Акафистник

Помочь сайту
·
·
·
·

Акафист покаяния, или песни, приводящие человека к сознанию своей греховности

Составил монах Геронтий, печатается по изданию типографии Киево-Печерской Успенской Лавры. 1911

Конда́к 1.

А́з е́смь пучи́на греха́ и бла́то вся́кия нечистоты́, а́з е́смь храни́лище все́х злы́х и безме́стных дея́ний: увы́ мне́, увы́ мне́, Бо́же мо́й, увы́ мне́, Тво́рче и Созда́телю мо́й, увы́ мне́, Све́те души́ моея́! Что́ возглаго́лю Ти́, уда́ливший себе́ от лица́ Твоего́, или́ что́ реку́ Ти́, отве́ргший себе́ от о́чию све́та Твоего́? Преступи́х бо за́поведь Твою́, я́коже и Ада́м испе́рва, и николи́же принесо́х Ти́ же́ртвы покая́ния; ны́не же, позна́в паде́ние свое́, из глубины́ души́ моея́ в покая́нии зову́ Ти́, Ми́лостиве:

Поми́луй мя́, Го́споди Бо́же мо́й, и к покая́нию призови́ мя́, па́дшаго.

И́кос 1.

Бо́г мо́й еси́ Ты́, Творе́ц и Созда́тель мо́й, Храни́тель живота́ моего́ и Засту́пник мо́й; а́з же е́смь созда́ние Твое́ и де́ло руку́ Твое́ю. Но увы́ мне́! Прароди́тельный гре́х ца́рствует во мне́, и зла́я во́ля моя́ госпо́дствует надо мно́ю, и а́з, я́ко ра́б, вы́ну рабо́таю греху́ и те́м прогневля́ю Тебе́, Влады́ку и Бо́га моего́; но, припа́дая Твое́й бла́гости, смире́нно молю́ Тя́, Ще́дре:

Поми́луй мя́, Тво́рче мо́й пресла́вный; поми́луй мя́, Созда́телю мо́й преди́вный.

Поми́луй мя́, Бо́же мо́й Предве́чный; поми́луй мя́, Го́споди мо́й пребезсме́ртный.

Поми́луй мя́, Влады́ко мо́й преми́лостивый; поми́луй мя́, Царю́ мо́й прекре́пкий.

Поми́луй мя́, воззва́вый мя́ от небытия́ в бытие́; поми́луй мя́, вдохну́вый в те́ло мое́ ду́х безсме́ртия.

Поми́луй мя́, почты́й мя́ Свои́м о́бразом и подо́бием; поми́луй мя́, вознесы́й мя́ превы́ше все́х ви́димых.

Поми́луй мя́, да́руяй мне́ ве́дение познава́ти Тя́ и люби́ти Тя́; поми́луй мя́, животворя́й мя́ Свое́ю благода́тию.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 2.

Влады́ко мо́й и Го́споди, ка́ко приступлю́ к Тебе́ а́з, погруже́нный грехми́ мно́гими, ко́има очи́ма воззрю́ на Тя́, пресве́тлаго Творца́ моего́, ко́е принесу́ Ти́ покая́ние? А́ще бо воспла́чуся, оскверню́ то́кмо зе́млю слеза́ми мои́ми, а́ще воздохну́, я́ко мыта́рь, непщу́ю отягчи́ти небеса́. Оба́че же покая́нием очи́сти мя́ от вся́кия скве́рны и ду́шу мою́ уясни́ све́том ми́лостиваго лица́ Твоего́, да ра́достно зову́ Ти́: Аллилу́иа.

И́кос 2.

Глаго́лы у́ст Твои́х вы́ну презрева́х, во сле́д бо писа́ний Твои́х николи́же ходи́х, но со тща́нием соблюда́х во́лю диа́волю, и в сле́д злы́я по́хоти моея́ усе́рдно ходи́х; ны́не же, го́рце позна́вый паде́ние свое́, со слеза́ми ищу́ Тебе́, незаходи́маго Све́та моего́, в покая́нии зовя́:

Поми́луй мя́, в беззако́ниих зача́таго; поми́луй мя́, во гресе́х рожде́ннаго.

Поми́луй мя́, блу́дно жи́знь ижди́вшаго; поми́луй мя́, нераде́вшаго о спасе́нии свое́м.

Поми́луй мя́, не тща́щагося благоугожда́ти Тебе́; поми́луй мя́, творя́щаго вы́ну во́лю свою́, па́че же диа́волю.

Поми́луй мя́, удали́вшагося от Тебе́, присносу́щнаго Све́та моего́; поми́луй мя́, заблу́ждшаго в пусты́ни страсте́й мои́х.

Поми́луй мя́, отчужди́вшагося Твоея́ благода́ти; поми́луй мя́, преда́вшаго ду́шу свою́ во тьму́ грехо́вную.

Поми́луй мя́, престу́пника зако́на Твоего́; поми́луй мя́, наруши́теля за́поведей Твои́х.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 3.

Добро́ и пра́ведно е́сть е́же не удали́тися от Тебе́, Исто́чника све́та, но тьма́ грехо́вная, ю́же а́з привлеко́х на себе́ злы́ми дея́нии мои́ми, нахо́дит на мя́, я́коже но́щь, и помрача́ющи ду́шу мою́, отво́дит мя́ от Тебе́, Бо́га моего́: но молю́ Тя́, Созда́телю мо́й, блесни́ мо́лниею и разжени́ мра́к мои́х страсте́й, да во све́те Твое́м узрю́ све́т, благода́рственно поя́: Аллилу́иа.

И́кос 3.

Естество́ зако́на преидо́х, окая́нный, согреши́х бо а́з грехми́, и́хже неле́ть и глаго́лати; но Ты́, Бо́же, я́ко Сердцеве́дец и прови́дяй вся́, не объяви́ моя́ та́йная пред А́нгелы Твои́ми, ниже́ вве́рзи мене́ в де́брь о́гненную, но, пощади́в, прости́ ми́ вся́ зла́я сия́, мно́ю соде́янная, вопию́щему Ти́:

Поми́луй мя́, оскверне́ннаго грехи́ мно́гими; поми́луй мя́, всели́вшагося во а́д вме́сто рая́.

Поми́луй мя́, возлю́бльшаго па́че тму́, не́же све́т; поми́луй мя́, вве́ргшагося во о́гненную пе́щь страсте́й.

Поми́луй мя́, оскорби́вшаго Тя́ неподо́бными глаго́лы; поми́луй мя́, преслу́шавшаго Твоя́ повеле́ния.

Поми́луй мя́, осуди́вшаго бли́жняго моего́; поми́луй мя́, оклевета́вшаго бра́та моего́.

Поми́луй мя́, не возда́вшаго Тебе́ обе́тов мои́х; поми́луй мя́, не сохра́ншаго за́поведей духо́внаго моего́ отца́.

Поми́луй мя́, призыва́вшаго и́мя Твое́ всу́е; поми́луй мя́, ничто́же бла́го пред Тобо́ю сотво́ршаго.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 4.

Жи́знь су́щи и Исто́чник жи́зни, Живонача́льная Тро́ице, Неразде́льное и Несли́тное Божество́, О́тче, Сы́не и Ду́ше Святы́й, при́зри на мя́, сотворе́ннаго по о́бразу и по подо́бию Твоему́, обнови́ мо́й ра́зум, сло́во испра́ви и ду́х мо́й освяти́, да во обновле́ннем трехча́стном мое́м существе́ разу́мно пою́: Аллилу́иа.

И́кос 4.

Земля́ е́смь а́з и в зе́млю отыду́, от нея́же взя́т е́смь, я́коже Са́м глаго́лал еси́, Созда́телю мо́й пресла́вный, но пре́жде не́же на́йдет сме́рть на мя́, пре́жде не́же вни́ду во гро́б, взира́я на беззако́нную жи́знь мою́, со слеза́ми зову́ Ти́, Творцу́ моему́:

Поми́луй мя́, помраче́ннаго страстьми́; поми́луй мя́, заблужда́ющаго в путе́х мои́х.

Поми́луй мя́, побежда́ющагося ску́постию; поми́луй мя́, снеда́емаго за́вистию.

Поми́луй мя́, согреши́вшаго Ти́ объяде́нием без сы́тости; поми́луй мя́, прогне́вавшаго Тя́ опи́вством чрезме́рным.

Поми́луй мя́, не напита́вшаго а́лчущаго; поми́луй мя́, не напои́вшаго жа́ждущаго.

Поми́луй мя́, не лю́бящаго бра́та моего́; поми́луй мя́, не почита́вшаго не́когда роди́телей свои́х.

Поми́луй мя́, согреши́вшаго Ти́ де́лом, сло́вом и помышле́нием; поми́луй мя́, прогне́вавшаго Тя́ во́льными и нево́льными злы́ми дея́нии мои́ми.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 5.

Иде́же Ты́ хо́щеши, Всемогу́щий Бо́же, побежда́ется естества́ чи́н: естество́ мое́ вы́ну влече́т мя́ ко греху́ и порабоща́ет мя́, но Ты́, я́ко Созда́тель естества́, угаси́ грехо́вная стремле́ния его́, обнови́в е́ росо́ю благода́ти Твоея́, да невозбра́нно пою́ Тебе́: Аллилу́иа.

И́кос 5.

Кто́ согреши́ когда́, я́коже согреши́х а́з, окая́нный? Ко́его греха́ не сотвори́х? Ко́его беззако́ния не соде́ях? Ко́его зла́ не вообрази́х в души́ мое́й? О лю́те мне́, лю́те мне́, что́ бу́ду и где́ обря́щуся а́з? Но пре́жде о́наго пра́веднаго воздая́ния Твоего́, смире́нно молю́ Тя́, Ми́лостивый Бо́же, я́коже отца́ блу́дный сы́н:

Поми́луй мя́, окая́ннаго; поми́луй мя́, немилосе́рднаго.

Поми́луй мя́, жесто́каго; поми́луй мя́, гневли́ваго.

Поми́луй мя́, тщесла́внаго; поми́луй мя́, го́рдаго.

Поми́луй мя́, скве́рнаго; поми́луй мя́, блу́днаго.

Поми́луй мя́, кова́рнаго; поми́луй мя́, памятозло́бнаго.

Поми́луй мя́, окамене́ннаго се́рдцем; поми́луй мя́, сожже́ннаго со́вестию.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 6.

Лучи́ благода́ти Твоея́ не скры́й от мене́, Тво́рче и Созда́телю мо́й, но облиста́й мя́ и́ми, просвети́ ми́лостивое лице́ Твое́ на мя́, раба́ Твоего́, и научи́ мя́ твори́ти во́лю Твою́, да во благи́х де́лех мои́х ра́достно пою́ Тебе́, Небе́сному Отцу́ моему́: Аллилу́иа.

И́кос 6.

Мра́чная и безлу́нная но́щь грехо́внаго моего́ жития́ соде́ла во мне́ мно́гая мно́жества прегреше́ний, и́же отчужди́ша мя́ от Тебе́, Присносу́щнаго Све́та моего́, и прибли́зиша мя́ ко а́ду преиспо́днейшему, его́же жже́ние и мра́к ужаса́ют мя́ и ны́не. Ра́йская же жили́ща Твоя́, угото́ванная пра́ведным, и блаже́нство в ни́х живу́щих исполня́ют ду́шу мою́ ско́рбию, я́ко удале́н е́смь от сея́ присносу́щныя жи́зни. Но доко́ле жи́в е́смь и ду́х мо́й во мне́, не лише́н е́смь све́тлыя сия́ наде́жды, пламене́я бо к Тебе́ любо́вию, от се́рдца зову́ Ти́:

Поми́луй мя́, лени́ваго; поми́луй мя́, неблагода́рнаго.

Поми́луй мя́, праздносло́вца; поми́луй мя́, скверносло́вца.

Поми́луй мя́, смехотво́рца; поми́луй мя́, сребролю́бца.

Поми́луй мя́, клятвопресту́пника; поми́луй мя́, пия́ницу.

Поми́луй мя́, прекосло́внаго; поми́луй мя́, непокори́ваго.

Поми́луй мя́, лжи́ваго; поми́луй мя́, льсти́ваго.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 7.

На не́бо о́чи мои́ возвожу́ и ду́хом ве́сь предстою́ Ти́, О́тче Небе́сный, но естество́ бре́ния влече́т мя́ до́лу, и грехи́ мно́зи влеку́т ду́шу в преиспо́днюю. Ты́ же, Тво́рче и Созда́телю мо́й, я́ко Всемогу́щий и Милосе́рдый, обнови́ мя́, да воспаря́ю вы́ну горе́, я́коже оре́л, побе́дно взыва́я Ти́ пе́снь: Аллилу́иа.

И́кос 7.

О́ко и́мам вы́ну лука́во, ме́рзости и вся́кия нечистоты́ преиспо́лнено, Бо́же мо́й и Тво́рче: смотря́х вы́ну неподо́бная, преле́стною красото́ю ми́ра сего́ восхища́хся и вдая́х ду́шу мою́ во вся́ку нечистоту́. На добро́ту же веще́й ми́ра сего́, от ни́х же поуча́лся бы́х познава́ти и люби́ти Тя́, николи́же очи́ма мои́ма взира́х, ны́не же, егда́ поме́ркнуша душе́внеи мои́ о́чи, в слепоте́ духо́вней сы́й, зову́ Тебе́, Све́ту моему́:

Поми́луй мя́, покая́нно Тебе́ взыва́ющаго; поми́луй мя́, сокруше́нным се́рдцем к Тебе́ припа́дающаго.

Поми́луй мя́, ве́рою Тебе́ покланя́ющагося; поми́луй мя́, любо́вию Тебе́ моля́щагося.

Поми́луй мя́, принося́щаго Ти́, я́ко сле́зы, глаго́лы моя́; поми́луй мя́ и не отве́ржи мене́ от лица́ Твоего́.

Поми́луй мя́ и пода́ждь ми́ исто́чник сле́з, да пла́чуся де́л мои́х го́рько; поми́луй мя́ и изведи́ ду́шу мою́ из темни́цы страсте́й.

Поми́луй мя́ и ду́х пра́в обнови́ во утро́бе мое́й; поми́луй мя́ и возста́ви во мне́ о́браз Тво́й.

Поми́луй мя́, Све́те мо́й, и просвети́ душе́внеи мои́ о́чи; поми́луй мя́ и сотвори́ мя́ хра́мом Твоего́ обита́ния.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 8.

Пла́мень любве́ моея́ к Тебе́, Созда́телю мо́й, не до конца́ еще́ угасе́ во мне́, но ду́х мо́й вы́ну пламене́ет к Тебе́, Первоо́бразу моему́: сле́зы умиле́ния и ра́дости о Тебе́ не изсо́хша еще́ во мне́ до конца́, но, я́ко о́блако дожде́вное в за́суху и́нде нахо́дят на мя́ и ороша́ют мя́; лука́вство же, гнездя́щееся во мне́, и су́етность ми́ра сего́, окружа́ющая мя́, поглоща́ют сия́; оба́че же, а́ще коли́ждо на́йдет на мя́ мину́та благода́ти, вы́ну воспева́ю Тебе́, Исто́чниче живота́ моего́: Аллилу́иа.

И́кос 8.

Ра́зумом мои́м николи́же досто́йная разуме́х, Ра́зуме неуразуме́нный, вы́ну же заблужда́х в безпу́тиих жи́зни моея́ и предава́х себе́ в ру́це разбо́йников, и́же обнажи́ша мя́ оде́жды нетле́ния, ю́же да́л ми́ еси́ при креще́нии мое́м, и ны́не предстою́ Ти́ наги́й и отпа́дший дру́жбы Твоея́; оба́че же, дерза́я, покая́нно Тебе́ взыва́ю:

Поми́луй мя́ и испра́ви пу́ть мо́й пред Тобо́ю; поми́луй мя́ и не вни́ди в су́д с рабо́м Твои́м.

Поми́луй мя́ и не пре́зри мя́, обнища́вшаго благи́ми де́лы; поми́луй мя́ и не возда́ждь ми́ по дело́м мои́м в Де́нь Су́дный.

Поми́луй мя́ и очи́сти мя́ от вся́каго де́йства диа́вола; поми́луй мя́ и оста́ви ми́ мно́жество грехо́в мои́х.

Поми́луй мя́ и свободи́ мя́ мучи́тельства ца́рствующих во мне́ страсте́й; поми́луй мя́ и наста́ви мя́ на пу́ть покая́ния.

Поми́луй мя́ и пода́ждь ми́ ра́зум твори́ти во́лю Твою́; поми́луй мя́ и взыщи́ мя́, заблу́ждшее Твое́ овча́.

Поми́луй мя́ и сопричти́ мя́ овца́м избра́ннаго Твоего́ ста́да.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 9.

Сло́во не довле́ет ми́, пречу́дный Царю́ и Го́споди, пода́ждь ми́ сле́зы покая́ния и по си́х сле́зы умиле́ния, я́ко да и́ми омы́ю скве́рну души́ моея́, ю́же а́з оскверни́х злы́ми и безме́стными дея́нии мои́ми, да в чистоте́ души́ моея́ ра́достно пою́ Тебе́, Бо́гу моему́: Аллилу́иа.

И́кос 9.

Те́ло мое́ пита́ю простра́нно, ду́х же мо́й истаява́ет гла́дом, о Го́споди мо́й, Го́споди! Да́ждь ми́ разуме́ти мое́ беззако́ние, да́ждь ми́ тща́ние насыща́ти ду́х мо́й благи́ми де́лы, да́ждь ми́ поне́ отны́не положи́ти нача́ло своего́ спасе́ния, зову́щему Ти́ во гла́де своего́ ду́ха:

Поми́луй мя́, Му́дросте недомы́слимая; поми́луй мя́, Божество́ неопи́санное.

Поми́луй мя́, Си́ло непобеди́мая; поми́луй мя́, Сла́во превознесе́нная.

Поми́луй мя́, Красото́ пресве́тлая; поми́луй мя́, Соверше́нство неизсле́димое.

Поми́луй мя́, Высото́ недостижи́мая; поми́луй мя́, Ми́лосте безконе́чная.

Поми́луй мя́, всемогу́щий Власти́телю; поми́луй мя́, небе́сных чино́в держа́вный Повели́телю.

Поми́луй мя́, Трисо́лнечный и Трисия́нный Све́те; поми́луй мя́, О́тче, Сы́не и Ду́ше Святы́й.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 10.

Утро́ба моя́ распаля́ется к Тебе́ любо́вию, Тво́рче небесе́ и земли́, и ду́х мо́й возно́сится к Тебе́ в превы́спренняя, но увы́ мне́, увы́! О окая́нства моего́ и несоверше́нства! Вся́ сия́ погубля́ю во еди́ном часе́, преступи́в за́поведи Твоя́; оба́че, а́ще и ра́тую греху́, но пою́ Тебе́: Аллилу́иа.

И́кос 10.

Хище́нием и непра́вдою бога́т е́смь а́з, кова́рством и студодея́нием порабоще́н, лжа́ и ле́сть не оскуде́ша от мене́, за́вистию снеда́юся и ску́постию побежда́юся, и все́м беззако́нием, я́ко ра́б, усе́рдно служу́. Но Ты́, Ми́лостивый Созда́телю мо́й, отжени́ вся́ зла́я сия́ от мене́, с любо́вию и тре́петом в покая́нии Тебе́ зову́щаго:

Поми́луй мя́, весе́лие мое́ и ра́дование; поми́луй мя́, наде́ждо моя́ пресла́вная.

Поми́луй мя́, сокро́вище мое́ нетле́нное; поми́луй мя́, бога́тство мое́ неистощи́мое.

Поми́луй мя́, просвеще́ние ума́ моего́ и се́рдца; поми́луй мя́, здра́вие души́ моея́ и телесе́.

Поми́луй мя́, Наста́вниче мо́й предо́брый; поми́луй мя́, Храни́телю мо́й преблаги́й.

Поми́луй мя́, и́стинное ра́дование пла́чущих; поми́луй мя́, прибе́жище на́ше и упова́ние.

Поми́луй мя́, изглажда́яй неподо́бная на́ша дея́ния; поми́луй мя́, огражда́яй на́с святы́ми Твои́ми А́нгелы.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 11.

Целому́дрие нару́шив а́з, окая́нный, от нача́ла дне́й ю́ности моея́, отто́ле е́смь смире́нный ра́б сего́ греха́. Ки́й ви́д его́ не сотвори́х, ко́его от си́х беззако́ний не соде́ях? Вся́кое чу́вство души́ моея́ и вся́кий у́д телесе́ моего́ оскверни́х, растли́х и непотре́бен сотвори́х; но молю́ Тя́, незло́биве Го́споди, изба́ви мя́ блу́дных страсте́й пло́ти моея́, зову́щаго Ти́: Аллилу́иа.

И́кос 11.

Чистоты́ душе́вныя не стяжа́х и ду́шу мою́ во тму́ грехо́вную преда́х: о лю́те мне́, лю́те мне́! Разбо́йник е́смь а́з души́ моея́, изра́них бо ю́ до конца́, и не́сть ме́ста це́ла в не́й; совлеко́х ю́ оде́жды Боготка́нныя и облеко́х ю́ в ри́зу раздра́нную и оскверне́нную от окая́нства моего́! Что́ возглаго́лю Ти́, О́тче Ще́дрый, или́ что́ реку́ Ти́ во оправда́ние мое́, Судие́ Пра́веднейший? Оба́че же, я́ко навыко́х, прошу́ у Тебе́ поми́лования, го́рце зову́щи:

Поми́луй мя́, пламенногоря́щая Любы́; поми́луй мя́, вы́ну светя́щая Прему́дросте.

Поми́луй мя́, Сокро́вище благи́х; поми́луй мя́, жи́зни Пода́телю.

Поми́луй мя́, везде́ Сы́й и вся́ исполня́яй; поми́луй мя́, творя́й ди́вная чудеса́.

Поми́луй мя́, предве́дый не су́щая я́ко су́щая; поми́луй мя́, не оставля́яй на́с посреде́ греха́ и сме́рти.

Поми́луй мя́, оживля́яй ме́ртвыя ду́хом; поми́луй мя́, очища́яй оскверне́нныя со́вестию.

Поми́луй мя́, призира́яй на воздыха́ния на́ша к Тебе́; поми́луй мя́, полага́яй ми́лость Свою́ на все́х де́лех руку́ Твое́ю.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 12

Широто́ю благода́ти Твоея́, Триипоста́сный Бо́же, покры́й моя́ согреше́ния, я́коже покры́л еси́ дре́вле согреше́ния богоотца́ Дави́да, и приими́ мое́ покая́ние, я́коже прия́л еси́ покая́ние Манасси́и царя́, и призови́ мя́, заблужда́ющаго в путе́х свои́х, я́коже призва́л еси́ гони́теля Па́вла, и да́ждь ми́ с любо́вию вы́ну воспева́ти Тебе́: Аллилу́иа.

И́кос 12.

Ю́ность моя́ про́йде в неразу́мии и нача́ло живота́ моего́ в ле́ности к доброде́тели. Не насади́х бо тогда́ в се́рдце мое́м се́мена хле́ба духо́внаго, пита́ющаго в жи́знь ве́чную, Бо́же мо́й и Го́споди, се́мена же те́рния и ре́пия приле́жно в себе́ посева́х. Ны́не же, егда́ прозябо́ша во мне́ вся́ зла́я сия́, пронза́ют ду́шу мою́ и ураня́ют се́рдце мое́, и все́ естество́ мое́ исполня́ют боле́знию. Умилосе́рдися, о Бо́же мо́й, и попали́ огне́м Божества́ Твоего́ вся́ грехо́вная те́рния во мне́, взыва́ющем Ти́ боле́зненно:

Поми́луй мя́, О́тче Безнача́льне, Сы́не Предве́чне и Ду́ше Присносу́щне; поми́луй мя́, Тро́ице Единосу́щная и Неразде́льная.

Поми́луй мя́, Триипоста́сная Держа́во; поми́луй мя́, Неразде́льное и Несли́тное Божество́.

Поми́луй мя́, еди́но Ца́рство и Госпо́дство; поми́луй мя́, еди́на во́ля и хоте́ние.

Поми́луй мя́, Его́же боя́тся и трясу́тся Херуви́ми; поми́луй мя́, пред Ни́мже закрыва́ют ли́ца своя́ стра́шнии Серафи́ми.

Поми́луй мя́, Его́же бои́тся со́лнце и трепе́щет луна́; поми́луй мя́, пред Ни́мже дымя́тся го́ры и бегу́т вспя́ть ре́ки.

Поми́луй мя́, пред Ни́м же вся́ко коле́но небе́сных, земны́х и преиспо́дних преклоня́ется; поми́луй мя́, Его́же вся́ тва́рь на небеси́ и на земли́ вы́ну славосло́вит.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 13.

Я́ко Творе́ц Всемогу́щий и Влады́ко незло́бивый, не помяни́ мои́х беззако́ний, и́миже Тебе́ прогне́вах, де́лом, сло́вом и помышле́нием, ве́дением и неве́дением, вся́ мне́, я́ко Бо́г Ми́лостив, прости́ и разреши́ от ни́х, изле́й на мя́, я́ко ка́пли дожде́вныя, благода́ть Твою́, да поне́ от ны́не начну́ благоугожда́ти Тебе́, Созда́телю моему́, вы́ну воспева́я: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Бо́г мо́й еси́ Ты́, Творе́ц и Созда́тель мо́й, Храни́тель живота́ моего́ и Засту́пник мо́й; а́з же е́смь созда́ние Твое́ и де́ло руку́ Твое́ю. Но увы́ мне́! Прароди́тельный гре́х ца́рствует во мне́, и зла́я во́ля моя́ госпо́дствует надо мно́ю, и а́з, я́ко ра́б, вы́ну рабо́таю греху́ и те́м прогневля́ю Тебе́, Влады́ку и Бо́га моего́; но, припа́дая Твое́й бла́гости, смире́нно молю́ Тя́, Ще́дре:

Поми́луй мя́, Тво́рче мо́й пресла́вный; поми́луй мя́, Созда́телю мо́й преди́вный.

Поми́луй мя́, Бо́же мо́й Предве́чный; поми́луй мя́, Го́споди мо́й пребезсме́ртный.

Поми́луй мя́, Влады́ко мо́й преми́лостивый; поми́луй мя́, Царю́ мо́й прекре́пкий.

Поми́луй мя́, воззва́вый мя́ от небытия́ в бытие́; поми́луй мя́, вдохну́вый в те́ло мое́ ду́х безсме́ртия.

Поми́луй мя́, почты́й мя́ Свои́м о́бразом и подо́бием; поми́луй мя́, вознесы́й мя́ превы́ше все́х ви́димых.

Поми́луй мя́, да́руяй мне́ ве́дение познава́ти Тя́ и люби́ти Тя́; поми́луй мя́, животворя́й мя́ Свое́ю благода́тию.

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Конда́к 1.

А́з е́смь пучи́на греха́ и бла́то вся́кия нечистоты́, а́з е́смь храни́лище все́х злы́х и безме́стных дея́ний: увы́ мне́, увы́ мне́, Бо́же мо́й, увы́ мне́, Тво́рче и Созда́телю мо́й, увы́ мне́, Све́те души́ моея́! Что́ возглаго́лю Ти́, уда́ливший себе́ от лица́ Твоего́, или́ что́ реку́ Ти́, отве́ргший себе́ от о́чию све́та Твоего́? Преступи́х бо за́поведь Твою́, я́коже и Ада́м испе́рва, и николи́же принесо́х Ти́ же́ртвы покая́ния; ны́не же, позна́в паде́ние свое́, из глубины́ души́ моея́ в покая́нии зову́ Ти́, Ми́лостиве:

Поми́луй мя́, Го́споди Бо́же мо́й, и к покая́нию призови́ мя́, па́дшаго.

Моли́тва пе́рвая.

К Тебе́, Влады́ко Многоми́лостиве, Триипоста́сный Бо́же, возвожу́ о́чи ума́ моего́ и се́рдца и, припа́дая Твое́й бла́гости, смире́нно испове́дую грехи́ моя́, я́же сотвори́х во вся́ дни́ живота́ моего́. Согреши́х бо, Го́споди, согреши́х а́з, окая́нный, преступи́х спаси́тельныя за́поведи Твоя́, я́же дарова́л ми́ еси́, во е́же и́ми восходи́ти к Тебе́, я́коже не́киим незаблу́дным путе́м. А́з же, окая́нный, вме́сто е́же ше́ствовати путе́м си́м, путе́м Боже́ственныя Твоея́ пра́вды и и́стины, удали́хся в распу́тия и устрани́хся с и́стиннаго пути́, и та́мо самово́льне вда́хся в ру́це мы́сленных разбо́йников, страсте́й души́ моея́, и́же совлеко́ша мя́ оде́жды нетле́ния, ура́ниша всего́ мя́ ра́нами, уязви́ша ду́шу мою́ я́звами и всего́ мя́ оскверни́ша, и ны́не, я́коже зри́ши, предстою́ Ти́ на́г, уя́звлен, оскверне́н, и того́ ра́ди отпа́дый любве́ Твоея́.

Го́споди мо́й, Го́споди, что́ возглаго́лю Ти́, или́ что́ реку́ Ти́; не́сть ни еди́наго мне́ оправда́ния, ниже́ извине́ния: еда́ не позна́х зако́на Твоего́, еда́ не ве́дех за́поведей Твои́х? Вся́ сия́ разуме́х от ю́ности моея́, но небреже́ния моего́ ра́ди, уны́ния и нераде́ния, ничто́же бла́го пред Тобо́ю сотвори́х, вы́ну же содева́х лука́вое и зло́е, вы́ну пло́ти моея́ и злы́м вожделе́нием мои́м, я́ко ра́б, рабо́тах приле́жно, но Тебе́, Созда́телю моему́, николи́же ничи́мже досто́йно послужи́х.

Ны́не же, приступа́я к Тебе́, щедрода́тельному Отцу́, я́ко блу́дный сы́н, вопию́ Ти́: согреши́х, О́тче, на не́бо и пред Тобо́ю и уже́ не́смь досто́ин нарещи́ся сы́н Тво́й. Ве́м же, я́ко прия́л еси́ блу́днаго сы́на, та́ко прии́меши и мене́, о́н бо бе́ о́браз мне́, и се́й блу́дный сы́н е́смь а́з са́м. Кто́ бо когда́ удали́хся от Тебе́ та́ко дале́че, я́коже удали́хся а́з, или́ кто́ сотвори́х толи́ко беззако́ний, я́коже сотвори́х а́з? Но молю́ Тя́, Милосе́рде, не вни́ди в су́д с рабо́м Твои́м и не помяни́ мои́х беззако́ний, ниже́ да соблюде́ши зла́я дела́ моя́ на де́нь пра́веднаго Твоего́ воздая́ния, егда́ возда́си кому́ждо по дело́м его́; но отны́не да покры́ет мя́ рука́ Твоя́, да бу́ду Тебе́ еди́ному благоугожда́ти, Тебе́ еди́ному слу́жите, Твоего́ стра́ха страши́тися, Твоя́ повеле́ния исполня́ти, Твоя́ за́поведи соблюда́ти и в зако́не Твое́м поуча́тися непреста́нно, де́нь и но́щь. Да́ждь ми́, всемогу́щий Влады́ко, отчужда́тися от зо́л ми́ра сего́; да́ждь ми́ ненави́дети вся́ зла́я в ми́ре се́м, отчужда́ющая мя́ от Тебе́, присносу́щнаго живота́ моего́, дыха́ния и ра́дования моего́; да́ждь ми́ Тебе́ еди́наго люби́ти, да́ждь ми́ к Тебе́ еди́ному, пламенногоря́щей Любве́, пламене́ти вы́ну любо́вию и возноси́тися непреста́нно к Тебе́ ду́хом. Ты́ бо еси́ моя́ жи́знь и ра́дование, и весе́лие, Ты́ Исто́чник све́та, светя́щаго во мне́, ны́не же грехо́в мои́х ра́ди угаса́ющаго во мне́ до конца́. О Све́те незаходи́мый, вя́щше уясни́ Твое́ю благода́тию се́й све́т во мне́, да при све́те Твое́м узрю́ пу́ть и́стинный, и́мже и дости́гну вожделе́ннаго ми́ небе́снаго оте́чества, иде́же и бу́ду вы́ну прославля́ти всесвято́е и преблагослове́нное и́мя Твое́, Отца́ и Сы́на и Свята́го Ду́ха. Ами́нь.

Моли́тва втора́я.

Пресвята́я Тро́ице, Единосу́щная Держа́во, все́х благи́х Вино́, что́ воздади́м Тебе́ за вся́, я́же воздала́ еси́ на́м, гре́шным и недосто́йным, пре́жде, не́же на све́т произыдо́хом, за вся́, я́же воздае́ши коему́ждо от на́с по вся́ дни́ и я́же угото́вала еси́ все́м на́м в ве́це гряду́щем? Подоба́ше бо за толи́кия благодея́ния и щедро́ты благодари́ти Тя́ не словесы́ то́чию, но па́че де́лы, храня́ще и исполня́юще за́поведи Твоя́: мы́ же, страсте́м на́шим и злы́м обы́чаем вне́мше, в безчи́сленныя от ю́ности низверго́хомся грехи́ и беззако́ния. Сего́ ра́ди, я́ко нечи́стии и оскверне́ннии, не то́чию пред трисве́тлое Лице́ Твое́ безсту́дно яви́тися, но ниже́ и́мене Твоего́ Пресвята́го изрещи́ дово́льни бы́хом, а́ще бы не Ты́ Сама́ благоизво́ли, во отра́ду на́шу, возвести́ти, я́ко чи́стыя и пра́ведныя лю́биши, гре́шники ка́ющиися ми́луеши и благоутро́бне прие́млеши. При́зри у́бо, о Пребоже́ственная Тро́ице, с высоты́ святы́я сла́вы Твоея́ на на́с, многогре́шных, и благо́е произволе́ние на́ше, вме́сто благи́х де́л, приими́, и пода́ждь на́м ду́ха и́стиннаго покая́ния, да возненави́девше вся́кий гре́х, в чистоте́ и пра́вде, до конца́ дне́й на́ших поживе́м, творя́ще пресвяту́ю во́лю Твою́ и сла́вяще чи́стыми по́мыслы и благи́ми дея́ньми сладча́йшее и великоле́пое и́мя Твое́. Ами́нь.

Yandex Metrika