Конда́к 1.

Возбра́нный воево́до правосла́вных и небе́сный засту́пниче Бря́нския земли́, князе́й ру́сских украше́ние и мона́хов похвало́, оби́тели первоверхо́вных Апо́стол основа́телю и покрови́телю и о душа́х на́ших усе́рдный моли́твенниче, благода́рственная пе́ния прино́сим ти́, глаго́люще:

Ра́дуйся, преподо́бне кня́же Оле́же, Бря́нский чудотво́рче.

И́кос 1.

А́нгельския Си́лы ра́довахуся благоче́стию твоему́, кня́же Оле́же, е́же измла́да благода́тию Бо́жиею яви́л еси́, блага́го ко́рене блага́я о́трасль бы́в. Мы́ же сора́дуемся и́м и я́ко Бо́жия избра́нника восхваля́ем тя́ си́це:

Ра́дуйся, благочести́вых роди́телей благослове́нный пло́д; ра́дуйся, я́ко па́мять твоя́ почита́ется в ро́д и ро́д.

Ра́дуйся, от ю́ности Христа́ Бо́га те́пле возлюби́вый; ра́дуйся, в се́рдце оби́тель Свято́му Ду́ху угото́вивый.

Ра́дуйся, богослуже́нию усе́рдно прилежа́вый; ра́дуйся, Сло́вом Бо́жиим ду́шу свою́ пита́вый.

Ра́дуйся, преподо́бне кня́же Оле́же, Бря́нский чудотво́рче.

Конда́к 2.

Ви́дя и слы́ша пра́ведное житие́ благове́рных сро́дников твои́х, Черни́говских князе́й Нико́лы Свято́ши и И́горя страстоте́рпца, му́ченика Михаи́ла и роди́теля твоего́ Рома́на, еще́ же и дще́ре Михаи́ловы преподо́бныя Евфроси́нии Су́здальския, потща́лся еси́, свя́те Оле́же, подража́ти и́м, воспева́я Бо́гу: Аллилу́иа.

И́кос 2.

Ра́зум богопросвеще́нный от ю́ности стяжа́в, благове́рне кня́же Оле́же, не прельсти́лся еси́ су́етною сла́вою княже́ния земна́го, почита́я сие́ я́ко сугу́бое служе́ние лю́дем Бо́жиим, вруче́нным попече́нию твоему́. Сего́ ра́ди приими́ от на́с сицева́я:

Ра́дуйся, любо́вию о Христе́ испо́лнивыйся; ра́дуйся, оте́ц чадолюби́вый лю́дем яви́выйся.

Ра́дуйся, печа́льных благи́й уте́шителю; ра́дуйся, в беда́х су́щим предста́телю.

Ра́дуйся, ни́щих и убо́гих пита́телю; ра́дуйся, вдо́в и сиро́т покрови́телю.

Ра́дуйся, преподо́бне кня́же Оле́же, Бря́нский чудотво́рче.

Конда́к 3.

Си́лою Ду́ха Свята́го укрепля́емь, блаже́нне кня́же Оле́же, в ми́ре се́м живя́, собла́знов его́ удаля́лся еси́, уедине́нно в вертогра́де роди́телей твои́х водворя́яся; те́мже и утвержде́нию ве́ры правосла́вныя ревну́я, пе́рвую в земли́ Бря́нстей оби́тель во и́мя святы́х апо́стол Петра́ и Па́вла основа́л еси́, да и́ноцы ея́ непреста́нно воспева́ют Бо́гу: Аллилу́иа.

И́кос 3.

Име́я богоприя́тное жела́ние от суеты́ мирски́я удали́тися, укрепи́лся еси́ в не́м, егда́ и́ноцы созда́нныя тобо́ю оби́тели вку́пе с Пече́рскими принесо́ша от Ки́ева чудотво́рную ико́ну Богома́тере, моле́ния ра́ди неду́гующаго роди́теля твоего́. Те́мже ублажа́юще изволе́ние твое́, вопие́м ти́ та́ко:

Ра́дуйся, у́зкий пу́ть Христо́в возлюби́вый; ра́дуйся, бога́тство и сла́ву ми́ра возненави́девый.

Ра́дуйся, ру́це на ра́ло Госпо́дне возложи́вый; ра́дуйся, вспя́ть лица́ твоего́ николи́же обрати́вый.

Ра́дуйся, Оте́чества Го́рняго дости́гнути возжеле́вый; ра́дуйся, кня́жескую диади́му ра́ди Небе́снаго венца́ оста́вивый.

Ра́дуйся, преподо́бне кня́же Оле́же, Бря́нский чудотво́рче.

Конда́к 4.

Бу́рею напа́стей коле́блемо оте́чество твое́ зря́, кня́же Оле́же, ага́ряны и злове́рными разоря́емо, еще́ же и междоусо́бными бра́нями терза́емо, щито́м ве́ры правосла́вныя огради́вся, и мече́м моли́твы вооружи́вся, на враги́ изше́л еси́, поя́ Спаси́телю Бо́гу: Аллилу́иа.

И́кос 4.

Слы́шав отца́ твоего́, благове́рнаго кня́зя Рома́на, во благодаре́ние за исцеле́ние оби́тель Све́нскую основа́вшаго и вся́, ели́ки ви́де прозре́вшима очи́ма, зе́мли е́й дарова́вшаго, себе́ самаго́ в же́ртву Бо́гу прине́сл еси́, свя́те Оле́же, и во оби́тель сию́ всели́лся еси́. Сего́ ра́ди воспева́ем тя́ си́це:

Ра́дуйся, взе́мый кре́ст сво́й и Христу́ после́довавый; ра́дуйся, земны́я по́чести ни во что́же вмени́вый.

Ра́дуйся, по за́поведи Христо́вой смири́выйся; ра́дуйся, господи́н бы́в и служи́тель все́м соде́лавыйся.

Ра́дуйся, люботру́дное житие́ избра́вый; ра́дуйся, в посте́ и моли́твах пребыва́вый.

Ра́дуйся, преподо́бне кня́же Оле́же, Бря́нский чудотво́рче.

Конда́к 5.

Боготе́чней звезде́ уподо́бился еси́, преподо́бне Оле́же, егда́ от черто́га кня́жеска во оби́тель первоверхо́вных Апо́стол, я́ко в черто́г Небе́снаго Жениха́, преше́л еси́, о благостоя́нии Святы́я Це́ркве, благоустрое́нии оте́чества и спасе́нии ду́ш вруче́нных ти́ Бо́гом люде́й усе́рдно моля́ся и со умиле́нием поя́: Аллилу́иа.

И́кос 5.

Ви́девше боголюби́вии лю́дие гра́да Бря́нска пра́ведное житие́ твое́, Оле́же богоно́сне, попремно́гу чествова́ху щедро́ты и по́двиги твоя́. Ты́ же смиренному́дренно благодаре́ние Бо́гу приноси́л еси́, сего́ ра́ди и То́й тя́ просла́ви и научи́ ве́рныя воспева́ти та́ко:

Ра́дуйся, ду́х пра́выя ве́ры укрепля́яй; ра́дуйся, ре́вность по Бо́зе возгрева́яй.

Ра́дуйся, дея́нию богомы́слие приложи́вый; ра́дуйся, тщесла́вие и горды́ню сокруши́вый.

Ра́дуйся, дре́вним отце́м единонра́вный; ра́дуйся, Бо́гом и людьми́ возлю́бленный.

Ра́дуйся, преподо́бне кня́же Оле́же, Бря́нский чудотво́рче.

Конда́к 6.

Пропове́дник ве́ры правосла́вныя и ревни́тель благоче́стия сло́вом и житие́м бы́л еси́, богоблаже́нне кня́же Оле́же, еди́нем бо жела́нием, подо́бно пра́деду твоему́ равноапо́стольному кня́зю Влади́миру, горе́л еси́, да вси́ лю́дие земли́ твоея́ присво́ятся Христу́ и вку́пе с тобо́ю воспева́ют Ему́: Аллилу́иа.

И́кос 6.

Возсия́л еси́ в де́брех, гра́д Бря́нск о́крест облежа́щих, я́ко у́тренняя заря́, и я́ко зве́зды небе́сныя, озари́ша зе́млю на́шу доброде́тели твоя́, и́миже и ны́не просвеща́еши немо́лчно воспева́ющих тя́ си́ми похва́льными словесы́:

Ра́дуйся, во Све́те невече́рнем пребыва́яй; ра́дуйся, ду́ши на́ша чудесы́ просвеща́яй.

Ра́дуйся, сто́лпе о́гненный в пусты́ни греха́ блужда́ющим; ра́дуйся, путево́дная звездо́ на Не́бо ше́ствующим.

Ра́дуйся, нетле́нием телесе́ от Бо́га почте́нный; ра́дуйся, благода́тию Христо́вою облече́нный.

Ра́дуйся, преподо́бне кня́же Оле́же, Бря́нский чудотво́рче.

Конда́к 7.

Хотя́й по́двигом до́брым подвиза́тися и ве́ру правосла́вную соблюсти́, преподо́бне о́тче Оле́же, от си́лы в си́лу ше́ствовал еси́, укрепля́я у́м чте́нием Боже́ственных слове́с и жити́й святы́х, и́мже подража́я, доброде́тели твоя́ сокры́ти от челове́к тща́лся еси́, воспева́я Сердцеве́дцу Бо́гу: Аллилу́иа.

И́кос 7.

Но́ваго тя́ чудотво́рца яви́ Госпо́дь в земли́ Ру́сской, Оле́же всече́стне, тобо́ю святу́ю правосла́вную ве́ру во гра́де Бря́нске утвержда́я, и́же све́тло красу́ется, име́я тя́ Небе́снаго засту́пника и предста́теля ко Го́споду, и с любо́вию ти́ взыва́ет:

Ра́дуйся, Правосла́вныя Це́ркве во́ине добропобе́дный; ра́дуйся, Руси́ святы́я моли́твенниче кре́пкий.

Ра́дуйся, земли́ Бря́нския храни́телю; ра́дуйся, Петропа́вловския оби́тели огражде́ние.

Ра́дуйся, ересе́й и раско́лов разори́телю; ра́дуйся, ду́ш и теле́с на́ших цели́телю.

Ра́дуйся, преподо́бне кня́же Оле́же, Бря́нский чудотво́рче.

Конда́к 8.

Стра́нно и ди́вно бы́сть житие́ твое́, о́тче на́ш Оле́же, во оби́тели, егда́ игу́мен бы́в, преподо́бному Феодо́сию Ки́ево-Пече́рскому подража́л еси́ и о́браз бра́тии в подви́жнических труде́х явля́л еси́, вся́ послуша́ния неле́ностно исполня́я, во вре́тище одева́яся, вма́ле на дре́вяне ло́жи поко́й име́я, па́че же на вся́к ча́с неуста́нно вопия́ Бо́гу: Аллилу́иа.

И́кос 8

Вся́ земля́ Бря́нская ра́достию духо́вною подви́жеся, егда́ святы́я мо́щи твоя́, достохва́льне кня́же Оле́же, многоле́тне во вре́мя гоне́ний богобо́рческих под спу́дом во оби́тели твое́й храни́мыя, па́ки яви́ Госпо́дь ве́рным лю́дем Свои́м, вопию́щим ти́ такова́я:

Ра́дуйся, се́тей тлетво́рнаго греха́ избежа́вый; ра́дуйся, безстра́стием ду́шу украси́вый.

Ра́дуйся, я́ко мо́щи твоя́ во укрепле́ние ве́ры на́м оста́вивый; ра́дуйся, освяще́ние притека́ющим к ни́м подава́яй.

Ра́дуйся, в ме́ртвеннем телеси́ жи́знь благода́тную явля́яй; ра́дуйся, от моще́й твои́х чудеса́ источа́яй.

Ра́дуйся, преподо́бне кня́же Оле́же, Бря́нский чудотво́рче.

Конда́к 9.

Вся́кое естество́ А́нгельское удиви́ся кре́пости души́ твоея́, богому́дре Оле́же, ка́ко соверше́н хотя́ бы́ти, бога́тство я́ве и та́йне расточи́л еси́ нужда́ющимся и, нището́ю духо́вною обогати́вся, ра́достно Христу́ Спаси́телю после́довал еси́, поя́ Тому́: Аллилу́иа.

И́кос 9.

Вети́йство челове́ческое не довле́ет по достоя́нию восхвали́ти труды́, боле́зни и по́двиги твоя́, сла́вне кня́же Оле́же, я́же спасе́ния ра́ди душе́внаго подъя́л еси́, чрез все́ житие́ неосла́бно пло́ть распина́я со страстьми́ и похотьми́. Мы́ же от простоты́ се́рдца любо́вию ублажа́ем тя́ си́це:

Ра́дуйся, во пло́ти а́ки безпло́тен на земли́ пожи́вый; ра́дуйся, струя́ми сле́зными о́гнь страсте́й угаси́вый.

Ра́дуйся, терпе́нием и кро́тостию диа́вола победи́вый; ра́дуйся, нището́ю духо́вною оде́жду нетле́ния стяжа́вый.

Ра́дуйся, си́лу Воскресе́ния Христо́ва от моще́й твои́х проявля́яй; ра́дуйся, зарю́ о́бщаго воскресе́ния нетле́нием моще́й показу́яй.

Ра́дуйся, преподо́бне кня́же Оле́же, Бря́нский чудотво́рче.

Конда́к 10.

Спасти́ся душа́м на́шим моли́ Человеколю́бца Бо́га, свя́те Оле́же, к тебе́ бо по Бо́зе и Пресвяте́й Богоро́дице усе́рдно прибега́ем, я́ко ско́рому помо́щнику и те́плому хода́таю о земли́ Бря́нстей и о все́х правосла́вно в не́й живу́щих и воспева́ющих Го́споду: Аллилу́иа.

И́кос 10.

Стена́ тве́рда и покро́в изря́ден бы́л еси́ в житии́ твое́м и́ноком оби́тели твоея́: о́ваго у́бо оте́чески назида́я, о́ваго кро́тце облича́я, ины́я же с любо́вию увещава́я, не́киих стра́хом спаса́я, наипа́че же пред кончи́ною твое́ю вся́ ко спасе́нию потре́бная запове́дал еси́ и́м. Те́мже и на́с гре́шных упаси́, да с любо́вию зове́м ти́:

Ра́дуйся, слове́сное ста́до от волко́в охраня́яй; ра́дуйся, заблу́ждшия о́вцы усе́рдно взыску́яй.

Ра́дуйся, мечу́ Бо́жий, душевре́дныя стра́сти посеца́яй; ра́дуйся, щито́м твои́х моли́тв на́с огражда́яй.

Ра́дуйся, мона́хом в по́двизех укрепле́ние; ра́дуйся, все́м ве́рным лю́дем поможе́ние.

Ра́дуйся, преподо́бне кня́же Оле́же, Бря́нский чудотво́рче.

Конда́к 11.

Пе́ние умиле́нное прине́сл еси́ Пресвяте́й Тро́ице в ча́с кончи́ны твоея́, досточу́дне кня́же Оле́же. Хвала́ Бо́гу благоде́йствующу, — глаго́лал еси́, возлежа́ на сме́ртном одре́, зрю́ уже́ бре́г мо́ря жите́йскаго, и́мже досе́ле ноша́шеся моя́ у́тлая ладия́. И со словесы́ си́ми ра́достно преше́л еси́ во оби́тели Го́рния, иде́же со А́нгельскими ли́ки пое́ши пе́снь вели́кую: Аллилу́иа.

И́кос 11.

Светоприе́мную свещу́, у́глем благода́ти возжже́нную, ви́деша ученицы́ лице́ твое́, уго́дниче Бо́жий, во свято́м преставле́нии све́том Небе́сным осия́нное. Сего́ ра́ди, ско́рбь разлуче́ния с тобо́ю ди́вным си́м утеше́нием раствори́вше, с тре́петом и ра́достию взира́ху на пречестны́я мо́щи твоя́ и отше́ствие твое́ просла́виша зва́нии си́ми:

Ра́дуйся, земно́е тече́ние достохва́льне сконча́вый; ра́дуйся, по труде́х вре́менных поко́й ве́чный улучи́вый.

Ра́дуйся, вене́ц безсме́ртныя жи́зни прие́мый; ра́дуйся, Престо́лу Вседержи́теля предстоя́й.

Ра́дуйся, любо́вию твое́ю на́с не оставля́яй; ра́дуйся, чту́щия тя́ ми́лостивно посеща́яй.

Ра́дуйся, преподо́бне кня́же Оле́же, Бря́нский чудотво́рче.

Конда́к 12.

Благода́ть, да́нную ти́, о́тче на́ш Оле́же, и ве́лие твое́ дерзнове́ние пред Бо́гом ве́дуще, приле́жно мо́лим тя́: моли́ Ми́лостиваго Бо́га, да сохрани́т Святу́ю Це́рковь от ересе́й, раско́лов и нестрое́ний, оте́честву на́шему ми́р и благоде́нствие да да́рует, ве́рных же в Правосла́вии и единомы́слии да утверди́т, пою́щих Ему́: Аллилу́иа.

И́кос 12.

Пою́ще ди́вное житие́ твое́ и честно́е преставле́ние, богоно́сне о́тче Оле́же, чти́м святу́ю па́мять твою́, я́ко Небе́снаго предста́теля и засту́пника, от Бо́га на́м дарова́ннаго, и, припа́дающе к честны́м моще́м твои́м, прино́сим ти́ сицевы́я хвалы́:

Ра́дуйся, в житии́ се́м Бо́гу угоди́вый; ра́дуйся, Ца́рствие Небе́сное насле́дивый.

Ра́дуйся, я́ко с Го́рних высо́т на ны́ призира́еши; ра́дуйся, я́ко гра́д Бря́нск и оби́тель твою́ покрыва́еши.

Ра́дуйся, преде́лов оте́чества на́шего защи́тниче; ра́дуйся, христолюби́вому во́инству побо́рниче.

Ра́дуйся, преподо́бне кня́же Оле́же, Бря́нский чудотво́рче.

Конда́к 13.

О свяще́нная главо́, преподо́бне благове́рне кня́же Оле́же, приими́ сие́ ма́лое хвале́ние от недосто́йных ча́д твои́х, и моли́твами твои́ми богоприя́тными Правосла́вие в земли́ Ру́сской утверди́, гра́д Бря́нск и оби́тель твою́ сохрани́ и душа́м на́шим спасе́ние испроси́, да с тобо́ю ны́не и во ве́ки воспева́ем Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельския Си́лы ра́довахуся благоче́стию твоему́, кня́же Оле́же, е́же измла́да благода́тию Бо́жиею яви́л еси́, блага́го ко́рене блага́я о́трасль бы́в. Мы́ же сора́дуемся и́м и я́ко Бо́жия избра́нника восхваля́ем тя́ си́це:

Ра́дуйся, благочести́вых роди́телей благослове́нный пло́д; ра́дуйся, я́ко па́мять твоя́ почита́ется в ро́д и ро́д.

Ра́дуйся, от ю́ности Христа́ Бо́га те́пле возлюби́вый; ра́дуйся, в се́рдце оби́тель Свято́му Ду́ху угото́вивый.

Ра́дуйся, богослуже́нию усе́рдно прилежа́вый; ра́дуйся, Сло́вом Бо́жиим ду́шу свою́ пита́вый.

Ра́дуйся, преподо́бне кня́же Оле́же, Бря́нский чудотво́рче.

Конда́к 1.

Возбра́нный воево́до правосла́вных и небе́сный засту́пниче Бря́нския земли́, князе́й ру́сских украше́ние и мона́хов похвало́, оби́тели первоверхо́вных Апо́стол основа́телю и покрови́телю и о душа́х на́ших усе́рдный моли́твенниче, благода́рственная пе́ния прино́сим ти́, глаго́люще:

Ра́дуйся, преподо́бне кня́же Оле́же, Бря́нский чудотво́рче.

Моли́тва.

О преподо́бне о́тче, благове́рне кня́же Оле́же, уго́дниче Христо́в усе́рдный, моли́твенниче ко Го́споду те́плый, защи́тниче в беда́х и уте́шителю в печа́лех неуста́нный! Воззри́, преблаже́нне, ми́лостиво на гра́д тво́й и ви́ждь ча́да твоя́, смире́нно ти́ припа́дающая и служи́ти тебе́ хотя́щая. Не отве́ргни тре́бующия твоея́ по́мощи, но, я́ко благоде́тель и хода́тай, моли́ при́сно Го́спода Бо́га и Спа́са на́шего Иису́са Христа́, да благослови́т страну́ Росси́йскую, в ми́ре и благове́рии ю́ сохраня́я, гра́ды умножа́я, достоя́ние Свое́ соблюда́я. Вознеси́, богоно́сне о́тче на́ш, сие́ ма́лое моле́ние недосто́йных ра́б твои́х Влады́це Христу́, да утверди́т во святе́й Правосла́вней Це́ркви живы́й ду́х пра́выя ве́ры и любве́, благоче́стие непоколеби́мо, любому́дрие христопосле́довательно, да да́рует па́стырем ре́вность попече́ния о спасе́нии люде́й, во е́же неве́рующия просвети́ти, заблу́ждшия наста́вити, отпа́дшия обрати́ти и привлещи́. Изря́днее же, да вся́ ча́да Це́ркве Правосла́вныя чи́сты сохрани́т от мирски́х искуше́ний, по́хотей плотски́х, суему́дрия, суеве́рий и наважде́ний вра́жеских. Е́й, уго́дниче Бо́жий, не пре́зри на́с, моля́щихся тебе́, но помози́ на́м ско́рым предста́тельством твои́м, да вся́ких бе́д, напа́стей и скорбе́й в се́й жи́зни вре́менней избежа́вше, кончи́ну непосты́дну обрете́м, и та́ко на земли́ богоуго́дно пожи́вше, жи́зни ра́йския на Небеси́ сподо́бимся, иде́же вку́пе с тобо́ю просла́вим человеколю́бие и щедро́ты в Тро́ице сла́вимаго Бо́га, Отца́ и Сы́на и Свята́го Ду́ха, во ве́ки веко́в. Ами́нь.