Конда́к 1.

Честни́и и сла́внии святи́и Екатеринбу́ржстии, Бо́гови благоугоди́вшии и в Ца́рствии Небе́снем дне́сь ликовству́ющии, похва́льная пе́ния прино́сим ва́м, мы́ гре́шнии, вы́ же, я́ко иму́ще дерзнове́ние ко Влады́це и Го́споду, от вся́ких на́с бе́д и напа́стей свобожда́йте благоприя́тными свои́ми моли́твами, да со умиле́нием взыва́ем си́це:

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

И́кос 1.

Тро́ицы Святы́я Престо́лу стра́шному со А́нгелы предстои́те торжеству́юще, на весе́лие все́х правосла́вных собира́юще, мы́ же, ве́рою серде́чною от души́ подвиза́еми и благогове́ния ду́хом исполня́еми, помина́ем сла́вныя по́двиги ва́ша и гла́сы хвале́бными зове́м такова́я:

Ра́дуйтеся, Святы́я Тро́ицы честна́я и чи́стая селе́ния; ра́дуйтеся, с Небесе́ бо дне́сь на́м возвеща́ете Тоя́ веле́ния.

Ра́дуйтеся, А́нгелов собесе́дницы, со апо́столы и проро́ки ны́не велича́емии; ра́дуйтеся, в черто́зех ра́йских со все́ми святы́ми ра́вно ублажа́емии.

Ра́дуйтеся, бо́дрии на́ши блюсти́телие от наве́тов а́да преле́стных; ра́дуйтеся, и лени́вых подвиза́ющии достига́ти высо́т Небе́сных.

Ра́дуйтеся, сла́вными венцы́ в раи́ сла́дости увенча́ннии; ра́дуйтеся, те́плии хода́таи, от Бо́га на́м дарова́ннии.

Ра́дуйтеся, все́х на́с заступа́ющии во вся́кой ну́жде и ско́рби; ра́дуйтеся, все́м на́м помога́ющии в соверше́нии де́л благи́х и до́брых.

Ра́дуйтеся, чистоты́ и целому́дрия преди́внии храни́телие; ра́дуйтеся, е́же о Бо́зе жи́тельства и́стиннии люби́телие.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 2.

Еди́ное на потре́бу иска́ти на земли́ прему́дренно подвиго́стеся, святи́и, е́же да́рует пресла́дкое в Ца́рствии Бо́жии на Небеси́ пребыва́ние, сего́ ра́ди труды́ вся́ческими подвиза́стеся и разли́чныя ско́рби со благодаре́нием претерпе́сте; и ны́не от жития́ сего́ в жи́знь ве́чную преше́дше, со А́нгелы при́сно пое́те: Аллилу́иа.

И́кос 2.

Це́ркве Небе́сныя и земны́я украше́ние яви́лися есте́, святи́и Екатеринбу́ржстии, просия́сте бо я́ко прекра́снии ка́мения драгоце́ннии и процвето́сте бо я́ко ди́внии цве́ти ра́йстии пред Го́сподем, те́мже чту́ще мно́гия и пресла́вныя ва́ша я́же о Христе́ по́двизи, умиле́нным се́рдцем от души́ пое́м ва́м такова́я:

Ра́дуйтеся, ми́лости Бо́жия огне́м серафи́мски горя́щии; ра́дуйтеся, от зла́ бесо́вскаго ве́рныя а́ки крилы́ херуви́мскими заслоня́ющии.

Ра́дуйтеся, любве́ Бо́жия то́к благотво́рный лю́дем излия́вшии; ра́дуйтеся, всю́ си́лу де́монов а́ки ды́м разгна́вшии.

Ра́дуйтеся, заблу́ждшия о́вцы на ра́йскую возводя́щии па́жить; ра́дуйтеся, А́нгелом Небе́сным о ни́х принося́щии ра́дость.

Ра́дуйтеся, те́плии люби́телие ду́ш, Христо́вою Кро́вию искупле́нных; ра́дуйтеся, при́снии предста́телие ми́ром, пло́тию и диа́волом уловле́нных.

Ра́дуйтеся, стра́шнии бесо́в лука́вых прогони́телие; ра́дуйтеся, хра́брии зло́бных наве́тов и́х победи́телие.

Ра́дуйтеся, вся́ бе́ды и печа́ли от челове́к удаля́ющии; ра́дуйтеся, все́м призыва́ющим ва́с по́мощь ско́рую посыла́ющии.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 3.

А́ки созве́здие прекра́сное, украша́ющее не́бо Це́ркве Ру́сския, сия́ете, святи́и земли́ Екатеринбу́ржския, све́т бо от присносу́щнаго Све́та Бо́жия прии́мше, вся́ ве́рныя озаря́ете честны́м свои́м предста́тельством, сего́ ра́ди пое́м просла́вльшему ва́с Влады́це Бо́гу: Аллилу́иа.

И́кос 3.

По́вести сла́вныя о претру́дных ва́ших по́двизех слы́шаще, удивля́емся, ка́ко вы́, святи́и, си́лою свы́ше осене́ни, на вся́кую зло́бу врага́ ро́да челове́ческаго до́блественно подвиго́стеся; те́мже благода́тию Бо́жиею вся́ блага́я начина́ния своя́ соверши́вше, кре́пкаго врага́ до конца́ низложи́ли есте́, сего́ ра́ди зове́м ва́м се́рдцем и усты́ такова́я:

Ра́дуйтеся, земна́я скороги́бнущая блага́ презре́вшии; ра́дуйтеся, Небе́сная вечнопребыва́ющая воздая́ния улучи́вшии.

Ра́дуйтеся, мо́ря жите́йскаго во́ды го́рькия до́бре преше́дшии; ра́дуйтеся, ве́ры Боже́ственныя о́гнь в сердца́ своя́ прии́мшии.

Ра́дуйтеся, все́х бо теплото́ю любве́ и́стинныя согрева́ете; ра́дуйтеся, росо́ю бо непосты́дныя наде́жды уны́ние утиша́ете.

Ра́дуйтеся, ве́янием благода́ти Ду́ха Свя́та ве́рныя услажда́ющии; ра́дуйтеся, тве́рдым ше́ствием в Ца́рствие Бо́жие де́моны ужаса́ющии.

Ра́дуйтеся, я́ко тя́жкия у́зы грехо́вныя сокруши́сте; ра́дуйтеся, я́ко стопа́ми ле́гкими к Бо́гу восхо́д соверши́сте.

Ра́дуйтеся, пучи́ну зо́л моли́твою свое́ю изсуша́ющии; ра́дуйтеся, пла́менем хода́тайства своего́ ве́рных ду́ши ороша́ющии.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 4.

Естество́ на по́двиг пону́дивше, святи́и Екатеринбу́ржстии, пачеесте́ственнаго воздая́ния от Царя́ все́х сподо́бистеся, дерзнове́ние бо по Бо́зе Вседержи́теле ре́вностне разжещи́ потща́вшеся, я́ко о́гнь небе́сный зе́млю осия́ли есте́, те́мже пресла́вному блиста́нию его́ удивля́ющеся, пе́снь хвале́бную прино́сим Бо́гу, Пода́телю благи́х: Аллилу́иа.

И́кос 4.

Тьмы́ бесо́вския свои́м е́же о Бо́зе де́ланием посрами́вше и треволне́ний мо́ря жите́йскаго че́стне избе́гше, ко оти́шию Небе́сному во отра́ду Ца́рствия Бо́жия ле́гкими стопа́ми ве́ры пра́выя внидо́сте и отту́ду призира́ете на пребыва́ние претру́дное Це́ркве Бо́жия в земли́ многомяте́жней и плаче́вней; не лиши́те у́бо хода́тайства своего́ принося́щих ва́м пе́ния такова́я:

Ра́дуйтеся, от дре́ва жи́зни в раи́ сла́дости сподо́бившиися вкуси́ти; ра́дуйтеся, устроя́ющии ду́ши на́ша о Го́споде плодоноси́ти.

Ра́дуйтеся, те́рния душепа́губных заблужде́ний растерза́ющии; ра́дуйтеся, цве́ты доброде́телей произраща́ти помога́ющии.

Ра́дуйтеся, я́ко шу́ма многомяте́жнаго ми́ра сего́ ва́ми исхища́емся; ра́дуйтеся, я́ко в ти́хость све́та Боже́ственнаго ва́ми призыва́емся.

Ра́дуйтеся, благоле́пием добро́ты жития́ своего́ А́нгелы увесели́вшии;

ра́дуйтеся, си́лою по́двиг свои́х бесо́м печа́ль учини́вшии.

Ра́дуйтеся, высоты́ ра́ди своего́ к Бо́гови устремле́ния на земли́ почита́емии; ра́дуйтеся, земна́го ра́ди смире́ния Небе́снаго жи́тельства сподо́бльшиися.

Ра́дуйтеся, хода́тайством бо свои́м ве́рныя облагоуха́ете; ра́дуйтеся, смра́да бо грехо́внаго удаля́тися науча́ете.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 5.

Ра́зум богопросвеще́нный стяжа́вше, мирска́го пристра́стия избе́гли есте́, Христо́вы уго́дницы, те́плии уте́шителие все́м напа́ствуемым и обремене́нным скорбьми́ мно́гими, от Го́спода просла́влени есте́ явле́нием чуде́с, и́миже собра́сте на́с умиле́нною душе́ю пе́ти Го́сподеви: Аллилу́иа.

И́кос 5.

А́ще и во единонадеся́тый ча́с призва́ни бы́сте, святи́и, спасе́ние и блаже́нство ра́йское по́двиги свои́ми унасле́довасте, ничи́мже от Небе́снаго Домовлады́ки лише́ни су́ще, вку́пе же с великому́ченицею Екатери́ною и со ины́ми дре́вними святы́ми ра́вную мзду́ прии́мше, моли́те приле́жно, во е́же и на́м немощны́м и гре́шным житие́ сие́ вре́менное без поро́ка преити́, зове́м у́бо ва́м:

Ра́дуйтеся, в страсте́х бе́дствующим помо́щницы; ра́дуйтеся, на бра́тию наве́тствующим наказа́телие.

Ра́дуйтеся, зари́ мы́сленныя созерца́телие; ра́дуйтеся, безу́мия бесо́вскаго помрачи́телие.

Ра́дуйтеся, зве́зды у́тренния, на восто́це сия́ющия; ра́дуйтеся, да́же и до за́пад сия́нием свои́м досяза́ющия.

Ра́дуйтеся, мо́лнии, облистава́ющия се́вера и мо́ря преде́лы; ра́дуйтеся, гро́ми, оглаша́ющии ю́га и пусты́ни уде́лы.

Ра́дуйтеся, ясносве́тлии би́сери, и́миже на́ша земля́ украша́ется; ра́дуйтеся, воды́ живы́я исто́чницы, и́миже ва́р грехо́вный охлажда́ется.

Ра́дуйтеся, кри́ни се́льнии, ми́р в злосмра́дии неве́рия вла́ющийся облагоуха́ющии; ра́дуйтеся, ке́дри мо́щнии, под се́нию свое́ю пу́тники от зно́я укрыва́ющии.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 6.

Стра́нницы по сло́ву апо́столову яви́стеся на земли́, оте́чествия Небе́снаго взыску́ющии, святи́и Екатеринбу́ржстии, те́мже вся́кое сло́во ри́торское не довле́ет к досто́йному песнохвале́нию ва́шему. Пачеесте́ственне подвиза́вшеся во пло́ти немощне́й, просла́влени яви́стеся Бо́гом, чуде́с бога́тством ва́с обогати́вшим, те́ми до ны́не озаря́еми, благода́рственно пое́м Ему́: Аллилу́иа.

И́кос 6.

Тве́рдо о Христе́ иму́ще тща́ние, яви́сте ми́ру, я́ко, благода́ти Бо́жией осеня́ющей, вся́кий во́зраст не неудо́бь быва́ет благоче́стию, во вся́цем бо во́зрасте Бо́гу угоди́вше, доброде́тели разли́чныя удо́бно соверши́ли есте́, святи́и уго́дницы Бо́жии, сего́ ра́ди пое́м ва́м такова́я:

Ра́дуйтеся, у́тро благода́ти Боже́ственныя житие́м свои́м возвеща́ющии; ра́дуйтеся, Дне́ Госпо́дня и воздая́ния дело́м свои́м ча́ющии.

Ра́дуйтеся, ве́чер жития́ своего́ во смире́нии сре́тившии; ра́дуйтеся, но́щь нестрое́ний жите́йских ве́рою освеща́вшии.

Ра́дуйтеся, я́ко сия́нием моли́твы мра́к отча́яния разгоня́ете; ра́дуйтеся, я́ко ве́ры све́т в сердца́х жела́ющих обрести́ ю́ возжига́ете.

Ра́дуйтеся, ва́ми бо со́н губи́тельный от на́ших ве́жд удаля́ется; ра́дуйтеся, ва́шею бо сла́вою бо́дрость в ду́ши на́ша вселя́ется.

Ра́дуйтеся, к пробужде́нию от мра́чнаго сна́ грехо́внаго ми́р зову́щии; ра́дуйтеся, си́лу к соверше́нию безпреткнове́ннаго земна́го ше́ствия подаю́щии.

Ра́дуйтеся, учи́вшии нечу́вствие к добру́ а́ки зло́ преодолева́ти; ра́дуйтеся, запове́давшии благи́х восприя́тие а́ки досто́инство похваля́ти.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 7.

О́чи серде́чнии, к Бо́гу устремле́нне, иму́ще, святи́и, врагу́, на подви́жницы при́сно ополча́ющуся, жесто́ким житие́м противуста́сте, пло́ть ду́хови покори́вше, и сла́вою земно́ю не уязви́стеся, все́ю душе́ю Бо́гови прилепи́вшеся, те́мже и чудесы́ свои́ми всю́ зе́млю Ру́сскую исполня́ете, благогове́йно взыва́ющую чуде́с Творцу́: Аллилу́иа.

И́кос 7.

Ро́да на́шего удобре́ние благо́е бы́вше и немерца́ющим сия́юще све́том, со все́ми про́чими святы́ми водвори́вшеся, стена́ тве́рдая яви́стеся все́м челове́ком, к заступле́нию ва́шему притека́ющим, святи́и Екатеринбу́ржстии, те́мже моли́теся пода́тися на́м ра́зуму Боже́ственному и приими́те от на́с ра́достныя похвалы́ сия́:

Ра́дуйтеся, свещи́, безбо́жия мра́чнаго тьму́ прогоня́ющия; ра́дуйтеся, лампа́ды, ми́р Небе́сным весе́лием просвеща́ющия.

Ра́дуйтеся, и́стины ева́нгельския ве́рнии ревни́телие; ра́дуйтеся, ересе́й и раско́лов всегро́знии обличи́телие.

Ра́дуйтеся, ко спасе́нию ве́рных путеводи́телие; ра́дуйтеся, пучи́ны грехо́вныя ско́рии изсуши́телие.

Ра́дуйтеся, гу́сли ди́вныя, я́ко пе́сни Богодухнове́нныя сла́достно возглаша́ете; ра́дуйтеся, цевни́цы духо́вныя, я́ко хвале́ние Бо́гу с ли́ком пра́ведных воспева́ете.

Ра́дуйтеся, у́глие кади́льнии, огне́м Ду́ха Свята́го возжже́ннии; ра́дуйтеся, испо́лнившии благоуха́ния ве́сь кру́г вселе́нныя.

Ра́дуйтеся, бо́дрии Правосла́вия побо́рницы; ра́дуйтеся, си́льнии о на́с ко Спа́су моли́твенницы.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 8.

Освяще́ния Боже́ственнаго испо́лнили есте́ земли́ концы́, еди́но попече́ние иму́ще о е́же благоугоди́ти Го́сподеви, те́мже о́браз жития́ пра́веднаго в себе́ на́м показа́сте, си́м все́х подвиза́юще в похвала́х достодо́лжных взыва́ти Бо́гу: Аллилу́иа.

И́кос 8.

Жития́ богоуго́днаго пра́вила яви́стеся, светопода́тельнии свети́льницы и преди́внии чудотво́рцы Екатеринбу́ржския земли́, и, от си́лы в си́лу восходя́ще, прича́стницы благода́ти Бо́жия показа́стеся, те́мже удивляю́щеся мно́гому ва́шему терпе́нию и ве́ре, ублажа́ем ва́с зва́нии си́ми:

Ра́дуйтеся, челове́ков пречу́дное удивле́ние; ра́дуйтеся, бесо́в стра́шное пораже́ние.

Ра́дуйтеся, доброде́тельми просия́вшии; ра́дуйтеся, я́же о Христе́ любо́вию пыла́вшии.

Ра́дуйтеся, хра́ми всечестни́и, Бо́гу освяще́ннии; ра́дуйтеся, Того́ благода́тию при́сно осене́ннии.

Ра́дуйтеся, честни́и хода́таи и́щущим спасе́ния; ра́дуйтеся, возводя́щии па́дших ко исправле́нию.

Ра́дуйтеся, ве́рнии наста́вницы богому́дрия; ра́дуйтеся, гро́знии обличи́телие суему́дрия.

Ра́дуйтеся, ре́вности о сла́ве Бо́жией испо́лненнии; ра́дуйтеся, сего́ ра́ди в Ца́рствие Бо́жие вни́ти удосто́еннии.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 9.

Ева́нгелие Христо́во в ду́ши своя́ всели́вше, любо́вь и милосе́рдие оби́льно все́м явля́ете, мно́гажды проше́ния на́ша исполне́нием предваря́юще, даде́ся бо ва́м от Го́спода благода́ть, те́мже дне́сь плоды́ хода́тайства ва́шего утеша́еми, Бо́гови со умиле́нием пое́м: Аллилу́иа.

И́кос 9.

Ны́не слы́шим вы́, святи́и, я́ко тру́бы многогла́сныя, чудесы́ свои́ми благовеству́ющия на́м всемо́щную си́лу Христо́ву, е́юже сме́рть попра́ся и жи́знь ве́чная челове́ком дарова́ся, те́мже прие́млюще заступле́нием ва́шим в ско́рбех утеше́ние, в неду́зех исцеле́ние, в бе́дах ско́рое вспоможе́ние, Го́спода прославля́ем, ва́м же, ве́рным слуга́м Его́, от любве́ серде́чныя воспева́ем:

Ра́дуйтеся, ве́ры плоды́ благи́я дне́сь на Небеси́ вкуша́ющии; ра́дуйтеся, к ва́м притека́ющия ве́рныя те́ми услажда́ющии.

Ра́дуйтеся, му́жества и терпе́ния наста́вницы; ра́дуйтеся, не́мощей на́ших ми́лостивии целе́бницы.

Ра́дуйтеся, бли́жния, я́ко себе́, возлюби́вшии; ра́дуйтеся, во искуше́ниих се́рдце свое́ не ожесточи́вшии.

Ра́дуйтеся, я́ко бога́тыя милосе́рдию ко убо́гим и оста́вленным науча́ете; ра́дуйтеся, я́ко си́рыя и вдови́цы от напа́стей и бе́д защища́ете.

Ра́дуйтеся, нра́вов благи́х и до́брых насади́телие; ра́дуйтеся, злы́х стремле́ний и де́л искорени́телие.

Ра́дуйтеся, оби́димых хра́брии предста́телие; ра́дуйтеся, оби́дящих всегро́знии наказа́телие.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 10.

Кре́ст сво́й благоду́шне на ра́мена восприи́мше, во вся́ ору́жия Бо́жия облеко́стеся, те́мже возмого́сте проти́ву ста́ти все́м ко́знем диа́вольским; ны́не же и на́с, грехми́ пленя́емых, предста́тельством свои́м свободи́те, я́ко да зове́м все́х Влады́це Христу́: Аллилу́иа.

И́кос 10.

Оби́льно плоды́ многоразли́чныя Бо́гу принесо́сте страда́ньми Христа́ ра́ди, терпе́нием гоне́ний, де́лы воздержа́ния и труды́ милосе́рдия удобри́вшеся, сего́ ра́ди дарова́ся ва́м благода́ть Бо́жия, я́ко и чудеса́ пресла́вная соверша́ти возмого́сте; мы́ же си́ми чудесы́ науча́еми, похваля́ем я́же о Христе́ труды́ и по́двиги ва́ша, зову́ще:

Ра́дуйтеся, златоза́рнии свети́льницы, пу́ть к Бо́гу освеща́ющии; ра́дуйтеся, смире́ния глубину́ житие́м свои́м явля́ющии.

Ра́дуйтеся, презре́вшии ми́ра до́льняго тле́нную бла́гость; ра́дуйтеся, ны́не вкуша́ющии горе́ нетле́нную сла́дость.

Ра́дуйтеся, безпомо́щных и отча́янных я́ко на руку́ нося́щии; ра́дуйтеся, печа́льных и уны́нием объя́тых ди́вно веселя́щии.

Ра́дуйтеся, боле́зней вся́ческих безме́зднии цели́телие; ра́дуйтеся, ско́рбных и озло́бленных блази́и посети́телие.

Ра́дуйтеся, я́ко ва́шими моли́твами благоче́стие утвержда́ется; ра́дуйтеся, я́ко ва́ми едине́ние в ме́сто вражды́ укореня́ется.

Ра́дуйтеся, о́блацы росоно́снии, ослабля́ющии зно́й страсте́й на́ших; ра́дуйтеся, зве́зды, я́же в нощи́ скорбе́й на́м с Небесе́ возблиста́ша.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 11.

Пропове́дницы сла́вных дея́ний ва́ших, святи́и Екатеринбу́ржстии, яви́шася мно́зи, бога́тии и убо́зии, ста́рцы и ю́нии, свяще́нницы и мирсти́и, все́м бо любо́вь свою́ излия́сте; те́мже правосла́внии, си́лою моли́тв ва́ших ми́лость Бо́жию обре́тше, Го́сподеви пою́т: Аллилу́иа.

И́кос 11.

Еди́ному Бо́гу благоугоди́ти потща́вшеся, Ду́ха Свя́та до́м избра́н показа́стеся, святи́и, сло́во бо апо́стольское помина́юще, я́ко подоба́ет Бо́гу повинова́тися па́че не́жели челове́ком, веле́нием безбо́жным и душевре́дным противуста́ли есте́, сего́ ра́ди слы́шите от все́х благохвале́ния такова́я:

Ра́дуйтеся, жесто́кою бо стезе́ю в Ца́рство Бо́жие торжеству́юще внидо́сте; ра́дуйтеся, я́ко о́рли высокопа́рнии, та́мо ю́ность свою́ обнови́сте.

Ра́дуйтеся, подви́жницы, опа́сно возше́дшии степе́ньми ле́ствицы; ра́дуйтеся, Небе́сныя ра́дости ве́чныя провозве́стницы.

Ра́дуйтеся, я́ко ва́ми поспешеству́еми, суеты́ прираже́ния отрева́ем; ра́дуйтеся, я́ко ва́шим заступле́нием зла́го врага́ хоте́ния низлага́ем.

Ра́дуйтеся, ору́дия си́лы Бо́жия, изыма́ющия а́дскаго пла́мене; ра́дуйтеся, благода́ти Христо́вы су́ще чу́дное зна́мение.

Ра́дуйтеся, злосла́вное отсту́пническое суему́дрие разоря́ющии; ра́дуйтеся, правосла́вное благоче́стие до́бре уясня́ющии.

Ра́дуйтеся, ва́ми бо многоразли́чная благодея́ния свы́ше посыла́ются; ра́дуйтеся, к ва́м бо возноси́мая моле́ния преди́вно исполня́ются.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 12.

Стена́ тве́рда бы́сть любо́вь ва́ша ко Го́споду, е́юже утверди́шася сердца́ ва́ша, богоно́снии Екатеринбу́ржстии святи́и, сего́ ра́ди все́м притека́ющим к ва́м с ве́рою и любо́вию утвержде́ние неподви́жимое обрета́етеся; те́мже вознеси́те моли́тву ко Го́споду, во е́же непоколеби́мей бы́ти Це́ркви Христо́ве, да сла́вится и́мя Госпо́дне пе́снию: Аллилу́иа.

И́кос 12.

Но́ваго не́ба и но́выя земли́ по обетова́нию Христо́ву ча́юще, кре́пко подвиза́стеся о Правосла́вии, вну́тренняго челове́ка на вся́ко вре́мя обновля́юще и труды́ пра́ведными от рабо́ты тле́нию свободи́тися тща́щеся, и та́ко сме́ртию вре́менною жи́знь ве́чную улучи́сте; те́мже ны́не подви́гните и на́с сла́вити Бо́га и взыва́ти ва́м:

Ра́дуйтеся, в по́двизех о Христе́ посеще́ния и утеше́ния Бо́жия сподо́бльшиися; ра́дуйтеся, добро́ту неизрече́нную сла́вы Его́ лицезре́ти удосто́ившиися.

Ра́дуйтеся, ка́ющихся и па́ки исправля́ющихся хода́таи преусе́рднии; ра́дуйтеся, бо́рющихся со страстьми́ и похотьми́ помо́щницы преизря́днии.

Ра́дуйтеся, обита́телие преблаже́ннии ми́ра го́рняго; ра́дуйтеся, засту́пницы многомо́щнии ми́ра до́льняго.

Ра́дуйтеся, житие́ и ве́ру на́шу благода́тно осоля́ющии; ра́дуйтеся, от грехо́вных по́мыслов на́с охраня́ющии.

Ра́дуйтеся, словеса́ Госпо́дня на сердца́х свои́х начерта́вшии; ра́дуйтеся, за́поведей Бо́жиих пути́ все́м се́рдцем возлюби́вшии.

Ра́дуйтеся, я́ко ми́лость ва́ша к стра́ждущим николи́же оскудева́ет; ра́дуйтеся, я́ко грехо́в челове́ческих мно́жество любы́ ва́ша покрыва́ет.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 13.

О вели́цыи и сла́внии святи́и земли́ Екатеринбу́ржския, приими́те ми́лостивно сие́ приноше́ние убо́гое, и моли́твами свои́ми сохрани́те на́с в жи́зни се́й от неду́г душе́вных и теле́сных, по преставле́нии же на́шем помози́те ве́чных му́к изба́витися, да сподо́бимся ку́пно с ва́ми во Ца́рствии Небе́снем вы́ну пе́ти Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Тро́ицы Святы́я Престо́лу стра́шному со А́нгелы предстои́те торжеству́юще, на весе́лие все́х правосла́вных собира́юще, мы́ же, ве́рою серде́чною от души́ подвиза́еми и благогове́ния ду́хом исполня́еми, помина́ем сла́вныя по́двиги ва́ша и гла́сы хвале́бными зове́м такова́я:

Ра́дуйтеся, Святы́я Тро́ицы честна́я и чи́стая селе́ния; ра́дуйтеся, с Небесе́ бо дне́сь на́м возвеща́ете Тоя́ веле́ния.

Ра́дуйтеся, А́нгелов собесе́дницы, со апо́столы и проро́ки ны́не велича́емии; ра́дуйтеся, в черто́зех ра́йских со все́ми святы́ми ра́вно ублажа́емии.

Ра́дуйтеся, бо́дрии на́ши блюсти́телие от наве́тов а́да преле́стных; ра́дуйтеся, и лени́вых подвиза́ющии достига́ти высо́т Небе́сных.

Ра́дуйтеся, сла́вными венцы́ в раи́ сла́дости увенча́ннии; ра́дуйтеся, те́плии хода́таи, от Бо́га на́м дарова́ннии.

Ра́дуйтеся, все́х на́с заступа́ющии во вся́кой ну́жде и ско́рби; ра́дуйтеся, все́м на́м помога́ющии в соверше́нии де́л благи́х и до́брых.

Ра́дуйтеся, чистоты́ и целому́дрия преди́внии храни́телие; ра́дуйтеся, е́же о Бо́зе жи́тельства и́стиннии люби́телие.

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Конда́к 1.

Честни́и и сла́внии святи́и Екатеринбу́ржстии, Бо́гови благоугоди́вшии и в Ца́рствии Небе́снем дне́сь ликовству́ющии, похва́льная пе́ния прино́сим ва́м, мы́ гре́шнии, вы́ же, я́ко иму́ще дерзнове́ние ко Влады́це и Го́споду, от вся́ких на́с бе́д и напа́стей свобожда́йте благоприя́тными свои́ми моли́твами, да со умиле́нием взыва́ем си́це:

Ра́дуйтеся, вси́ святи́и земли́ Екатеринбу́ржския, Це́ркве Христо́вы похвало́ и украше́ние.

Моли́тва.

О преди́внии чудотво́рцы и вели́цыи уго́дницы Бо́жии, вси́ святи́и, в земли́ Екатеринбу́ржстей сла́вно просия́вшии! Предстоя́ще престо́лу Пресвяты́я Тро́ицы, при́зрите ми́лостивно на ны́ и на вся́ лю́ди, к заступле́нию ва́шему притека́ющия. Услы́шите на́с, моля́щихся ва́м и чту́щих всечестну́ю па́мять ва́шу. Простри́те ру́це свои́ ко Влады́це небеси́ и земли́, я́ко да соблюде́т в ми́ре и благоде́нствии страну́ на́шу, Це́рковь да сохрани́т от гоне́ний, ересе́й и раско́лов; умоли́те ми́лостиваго Бо́га отврати́ти от на́с вся́кий гне́в пра́ведный, на ны́ дви́жимый. Сохрани́те вся́ гра́ды и ве́си Оте́чества на́шего, и вся́ страны́ христиа́нския от гра́да и гла́да, от трясе́ния и пото́па, от зно́я и мра́за, от огня́ и меча́, от нахожде́ния иноплеме́нных и междоусо́бныя бра́ни, от смертоно́сныя я́звы и от вся́каго зла́. Исхода́тайствуйте си́льным ва́шим пред Бо́гом предста́тельством па́стырем Це́ркве му́дрость духо́вную и ре́вность о спасе́нии пасо́мых; градонача́льником и судия́м стра́х Бо́жий, правдолю́бие и безкоры́стие; во́ином терпе́ние, му́жество и на враги́ одоле́ние; супру́гом любо́вь, ве́рность и согла́сие; ку́плю де́ющим праводу́шие, земледе́льцем трудолю́бие; си́рым призре́ние, оби́димым заступле́ние, оклевета́нным оправда́ние; все́м же на́м дарова́ти вся́, я́же в жи́зни вре́менней потре́бная и к ве́чному спасе́нию поле́зная. Е́й, святи́и Бо́жии, помози́те на́м избежа́ти па́губных сете́й диа́вольских, препобеди́ти собла́зны ми́ра сего́, проти́ву спасе́ния на́шего ополча́ющагося, наста́вите ны́ тве́рдо в ве́ре правосла́вней подвиза́тися. Потщи́теся благоприя́тным свои́м хода́тайством умоли́ти Го́спода, да низпо́слет на́м ти́хое и богоуго́дное житие́, уврачу́ет Свое́ю благода́тию на́ша неду́ги душе́вныя и теле́сныя, согре́ет сердца́ на́ша любо́вию дру́г ко дру́гу и сотвори́т ны́ братолю́бны и единомы́сленны. Да да́рует на́м Госпо́дь ва́шим предста́тельством во искуше́ниих му́жество, в злострада́ниих терпе́ние, в моли́твах постоя́нство; егда́ же прии́дет ча́с кончи́ны на́шея, да утверди́т О́н ми́р Сво́й в душа́х на́ших, да и мы́ в и́стиннем покая́нии и чи́стом сведе́нии со́вести своея́ предста́нем ко Го́споду и сподо́бимся десна́го стоя́ния, и со все́ми святы́ми воспое́м сла́ву Отцу́ и Сы́ну и Свято́му Ду́ху во ве́ки веко́в. Ами́нь.