Конда́к 1.

Избра́нный уго́дниче Христо́в, те́плый моли́твенниче и преди́вный испове́дниче, о́тче на́ш Иоа́нне, измла́да возлюби́вый житие́ нескве́рное, по́двиг взе́м печа́льника земли́ на́шея, и ве́ру Христо́ву испове́да небоя́зненно, яви́лся еси́ чудотво́рец преизря́днейший, подая́ все́м стра́ждущим исцеле́ние и утеше́ние. Мы́ же, недосто́йнии, пе́ние хвале́бное во умиле́нии серде́ц прино́сим ти́:

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

И́кос 1.

Равноа́нгельнаго жития́ возжела́л еси́ с ле́т ю́ных, о́тче пра́ведне Иоа́нне, посто́м и моли́твою предуготовля́я всего́ себе́ служе́нию Го́сподеви, яви́л еси́ ду́шу свою́ я́ко оби́тель святу́ю для печа́льных сиро́т и вдови́ц, заступа́я и наставля́я на пу́ть спасе́ния к тебе́ притека́ющих. Мы́ же, зря́ще тя́, я́ко па́стыря до́браго, от Бо́га на́м дарова́ннаго, уми́льно вопие́м ти́:

Ра́дуйся, пре́жде рожде́ния и́ноками предрече́нный; ра́дуйся, прорече́ние: Се́й ве́лий вои́стину посреде́ ве́рных бу́дет, житие́м свои́м испо́лнивый.

Ра́дуйся, посто́м и моли́твою ду́шу свою́ я́ко святу́ю оби́тель скорбя́щих ра́ди угото́вавый; ра́дуйся, нищету́ духо́вную па́че сла́достей ми́ра возлюби́вый.

Ра́дуйся, в моли́тве ко Го́споду де́нь и но́щь отроко́м проводи́л еси́; ра́дуйся, неради́вых в хра́м святы́й ходи́ти вразумля́я еси́.

Ра́дуйся, измла́да в хра́ме усе́рдно служи́вый; ра́дуйся, сирота́м и вдови́цам ми́лости неоскудева́емыя подава́вый.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 2.

Ви́дяще лю́тый вра́г ро́да челове́ческаго житие́ твое́ свято́е, о́тче на́ш Иоа́нне, непреста́нно де́яху ти́ па́кости, во е́же озло́бити сро́дники на тя́, и ти́и изгоня́ху тя́ и прию́та не дая́ху. Ты́ же бе́ подо́бие Саро́вскому чудотво́рцу, за оби́дящих моли́лся еси́, воспева́я благодаря́ще Бо́гу: Аллилу́иа.

И́кос 2.

У́м име́я богопросвеще́нный, проше́л еси́ ве́сь пу́ть ско́рбнаго подви́жническаго жития́: поста́, бде́ния нощна́го и сле́з неоску́дных. Стра́нен бе́ са́м и прия́т сироту́ о́трока, наставля́л еси́ его́, пита́я труда́ми свои́ми. Те́мже и мы́ вси́, таково́му твоему́ милосе́рдию дивя́щеся, вопие́м ти́:

Ра́дуйся, житие́м свои́м пресла́вным Бо́гу угоди́вый; ра́дуйся, любо́вию Христо́вою ко́зни диа́вольския победи́вый.

Ра́дуйся, кре́стным зна́мением сме́ртную я́зву врачева́вый; ра́дуйся, о ненави́дящих и гоня́щих усе́рдно к Бо́гу взыва́вый.

Ра́дуйся, слова́ми: Бо́г с ни́ми, ра́нящих тя́, кро́тко проща́л еси́; ра́дуйся, о все́м ми́ре в моли́тве пла́менней сле́зы пролива́л еси́.

Ра́дуйся, неоскудева́емую ми́лость к о́троку-сироте́ показа́вый; ра́дуйся, от трудо́в свои́х неиму́щим ще́дро подава́вый.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 3.

Си́ла Вы́шняго просвети́ душе́вная очеса́ твоя́, блаже́нне Иоа́нне, внегда́ смире́нно позна́л еси́ во́лю Госпо́дню, приуча́яся измла́да житию́ стро́гому, оста́вив пре́лесть ми́ра сего́, непреста́нно помышля́я о небе́снем и взыва́я Бо́гу: Аллилу́иа.

И́кос 3.

Иму́щи ре́вность Бо́жию измла́да и Бо́жий глаго́лы па́мятуя: Иде́же бо еста́ два́ или́ трие́ со́брани во И́мя Мое́, ту́ е́смь посреде́ и́х, ты́, о́тче Иоа́нне, егда́ бе́ о́трок ма́л, ходи́ти в Це́рковь Бо́жию лю́ди призыва́л еси́. Мы́ же, благодаря́ще Бо́га, воспева́ем ти́:

Ра́дуйся, смиренному́дрие с ю́ных ле́т стяжа́вый; ра́дуйся, непреста́нным по́двигом вели́ким уго́дником подража́вый.

Ра́дуйся, во́лю Госпо́дню смире́нно в себе́ позна́вый; ра́дуйся, Го́спода ра́ди по́стное житие́ возлюби́вый.

Ра́дуйся, вся́ кра́сная ми́ра сего́ ни во что́ же вмени́вый; ра́дуйся, все́ упова́ние на Бо́га от ю́ности возложи́вый.

Ра́дуйся, благу́ю любо́вь к хра́му Бо́жию при́сно име́л еси́; ра́дуйся, пе́нием сладостотво́рным моля́щихся услажда́л еси́.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 4.

Бу́ри жития́ ми́ра сего́ присноволну́ющагося избега́я, в ча́щи лесны́я удаля́лся, сокрыва́л еси́ себе́, свя́те Иоа́нне, и та́мо у́м сво́й в го́рняя возводя́, возлюби́л еси́ в моли́тве сла́дость и упокое́ние, взыва́я к Бо́гу: Аллилу́иа.

И́кос 4.

Слы́шаще и ви́дяще свято́е житие́ твое́, свя́те Иоа́нне, бли́жний и да́льний удивля́хуся тебе́, и приходя́ще к тебе́, поуча́хуся о словесе́х твои́х и сове́тех, сла́вяще Го́спода, ди́внаго во святы́х Свои́х. И мы́ вси́ с ве́рою и любо́вию восхваля́ем тя́, пра́ведне Иоа́нне, и вопие́м ти́ си́це:

Ра́дуйся, я́ко по́двигами и чудесы́ твои́ми зе́млю на́шу облагоуха́вый; ра́дуйся, все́м се́рдцем благода́ть Христо́ву стяжа́вый.

Ра́дуйся, житие́м свои́м Саро́вскому чудотво́рцу подража́вый; ра́дуйся, сла́дость ра́йскую в моли́тве пла́менней взыска́вый.

Ра́дуйся, у́м сво́й в го́рняя усе́рдно вперя́вый; ра́дуйся, по́двиги твоя́ от взо́ра людска́го укрыва́вый.

Ра́дуйся, в искуше́ниях к Бо́гу непреста́нно взыва́вый; ра́дуйся, в беда́х и ско́рбех все́ упова́ние на Него́ возлага́вый.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 5.

Боже́ственнаго Ду́ха преиспо́лнен бы́л еси́, святы́й пра́ведный Иоа́нне, доброде́тельнаго ра́ди жития́ твоего́, зане́ кро́ток, ми́лостив, де́вственен, чи́ст се́рдцем, терпели́в зело́, непамятозло́бив бы́л еси́: сего́ ра́ди Творе́ц и в чудесе́х пресла́вно показа́ тя. Мы́ же, прославля́я Бо́га, просла́вившаго тя́, вопие́м Ему́: Аллилу́иа.

И́кос 5.

Ви́дя вра́г ро́да челове́ча чи́стое и свято́е житие́ твое́, свя́те Иоа́нне, наводя́ на тя́ лю́ди злы́, и́же беззако́нно истяза́ху тя́ и е́ле жи́ва су́ща оставля́ху. Ты́ же, святы́й о́тче, я́ко а́гнец кро́ток вся́ терпе́л еси́, за оби́дящих тя́ Го́сподеви моля́ся. Те́мже мы́ вси́, таково́му твоему́ незло́бию дивя́щеся, вопие́м ти́:

Ра́дуйся, в кро́тости и смире́нии твое́м Христу́ Бо́гу подража́вый; ра́дуйся, незло́бием твои́м ду́ха зло́бы победи́вый.

Ра́дуйся, цели́телю ско́рый и в беда́х помо́щниче преди́вный; ра́дуйся, прикоснове́нием руки́ твоея́ ду́ха зло́бы изгна́вый.

Ра́дуйся, пома́занием еле́я ра́ны стра́ждущим исцели́л еси́; ра́дуйся, мно́жеством чуде́с Го́спода в житии́ свое́м просла́вил еси́.

Ра́дуйся, посто́м и моли́твою бе́ свети́льник неугаси́мый; ра́дуйся, Ду́хом Святы́м во вся́ дни́ жития́ твоего́ води́мый.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 6.

Пропове́дует земля́ Пе́нзенская по́двиги и труды́ твоя́, богоно́сне о́тче на́ш Иоа́нне: ве́лие поще́ние, моли́твы денноно́щныя, смире́ние и терпе́ние достохва́льныя, сего́ ра́ди яви́лся еси́ земли́ Ру́сския прозябе́ние многопло́дное дара́ми Ду́ха Свята́го, Его́же де́йствием мно́гая и чу́дное соверши́л еси́, подвиза́я ве́рных воспева́ти Бо́гу: Аллилу́иа.

И́кос 6.

Возсия́ душа́ твоя́ в ми́ре го́рнем по отше́ствии твое́м, свя́тче Бо́жий Иоа́нне, иде́же Мирлики́йский чудотво́рец Никола́й и Серафи́м Саро́вский со ине́ми святы́ми мо́лят Бо́га за ны́. Мы́ же, ра́дуяся таково́му о тебе́ Бо́жию Промышле́нию, с любо́вию вопие́м ти́:

Ра́дуйся, в по́двизех ди́вных чудотво́рцем вели́ким поревнова́вый; ра́дуйся, в виде́нии с уго́дниками Бо́жиими в ри́зах ра́вных стоя́вый.

Ра́дуйся, па́ству Пе́нзенскую с любо́вию ре́вностно окормля́л еси́; ра́дуйся, гряду́щее, я́ко настоя́щее провещава́л еси́.

Ра́дуйся, притека́вших к тебе́ на пу́ть спасе́ния направля́л еси́; ра́дуйся, погиба́ющих в пучи́не грехо́вней моли́твою спаса́л еси́.

Ра́дуйся, Про́мыслу Бо́жию ве́ровати малоду́шных утвержда́л еси́; ра́дуйся, гре́шников ко исправле́нию чрез покая́ние возрожда́л еси́.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 7.

Хотя́щу врагу́ спасе́ния ро́да челове́ча истреби́ти ве́ру Правосла́вную в земли́ Ру́сстей, воздви́же тя́ Госпо́дь, о́тче пра́ведне, во утвержде́ние ве́рным, я́ко столпа́ ве́ры неколеби́ма и испове́дника пресла́вна. Те́мже толи́цем в ве́ре стоя́нием твои́м утвержде́ни, Подвигополо́жнику Христу́ Бо́гу вопие́м: Аллилу́иа.

И́кос 7.

Но́ваго ви́дяще тя́ испове́дника Христо́ва, издале́ча притека́ху к тебе́ ве́рни и в ско́рбех и гоне́ниих, ты́ же неустраши́мо испове́дал еси́ ве́ру Христо́ву да́же до у́з темни́чных, о́тче на́ш Иоа́нне, и яви́л себе́ о́браз жития́ и пра́вило ве́ры па́стве твое́й. Те́мже ублажа́я тя́, взыва́ем си́це:

Ра́дуйся, за ве́ру Христо́ву гони́мый; ра́дуйся, у́зы темни́чныя за Го́спода с ра́достию прие́мый.

Ра́дуйся, ра́ны и зауше́ния смире́нно претерпе́вый; ра́дуйся, испове́дниче Христо́в, богому́дрый и прозорли́вый.

Ра́дуйся, кро́тостию свое́ю си́лу вра́жию разруши́вый; ра́дуйся, адама́нте ве́ры несокруши́мый.

Ра́дуйся, испове́дниче сла́вный и неустраши́мый; ра́дуйся, сто́лпе Правосла́вия непоколеби́мый.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 8.

Стра́нное чу́до ви́дим на тебе́, свя́тче пра́ведне, внегда́ стреля́ху в тя́ богобо́рцы, ты́ же це́л бе́ и невреди́м, амали́ка богобо́рнаго побежда́я и Го́сподеви поя́: Аллилу́иа.

И́кос 8.

Ве́сь бе́ в вы́шних, испове́дниче Христо́в Иоа́нне, в до́льнем же ми́ре гоне́ния претерпева́я, со избра́нными Бо́жиими взыва́л еси́ ко Го́споду: Тебе́ ра́ди умерщвля́емся ве́сь де́нь, вмени́хомся я́ко о́вцы заколе́ния. Сего́ ра́ди, укрепля́емии твои́м терпе́нием, взыва́ем ти́:

Ра́дуйся, бра́нь лю́тую от злы́х люде́й прие́мый; ра́дуйся, немощны́я лю́ди в заточе́нии укрепи́вый.

Ра́дуйся, на вопроша́ние палаче́й кро́тко отвеща́вый; ра́дуйся, стра́жнику еди́ному кончи́ну внеза́пную предсказа́вый.

Ра́дуйся, терпе́нием ди́вным безбо́жныя порази́вый; ра́дуйся, в муче́ниих тя́ па́ки невреди́ма Госпо́дь сохрани́вый.

Ра́дуйся, я́ко от убива́ющих тя́ невреди́мо сохрани́лся еси́; ра́дуйся, чу́до ве́лие при муче́нии о́гненнем показа́л еси́.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 9.

Все́ естество́ А́нгельское удиви́ся высоте́ служе́ния твоего́ во тьме́ неве́рия, о́тче Иоа́нне. Ты́ же бы́сть на́м я́ко свети́ло незаходи́мое, зе́млю на́шу чудесы́ мно́гими озаря́ющее, восприя́л еси́ позо́р, и уничиже́ние, и испове́дание за Христа́, побе́дно взыва́я Бо́гу: Аллилу́иа.

И́кос 9.

Вити́йство вся́кое земноро́дных не мо́жет досто́йно восхвали́ти тя́, о́тче на́ш Иоа́нне, пре́дал бо еси́ всего́ себе́ на служе́ние все́м, приходя́щим к тебе́, и сего́ ра́ди лю́то му́чим бы́сть от люде́й злы́х, егда́ тя́ вяза́ху пелено́ю и с брега́ броса́ху в реку́ но́щию, но Госпо́дь тя́ здра́вым сохрани́л е́сть. Посему́ мы́ досто́йную похвалу́ прино́сим ти́ си́це:

Ра́дуйся, луча́ми чуде́с твои́х бу́рю зо́л отгна́вый; ра́дуйся, лише́ния темни́чныя му́жественно претерпе́вый.

Ра́дуйся, де́нь и но́щь за враго́в моли́тву возноси́вый; ра́дуйся, позо́р и уничиже́ние я́ко сла́ву во́ина Христо́ва прия́вый.

Ра́дуйся, му́ченическое испове́дание Го́спода ра́ди яви́вый; ра́дуйся, во времена́ оскуде́ния ве́ры от Бо́га не отступи́вый.

Ра́дуйся, хра́м души́ е́ресию не оскверни́вый; ра́дуйся, в пучи́не испыта́ний ве́ру сохраня́ти научи́вый.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 10.

Спаси́тельнаго по́двига страда́льче дости́гл еси́ изря́дно пред честно́ю кончи́ною твое́ю, егда́ в Четыредеся́тницу Святу́ю еди́ну просфору́ в де́нь вкуша́ше и то́кмо свято́й водо́ю ма́ло запива́ше; диа́вол же отмсти́ ти́, наведе́ на тя́ лю́ди, и́же беззако́нно му́чаше тя́ и едва́ жи́ва су́ща оста́виша. Ты́ же, я́ко а́гнец кро́ток, претерпе́л еси́ вся́, за оби́дящих тя́ моля́ся Бо́гу, воспева́я: Аллилу́иа.

И́кос 10.

Стена́ еси́ все́м Христиа́ном, к заступле́нию твоему́ притека́ющим, Христолю́бче о́тче на́ш Иоа́нне, явля́ешися. Помози́ на́м, гре́шным, да принесе́м пло́д покая́ния и научи́ на́с па́мятовати во вся́ дни́ после́дняя своя́, са́м бо, прови́дев кончи́ну свою́, многоле́тно хожда́ше на ме́сто упокое́ния земна́го и пе́сни исхо́дный по себе́ поя́ше. Мы́ же, любо́вию подвиза́емии, дерза́ем пе́ти тебе́ си́це:

Ра́дуйся, а́нгельское житие́ в бре́ннем телеси́ яви́вый; ра́дуйся, вели́кий по́стниче, Бо́гу от ю́ности послужи́вый.

Ра́дуйся, я́ко благоуха́ние от тебе́ в житии́ и успе́нии исхожда́ше; ра́дуйся, до отше́ствия своего́ на ме́сто поко́я пе́сни исхо́дныя пе́ти хожда́ше.

Ра́дуйся, виде́ния преподо́бнаго Серафи́ма сподо́бился еси́; ра́дуйся, лю́ди мно́гия от пути́ ги́бельнаго отврати́л еси́.

Ра́дуйся, о спасе́нии Росси́и сле́зно Бо́га моли́л еси́; ра́дуйся, свети́льниче, зе́млю Пе́нзенскую па́че со́лнца освети́л еси́.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 11.

Пе́ние благода́рственное непреста́нно возноси́л еси́ Творцу́, уго́дниче Бо́жий, все́м житие́м твои́м и испове́дничеством за Христа́ чудотво́рец ве́лий яви́лся еси́, и по кончи́не твое́й со́лнце взыгра́ху и небеса́ ра́дугой облиста́хуся, пресла́вных моще́й твои́х явле́ние запечатле́ша. Мы́ же, с ра́достию лобыза́я и́х, вопие́м Бо́гу: Аллилу́иа.

И́кос 11.

Светоза́рное свети́ло в земле́ Пе́нзенстей благода́тию и чудеса́ми бы́в в житии́, блаже́нне о́тче, и по кончи́не твое́й возсия́л еси́, просвеща́я вся́ концы́ земли́. Ны́не честны́я мо́щи твоя́ источа́ют мно́жество чуде́с и исцеле́ний все́м с ве́рою и любо́вию притека́ющим к тебе́. Посему́ и мы́, я́ко те́плому о на́с предста́телю и чудотво́рцу, вопие́м ти́:

Ра́дуйся, милосе́рдия исто́чниче неоскудева́емый; ра́дуйся, кла́дезю чуде́с неисчерпа́емый.

Ра́дуйся, о́бразе кро́тости благоле́пный; ра́дуйся, моли́твенниче на́ш неусы́пный.

Ра́дуйся, де́вством прехва́льным укра́шенный; ра́дуйся, чудотво́рче, а́нгелами воспева́емый.

Ра́дуйся, исто́чниче благода́ти на́м явля́емый; ра́дуйся, сердца́ любо́вию насыща́ющий.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 12.

Благода́ть спаси́тельную и ве́лие предста́тельство твое́ пред Бо́гом ве́дуще, мо́лим тя́, ста́рче пра́ведный, моли́ся за ны́, недосто́йныя, ко Всеми́лостивому Спа́су, да упра́вит Це́рковь Свою́ Святу́ю от раско́лов и ересе́й, и ве́сь се́ю от бе́д и напа́стей сохрани́т, да просла́вим Бо́га, воспева́я Ему́: Аллилу́иа.

И́кос 12.

Пою́ще твое́ ди́вное прославле́ние, велича́ем тя́, святы́й пра́ведный Иоа́нне испове́дниче, покланя́емся многоцеле́бным моще́м твои́м, ублажа́ем святу́ю па́мять твою́, ве́мы тя́, я́ко щи́т и огражде́ние на́ше от супоста́т и моли́твенника многомо́щна пред Престо́лом Госпо́дним. Сего́ ра́ди с любо́вию восклица́ем ти́ си́це:

Ра́дуйся, ве́си на́шей похвало́ и утвержде́ние; ра́дуйся, земли́ Росси́йстей украше́ние.

Ра́дуйся, правосла́вным кре́пкое заступле́ние; ра́дуйся, стра́ждущим ско́рое исцеле́ние.

Ра́дуйся, скорбя́щим благонаде́жное утеше́ние; ра́дуйся, прося́щим неоскудева́емое вспоможе́ние.

Ра́дуйся, непоколеби́мая на́ша наде́жда на спасе́ние; ра́дуйся, неруши́мое на́ше огражде́ние.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 13.

О, вели́кий уго́дниче Христо́в и преди́вный испове́дниче, о́тче на́ш Иоа́нне, помо́щниче ско́рый все́м, в ну́ждех и боле́знех к тебе́ притека́ющим! Приими́ от на́с, недосто́йных, с ве́рою и любо́вию возноси́мое тебе́ хвале́бное пе́ние. Огради́ на́с моли́твами твои́ми от вра́г ви́димых и неви́димых, да просла́вим ди́внаго во святы́х Свои́х Бо́га, яви́вшаго на́м в тебе́ ве́лию ми́лость, побе́дную пе́снь воспева́ющим: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Равноа́нгельнаго жития́ возжела́л еси́ с ле́т ю́ных, о́тче пра́ведне Иоа́нне, посто́м и моли́твою предуготовля́я всего́ себе́ служе́нию Го́сподеви, яви́л еси́ ду́шу свою́ я́ко оби́тель святу́ю для печа́льных сиро́т и вдови́ц, заступа́я и наставля́я на пу́ть спасе́ния к тебе́ притека́ющих. Мы́ же, зря́ще тя́, я́ко па́стыря до́браго, от Бо́га на́м дарова́ннаго, уми́льно вопие́м ти́:

Ра́дуйся, пре́жде рожде́ния и́ноками предрече́нный; ра́дуйся, прорече́ние: Се́й ве́лий вои́стину посреде́ ве́рных бу́дет, житие́м свои́м испо́лнивый.

Ра́дуйся, посто́м и моли́твою ду́шу свою́ я́ко святу́ю оби́тель скорбя́щих ра́ди угото́вавый; ра́дуйся, нищету́ духо́вную па́че сла́достей ми́ра возлюби́вый.

Ра́дуйся, в моли́тве ко Го́споду де́нь и но́щь отроко́м проводи́л еси́; ра́дуйся, неради́вых в хра́м святы́й ходи́ти вразумля́я еси́.

Ра́дуйся, измла́да в хра́ме усе́рдно служи́вый; ра́дуйся, сирота́м и вдови́цам ми́лости неоскудева́емыя подава́вый.

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Конда́к 1.

Избра́нный уго́дниче Христо́в, те́плый моли́твенниче и преди́вный испове́дниче, о́тче на́ш Иоа́нне, измла́да возлюби́вый житие́ нескве́рное, по́двиг взе́м печа́льника земли́ на́шея, и ве́ру Христо́ву испове́да небоя́зненно, яви́лся еси́ чудотво́рец преизря́днейший, подая́ все́м стра́ждущим исцеле́ние и утеше́ние. Мы́ же, недосто́йнии, пе́ние хвале́бное во умиле́нии серде́ц прино́сим ти́:

Ра́дуйся, о́тче на́ш Иоа́нне, те́плый моли́твенниче и преди́вный чудотво́рче.

Моли́тва пе́рвая.

О, всеблаже́нне Иоа́нне чудотво́рче, челове́че Бо́жий и ве́рный ра́бе Госпо́день! Ты́ еси́ пра́ведник, я́ко фи́никс процветы́й, насажде́нный во дво́рех Го́спода Бо́га, при́сно многоразли́чныя благода́тию Бо́жией чудеса́ источа́яй. О, всечестна́я главо́, уго́дниче Бо́жий, свя́те пра́ведне Иоа́нне, от рожде́ния своего́ на служе́ние Бо́гу при́званный, научи́ и на́с все́м се́рдцем, все́ю душе́ю, все́м разуме́нием и все́м житие́м свои́м Бо́гу служи́ти и Ему́ одному́ угожда́ти. Ты́ еси́, и́же де́вство и житие́ нескве́рное сохрани́вый, научи́ и на́с, во мно́гих гресе́х сплете́нных, целому́дрию и чи́стых соблюди́ от вся́каго греха́. Ты́ еси́, и́же в незло́бии и терпе́нии испове́дничеством просия́вый, помози́ на́м в терпе́нии и смиренному́дрии ве́рными Бо́гу бы́ти да́же до сконча́ния ве́ка, и я́коже обеща́лся еси́, бу́ди о на́с и держа́ве Росси́йстей хода́тай пред Бо́гом, Ему́же со Единоро́дным Его́ Сыно́м и Всесвяты́м и Благи́м и Животворя́щим Ду́хом сла́ва, че́сть и поклоне́ние подоба́ет, ны́не и при́сно, и во ве́ки веко́в. Ами́нь.

Моли́тва втора́я.

Святы́й пра́ведный о́тче на́ш Иоа́нне! Мо́лим тя́: помога́й на́м, гре́шным рабо́м Бо́жиим (и́мярек), твои́ми моли́твами во все́х ско́рбех, боле́знех, ну́ждех и обстоя́ниих на́ших, сохраня́й на́с и святы́й гра́д се́й (оби́тель сию́) от вся́каго зла́ и вся́кия напа́сти, наипа́че же споспешеству́й ве́чному спасе́нию на́шему. Е́й, смире́нно мо́лим тя́, уго́дниче Бо́жий Иоа́нне: моли́ Христа́ Бо́га на́шего, да отврати́т от на́с вся́кий гне́в, на ны́ дви́жимый, да изба́вит на́с от сете́й вра́жиих, томле́ния во у́зах греха́ и муче́ний а́довых, и да сподо́бит на́с, недосто́йных, одесну́ю Себе́ ста́ти на Суде́ Свое́м пра́веднем и вни́ти в ве́чный поко́й святы́х Его́, иде́же пра́зднующих гла́с непреста́нный и неизрече́нная сла́дость зря́щих добро́ту лица́ Его́: и та́ко возмо́жем с тобо́ю и все́ми святы́ми прославля́ти Отца́ и Сы́на и Свята́го Ду́ха, Тро́ицу Единосу́щную и Неразде́льную, во ве́ки веко́в. Ами́нь.

Моли́тва тре́тия.

О, святы́й новоявле́нный уго́дниче Бо́жий Иоа́нне Оле́невский! По́двигом до́брым подвиза́лся еси́ на земли́, восприя́л еси́ на небесе́х вене́ц пра́вды, е́же угото́вал е́сть Госпо́дь все́м лю́бящим Его́. Те́мже взира́юще на святы́й тво́й о́браз (и поклоня́яся всечестны́м моща́м твои́м), ра́дуемся о пресла́внем сконча́нии жи́тельства твоего́ и чти́м святу́ю па́мять твою́. Ты́ же, предстоя́й Престо́лу Бо́жию, приими́ моле́ния на́ша, рабо́в Бо́жиих (и́мярек), и ко Всеми́лостивому Бо́гу принеси́, о е́же прости́ти на́м вся́кое прегреше́ние и помощи́ на́м ста́ти проти́ву ко́зней диа́вольских, да изба́вльшеся от скорбе́й, боле́зней, бе́д и напа́стей и вся́каго зла́, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во Святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

Моли́тва четве́ртая.

О, ди́вный и кро́ткий уго́дниче Бо́жий и те́плый моли́твенниче о́тче на́ш Иоа́нне! Ты́ измла́да Го́спода возлюби́вый, неуста́нно в хра́ме пребыва́я, в посте́ и моли́тве та́йной во все́х беда́х ду́ши людски́я укрепля́я и утеша́я, Бо́га благодари́л еси́. Те́м же и Ду́х Святы́й изво́ли твои́ма устна́ма во́лю Бо́жию глаго́лати и́стинную и благу́ю все́м приходя́щим к тебе́. Та́ко ны́не на́с притека́ющих к святы́м твои́м и многоцеле́бным моща́м не оста́ви си́рых и стра́ждущих в житии́ се́м твои́м предста́тельством пред Престо́лом Го́спода си́л. Да твои́м моли́твенным хода́тайством укрепля́еми в ве́це се́м, сподо́бимся ве́чныя Небе́сныя оби́тели, иде́же вку́пе с тобо́ю и со все́ми святы́ми да просла́вим Пречестно́е и великоле́пное и́мя Единосу́щныя Тро́ицы, Отца́ и Сы́на и Свята́го Ду́ха. Ами́нь.