Акафист Пресвятой Богородице пред иконой «Всечестная Игумения монашеских обителей»

Не утвержден для общецерковного использования.

Кондак 1

Избранной от сложения мира Пресвятей Деве Марии Богродице, яко воистину плотию родшей Иисуса Христа, Спаса и Бога нашего, яко Владычицу всея Вселенныя, зело возлюбившей род преподобных Христа, и взявшей под Свой державный покров их святыя обители, похвальная приносим пения. Ты же, о Всечестная наша Мати Игумения, храни и спасай нас от всех врагов видимых и невидимых, да зовем Ти:

Радуйся, Пресвятая Богородице Дево, святыя горы Афона и всея Вселенныя православных обителей Всечестная Игумения.

Икос 1

Ангели плотию суще, вси преподобнии отцы и матери, юноши и девы, от века просиявшии во святых, и ныне православно шествующие в небесныя селения под сиянием Честнаго и Животворящаго Креста Христова на земном поприще, в юдоли плача и скорбей, под державным покровительством Матери Христа Бога нашего, Всечестнейшия Игумении православного монашескаго жития, Ея же милостивому заступлению радостно взываем сице:

Радуйся, святыя Афонския горы спасительнице;

Радуйся, тамо живущих иноков хранительнице;

Радуйся, веселие и славо Христовых подвижников;

Радуйся, отрадо Божественныя святых пустынников;

Радуйся, яко Тобою все святые спасаются;

Радуйся, яко Тобою вся вселенная украшается;

Радуйся, миров бесчисленных по Бозе упование;

Радуйся, в селения Рая небеснаго руководительнице;

Радуйся, благое начало и славный конец всех святых жития;

Радуйся, святыя радости Божественная струя;

Радуйся, Пресвятая Богородице Дево, святыя горы Афона и всея вселенныя православных обителей Всечестная Игумения.

Кондак 2

Видящи скорбный путь спасения для всех преподобных Своих, Господь наш Иисус Христос благоволи Матери Своей Всепречистой Деве Марии Богородице, да прострёт Она Свой Божественный Покров игуменства над всеми святыми обителями Афонския горы и всея Вселенныя православного монашескаго спасения, да вси спасающиеся в преподобии и святости, верою видяще сие взывают непрестанно Спасителю Богу: Аллилуия.

Икос 2

Разум имуще Божественный вси преподобнии отцы и матери. От всея души возлюбиша славу небесную, а мир со всеми его прелестьми возненавидеше, ногами попраше, шествоваху в подвизе святых за Христом в мире жития своего безбедно, руководимыя своею Приснодевственною Небесною Игумениею. Еяже, верою зряще лице Ея икон святых, умильно взывают тако:

Радуйся, нашего спасения главизно;

Радуйся, Радосте наша в сей и в будущей жизни;

Радуйся, дивная строительнице наших святых обителей;

Радуйся, Экономиссе милосердная иноческих общежитий;

Радуйся, цвете Божественного прозябения;

Радуйся, Радосте Всемирного Воскресения;

Радуйся, всех святых Божественное веселие;

Радуйся, истинная Мати нашего Спасителя;

Радуйся, яко плотию родила еси ада Победителя;

Радуйся, яко там в преподобии живущих в рай руководила еси;

Кондак 3

Сила Вышняго осеняет всех в преподобии и в святости живущих, иже возненавидеша суету мира сего и бежаша во святыя обители монашеския, и тамо во образе ангельском, вземше на ся благое иго Христово, свято подвизающихся чрез все житие свое, взывают непрестанно ко Пресвятей Троице Богу: Аллилуиа.

Икос 3

Имуще пламенное желание спасения, соборы преподобных просиявшии во святых от века, и ныне подвиги спасения совершающии: в обителях иноческого жития, в лаврах, в монастырях, скитах, киновиях, келлиях и на всяком месте всея Вселенныя, имея дивный щит спасения Божественного Игуменства Матери Своей Божией, хвалебно Ей песнопоют:

Радуйся, собирательнице наша среди мира греховнаго;

Радуйся, строительнице нашего спасения духовнаго;

Радуйся, спасшая весь род Адама падшаго;

Радуйся, плотию рождшая неизреченно Спаса и Бога нашего;

Радуйся, Всечестнейшая Монахине, образе спасающимся;

Радуйся, Праведная Игумения всем нам подвизающимся;

Радуйся, веры Православныя Воевода непобедимая;

Радуйся, Божественная крепосте всесильная;

Радуйся, Мати Господня и наша благодатная;

Радуйся, всех святых надеждо благоприятная;

Радуйся, двере милосердия для кающихся;

Радуйся, упование по Бозе подвизающихся;

Кондак 4

Бурю сомнений грехолюбивых оставльше отцы преподобнии и матери возлюбиша тернистый путь спасения, живущи среди скорбей и лишений Царствия ради Небеснаго, украсивше своим богоугодным житием премногия места вселенныя, идеже основаша святыя обители иноческаго спасения, в нихже спасающиися присно поют ангельскую песнь Христу Богу нашему: Аллилуиа.

Икос 4

Слышавша святыя глаголы Христова Евангелия избранницы небеснии, вся презревши суетная мира сего, и в путь святый поидоша, нося благое иго Спаса нашего, житием своим во плоти ангелом святым уподобишася, имея предивную Игумению над всеми их святыми обителями по всей Вселенней яко звезды небесныя сияющими, к Нейже и вопиют всегда:

Радуйся, премудрая Игумения монашества православнаго;

Радуйся, спасение народа богоизбранного;

Радуйся, столпе девства и океан милосердия;

Радуйся, вечная отрадо райскаго прозябения;

Радуйся, прибежище кающимся грешникам;

Радуйся, сокровище убогим подвижникам;

Радуйся, яко вселенную любовию покрывающая;

Радуйся, славою небесною сатану во ад низвергающая;

Радуйся, божественная радосте ангелов и человеков;

Радуйся, яко плач принесла еси демонам во веки;

Радуйся, единая надеждо веры православныя;

Радуйся, Мати Господня и наша всеславная;

Кондак 5

Боготечную жизнь праведницы проидоша и Небеснаго Отечества с радостию достигоша, веселятся о Господе со ангелы святыми во вся веки. Мы же, их собратия и соратницы на поприще спасения, милостию Божиею подвизаемся во святых обителех, поюще хвалебныя песни к Богу: Аллилуиа.

Икос 5

Видеша избранницы Господни скоропреходящую славу мира сего: богатство непостоянно, красота увядает, счастие скоротечно; скорби же, и печали, и отчаяние, и всякия злоключения – присныя спутницы жизни сея, в конце же смерть телесная, всем людям неизбежная. Святою верою вечная селения созерцаху, возлюбиша тесный и прискорбный путь монашескаго жития, идеже Пресвятая Богородица Сама о Господе игуменствует, руководя спасающимися духовными чадами Ея, хвалебно к Ней взывающими:

Радуйся, единое спасение душ наших;

Радуйся, райское утешение всех скорбящих;

Радуйся, святыя горы Афона просветительнице;

Радуйся, всея Вселенныя руководительнице;

Радуйся, надеждное прибежище всем кающимся;

Радуйся, тихое пристанище от бед спасающимся;

Радуйся, Лавры Печерския строительнице;

Радуйся, Почаевския обители защитнице;

Радуйся, экономиссе Лавры Афанасия Афонскаго;

Радуйся, книга Христова Завета Ново-Сионскаго;

Радуйся, всех святых во едино собравшая;

Радуйся христианам православным путь в рай указавшая;

Кондак 6

Проповедницы благодатнаго равноангельскаго жития во плоти явишася отцы преподобнии: Антоний Великий, Пахомий, Макарий, Феодосий и прочие преподобнии отцы и матери, - ихже житию сонми последоваша всех преподобных, наследницы бывше райских обителей, со всеми святыми. И мы, им подражающе, во ангельском чине живуще, воспеваем Спасителю мира хвалебныя гласы: Аллилуиа.

Икос 6

Возсия образ жития равноангельскаго для всех ищущих спасения вдали от сует мирских, примером Самаго Христа Спаса и Бога нашего и Его Причистлй Матери, Приснодевы Марии Богородицы, Предтечи Иоанна и премногих святых угодников, ихже житию подражают вси преподобнии под державным покровом Владычицы Вселенныя, Всечестнейшия Игумении православно-монашеских обителей, Марии Богородицы, хвалимой от всех святых, предивными похвалами сими:

Радуйся, православнаго монашества Мати Игумения;

Радуйся, их ангельскаго жития вечное спасение;

Радуйся, благая наставнице на путь небесныя жизни;

Радуйся, Настоятельнице монашеския Отчизны;

Радуйся, скорая защита всех сиротствующих;

Радуйся, яко подвижникам святым венцы всегда готуеши;

Радуйся, всех праведников любящая;

Радуйся, кающихся грешников милующая;

Радуйся, яко Твоя любовь Божией любви уподобляется;

Радуйся, яко всякая тварь Тобою о Господе спасается;

Радуйся, радосте Божественнаго веселия;

Кондак 7

Хотящу скорбный путь к Небеси благоустроити Господь наш Иисус Христос благоволи Матери Своей, да игуменствует над всеми православными иноческими обителями по всей Вселенней сущими, руководя в селения Небеснаго Рая сонмы избранников, ищущих спасения и поющих Избавителю Богу нашему: Аллилуиа.

Икос 7

Новую жизнь образом ангельскаго жития показаша, отцы преподобнии и матери, зане вся оставильше сладости мира греховнаго и возлюбиша шествовати к Небеси путем Царя Славы Христа Бога нашего крестными страданиями и быша мученицы без крови, терпяще вся злая, Царствия ради Божия, еже и получиша. И ныне сонмы преподобных шествуют таковым путем, водимые Материю Божиею, яко Всечестнейшею Игумениею, их преподобнаго жития, превозносимою от них похвалами:

Радуйся, Мати Господа, Судии Всеправеднаго;

Радуйся, во Игумении от века предъизбранная;

Радуйся, чистотою телеси всю тварь превозшедшая;

Радуйся, святостию своея души Небеса украсившая;

Радуйся, благовестие Небеснаго Отечества;

Радуйся, духовный крине православнаго монашества;

Радуйся, усердная молитвенница о всех православных;

Радуйся, благая строительнице спасения для всех святых избранных;

Радуйся, тихое пристанище всем странствующим;

Радуйся, покоище блаженныя старости;

Радуйся, Невесто Неневестная;

Радуйся, яко на земли и на Небеси и во аде известная;

Кондак 8

Странное житие имущи Христовы избранницы, оставльше телесныя сладости и утехи, возлюбиша путь крестных страданий: в пустынях, на островах, в расселинах скал и в дубравах со зверьми живуще равноангельно, идеже устроиша Божиею волею святыя обители, в нихже воспеваху чрез все житие свое херувимский глас ко Господу: Аллилуиа.

Икос 8

Весь был Всемогущий Бог в умах и сердцах избранных своих угодников, по реченому: «Дивен Бог во святых своих», прославляя святыя своя, собирая из среды мира греховнаго во святыя обители, да хвалится ими святое имя Его, со святыми ангелы во веки вечныя, и Владычица Богородица, Всеблагая Матерь Господня, премудро игуменствует, спасая от бед и скорбей, смиренно восхваляющих милости Ея:

Радуйся, честнейшая всея твари Вселенныя;

Радуйся, сладчайшая, яко Божие селение;

Радуйся, святый покров жизни нашея;

Радуйся, Божественный источник сладости сладчайшия;

Радуйся, вся наша надеждо спасения и покой;

Радуйся, по Бозе все наше упование в жизни земной;

Радуйся, яко воскресе Сын Твой и Господь;

Радуйся, Он воскресит всякую плоть;

Радуйся, Юже воспевают небесныя воинства;

Радуйся, от всех святых превозносимая по достоинству;

Радуйся, великая радосте моего спасения;

Радуйся, всего мира Божественное утешение;

Кондак 9

Всякое мудрование земное презревше, святии угодницы, яко юроди Христа ради явишася, бегая странствующе на земли, не имуще нигде телеснаго покоя, Царствия ради Небеснаго, еже и получиша. И мы им подражающе житием, подвигами и любовию ко Господу, Его же и восхваляем, ангельски поюще: Аллилуиа.

Икос 9

Ветия премудрости Господней явишася отцы преподобнии: Антоний Великий, Макарий Египетский, всез православных иноков начальницы, просиявшии во святых, ибо святым своим житием равноангельским на земли и словами спасения спасоша премногия сонмы учеников, истинных рабов Христовых, по всей Вселенней велением Пресвятыя Троицы, под державным игуменством Владычицы Богородицы, Юже от всея души всегда хвалиша тако:

Радуйся, Державная Владычице Вселенныя;

Радуйся, Игумения нашего спасения;

Радуйся, Бога Отца Дщерь вселюбезная;

Радуйся, Материю Сыну Божию быти сподобилася еси за святость и за смирение;

Радуйся, Духа Святаго прекрасная палато;

Радуйся, на Небеси и на земли любовью всебогатая;

Радуйся, Инокине, честнейшая Херувимов;

Радуйся, яко Матерь Бога превыше Серафимов;

Радуйся, святых мучеников предивное терпение;

Радуйся, Апостолов Христовых всемирное учение;

Радуйся, наша помощь в земных страданиях;

Кондак 10

Спасти хотя род человеческий Господь наш Иисус Христос, сошед с Небеси во юдоль плача и скорбей и Своими страданиями Божественнаго жития подаде пример для всех святых, желающих достигнути небеснаго покоя, в преподобии и правде живущих, Его ангельскими гласами восхваляющих: Аллилуиа.

Икос 10

Стена крепости Божественныя явилася еси наша Всечестная Мати Игумения: охраняя, спасая и покрывая все святыя обители иноческой жизни на святей горе Афонской и по всей Вселенней от зари поры Христианской и до дне Страшнаго Суда Христова, спасая Божественною милостию преподобныя своя, присно хвалящия Ея щедроты сими словесы:

Радуйся, Пресвятая наша Мати Игумения;

Радуйся, источник духовнаго воскресения;

Радуйся, всю Вселенную покрывающая;

Радуйся, святую Церковб Христову увеселяющая;

Радуйся, пропочества Славо и Венец;

Радуйся, и моея жизни блаженный конец;

Радуйся, краше неба и сладше рая;

Радуйся, пример для святаго жития;

Радуйся, любящая Свой жребий – Афон;

Радуйся, Иерусалим и Сион;

Радуйся, Мати Милосерднаго Судии;

Радуйся, проливающая о нас слезныя струи;

Кондак 11

Пение всеумиленное приносят вси святии в Небесных селениях Райских, со святыми ангелами хваляще и превозносяще Пресвятую Троицу: свят, свят, свят, - вопиют. И мы, православныя иноцы, верою сие зряще, вопием непрестанно к Богу нашему: Аллилуиа.

Икос 11

Светоприемную свещу православнаго жития соборы преподобных приемше, и со всеми святыми, просиявшими от века, якоже впреди, тако и ныне в путь небесный шествуют, имея Всемогущую о Господе Владычицу, Матерь Эммануилеву, яко Игумению их побоподобнаго жития, и с радостию вопиют к Ней похвалами сими:

Радуйся, собирательнице наша во обители спасения;

Радуйся, подающая нам образ смирения;

Радуйся, Игумения святыя горы Афонския;

Радуйся, Настоятельнице всех святых монастырей;

Радуйся, Монахине, житием всечестнейшая;

Радуйся, Воеводо, во бранех всесильнейшая;

Радуйся, живых и умерших спасительнице;

Радуйся, святых пленников освободительнице;

Радуйся, сиротствующих Мати Господня Благодатная;

Радуйся, в скорби сущих отрадо приятная;

Радуйся, спасение православных христиан;

Радуйся, святых щедрот Божественный океан;

Кондак 12

Благодать подает всегда Пресладкий Спаситель наш, всем святым рабам Своим, в преподобии и святости подвизающимся на поприще земнаго жития. Ибо уже сонмы святых, прославленных Православною Церковью, в райских селениях прославляют Пресвятую Троицу со всеми небесными силами, и мы им подражающе, вопием дивному во святых Богу: Аллилуиа.

Икос 12

Поюще вся милости Господни и щедроты к нам недостойным инокам, присно ниспосылаемыя, всечестное игуменство над всеми нашими обителями нашея Всеблагодатныя Владычицы Богородицы, радуемся Божественному игуменству и веселимся, яко мы сподобились спасение совершати в тех святых обителях, идеже уже премногия сонмы преподобных подвижников достигоша Небеснаго Царствия. Ихже святыми молитвами, по милости Божией, под святым покровом нашей Небесной Матери, достигнем и мы райских селений за труды же спасения похвальная сице приносим словеса:

Радуйся, Пресвятая Дево Богородице;

Радуйся, спасения нашего помощнице;

Радуйся, Игумения всещедрая;

Радуйся, в преподобии Ты еси первая;

Радуйся, покровом милости весь мир покрывающая;

Радуйся, сирот странных питающая;

Радуйся, юных целомудрия наставнице;

Радуйся, о всех людех благая печальнице;

Радуйся, рода праотца Адама веселие;

Радуйся, тихое пристанище спасения;

Радуйся, Всещедрая наша Мати Игумения;

Радуйся, благое начало и конец нашего спасения;

Кондак 13

О, Всепетая наша Мати Игумения, Преславная Владычице Богородице, приими сие наше моление, от всея души Тебе ныне возносимое. И сподоби нас в чине ангельском достигнути Небеснаго Царствия, идеже вси святии ангели и человецы воспевают непрестанными гласы хвалу Пресвятей Троице: Аллилуиа!

Сей кондак глаголи трижды и паки первый икос и первый кондак.

Молитва ко Пресвятей Богородице

О, Пречистая Владычице Богородице, Всечестнейшая наша Мати Игумения, всех православных святых обителей иноческаго жития на святей горе Афонской и по всей вселенней сущих скорая помощнице! Приими смиренныя моления наша и принеси я ко Всещедрому Богу нашему, да спасет души наша Своею благодатию.

Воззри на нас милосердным оком и соверши Сама о Господе наше спасение, понеже без милости Спаса нашего, и Твоего, Пречистая, святаго о нас ходатайства нет спасения.

Тебе молим: О, Всемилостивая Госпоже наша, Всечестнейшая наша Мати Игумения, пребыстрая Заступнице рода христианскаго! Мы же не возможем совершати своего спасения, яко окаляхом житие наше в суетах мирских, в нерадении и безпечии о душах своих. Ибо время приблизися жатвы Христовой и день Страшнаго Суда присле, яко погибаем в бездне греховней нерадения ради нашего, по реченному от святых отцев первоначальников ангельскаго во плоти жития, яко последнии монаси нерадением жития своего уподобятся мирским людем, еже и сбыстся днесь, ибо последнее иночество наше плавает житием своим на море житейском, среди великия бури и непогоды, ибо святыя обители во прахе пребывают, грехов ради наших. Но, Всеправедный Господь наш Иисус Христос Судия, тако благоволи Тебе, Пречистей, просити у Него все, что хощеши.

О, Сладчайшая наша Мати Игумения! Покрый нас покровом милости Твоея от враг видимых и невидимых, от всякаго зла, от напрасныя смерти, от всех зол душевных и телесных, и приведи нас, Всемилостивая Благоподательнице, к тихому пристанищу, яко недостойнии, не имеем где главы подклонити, и собери ны, рассеянное стадо Христово, во едино, и спаси православное монашество последнего века сего и всех православных христиан, сподоби райския жизни со ангелы и со всеми святыми во Царствии Христа Бога нашего. Емуже подобает честь и слава со Безначальным Его Отцем и со Пресвятым, Благим и Животворящим Его Духом во веки веков.

Аминь.

Сайт создан в системе uCoz

Акафист иконе Божией Матери Знамение

Празднование совершается 27 ноября/10 декабря

Кондак 1

Взбранной Воеводе, Царице Небесе и земли, даровавшей нам пречудную икону «Знамение», благодарственное приносим пение. Ты же яко Благосердая Мати не отрини нашего сего моления, но благоволи прияти е, сподобив вопити Тебе тако:

Радуйся, Владычице, знамение милости Твоея нам являющая.

Икос 1

Ангельский глас услыша святая Анна, извествующ: ты зачнеши и родиши Дщерь Преблагословенную Марию; о Ней благословятся вся племена земная и приидет спасение всему миpy. Сие ведуще, возопием Богородице:

Радуйся, освященное селение Бога Слова;

Радуйся, благодатию Божиею и нас освящающая.

Радуйся, спасению падшаго рода человеческаго послужившая;

радуйся, Матерним Твоим попечением всех нас объемлющая.

Радуйся, в бедах и напастях скорая нам Помощнице;

Радуйся, злыя страсти наша невидимо укрощающая.

Радуйся, в христианских добродетелях преуспевати нам помогающая;

Радуйся, недуги наша безмездно врачующая.

Радуйся, Владычице, знамение милости Твоея нам являющая.

Кондак 2

Видяще святые Твои родители Иоаким и Анна, яко Ты еси, Пречистая, плод благословенный, возблагодариша Бога и пред дверьми храма положиша и обет даша посвятити Тя Господу, поя Ему: Аллилуия.

Икос 2

Разум совершенный Ты Сама стяжала еси, Богородице, воспитавшися во Святая святых, тако не престаеши умудряти и просвещати светом богоразумия и вся христианы, вопиющия Ти таковая:

Радуйся, Дево, христиан похвало;

Радуйся, яко блажат Тя вси роди.

Радуйся, на стези покаяния нас премудро наставляющая;

Радуйся, Надеждо христиан ненадеждных.

Радуйся, скорбящих радосте и заступление;

Радуйся, безпомощным скорую помощь Твою являющая.

Радуйся, обидящих всегрозная устрашительнице;

Радуйся, обидимых Всеблагая Заступнице.

Радуйся, Владычице, знамение милости Твоея нам являющая.

Кондак 3

Сила Вышняго осени Тя, Благодатная, егда архангел Гавриил благовествоваше о безсеменном зачатии из Тебе Сына Божия, Спасителя Mиpy. Прияв сию благую весть со смирением, яко раба Господня, возопила еси Богу: Аллилуия.

Икос 3

Имущи во утробе Христа Жизнодавца, востекла еси Благословенная к южике Своей, праведней Елисавете и «целовастася обе матери», радуяся о Бозе Спасе нашем. Сего ради, яко источнику святыя радости, вопием Ти сице:

Радуйся, умирение миpy Святым рождеством Твоим принесшая;

радуйся, знаменьми и чудесы Твоими христолюбивыя люди утешающая.

Радуйся, неправедно враждующия наказующая;

Радуйся, утесняемым ослабу и свободу дарующая.

Радуйся, от стрелы вражия язву на лице иконы Твоея приемшая;

радуйся, слезы благодатныя от нея дивно источившая.

Радуйся, во бранех крепкая помощнице;

Радуйся, врагов посрамление.

Радуйся, Владычице, знамение милости Твоея нам являющая.

Кондак 4

Буря недоумения смущает ми ум, како возмогу недостойными усты восхвалити Тя, Пресвятая Дево, за Твое великое нам вспоможение. Тем же величая неисчетныя Твоя милости, смиренномудренно пою Вседержителю Богу: Аллилуия.

Икос 4

Слышаша Вифлеемстии пастырие ангелов поющих Христово Рождество, текше в пещеру, обретоша тамо Богородительницу, на руках содержащую Превечнаго Младенца. С ними в веселии духовнем и мы, яко общей Матери, глаголем тако:

Радуйся, яко из Тебе в плоть облечеся, одеваяй небо облаки;

Радуйся, яко млеком питала еси Питателя вселенныя.

Радуйся, Живоначальныя и Единосущныя Троицы благодатию осененная;

Радуйся, ангельския соборы чистотою превозшедшая.

Радуйся, человеческаго рода возвышение;

Радуйся, непобедимая Воеводо вождей и воинств христианских.

Радуйся, Заступнице наша от Бога нам дарованная;

Радуйся, Радосте наша и спасение душ наших.

Радуйся, Владычице, знамение милости Твоея нам являющая.

Кондак 5

Боготечною звездою являешися, Царице Небесная, всем под кров Твой всемощный прибегающим и непрестанно во умилении сердечнем вопиющим: Аллилуия.

Икос 5

Видя праведный Симеон Тя, пришедшую с Младенцем Иисусом во храм преставитися Господеви, рече: «Тебе же Самой душу пройдет оружие», - проразумевая матерния Твоя страдания о Сыне Твоем Божественнем и о всех гонимых за Имя Его Святое. Сего ради зовем Ти:

Радуйся, скорбящих Радосте и обидимых Заступнице;

Радуйся, печальных Утешение и бедствующих Помощнице.

Радуйся, болящих немздоприимная Целительнице;

Радуйся, нищих и убогих некрадомое богатство.

Радуйся, терпеливых страдальцев дарами благодатными ущедряющая;

Радуйся, отчаянных и безнадежных от рова погибели избавляющая.

Радуйся, вдовиц и сирых благосердая Попечительнице;

Радуйся, целомудрия и воздержания юных Наставнице.

Радуйся, Владычице, знамение милости Твоея нам являющая.

Кондак 6

Проповедницы Твоея благодатныя помощи суть все множество Тобою спасенных: страждущих, болящих, скорбящих и грехми обремененных, благодарственно о Тебе поющих Богу: Аллилуия.

Икос 6

Возсия Божественный Свет во Египте и падоша тамо идоли, егда бежала еси Пречистая с Богомладенцем Иисусом, спасаяся от убийства Иродова. Ты убо озаряеши светом боговидения умы всех удаляющихся прелестей суетнаго миpa, исторгая из душ их кумиры гнездящихся тамо губительных страстей. Тем же превозносим Тя словесы сими:

Радуйся, Молитвеннице благоприятная за нас к Богу;

Радуйся, Предстательнице всемощная, гнев Божий на милость прелагающая.

Радуйся, руце Твои богоносне на умоление ко Творцу выну простирающая;

Радуйся, яко Мати Сына, Судию Праведнаго о всем миpe умоляющая.

Радуйся, покровом Матерняго Твоего заступления всех нас покрывающая;

Радуйся, сущих в бедах и скорбях благодатию смирения и терпения снабдевающая.

Радуйся, старцев благоговейных сладкое успокоение;

Радуйся, стариц боголюбивых тихое прибежище.

Радуйся, Владычице, знамение милости Твоея нам являющая.

Кондак 7

Хотящи николиже отлучатися от Рожденнаго Тобою Спасителя миpa, Ты, Богоблаженная, пребывала еси с Ним неотлучно во граде Назарете, детоводя и питая Его, яко человека и поя в сердце Своем, яко Богу: Аллилуия.

Икос 7

Новую показуя матернюю любовь к Сыну Твоему, со скорбию искала Его, двоюнадесятилетня Отрока во граде Иерусалиме в праздник Пасхи «мнеша Его в дружине суща». Ведуще таковое Твое сердоболие, со умилением вопием Ти:

Радуйся, страждущия и безпомощныя невидимо укрепляющая;

радуйся, болящия и безнадежныя от одра болезни возставляющая.

Радуйся, кающихся грешников верная Споручнице;

Радуйся, даров духовных щедрая Подательнице.

Радуйся, верою молящимся Тебе великия милости являющая;

Радуйся, во благих прошения наша дивно исполняющая.

Радуйся, струи благодатных исцелений обильно нам источающая;

радуйся, всем вся полезная дарующая.

Радуйся, Владычице, знамение милости Твоея нам являющая.

Кондак 8

Странное и предивное Твое попечение бысть о христианех на всех путех их жизни многомятежней и многотрудней. Имея в Тебе столь милосердую и независтную Помощницу, вси облагодетельствованные Тобою велегласно поют Богу: Аллилуия.

Икос 8

Вся была еси со Христом при служении Его роду человеческому, како и божественный евангелист Лука повествует о Тебе, глаголя: «Мати Твоя, и братия вне стоят, видети Тя хотяще». Мним, яко Ты, Всеблагая Мати, неотступно пребываеши и со всеми труждающимися во славу Божию, восхваляющими Тя тако:

Радуйся, скоропредстательная Помощнице усердно к Тебе притекающим;

Радуйся, благосердая Услышительнице молений наших.

Радуйся, великий Новгород благословением Твоим осенившая;

радуйся, многих мест и обителей сокровище неоскудное.

Радуйся, иноков и инокинь благоподвизающихся всемощная Покровительнице;

Радуйся, в мире благочестно живущих усердная Заступнице.

Радуйся, ведущим брань противу мира, плоти и диавола добрая Споспешнице;

Радуйся, за всех нас милостивая к Сыну Твоему и Богу Ходатаице.

Радуйся, Владычице, знамение милости Твоея нам являющая.

Кондак 9

Всяк возраст верных благопользуется Твоим попечением, Всемилостивая Мати, яко всегда, к Тебе прибегающим душеполезная даруеши, потребная в житии доставляеши и усердно ходатайствуеши за ны, немощныя и грешныя, у Престола Господа Славы, Емуже поем: Аллилуия.

Икос 9

Ветии многовещанныя не могут изглаголати Твоея матерния печали, при Кресте Сына Твоего бывшей, егда видела еси Его страждуща за вся человеки мукою неизглаголанною. Тем же, яко искушенней по всяческим и спострадати в самых тяжких скорбях и лишениях нам могущей, взываем Ти:

Радуйся, Славо небесных и упование земных;

Радуйся, Надеждо наша и Заступнице христиан.

Радуйся, яко любящия и чтущия Тя от всяких бед избавляеши;

Радуйся, подвижников благочестия к Горнему Сиону путеводствующая.

Радуйся, омраченныя сердца светом истиннаго Боговедения просвещающая;

Радуйся, освятившая землю Всесвятым Твоим Рождеством.

Радуйся, девство и рождество в Себе дивно сочетавшая;

Радуйся, велие вселенныя Чудо.

Радуйся, Владычице, знамение милости Твоея нам являющая.

Кондак 10

Спасти хотя миp, иже всех Господь, Сый на Кресте, дарова всему миpy Пресвятую, Премилосердую Матерь, егда изрек Пренепорочней и возлюбленному ученику: «Се сын Твой» и «Се Мати твоя». Благодаряще за сие Всеблагаго Бога, глаголем Ему: Аллилуия.

Икос 10

Стена крепка явилася еси, по завету Господа, Преблагословенная, даруя всем благоденствие, мир, отраду, радость, яко и Сама все сие Первая получила еси от Воскресшаго Христа Спасителя, услышав от Него приветственный глас: «радуйтеся». Сего ради ублажаем Тя тако:

Радуйся, ангельских ликов удивление;

Радуйся, святых Божиих угодников радование.

Радуйся, миpa горняго первейшее украшение;

Радуйся, миpa дольняго благонадежное заступление.

Радуйся, демонов низложение;

Радуйся, ада попрание.

Радуйся, крепкое наше упование;

Радуйся, несумненная наша Надеждо.

Радуйся, Владычице, знамение милости Твоея нам являющая.

Кондак 11

Пение наше смиренное, от полноты любве и усердия Тебе приносимое, не презри, Богоневесто, и не отвратися от нас грешных и недостойных, но помози нам очиститися от всякия скверны плоти и духа, да возможем достойно и праведно пети: Аллилуия.

Икос 11

Светом руководствующим являлася еси апостолом, Богородительнице, по Вознесении Сына Твоего на небо. Таковою остаешися даже до сего дне всем хотящим спастися и в разум истины приити. Не лиши, о Всеблагая, Твоего святаго водительства и нас в житейском море обуреваемых, обаче от сердца приносящих Тебе благохваления таковая:

Радуйся, иноческих обителей покров и снабдение;

Радуйся, благочестивых домов и семейств благословение.

Радуйся, девства и чистоты поборнице;

Радуйся, обидимых и гонимых предстательнице.

Радуйся, нагих одеяние;

Радуйся, больных исцеление.

Радуйся, уповающия на Тя непосрамляющая;

Радуйся, просящия Твоея святыя помощи от бед избавляющая.

Радуйся, Владычице, знамение милости Твоея нам являющая.

Кондак 12

Благодать Божественную испроси нам у Сына Твоего и Бога, простри руку помощи, да не погибнем во гресех и лютых обстояниях, находящих на ны от враг видимых и невидимых, умиротвори наша сердца, злобою и враждою исполненных, да утешеннии Тобою, с радостию зовем Богу: Аллилуия.

Икос 12

Поюще честное Твое Успение, прославляем и Покров Твой святый, распростертый над всем миpoм, наипаче же родом христианским, прославляющим Тя тако:

Радуйся, Царице и Владычице Небесе и земли;

Радуйся, порфиро Царя царей.

Радуйся, столпе и утверждение девства;

Радуйся, щите и ограждение веры Православныя.

Радуйся, боголепное украшение святыя Христовы Церкве;

Радуйся, покрывающая всех нас матерним Своим покровом.

Радуйся, телес наших врачевание;

Радуйся, душ наших спасение.

Радуйся, страждущих от бед избавление;

Радуйся, взыскание погибших.

Радуйся, Владычице, знамение милости Твоея нам являющая.

Кондак 13

О Всепетая Мати Сладчайшаго Спасителя нашего Иисуса Христа! Нынешнее наше приемши приношение, от всякия избави нас напасти и скорби, и вечныя изми муки всех пред святою иконою Твоею с верою и любовию поклоняющихся и о Тебе благодарно зовущих Богу: Аллилуия.

Этот Кондак читается трижды, затем читается Икос 1 и Кондак 1

Молитва

К кому возопию, Владычице, к кому прибегну в горести моей, аще не к Тебе, Царице Небесная? Кто плач мой услышит и воздыхание приимет, аще не Ты, Пренепорочная, Надежда христиан и прибежище нам грешным? Кто паче Тебе в несчастиях защитит? Услыши стенание мое и приклони ухо Твое ко мне, Владычице и Мати Бога моего! Не презри ищущаго Твоея помощи и не отрини мене, грешнаго, Царице Небесная! Научи меня исполнять волю Сына Твоего и даруй желание всегда следовать Его святым заповедям. За мой ропот в болезнях, трудах и несчастиях не отступи от мене, но пребуди Материю и Покровительницей мене малодушнаго.

Царице моя Преблагая, Заступнице усердная! Твоим ходатайством прегрешения моя покрый, от видимых и невидимых врагов защити; сердца враждующих против меня смягчи и Христовою любовию согрей. Мне, немощному, даруй Твою всесильную помощь победить мои греховныя привычки, дабы очищенный покаянием и последующею добродетельною жизнию, в общении со Святою Церковию, провел остальные дни земнаго странствия.

Предстани мне, Надеждо всех христиан, в час кончины моея и подкрепи мою веру в смертный тяжкий час. Вознеси за меня, многогрешащаго в жизни сей, Твои всесильныя молитвы по отшествии моем, да оправдает меня Господь и соделает причастником Его безконечных радостей. Аминь.