Конда́к 1.

Избра́нный во́ине Христо́в, священноиспове́дниче о́тче Гео́ргие, венце́м сла́вы Небе́сныя укра́шенный, похва́льное пе́ние тебе́ прино́сим, ты́ же я́ко дерзнове́ние име́я ко Го́споду, моли́ Всеблага́го Царя́ Сла́вы дарова́ти ми́лость почита́ющим святу́ю па́мять твою́ и те́плым се́рдцем пою́щим:

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

И́кос 1.

От ю́ности Христа́ возлюби́л еси́, и Тому́ те́сным путе́м после́довав, сосу́д избра́н Ду́ха Свята́го яви́лся еси́, да́р чудотворе́ния и прозре́ния восприе́мый. Орло́вския земли́ засту́пниче, богоизбра́нне о́тче Гео́ргие, пресла́вный защи́тниче от враго́в спасе́ния на́шего ви́димых и неви́димых, те́мже на́с на похвалу́ твою́ воздвиза́еши ра́достию воспева́ти ти́:

Ра́дуйся благочести́вых роди́телей ча́до прелюбе́зное; ра́дуйся стра́ху Бо́жию и чистоте́ те́ми науче́нный.

Ра́дуйся, со млеко́м ма́терним ве́ру правосла́вную впита́вый; ра́дуйся, у́зкий пу́ть и те́сныя врата́ ко спасе́нию избра́вый.

Ра́дуйся Орло́вския страны́ в ве́ре утвержде́ние; ра́дуйся, пред престо́лом Бо́га Вы́шняго на́ш тве́рдый предста́телю.

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Конда́к 2.

Ви́дя се́рдца твоего́ благо́е наме́рение, Христо́с предначерта́ у́зкий и терни́стый пу́ть спасе́ния твоего́. В зи́му лю́тую, в боле́зни и нищете́ прите́кл еси́ в Спа́с-Чекря́к, иде́же ме́сто бе́ пу́сто и безлю́дно. Но оба́че то́ избра́ Госпо́дь да просла́вится та́мо И́мя Его́, и бы́сть сие́ по́прищем по́двигов твои́х. Те́мже взыва́ем с ра́достию Бо́гу: Аллилу́иа.

И́кос 2.

Слы́ша ве́лие житие́ и благоче́стие богому́дрых отце́в и ста́рцев О́птинских, бу́рею помышле́ний дви́жимый прише́л еси́ я́ко стра́нник убо́гий к вели́кому ста́рцу Амвро́сию да укрепи́т твое́ се́рдце, и да наста́вит тя́ на по́двиг па́стырскаго служе́ния. О́н же, я́ко прови́дев вся́ Бо́жия произволе́ния о тебе́, па́ки возврати́ тя́ в Спа́с-Чекря́к, иде́же и обре́л еси́ до́брое приста́нище и утвержде́ние. Ви́девше таково́е Бо́жие благоволе́ние, глаго́лем си́це:

Ра́дуйся, ве́ры пра́выя неруши́мое основа́ние; ра́дуйся све́тлый о́бразе простоты́ и смире́ния.

Ра́дуйся, све́та Христо́ва носи́телю; ра́дуйся, вся́кия пра́вды до́брый ревни́телю.

Ра́дуйся, любвеоби́лие неистощи́мое; ра́дуйся, христиа́нских доброде́телей насади́телю.

Ра́дуйся, о́тче Гео́ргие, тве́рдый испове́дниче и засту́пнице земли́ на́шея.

Конда́к 3.

Име́яй кре́пкую ве́ру во благо́е промышле́ние Го́спода на́шего о спасе́нии челове́ков, во смире́нии души́ возврати́лся еси́ в прихо́д тво́й, о́тче Гео́ргие, и взя́л еси́ кре́ст тво́й на ра́мена твоя́. Святы́м Да́ром от мра́за замерза́ющим во хра́ме ве́тхом, оба́че возжига́л еси́ ты́ свещу́ пред чудотво́рным о́бразом Пресвяты́я Богоро́дицы и моли́л еси́ усе́рдно Влады́чицу да упра́вит пу́ть тво́й. Мы́ же ви́дяще таково́е твое́ тве́рдое упова́ние на ми́лость Цари́цы Небе́сныя, воспева́ем: Аллилу́иа.

И́кос 3.

Зря́ труды́ твоего́ послуша́ния, вра́г спасе́ния ро́да челове́ческаго за́вистию распала́емь, потща́ся изгна́ти тя́, гну́сными гла́сы хва́лящеся воздви́гнути бе́сы мно́зи супроти́в тебе́ еди́наго. Ты́ же моли́твами ста́рца Амвро́сия укрепля́ем, и небе́сному покрови́телю твоему́ Гео́ргию Победоно́сцу подража́я, победи́л еси́ дре́вняго зми́я и разгна́л еси́ нахожде́ния бесо́вския. Мы́ же, благодаря́ о се́м укрепи́вшаго тя́ Го́спода, с любо́вию взыва́ем ти́:

Ра́дуйся, всю́ наде́жду на Го́спода возложи́вый; ра́дуйся, си́лою Бо́жией полки́ бесо́вския победи́вый.

Ра́дуйся, О́птинскаго ста́рчества досто́йный прие́мниче; ра́дуйся, ста́рца Амвро́сия духо́вный насле́дниче.

Ра́дуйся, и́мже наста́влен бы́л еси́ к духо́вному де́ланию; ра́дуйся, я́ко с ни́м ны́не во сла́ве небе́сней пребыва́еши.

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Конда́к 4.

Ра́зум Боже́ственных писа́ний стяжа́в и си́лою любве́ утвержда́яся в ве́ре, поревнова́л еси́, о́тче, Ева́нгельское житие́ стяжа́ти по о́бразу преподо́бных отце́в Це́ркви дре́вния. Егда́ же даде́ ти́ Госпо́дь разуме́ние сего́ благоугожде́ния, уви́дел еси́, я́ко бла́го е́сть и́го Христо́во и бре́мя Его́ легко́ е́сть, те́мже воспе́л еси́ со умиле́нием: Аллилу́иа.

И́кос 4.

Боготе́чно ше́ствовал еси́ от си́лы в си́лу, о́тче на́ш Гео́ргие, и я́ко досто́йный бы́в сосу́д Бо́жия благода́ти, ве́лия чудеса́ яви́ Госпо́дь ти́, я́ко уго́днику Своему́. Име́я да́р прозре́ния, сокрове́нная серде́ц ве́дый и гряду́щая я́ко настоя́щая, просла́вил еси́ и́мя Христо́во во все́х конце́х земли́ на́шея, сего́ ра́ди вопие́м ти́:

Ра́дуйся, на земли́ от Бо́га да́ром чудотворе́ния просла́вленный; ра́дуйся, нищету́ духо́вную себе́ усво́ивый.

Ра́дуйся, о́тче Гео́ргие, земли́ на́шея защи́тниче; ра́дуйся, грехми́ оскверне́нныя моли́твами твои́ми очища́ющий.

Ра́дуйся, супроти́в духо́в зло́бы до́блий вои́телю; ра́дуйся, на небесе́х венце́м неувяда́емым увенча́нный.

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Конда́к 5.

Слы́шавше лю́дие мно́зи богоуго́дное житие́ твое́, прихожда́ху к тебе́ со упова́нием получи́ти утеше́ние и вспомоществова́ние в жите́йских ско́рбех и ну́ждах. Спасти́ся взыску́ющим Ца́рства Небе́снаго вспомоществу́я, ве́рный путеводи́тель яви́лся еси́ и́м, благода́рно взыва́я к Бо́гу: Аллилу́иа.

И́кос 5.

Све́том до́брых де́л твои́х и врачева́нием неду́гов умили́л еси́ души́ и се́рдца челове́ков. И бы́сть хра́м тво́й, я́ко враче́бница безме́здная вся́кому в о́ньже прите́кшему – бога́тому и убо́гому, прему́дрому и про́стому. Ты́ же еди́но в се́рдце утверди́в, я́ко да́же наказу́я Госпо́дь ми́лует, врачева́ше все́х. Такове́й си́ле твоего́ чудотворе́ния и нелицепри́ятию дивя́щеся, воспева́ем ти́ хвале́бную пе́снь:

Ра́дуйся, неуте́шных в ско́рбех утеше́ние; ра́дуйся, тре́бующих по́мощи стено́ необори́мая.

Ра́дуйся, душе́вных и теле́сных неду́гов ско́рый врачева́телю; ра́дуйся, сло́вом и де́лом бли́жнему усе́рдно послужи́вый.

Ра́дуйся, смиренному́дрия учи́телю; ра́дуйся, ве́ры и любви́ насади́телю.

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Конда́к 6.

Провозве́стник свя́тости и пра́ведности жития́ твоего́ яви́ся святы́й пра́ведный Иоа́нн Кроншта́дтский, имену́я тя́ свои́м сора́тником и прее́мником. Та́кожде и бра́тия О́птинския нача́ша почита́ти тя́ я́ко ста́рца. Ты́ же смире́нно ве́рою и пра́вдою Бо́гу и лю́дем послужи́л еси́, и́хже оберега́я от невзго́д и напа́стей. Те́мже лю́дие правосла́внии с ра́достию прославля́ют Бо́га: Аллилу́иа.

И́кос 6.

Хотя́ Го́спода на́шего Иису́са Христа́ досто́йно ублажа́ти, поревнова́л еси́, о́тче Гео́ргие, но́ваго хра́ма ка́меннаго созда́нию, вку́пе же и просвеще́ния христиа́нскаго насажде́нию и обездо́ленных огражде́нию. Мы́ же, ви́дяще неуста́нный по́двиг твоего́ па́стырскаго служе́ния, изумля́емся, ка́ко понесе́ таковы́я труды́ не́мощь естества́ челове́ческаго, и усе́рдию твоему́ покланя́емся, благода́рно вопию́ще ти́:

Ра́дуйся, ми́р с Бо́гом и людьми́ стяжа́вый; ра́дуйся, в кро́тости и смире́нии пожи́вый.

Ра́дуйся, та́йныя челове́ческия помышле́ния прозрева́вый; ра́дуйся, терпе́ния христиа́нскаго учи́телю.

Ра́дуйся, оби́димых нело́жное упова́ние; ра́дуйся, го́рдых и заблу́ждших вразуми́телю.

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Конда́к 7.

Ди́вный хра́м Преображе́ния Го́спода Сла́вы воздви́гл еси́ в глухо́м сельце́, я́ко в ца́рстем гра́де подоба́ше, и те́м испо́лнил еси́ благослове́ние ста́рца Амвро́сия. С усе́рдием моли́лся еси́, о́тче, ко Го́споду и Пречи́стей Его́ Ма́тери: да пребу́дет хра́м се́й жили́щем Бо́жией благода́ти и да услы́шит в не́м Творе́ц лю́ди Своя́, с ве́рою вопию́щия: Аллилу́иа.

И́кос 7.

Созида́я хра́м ве́лий на приноше́ния людски́я, но оба́че же́ртвы непра́ведныя, о́тче Гео́ргие, отверга́л еси́. Те́мже в та́йная се́рдца зря́, нечести́ваго купца́, оби́дящаго сиро́т и вдови́ц, обличи́л и к покая́нию приве́л еси́ его́, науча́я за все́ благодари́ти и сла́вити Го́спода. Зря́ще таково́е милосе́рдие твое́, пое́м ти́:

Ра́дуйся, све́т Христо́в на ме́сте тьмы́ бесо́вския утверди́вый; ра́дуйся, на ме́сте и́дольских ка́пищ хра́м Бо́жий поста́вивый.

Ра́дуйся, моли́твенными слеза́ми основа́ние его́ ороси́вый; ра́дуйся, рука́ма свои́ма краеуго́льный ка́мень его́ положи́вый.

Ра́дуйся, непрело́жно на по́мощь Бо́жию упова́вый; ра́дуйся, богому́дрый учи́телю и моли́твенниче о душа́х на́ших.

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Конда́к 8.

Стена́ и прибе́жище бы́л еси́ ча́дом твои́м, блаже́нне, егда́ во вре́мя гла́дов и сму́ты ни́щия и убо́гия пита́л еси́, прию́т отрокови́цам устроя́я, да обрету́т та́мо сироты́ душе́вный поко́й и спасе́ние. Те́мже блаже́нство ми́лостивых унасле́довал еси́ ны́не, о́тче Гео́ргие, со святы́ми ве́чно воспева́я на небесе́х хвале́бную пе́снь: Аллилу́иа.

И́кос 8.

Ре́вностно потруди́вшися на бла́го бли́жним свои́м, созда́л еси́ учи́лище наро́дное, иде́же кро́тко и богому́дренно доброде́телем поуча́л еси́, в милосе́рдии, сострада́нии и целому́дрии вся́ утвержда́я. До́бре упа́сл еси́ Бо́гом вруче́нное тебе́ ста́до, да не похи́тит вра́г неви́димый еди́ну от ове́ц твои́х. Те́мже тя́ хва́лим и зове́м ти́ си́це:

Ра́дуйся, ю́ныя ду́ши для Ца́рствия Небе́снаго возрасти́вый; ра́дуйся, во главу́ у́гла любо́вь христиа́нскую положи́вый.

Ра́дуйся, бездо́мных и сиро́т приста́нище; ра́дуйся, и́мже я́ко оте́ц родно́й и до́брый учи́телю пребы́вший.

Ра́дуйся, любо́вь к труду́ и моли́тве в сердца́ отроко́в влага́вший; ра́дуйся, любо́вию свое́ю невзго́ды други́х покрыва́вший.

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Конда́к 9.

Но́ваго засту́пника, моли́твенника и хода́тая за Росси́ю дарова́ тя́ Госпо́дь в годи́ну тя́жких испыта́ний все́м ве́рным, я́ко мно́зи отпа́даху от спаси́тельнаго корабля́ Це́ркви Правосла́вныя в мо́ре всепа́губных треволне́ний. Ты́ же, о́тче, малове́рныя и заблу́ждшыя усе́рдно наставля́л еси́, е́реси и уче́ния тлетво́рныя облича́я, мно́гия от пути́ поги́бели обрати́л еси́ ко Христу́ Жизнода́вцу, науча́я пе́ти Ему́: Аллилу́иа.

И́кос 9.

Ви́дя держа́вы Росси́йския разоре́ние, наро́да духо́вное паде́ние, ересе́й чу́ждых воста́ние и христиа́н ве́рных зло́е погубле́ние, моли́лся еси́ непреста́нно ко Го́споду, да пощади́т Человеколю́бец отчи́зну на́шу от поги́бели всеконе́чныя хода́тайством Цари́цы Небе́сныя и со́нма Святы́х Ру́сских. Сего́ ра́ди вопие́м ти́ такова́я:

Ра́дуйся, безбо́жия и́дольскаго неуста́нный сопротивобо́рче; ра́дуйся, па́стырю до́брый и ста́да твоего́ от волко́в лю́тых защи́тниче.

Ра́дуйся, ду́ши заблу́ждшия к Бо́гу приводи́вый; ра́дуйся, к едине́нию с Ма́терию Це́рковию отпа́вших призыва́вый.

Ра́дуйся, во огра́ду церко́вную расточе́нныя о́вцы собира́вый; ра́дуйся, незло́бия и всепроще́ния о́браз все́м показа́вый.

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Конда́к 10.

Бу́ри безу́мия и злоре́чия не убоя́лся еси́, священноиспове́дниче о́тче Гео́ргие, егда́ предложе́нный ти́ соу́з со враги́ на па́губу Оте́чества ничто́же сумня́ся отве́ргл еси́. Мы́ же почита́я во Христе́ твои́ страда́ния, про́сим твоея́ по́мощи и заступле́ния. Утверди́ и на́с в ве́ре и терпе́нии и пода́ждь на́м ра́зум воспева́ти Бо́гу при́сно: Аллилу́иа.

И́кос 10.

Кто́ у́бо исчи́слит лише́ния и боле́зни твоя́, егда́ воста́ша на тя́ вожди́ бесо́вския и преда́ша му́кам заточе́ния за и́мя Христо́во. Ты́ же к ве́чному спасе́нию и мучи́тели твоя́ обрати́л еси́, чудеса́ и исцеле́ния творя́, да у́зрят си́лу Бо́жию в не́мощи соверша́емую. Мы́ же припа́дая к честно́му о́бразу твоему́, со умиле́нием взыва́ем ти́:

Ра́дуйся, хулы́ и напа́сти от заблу́ждших претерпе́вый; ра́дуйся, за оби́дящих и гоня́щих тя́ моли́твенниче усе́рдный.

Ра́дуйся, среди́ поруга́ний я́ко отроча́ беззло́бное пребыва́я; ра́дуйся, к покая́нию мучи́телей призыва́я.

Ра́дуйся, сокруше́нныя сле́зы за оста́вивших пу́ть Христо́в пролива́вый; ра́дуйся, за вино́вных пред Судие́ю ми́лостивый хода́таю.

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Конда́к 11.

Мно́ги ско́рби и боле́зни претерпе́л еси́, о́тче на́ш Гео́ргие, егда́ тве́рдо ста́л еси́ супроти́в си́л вра́жиих, и́хже ко́зни и кова́рства облича́я и бе́сы от одержи́мых те́ми отгоня́я. Те́мже до конца́ дне́й твои́х помога́л еси́ стра́ждущим и скорбя́щим, непреста́нною моли́твою славосло́вя Го́спода: Аллилу́иа.

И́кос 11.

Та́ко подвиза́яся, в моли́тве усе́рдной в ру́це Го́спода пре́дал еси́ чи́стую ду́шу твою́, ю́же а́нгелы вознесо́ша со сла́вою в го́рния оби́тели. Ты́ же и по святе́й кончи́не твое́й не оста́вил еси́ си́рыми на́с, ча́д твои́х, наставля́я и исцеля́я все́х с ве́рою к тебе́ приходя́щих, моля́ся за ны́ пред престо́лом Бо́жиим. Сего́ ра́ди приими́ от на́с ма́лое моле́ние сие́:

Ра́дуйся, в и́стине Христо́вой да́же до му́ки сме́ртныя пребы́вый; ра́дуйся, до конца́ вся́кия ско́рби от диа́вола претерпе́вый.

Ра́дуйся, в ско́рбное вре́мя печа́льниче и уте́шителю ве́рных; ра́дуйся, я́ко мно́гия ча́да твоя́ за Христа́ испове́дницы и му́ченицы бы́ша.

Ра́дуйся, при жи́зни до́брый подви́жниче; ра́дуйся, и по сме́рти на небесе́х на́ш до́брый предста́телю.

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Конда́к 12.

Бу́рею зло́бы и неи́стовства ды́шуще, служи́тели безбо́жныя и по́сле сме́рти гна́ху тя́, моги́лу твою́ сравня́ша, хра́м же разори́ша, те́мже и Спа́с-Чекря́к безлю́ден бы́сть. Мня́ху нечести́вии де́ло твое́ и ве́ру правосла́вную зде́ до конца́ истреби́ти. Но оба́че пред кончи́ною твое́ю па́ки сотвори́ Госпо́дь чу́до и дарова́ исто́чник воды́ живо́й, его́же ты́ освяти́л и благослови́л еси́ все́м в ну́ждах и ско́рбех приходи́ти се́мо, я́коже и к тебе́ самому́ прихожда́ху. Сии́ же святы́я во́ды яви́шася бесо́м поруга́ние, ве́рным же исцеле́ние и утеше́ние, зане́же воспева́ем Бо́гу: Аллилу́иа.

И́кос 12.

Де́йством Про́мысла Бо́жия ме́ж дву́х тысящеле́тий просла́влен бы́л еси́ Архиере́йским Собо́ром, священноиспове́дниче Гео́ргие, и в ли́ке Святы́х просия́л еси́. По си́х же дарова́ Госпо́дь Орло́встей земле́ сугу́бую ми́лость, яви́в из под спу́да святы́я мо́щи твоя́. Ны́не с наде́ждою притека́я к се́й многоцеле́бней ра́це, ублажа́ем святу́ю па́мять твою́ вси́, пое́м и сла́вим тя́:

Ра́дуйся, неугаси́мый свети́льниче земли́ Ру́сския; ра́дуйся, просла́вивый и́мя Бо́жие среди́ челове́ков.

Ра́дуйся, ве́сь живо́т тво́й Христу́ Бо́гу преда́вый; ра́дуйся, блаже́нне, любо́вию и кро́тостию зло́бу ве́ка сего́ победи́вый.

Ра́дуйся, блаже́нства Святы́х на небесе́х удосто́енный; ра́дуйся, и на́с гре́шных моля́щихся тебе́ ми́лостию твое́ю не оставля́ющий.

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Конда́к 13.

О, ди́вный уго́дниче Христо́в и чудотво́рче, священноиспове́дниче на́ш Гео́ргие, приими́ сие́ ма́лое моле́ние, я́коже вдови́цы две́ ле́пте. Услы́ши ны́не и на́с гре́шных, скорбьми́, боле́зньми и печа́льми одержи́мых, оба́че с ве́рою почита́ющих честны́я мо́щи твоя́, я́ко многоце́нный зало́г предста́тельства твоего́ о на́с ко Го́споду. Моли́ у́бо Влады́ку на́шего да изба́вит на́с от поги́бели ве́чныя, и да сподо́бит блаже́нства со Святы́ми воспева́ющих Ему́ хвале́бную пе́снь: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

От ю́ности Христа́ возлюби́л еси́, и Тому́ те́сным путе́м после́довав, сосу́д избра́н Ду́ха Свята́го яви́лся еси́, да́р чудотворе́ния и прозре́ния восприе́мый. Орло́вския земли́ засту́пниче, богоизбра́нне о́тче Гео́ргие, пресла́вный защи́тниче от враго́в спасе́ния на́шего ви́димых и неви́димых, те́мже на́с на похвалу́ твою́ воздвиза́еши ра́достию воспева́ти ти́:

Ра́дуйся благочести́вых роди́телей ча́до прелюбе́зное; ра́дуйся стра́ху Бо́жию и чистоте́ те́ми науче́нный.

Ра́дуйся, со млеко́м ма́терним ве́ру правосла́вную впита́вый; ра́дуйся, у́зкий пу́ть и те́сныя врата́ ко спасе́нию избра́вый.

Ра́дуйся Орло́вския страны́ в ве́ре утвержде́ние; ра́дуйся, пред престо́лом Бо́га Вы́шняго на́ш тве́рдый предста́телю.

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Конда́к 1.

Избра́нный во́ине Христо́в, священноиспове́дниче о́тче Гео́ргие, венце́м сла́вы Небе́сныя укра́шенный, похва́льное пе́ние тебе́ прино́сим, ты́ же я́ко дерзнове́ние име́я ко Го́споду, моли́ Всеблага́го Царя́ Сла́вы дарова́ти ми́лость почита́ющим святу́ю па́мять твою́ и те́плым се́рдцем пою́щим:

Ра́дуйся, о́тче Гео́ргие, тве́рдый испове́дниче и засту́пниче земли́ на́шея.

Моли́тва.

О, преблаже́нне о́тче на́ш Гео́ргие! При́зри ны́не от го́рния сла́вы на на́с смире́нных и немощны́х, обремене́нных грехи́ мно́гими, твоея́ по́мощи и утеше́ния уми́льно прося́щих. Те́мже мо́лим тя́, о́тче святы́й, испроси́ и на́м у Бо́га благоприя́тное и спаси́тельное вре́мя на покая́ние. Да отпу́стит Всеми́лостивый Госпо́дь наро́ду на́шему грехи́ за преда́ние и убие́ние Царя́, Пома́занника Бо́жия, за оскверне́ние и разоре́ние хра́мов Правосла́вных, за поруга́ние вся́кия святы́ни земли́ Ру́сския. Ве́мы я́ко осуети́хомся умо́м и се́рдцем преда́хомся непотре́бным и лю́тым страсте́м, благоче́стие презре́хом, па́че же бесо́вское нече́стие возлюби́хом. Простри́ у́бо ны́не моли́твенно ру́це твои́ ко Влады́це все́х и Го́споду, и испроси́ щедрода́тельную Его́ ми́лость да изба́вит на́с от беззако́ний на́ших, от вся́ких бе́д и скорбе́й за е́же на ны́ прише́дших, от раско́лов и ересе́й и от гоне́ний иноплеме́нников на Це́рковь Правосла́вную.

Ве́руем, о́тче всеблаже́нне, я́ко а́ще Христо́вою любо́вию возлюби́л еси́ бли́жния твоя́ еще́ на земли́ тебе́ бы́вшу, кольми́ па́че лю́биши вся́ ны́ и на небесе́х ны́не водворя́яся. Умоли́, священноиспове́дниче на́ш Гео́ргие, ку́пно со все́ми Му́ченики и Испове́дники, Го́спода Бо́га Царя́ Си́л, да пода́ст и на́м грехо́в проще́ние, да процвете́т в Росси́и ве́ра Правосла́вная и водвори́тся па́ки ликова́ние пра́ведных.

Не пре́зри у́бо моле́ний на́ших, излива́емых ны́не пред тобо́ю, и вознеси́ я́ ко всеще́дрому Бо́гу, я́ко кади́ло благово́нное, да твои́ми хода́тайствы почи́ет благода́ть Его́ во гра́де на́шем, иде́же почита́ются пресла́вное и́мя и многоцеле́бныя мо́щи твои́. Те́мже сохраня́еми твои́м предста́тельством, ми́рно и благоче́стно да поживе́м в ве́це се́м, да никто́же во упова́нии свое́м на тя́ посра́млен бу́дет, и да обря́щем благода́ть и ми́лость Го́спода на́шего, Ему́же подоба́ет вся́кая сла́ва, че́сть и поклоне́ние ны́не и при́сно и во ве́ки веко́в. Ами́нь.