Конда́к 1.

Избра́нный от рожде́ния страстоте́рпче и Христо́вы любве́ воплоще́ние, воспева́ем ти́ Похва́льная, я́ко па́че всего́ Оте́чество твое́ возлюби́вшему, ты́ же, я́ко име́яй дерзнове́ние ко Го́споду, просвети́ омраче́нныя умы́ и сердца́ на́ша, да зове́м ти́:

Ра́дуйся, Нико́лае, боговенча́нный царю́ и вели́кий страстоте́рпче.

И́кос 1.

А́нгелов Творе́ц посла́ тя земли́ Росси́йстей я́ко а́нгела незло́бива на вразумле́ние люде́й твои́х, тя́ бо избра́ по о́бразу Сы́на Своего́ Единоро́днаго в же́ртву искупле́ния за грехи́ люде́й Росси́йских, мы́ же, дивя́щеся таково́му о тебе́ промышле́нию Вседержи́теля, с умиле́нием вопие́м ти́:

Ра́дуйся, Христу́ уподобле́ние; ра́дуйся, же́ртво всесожже́ния.

Ра́дуйся, росси́йских царе́й украше́ние; ра́дуйся, страны́ твоея́ утвержде́ние.

Ра́дуйся, незло́бия и всепроще́ния о́бразе; ра́дуйся, тве́рдаго испове́дания кре́посте.

Ра́дуйся, оби́димых нело́жное упова́ние; ра́дуйся, ве́рных неруши́мое основа́ние.

Ра́дуйся, Нико́лае, боговенча́нный царю́ и вели́кий страстоте́рпче.

Конда́к 2.

Ви́дящи всеблага́я Богома́ти во уде́ле Свое́м страну́ на́шу ме́рзостию растле́ния оскверня́емую, избра́ тя от рожде́ния, я́ко чисте́йшаго, Руси́ во очище́ние, да вси́ несумне́нною наде́ждою твори́м пе́снь: Аллилу́иа.

И́кос 2.

Ра́зум предве́чный предуста́ви тя́ ко спасе́нию в житии́ твое́м, И́ову Многострада́льному, рожде́ние твое́ и па́мять пра́ведника сочетава́я. Мы́ же, во страда́ниих за грехи́ на́ша, па́че же за отступле́ние от тебе́, пома́занника Бо́жия, со тре́петом смире́нным и сокруше́нием серде́чным вопие́м ти́ си́це:

Ра́дуйся, хулы́ и напа́сти от наро́да твоего́ претерпе́вый: ра́дуйся, сострада́ние к нему́ до конца́ име́вый.

Ра́дуйся, пра́вило ве́ры правосла́вныя: ра́дуйся, о́бразе кро́тости Дави́довы.

Ра́дуйся, свети́льниче пра́вды: ра́дуйся, храни́телю и́стины.

Ра́дуйся, смиренному́дрия учи́телю: ра́дуйся, терпе́ния И́овлева люби́телю.

Ра́дуйся, Нико́лае, боговенча́нный царю́ и вели́кий страстоте́рпче.

Конда́к 3.

Си́ла вы́шняго осени́ тя, пома́занниче Бо́жий, лжему́дрствующу За́паду вразумле́ние противора́тное соде́лавшаго, да ми́р ве́сь Бо́гу вопие́т: Аллилу́иа.

И́кос 3.

Име́я тща́ние о благоче́стии, ревнова́л еси́, благове́рный царю́, хра́мов созида́нию, моще́й уго́дников Бо́жиих прославле́нию, просвеще́ния Христиа́нскаго насажде́нию и обездо́ленных от наси́лия огражде́нию, сего́ ра́ди ми́р правосла́вный сла́ви тя́ си́це:

Ра́дуйся, святи́теля Никола́я соимени́те: ра́дуйся, преподо́бнаго Серафи́ма сомоли́твенниче.

Ра́дуйся, правосла́вия насади́телю: ра́дуйся, све́та Христо́ва носи́телю.

Ра́дуйся, ца́рствования христиа́нскаго учи́телю: ра́дуйся, правосла́вным страна́м охрани́телю.

Ра́дуйся, оби́телей мона́шествующих покрови́телю: ра́дуйся, иконопочита́ния попечи́телю.

Ра́дуйся, Нико́лае, боговенча́нный царю́ и вели́кий страстоте́рпче.

Конда́к 4.

Бу́ри де́рзости, злоре́чия и безу́мия не убоя́лся еси́, страстоте́рпче Нико́лае, глаго́ля: изме́на, тру́сость и обма́н о́крест всю́ду. Злохуле́ния, заточе́ние и умерщвле́ние кро́тко претерпе́л еси́, Бо́гу Вседержи́телю вопия́: Аллилу́иа.

И́кос 4.

Слы́ша держа́вы твоея́ росси́йския нестрое́ние и ви́дя христиа́н поноше́ние, непреста́нно моли́лся еси́, да спасе́т Цари́ца Преблага́я Ру́сь правосла́вную, сего́ ра́ди похва́льными пе́сньми воспева́ем ти́ такова́я:

Ра́дуйся, Пречи́стыя держа́вный чти́телю: ра́дуйся, че́сти ико́н Ея́ ревни́телю.

Ра́дуйся, в моле́ниих за лю́ди своя́ предста́телю: ра́дуйся, и́х под держа́вный Покро́в Ея́ вручи́телю.

Ра́дуйся, Христа́ ра́ди ча́шу страда́ний испи́вый: ра́дуйся, изме́ну до конца́ прости́вый.

Ра́дуйся, моли́твы кади́ло благово́нное: ра́дуйся, лампа́до ве́ры неугаси́мая!

Ра́дуйся, Нико́лае, боговенча́нный царю́ и вели́кий страстоте́рпче.

Конда́к 5.

Боготе́чная звезда́ россия́ном ве́рным в разсе́янии су́щым яви́лся еси́, о и́мени твое́м во еди́но и́х собира́я и пу́ть покая́ния к Руси́ возрожде́нию показу́я, да возра́дуются А́нгелы о гре́шницех ка́ющихся взыва́юще: Аллилу́иа.

И́кос 5.

Ви́дя я́ко кро́тость и смире́ние во обраще́ние не успева́ет, все́ упова́ние на Ма́ти Бо́жию возложи́л еси́ и в ру́це Вседержи́теля всего́ себе́ преда́л еси́, да и безу́мныя вразуми́т во е́же пе́ти тебе́:

Ра́дуйся, бу́йствующия горды́ни победи́телю: ра́дуйся, венца́ смире́нный носи́телю.

Ра́дуйся, немощны́х стено́ необори́мая: ра́дуйся, к лю́дем свои́м любо́вь преизоби́льная.

Ра́дуйся, чудеса́ми в Росси́и Бо́гом превознесе́нный: ра́дуйся, в разсе́янии су́щими просла́вленный.

Ра́дуйся, за Росси́ю же́ртво усе́рдная: ра́дуйся, славя́ном се́рдце милосе́рдое.

Ра́дуйся, Нико́лае, боговенча́нный царю́ и вели́кий страстоте́рпче.

Конда́к 6.

Пропове́дуют концы́ вселе́нныя сла́ву твою́, во всю́ зе́млю изы́де веща́ние твое́: не́сть тоя́ же́ртвы, ю́же не прине́сл бы́х за бла́го Оте́чества моего́, науча́я те́м лю́ди твоя́ покая́нно пе́ти Бо́гу: Аллилу́иа.

И́кос 6.

Возсия́л еси́ па́че со́лнца земли́ росси́йстей, свя́те Нико́лае, предста́тельство лю́дем твои́м да́же на Голго́фе твое́й яви́вый, да вси́ ко Христу́ обратя́тся и благода́рственно воспою́т:

Ра́дуйся, све́те от восто́ка изше́дый: ра́дуйся, тмо́ю за́пада не ослепле́нный.

Ра́дуйся, сия́ние пра́вды неистощи́мое: ра́дуйся, свети́ло кро́тости незаходи́мое.

Ра́дуйся, гре́шников вразумле́ние: ра́дуйся, пра́ведников прославле́ние.

Ра́дуйся, слуго́ Бо́жий самодержа́вный: ра́дуйся, вои́стинну святы́й царю́ правосла́вный.

Ра́дуйся, Нико́лае, боговенча́нный царю́ и вели́кий страстоте́рпче.

Конда́к 7.

Хотя́й ве́ру правосла́вную на земли́ утверди́ти, подви́гнул еси́ ца́рство твое́ на заступле́ние оби́димыя страны́ Се́рбския, да ви́дя до́брая дела́ твоя́, просла́вят Отца́ Небе́снаго, вопию́ще: Аллилу́иа.

И́кос 7.

Но́ваго тя́ Но́я, строи́теля спасе́ния наро́ду росси́йскому и сохрани́теля страны́ Се́рбския яви́ тя Госпо́дь, о Нико́лае, правосла́вным лю́дем побе́ды пода́телю, да вси́ по́двиги твоя́ помина́юще, при́сно вси́ ку́пно воспева́ем ти́:

Ра́дуйся, Свяще́ннаго Писа́ния исполни́телю: ра́дуйся, преда́ния святы́х оте́ц храни́телю.

Ра́дуйся, до́м души́ своея́ на ка́мени Христе́ созда́вый: ра́дуйся, до́м Ма́тере Бо́жия любо́вию утверди́вый.

Ра́дуйся, Росси́йскаго корабля́ ко спасе́нию води́телю: ра́дуйся, славя́н в беда́х наде́жный уте́шителю.

Ра́дуйся, христиа́нских доброде́телей носи́телю: ра́дуйся, грехо́вных страсте́й искорени́телю.

Ра́дуйся, Нико́лае, боговенча́нный царю́ и вели́кий страстоте́рпче.

Конда́к 8.

Стра́нное чу́до ви́дим на тебе́, ра́бе Бо́жий благи́й и ве́рный, десни́цею Вы́шняго мно́гажды охраня́емем с цари́цею же и ча́ды и слуги́ твои́ми му́ченическим венце́м венча́емем, сего́ ра́ди вни́де в ра́дость Го́спода твоего́, мы́ же промысли́телю вся́ческих вопие́м: Аллилу́иа.

И́кос 8.

Вси́ пое́м по́двиг ва́ш кре́пкий, почита́ем страда́ние, хва́лим долготерпе́ние, ублажа́ем кончи́ну ва́шу. Вои́стинну, что́ добро́ или́ что́ красно́, но е́же жи́ти, па́че умре́ти, вку́пе во Христе́ Иису́се за лю́ди своя́? Мы́ же, недосто́йная ча́да ва́ша, еди́ными усты́ и еди́ным се́рдцем сла́вим и воспева́ем имена́ ва́ша си́це:

Ра́дуйся, цари́це Алекса́ндро но́вая: ра́дуйся, Алекси́е, насле́дниче небе́сный.

Ра́дуйся, О́льго но́вая богому́драя: ра́дуйся, Татиа́но милосе́рдая.

Ра́дуйся, Мари́е целому́дренная: ра́дуйся, Анастаси́е а́гнице свята́я.

Ра́дуйся, ра́дужная седмери́це, заве́те но́ваго ца́рствия: ра́дуйся, цветни́че благоуха́нный, торжество́ правосла́вия.

Ра́дуйся, Нико́лае, боговенча́нный царю́ и вели́кий страстоте́рпче.

Конда́к 9.

Вся́кими чудесы́ явля́ше Госпо́дь благоволе́ние свое́ росси́йским лю́дем, до́ндеже преогорчи́ша его́ до зела́, но тобо́ю, великому́чениче царю́, к покая́нию призыва́еми, наде́жду проще́ния и́мамы, да вопие́м Бо́гу: Аллилу́иа.

И́кос 9.

Вети́и многовеща́ннии, я́ко ры́бы безгла́сныя, не возмо́гут возрещи́ высоту́ твоего́ терпе́ния, мы́ же глубину́ паде́ния на́шего созерца́юще, в сокруше́нии ду́ха восклица́ем:

Ра́дуйся, му́жество необори́мое: ра́дуйся, ве́рносте непоколеби́мая.

Ра́дуйся, ка́ющихся соверше́нное проще́ние: ра́дуйся, упо́рствующих долготерпе́ние.

Ра́дуйся, заве́т ца́рствующаго отца́ соблюда́вый: ра́дуйся, пред Царе́м Царе́й обе́т сохрани́вый.

Ра́дуйся, Бо́гу послушли́вый вельми́: ра́дуйся, нелицеме́рный в любви́.

Ра́дуйся, Нико́лае, боговенча́нный царю́ и вели́кий страстоте́рпче.

Конда́к 10.

Спасти́ся хотя́й все́м челове́ком и в ра́зум и́стины приити́, и́же на крови́ му́чеников Це́рковь Свою́ основа́вый Христо́с, положи́ тя́, царю́ самодержа́вный, во основа́ние но́выя хра́мины Росси́йския, да су́щии в не́й ве́рно вопию́т: Аллилу́иа.

И́кос 10.

Стена́ еси́ все́м к тебе́ с ве́рою прибега́ющым и необори́мое огражде́ние еси́ ми́ру правосла́вному, о́тче чадолюби́вый, науча́яй вся́ ве́рныя на по́мощь тя́ призыва́ти си́це:

Ра́дуйся, благода́тию немощны́х врачева́ние: ра́дуйся, оскудева́ющих доброде́тельми восполне́ние.

Ра́дуйся, пле́нных свободи́телю: ра́дуйся, ни́щих защи́тителю.

Ра́дуйся, бу́йствующих трезве́ние: ра́дуйся, от неду́га винопи́тия исцеле́ние.

Ра́дуйся, но́вое со́лнце кра́сное: ра́дуйся, очисти́тельная реко́ багря́ная.

Ра́дуйся, Нико́лае, боговенча́нный царю́ и вели́кий страстоте́рпче.

Конда́к 11.

Пе́ние Пресвяте́й Тро́ице да́же до сме́рти принося́, тече́ние сконча́л еси́ и ве́ру соблю́л еси́, е́юже вся́ правосла́вныя Христиа́ны подвиза́еши пе́ти: Аллилу́иа.

И́кос 11.

Светода́телем по́слан бы́в земли́ на́шей, я́ко а́гнец непоро́чный, полага́ешися в же́ртву за грехи́ на́ша, да в покая́нии у́зрим све́т и вопие́м ти́ си́це:

Ра́дуйся, о́браз жития́ и кончи́ны святы́я да́вый: ра́дуйся, за грехи́ земли́ своея́ пострада́вый.

Ра́дуйся, за враго́в свои́х моли́вый: ра́дуйся, мучи́телей свои́х прости́вый.

Ра́дуйся, в житии́ твое́м миротво́рче: ра́дуйся, на Небесе́х Христиа́ном побо́рниче.

Ра́дуйся, ски́петром духо́вно упра́вивый: ра́дуйся, порфи́рою Ду́ха украше́нный.

Ра́дуйся, Нико́лае, боговенча́нный царю́ и вели́кий страстоте́рпче.

Конда́к 12.

Благода́ть от Бо́га даде́ся тебе́, Нико́лае, моли́тися за ны́, о проще́нии за отступле́ние на́ше от тебе́, пома́занника Бо́жия, и от насле́дия святы́х оте́ц, но с упова́нием кре́пким вопие́м: Аллилу́иа.

И́кос 12.

Пою́ще страда́ния твоя́, страстоте́рпче святы́й, покланя́емся благода́ти Всесвята́го Ду́ха, я́вльшейся на тебе́, да вси́ согла́сно вопие́м:

Ра́дуйся, пома́занниче Бо́жий, при́сный моли́твенниче: ра́дуйся, возлю́бленное ча́до Христо́во кротча́йшее.

Ра́дуйся, цари́це пра́ведною бы́ти пособи́вый: ра́дуйся, ча́да и слуги́ ко Христу́ приведы́й.

Ра́дуйся, лю́ди твоя́ во и́стине просвети́вый: ра́дуйся, Оте́чества че́сти не посрами́вый.

Ра́дуйся, Ду́ха Свята́го ве́рный стяжа́телю: ра́дуйся, вели́кия ве́ры до конца́ показа́телю.

Ра́дуйся, Нико́лае, боговенча́нный царю́ и вели́кий страстоте́рпче.

Конда́к 13.

О, свяще́нная главо́, пома́занниче Бо́жий, му́чениче святы́й Царю́ нико́лае, при́зри на ца́рство твое́ земно́е и на лю́ди твоя́, и умоли́ вседержи́теля, да не вни́дет в су́д с на́ми, но да пода́ст на́м: ве́лие проще́ние, воста́ние от паде́ния и ца́рства правосла́внаго воскресе́ние, вопию́щым непреста́нно: Аллилу́иа.

Этот конда́к читается трижды, затем и́кос 1-й и конда́к 1-й.

Моли́тва свято́му страстоте́рпцу царю́ никола́ю.

О, святы́й страстоте́рпче царю́ му́чениче Нико́лае, пома́занника своего́ тя́ Госпо́дь избра́, во е́же ми́лостивно и пра́во суди́ти лю́дем твои́м, и храни́теля ца́рства правосла́внаго бы́ти: ца́рское служе́ние сие́ и о душа́х попече́ние со стра́хом Бо́жиим соверша́л еси́. Испыту́я же тя́, я́ко зла́то в горни́ле, ско́рби го́рькия Госпо́дь ти́ попусти́, я́ко же И́ову Многострада́льному, последи́ же престо́ла ца́рскаго лише́ние и му́ченическую сме́рть посла́ ти. Вся́ сия́ кро́тко претерпе́вый, я́ко и́стинный ра́б Христо́в, наслажда́ешися ны́не вы́шния сла́вы у Престо́ла все́х Царя́, ку́пно со святы́ми му́ченики: свято́ю цари́цею Алекса́ндрою, святы́м царе́вичем Алекси́ем, святы́ми царе́внами О́льгою, Татиа́ною, Мари́ею и Анастаси́ею и с ве́рными слуги́ твои́ми, та́кже со свято́ю му́ченицею княги́нею Елисаве́тою и со все́ми ца́рственными му́ченики и свято́ю му́ченицею Варва́рою. Но я́ко име́я дерзнове́ние ве́лие ко Христу́ Царю́, Его́ же ра́ди и пострада́, моли́ с ни́ми, да отпу́стит Госпо́дь гре́х наро́да, не возбрани́вшаго убие́ние твое́, царя́ и пома́занника Бо́жия, да изба́вит Госпо́дь стра́ждущую страну́ Росси́йскую от лю́тых безбо́жник, за грехи́ на́шя и отступле́ние от Бо́га попу́щенных, и возста́вит престо́л правосла́вных царе́й, на́м же пода́ст грехо́в проще́ние, и на вся́кую доброде́тель наста́вит на́с, да стя́жем смире́ние, кро́тость и любо́вь, и́хже си́и му́ченицы яви́ша, да сподо́бимся Небе́снаго Ца́рствия, иде́же ку́пно с тобо́ю и все́ми святы́ми новому́ченики и испове́дники росси́йскими просла́вим Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.