Конда́к 1.

Взбра́нной Воево́де победи́тельная, Цари́це Небесе́ и земли́, похва́льная песнопе́ния прино́сим Ти́, Богороди́тельнице. Ты́ же, я́ко иму́щая держа́ву непобеди́мую, от вся́ких зо́л сохрани́ на́с и гра́д на́ш, да зове́м Ти́:

Ра́дуйся, Благода́тная, чу́дным зна́мением ми́лость Бо́жию явля́ющая.

И́кос 1.

Арха́нгели и А́нгели и все́ во́инство Си́л безпло́тных немо́лчно славосло́вят и слу́жат Ти́, главы́ своя́ приклоня́юще: мы́ же гре́шнии недоуме́ем, ка́ко восхвали́ти Тя́ по достоя́нию. Оба́че дерза́юще со упова́нием на благосе́рдие Твое́, прино́сим Ти́ похвалы́ сия́:

Ра́дуйся, рождество́м Твои́м ми́р го́рний с до́льним возвесели́вшая; ра́дуйся, благослове́нная Отрокови́це, по степе́нем хра́ма ники́мже держи́ма возше́дшая.

Ра́дуйся, по обетова́нию роди́телей Твои́х во хра́ме Иерусали́мстем воспита́нная; ра́дуйся, в дому́ Бо́жии моли́тве и богомы́слию науче́нная.

Ра́дуйся, пи́щу из ру́к Арха́нгельских приима́вшая; ра́дуйся, наставле́ния свы́ше в се́рдце Свое́м благогове́йно слага́вшая.

Ра́дуйся, я́ко житие́ Твое́ при хра́ме проо́браз жития́ и́ноческаго яви́ся; ра́дуйся, я́ко ро́д челове́ческий Тобо́ю, а́ки сокро́вищем неветша́ющим, обогати́ся.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 2.

Ви́девши Пресвята́я Де́ва не́мощь вдови́цы не́кия, па́губною стра́стию винопи́тия одержи́мыя, простре́ е́й ру́ку по́мощи. Та́ бо расточи́вши вся́ име́ния своя́, отдаде́ благослове́нную ико́ну Зна́мения в корче́мницу в зало́г, вина́ ра́ди. В себе́ же прише́дши, принесе́ ико́ну в до́м сво́й, оба́че нау́трие не обре́тши ю́ в дому́ свое́м, па́ки тече́ в корче́мницу, и та́мо узре́вши ико́ну, чуде́сно пренесе́нную, паде́ пред не́ю в покая́нии, пою́щи Бо́гу: Аллилу́иа.

И́кос 2.

Разумева́ющи чуде́сное пренесе́ние ико́ны Твоея́, Пречи́стая Де́во, и неви́димыма рука́ма в корче́мнице поставле́ние, вдови́ца отягче́на су́щи студо́м и жа́лостию, нача́т приле́жно моли́тися со слеза́ми: Влады́чице, не лиши́ мя покро́ва Твоего́ и ми́лости! Си́це и мы́ хвалу́ Тебе́, Богороди́тельнице, прино́сим:

Ра́дуйся, чу́дно та́йне воплоще́ния Сы́на Бо́жия послужи́вшая; ра́дуйся, Богомладе́нца пови́вшая и во я́слех безслове́сных ове́ц положи́вшая.

Ра́дуйся, поклоне́ние Сы́ну Твоему́ и Бо́гу пе́рвая соверши́вшая; ра́дуйся, млеко́м пита́вшая Пита́теля а́лчущих.

Ра́дуйся, стяжа́вшая благода́ть ве́лию, в ну́ждах и обстоя́ниих помога́ти; ра́дуйся, ре́вность иму́щая призыва́ющих Тя́ от грехо́в и страсте́й свобожда́ти.

Ра́дуйся, чу́дом исцеле́ния еди́ныя вдови́цы, укрепле́ние ве́ры мно́гим пода́вшая; ра́дуйся, ратобо́рству со страстьми́ и похотьми́ благода́тно науча́ющая.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 3.

Си́лою Твоея́ многомо́щныя моли́твы, Богоневе́стная, обрати́ на пу́ть покая́ния и на́с, удобопрекло́нных ко греху́, па́че жены́ тоя́ согреша́ющих ежеча́сне пред Сы́ном Твои́м и Бо́гом. Не тщи́мся воспря́нути от сна́ грехо́внаго, и не разумева́ем, ка́ко жи́знь на́ша прехо́дит, я́ко се́нь, но яви́ на́м милосе́рдие Твое́, во е́же с наде́ждею вопи́ти о Тебе́: Аллилу́иа.

И́кос 3.

Иму́щи милосе́рдие неоскудева́емое, Ты́, Блага́я Ма́ти, простира́еши ру́це Свои́ на умоле́ние за все́х скорбя́щих и неду́гующих, непреста́нно мо́лиши Сы́на Твоего́ Возлю́бленнаго не то́чию прости́ти на́с, но и дарова́ти на́м оби́тели во Ца́рствии сла́вы, да просла́вим Тя́, бога́тую в ми́лости:

Ра́дуйся, вселюбе́зная Ма́ти на́ша, любо́вию Свое́ю на́с покрыва́ющая; ра́дуйся, врата́ бла́гости Твоея́ на́м отверза́ющая.

Ра́дуйся, кла́дезю неисчерпа́емый ди́внаго милосе́рдия к ми́ру ско́рбному; ра́дуйся, неоскудева́ющий исто́чниче по́мощи по изволе́нию Твоему́ благоутро́бному.

Ра́дуйся, мно́гими чудесы́ ико́ну Свою́ Зна́мения во укрепле́ние на́шея наде́жды на Тя́ просла́вльшая; ра́дуйся, жи́телей гра́да Ряза́ни и ины́х ве́сей и градо́в ми́лостию Свое́ю не оставля́ющая.

Ра́дуйся, о по́чести вы́шняго зва́ния все́х ревнова́ти призыва́ющая; ра́дуйся, обрета́ти Христа́ на пути́ ева́нгельскаго доброде́лания прему́дро наставля́ющая.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 4.

Недоуме́ет у́м на́ш, ка́ко просла́вити чу́до ми́лости Твоея́ ко вдови́це, ю́же обрати́ла еси́ к покая́нию и дала́ еси́ е́й непреста́нно па́мятовати о гресе́ свое́м. О Ма́ти милосе́рдая, помози́ и на́м име́ти па́мять о гресе́х на́ших и николи́же забыва́ти о часе́ сме́ртнем, ка́ко предста́нем Сы́ну Твоему́, ка́ко отвеща́ем Судии́ Пра́веднейшему. Да обрати́мся у́бо к покая́нию и предста́тельством Твои́м умо́лим Бо́га, пою́ще пе́снь: Аллилу́иа.

И́кос 4.

Слы́шавше о ди́вном пренесе́нии ико́ны Богома́тере и о чудесе́х, от нея́ быва́емых, вси́ лю́дие гра́да Ряза́ни нача́ша почита́ти и покланя́тися честно́му о́бразу Зна́мения, Корче́мный его́ имену́юще, и ле́пту приноша́ху на соблюде́ние пред ни́м лампа́ды неугаси́мыя. Моли́, Пресвята́я Де́во, преве́чнаго Бо́га, да не уга́снет в сердца́х на́ших о́гнь любве́ боже́ственныя, и приими́ похвалы́ сия́:

Ра́дуйся, я́ко во утро́бе Твое́й пло́ть Спаси́теля ми́ра истка́ся; ра́дуйся, я́ко благода́тию Его́ чрез Тебе́ ве́сь ми́р обогати́ся.

Ра́дуйся, любве́ духо́вныя приснотеку́щая реко́; ра́дуйся, доброде́телей непости́жная глубино́.

Ра́дуйся, безнаде́жных и отча́янных безмяте́жное приста́нище; ра́дуйся, и́щущих вспоможе́ния любоблагоутро́бное прия́телище.

Ра́дуйся, ряза́нским жи́телем по́мощь и вразумле́ние чрез ико́ну Твою́ яви́вшая; ра́дуйся, ко укрепле́нию ве́ры и исправле́нию жития́ на́с побужда́ющая.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 5.

Богоразу́мия гла́с от ико́ны Твоея́ обрати́л е́сть на пу́ть пра́вый челове́ка не́коего, ему́же прилучи́ся бы́ти в Ряза́ни. Повнегда́ пречи́стому о́бразу Зна́мения поклоне́ние то́й сотвори́, яви́ся ему́ в со́ннем виде́нии о́браз се́й, и кро́ткий гла́с Тво́й, Богоро́дице, веща́ше от него́: Се́ А́з приидо́х к тебе́, поне́же посети́л Мя́ еси́ и обрати́лся еси́ от скве́рны; и обеща́ вспоможе́ние в устрое́нии его́ попече́ний. О Цари́це многоми́лостивая, да́ждь и на́м не позна́ти за безче́стие на́ше гне́ва Твоего́, но услы́шати всепроща́ющий гла́с Тво́й, Бо́гу же воспе́ти: Аллилу́иа.

И́кос 5.

Узре́в сие́ ди́вное зна́мение, челове́к се́й, воспряну́в от дрема́ния, а́бие тече́ ко пресви́теру це́ркве преподо́бнаго Симео́на Сто́лпника и моля́ше его́, да сотвори́т благода́рственное пе́ние в хра́мине, иде́же бы́сть ему́ явле́ние Твое́, Ма́ти Бо́жия, и мно́гажды поверга́яся ни́ц, побужда́ше все́х пе́ти: О всепе́тая Ма́ти. Мы́ же, не еди́ножды то́кмо, но мно́гажды получа́юще по́мощь Твою́, благодаря́ще хвалу́ прино́сим:

Ра́дуйся, в словесе́х Бо́жиих де́нь и но́щь поуча́тися на́м приме́р пода́вшая; ра́дуйся, Арха́нгельское благове́стие во смире́нии глубо́це прия́вшая.

Ра́дуйся, обетова́нием Свята́го Ду́ха ку́пно со апо́столы обра́дованная; ра́дуйся, соше́ствием Ду́ха Свята́го свы́ше в де́нь Пятдеся́тницы всеще́дро облагода́тствованная.

Ра́дуйся, во мра́це духо́внем блужда́вшаго от пути́ поги́бельнаго отвра́щшая; ра́дуйся, алка́вшаго пра́веднаго жития́ на пу́ть покая́ния чрез ико́ну Твою́ ско́ро наста́вльшая.

Ра́дуйся, вся́ притру́дности того́ устрани́вшая и от внеза́пныя поги́бели изба́вльшая; ра́дуйся, вселюби́вая Ма́ти на́ша, покро́вом моли́тв Твои́х все́х на́с от наве́т вра́жиих покрыва́ющая.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 6.

Пропове́дует вся́ вселе́нная чу́дныя ми́лости, от ико́н Твои́х чудотво́рных явля́емыя, воспомина́ем и мы́, ка́ко ди́вно спасла́ еси́ гра́д Ряза́нь от губи́тельныя я́звы, егда́ лю́дие, стра́хом внеза́пныя сме́рти одержи́мии, притеко́ша с ве́рою и наде́ждею ко ико́не Твое́й, с пе́нием обнося́ще ю́ о́крест домо́в свои́х. И не посрами́ся ве́ра и́х в милосе́рдый покро́в Тво́й, и́бо ни еди́ному бы́сть умре́ти от боле́зни сея́ из домо́в те́х, и в ра́дости се́рдца воспе́ша лю́дие Бо́гу Спаси́телю: Аллилу́иа.

И́кос 6.

Возсия́ благода́ть от цельбоно́сныя ико́ны Твоея́ Зна́мения Корче́мныя, пред не́юже и мы́ преклоня́ем коле́на на́ша и со слеза́ми благодари́м, я́ко изба́вила еси́ толи́кия лю́ди Твоя́ от скоропости́жныя сме́рти. Изба́ви и на́с, пречу́дная Влады́чице, от сме́рти без покая́ния, и умоли́ Спаси́теля, да в ча́с кончи́ны на́шея не лиши́т на́с Пречи́стых Та́ин Свои́х. Е́й, Ма́ти Бо́жия, услы́ши на́с, да с ве́рою и любо́вию во упова́нии зове́м Ти́:

Ра́дуйся, ко́реню де́вства и цве́те чистоты́; ра́дуйся, преизя́щных доброде́телей зерца́ло.

Ра́дуйся, все́х прибега́ющих к Тебе́ с те́плою моли́твою услы́шание; ра́дуйся, от бе́д и скорбе́й, обурева́ющих на́с, ско́рое избавле́ние.

Ра́дуйся, и́ноков ко спасе́нию незри́мая Руководи́тельнице; ра́дуйся, боголю́бцев, среди́ ми́ра живу́щих, Наста́внице.

Ра́дуйся, среди́ мо́ра до́мы ве́рных Свое́ю ико́ною посети́вшая и от немину́емыя сме́рти изба́вльшая; ра́дуйся, в ве́ре глубо́цей и смире́нии упова́вших на Тя́ без вспоможе́ния не оста́вльшая.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 7.

Восхоте́ла еси́ яви́ти ди́вное милосе́рдие от ико́ны Твоея́, Ты́, о Всеми́лостивая, егда́ ве́лий бы́сть зно́й, земля́ и́зсше, бы́лие зажже́ся и возгоре́ся о́гнь ве́лий в бору́ бли́з гра́да Ряза́ни. Те́мже, о Засту́пнице, по моли́тве пред ико́ною Твое́ю Зна́мения, чуде́сно угаси́ла еси́ о́гнь се́й, и зе́млю одожди́ла еси́ преизоби́льно. Мы́ же, прославля́юще Бо́га, ди́вную пе́снь воспева́ем Ему́: Аллилу́иа.

И́кос 7.

Ди́вно угаси́ла еси́, о Богома́ти, пла́мень горя́щ бли́з гра́да Ряза́ни: ма́лую бо ту́чу от о́блак возду́шных Ты́ ско́ро отдели́ла еси́, и во́ды ея́ на о́гнь яря́щийся оби́льно одожди́ла еси́. Те́мже и мы́, о Пресвята́я Де́во, мо́лим Тя́: угаси́ пла́мень страсте́й на́ших, помози́ на́м стяжа́ти блаже́нное безстра́стие, зане́ со́здани есмы́ по о́бразу Бо́жию, но в забве́нии и безразсу́дстве предае́мся страсте́м на́шим. Сего́ ра́ди со умиле́нием Тебе́ вопие́м:

Ра́дуйся, одесну́ю Сы́на Своего́ и Бо́га стоя́щая; ра́дуйся, о ка́ющихся гре́шницех моли́твы к Бо́гу усе́рдно вознося́щая.

Ра́дуйся, умо́в на́ших от помышле́ний су́етных очище́ние; ра́дуйся, отча́янных и безнаде́жных челове́к к ти́хой и безмяте́жной жи́зни приобще́ние.

Ра́дуйся, ско́рое и многомо́щное вспоможе́ние усе́рдно Ти́ взыва́ющим; ра́дуйся, ве́ру на́шу в Тво́й благода́тный покро́в си́м чу́дом укрепля́ющая.

Ра́дуйся, моли́твенных воздыха́ний ско́рая Услы́шательнице; ра́дуйся, в исполне́нии до́брых наме́рений при́сная Помо́щнице.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 8.

Стра́нно бы́сть чу́до, егда́ челове́к не́кий, одержи́мый лю́тым неду́гом, имы́й но́зе свои́ ви́дом багря́не и зело́ уя́звлене, от враче́в никоея́ по́льзы прие́мый, прише́д ко ико́не Твое́й, умоли́ ско́рую Помо́щницу в ско́рбех, и получи́в соверше́нное исцеле́ние, паде́ ни́ц благодаря́ Тя. Уврачу́й, Цели́тельнице блага́я, и на́ша душе́вныя и теле́сныя я́звы, е́же воспе́ти на́м немо́лчную пе́снь Бо́гу: Аллилу́иа.

И́кос 8.

Вся́ возмо́жна Тебе́ су́ть, Пречи́стая, я́ко му́жа о́наго, одержи́маго лю́тою боле́знию но́г, исцели́ла еси́, и мно́гая ина́я чудеса́ вспоможе́ния призыва́ющим Тя́ с ве́рою и смире́нием сотвори́ла еси́. Та́ко и на́с покры́й покро́вом ми́лости Твоея́, умоли́ о на́с Сы́на Твоего́, да продле́но бу́дет вре́мя жи́зни на́шея на покая́ние, да остаю́щияся дни́ до кончи́ны на́шея поживе́м в чистоте́, целому́дрии и творе́нии де́л милосе́рдия, я́ко да услы́шим сла́дкий гла́с Его́, призыва́ющий благослове́нныя насле́довати Ца́рствие Бо́жие. Тебе́ же, о всепе́тая Ма́ти, со умиле́нием зове́м:

Ра́дуйся, хла́дныя ду́ши к позна́нию и́стины путьми́ неизсле́димыми приводя́щая; ра́дуйся, к исполне́нию за́поведей Бо́жиих на́с воодушевля́ющая.

Ра́дуйся, вели́чием Небе́сныя сла́вы от Святы́я Тро́ицы увенча́нная; ра́дуйся, Пресвята́я Богоро́дице, неискусому́жная Де́во и Ма́ти благосе́рдая.

Ра́дуйся, челове́ка не́коего от боле́зни но́г, па́че же и душе́вных я́зв, изба́вльшая; ра́дуйся, и на́шим душа́м, иму́щим быстродви́жное поползнове́ние ко греху́, в ратобо́рстве с ни́м вспомоществу́ющая.

Ра́дуйся, ро́да людска́го прекра́сный ве́нче и назда́ние; ра́дуйся, неизъясни́мых добро́т Правосла́вия киво́те.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 9.

Все́ упова́ние на́ше возло́жше на Тя́, Преблагослове́нная Богоро́дице, мо́лим Тя́: простри́ пречи́стеи ру́це Свои́ к Сы́ну Твоему́ и Бо́гу на́шему, бу́ди Спору́чница на́м гре́шным, окажи́ ми́лость на́м зде́ на земли́ живу́щим и введи́ на́с в страну́ го́рнюю, иде́же не́сть печа́ль, ни воздыха́ние, но А́нгельстии ли́цы непреста́нно пою́т боже́ственную пе́снь: Аллилу́иа.

И́кос 9.

Вети́и многоглаго́ливии умолка́ют и Си́лы го́рния приклоня́ют главы́ своя́ пред сла́вою Твое́ю, я́ко Ты́ еси́ Цари́ца Небесе́ и земли́, и во сла́ве Небе́сней пребыва́еши, и земна́я не оставля́еши. Се́ бо и жену́ не́кую, от лю́тыя боле́зни но́г страда́вшую и ско́рбь о уме́ршей дще́ри име́вшую, посети́ла еси́. Жена́ бо та́ повеле́ нести́ себе́ в часо́вню к пречу́дней ико́не Твое́й Зна́мения Корче́мней, и по сле́зней моли́тве в ско́ром вре́мени получи́ соверше́нное здра́вие теле́сное и поко́й душе́вный, и просла́ви Тя́, ми́лостивую Цели́тельницу. Сего́ ра́ди и мы́ похваля́ем Тя́ си́це:

Ра́дуйся, сла́ву Бо́жию в го́рнем Иерусали́ме непреста́нно зря́щая; ра́дуйся, в окруже́нии лико́в Небе́сных Престо́лу Бо́жию предстоя́щая.

Ра́дуйся, вмести́лище Ду́ха Свята́го преизря́дное; ра́дуйся, и́щущим отдохнове́ния от треволне́ний приста́нище отра́дное.

Ра́дуйся, жене́, одержи́мей ско́рбию душе́вною и но́г разслабле́нием, исцеле́ние ско́ро пода́вшая; ра́дуйся, все́м обремене́нным душе́вными и теле́сными скорбьми́ при́сно сострада́ющая.

Ра́дуйся, премилосе́рдая Ма́ти, во́лю на́шу разсла́бленную укрепля́ющая; ра́дуйся, во уны́нии мня́щих себе́ оста́влены бы́ти Бо́гом и бли́жними, утеша́ющая.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 10.

Спасе́нию все́х челове́к посо́бствуя и о то́м ве́лие попече́ние име́я, боголюби́вейший святи́тель Гаврии́л Ряза́нский повеле́ изнести́ из корче́мницы с че́стию ико́ну Твою́, о Богома́ти, и во благоукраше́нную часо́вню ка́менную при хра́ме преподо́бнаго Симео́на Сто́лпника поста́вити на поклоне́ние, да прославля́ют Тя́ вси́, о пречу́дная Цари́це, и пою́т Сы́ну Твоему́ и Бо́гу: Аллилу́иа.

И́кос 10.

Стене́ кре́пкой и огражде́нию неразори́му уподо́билася е́сть ико́на Твоя́ Зна́мения, Пречи́стая, ю́же боголюби́вии лю́дие преноша́ху из часо́вни во хра́м в понеде́льник седми́цы Све́тлыя, да воспое́тся пред ико́ною Твое́ю приве́тствие а́нгельское: Чи́стая Де́во, ра́дуйся! Тво́й Сы́н воскре́се тридне́вен от гро́ба! И си́м у́бо нача́ло полага́шеся моле́бному пе́нию в доме́х прихо́жан. Те́мже и мы́, воспомина́юще сие́, ра́достно сла́вим Тя́:

Ра́дуйся, попече́нием и моли́твами Твои́ми Це́рковь земну́ю умно́жившая; ра́дуйся, взыску́ющим со́весть незазо́рную име́ти пу́ть ко спасе́нию благоуве́тливо устро́ившая.

Ра́дуйся, десни́цею Свое́ю от искуше́ний изнемога́ющих избавля́ющая; ра́дуйся, во смире́нии живу́щим две́ри ра́йския отверза́ющая.

Ра́дуйся, святи́теля о по́льзе пренесе́ния ико́ны Твоея́ в часо́вню наста́вльшая; ра́дуйся, чудесы́ Твои́ми со́нм люде́й, по духо́вней ле́ствице восходя́щих, умно́жившая.

Ра́дуйся, я́ко возсия́ о́браз Тво́й подо́бно свети́льнику, на высо́це све́щнице стоя́щему; ра́дуйся, я́ко прославле́ние Воскресе́ния Христо́ва с сугу́бым ра́дованием о Тебе́ соедини́ся.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 11.

Пе́ние и служе́ние Бо́гу, правосла́вно приноси́мое де́лы и словесы́, покуси́ся искорени́ти дре́вний вра́г спасе́ния на́шего, зело́ ополчи́вся во Оте́честве на́шем на ве́ру христиа́нскую. Ты́ же, к Бо́гу Путеводи́тельнице, яви́ла еси́ чу́до но́вое от ико́ны Твоея́ Зна́мения Корче́мныя, да укорени́ши в лю́дех сугу́бое на Тя́ упова́ние. Егда́ пред о́бразом Твои́м моле́бен в дому́ люде́й ве́рующих соверши́ся, по окропле́нии водо́ю отрокови́ца не́кая от слепоты́ внеза́пу исцеле́. Сего́ ра́ди и мы́, я́коже не́когда о́ная, прославля́юще Тя́, воспева́ем пе́снь Бо́гови: Аллилу́иа.

И́кос 11.

Светоза́рная свеща́ ико́на Твоя́ Зна́мения Корче́мная яви́ся христиа́ном, от богобо́рцев стужа́емым, ю́же Ты́, о Богома́ти, восхоте́ла еси́ вда́ти на сохране́ние ю́ноши не́коему. Егда́ о́ный ве́рою и благогове́нием оскуде́ и по науще́нию власте́й безбо́жных со дру́ги прии́де в Симео́новский хра́м церко́вное достоя́ние изыма́ти, тогда́ узре́ на ико́не пречи́стый ли́к Тво́й, и то́тчас в себе́ саме́м премени́ся к добру́, и о́браз Тво́й спасе́ от оскверне́ния и поги́бели. Сего́ ра́ди да́же до ны́не и мы́, чту́щии Тя́, о Богома́ти, во умиле́нии серде́ц на́ших благода́рственно пред о́бразом си́м пое́м:

Ра́дуйся, та́йне крестоноше́ния от Сы́на Своего́ науче́нная; ра́дуйся, на Голго́фе Го́споду Своему́ сострада́вшая.

Ра́дуйся, Благода́тная, я́ко воскре́се Сы́н Тво́й, и на́с совоскреси́т с Собо́ю; ра́дуйся, Препросла́вленная, я́ко вси́ смире́ннии неразлу́чни бу́дут с Тобо́ю.

Ра́дуйся, слепоты́ теле́сныя исцеле́ние; ра́дуйся, очесе́м душе́вным прозре́ние.

Ра́дуйся, в но́вое свиде́тельство отрокови́це прозре́ние от слепоты́ дарова́вшая; ра́дуйся, ю́ношу, в ве́ре оскуде́вшаго, во ору́дие спасе́ния чудотво́рныя Твоея́ ико́ны прему́дро избра́вшая.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 12.

Благода́ть чрез ико́ну Твою́ Зна́мения Корче́мную на ро́ды христиа́н излива́ти промышля́ющи, о Богома́ти, внуши́ла еси́ в годи́ну безбо́жия но́вому храни́телю о́браза Твоего́ архимандри́ту А́велю понови́ти его́. О́н же, возыме́в горя́чее о то́м попече́ние, посла́ проше́ние изогра́фу не́коему, де́ньми ве́тхому, благоче́стием же кре́пкому. Егда́ же ве́сть о слепоте́ его́ прия́т, усе́рдно моля́ше Тя́, Богоро́дице, устро́ити де́ло сие́, я́коже Ти́ благоуго́дно бу́дет. Ты́ же, о Всеблага́я, исцеле́ние от слепоты́ изогра́фу дарова́вши, помогла́ еси́ ему́ о́браз Тво́й понови́ти и спи́сок с него́ сотвори́ти, да мно́зии лю́дие просла́вят Тя́ о се́м чудеси́ и воспою́т Сы́ну Твоему́ и Бо́гу: Аллилу́иа.

И́кос 12.

Пою́ще Твоя́ ми́лости и чудеса́, да́же до ны́не явля́емыя ве́рным рабо́м Твои́м, покланя́емся преди́вному о́бразу Твоему́, явле́нному во гра́де Ряза́ни, и мо́лим Тя́ со слеза́ми: научи́ на́с, что́ сотвори́м, да уго́дни бу́дем Бо́гу и Тебе́, о всеми́лостивая Ма́ти. Мы́ же, не иму́щии не то́кмо де́л, но и слове́с благи́х, что́ воздади́м Тебе́ за вся́ благодея́ния Твоя́? Оба́че наде́ющеся на ми́лость Твою́, сла́вим Тя́ со умиле́нием:

Ра́дуйся, Небесе́ и земли́ примире́нию чу́дно послужи́вшая; ра́дуйся, Изба́вителя ми́ра, Спаси́теля на́шего, пло́тию породи́вшая.

Ра́дуйся, всесве́тлая звездо́, сия́нием души́ Твоея́ ми́р ско́рбный озаря́ющая; ра́дуйся, Цари́це Небесе́ и земли́, в безконе́чныя ве́ки ца́рствующая.

Ра́дуйся, рабо́в Бо́жиих среди́ мра́ка и страда́ний укрепля́ющая и возвеселя́ющая; ра́дуйся, попече́ние о поновле́нии о́браза Твоего́ прему́дро яви́вшая.

Ра́дуйся, серде́чную моли́тву пла́менныя ве́ры ста́рца А́веля прия́вшая; ра́дуйся, неудо́бь исполни́мое де́ло во спасе́ние мно́гих чуде́сно устро́ившая.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 13.

О Пресвята́я Влады́чице, Де́во Богоро́дице, Ма́ти Го́спода и Бо́га на́шего Иису́са Христа́! К Тебе́ припа́даем и мо́лим Тя́: услы́ши на́с и яви́ на́м ми́лости Твоея́ зна́мение, изба́ви ны́, рабы́ Твоя́, от неду́гов душе́вных и теле́сных в жи́зни се́й, а в ве́це бу́дущем сотвори́ насле́дники бы́ти Ца́рствия Небе́снаго, да просла́вим безме́рное милосе́рдие Твое́ к на́м недосто́йным, и воспое́м Бо́гу херуви́мскую пе́снь: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Арха́нгели и А́нгели и все́ во́инство Си́л безпло́тных немо́лчно славосло́вят и слу́жат Ти́, главы́ своя́ приклоня́юще: мы́ же гре́шнии недоуме́ем, ка́ко восхвали́ти Тя́ по достоя́нию. Оба́че дерза́юще со упова́нием на благосе́рдие Твое́, прино́сим Ти́ похвалы́ сия́:

Ра́дуйся, рождество́м Твои́м ми́р го́рний с до́льним возвесели́вшая; ра́дуйся, благослове́нная Отрокови́це, по степе́нем хра́ма ники́мже держи́ма возше́дшая.

Ра́дуйся, по обетова́нию роди́телей Твои́х во хра́ме Иерусали́мстем воспита́нная; ра́дуйся, в дому́ Бо́жии моли́тве и богомы́слию науче́нная.

Ра́дуйся, пи́щу из ру́к Арха́нгельских приима́вшая; ра́дуйся, наставле́ния свы́ше в се́рдце Свое́м благогове́йно слага́вшая.

Ра́дуйся, я́ко житие́ Твое́ при хра́ме проо́браз жития́ и́ноческаго яви́ся; ра́дуйся, я́ко ро́д челове́ческий Тобо́ю, а́ки сокро́вищем неветша́ющим, обогати́ся.

Ра́дуйся, Благода́тная, чу́дным зна́мением ми́лость Бо́жию явля́ющая.

Конда́к 1.

Взбра́нной Воево́де победи́тельная, Цари́це Небесе́ и земли́, похва́льная песнопе́ния прино́сим Ти́, Богороди́тельнице. Ты́ же, я́ко иму́щая держа́ву непобеди́мую, от вся́ких зо́л сохрани́ на́с и гра́д на́ш, да зове́м Ти́:

Ра́дуйся, Благода́тная, чу́дным зна́мением ми́лость Бо́жию явля́ющая.

Моли́тва.

О Пресвята́я Влады́чице на́ша Богоро́дице, Богоизбра́нная Отрокови́це и Царя́ Небе́снаго Ма́ти! Ненаде́жных наде́яние, больны́х исцеле́ние, си́рым Предста́тельнице, скорбя́щим ра́досте и утеше́ние, оби́димым Покрови́тельнице, и все́м в беда́х и напа́стех су́щим ско́рое поможе́ние и заступле́ние! Помози́, о Ма́ти Бо́жия, и на́м гре́шным в ско́рби на́шей, возвесели́ сердца́ люде́й Твои́х ра́достию, упра́ви жи́знь на́шу в ми́ре и тишине́, и изба́ви на́с от вся́кия печа́ли и отча́яния. О Всеблага́я Ма́ти, Ты́ еси́ еди́на Предста́тельница на́ша ко Го́споду па́че все́х святы́х и все́х го́рних умо́в! Те́мже и мы́ гре́шнии, на пречи́стый о́браз Тво́й Зна́мения Корче́мный взира́юще, умиле́нно преклоня́ем коле́на серде́ц на́ших и, благогове́йно лобыза́юще его́, мо́лим Тя́: не отри́ни смире́ннаго моле́ния на́шего и яви́ на́м ми́лости Твоея́ зна́мение, и́бо никто́же, со упова́нием к Тебе́ прибега́яй, исхо́дит от Тебе́ посра́млен, но, прие́мля да́р благода́ти к поле́зному проше́нию, прославля́ет Сы́на Твоего́ и Бо́га, и Тя́ с Ни́м, о Ма́ти Бо́жия, всегда́, ны́не и при́сно, и во ве́ки веко́в. Ами́нь.