую и милосе́рдие неизрече́нное, от вся́ких зо́л и бе́д на́с свободи́, да зове́м Ти́:

Ра́дуйся, Влады́чице, оби́тели Валаа́мския и страны́ на́шея ди́вная Засту́пнице.

Моли́тва пе́рвая.

О Пресвята́я и Преблагослове́нная Влады́чице Богоро́дице, Небесе́ и земли́ Цари́це, оби́тели Валаа́мския Покрови́тельнице! Припа́даем и покланя́емся Тебе́ пред чудотво́рною ико́ною Твое́ю, и я́ко призре́ла еси́ ми́лостивно на моли́тву боля́щия рабы́ Твоея́ и дарова́ла еси́ е́й исцеле́ние, та́ко и ны́не приими́ на́ше усе́рдное моле́ние, Тебе́ приноси́мое. Спаси́ и сохрани́, Всеми́лостивая, Оте́чество на́ше и вся́ лю́ди правосла́вныя, живу́щия в не́м и к Тебе́ с любо́вию прибега́ющия, от наше́ствия иноплеме́нных, от гла́да и мо́ра, и от вся́каго зла́; упра́ви пути́ на́ша, да возсия́ют в земли́ на́шей пра́вда и ми́р, ра́дость и любо́вь, сохрани́ в не́й до сконча́ния ве́ка ве́ру правосла́вную. Воззри́ ми́лостивым о́ком Твои́м на оби́тель Валаа́мскую и соверши́ Сама́ о Го́споде спасе́ние все́х в ве́ре и наде́жди подвиза́ющихся в не́й. Умоли́ Сы́на Твоего́ и Бо́га на́шего, да изба́вит все́х на́с от вся́кия беды́, ско́рби и боле́зни, да наста́вит на исполне́ние за́поведей Свои́х, от ве́чныя му́ки изба́вит и да сподо́бит Твои́м хода́тайством всели́тися во оби́телех Небе́сных и сла́вити та́мо Пресвяту́ю Тро́ицу, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Моли́тва втора́я.

Пресвята́я Госпоже́, Влады́чице Богоро́дице, страны́ на́шея Засту́пнице, оби́тели Валаа́мския красото́ и сла́во! Взира́юще на пречи́стый ли́к Тво́й, в чудотво́рней ико́не явле́нный, мо́лим Тя́, сохрани́ от вся́каго зла́ оби́тель сию́, ю́же преподо́бнии Се́ргий и Ге́рман основа́ша, во бра́тии ми́р соблюди́, осени́ покро́вом Твои́м строи́телей, благотвори́телей и благоукраси́телей ея́. О Всечестна́я на́ша Ма́ти, Игу́мение все́х правосла́вных оби́телей и и́ноческаго жития́ Покрови́тельнице, пребу́ди неотсту́пна от оби́тели сея́, су́щаго достоя́ния Твоего́, и всеси́льными Твои́ми моли́твами покры́й и заступи́ зде́ подвиза́ющихся, от вся́ких бе́д и ну́жд, помози́ уста́вы преподо́бных оте́ц непоколеби́мо сохрани́ти, изба́ви от паде́ний грехо́вных, да́руй на́м ду́х сокруше́ния и смире́ния, наста́ви и́ноков в исполне́нии обе́тов и все́х христиа́н в де́лании за́поведей Бо́жиих. Приими́ смире́нное моле́ние на́ше, согре́й на́с любо́вию Твое́ю и никогда́же отступа́й от на́с, да не оскуде́ет ве́ра в на́с гре́шных, и да сподо́бимся вни́ти в Ца́рствие Небе́сное, в не́мже возвели́чим Тя́, Ма́терь на́шу Всепе́тую, и просла́вим Сы́на Твоего́ и Бо́га на́шего, со Безнача́льным Его́ Отце́м, и Пресвяты́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.