Акафист Пресвятой Богородице пред иконой «Всецарица»

Утвержден Священным Синодом Русской Православной Церкви 25.12.2012 (журнал № 131).

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 31 августа (18 августа ст. ст.)

Утвержден для общецерковного использования.

Конда́к 1.

Новоявле́нней Твое́й ико́не предстоя́ще ве́рнии уми́льно, воспева́ем Ти́, Всецари́це, раби́ Твои́; низпосли́ цельбы́ к Тебе́ притека́ющим, да вси́ ра́достно зове́м Ти́:

Ра́дуйся, Всецари́це, неду́ги на́ша благода́тию исцеля́ющая.

И́кос 1.

А́нгел предста́тель с Небесе́ сше́д, рече́ Всецари́це: ра́дуйся! И боговеща́нным гла́сом воплоща́ема Тя́ зря́, Го́споди, возопи́ к Не́й такова́я:

Ра́дуйся, глави́зно на́шего спасе́ния; ра́дуйся, исполне́ние Зижди́телева смотре́ния.

Ра́дуйся, я́ко Тобо́ю Бо́г воплоти́ся; ра́дуйся, я́ко Неви́димый в Тебе́ изобрази́ся.

Ра́дуйся, Ми́лость ми́ра вну́трь прия́вшая; ра́дуйся, одея́ние пло́ти Сло́ву истка́вшая.

Ра́дуйся, уму́ непости́жная го́рняя сла́во; ра́дуйся, сердца́ оживи́вшая небе́сная ма́нно.

Ра́дуйся, звездо́, благода́ти сия́ние; ра́дуйся, исто́чниче, живы́я воды́ излия́ние.

Ра́дуйся, Богоро́дице, в жена́х благослове́нная; ра́дуйся, ро́ждшая Спа́са Де́во нетле́нная.

Ра́дуйся, Всецари́це, неду́ги на́ша благода́тию исцеля́ющая.

Конда́к 2.

Безнача́льное Сло́во Отроча́ мла́до Тобо́ю бы́сть, исцеле́ния подая́ Тя́, Де́во, чту́щим и неизрече́нное Его́ Рождество́ воспева́ющим: Аллилу́ия.

И́кос 2.

Ра́зум недоразумева́емый разуме́ти Де́ва и́щущи, возопи́ к служа́щему: «Я́ко Отрокови́ца чи́стая, ка́ко бу́ду Вы́шняго Ма́ти – изъясни́ Ми?». К Не́й же Гаврии́л рече́ со стра́хом, зовы́й такова́я:

Ра́дуйся, Сове́та Вы́шняго избра́ннице; ра́дуйся, гла́са моля́щихся скоропослу́шнице.

Ра́дуйся, Сокро́вище Христо́ва ми́ра; ра́дуйся, люде́й Твои́х наде́ждо и си́ло.

Ра́дуйся, ра́ковыя я́звы ди́вная губи́тельнице; ра́дуйся, про́чих боле́зней исцели́тельнице.

Ра́дуйся, еди́ное ми́ру заступле́ние; ра́дуйся, ве́рное в ско́рбех избавле́ние.

Ра́дуйся, пла́ч и сле́зы при́сно утоля́ющая; ра́дуйся, спасе́ния вхо́ды все́м отверза́ющая.

Ра́дуйся, держа́вный покро́ве Афо́н населя́ющих; ра́дуйся, же́зле мона́хов и миря́н.

Ра́дуйся, Всецари́це, неду́ги на́ша благода́тию исцеля́ющая.

Конда́к 3.

Си́ла Вы́шняго осени́вши Тя́, Отрокови́це, пло́ть прия́т неизрече́нно, показа́ Тя́ село́ сла́дкое хотя́щим жа́ти спасе́ние и пою́щим: Аллилу́ия.

И́кос 3.

Просла́вися ди́вно свята́я ико́на Твоя́, «Всецари́ца» имену́емая, егда́ цельбоно́сно яви́ся Твое́, Богома́ти, изображе́ние; вопию́щим же пред ни́м с ве́рою исцеле́ния подае́ши, да умножа́ются пе́сни сицевы́я:

Ра́дуйся, Ма́ти незаходи́маго Све́та; ра́дуйся, претерпе́вших до конца́ побе́до.

Ра́дуйся, в боле́знех и ско́рбех су́щим врачева́ние; ра́дуйся, сиро́т и вдови́ц неруши́мая стено́.

Ра́дуйся, две́ри ра́йския отверза́ющая; ра́дуйся, тружда́ющихся и обремене́нных заступа́ющая.

Ра́дуйся, о спасе́нии ве́рных хода́таице; ра́дуйся, за ро́д челове́ческий моли́твеннице.

Ра́дуйся, ле́ствице небе́сная, возводя́щая от земли́ к небеси́; ра́дуйся, водо́ жива́я, омыва́ющая сме́ртныя грехи́.

Ра́дуйся, а́гнице, сердца́ незло́бивых храня́щая; ра́дуйся, покро́ве, ча́д Це́ркве осеня́ющий.

Ра́дуйся, Всецари́це, неду́ги на́ша благода́тию исцеля́ющая.

Конда́к 4.

Живо́т ми́рови да́руя, Влады́ка ми́ра всели́ся во утро́бу Твою́ неискусому́жно, Ма́терь ве́рных Тя́ показа́в, в ми́ре те́х воспева́ти призва́: Аллилу́ия.

И́кос 4.

Пресла́вная соде́яшася о Тебе́, Гра́де Бо́жий, исцеле́нием быва́ющим от святы́я ико́ны Твоея́; сего́ ра́ди цельбоно́сныя струи́ врачева́ний прие́млюще, благода́рственно, о Всецари́це, вопие́м:

Ра́дуйся, сна́добие, бо́ль утоля́ющее; ра́дуйся, прохла́до, жа́р неду́жных остужа́ющая.

Ра́дуйся, прижига́ющая ра́ковыя я́звы а́ки пла́менем; ра́дуйся, подыма́ющая со одра́ оста́вленных врачми́.

Ра́дуйся, ли́к Сво́й пречи́стый избра́нным явля́ющая; ра́дуйся, от грехо́вных у́з разреша́ющая.

Ра́дуйся, я́ко Тобо́ю избавле́ние от сме́рти дарова́ся; ра́дуйся, я́ко Тобо́ю неизче́тный со́нм ве́рных оправда́ся.

Ра́дуйся, высото́, челове́ческими по́мыслы неизсле́дованная; ра́дуйся, глубино́, еди́ным Сло́вом изве́данная.

Ра́дуйся, проро́чествие пре́жде Тебе́ бы́вших патриа́рхов; ра́дуйся, наста́внице Тебе́ моли́вшихся иера́рхов.

Ра́дуйся, Всецари́це, неду́ги на́ша благода́тию исцеля́ющая.

Конда́к 5.

Пречи́стый Хра́м Спа́сов позна́хом Тя́, Отрокови́це; к Тебе́ припа́даем, Чи́стая, да на́с соде́лаеши хра́мы Божества́, вопию́щих Ему́: Аллилу́ия.

И́кос 5.

Ви́деша чи́ни а́нгельстии на руку́ Твое́ю Созда́вшаго руко́ю челове́ки, и я́ко Влады́чицу разумева́юще Тя́ еди́ну, а́ще и Рабо́ю Себе́ нарекла́ еси́, потща́шася пе́сньми послужи́ти Ти́, Благослове́нней, сицевы́ми:

Ра́дуйся, Бо́гом поста́вленная превы́ше Небе́сных Си́л; ра́дуйся, чуде́сными исцеле́ньми исполня́ющая ми́р.

Ра́дуйся, хвалу́ и сла́ву от небе́с слы́шащая; ра́дуйся, благодаре́ние от земли́ прие́млющая.

Ра́дуйся, я́ко се́мя тли́ в сердца́х потреби́ла еси́; ра́дуйся, я́ко ко́зней диа́вольских яре́м сокруши́ла еси́.

Ра́дуйся, юдо́ль плаче́вную испо́лнившая ра́достию; ра́дуйся, ско́рби изменя́ющая в небе́сную сла́дость.

Ра́дуйся, благоуха́ние Бо́гу прия́тное; ра́дуйся, ка́ющихся гре́шников весе́лие изря́дное.

Ра́дуйся, броне́ пра́вды от искуше́ний; ра́дуйся, щи́те огражде́ния от вражды́ и нестрое́ний.

Ра́дуйся, Всецари́це, неду́ги на́ша благода́тию исцеля́ющая.

Конда́к 6.

Пропове́дницы богоглаго́ливии, Спа́совы ученицы́, предста́ша Ти́, Де́во, чу́дно, егда́ от земли́ к небеси́ восходи́ла еси́, да еди́ным се́рдцем и усты́ воспою́т Бо́гови: Аллилу́ия.

И́кос 6.

Возсия́ ди́вно благода́ть от ико́ны Твоея́, Всецари́це, егда́ ю́ноша, уче́ньми сатани́нскими омраче́нный, пред не́ю паде́ и недви́жим бы́сть; па́че ча́яния же от у́з мра́чных свобожде́нный, со стра́хом и ра́достию взыва́ше Ти́ си́це:

Ра́дуйся, исправле́ние нечести́ваго жития́; ра́дуйся, утеше́ние стра́ждущих лю́те.

Ра́дуйся, бесо́вских по́лчищ от Це́ркве отгна́ние; ра́дуйся, мглы́ грехо́вныя разсе́яние.

Ра́дуйся, ко́зней неви́димых упраздне́ние; ра́дуйся, де́монских ча́р всемо́щное одоле́ние.

Ра́дуйся, свети́льниче, прельще́нных наставля́яй; ра́дуйся, о́блаче, неви́нных от зла́ покрыва́яй.

Ра́дуйся, хо́лме, небе́сною ма́нною пита́ющий; ра́дуйся, доли́но, смире́нием Христо́вым насыща́ющая.

Ра́дуйся, ка́меню Небе́снаго Ца́рствия; ра́дуйся, зерца́ло преве́чнаго Све́та.

Ра́дуйся, Всецари́це, неду́ги на́ша благода́тию исцеля́ющая.

Конда́к 7.

Хотя́ да́ти Себе́ в сне́дь ве́рным, Христе́ Бо́же, благоволи́л еси́ от Де́вы воплоти́тися, да прие́млюще Пречи́стое Те́ло и Кро́вь Твою́, позна́ют Тя́ Бо́га соверше́ннаго; те́мже дивя́щеся неизрече́нней прему́дрости се́й зове́м: Аллилу́ия.

И́кос 7.

Но́вое показа́ та́инство я́влься Зижди́тель, со ученики́ сверши́вый Та́йную Свою́ Ве́черю; мы́ же, моля́ще Всецари́цу удосто́ити на́с Боже́ственныя Святы́ни, воспису́ем Е́й сицева́я:

Ра́дуйся, пода́тельнице Небе́снаго Хле́ба; ра́дуйся, роди́тельнице Ве́чнаго Живота́.

Ра́дуйся, ча́ше, Христу́ приобща́ющая; ра́дуйся, ду́шу и те́ло с Бо́гом сочетава́ющая.

Ра́дуйся, лжи́це злата́я, испо́лнь Боже́ственных Та́ин; ра́дуйся, драги́й киво́те, вмести́лище вели́кия Святы́ни.

Ра́дуйся, пе́рсте, на святу́ю Евхари́стию указу́яй; ра́дуйся, трапе́зо, предлага́ющая на́м Пи́щу Святу́ю.

Ра́дуйся, досто́йных прича́стников одесну́ю поставля́ющая; ра́дуйся, ревни́телей Боже́ственныя Литурги́и от а́да избавля́ющая.

Ра́дуйся, приводя́щая сме́ртных к Исто́чнику безсме́ртия; ра́дуйся, огражда́ющая ча́д Свои́х ми́ром и кре́постию.

Ра́дуйся, Всецари́це, неду́ги на́ша благода́тию исцеля́ющая.

Конда́к 8.

Стра́нное Рождество́ ви́девше, жите́йское вся́кое отло́жше попече́ние, горе́ име́им сердца́; на сие́ бо Вы́шний яви́ся, во е́же привлещи́ Тому́ вопию́щия: Аллилу́ия.

И́кос 8.

Неотсту́пно в не́дрех Оте́ческих пребыва́я, Сло́во неопи́санное на земли́ пло́ть бы́сть; Бо́г Ве́лий сотвори́ вели́чие Де́ве и призре́ на смире́ние Рабы́ Своея́, слы́шащия сицева́я:

Ра́дуйся, невмести́маго Бо́га вмести́вшая; ра́дуйся, надми́рнаго Творца́ ми́ру яви́вшая.

Ра́дуйся, я́ко сокруши́ся сме́рти держа́ва; ра́дуйся, я́ко исцели́ся Ада́мова ра́на.

Ра́дуйся, пла́стырю, стру́пы душе́вныя заживля́яй; ра́дуйся, еле́е, я́звы теле́сныя умаща́яй.

Ра́дуйся, утоле́ние боле́зней ражда́ющих; ра́дуйся, облегче́ние му́к умира́ющих.

Ра́дуйся, нане́сшая пораже́ние а́ду; ра́дуйся, притупи́вшая сме́рти жа́ло.

Ра́дуйся, ча́яние всео́бщаго воскресе́ния; ра́дуйся, правосла́вных несумне́нное спасе́ние.

Ра́дуйся, Всецари́це, неду́ги на́ша благода́тию исцеля́ющая.

Конда́к 9.

Вся́кое естество́ а́нгельское и челове́ческое удиви́ся вели́чию непостижи́маго Твоего́ воплоще́ния, Сло́ве; недоумева́юще же о се́й ве́лией та́йне благоче́стия, со стра́хом и тре́петом благода́рственно зове́м Ти́: Аллилу́ия.

И́кос 9.

Многоразли́чными неду́ги одержи́мии, о Всецари́це, от святы́я ико́ны Твоея́ па́че ча́яния исцеле́ния получа́ют, да прие́мше ве́рою благода́ть, велегла́сно взыва́ют Ти́:

Ра́дуйся, здра́вых ча́д при́сное сохране́ние; ра́дуйся, боля́щих ко здра́вию преложе́ние.

Ра́дуйся, дете́й неду́гующих исцеле́ние; ра́дуйся, ю́ных страда́льцев Ма́ти.

Ра́дуйся, воста́ние на о́др боле́зни пове́рженных; ра́дуйся, отра́до стра́хом сме́ртным одержи́мых.

Ра́дуйся, вне́млющая челове́ков рыда́ниям; ра́дуйся, призрева́ющая на на́ша стена́ния.

Ра́дуйся, бо́лей земны́х небе́сною ра́достию растворе́ние; ра́дуйся, лю́те обурева́емых пачеесте́ственное терпе́ние.

Ра́дуйся, я́ко уготовля́еши пла́чущим ра́дость; ра́дуйся, я́ко снабдева́еши кро́тких крило́ма моли́твы.

Ра́дуйся, Всецари́це, неду́ги на́ша благода́тию исцеля́ющая.

Конда́к 10.

Спасти́ хотя́ Зижди́тель истле́вшее грехо́м челове́ческое естество́, сни́де на Тя́, я́ко до́ждь на руно́, и купину́ Тя́ соде́лав неопали́мую, Бо́г сы́й бы́сть челове́к, да воспева́ем Ему́: Аллилу́ия.

И́кос 10.

Стена́ еси́ де́вам, Отрокови́це чи́стая, и все́м о чистоте́ радя́щим: в Тя́ бо всели́ся Бо́г, очища́яй разу́мная созда́ния Своя́, да избы́вше вся́кия скве́рны, предлага́ем Ти́ сицева́я:

Ра́дуйся, молча́ния взыску́ющих собесе́днице; ра́дуйся, ве́нче храня́щих де́вство.

Ра́дуйся, нача́ло и коне́ц духо́внаго соверше́ния; ра́дуйся, храни́лище Боже́ственнаго Открове́ния.

Ра́дуйся, Тро́ическаго Сове́та таи́ннице; ра́дуйся, спасе́ния челове́ков вино́внице.

Ра́дуйся, верши́но, го́рдым умо́м непристу́пная; ра́дуйся, убе́жище, смире́нным сердца́м досту́пное.

Ра́дуйся, чи́стая, небесе́ чисте́йшая; ра́дуйся, Херуви́мов и Серафи́мов честне́йшая.

Ра́дуйся, обра́дованная, я́ко прия́ла еси́ от Арха́нгела ра́дование; ра́дуйся, уте́шенная, я́ко ру́це Твои́ осяза́сте воскре́сшаго Христа́.

Ра́дуйся, Всецари́це, неду́ги на́ша благода́тию исцеля́ющая.

Конда́к 11.

Пе́ние тща́щеся разу́мное Спа́су приноси́ти, всегда́ неключи́ми, Влады́чице, остае́мся раби́ Твои́; кто́ бо мо́жет досто́йно воспе́ти Бо́га, Его́же и́мя я́ко ми́ро излия́нное? Сего́ ра́ди вопие́м Ему́: Аллилу́ия.

И́кос 11.

Све́т ве́лий возсия́в во тьме́ седя́щим, посети́ на́с Восто́к свы́ше, Сы́н и Бо́г Тво́й, о Де́во; Тя́ соде́лав свеще́ю на све́щнице, светоно́сным ча́дом церко́вным наказу́ет приноси́ти Ти́ сицева́я:

Ра́дуйся, заре́ У́мнаго Со́лнца; ра́дуйся, вмести́лище Боже́ственнаго Огня́.

Ра́дуйся, све́те, я́ко одея́ние святы́х сотка́ла еси́; ра́дуйся, свеще́, я́ко тьму́ бесо́вскую отгна́ла еси́.

Ра́дуйся, ко́сных умо́в Просвеще́ние; ра́дуйся, гре́шных серде́ц Озаре́ние.

Ра́дуйся, десни́це, из мо́ря су́етствий изводя́щая; ра́дуйся, луче́, путеводя́щая к Ца́рствию спаса́ющихся.

Ра́дуйся, мо́лние, нераска́янных поража́ющая; ра́дуйся, гро́ме, губи́телей устраша́ющий.

Ра́дуйся, омраче́нныя со́вести просветле́ние; ра́дуйся, Бо́жия Суда́ умилостивле́ние.

Ра́дуйся, Всецари́це, неду́ги на́ша благода́тию исцеля́ющая.

Конда́к 12.

Благода́ть да́ти восхоте́в, Зако́на Ве́тхаго Пода́тель Заве́т Но́вый на́м дарова́; мы́ же, благода́ть прии́мше, не де́лы зако́на, но еди́ною ве́рою спасе́ние улучи́вше, воспису́ем вси́: Аллилу́ия.

И́кос 12.

Пою́ще Твое́ рождество́, Богома́ти, я́коже дре́вле Изра́иль в кимва́лех сено́вную ски́нию воспева́ше, та́ко мы́ ны́не Тя́, Ски́нию и́стинну, доброде́тельми прославля́ем, да слы́шиши от все́х сицева́я:

Ра́дуйся, пе́сне, воспева́емая горе́; ра́дуйся, псалме́, слы́шимый ни́зу.

Ра́дуйся, Еди́ному Бо́гу досто́йно послужи́вшая; ра́дуйся, Боже́ственней Тро́ице смире́нием угоди́вшая.

Ра́дуйся, ве́ки Нося́щаго носи́вшая в Себе́; ра́дуйся, престо́ле Содержа́щаго Вселе́нную в руце́.

Ра́дуйся, та́йно неизрече́нная веко́в и време́н; ра́дуйся, упова́ние тве́рдое наро́дов и племе́н.

Ра́дуйся, серде́чное ра́дование иере́ев благогове́йных; ра́дуйся, бы́строе слы́шание моли́тв церко́вных и келе́йных.

Ра́дуйся, Прему́дрости до́ме богозда́нный; ра́дуйся, Ми́лости сосу́де, Бо́гом избра́нный.

Ра́дуйся, Всецари́це, неду́ги на́ша благода́тию исцеля́ющая.

Конда́к 13.

О Всецари́це Ма́ти, ро́ждшая все́х святы́х Святе́йшее Сло́во, ны́нешнее на́ше прие́мши песнопе́ние, от вся́кия сме́ртныя боле́зни исцели́ ны́ и бу́дущаго изба́ви осужде́ния вопию́щих: Аллилу́ия.

Этот конда́к читается три́жды, затем 1-й и́кос и 1-й конда́к.

И́кос 1.

А́нгел предста́тель с Небесе́ сше́д, рече́ Всецари́це: ра́дуйся! И боговеща́нным гла́сом воплоща́ема Тя́ зря́, Го́споди, возопи́ к Не́й такова́я:

Ра́дуйся, глави́зно на́шего спасе́ния; ра́дуйся, исполне́ние Зижди́телева смотре́ния.

Ра́дуйся, я́ко Тобо́ю Бо́г воплоти́ся; ра́дуйся, я́ко Неви́димый в Тебе́ изобрази́ся.

Ра́дуйся, Ми́лость ми́ра вну́трь прия́вшая; ра́дуйся, одея́ние пло́ти Сло́ву истка́вшая.

Ра́дуйся, уму́ непости́жная го́рняя сла́во; ра́дуйся, сердца́ оживи́вшая небе́сная ма́нно.

Ра́дуйся, звездо́, благода́ти сия́ние; ра́дуйся, исто́чниче, живы́я воды́ излия́ние.

Ра́дуйся, Богоро́дице, в жена́х благослове́нная; ра́дуйся, ро́ждшая Спа́са Де́во нетле́нная.

Ра́дуйся, Всецари́це, неду́ги на́ша благода́тию исцеля́ющая.

Конда́к 1.

Новоявле́нней Твое́й ико́не предстоя́ще ве́рнии уми́льно, воспева́ем Ти́, Всецари́це, раби́ Твои́; низпосли́ цельбы́ к Тебе́ притека́ющим, да вси́ ра́достно зове́м Ти́:

Ра́дуйся, Всецари́це, неду́ги на́ша благода́тию исцеля́ющая.

Моли́тва.

О, Пречи́стая Богома́ти, Всецари́це! Услы́ши многоболе́зненное воздыха́ние на́ше пред чудотво́рною ико́ною Твое́ю, из уде́ла Афо́нскаго в Росси́ю принесе́нною, при́зри на ча́д Твои́х, неисце́льными неду́ги стра́ждущих, ко свято́му о́бразу Твоему́ с ве́рою припа́дающих! Я́коже пти́ца крило́ма покрыва́ет птенцы́ своя́, та́ко и Ты́ ны́не, при́сно жива́ су́щи, покры́й на́с многоцеле́бным Твои́м омофо́ром. Та́мо, иде́же наде́жда исчеза́ет, несумне́нною Наде́ждою бу́ди. Та́мо, иде́же лю́тыя ско́рби превозмога́ют, Терпе́нием и Осла́бою яви́ся. Та́мо, иде́же мра́к отча́яния в ду́ши всели́ся, да возсия́ет неизрече́нный све́т Божества́! Малоду́шныя уте́ши, немощны́я укрепи́, ожесточе́нным сердца́м умягче́ние и просвеще́ние да́руй. Исцели́ боля́щия лю́ди Твоя́, о всеми́лостивая Цари́це! У́м и ру́ки врачу́ющих на́с благослови́; да послу́жат ору́дием Всемо́щнаго Врача́ Христа́ Спа́са на́шего. Я́ко живе́й Ти́ су́щей с на́ми мо́лимся пред ико́ною Твое́ю, о Влады́чице! Простри́ ру́це Твои́, испо́лненнеи исцеле́ния и врачбы́, Ра́досте скорбя́щих, в печа́лех Утеше́ние, да чудотво́рную по́мощь ско́ро получи́вше, прославля́ем Живонача́льную и Неразде́льную Тро́ицу, Отца́ и Сы́на и Свята́го Ду́ха, во ве́ки веко́в. Ами́нь.

А҆ка́ѳїстъ прест҃ѣ́й бцⷣѣ въ че́сть чꙋдотво́рныѧ є҆ѧ̀ і҆кѡ́ны всецр҃и́ца.

Конда́къ а҃.

Новоѧвле́ннѣй твое́й і҆кѡ́нѣ предстоѧ́ще вѣ́рнїи ᲂу҆ми́льнѡ, воспѣва́емъ тѝ, всецр҃и́це, рабѝ твоѝ:* низпослѝ цѣльбы̑ къ тебѣ̀ притека́ющымъ, да всѝ ра́достнѡ зове́мъ тѝ:

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

І҆́косъ а҃.

А҆́гг҃лъ предста́тель съ нб҃сѐ сше́дъ, речѐ всецр҃и́цѣ: ра́дꙋйсѧ! И҆ бг҃овѣща́ннымъ гла́сомъ воплоща́ема тѧ̀ зрѧ̀, гдⷭ҇и, возопѝ къ не́й такова̑ѧ:

Ра́дꙋйсѧ, глави́зно на́шегѡ сп҃се́нїѧ: ра́дꙋйсѧ, и҆сполне́нїе зижди́телева смотре́нїѧ.

Ра́дꙋйсѧ, ꙗ҆́кѡ тобо́ю бг҃ъ воплоти́сѧ: ра́дꙋйсѧ, ꙗ҆́кѡ неви́димый въ тебѣ̀ и҆з̾ѡбрази́сѧ.

Ра́дꙋйсѧ, ми́лость ми́ра внꙋ́трь прїѧ́вшаѧ: ра́дꙋйсѧ, ѡ҆дѣѧ́нїе пло́ти сло́вꙋ и҆стка́вшаѧ.

Ра́дꙋйсѧ, ᲂу҆мꙋ̀ непости́жнаѧ го́рнѧѧ сла́во: ра́дꙋйсѧ, сердца̀ ѡ҆живи́вшаѧ нбⷭ҇наѧ ма́нно.

Ра́дꙋйсѧ, ѕвѣздо̀, бл҃года́ти сїѧ́нїе: ра́дꙋйсѧ, и҆сто́чниче, живы́ѧ воды̀ и҆злїѧ́нїе.

Ра́дꙋйсѧ, бцⷣе, въ жена́хъ бл҃гослове́ннаѧ: ра́дꙋйсѧ, ро́ждшаѧ сп҃са дв҃о нетлѣ́ннаѧ.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ в҃.

Безнача́льное сло́во ѻ҆троча̀ мла́до тобо́ю бы́сть, и҆сцѣлє́нїѧ подаѧ̀ тѧ̀, дв҃о, чтꙋ́щымъ и҆ неизрече́нное є҆гѡ̀ ржⷭ҇тво̀ воспѣва́ющымъ: А҆ллилꙋ́їа.

І҆́косъ в҃.

Ра́зꙋмъ недоразꙋмѣва́емый разꙋмѣ́ти дв҃а и҆́щꙋщи, возопѝ къ слꙋжа́щемꙋ: ꙗ҆́кѡ ѻ҆трокови́ца чⷭ҇таѧ, ка́кѡ бꙋ́дꙋ вы́шнѧгѡ мт҃и, и҆з̾ѧсни́ ми; Къ не́й же гаврїи́лъ речѐ со стра́хомъ, зовы́й такова̑ѧ:

Ра́дꙋйсѧ, совѣ́та вы́шнѧгѡ и҆збра́ннице: ра́дꙋйсѧ, гла́са молѧ́щихсѧ скоропослꙋ́шнице.

Ра́дꙋйсѧ, сокро́вище хрⷭ҇то́ва ми́ра: ра́дꙋйсѧ, люде́й твои́хъ наде́ждо и҆ си́ло.

Ра́дꙋйсѧ, ра́ковыѧ ꙗ҆́звы ди́внаѧ гꙋби́тельнице: ра́дꙋйсѧ, про́чихъ болѣ́зней и҆сцѣли́тельнице.

Ра́дꙋйсѧ, є҆ди́ное мі́рꙋ застꙋпле́нїе: ра́дꙋйсѧ, вѣ́рное въ ско́рбехъ и҆збавле́нїе.

Ра́дꙋйсѧ, пла́чь и҆ сле́зы при́снѡ ᲂу҆толѧ́ющаѧ: ра́дꙋйсѧ, сп҃се́нїѧ вхо́ды всѣ̑мъ ѿверза́ющаѧ.

Ра́дꙋйсѧ, держа́вный покро́ве а҆ѳѡ́нъ населѧ́ющихъ: ра́дꙋйсѧ, же́зле мона́хѡвъ и҆ мїрѧ́нъ.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ г҃.

Си́ла вы́шнѧгѡ ѡ҆сѣни́вши тѧ̀, ѻ҆трокови́це, пло́ть прїѧ́тъ неизрече́ннѡ, показа́ тѧ село̀ сла́дкое хотѧ́щымъ жа́ти сп҃се́нїе и҆ пою́щымъ: А҆ллилꙋ́їа.

І҆́косъ г҃.

Просла́висѧ ди́внѡ ст҃а́ѧ і҆кѡ́на твоѧ̀, всецр҃и́ца и҆менꙋ́емаѧ, є҆гда̀ цѣльбоно́сно ꙗ҆ви́сѧ твоѐ, бг҃омт҃и, и҆з̾ѡбраже́нїе: вопїю́щымъ же пред̾ ни́мъ съ вѣ́рою и҆сцѣлє́нїѧ подае́ши, да ᲂу҆множа́ютсѧ пѣ̑сни сицевы̑ѧ:

Ра́дꙋйсѧ, мт҃и незаходи́магѡ свѣ́та: ра́дꙋйсѧ, претерпѣ́вшихъ до конца̀ побѣ́до.

Ра́дꙋйсѧ, въ болѣ́знехъ и҆ ско́рбехъ сꙋ́щымъ врачева́нїе: ра́дꙋйсѧ, сиро́тъ и҆ вдови́цъ нерꙋши́маѧ стѣно̀.

Ра́дꙋйсѧ, двє́ри ра̑йскїѧ ѿверза́ющаѧ: ра́дꙋйсѧ, трꙋжда́ющихсѧ и҆ ѡ҆бремене́нныхъ застꙋпа́ющаѧ.

Ра́дꙋйсѧ, ѡ҆ сп҃се́нїи вѣ́рныхъ хода́таице: ра́дꙋйсѧ, за ро́дъ человѣ́ческїй мл҃твеннице.

Ра́дꙋйсѧ, лѣ́ствице нбⷭ҇наѧ, возводѧ́щаѧ ѿ землѝ къ нб҃сѝ: ра́дꙋйсѧ, водо̀ жива́ѧ, ѡ҆мыва́ющаѧ смє́ртныѧ грѣхѝ.

Ра́дꙋйсѧ, а҆́гнице, сердца̀ неѕло́бивыхъ хранѧ́щаѧ: ра́дꙋйсѧ, покро́ве, ча́дъ цр҃кве ѡ҆сѣнѧ́ющїй.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ д҃.

Живо́тъ мі́рови да́рꙋѧ, влⷣка мі́ра всели́сѧ во ᲂу҆тро́бꙋ твою̀ неискꙋсомꙋ́жнѡ, мт҃рь вѣ́рныхъ тѧ̀ показа́въ, въ ми́рѣ тѣ́хъ воспѣва́ти призва̀: А҆ллилꙋ́їа.

І҆́косъ д҃.

Пресла̑внаѧ содѣ́ѧшасѧ ѡ҆ тебѣ̀, гра́де бж҃їй, и҆сцѣле́нїємъ быва́ющымъ ѿ ст҃ы́ѧ і҆кѡ́ны твоеѧ̀: сегѡ̀ ра́ди цѣльбонѡ́сныѧ стрꙋи̑ врачева́нїй прїе́млюще, бл҃года́рственнѡ, ѽ всецр҃и́це, вопїе́мъ:

Ра́дꙋйсѧ, сна́добїе, бо́ль ᲂу҆толѧ́ющее: ра́дꙋйсѧ, прохла́до, жа́ръ недꙋ́жныхъ ѡ҆стꙋжа́ющаѧ.

Ра́дꙋйсѧ, прижига́ющаѧ ра́кѡвыѧ ꙗ҆́звы а҆́ки пла́менемъ: ра́дꙋйсѧ, под̾има́ющаѧ со ѻ҆дра̀ ѡ҆ста́вленныхъ врачмѝ.

Ра́дꙋйсѧ, ли́къ сво́й пречⷭ҇тый и҆збра̑ннымъ ꙗ҆влѧ́ющаѧ: ра́дꙋйсѧ, ѿ грѣхо́вныхъ ᲂу҆́зъ разрѣша́ющаѧ.

Ра́дꙋйсѧ, ꙗ҆́кѡ тобо́ю и҆збавле́нїе ѿ сме́рти дарова́сѧ: ра́дꙋйсѧ, ꙗ҆́кѡ тобо́ю неизче́тный со́нмъ вѣ́рныхъ ѡ҆правда́сѧ.

Ра́дꙋйсѧ, высото̀, человѣ́ческими пѡ́мыслы неизслѣ́дованнаѧ: ра́дꙋйсѧ, глꙋбино̀, є҆ди́нымъ сло́вомъ и҆звѣ́даннаѧ.

Ра́дꙋйсѧ, прⷪ҇ро́чествїе пре́жде тебѐ бы́вшихъ патрїа́рхѡвъ: ра́дꙋйсѧ, наста́внице тебѣ̀ моли́вшихсѧ і҆ера́рхѡвъ.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ є҃.

Пречⷭ҇тый хра́мъ сп҃совъ позна́хомъ тѧ̀, ѻ҆трокови́це: къ тебѣ̀ припа́даемъ, чⷭ҇таѧ, да на́съ содѣ́лаеши хра́мы бжⷭ҇тва̀, вопїю́щихъ є҆мꙋ̀: А҆ллилꙋ́їа.

І҆́косъ є҃.

Ви́дѣша чи́ни а҆́гг҃льстїи на рꙋкꙋ̀ твоє́ю созда́вшаго рꙋко́ю человѣ́ки, и҆ ꙗ҆́кѡ влⷣчцꙋ разꙋмѣва́юще тѧ̀ є҆ди́нꙋ, а҆́ще и҆ рабо́ю себѐ нарекла̀ є҆сѝ, потща́шасѧ пѣ́сньми послꙋжи́ти тѝ, бл҃гослове́ннѣй, сицевы́ми:

Ра́дꙋйсѧ, бг҃омъ поста́вленнаѧ превы́ше нбⷭ҇ныхъ си́лъ: ра́дꙋйсѧ, чꙋде́сными и҆сцѣле́ньми и҆сполнѧ́ющаѧ мі́ръ.

Ра́дꙋйсѧ, хвалꙋ̀ и҆ сла́вꙋ ѿ нб҃съ слы́шащаѧ: ра́дꙋйсѧ, бл҃годаре́нїе ѿ землѝ прїе́млющаѧ.

Ра́дꙋйсѧ, ꙗ҆́кѡ сѣ́мѧ тлѝ въ сердца́хъ потреби́ла є҆сѝ: ра́дꙋйсѧ, ꙗ҆́кѡ ко́зней дїа́вольскихъ ꙗ҆ре́мъ сокрꙋши́ла є҆сѝ.

Ра́дꙋйсѧ, ю҆до́ль плаче́внꙋю и҆спо́лнившаѧ ра́достїю: ра́дꙋйсѧ, скѡ́рби и҆змѣнѧ́ющаѧ въ нбⷭ҇нꙋю сла́дость.

Ра́дꙋйсѧ, бл҃гоꙋха́нїе бг҃ꙋ прїѧ́тное: ра́дꙋйсѧ, ка́ющихсѧ грѣ́шникѡвъ весе́лїе и҆зрѧ́дное.

Ра́дꙋйсѧ, бронѐ пра́вды ѿ и҆скꙋше́нїй: ра́дꙋйсѧ, щи́те ѡ҆гражде́нїѧ ѿ вражды̀ и҆ нестрое́нїй.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ ѕ҃.

Проповѣ́дницы бг҃оглаго́ливїи, сп҃совы ᲂу҆чн҃цы̀, предста́ша тѝ, дв҃о, чꙋ́днѡ, є҆гда̀ ѿ землѝ къ нб҃сѝ восходи́ла є҆сѝ, да є҆ди́нымъ се́рдцемъ и҆ ᲂу҆сты̀ воспою́тъ бг҃ови: А҆ллилꙋ́їа.

І҆́косъ ѕ҃.

Возсїѧ̀ ди́внѡ бл҃года́ть ѿ і҆кѡ́ны твоеѧ̀, всецр҃и́це, є҆гда̀ ю҆́ноша, ᲂу҆че́ньми сатани́нскими ѡ҆мраче́нный, пред̾ не́ю падѐ и҆ недви́жимь бы́сть: па́че ча́ѧнїѧ же ѿ ᲂу҆́зъ мра́чныхъ свобожде́нный, со стра́хомъ и҆ ра́достїю взыва́ше тѝ си́це:

Ра́дꙋйсѧ, и҆справле́нїе нечести́вагѡ житїѧ̀: ра́дꙋйсѧ, ᲂу҆тѣше́нїе стра́ждꙋщихъ лю́тѣ.

Ра́дꙋйсѧ, бѣсо́вскихъ по́лчищъ ѿ цр҃кве ѿгна́нїе: ра́дꙋйсѧ, мглы̀ грѣхо́вныѧ разсѣ́ѧнїе.

Ра́дꙋйсѧ, ко́зней неви́димыхъ ᲂу҆праздне́нїе: ра́дꙋйсѧ, де́мѡнскихъ ча́ръ всемо́щное ѡ҆доле́нїе.

Ра́дꙋйсѧ, свѣти́льниче, прельще́нныхъ наставлѧ́ѧй: ра́дꙋйсѧ, ѻ҆́блаче, неви́нныхъ ѿ ѕла̀ покрыва́ѧй.

Ра́дꙋйсѧ, хо́лме, нбⷭ҇ною ма́нною пита́ющїй: ра́дꙋйсѧ, доли́но, смире́нїемъ хрⷭ҇то́вымъ насыща́ющаѧ.

Ра́дꙋйсѧ, ка́меню нбⷭ҇нагѡ црⷭ҇твїѧ: ра́дꙋйсѧ, зерца́ло превѣ́чнагѡ свѣ́та.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ з҃.

Хотѧ̀ да́ти себѐ въ снѣ́дь вѣ̑рнымъ, хрⷭ҇тѐ бж҃е, бл҃говоли́лъ є҆сѝ ѿ дв҃ы воплоти́тисѧ, да прїе́млюще пречⷭ҇тое тѣ́ло и҆ кро́вь твою̀, позна́ютъ тѧ̀ бг҃а соверше́ннаго: тѣ́мже дивѧ́щесѧ неизрече́ннѣй премꙋ́дрости се́й зове́мъ: А҆ллилꙋ́їа.

І҆́косъ з҃.

Но́вое показа̀ та́инство ꙗ҆́вльсѧ зижди́тель, со ᲂу҆чн҃ки̑ сверши́вый та́йнꙋю свою̀ ве́черю: мы́ же, молѧ́ще всецр҃и́цꙋ ᲂу҆досто́ити на́съ бжⷭ҇твенныѧ ст҃ы́ни, восписꙋ́емъ є҆́й сицева̑ѧ:

Ра́дꙋйсѧ, пода́тельнице нбⷭ҇нагѡ хлѣ́ба: ра́дꙋйсѧ, роди́тельнице вѣ́чнагѡ живота̀.

Ра́дꙋйсѧ, ча́ше, хрⷭ҇тꙋ̀ прїѡбща́ющаѧ: ра́дꙋйсѧ, дꙋ́шꙋ и҆ тѣ́ло съ бг҃омъ сочетава́ющаѧ.

Ра́дꙋйсѧ, лжи́це злата́ѧ, и҆спо́лнь бжⷭ҇твенныхъ та́инъ: ра́дꙋйсѧ, драгі́й кївѡ́те, вмѣсти́лище вели́кїѧ ст҃ы́ни.

Ра́дꙋйсѧ, пе́рсте, на ст҃ꙋ́ю є҆ѵхарі́стїю ᲂу҆казꙋ́ѧй: ра́дꙋйсѧ, трапе́зо, предлага́ющаѧ на́мъ пи́щꙋ ст҃ꙋ́ю.

Ра́дꙋйсѧ, досто́йныхъ прича́стникѡвъ ѡ҆деснꙋ́ю поставлѧ́ющаѧ: ра́дꙋйсѧ, ревни́телей бжⷭ҇твенныѧ лїтꙋргі́и ѿ а҆́да и҆збавлѧ́ющаѧ.

Ра́дꙋйсѧ, приводѧ́щаѧ сме́ртныхъ къ и҆сто́чникꙋ безсме́ртїѧ: ра́дꙋйсѧ, ѡ҆гражда́ющаѧ ча́дъ свои́хъ ми́ромъ и҆ крѣ́постїю.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ и҃.

Стра́нное ржⷭ҇тво̀ ви́дѣвше, жите́йское всѧ́кое ѿло́жше попече́нїе, горѣ̀ и҆мѣ́имъ сердца̀: на сїе́ бо вы́шнїй ꙗ҆ви́сѧ, во є҆́же привлещѝ томꙋ̀ вопїю́щыѧ: А҆ллилꙋ́їа.

І҆́косъ и҃.

Неѿстꙋ́пнѡ въ нѣ́дрѣхъ ѻ҆ч҃ескихъ пребыва́ѧ, сло́во неѡпи́санное на землѝ пло́ть бы́сть: бг҃ъ ве́лїй сотворѝ вели́чїе дв҃ѣ и҆ призрѣ̀ на смире́нїе рабы̀ своеѧ̀, слы́шащїѧ сицева̑ѧ:

Ра́дꙋйсѧ, невмѣсти́маго бг҃а вмѣсти́вшаѧ: ра́дꙋйсѧ, надмі́рнаго творца̀ мі́рꙋ ꙗ҆ви́вшаѧ.

Ра́дꙋйсѧ, ꙗ҆́кѡ сокрꙋши́сѧ сме́рти держа́ва: ра́дꙋйсѧ, ꙗ҆́кѡ и҆сцѣли́сѧ а҆да́мова ра́на.

Ра́дꙋйсѧ, пла́стырю, стрꙋ́пы дꙋшє́вныѧ заживлѧ́ѧй: ра́дꙋйсѧ, є҆ле́е, ꙗ҆́звы тѣлє́сныѧ ᲂу҆маща́ѧй.

Ра́дꙋйсѧ, ᲂу҆толе́нїе болѣ́зней ражда́ющихъ: ра́дꙋйсѧ, ѡ҆блегче́нїе мꙋ́къ ᲂу҆мира́ющихъ.

Ра́дꙋйсѧ, нане́сшаѧ пораже́нїе а҆́дꙋ: ра́дꙋйсѧ, притꙋпи́вшаѧ сме́рти жа́ло.

Ра́дꙋйсѧ, ча́ѧнїе всеѻ́бщагѡ воскрⷭ҇нїѧ: ра́дꙋйсѧ, правосла́вныхъ несꙋмнѣ́нное сп҃се́нїе.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ ѳ҃.

Всѧ́кое є҆стество̀ а҆́гг҃льское и҆ человѣ́ческое ᲂу҆диви́сѧ вели́чїю непостижи́магѡ твоегѡ̀ воплоще́нїѧ, сло́ве: недоꙋмѣва́юще же ѡ҆ се́й ве́лїей та́йнѣ бл҃гоче́стїѧ, со стра́хомъ и҆ тре́петомъ бл҃года́рственнѡ зове́мъ тѝ: А҆ллилꙋ́їа.

І҆́косъ ѳ҃.

Многоразли́чными недꙋ̑ги ѡ҆держи́мїи, ѽ всецр҃и́це, ѿ ст҃ы́ѧ і҆кѡ́ны твоеѧ̀ па́че ча́ѧнїѧ и҆сцѣлє́нїѧ полꙋча́ютъ, да прїе́мше вѣ́рою бл҃года́ть, велегла́снѡ взыва́ютъ тѝ:

Ра́дꙋйсѧ, здра́выхъ ча́дъ при́сное сохране́нїе: ра́дꙋйсѧ, болѧ́щихъ ко здра́вїю преложе́нїе.

Ра́дꙋйсѧ, дѣте́й недꙋ́гꙋющихъ и҆сцѣле́нїе: ра́дꙋйсѧ, ю҆́ныхъ страда́льцєвъ мт҃и.

Ра́дꙋйсѧ, воста́нїе на ѻ҆́дръ болѣ́зни пове́рженныхъ: ра́дꙋйсѧ, ѿра́до стра́хомъ сме́ртнымъ ѡ҆держи́мыхъ.

Ра́дꙋйсѧ, вне́млющаѧ человѣ́кѡвъ рыда́нїѧмъ: ра́дꙋйсѧ, призрѣва́ющаѧ на на̑ша стена̑нїѧ.

Ра́дꙋйсѧ, бо́лей земны́хъ нбⷭ҇ною ра́достїю растворе́нїе: ра́дꙋйсѧ, лю́тѣ ѡ҆бꙋрева́емыхъ пачеесте́ственное терпѣ́нїе.

Ра́дꙋйсѧ, ꙗ҆́кѡ ᲂу҆готовлѧ́еши пла́чꙋщымъ ра́дость: ра́дꙋйсѧ, ꙗ҆́кѡ снабдѣва́еши кро́ткихъ крило́ма мл҃твы.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ і҃.

Сп҃стѝ хотѧ̀ зижди́тель и҆стлѣ́вшее грѣхо́мъ человѣ́ческое є҆стество̀, сни́де на тѧ̀, ꙗ҆́кѡ до́ждь на рꙋно̀, и҆ кꙋпинꙋ́ тѧ содѣ́лавъ неѡпали́мꙋю, бг҃ъ сы́й бы́сть чл҃вѣ́къ, да воспѣва́емъ є҆мꙋ̀: А҆ллилꙋ́їа.

І҆́косъ і҃.

Стѣна̀ є҆сѝ дѣ́вамъ, ѻ҆трокови́це чⷭ҇таѧ, и҆ всѣ̑мъ ѡ҆ чⷭ҇тотѣ̀ радѧ́щымъ: въ тѧ́ бо всели́сѧ бг҃ъ, ѡ҆чища́ѧй разꙋ̑мнаѧ созда̑нїѧ своѧ̑, да и҆збы́вше всѧ́кїѧ скве́рны, предлага́емъ тѝ сицева̑ѧ:

Ра́дꙋйсѧ, молча́нїѧ взыскꙋ́ющихъ собесѣ́днице: ра́дꙋйсѧ, вѣ́нче хранѧ́щихъ дѣ́вство.

Ра́дꙋйсѧ, нача́ло и҆ коне́цъ дꙋхо́внагѡ соверше́нїѧ: ра́дꙋйсѧ, храни́лище бжⷭ҇твеннагѡ ѿкрове́нїѧ.

Ра́дꙋйсѧ, трⷪ҇ческагѡ совѣ́та таи́ннице: ра́дꙋйсѧ, сп҃се́нїѧ человѣ́кѡвъ вино́внице.

Ра́дꙋйсѧ, верши́но, гѡ́рдымъ ᲂу҆мѡ́мъ непристꙋ́пнаѧ: ра́дꙋйсѧ, ᲂу҆бѣ́жище, смирє́ннымъ сердца́мъ достꙋ́пное.

Ра́дꙋйсѧ, чⷭ҇таѧ, нб҃сѐ чⷭ҇тѣ́йшаѧ: ра́дꙋйсѧ, херꙋві́мѡвъ и҆ серафі́мѡвъ чтⷭ҇нѣ́йшаѧ.

Ра́дꙋйсѧ, ѡ҆бра́дованнаѧ, ꙗ҆́кѡ прїѧ́ла є҆сѝ ѿ а҆рха́гг҃ла ра́дованїе: ра́дꙋйсѧ, ᲂу҆тѣ́шеннаѧ, ꙗ҆́кѡ рꙋ́цѣ твоѝ ѡ҆сѧза́стѣ воскрⷭ҇шаго хрⷭ҇та̀.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ а҃і.

Пѣ́нїе тща́щесѧ разꙋ́мное сп҃сꙋ приноси́ти, всегда̀ неключи́ми, влⷣчце, ѡ҆стае́мсѧ рабѝ твоѝ: кто́ бо мо́жетъ досто́йнѡ воспѣ́ти бг҃а, є҆гѡ́же и҆́мѧ ꙗ҆́кѡ мѵ́ро и҆злїѧ́нное; сегѡ̀ ра́ди вопїе́мъ є҆мꙋ̀: А҆ллилꙋ́їа.

І҆́косъ а҃і.

Свѣ́тъ ве́лїй возсїѧ́въ во тьмѣ̀ сѣдѧ́щымъ, посѣтѝ на́съ восто́къ свы́ше, сн҃ъ и҆ бг҃ъ тво́й, ѽ дв҃о: тѧ̀ содѣ́лавъ свѣще́ю на свѣ́щницѣ, свѣтонѡ́снымъ ча́дѡмъ цр҃кѡ́внымъ наказꙋ́етъ приноси́ти тѝ сицева̑ѧ:

Ра́дꙋйсѧ, зарѐ ᲂу҆́мнагѡ сл҃нца: ра́дꙋйсѧ, вмѣсти́лище бжⷭ҇твеннагѡ ѻ҆гнѧ̀.

Ра́дꙋйсѧ, свѣ́те, ꙗ҆́кѡ ѡ҆дѣѧ́нїе ст҃ы́хъ сотка́ла є҆сѝ: ра́дꙋйсѧ, свѣщѐ, ꙗ҆́кѡ тьмꙋ̀ бѣсо́вскꙋю ѿгна́ла є҆сѝ.

Ра́дꙋйсѧ, ко́сныхъ ᲂу҆мѡ́въ просвѣще́нїе: ра́дꙋйсѧ, грѣ́шныхъ серде́цъ ѡ҆заре́нїе.

Ра́дꙋйсѧ, десни́це, и҆з̾ мо́рѧ сꙋ́етствїй и҆зводѧ́щаѧ: ра́дꙋйсѧ, лꙋчѐ, пꙋтеводѧ́щаѧ къ црⷭ҇твїю сп҃са́ющихсѧ.

Ра́дꙋйсѧ, мо́лнїе, нераска́ѧнныхъ поража́ющаѧ: ра́дꙋйсѧ, гро́ме, гꙋби́телей ᲂу҆страша́ющїй.

Ра́дꙋйсѧ, ѡ҆мраче́нныѧ со́вѣсти просвѣтле́нїе: ра́дꙋйсѧ, бж҃їѧ сꙋда̀ ᲂу҆милостивле́нїе.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ в҃і.

Бл҃года́ть да́ти восхотѣ́въ, зако́на ве́тхагѡ пода́тель завѣ́тъ но́вый на́мъ дарова̀: мы́ же, бл҃года́ть прїи́мше, не дѣ́лы зако́на, но є҆ди́ною вѣ́рою сп҃се́нїе ᲂу҆лꙋчи́вше, восписꙋ́емъ всѝ: А҆ллилꙋ́їа.

І҆́косъ в҃і.

Пою́ще твоѐ ржⷭ҇тво̀, бг҃омт҃и, ꙗ҆́коже дре́вле і҆и҃ль въ кѷмва́лѣхъ сѣно́внꙋю ски́нїю воспѣва́ше, та́кѡ мы̀ ны́нѣ тѧ̀, ски́нїю и҆́стиннꙋ, добродѣ́тельми прославлѧ́емъ, да слы́шиши ѿ всѣ́хъ сицева̑ѧ:

Ра́дꙋйсѧ, пѣ́сне, воспѣва́емаѧ горѣ̀: ра́дꙋйсѧ, ѱалмѐ, слы́шимый ни́зꙋ.

Ра́дꙋйсѧ, є҆ди́номꙋ бг҃ꙋ досто́йнѡ послꙋжи́вшаѧ: ра́дꙋйсѧ, бжⷭ҇твеннѣй трⷪ҇цѣ смире́нїемъ ᲂу҆годи́вшаѧ.

Ра́дꙋйсѧ, вѣ́ки носѧ́щаго носи́вшаѧ въ себѣ̀: ра́дꙋйсѧ, прⷭ҇то́ле содержа́щагѡ вселе́ннꙋю въ рꙋцѣ̀.

Ра́дꙋйсѧ, та́йно неизрече́ннаѧ вѣкѡ́въ и҆ време́нъ: ра́дꙋйсѧ, ᲂу҆пова́нїе тве́рдое наро́дѡвъ и҆ племе́нъ.

Ра́дꙋйсѧ, серде́чное ра́дованїе і҆ере́євъ бл҃гоговѣ́йныхъ: ра́дꙋйсѧ, бы́строе слы́шанїе мл҃твъ цр҃ко́вныхъ и҆ келе́йныхъ.

Ра́дꙋйсѧ, премⷣрости до́ме бг҃озда́нный: ра́дꙋйсѧ, млⷭ҇ти сосꙋ́де, бг҃омъ и҆збра́нный.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ г҃і.

Ѽ всецр҃и́це мт҃и, ро́ждшаѧ всѣ́хъ ст҃ы́хъ ст҃ѣ́йшее сло́во, ны́нѣшнее на́ше прїе́мши пѣснопѣ́нїе, ѿ всѧ́кїѧ сме́ртныѧ болѣ́зни и҆сцѣли́ ны и҆ бꙋ́дꙋщагѡ и҆зба́ви ѡ҆сꙋжде́нїѧ вопїю́щихъ: А҆ллилꙋ́їа.

Се́й конда́къ глаго́летсѧ три́жды. И҆ па́ки чте́тсѧ і҆́косъ а҃-й, и҆ конда́къ а҃-й.

І҆́косъ а҃.

А҆́гг҃лъ предста́тель съ нб҃сѐ сше́дъ, речѐ всецр҃и́цѣ: ра́дꙋйсѧ! И҆ бг҃овѣща́ннымъ гла́сомъ воплоща́ема тѧ̀ зрѧ̀, гдⷭ҇и, возопѝ къ не́й такова̑ѧ:

Ра́дꙋйсѧ, глави́зно на́шегѡ сп҃се́нїѧ: ра́дꙋйсѧ, и҆сполне́нїе зижди́телева смотре́нїѧ.

Ра́дꙋйсѧ, ꙗ҆́кѡ тобо́ю бг҃ъ воплоти́сѧ: ра́дꙋйсѧ, ꙗ҆́кѡ неви́димый въ тебѣ̀ и҆з̾ѡбрази́сѧ.

Ра́дꙋйсѧ, ми́лость ми́ра внꙋ́трь прїѧ́вшаѧ: ра́дꙋйсѧ, ѡ҆дѣѧ́нїе пло́ти сло́вꙋ и҆стка́вшаѧ.

Ра́дꙋйсѧ, ᲂу҆мꙋ̀ непости́жнаѧ го́рнѧѧ сла́во: ра́дꙋйсѧ, сердца̀ ѡ҆живи́вшаѧ нбⷭ҇наѧ ма́нно.

Ра́дꙋйсѧ, ѕвѣздо̀, бл҃года́ти сїѧ́нїе: ра́дꙋйсѧ, и҆сто́чниче, живы́ѧ воды̀ и҆злїѧ́нїе.

Ра́дꙋйсѧ, бцⷣе, въ жена́хъ бл҃гослове́ннаѧ: ра́дꙋйсѧ, ро́ждшаѧ сп҃са дв҃о нетлѣ́ннаѧ.

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Конда́къ а҃.

Новоѧвле́ннѣй твое́й і҆кѡ́нѣ предстоѧ́ще вѣ́рнїи ᲂу҆ми́льнѡ, воспѣва́емъ тѝ, всецр҃и́це, рабѝ твоѝ:* низпослѝ цѣльбы̑ къ тебѣ̀ притека́ющымъ, да всѝ ра́достнѡ зове́мъ тѝ:

Ра́дꙋйсѧ, всецр҃и́це, недꙋ́ги на́шѧ бл҃года́тїю и҆сцѣлѧ́ющаѧ.

Мл҃тва.

Ѽ пречⷭ҇таѧ бг҃омт҃и, всецр҃и́це! Оу҆слы́ши многоболѣ́зненное воздыха́нїе на́ше пред̾ чꙋдотво́рною і҆кѡ́ною твое́ю, и҆з̾ ᲂу҆дѣ́ла а҆ѳѡ́нскагѡ въ рѡссі́ю принесе́нною, при́зри на ча́дъ твои́хъ, неисцѣ́льными недꙋ̑ги стра́ждꙋщихъ, ко ст҃о́мꙋ ѻ҆́бразꙋ твоемꙋ̀ съ вѣ́рою припа́дающихъ! Ꙗ҆́коже пти́ца крило́ма покрыва́етъ птенцы̀ своѧ̑, та́кѡ и҆ ты̀ ны́нѣ, при́снѡ жива̀ сꙋ́щи, покры́й на́съ многоцѣле́бнымъ твои́мъ ѡ҆мофо́ромъ. Та́мѡ, и҆дѣ́же наде́жда и҆счеза́етъ, несꙋмнѣ́нною наде́ждою бꙋ́ди. Та́мѡ, и҆дѣ́же лю̑тыѧ скѡ́рби превозмога́ютъ, терпѣ́нїемъ и҆ ѡ҆сла́бою ꙗ҆ви́сѧ. Та́мѡ, и҆дѣ́же мра́къ ѿча́ѧнїѧ въ дꙋ́ши всели́сѧ, да возсїѧ́етъ неизрече́нный свѣ́тъ бжⷭ҇тва̀! Малодꙋ̑шныѧ ᲂу҆тѣ́ши, немощны̑ѧ ᲂу҆крѣпѝ, ѡ҆жесточє́ннымъ сердца́мъ ᲂу҆мѧгче́нїе и҆ просвѣще́нїе да́рꙋй. И҆сцѣли́ болѧ́щыѧ лю́ди твоѧ̑, ѽ всемлⷭ҇тиваѧ цр҃и́це! Оу҆́мъ и҆ рꙋ́ки врачꙋ́ющихъ на́съ бл҃гословѝ, да послꙋ́жатъ ѻ҆рꙋ́дїемъ всемо́щнагѡ врача̀ хрⷭ҇та̀ сп҃са на́шегѡ. Ꙗ҆́кѡ живѣ́й тѝ сꙋ́щей съ на́ми мо́лимсѧ пред̾ і҆кѡ́ною твое́ю, ѽ влⷣчце! Прострѝ рꙋ́цѣ твои̑, и҆спо́лненнѣи и҆сцѣле́нїѧ и҆ врачбы̀, ра́досте скорбѧ́щихъ, въ печа́лехъ ᲂу҆тѣше́нїе, да чꙋдотво́рнꙋю по́мощь ско́рѡ полꙋчи́вше, прославлѧ́емъ живонача́льнꙋю и҆ нераздѣ́льнꙋю трⷪ҇цꙋ, ѻ҆ц҃а̀ и҆ сн҃а и҆ ст҃а́го дх҃а, во вѣ́ки вѣкѡ́въ. А҆ми́нь.

Чу­до­твор­ная ико­на Бо­жи­ей Ма­те­ри, име­ну­е­мая «Все­ца­ри­ца» (по-гре­че­ски – «Пан­та­насса») на­хо­дит­ся на Свя­той Го­ре Афон в Гре­ции в со­бор­ном хра­ме Ва­то­пед­ской оби­те­ли, сле­ва от цар­ских врат. Эта ико­на, неболь­шая по раз­ме­рам, на­пи­са­на в XVII ве­ке, и была благословением афонского старца Иосифа Исихаста своим ученикам, а в Ватопед она принесена Иосифом Спилеотом (Пещерником) Ватопедским.

На иконе изо­бра­же­на Пре­чи­стая Де­ва в баг­ря­ном оде­я­нии, вос­се­да­ю­щая на цар­ском троне. На ру­ках Ее – Бо­гом­ла­де­нец со свит­ком в ле­вой ру­ке и бла­го­слов­ля­ю­щий дес­ни­цей. Пра­вой ру­кой Бо­го­ро­ди­ца ука­зы­ва­ет на Сво­е­го Цар­ствен­но­го Сы­на, как на Спа­си­те­ля всех че­ло­ве­ков. На зад­нем плане – два ан­ге­ла, ко­то­рые с бла­го­го­ве­ни­ем осе­ня­ют кры­ла­ми Пре­чи­стую Де­ву.

Из рассказа старца Иосифа Исихаста известно о первом чуде, произошедшим у образа «Всецарицы». Однажды некий юноша вошел в храм и захотел поклониться иконе[1]. Вдруг лик Бо­го­ма­те­ри вос­си­ял див­ным све­том, ка­кая-то неви­ди­мая си­ла от­бро­си­ла мо­ло­до­го че­ло­ве­ка, и он упал на­земь. Под­няв­шись, он в стра­хе под­бе­жал к стар­цам–ино­кам и со сле­за­ми на гла­зах при­знал­ся им, что вел нече­сти­вую жизнь, за­ни­мал­ся кол­дов­ством и при­шел в мо­на­стырь, чтобы про­ве­рить си­лу сво­ей ма­гии на свя­тых ико­нах. Про­изо­шед­шее у ико­ны Пре­свя­той Бо­го­ро­ди­цы чу­до на­все­гда от­вра­ти­ло юно­шу от кол­дов­ства, на­пра­ви­ло на путь по­ка­я­ния и вер­ну­ло на сте­зю бла­го­че­сти­вой жиз­ни. Чу­до­твор­ный об­раз Бо­жи­ей Ма­те­ри «Все­ца­ри­ца» по­чи­та­ет­ся как на Афоне, так и да­ле­ко за его пре­де­ла­ми. Са­мо имя ико­ны – Все-Гос­по­жа, Все-По­ве­ли­тель­ни­ца – го­во­рит о ее осо­бой, все­объ­ем­лю­щей си­ле. Про­явив свою чу­до­твор­ную си­лу впер­вые про­тив вол­шеб­ных чар, «Все­ца­ри­ца» име­ет и бла­го­дать ис­це­ле­ния боль­ных ра­ком – страш­ней­шей из бо­лез­ней совре­мен­но­го че­ло­ве­че­ства (а ведь рас­про­стра­не­ние увле­че­ния ма­ги­ей, кол­дов­ством и ок­куль­тиз­мом по хри­сти­ан­ско­му ми­ру мож­но срав­нить с по­ра­же­ни­ем че­ло­ве­че­ско­го ор­га­низ­ма зло­ка­че­ствен­ной опу­хо­лью).

11 ав­гу­ста 1995 го­да спи­сок чу­до­твор­ной ико­ны «Все­ца­ри­ца» при­был в Рос­сию – в мос­ков­ский дет­ский он­ко­ло­ги­че­ский центр на Ка­шир­ке. На мо­леб­нах Бо­жи­ей Ма­те­ри «Все­ца­ри­це» мо­лят­ся боль­ные де­ти и их ро­ди­те­ли с на­деж­дой на небес­ную по­мощь За­ступ­ни­цы и Це­ли­тель­ни­цы.

В 1997 году один из списков иконы «Всецарица» был пожертвован в московский Новоспасский монастырь и почитается как чудотворный и мироточивый.

В связи с многочисленными сообщениями об исцелениях от раковых заболеваний, переданных вместе с медицинскими заключениями в Московскую Патриархию из Екатеринбургской епархии в 2004 году, один из списков иконы «Всецарица» из Свято-Троицкого мужского монастыря в селе Тарасково был включен в число местночтимых икон епархии.


Примечание

[1] По другим данным «начал что-то невнятно бормотать».


Молебен с акафистом Пресвятой Богородице пред иконой Всецарица




Сайт нуждается в средствах (способы помочь).