Конда́к 1.

Избра́нная от родо́в дре́вних Пресвята́я Богоро́дице Одиги́трие, Засту́пнице все́х к Тебе́ притека́ющих, ско́рая Услы́шательнице и ми́лостивая Предста́тельнице, со умиле́нием припа́даем ко Твоему́ Пречи́стому о́бразу и глаго́лем: отве́рзи о́чи серде́ц на́ших, грехми́ омраче́нныя, во е́же позна́ти на́м пу́ть покая́ния. Те́мже благода́рственне вопие́м Ти́:

Ра́дуйся, Богоро́дице Одиги́трие, на спасе́ния стези́ на́с наставля́ющая.

И́кос 1.

А́нгели и Арха́нгели воспева́ют Тя́ вы́ну: ра́дуйся, Цари́це Небесе́ и земли́, Ты́ бо честне́йши все́х безпло́тных си́л яви́лася еси́, я́ко из Тебе́ воплоти́ся Госпо́дь на́ш, до́лу снизше́дый спасе́ния на́шего ра́ди. Ны́не же, я́ко усе́рдная Моли́твенница о ро́де христиа́нстем, путеводи́ши все́х чту́щих Тя́ в селе́ния го́рняя, да взыва́ем Ти́ си́це:

Ра́дуйся, Путеводи́тельнице блага́я; ра́дуйся, ка́ющихся Предста́тельнице.

Ра́дуйся, Све́т спасе́ния ми́ру яви́вшая; ра́дуйся, из мра́ка неве́рия изводя́щая.

Ра́дуйся, две́ри покая́ния на́м отверза́ющая; ра́дуйся, Богове́дению на́с науча́ющая.

Ра́дуйся, в ско́рбех ми́лостивая Уте́шительнице; ра́дуйся, в ча́с су́дный всемо́щная Хода́таице.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 2.

Ви́дяще на ме́сте пусты́нном, иде́же бе́ хра́м во и́мя великому́ченика Бо́жия Гео́ргия, ди́вную ико́ну Твою́ Одиги́трию, в пла́мени стра́шном невреди́мо пребы́вшую, и обре́тше ту́ с ве́лиею ра́достию, жи́телие ве́си Выдропу́сския возопи́ша Бо́гу: Аллилу́иа.

И́кос 2.

Разуме́в сы́н боя́рский и во́ин вели́каго кня́зя моско́вскаго Иоа́нна ико́ну Твою́, я́ко сокро́вище драго́е, де́рзостно похи́ти ю́ и пренесе́ во о́тчину свою́, гра́д Му́ром, и та́мо поста́ви ве́лию святы́ню сию́ во хра́ме святи́теля Никола́я, да и му́ромстии лю́дие воспою́т Тя́, глаго́люще сицева́я:

Ра́дуйся, ико́ну Твою́ из огня́ невреди́мо изве́дшая; ра́дуйся, пла́мень душетле́нных страсте́й в на́с угаша́ющая.

Ра́дуйся, ско́рая Помо́щнице Тя́ призыва́ющих; ра́дуйся, Заступле́ние Тя́ почита́ющих.

Ра́дуйся, междоусо́бныя бра́ни ско́ро утиша́ющая; ра́дуйся, братолю́бие и ми́р водворя́ющая.

Ра́дуйся, земли́ Ру́сския ди́вное сокро́вище; ра́дуйся, я́ко по все́й вселе́нней сла́вится и́мя Твое́.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 3.

Си́ла Вы́шняго возбуди́ ве́тр вели́к и стра́шен зело́, тру́с кре́пок и гро́м си́лен, егда́ сы́н боя́рский Тя́, Цари́це Небе́сная, Пле́нницею наименова́в, повеле́ моле́ние соверши́ти пред ико́ною Твое́ю Одиги́триею. И а́бие разверзо́шася кро́вы церко́вныя, и падо́ша на лице́ свое́ свяще́нник и вси́ лю́дие, узре́вше ико́ну сию́ на возду́се уноси́му дале́че. Мы́ же, ве́лию чу́ду сему́ ужаса́ющеся, вопие́м: Аллилу́иа.

И́кос 3.

Возыме́в сокруше́ние серде́чное о неразу́мии свое́м, сы́н боя́рский возопи́: Увы́ мне́, безу́мному! Ка́ко дерзну́х а́з, гре́шный, плени́ти Ту́, Е́юже ве́сь ми́р свободи́ся от греха́ и рабо́ты вра́жия! Ны́не посра́мленный де́рзостию свое́ю, ка́юся и молю́ Тя, Пречи́стая, да́ждь ми́ неосужде́нно воспева́ти Тя́ си́це:

Ра́дуйся, ми́р Рождество́м Твои́м свободи́вшая; ра́дуйся, чу́до все́м на покая́ние сугу́бое откры́вшая.

Ра́дуйся, я́ко ико́на Твоя́ а́нгелы бы́сть носи́ма; ра́дуйся, я́ко святы́ня сия́ и челове́ки чти́ма.

Ра́дуйся, го́рдым вразумля́ющее противле́ние; ра́дуйся, смире́нным благода́ти низпосла́ние.

Ра́дуйся, к созерца́нию сла́вы Бо́жия на́с возвыша́ющая; ра́дуйся, к покая́нию серде́чному на́с обраща́ющая.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 4.

Бу́рею стра́нною восхище́на бы́сть чу́дная ико́на Одиги́трии и, а́ки на крилу́ ве́треню Небе́сными Си́лами носи́мая, по трие́х ме́сяцех из гра́да Му́рома в ве́сь Выдропу́сскую, па́ки возврати́ся. Те́мже зря́ще святы́ню сию́, на возду́се носи́му, селя́нин Фло́р удиви́ся, понома́рь же Фео́дор, во олтари́ на святе́м престо́ле о́ную обре́т, созыва́ше вся́ лю́ди, благода́рне вопия́ Бо́гу: Аллилу́иа.

И́кос 4.

Слы́ша о чуде́сном Твое́м отше́ствии, сы́н боя́рский, в покая́ние прише́д, и воста́в, и́де па́ки в ве́сь Выдропу́сскую, посто́м в нище́тне о́бразе себе́ утружда́я испове́дати безу́мие свое́, и обре́те та́мо проще́ние, сле́зно взыва́я си́це:

Ра́дуйся, согреша́ющия ско́ро вразумля́ющая; ра́дуйся, ка́ющияся от Себе́ не отрева́ющая.

Ра́дуйся, прелага́ющая сле́зы на весе́лие; ра́дуйся, подаю́щая ве́лие ра́дование.

Ра́дуйся, наде́жная Засту́пнице на Тя́ упова́ющим; ра́дуйся, ско́рая Помо́щнице к Тебе́ притека́ющим.

Ра́дуйся, я́ко от Тебе́ чудеса́ мно́гая исхо́дят; ра́дуйся, я́ко о Тебе́ вся́кая тва́рь ра́дуется.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 5.

Боготе́чной звезде́ уподо́бися пречестна́я ико́на Твоя́, Одиги́трие, та́ бо приведе́ волхвы́ к верте́пу Бо́жию, пред Твои́м же святы́м о́бразом ве́рнии прекло́ньше коле́на, благогове́йно воспева́ют: упра́ви, милосе́рдая Ма́ти, пу́ть жития́ на́шего ко Оте́честву Небе́сному, зане́же прише́льцы есмы́ в ми́ре се́м, да взыва́ем Сы́ну Твоему́ и Бо́гу: Аллилу́иа.

И́кос 5.

Ви́дяще ди́вную ико́ну твою́ Одиги́трию, земли́ Тверско́й дарова́нную, и благослове́ние Ма́тернее подаю́щую вся́кому путеше́ствовати хотя́щему, мо́лим Тя́, да не то́кмо от зла́го обстоя́ния ны́ изба́виши и це́лы сохрани́ши, но и ду́ши на́ша ко благоугожде́нию Бо́жию напра́виши. Те́мже и мы́, пречу́днаго покро́ва Твоего́ сподо́битися жела́юще, благода́рственно вопие́м Ти́:

Ра́дуйся, притека́ющих к Тебе́ ти́хое приста́нище; ра́дуйся, упова́ющим на Тя́ спаси́тельная кре́посте.

Ра́дуйся к го́рним селе́нием у́м на́ш возводя́щая; ра́дуйся, до́льния суеты́ отрева́ти на́с подвиза́ющая.

Ра́дуйся, не́мощи и я́звы врачева́ние; ра́дуйся, искуше́ния и недоуме́ния истребле́ние.

Ра́дуйся, пути́ пра́выя благословля́ющая; ра́дуйся, еди́ному Го́споду служи́ти устремля́ющая.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 6.

Пропове́дница бы́сть ико́на Твоя́, Путеводи́тельнице, мно́жества ми́лостей Твои́х, я́же излия́ла еси́ притека́ющим к Тебе́: ско́рбнии бо прихожда́ху, моле́ние принося́ще милосе́рдию Твоему́; прие́млюще же ско́ро избавле́ние от многообра́зных не́мощей душе́вных, вку́пе и теле́сных, пове́даху всю́ду заступле́ние и чудеса́ Твоя́, со умиле́нием вопию́ще Бо́гу: Аллилу́иа.

И́кос 6.

Возсия́ в ве́си Выдропу́сской благода́ть от ико́ны Твоея́, Влады́чице: среди́нное бо ме́сто яви́ся ве́сь сия́ ца́рствующей Москве́ и Петро́ву гра́ду, освяща́я и благословля́я зе́млю на́шу Ру́сскую, мо́лиши бо неусы́пно Сы́на Своего́ Преве́чнаго Бо́га о дарова́нии стране́ на́шей ми́ра и благоде́нствия, избавле́ния от междоусо́бныя бра́ни и вся́кия ско́рби и печа́ли. Те́мже славосло́вим Тя́ си́це:

Ра́дуйся, честны́м Твои́м омофо́ром держа́ву на́шу покрыва́ющая; ра́дуйся, Ру́сь Святу́ю Свои́м уде́лом имену́ющая.

Ра́дуйся, от ле́т дре́вних во бране́х со иноплеме́нники помога́ющая; ра́дуйся, призыва́ющим и́мя Твое́ побе́ды умножа́ющая.

Ра́дуйся, прави́тели и вла́сти умудря́ющая; ра́дуйся, судьбы́ Оте́чествия ко бла́гу устроя́ющая.

Ра́дуйся, по́моще на́ша и утвержде́ние; ра́дуйся, упова́ние на́ше и вразумле́ние.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 7.

Хотя́ Госпо́дь яви́ти человеколю́бие Свое́ не то́кмо ве́си Выдропу́сской, но и все́й правосла́вней Ру́сской земли́, устро́и пренесе́ние ико́ны сея́ по градо́м и ве́сем, во оби́тели и́ночествующих и до́мы богобоя́зненных христиа́н. Те́мже, я́ко Саму́ Цари́цу Небе́сную сию́ ико́ну чту́ще, восхваля́ем с любо́вию твори́мая от нея́ чудеса́, пою́ще Бо́гу: Аллилу́иа.

И́кос 7.

Но́вый исто́чник ми́лостей яви́ся ико́на Твоя́ Одиги́трия, стра́ждущим бо осла́бы посыла́ются, немощству́ющим здра́вие, пле́нником свобожде́ние, заблу́ждшим обраще́ние, коему́ждо позна́ние вели́чия Твоего́ да́руется, зане́ моли́тва, я́же к Тебе́, Пречи́стая, возноси́мая, непрело́жно услы́шана быва́ет. Те́мже и заступле́ние Твое́ многоси́льное обрета́ем и благодаря́ще воспева́ем Ти́ си́це:

Ра́дуйся, на́ше всемо́щное заступле́ние; ра́дуйся, от вся́кия напа́сти огражде́ние.

Ра́дуйся, си́рых и убо́гих прия́телище; ра́дуйся, де́в и вдови́ц честны́х прибе́жище.

Ра́дуйся, супру́гом целому́дрие и единомы́слие подава́ющая; ра́дуйся, ча́да во благоче́стии и послуша́нии жи́ти наставля́ющая.

Ра́дуйся, проше́ния благогове́йных моли́твенников исполня́ющая; ра́дуйся, лю́тыя беды́ от на́с отгоня́ющая.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 8.

Стра́нствие земно́е соверша́ющих, огради́ на́с Твои́м заступле́нием, Пречи́стая Де́во, изведи́ из глубины́ грехо́в и бу́ри отча́яния, мо́ря жите́йскаго пучи́ну помози́ невла́жными проити́ стопа́ми, мы́сленнаго фарао́на потопля́ющи, да спаса́еми Тобо́ю дерзнове́нно возопие́м Бо́гу: Аллилу́иа.

И́кос 8.

Вся́ в вы́шних пребыва́ющи, и на́с земноро́дных не оста́вила еси́, Влады́чице: коего́ждо бо воздыха́ния серде́чная слы́шиши и призира́еши на проше́ния ве́рно взыва́ющих к Тебе́: ни́вы се́льныя благословля́еши и бразды́ жи́тныя освяща́еши, во е́же бы́ти до́брым плодо́м от земли́ на́шея, исполня́ющи моле́ния люде́й Твои́х о хле́бе насу́щном, вопию́щих Ти́ си́це:

Ра́дуйся, благорастворе́ние возду́хов низпосыла́ющая; ра́дуйся, во гла́де су́щих на́с не оставля́ющая;

Ра́дуйся, усе́рдных де́лателей моле́ния приима́ющая; ра́дуйся, на небе́сныя сокро́вищницы упова́ти те́х подвиза́ющая.

Ра́дуйся, незри́мое ве́ры се́мен прозябе́ние; ра́дуйся, зе́рен благоче́стия изря́дное насажде́ние.

Ра́дуйся, пло́д стори́чный приноси́ти на́с сподобля́ющая; ра́дуйся, пи́щею небе́сною на́с пита́ющая.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 9.

Вся́кое естество́ безпло́тных воспева́ет немо́лчно вели́чия Твоя́, Де́во. А́нгели бо незри́мо поклоне́ние пред Твое́ю ико́ною творя́ще, фимиа́мом небе́сным пред не́ю кажде́ние соверша́ют. Мы́ же, земноро́днии, ка́ко досто́йно восхвали́ти Тя́ возмо́жем? И́бо вся́кое благодаре́ние не превозмога́ет мно́жества ми́лостей Твои́х. Те́мже и припа́дающе к Твоему́ свято́му о́бразу, иде́же Ты́ держи́ши на рука́х Свои́х Богомладе́нца Христа́, хвале́бную пе́снь воспои́м Зижди́телю все́х: Аллилу́иа.

И́кос 9.

Вети́и многовеща́ннии недоуме́ют, ка́ко возмо́жно изъясни́ти мно́жества чуде́с, от ико́ны Твоея́ излива́емая, ты́ бо пути́ заблу́ждших исправля́еши, малове́рныя вразумля́еши. Мы́ же, не дерза́юще испыта́ти вели́чия Твоя́, благогове́йно воспева́ем Ти́ си́це:

Ра́дуйся, и́стинныя ве́ры Наста́внице; ра́дуйся, наде́жды несумне́нныя Пода́тельнице.

Ра́дуйся, любве́ нелицеме́рныя взыска́ние; ра́дуйся, му́дрости небе́сныя стяжа́ние.

Ра́дуйся, оте́ческаго преда́ния Храни́тельнице; ра́дуйся, ве́ры святы́х апо́стол Защи́тнице.

Ра́дуйся, е́реси тьмочи́сленныя разоря́ющая; ра́дуйся, пра́вое богопочита́ние насажда́ющая.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 10.

Спасти́ хотя́ от поруга́ния ико́ну Твою́ Одиги́трию, благочести́вый селя́нин Стефа́н, ви́дя, я́ко безу́мнии отсту́пницы ве́ры оте́ческия восхоте́ша вве́ргнути во о́гнь святы́ню хра́ма Выдропу́сскаго, откупи́ ю́ у безбо́жных за еди́н дровяны́й воз, и благогове́йно внесе́ в до́м сво́й, благодаря́ Бо́га: Аллилу́иа.

И́кос 10.

Стена́ кре́пкая яви́ся стране́ на́шей ико́на Твоя́, Влады́чице, я́ко Ты́ никогда́же оставля́еши ми́лостивное Свое́ о наро́де христиа́нстем попече́ние, а́ще бо и разоре́ни и пору́гани хра́ми Бо́жии бы́ша, и нечести́вии лю́дие святы́ни поху́лиша и истреби́ша. Но поми́ловала еси́ ны́ и благослови́ла еси́ пребыва́ти ико́не Твое́й Одиги́трии в земли́ Тверско́й в дому́ благочести́ваго Стефа́на со Матро́ною и ча́дами и́х. Богомо́льцы же Твои́ та́йно прихожда́ху в до́м се́й, и припа́дающе к наде́жной пред Бо́гом Засту́пнице, сле́зно взыва́ху Ти́ си́це:

Ра́дуйся, во испове́дании Правосла́вия на́с утвержда́ющая; ра́дуйся, благодари́ти за ско́рби и тесноты́ вразумля́ющая.

Ра́дуйся, безу́мия богобо́рцев обличе́ние; ра́дуйся, омраче́нных безбо́жием исцеле́ние.

Ра́дуйся, усе́рдных служи́телей Свои́х утеша́ющая; ра́дуйся, о́ным оби́тели Небе́сныя уготовля́ющая.

Ра́дуйся, ми́лостиваго всепроще́ния исто́чниче; ра́дуйся, ве́рным моли́твы за враги́ дарова́ние.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 11.

Пе́ние вознося́ доброгла́сное пред честно́ю ико́ною Твое́ю, усе́рдно про́сим Тя́, Богома́ти, услы́ши моле́ния на́ша, к Тебе́ возноси́мая. Умоли́ Влады́ку Христа́ изба́вити оте́чество и наро́д на́ш от поги́бели и сохрани́ в на́с ве́ру правосла́вную, да со умиле́нием благода́рственно еди́нем се́рдцем и еди́неми усты́ вознесе́м хвалу́ Бо́гу: Аллилу́иа.

И́кос 11.

Светоприе́мной свещи́ уподо́бися ико́на Твоя́ Выдропу́сская, благода́тию от нея́ излия́нною ди́вно показу́ющи на́м та́йны боже́ственныя и науча́ющи а́нгельскому житию́. Те́мже и во́ина Крони́да, и́же споспе́шествовал е́сть сопру́жником честны́м Стефа́ну и Матро́не сохрани́ти о́браз Тво́й святы́й, препроводи́ла еси́ во оби́тель Пско́во-Пече́рскую, и та́мо и́ноческий о́браз восприя́ти с и́менем Нафана́ил сподо́била еси́. Се́й же моли́твы де́латель усе́рдный, му́дростию и му́жеством преукра́шенный, до после́дняго издыха́ния испове́даше Твое́ благо́е о на́с попече́ние, вопия́ Ти́ похвалы́ сицевы́я:

Ра́дуйся, ева́нгельским путе́м ше́ствовати на́с побужда́ющая; ра́дуйся, во́лю Бо́жию взыска́ти и твори́ти повелева́ющая.

Ра́дуйся, и́ноческаго о́браза небе́сная Покрови́тельнице; ра́дуйся, оби́телей земны́х, во о́браз оби́телей го́рних, до́брая Устрои́тельнице.

Ра́дуйся, непреста́нную моли́тву стяжева́ти назида́ющая; ра́дуйся, ума́ и се́рдца чистоту́ созида́ющая.

Ра́дуйся, благогове́йно пред Бо́гом ходи́ти воскриля́ющая; ра́дуйся, да́же до са́мыя сме́рти обе́ты мона́шеския храни́ти укрепля́ющая.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 12.

Благода́тию боже́ственною защити́ ны, Де́во Непоро́чная, от плене́ния врагу́ па́дшия во́ли на́шея и ко́зней диа́вольских, и я́ко младе́нцы а́лчущия, ни во что́же вменя́юще би́сер и зла́то, прини́чут ко млеку́ ма́терню, та́ко и ду́ши на́ша умудри́ иска́ти упокое́ния то́кмо во Еди́ном Го́споде на́шем, да позна́вше Его́ бла́гость, воспое́м: Аллилу́иа.

И́кос 12.

Пою́ще заступле́ние Твое́, Пресвята́я Влады́чице, мо́лим Тя́: бу́ди на́м блага́я предста́тельница в о́ный де́нь стра́шный, егда́ во сла́ве прии́дет Пра́ведный Судия́, Сы́н и Бо́г Тво́й, да не уподо́бимся смоко́внице безпло́дней, да не сопричте́мся лука́вому рабу́, но восприи́мем ча́сть му́дрых де́в, со свети́льники горя́щими, испо́лненными еле́я ми́лости и до́брых де́л, велича́юще Тя́ та́ко:

Ра́дуйся, упова́ние на́ше в де́нь су́дный; ра́дуйся, умоле́ние за ны́ в ча́с испыта́ния.

Ра́дуйся, огня́ неугаси́маго избавля́ющая; ра́дуйся, во избра́нное ста́до Христо́во на́с собира́ющая.

Ра́дуйся, ду́шу полага́ти за дру́ги призыва́ющая; ра́дуйся, сердца́ на́ша ми́лующими бы́ти сотворя́ющая.

Ра́дуйся, Ты́ бо еси́ Хода́таица поми́лования гре́шником ка́ющимся; ра́дуйся, Ты́ бо вво́диши ве́рныя в ра́дость Го́спода Твоего́.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 13.

О Предста́тельнице на́ша непосты́дная, Пресвята́я Богоро́дице Одиги́трие, приими́ на́ше возноси́мое к Тебе́ моле́ние, и от вся́каго зла́ сохрани́, к доброде́тели упра́ви, пути́ пра́вы сотвори́ и проще́ния грехо́в на́ших испроси́, да взира́юще на святу́ю Твою́ ико́ну, воззове́м к щедро́там Отца́ Небе́снаго: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгели и Арха́нгели воспева́ют Тя́ вы́ну: ра́дуйся, Цари́це Небесе́ и земли́, Ты́ бо честне́йши все́х безпло́тных си́л яви́лася еси́, я́ко из Тебе́ воплоти́ся Госпо́дь на́ш, до́лу снизше́дый спасе́ния на́шего ра́ди. Ны́не же, я́ко усе́рдная Моли́твенница о ро́де христиа́нстем, путеводи́ши все́х чту́щих Тя́ в селе́ния го́рняя, да взыва́ем Ти́ си́це:

Ра́дуйся, Путеводи́тельнице блага́я; ра́дуйся, ка́ющихся Предста́тельнице.

Ра́дуйся, Све́т спасе́ния ми́ру яви́вшая; ра́дуйся, из мра́ка неве́рия изводя́щая.

Ра́дуйся, две́ри покая́ния на́м отверза́ющая; ра́дуйся, Богове́дению на́с науча́ющая.

Ра́дуйся, в ско́рбех ми́лостивая Уте́шительнице; ра́дуйся, в ча́с су́дный всемо́щная Хода́таице.

Ра́дуйся, Богоро́дице Одиги́трие, на спасе́ния стези́ на́с наставля́ющая.

Конда́к 1.

Избра́нная от родо́в дре́вних Пресвята́я Богоро́дице Одиги́трие, Засту́пнице все́х к Тебе́ притека́ющих, ско́рая Услы́шательнице и ми́лостивая Предста́тельнице, со умиле́нием припа́даем ко Твоему́ Пречи́стому о́бразу и глаго́лем: отве́рзи о́чи серде́ц на́ших, грехми́ омраче́нныя, во е́же позна́ти на́м пу́ть покая́ния. Те́мже благода́рственне вопие́м Ти́:

Ра́дуйся, Богоро́дице Одиги́трие, на спасе́ния стези́ на́с наставля́ющая.

Моли́тва.

О Цари́це Небесе́ и земли́, Влады́чице всеми́лостивая, Одиги́трие всечестна́я, Предста́тельнице на́ша усе́рдная, при Кресте́ Сы́на Твоего́ и Бо́га всынови́вшая ве́сь па́дший ро́д челове́ческий и по успе́нии Свое́м не оста́вившая на́с си́рых и безнаде́жных! Мо́лим Тя́, Всенепоро́чная, благода́ть Твою́ не отыми́ от ка́ющихся рабо́в Твои́х и упра́ви вся́, я́ко Ма́ти Преблага́я: защити́ оте́чество на́ше, ве́ру правосла́вную сохрани́, вла́сти умудри́, иере́и укрепи́, ве́рным лю́дем Твои́м по́мощь неоску́дную да́руй, ю́ныя вразуми́, ста́рость уте́ши, боля́щия исцели́, отча́янныя возста́ви, заблу́ждшия обрати́ и все́м целому́дрие и кре́пость исхода́тайствуй – Ты́ бо еси́ блага́я Путеводи́тельница и милосе́рдая Засту́пница, к Тебе́ припа́даем и мо́лим Тя́: не отве́ржи на́с, но испроси́ на́м до́браго отве́та на Стра́шнем Суди́лищи, да не осу́димся по грехо́м и беззако́нием на́шим, но ми́лость улучи́м по безме́рному человеколю́бию Го́спода и Спаси́теля на́шего Иису́са Христа́, Ему́же сла́ву и поклоне́ние возсыла́ем, со Безнача́льным Его́ Отце́м, и Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.