Конда́к 1.

Избра́нным Бо́гом от су́етнаго ми́ра, ва́м, о преподо́бнии отцы́ О́птинстии, кре́ст сво́й благогове́йно подъе́мше и Христу́ последова́вшим ве́рою, я́ко дерзнове́нным предста́телем на́шим пред Го́сподем ны́не усе́рдное моле́ние принося́ще, с любо́вию взыва́ем:

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

И́кос 1.

А́нгельскаго и́ноческаго жития́ все́м се́рдцем взыска́вше, вся́ мирска́я пристра́стия отверго́сте, Богому́дрии, и во объя́тия О́тча с любо́вию в оби́тель О́птину прите́кше, путе́м те́сным и приско́рбным до конца́ дне́й ва́ших ше́ствовасте. Сего́ ра́ди воспева́ем си́це:

Ра́дуйтеся, на зо́в Госпо́день ра́достно прите́кшии; ра́дуйтеся, все́м жела́нием Христу́ после́довавшии.

Ра́дуйтеся, кре́ст сво́й на ра́мо восприи́мшии; ра́дуйтеся, па́че Го́спода ничесо́же возлюби́вшии.

Ра́дуйтеся, Христа́ ра́ди всеконе́чно себе́ отве́ргшиися; ра́дуйтеся, Ца́рствия Бо́жия блаже́ннии насле́дницы.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 2.

Ви́девше се́ти диа́вольския, а́ки паучи́на в ми́ре распросте́ртыя, и во глубине́ серде́ц ва́ших восчу́вствовавше, я́ко от ни́х челове́цы то́кмо смире́нием спаса́ются, себе́ саме́х в те́плой моли́тве пред Го́сподем поверго́сте, со умиле́нием взыва́юще: Аллилу́иа.

И́кос 2.

Разуме́вше се́рдцем и умо́м, я́ко де́лы свои́ми не оправди́тся пред Бо́гом вся́к живы́й, и при́сно содержа́ще пред очесы́ ва́шими согреше́ния своя́, то́ки сле́зныя, еди́ному Го́споду зри́мыя, источа́ти не преста́сте, покая́ние души́ Ему́ принося́ще, Его́же о́браз показа́сте на́м, взыва́ющим:

Ра́дуйтеся, грехи́ своя́ неприкрове́нны прозрева́вшии; ра́дуйтеся, да́р умиле́ния и сле́з от Го́спода прия́вшии.

Ра́дуйтеся, блаже́нство пла́ча о гресе́х позна́вшии; ра́дуйтеся, неусыпа́ющую ско́рбь о ни́х стяжа́вшии.

Ра́дуйтеся, на земли́ покая́ния пропове́дницы; ра́дуйтеся, на небеси́ ны́не Го́сподем утеша́емии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 3.

Си́лу искупи́тельных страда́ний Христо́вых положи́сте, святи́и, я́ко неруши́мую наде́жду спасе́ния, себе́ саме́х ху́ждшими все́х челове́к и никоея́же ми́лости досто́йных помышля́юще, и сего́ ра́ди со мно́гим смире́нием и благодаре́нием при́сно вопия́сте Бо́гу: Аллилу́иа.

И́кос 3.

Иму́ще в сердца́х свои́х Боже́ственный смиренному́дрия да́р, и́стиннии ученицы́ Христа́, смири́вшаго Себе́ да́же до сме́рти Кре́стныя, ни во что́ же вмени́сте вся́ по́двиги и труды́ ва́ша. Возраста́ющим бо по́двигом, сугу́бо возраста́ше и смире́ние, ему́же дивя́щеся, глаго́лем:

Ра́дуйтеся, послуша́нию и смире́нию Спаси́телем науче́ннии; ра́дуйтеся, за смире́ние Го́сподем Сла́вы вознесе́ннии.

Ра́дуйтеся, безгне́вия и кро́тости смире́нием дости́гшии; ра́дуйтеся, смире́нием и самоукоре́нием поко́й душа́м обре́тшии.

Ра́дуйтеся, нището́ю духо́вною обогати́вшиися избра́нницы; ра́дуйтеся, ва́ше бо е́сть Ца́рствие Небе́сное, ни́щим ду́хом угото́ванное.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 4.

Бу́рю страсте́й, пло́тию и диа́волом воздвиза́емую, утоля́юще, у́м влады́ку над страстьми́ па́губными по́стнически поста́висте, му́жески бо естество́ пону́дивше, потща́стеся благода́тию Бо́жиею ху́ждшее покори́ти лу́чшему и пло́ть порабо́тити ду́ху, Подвигополо́жнику Христу́ пе́ти не престаю́ще: Аллилу́иа.

И́кос 4.

Слы́шавше глаго́л Госпо́день, я́ко Ца́рствие Небе́сное ну́дится и то́кмо ну́ждницы восхища́ют е́, посто́м, бде́нием и моли́твою непреста́нно подвиза́стеся и пло́ть свою́ со страстьми́ и похотьми́ Христо́ви распя́сте, уста́вы и́ноческия неруши́мо соблю́дше. Те́мже ублажа́ем вы́:

Ра́дуйтеся, благо́е и́го Христо́во люботру́дно поне́сшии; ра́дуйтеся, трезве́нием серде́чным ду́ха не угаси́вшии.

Ра́дуйтеся, кре́пкое хране́ние усто́м свои́м полага́вшии; ра́дуйтеся, телеса́ своя́ неща́дно утесня́вшии.

Ра́дуйтеся, с теле́сными по́двиги у́мное де́лание сочета́вшии; ра́дуйтеся, в терпе́нии ва́шем ду́ши ва́ша стяжа́вшии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 5.

Светоно́сное и́мя Иису́сово, я́ко ору́жие непобеди́мое проти́ву бесо́вския ра́ти, непреста́нно в се́рдце с ве́рою нося́ще, приснотеку́щий исто́чник благода́ти обрето́сте, восходя́ще от си́лы в си́лу и о́гнь ко огню́ прилага́юще, очище́нным смы́слом воспева́ете Бо́гу: Аллилу́иа.

И́кос 5.

Прозрева́юще всеча́сно не́мощь свою́ и спаси́тельную, благода́тную си́лу моли́твы Иису́совы, николи́же преста́сте твори́ти ю́, страсте́й прило́ги то́ю посека́юще и вся́ ко́зни вра́жия попаля́юще, в безмо́лвии се́рдца моли́твенное собесе́дование с Го́сподем та́инственно обре́тше, на́с науча́ете взыва́ти ва́м:

Ра́дуйтеся, ве́сь у́м сво́й в моли́тву погрузи́вшии; ра́дуйтеся, всеце́ло горе́ сердца́ своя́ име́вшии.

Ра́дуйтеся, на моли́тве ни о че́мже су́етнем помышля́вшии; ра́дуйтеся, и́мя Иису́сово неусы́пно призыва́вшии.

Ра́дуйтеся, моли́твы серде́чныя изря́днии подви́жницы; ра́дуйтеся, вся́ проси́мая во и́мя Госпо́дне получа́вшии моли́твенницы.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 6.

Предстоя́ще се́рдцем в моли́тве пред Кресто́м за грехи́ людски́я стра́ждущаго Го́спода, рыда́нием возрыда́ете, преподо́бнии, ско́рбию о гресе́х свои́х снеда́еми и неизглаго́ланною любо́вию к Искупи́телю на́шему возгара́ющеся, до конца́ жития́ у́бо тре́петно взыва́сте Ему́: Аллилу́иа.

И́кос 6.

Возсия́вшу в сердца́х ва́ших све́ту любве́ Боже́ственныя, сла́ву земну́ю и похвалы́ возненави́десте и омерзи́сте, безче́стие же от челове́ков и вся́кия ско́рби отве́рстым се́рдцем ра́достно прие́млюще, поноше́нию Христо́ву усе́рдно приобщи́стеся. На́м у́бо о́браз злострада́ния и терпе́ния показа́сте, зову́щим:

Ра́дуйтеся, я́звы Го́спода Иису́са Христа́ на телеси́ свое́м носи́вшии; ра́дуйтеся, поруга́ния, я́ко врачевство́ чисти́тельное, усе́рдно пи́вшии.

Ра́дуйтеся, от по́честей земны́х все́м се́рдцем отврати́вшиися; ра́дуйтеся, за ненави́дящих ва́с с любо́вию моли́вшиися.

Ра́дуйтеся, оби́дящих ва́с, я́ко благоде́телей, возлюби́вшии; ра́дуйтеся, благодари́ти Милосе́рдаго Го́спода николи́же преста́вшии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 7.

Хотя́й Госпо́дь все́м челове́ком спасти́ся и в ра́зум и́стины приити́, ви́дя ва́ше благо́е произволе́ние и тру́д непреста́нный в исполне́нии за́поведей Его́, отве́рзе ва́м у́м разуме́ти пути́ Своя́ и оправда́нием Свои́м научи́ ва́с. Те́мже се́рдцем просвеще́нным вы́ну воспева́сте: Аллилу́иа.

И́кос 7.

Ди́вна дела́ Твоя́, Го́споди, я́ко па́че кни́жник вразумля́еши рабо́в Твои́х, все́м се́рдцем взыску́ющих Тя́, и открыва́еши о́чи и́х, да уразуме́ют чудеса́ от зако́на Твоего́. Блажи́м бо преподо́бных Твои́х, отце́в на́ших О́птинских, при́сно поуча́вшихся в за́поведех Твои́х, я́же возлюби́ша зело́, и пое́м и́м:

Ра́дуйтеся, словеса́ Бо́жия, я́ко бога́тство мно́го, в се́рдце сокры́вшии; ра́дуйтеся, путие́ за́поведей Бо́жиих все́м се́рдцем возлюби́вшии.

Ра́дуйтеся, вся́к пу́ть непра́вды омерзи́вшии; ра́дуйтеся, от пути́ Госпо́дня николи́же отступи́вшии.

Ра́дуйтеся, в до́брем по́двизе угото́вившиися и не смути́вшиися; ра́дуйтеся, сло́во Бо́жие вмести́вше, ми́р мно́г во Христе́ обре́тшии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 8.

Стра́нников и прише́льцев на земли́ себе́ помышля́юще, ничесо́же от тле́нных веще́й ми́ра сего́ стяжа́ти себе́ не возжела́сте, да не бу́дут сердца́ ва́ша к земли́ влеко́ма, оба́че к еди́ному Бо́гу прилепи́стеся, чи́сте вознося́ще Ему́ пе́снь: Аллилу́иа.

И́кос 8.

Вся́кое плотско́е пристра́стие, от любве́ Госпо́дни отлуча́ющее, вседу́шно отверго́сте, еди́ное на потре́бу взыску́юще. Всегда́ у́бо при ногу́ Иису́сову неотторже́нною приседе́сте любо́вию, ко бла́гом жите́йским сердца́ не прилага́юще и все́ упова́ние свое́ на Го́спода возложи́вше. Те́мже похваля́ем ва́с, святи́и:

Ра́дуйтеся, без пристра́стия к ми́ру житие́ свое́ сконча́вшии; ра́дуйтеся, от земны́х забо́т свобо́ждшеся, сла́дость чи́стыя моли́твы позна́вшии.

Ра́дуйтеся, тве́рдою ве́рою попече́ния жите́йская отложи́вшии; ра́дуйтеся, нестяжа́нием и послуша́нием па́губныя стра́сти умертви́вшии.

Ра́дуйтеся, и́ноческий обе́т нестяжа́ния свя́то соблю́дшии; ра́дуйтеся, во́лю свою́ отсе́кшии Христо́вы послу́шницы.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 9.

Вся́ моли́твы ва́ша и вся́ си́лы ва́ша подвиго́сте, преподо́бнии, во е́же стяжа́ти чистоту́ душе́вную и теле́сную, без нея́же, по словеси́ Христо́ву, никто́же у́зрит Бо́га; те́мже у́бо чи́стым се́рдцем сподо́бистеся в раи́ Госпо́дни досто́йно воспе́ти чу́дную пра́ведных пе́снь, зову́ще: Аллилу́иа.

И́кос 9.

Вою́ющии на ду́шу плотска́я вожделе́ния посто́м и моли́твою укроща́юще, по́мыслом грехо́вным возоблада́ти ва́ми не попуска́ете, от Го́спода Бо́га, еди́наго вла́сть иму́щаго побежда́ти естества́ чи́н, да́р чистоты́ и целому́дрия прия́сте. Приими́те у́бо и от на́с хвале́ния такова́я:

Ра́дуйтеся, благода́ть Бо́жию в борьбе́ с пло́тию смире́нием привле́кшии; ра́дуйтеся, труды́ и лише́ния возлюби́вше, поко́й теле́сный отри́нувшии.

Ра́дуйтеся, посто́м и всено́щными моле́ньми по́хоть пло́ти умертви́вшии; ра́дуйтеся, естества́ уста́вы си́лою Христо́вою победи́вшии.

Ра́дуйтеся, телеса́ и ду́ши ва́ша чи́сты Го́сподеви прине́сшии; ра́дуйтеся, чи́стии се́рдцем, Бо́га в ве́чнем блаже́нстве зря́щии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 10.

Спасти́ хотя́ще ду́ши своя́ для жи́зни ве́чныя, вся́ помышле́ния о земне́м и привре́меннем отри́нусте и Спаси́телю на́шему, за́поведь вели́ку о любви́ ученико́м Свои́м да́вшему, де́лом и и́стиною после́довасте. Сего́ ра́ди бли́жних ва́ших те́плою любо́вию тогда́ возлюби́сте, Небе́сному Отцу́ все́х челове́ков зову́ще: Аллилу́иа.

И́кос 10.

Возлюби́вше все́ю душе́ю бли́жняго своего́, Ца́рствие Бо́жие вну́трь себе́ обрето́сте, те́мже сни́де в сердца́ ва́ша о́гнь попаля́яй любве́ Бо́жия, е́юже необыме́нно насыща́ющеся, всеце́ло себе́ в же́ртву дело́м любве́ принесо́сте. Ны́не же и от на́с благогове́йное пе́ние сие́ слы́шите:

Ра́дуйтеся, все́х челове́ков свято́ю любо́вию возлюби́вшии; ра́дуйтеся, во е́же не́кия спасти́, все́м вся́ бы́вшии.

Ра́дуйтеся, о го́рестех людски́х сле́зно воздыха́вшии; ра́дуйтеся, все́х притека́ющих в сердца́х свои́х вмеща́вшии.

Ра́дуйтеся, тща́ от себе́ никого́же отпуска́вшии; ра́дуйтеся, ду́ши ва́ша за бли́жних полага́вшии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 11.

Пе́ние моле́бное прино́сим ва́м, преподо́бнии отцы́ на́ши О́птинстии, ва́шею бо стезе́ю вои́стину пра́во ходи́ти позна́хом. Блаже́ни есте́, Христу́ рабо́тавшии и вра́жию посрами́вшии си́лу, и́стинное пра́вило доброде́тели показа́стеся все́м, Го́сподеви зову́щим: Аллилу́иа.

И́кос 11.

Све́тлыя по́двиги ва́ша похваля́юще, преподо́бнии отцы́ на́ши О́птинстии, ублажа́ем ва́с, я́ко сла́вных наста́вников мона́хов и чу́дных собесе́дников А́нгелов ны́не на небеси́ Престо́лу Бо́жию предстоя́щих и моля́щихся о на́с, с любо́вию пою́щих ва́м:

Ра́дуйтеся, трезве́ния непреста́ннаго усе́рднии ревни́телие; ра́дуйтеся, пла́мени серде́чнаго неусы́пнии храни́телие.

Ра́дуйтеся, непоколеби́мии столпи́ послуша́ния, вся́ претерпе́вшии; ра́дуйтеся, мно́гими скорбьми́ в Ца́рствие Бо́жие вше́дшии.

Ра́дуйтеся, и́ноческаго жития́ равноа́нгельнии подви́жницы; ра́дуйтеся, до́брии раби́ Бо́жии, блази́и и ве́рнии.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 12.

Благода́ти да́р испроси́те на́м у Го́спода, о блаже́ннии, ве́рно хва́лящим ва́с, мо́лим. Вонми́те воздыха́нием на́шим, сле́з на́ших не пре́зрите. Умоли́те Го́спода утоли́ти лю́тыя стра́сти на́ша, да́ти на́м пла́ч сокруше́нный о гресе́х на́ших, да чи́стою душе́ю и неоскверне́нными устна́ми ку́пно с ва́ми сподо́бимся в раи́ Госпо́дни воспева́ти: Аллилу́иа.

И́кос 12.

Пою́ще ны́не ва́с, о преподо́бнии, хвале́бными гла́сы, ве́мы, я́ко не пе́ния усте́н взыску́ете, но по́двигом ва́шим после́дования, смире́ния серде́чнаго и жития́ исправле́ния. Те́мже в покая́нии по́мощи ва́шея прося́ще, любо́вию же подвиза́еми, глаго́лем:

Ра́дуйтеся, до́бре жи́тельствующих огражда́ющии; ра́дуйтеся, немощны́х и си́рых укрепля́ющии.

Ра́дуйтеся, па́дающим ру́ку по́мощи простира́ющии; ра́дуйтеся, ка́ющимся сле́зы уте́шительныя низпосыла́ющии.

Ра́дуйтеся, все́м призыва́ющим ва́с ско́рии помо́щницы; ра́дуйтеся, спасе́ния на́шего пред Бо́гом те́плии хода́таи. Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 13.

О пресла́внии уго́дницы Христо́вы, преподо́бнии отцы́ и ста́рцы, Моисе́е, Анто́ние, Исаа́кие, Иларио́не, Анато́лие, Ио́сифе и Вторы́й Исаа́кие, Льве́, Мака́рие, Амвро́сие, Варсоно́фие, Вторы́й Анато́лие, Некта́рие и Ни́коне, я́ко се́дмь столпо́в и се́дмь свети́льников в О́птинстей оби́тели просия́вшии! Ны́нешнее на́ше моле́ние услы́шите и испроси́те на́м у Го́спода смире́ние и па́мять сме́ртную, да изба́вит на́с Госпо́дь от вся́каго зла́ и сподо́бит христиа́нския кончи́ны все́х вопию́щих Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельскаго и́ноческаго жития́ все́м се́рдцем взыска́вше, вся́ мирска́я пристра́стия отверго́сте, Богому́дрии, и во объя́тия О́тча с любо́вию в оби́тель О́птину прите́кше, путе́м те́сным и приско́рбным до конца́ дне́й ва́ших ше́ствовасте. Сего́ ра́ди воспева́ем си́це:

Ра́дуйтеся, на зо́в Госпо́день ра́достно прите́кшии; ра́дуйтеся, все́м жела́нием Христу́ после́довавшии.

Ра́дуйтеся, кре́ст сво́й на ра́мо восприи́мшии; ра́дуйтеся, па́че Го́спода ничесо́же возлюби́вшии.

Ра́дуйтеся, Христа́ ра́ди всеконе́чно себе́ отве́ргшиися; ра́дуйтеся, Ца́рствия Бо́жия блаже́ннии насле́дницы.

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Конда́к 1.

Избра́нным Бо́гом от су́етнаго ми́ра, ва́м, о преподо́бнии отцы́ О́птинстии, кре́ст сво́й благогове́йно подъе́мше и Христу́ последова́вшим ве́рою, я́ко дерзнове́нным предста́телем на́шим пред Го́сподем ны́не усе́рдное моле́ние принося́ще, с любо́вию взыва́ем:

Ра́дуйтеся, преподо́бнии отцы́ О́птинстии, благода́ти ста́рчества свети́льницы.

Моли́тва.

О Боже́ственный со́нме преподо́бных оте́ц, богоно́снии ста́рцы о́птинстии, а́нгельским житие́м на земли́ просия́вшии и в Небе́снем гра́де просла́вленнии! Ве́мы, я́ко во дни́ земна́го служе́ния ва́шего никто́же то́щ и неуте́шен от ва́с оти́де, но все́м вся́ бы́сте: боля́щым цели́телие, сомня́щымся утвержде́ние, печа́льным уте́шители: я́ко благода́ть исцеле́ния, прозре́ния, немощны́х ду́ш врачева́ния оби́льна в ва́с яви́ся. Но и ны́не все́м на́м есте́ предста́телие, и о стра́ждущем оте́честве на́шем при́снии пред Престо́лом Бо́жиим печа́льницы, ва́м бо даде́ся е́же за ны́ моли́тися: призри́те у́бо от го́рния сла́вы и ви́дите ста́до ва́ше, е́же пасли́ есте́ на па́жити уче́ния Христо́ва, я́ко смяте́но е́сть и пове́ржено, и от волко́в душетле́нных расхища́емо: посети́те на́с немощны́х и безпомо́щных благосе́рдием ва́шим, заблу́ждшыя взыщи́те, расточе́нныя собери́те, прельще́нныя обрати́те, и совокупи́те Святе́й, Собо́рней и Апо́стольстей Це́ркве: я́же во и́ночестем житии́ огради́те от все́х наве́т вра́жиих, ю́ность вразуми́те, ста́рость поддержи́те, супру́жества в ми́ре и единомы́слии соблюди́те. Услы́шите на́с, ду́ш Боже́ственнии вра́чеве, и наста́вите на́с на пу́ть покая́ния, да после́дующе словесе́м ва́шым, возложи́м себе́ и ве́сь живо́т на́ш в ру́це превели́каго милосе́рдия Бо́жия, да руководи́т во́ля Его́ на́шими мы́сльми и чу́вствы во все́х де́лех и словесе́х на́ших. Простри́те на́м ру́ку по́мощи, отцы́ всеблаже́ннии и научи́те на́с моли́тися, ве́ровати, упова́ти, терпе́ти, проща́ти и люби́ти: да та́ко в за́поведех Госпо́дних при́сно ходя́ще, сподо́бимся хода́тайством ва́шим ве́чныя ра́дости, Ца́рствия Небе́снаго, иде́же вку́пе с ва́ми просла́вим Бо́га, ди́внаго во святы́х Свои́х, Отца́ и Сы́на и Свята́го Ду́ха во ве́ки. Ами́нь.