Конда́к 1.
Избра́ннии служи́телие Преве́чнаго А́гнца Бо́жия, во спасе́ние на́ше на Кресте́ Себе́ прине́сшаго, Ему́ же, взе́мше кре́ст сво́й, во и́ноческом благочести́вом житии́ усе́рдно после́довавшии и кро́вь свою́ за Него́ пролия́вшии, ди́вная дво́ице друзе́й Христо́вых Серафи́ме и Феогно́сте. Просла́вльшаго вы́ Подвигополо́жника на́шего и Це́ркви Зижди́теля, прославля́юще, и чи́стое житие́ и честна́я страда́ния ва́ша восхваля́юще, любо́вию вопие́м:
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы, от Бо́га просла́вленныя.
И́кос 1.
А́нгели земни́и и челове́цы небе́снии во все́м житии́ ва́шем яви́лися есте́, преподо́бнии: из мла́да под кро́в Честне́йшей Херуви́мов и сла́внейшей без сравне́ния Серафи́мов Пречи́стой Де́вы Богоро́дицы прите́кшии и равноа́нгельному ли́ку и́ночествующих в Гли́нской пусты́ни вчине́ннии, отону́дуже, гла́су Боже́ственному кро́тко после́дуя, кра́я Семире́чия дости́гли есте́, иде́же во испове́дании Христо́ве да́же до кро́ви подвиза́лися есте́. Те́мже, кро́тости и смире́нию ва́шему удивля́ющеся, восхваля́ем ва́с та́ко:
Ра́дуйтеся, измла́да Христа́ Иису́са возлюби́вшии и Тому́ усе́рдно потруди́вшиеся; ра́дуйтеся, спасе́ния ра́ди ве́чнаго во оби́тель Гли́нскую под кро́в Пречи́стыя Богоро́дицы прите́кшия.
Ра́дуйтеся, равноа́нгельную че́сть в со́нме гли́нских ста́рцев досто́йне восприя́вшия; ра́дуйтеся, целому́дрия храни́телие и душе́вныя и теле́сныя чистоты́ рачи́телие.
Ра́дуйтеся, ду́ши ва́ша и телеса́ во оби́тели Ду́ха Свята́го угото́вившия; ра́дуйтеся, во пло́ти, а́ки безпло́тныя на земли́ пожи́вшия.
Ра́дуйтеся, я́ко на небеси́ и на земли́ от Го́спода просла́вленнии; ра́дуйтеся, обре́тшия ве́чное всесве́тлое ме́сто упокое́ния.
Ра́дуйтеся, я́ко, восходя́ та́мо душа́ми, на́м мо́щи святы́я ва́ша оста́вившия; ра́дуйтеся, я́ко моще́й ва́ших де́моны трепе́щут.
Ра́дуйтеся, я́ко чудоде́йствует те́ми Госпо́дь с любо́вию к ва́м приходя́щим.
Ра́дуйтеся, преподобному́ченицы Серафи́ме и Феогно́сте, моли́твенницы на́ша и засту́пницы, от Бо́га просла́вленныя.
Конда́к 2.
Ви́дя Христо́с Госпо́дь непоро́чную чистоту́ серде́ц ва́ших, плотски́ми страстьми́ не омраче́нную, суди́ досто́йны ва́с бы́ти жре́бия апо́стольскаго благове́стия в Туркеста́нском кра́е. Его́же гла́су: гряди́те по Мне́, и сотворю́ вы́ ловцы́ челове́ков – вне́млюще по Не́м с любо́вию и тре́петом идо́сте. Те́мже и на́с, ча́д ва́ших, моли́твами ва́шими сотвори́те ско́ры бы́ти на де́лание за́поведей Боже́ственных, пою́щих Бо́гу: Аллилу́иа.
И́кос 2.
Ра́зум недоразумева́емый о ди́вном призва́нии ва́шем, Боже́ственным смотре́нием проявле́нный, разуме́ти ища́, преподо́бнии, помышля́ли есте́ ка́ко, Бо́гу соде́йствующу, возмо́жете ми́р и кня́зя его́ – человекоуби́йцу искони́ и отца́ лжи́ диа́вола – победи́ти. Сего́ ра́ди, во вся́ ору́жия Бо́жия обле́кшися, я́ко возмощи́ ва́м ста́ти проти́ву все́м ко́знем диа́вольским, разже́нныя стре́лы сего́ посто́м и моли́твою, сле́з тече́нием, кро́тостию и смире́нием угаси́ли есте́. Сего́ ра́ди слы́шите от на́с похвалы́ сия́:
Ра́дуйтеся, душе́вная ловле́ния и стра́сти плотски́я мече́м воздержа́ния посе́кшия; ра́дуйтеся, по́мыслы грехо́вныя молча́ния обуче́нием и сокруше́нною и́споведию истреби́вшия.
Ра́дуйтеся, струя́ми сле́з покая́ния пусты́нную го́ру сию́ напои́вшия; ра́дуйтеся, труда́ми по́стническими, я́ко свети́ла просия́вшия.
Ра́дуйтеся, сладча́йшее И́мя Иису́сово во уме́ свое́м и се́рдце непреста́нно носи́вшия; ра́дуйтеся, стоя́нием на моли́тве, бде́нием и покло́нами пло́ть ва́шу ду́хови покори́вшия.
Ра́дуйтеся, душа́ми ва́шими в Сио́н го́рний моли́твенно восходи́вшия; ра́дуйтеся, та́мо сла́вою небе́сною обогати́вшиися.
Ра́дуйтеся, А́нгелов собесе́дницы и челове́ков наста́вницы; ра́дуйтеся, по́тами по́стническими у́глие стре́л вра́жиих угаси́вшия.
Ра́дуйтеся, во и́ноческом житии́ про́пасти греха́ изба́вившиися.
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы, от Бо́га просла́вленныя.
Конда́к 3.
Си́ла Вы́шняго, в сия́нии светоза́рнем явле́нная, трикра́ты указа́ ва́м со спо́стники ва́шими ме́сто подви́жнических трудо́в, испове́дничества и упокое́ния ва́шего на Кызылжа́рстей горе́ Заили́йского Алата́у. На ню́же, ра́дующеся, взошли́ есте́, дре́вним сто́лпником и пусты́нником подо́бяся, и Го́сподеви поя́: Аллилу́иа.
И́кос 3.
Име́я неусы́пное попече́ние о спасе́нии ду́ш ва́ших и вве́ренных ва́м от Бо́га благослове́нием архипа́стырей Туркеста́нских ча́д церко́вных, показу́я неле́ностный по́двиг в подража́нии уго́дником Бо́жиим, па́стырски в душепопече́нии сло́вом и са́мым де́лом приле́жно потруди́лися есте́. Сего́ ра́ди от усе́рдия на́шего приими́те похвалы́ сия́:
Ра́дуйтеся, отцу́ ве́рных пра́ведному Авраа́му подража́вшия; ра́дуйтеся, теплото́ю ве́ры согрева́емыя, оте́чество свое́ оста́вльшия.
Ра́дуйтеся, Богови́дцу Моисе́ю, на Сина́йскую го́ру возше́дшему, поревнова́вшия; ра́дуйтеся, на гора́х Тяньша́ня поуче́нии Боже́ственными и доброде́телей исправле́нием Влады́ку Христа́ вы́ну ду́хом свои́м созерца́вшия.
Ра́дуйтеся, И́ову многострада́льному в слеза́х и терпе́нии уподо́бившиися; ра́дуйтеся, еле́ем благоче́стия и благотворе́ния ду́ши ва́ша пома́завшия.
Ра́дуйтеся, я́ко дре́внии проро́цы ду́ха прозре́ния иму́щия; ра́дуйтеся, де́йством Того́ озаря́еми, му́ченическую кончи́ну ва́шу предузна́вшия.
Ра́дуйтеся, апо́столом Христо́вым во благове́стии Ева́нгельском в кра́е Семире́чия после́довавшия; ра́дуйтеся, преподо́бному Серафи́му Саро́вскому в житии́ ва́шем и́ноческом усе́рдно подража́вшия.
Ра́дуйтеся, му́чеников добропобе́дных ли́ку сопричте́нныя.
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы, от Бо́га просла́вленныя.
Конда́к 4.
Бу́рю богобо́рчества, от безбо́жныя вла́сти воздви́гнутую, огне́м ве́ры кре́пкия, наде́жды несумне́нныя и любве́ и́стинныя угаси́вшия, преподо́бнии, А́гнцу Бо́жию Христу́ Иису́су, я́ко заколе́ние благоприя́тное, себе́ принесли́ есте́, и душепа́губных волко́в суему́дрия бу́рю укроти́ли есте́, Го́сподеви поя́: Аллилу́иа.
И́кос 4.
Слы́шаша богоху́льнии и злочести́вии лю́дие ангелоподо́бное житие́ ва́ше, в тишине́ пусты́ннаго уедине́ния на горе́ соверша́емое, богопроти́вною я́ростию ды́шуще и бога́тство обрести́ мня́ще, преда́ша ва́с сме́рти, кова́рно в рассве́тныя часы́ у́тра расстреля́в. Сего́ ра́ди Це́рковь Свята́я, кро́вию испове́дничества ва́шего, за Христа́ пролия́нною, украша́ема, срета́ет вы́ приве́тствии си́ми:
Ра́дуйтеся, во́ини Христо́вы, не обяза́вшиися ку́плями жите́йскими, да Ему́ уго́дни бу́дете; ра́дуйтеся, во все́м житии́ ва́шем Его́ иска́вшия и в Не́м наме́рение полага́вшия.
Ра́дуйтеся, на го́ру высо́кую доброде́телей возше́дшия, мона́шески Тому́ угоди́вшия; ра́дуйтеся, неви́нно от пребеззако́нных за ве́ру и любо́вь к Нему́ пострада́вшия.
Ра́дуйтеся, венце́в неувяда́емых от Небе́снаго Царя́ сла́вы сподо́бившиися; ра́дуйтеся, к Распе́ншемуся на́с ра́ди на Кресте́ ра́зум сво́й вы́ну возводи́вшия.
Ра́дуйтеся, страда́льческою кончи́ною ва́шею незло́бие А́гнца Бо́жия пропове́давшия; ра́дуйтеся, в небе́сном всевесе́лом пребыва́нии в ли́ке А́нгелов и все́х святы́х от Него́ просла́вленныя.
Ра́дуйтеся, дерзнове́ние моли́твенное о на́с к Нему́ иму́щия; ра́дуйтеся, потемне́нныя грехми́ очеса́ ду́ш на́ших све́том ева́нгельским просвеща́ющия.
Ра́дуйтеся, грехо́в оставле́ние и в доброде́тельном житии́ укрепле́ние на́м подаю́щия.
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы от Бо́га просла́вленныя.
Конда́к 5.
Боготе́чныя зве́зды яви́лися я́сте в христоподража́тельном житии́ ва́шем, блаже́ннии, луча́ми доброде́телей ду́ши ве́рных озаря́ющия и пу́ть к достиже́нию Ца́рства Небе́снаго и́щущим спасе́ния указу́юще, поуча́я те́х благода́рне пе́ти Бо́гу: Аллилу́иа.
И́кос 5.
Ви́дяще правосла́внии лю́дие гра́да Ве́рнаго премно́гую любо́вь ва́шу к Бо́гу и ре́вностное благочести́вое и́ноческое житие́, усе́рдно иска́ху назида́ния и моли́твеннаго предста́тельства ва́шего, преподо́бнии. Егда́ же о неви́нном убие́нии ва́шем узна́ша, еди́ными усты́ и еди́ным се́рдцем ко Христу́ Подвигополо́жнику на́шему о упокое́нии ва́шем в селе́ниях пра́ведных на ло́не Авраа́ма моля́хуся, надгро́бное рыда́ние, творя́ще побе́дною пе́снию: Аллилу́иа. Те́мже и до дне́сь, святы́й гро́б ва́ш обстоя́ще, ве́рнии взыва́ют:
Ра́дуйтеся, житие́м и кончи́ною ва́шею А́гнца Бо́жия пропове́давшия; ра́дуйтеся, закла́ни бы́вше, я́коже а́гнцы.
Ра́дуйтеся, пе́рвее сле́з ва́ших тече́ньми фарао́на мы́сленнаго потопи́вшия; ра́дуйтеся, последи́ во успе́нии ва́шем пролия́нием му́ченическия кро́ви того́ сокруши́вшия.
Ра́дуйтеся, к жи́зни нестаре́емей и присносу́щней преста́вльшиися; ра́дуйтеся, преподо́бных похвало́ и му́чеников украше́ние.
Ра́дуйтеся, по́стников слико́вницы и де́вственников ра́дование; ра́дуйтеся, и́ноков и и́нокинь путеводя́щия в селе́ния небе́сная.
Ра́дуйтеся, богобоя́зненных миря́н скоропослу́шливыя попечи́телие; ра́дуйтеся, ста́да своего́ и́ночествующих наста́вницы и храни́телие.
Ра́дуйтеся, пусты́нныя оби́тели ва́шея похвало́ и утвержде́ние.
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы, от Бо́га просла́вленныя.
Конда́к 6.
Пропове́дуют Семире́чия концы́ Казахста́нстей стране́ вели́чие мона́шеских по́двигов и неви́нную страда́льческую за Христа́ кончи́ну ва́шу, преподобному́ченицы, и́хже ра́ди дарова́ ва́м Госпо́дь благода́ти чуде́с струю́ непреста́нно теку́щую. От нея́же благогове́йно ми́ро те́плаго хода́тайства ва́шего че́рплюще, благода́рне Бо́гу вопие́м: Аллилу́иа.
И́кос 6.
Возсия́ Казахста́нстей стране́ све́т благоприя́тнаго хода́тайства ва́шего ко Престо́лу Живонача́льныя Тро́ицы, и́бо тле́нная и скоротеку́щая ми́ра оста́вльше и кре́ст на ра́мена взе́мше, де́монския победи́ли есте́ полки́ и А́нгельския дости́гли есте́ чи́ны. Те́мже восхваля́юще боле́зни и страда́ния ва́ша, любо́вию вопие́м:
Ра́дуйтеся, ве́ру и́стинную, наде́жду несумне́нную и любо́вь нелицеме́рную в себе́ име́вшия; ра́дуйтеся, любо́вь ва́шу к Бо́гу любо́вию к бли́жним свои́м показа́вшия.
Ра́дуйтеся, воздержа́ния пра́вило в житии́ ва́шем прия́вшия; ра́дуйтеся, смире́ние, кро́тость и послуша́ние дру́г ко дру́гу име́вшия.
Ра́дуйтеся, сего́ ра́ди Боже́ственную зарю́ Свята́го Ду́ха разу́мне прия́вшия; ра́дуйтеся, Трисия́ннаго и Трисо́лнечнаго Божества́ це́ркви нерукотворе́нныя яви́вшиися.
Ра́дуйтеся, богодухнове́нными наставле́ниями ва́шими в правосла́вии ве́рныя утвержда́ющия; ра́дуйтеся, проти́ву зло́бы гоня́щих ва́с незло́бивы и про́сты яви́вшиися.
Ра́дуйтеся, незло́бию и братолю́бию на́с науча́ющия; ра́дуйтеся, ми́лости и сострада́ния преиспо́лненныя.
Ра́дуйтеся, нестрое́ния, раздо́ров и вся́каго нече́стия искорени́телие.
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы от Бо́га просла́вленныя.
Конда́к 7.
Хотя́щим на́м воспева́ти сла́вно венча́вшаго ва́с, преподобному́ченицы, Го́спода и ва́ша сла́вити по́двиги и труды́, любве́ ра́ди Боже́ственныя, ва́ми подъя́тыя, помози́те на́м, недосто́йным, свы́ше да́нною ва́м благода́тию Ду́ха Свята́го, сердца́ на́ша от грехо́вныя тьмы́ очища́я, во е́же чи́сте пе́ти Бо́гу: Аллилу́иа.
И́кос 7.
Но́выя, победоно́сныя, боговенча́нныя во́ини Христо́вы Того́ бла́гостию в после́дния сия́ времена́ лю́тых гоне́ний, преподобному́ченицы, яви́лися есте́, до́брый жития́ ва́шего по́двиг сконча́вше и ве́ру правосла́вную непоро́чно соблю́дше. Те́мже о таково́м Бо́жием благоволе́нии ра́дующеся, воспева́ем ва́м такова́я:
Ра́дуйтеся, во еди́но естество́ Боже́ственныя Тро́ицы ве́ровавшия правосла́вно; ра́дуйтеся, креще́нием во И́мя Отца́ и Сы́на и Свята́го Ду́ха слове́сное ста́до Христо́во приумно́жившия.
Ра́дуйтеся, безкро́вную Же́ртву о свои́х гресе́х и о людски́х неве́дениих со стра́хом и тре́петом Бо́гу приноси́вшия; ра́дуйтеся, во вре́мя соверше́ния Боже́ственныя Литурги́и сле́зы умиле́ния пролива́вшия.
Ра́дуйтеся, пречи́стыми Та́йнами Христо́выми в насле́дие жития́ ве́чнаго себе́ и ча́д церко́вных насыща́вшия; ра́дуйтеся, славосло́вия и благодаре́ния к Бо́гу во хра́мех благогове́йно приноси́вшия.
Ра́дуйтеся ве́рных научи́вшия поклоня́тися Творцу́ в Тро́ице; ра́дуйтеся, Пресвяту́ю Де́ву Богоро́дицу во все́м житии́ ва́шем прославля́вшия.
Ра́дуйтеся, Ея́же преблаго́му Покро́ву и все́х ве́рных поручи́вшия; ра́дуйтеся, чи́на и уста́вов Святы́я Це́ркви ве́рнии храни́телие.
Ра́дуйтеся, благи́х обы́чаев и преда́ний святооте́ческих ревни́телие.
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы, от Бо́га просла́вленныя.
Конда́к 8.
Стра́нно е́сть ви́дети, я́ко благода́тиею Бо́жиею, и по сокрове́нии в не́дра земна́я страда́льческая телеса́ ва́ша, преподобному́ченицы досточу́дныя, присносу́щную жи́знь явля́ют. Приходя́щим бо к ва́м и те́плаго ва́шего хода́тайства к Бо́гу во Святе́й Тро́ице сла́вимому и покланя́емому и́щущим я́ко жи́вы су́ще во благо́е посо́бствуете, науча́я прославля́ющему ва́с Бо́гу пе́ти: Аллилу́иа.
И́кос 8.
Вся́ дни́ христоподража́тельнаго жития́ ва́шего, во еди́но существо́ Боже́ственныя Тро́ицы ве́ровав правосла́вно, богодухнове́нными наставле́нии ва́шими в правове́рии ве́рных утвержда́ли есте́ и насле́дия небе́снаго сподо́билися есте́, духоно́сныя отцы́, А́нгелов сослужи́телие. Те́мже честну́ю па́мять ва́шу соверша́я, прино́сим ва́м похва́льная сия́:
Ра́дуйтеся, ди́вная дво́ице друзе́й Христо́вых; ра́дуйтеся, соу́з любве́ духо́вныя до сме́рти ве́рно сохрани́вшия.
Ра́дуйтеся, не то́кмо в житии́ земно́м, но и по отше́ствии в небе́сныя селе́ния о Го́споде соедине́нныя; ра́дуйтеся, на светоза́рную колесни́цу доброде́телей Боже́ственных возше́дшия.
Ра́дуйтеся, Небе́снаго Ца́рствия дости́гшия; ра́дуйтеся, и на́м, гре́шным, о́браз доброде́телей сло́вом и житие́м яви́вшия.
Ра́дуйтеся, смире́нием и целому́дрием ве́чное блаже́нство улучи́вшия; ра́дуйтеся, ми́лостию и моли́твою Небе́сное Ца́рство стяжа́вшия.
Ра́дуйтеся, сла́ву вре́менную ни во что́же вмени́вшия; ра́дуйтеся, моли́твами ва́шими от мно́гих бе́д на́с избавля́ющия.
Ра́дуйтеся, вся́ блага́я проше́ния на́ша исполня́ющия.
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы, от Бо́га просла́вленныя.
Конда́к 9.
Вси́ А́нгели Бо́жии и ли́ки святы́х ра́достно восприя́ша богоно́сныя ду́ши ва́ша на небеси́, христоимени́тых же люде́й мно́жество, обстоя́ще с любо́вию гро́б ва́ш, на земли́ пе́сньми и пе́ньми духо́вными ублажа́ют ва́с, преподобному́ченицы, псало́мски поя́: Аллилу́иа.
И́кос 9.
Вити́йствующий язы́к не возмо́жет по достоя́нию изнести́ похва́льная в прославле́нии ва́шем, о, блаже́нная дво́ице друзе́й Христо́вых. Вы́ же, ми́лостивы и благопослушли́вы су́ще, приими́те убо́гая похвалы́ на́ша, дерзнове́нными свои́ми и богоприя́тными моли́твами, ску́дость на́шу восполня́ющи, да благода́рственне зове́м ва́м:
Ра́дуйтеся, Трисия́ннаго Божества́ таи́нницы; ра́дуйтеся, Сла́вы небе́снаго Ца́рствия насле́дницы.
Ра́дуйтеся, А́нгельских лико́в собесе́дницы; ра́дуйтеся, со святы́ми на небеси́ ве́чно ца́рствующия.
Ра́дуйся, от го́рних высо́т ра́йских к на́м, недосто́йным, ми́лостивно приника́ющия; ра́дуйтеся, благодея́ний мно́жество на́м источа́ющия.
Ра́дуйтеся, ми́лостию сострада́ния ва́шего все́х объе́млющия; ра́дуйтеся, Бо́жиих ми́лостей и щедро́т на́м пода́телие.
Ра́дуйтеся, безпомо́щных ско́рии помо́щницы; ра́дуйтеся, си́рых и вдови́ц корми́телие.
Ра́дуйтеся, боле́зней душе́вных и теле́сных врачи́ безме́здныя.
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы, от Бо́га просла́вленныя.
Конда́к 10.
Спасти́ хотя́ ду́ши своя́, да неосужде́нно предста́ните на суди́щи Христо́ве, вся́ су́щая в ми́ре доброхо́тне оста́вили есте́, те́сным путе́м покая́ния в безмо́лвие Заили́йских го́р возше́дше, сле́з тече́нием и тве́рдым духо́вным трудолю́бием богодарова́нныя тала́нты ва́ша умно́жили есте́, моле́ние те́плое за все́х Бо́гу принося́ще, да вси́ в позна́ние И́стины прии́дут, поя́ Бо́гу: Аллилу́иа.
И́кос 10.
Стено́ю непоколеби́мою богоприя́тных моли́тв и хода́тайств ва́ших, преподобному́ченицы, остени́те гра́д и страну́ на́шу, утоля́я пра́ведный гне́в Бо́жий, поража́ющий на́с, гре́шных и непотре́бных, бездо́ждием и гла́дом, тлетво́рными ве́тры и боле́знми, се́лями и трясе́нии, да, си́х изба́вльшеся, благода́рственно пое́м:
Ра́дуйтеся, блаже́ннии, в боголю́бии на земли́ пожи́вшия; ра́дуйтеся, ми́лости и сострада́ния преиспо́лненныя.
Ра́дуйтеся, благода́тных даро́в ве́рным раздая́телие; ра́дуйтеся, приходя́щим к ва́м с ве́рою и любо́вию предста́тельство и покро́ве.
Ра́дуйтеся, изнемога́ющим от уны́ния и печа́ли помо́щницы; ра́дуйтеся, ю́ных наста́вницы и ста́рцев пита́телие.
Ра́дуйтеся, растле́нных обы́чаев искорени́телие; ра́дуйтеся, ко спасе́нию ве́чному до́брые путеводи́телие.
Ра́дуйтеся, кро́тости, воздержа́ния и покая́ния учи́телие; ра́дуйтеся, Це́ркве Христо́вы огражде́ние и Правосла́вия побо́рницы.
Ра́дуйтеся, па́стырей учи́телие и мона́шествующих наста́вницы.
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы, от Бо́га просла́вленныя.
Конда́к 11.
Пе́ние всеумиле́нное от ю́ности Христу́, Со́лнцу Пра́вды, у́треневав приноси́ли есте́, богоно́снии отцы́, и у́мную чистоту́ безстра́стием стяжа́в, це́ркви нерукотворе́нныя яви́лися есте́ Ду́ха Свята́го, И́мже непреста́нно в сердца́х ва́ших Отцу́ Небе́сному воспева́ли: Аллилу́иа.
И́кос 11.
Светоза́рная свети́ла во гра́де Алма́-Ате́ и все́й Казахста́нстей стране́ яви́лися есте́, просвеща́я лю́ди све́том и́стиннаго богове́дения и разгоня́я мра́к безбо́жия, Трисо́лнечнаго све́та Ева́нгельскаго сия́нием, и́мже и на́ша, грехо́м помраче́нная, смы́слы просвети́те, вопию́щих ва́м такова́я:
Ра́дуйтеся, чистоту́ серде́чную и теле́сную до сме́рти опа́сно храни́вшия; ра́дуйтеся, целому́дренно и пра́ведно на земли́ пожи́вшия.
Ра́дуйтеся, ве́ру свою́ во страда́нии, я́ко зла́то в горни́ле, очи́стившия; ра́дуйтеся, стезе́ю те́сною воздержа́ния и оскуде́ния и́ноческаго ше́ствовавшия.
Ра́дуйтеся, я́ко то́ю широты́ рая́ Бо́жия дости́гшия; ра́дуйтеся, от го́рния оби́тели земны́я во Оби́тели Небе́сныя удо́бь возше́дшия.
Ра́дуйтеся, со А́нгелы и ли́ки все́х святы́х Трисвяту́ю пе́снь Бо́гу воспева́ющия; ра́дуйтеся, я́ко па́мять ва́ша с похвала́ми и успе́ние со святы́ми.
Ра́дуйтеся, я́ко имена́ ва́ша че́стны и благогове́йны в Це́ркви Христо́вой; ра́дуйтеся, свети́льницы Трисо́лнечнаго све́та, умы́ и сердца́ ве́рных озаря́ющия.
Ра́дуйтеся, ста́до свое́ от волко́в хи́щных соблюда́ющия.
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы, от Бо́га просла́вленныя.
Конда́к 12.
Благода́ть небе́сныя сла́вы от Христа́ Бо́га восприя́вше, пречу́дныя и кро́ткия страстоте́рпцы Христо́вы, земны́х на́с не оставля́ете без по́мощи и заступле́ния ва́шего, утвержда́я на́с в ве́ре, укрепля́я в наде́жде, соверше́нствуя в любви́ и наставля́я в му́дрости, и науча́я благи́х пода́телю Бо́гу пе́ти: Аллилу́иа.
И́кос 12.
Пою́ще ди́внаго во святы́х Свои́х Бо́га на́шего, прославля́ем ва́с, блаже́ннии, с му́ченики Христо́выми сочета́емыя и с ли́ки преподо́бных вчиня́емыя, с де́вственники ликовству́емыя, с по́стники и пусты́нники ублажа́емыя, с ни́миже непреста́нно пе́снь хвале́бную Це́ркви Зижди́телю возсыла́ете и моли́теся о на́с такова́я ва́м глаго́лющих:
Ра́дуйтеся, Це́ркви Ру́сския украше́ние; ра́дуйтеся, Казахста́нския страны́ заступле́ние.
Ра́дуйтеся, гра́ду Алма́-Ате́ сокро́вища пребога́тыя; ра́дуйтеся, во благоуха́нии святы́ни почива́ющия.
Ра́дуйтеся, все́х с ве́рою приходя́щих к ва́м благода́тно освяща́ющия; ра́дуйтеся, усе́рдно призыва́ющим ва́с помога́ющия.
Ра́дуйтеся, возлага́ющим по Бо́зе упова́ние на ва́с посо́бствующия; ра́дуйтеся, кре́пции защи́тницы на́ша от враго́в ви́димых и неви́димых.
Ра́дуйтеся, при́снии на́м хода́таи спасе́ния; ра́дуйтеся, теле́с на́ших благода́тныя целе́бницы.
Ра́дуйтеся, о душа́х на́ших усе́рдныя ко Го́споду моле́бницы.
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы, от Бо́га просла́вленныя.
Конда́к 13.
О, пречу́днии и кро́тции страстоте́рпцы Христо́вы, преподо́бнии Серафи́ме и Феогно́сте, все́м с ве́рою и любо́вию ва́с призыва́ющим ско́рыя и те́плыя помо́щницы, приими́те от на́с недосто́йных ма́лое сие́ со усе́рдием приноси́мое ва́м благодаре́ние и засту́пите ны́ от все́х враго́в ви́димых и неви́димых и ве́чныя му́ки изба́витися на́м Го́спода умоли́те, да с ва́ми в невече́рнем дни́ Ца́рствия Бо́жия воспое́м: Аллилу́иа.
И́кос 1.
А́нгели земни́и и челове́цы небе́снии во все́м житии́ ва́шем яви́лися есте́, преподо́бнии: из мла́да под кро́в Честне́йшей Херуви́мов и сла́внейшей без сравне́ния Серафи́мов Пречи́стой Де́вы Богоро́дицы прите́кшии и равноа́нгельному ли́ку и́ночествующих в Гли́нской пусты́ни вчине́ннии, отону́дуже, гла́су Боже́ственному кро́тко после́дуя, кра́я Семире́чия дости́гли есте́, иде́же во испове́дании Христо́ве да́же до кро́ви подвиза́лися есте́. Те́мже, кро́тости и смире́нию ва́шему удивля́ющеся, восхваля́ем ва́с та́ко:
Ра́дуйтеся, измла́да Христа́ Иису́са возлюби́вшии и Тому́ усе́рдно потруди́вшиеся; ра́дуйтеся, спасе́ния ра́ди ве́чнаго во оби́тель Гли́нскую под кро́в Пречи́стыя Богоро́дицы прите́кшия.
Ра́дуйтеся, равноа́нгельную че́сть в со́нме гли́нских ста́рцев досто́йне восприя́вшия; ра́дуйтеся, целому́дрия храни́телие и душе́вныя и теле́сныя чистоты́ рачи́телие.
Ра́дуйтеся, ду́ши ва́ша и телеса́ во оби́тели Ду́ха Свята́го угото́вившия; ра́дуйтеся, во пло́ти, а́ки безпло́тныя на земли́ пожи́вшия.
Ра́дуйтеся, я́ко на небеси́ и на земли́ от Го́спода просла́вленнии; ра́дуйтеся, обре́тшия ве́чное всесве́тлое ме́сто упокое́ния.
Ра́дуйтеся, я́ко, восходя́ та́мо душа́ми, на́м мо́щи святы́я ва́ша оста́вившия; ра́дуйтеся, я́ко моще́й ва́ших де́моны трепе́щут.
Ра́дуйтеся, я́ко чудоде́йствует те́ми Госпо́дь с любо́вию к ва́м приходя́щим.
Ра́дуйтеся, преподобному́ченицы Серафи́ме и Феогно́сте, моли́твенницы на́ша и засту́пницы, от Бо́га просла́вленныя.
Конда́к 1.
Избра́ннии служи́телие Преве́чнаго А́гнца Бо́жия, во спасе́ние на́ше на Кресте́ Себе́ прине́сшаго, Ему́ же, взе́мше кре́ст сво́й, во и́ноческом благочести́вом житии́ усе́рдно после́довавшии и кро́вь свою́ за Него́ пролия́вшии, ди́вная дво́ице друзе́й Христо́вых Серафи́ме и Феогно́сте. Просла́вльшаго вы́ Подвигополо́жника на́шего и Це́ркви Зижди́теля, прославля́юще, и чи́стое житие́ и честна́я страда́ния ва́ша восхваля́юще, любо́вию вопие́м:
Ра́дуйтеся, преподобному́ченицы Серафи́ме и Феогно́сте, моли́твенницы на́ши и засту́пницы, от Бо́га просла́вленныя.
Моли́тва.
О, Богоблаже́нная дво́ице друзе́й Христо́вых, преподо́бнии страстоте́рпцы Серафи́ме и Феогно́сте! Казахста́нския страны́ свети́льницы достопочте́ннии, гра́да Алма́-Аты́ защи́тницы и покрови́телие Богодарова́ннии, правосла́вных все́х неусы́пныя наста́вницы! На небеси́ Богопросвеще́нными душа́ми ва́шими престо́лу Бо́жию предстоя́щии, на земли́ же му́ченически за Христа́ пострада́вшими телесы́ ва́шими на гора́х Заили́йских почива́ющия и разли́чная дарова́ния духо́вная все́м с ве́рою и любо́вию к ва́м приходя́щим источа́ющия! Ми́лостивым призре́нием благосе́рдия ва́шего при́зрите на лю́ди, святу́ю па́мять ва́шу почита́ющия, на ме́сте испове́днических подвиго́в и преподо́бнических трудо́в ва́ших святы́й гро́б ва́ш обстоя́щия и те́плаго ва́шего ко Го́споду хода́тайства во обдержа́щих ну́ждах прося́щия. Вси́ бо мы́ по мно́жеству грехо́в на́ших не дерза́ем возвести́ на Не́бо оче́с на́ших, до́лу пони́кших, вы́ же, я́ко стяжа́вшии дерзнове́ние ко Го́споду и ны́не со А́нгелы Ему́ предстоя́щии, принеси́те о на́с благоуха́нныя моли́твы ва́ша, во е́же изба́витися на́м от гла́да, пото́па, тру́са, огня́, меча́, наше́ствия иноплеме́нник и междоусо́бныя бра́ни, от вся́кия ско́рби, зо́л и боле́зни душе́вныя и теле́сныя от люде́й и диа́вола по грехо́м на́шим быва́ющия. Да си́х избежа́вше, Го́споду усе́рдно рабо́тающе, моли́твами ва́шими и те́плым предста́тельством вни́дем в несконча́емый поко́й Ца́рства Небе́снаго и та́мо с ва́ми и ли́ки все́х святы́х просла́вим Вели́кое И́мя Святы́я Тро́ицы, Отца́ и Сы́на и Ду́ха Свята́го во ве́ки веко́в. Ами́нь.