Конда́к 1.

Избра́нный слуго́ Царя́ Небе́снаго, Бо́гом да́нный покрови́телю гра́да твоего́, преблаже́нне о́тче на́ш Се́ргие, Правосла́вия изря́дный пропове́дниче, со́нма испове́дников Росси́йских соприча́стниче, приими́ от на́с сие́ благодаре́ние и, предстоя́ Престо́лу сла́вы Бо́жия, не преста́й моля́ся о чту́щих па́мять твою́ и зову́щих ти́:

Ра́дуйся, Се́ргие Испове́дниче, Тро́ице Святе́й о на́с моли́твенниче.

И́кос 1.

А́нгели и пра́ведных ду́си возра́довашася, сре́тив на небесе́х ве́лий со́нм новому́чеников и испове́дников Росси́йских. И мы́, немощни́и и гре́шнии, оба́че небе́сную ра́дость улучи́ти жела́ющии, тебе́, свя́те Се́ргие, я́ко еди́ному от со́нма и́х ра́достно глаго́лем:

Ра́дуйся, до́брая о́трасле роди́телей благочести́вых; ра́дуйся, гра́ду твоему́ ра́дость и утвержде́ние.

Ра́дуйся, Богосло́вию усе́рдно учи́выйся; ра́дуйся, сло́во Бо́жие до сме́ртнаго часа́ пропове́давый.

Ра́дуйся, себе́ сама́го всеце́ло в во́лю Бо́жию преда́вый; ра́дуйся, и при́сных твои́х Го́споду Бо́гу поручи́вый.

Ра́дуйся, безро́потному терпе́нию и́х учи́вый; ра́дуйся, мно́гажды темни́чное заключе́ние со благодаре́нием Го́споду терпе́вый.

Ра́дуйся, Се́ргие Испове́дниче, Тро́ице Святе́й о на́с моли́твенниче.

Конда́к 2.

Ви́дя ве́ру и благоче́стие роди́телей и сро́дников твои́х, свя́те Се́ргие, измла́да потща́лся еси́ подража́телем си́х бы́ти, пра́вила жи́тельства христиа́нскаго и́ми внуша́емыя ре́вностно соблюда́я и с любо́вию взыва́я Бо́гу: Аллилу́иа.

И́кос 2.

Ра́зум богопросвеще́н име́ти жела́я, кни́жному уче́нию, свя́те Се́ргие, усе́рдно прилежа́л еси́, и в трие́х граде́х: Каси́мове, Ряза́ни и Ки́еве – Бо́га в Тро́ице сла́вимаго правосла́вно чти́ти поуча́лся еси́, и сие́ бога́тство, тобо́ю собра́нное усе́рдному служе́нию Це́ркви Бо́жией посвяти́л еси́. Сего́ ра́ди приими́ от на́с похва́льная сия́:

Ра́дуйся, кни́жному уче́нию усе́рдно прилежа́вый; ра́дуйся, все́ у́тро жития́ твоего́ тому́ отда́вый.

Ра́дуйся, до́брый и иску́сный Богосло́ве; ра́дуйся, святы́я Тро́ицы служи́телю ве́рный.

Ра́дуйся, проти́ву непра́во во Христа́ ве́рующих тру́д сво́й написа́вый; ра́дуйся, те́м писа́нием ло́жнаго богосло́ва обличи́вый.

Ра́дуйся, внима́ющих до́брому уче́нию к усе́рдию призыва́яй; ра́дуйся, и́м моли́твою твое́ю в труда́х и́х помога́яй.

Ра́дуйся, Се́ргие Испове́дниче, Тро́ице Святе́й о на́с моли́твенниче.

Конда́к 3.

Си́лою благода́ти Бо́жия в та́инстве свяще́нства облече́н, по́слан бы́л еси́, свя́те, в ма́лый гра́д о́бласти Вя́тския, свяще́нническое служе́ние соверша́ти, сло́во Бо́жие пропове́дати и со́нмом священнослужи́телей руководи́ти, с ни́миже согла́сно воспева́л еси́ Бо́гу хвале́бную пе́снь: Аллилу́иа.

И́кос 3.

Име́яй неусы́пное попече́ние о служе́нии твое́м, о́тче Се́ргие, потща́лся еси́ о благоле́пии священноде́йствий, пропове́дании сло́ва Бо́жия и о до́бром воспита́нии ю́ных ду́ш, вве́ренных тебе́. Ублажа́юще труды́ твоя́, вопие́м ти́ си́це:

Ра́дуйся, усе́рдный служи́телю олтаря́ Госпо́дня; ра́дуйся торже́ственных богослуже́ний соверши́телю.

Ра́дуйся, ре́вностный пропове́дниче сло́ва Бо́жия; ра́дуйся, учи́вый па́ству твою́ сло́вом и житие́м твои́м.

Ра́дуйся, дете́й уча́щихся в зако́не Бо́жием наста́вниче; ра́дуйся, от собла́знов ми́ра сего́ и́х усе́рдный охрани́телю.

Ра́дуйся, па́стырскаго служе́ния пра́вило; ра́дуйся, сослужи́телей твои́х вдохнови́телю.

Ра́дуйся, Се́ргие Испове́дниче, Тро́ице Святе́й о на́с моли́твенниче.

Конда́к 4.

Бу́ря я́ростная безбо́жия на Руси́ наста́ и мно́гих умертви́. Тогда́ и ты́, свя́те Се́ргие, трикра́ты ко врата́м сме́ртным приво́дим бы́л еси́, но стра́хом Бо́жиим стра́х сме́ртный победи́в, до конца́ дне́й твои́х Бо́га в Тро́ице сла́вимаго му́жественно испове́дал еси́, поя́ Ему́, Аллилу́иа.

И́кос 4.

Слы́шавше благочести́вии лю́дие о тве́рдом и победоно́снем твое́м стоя́нии проти́ву безбо́жных, пону́дивших тя́ на словопре́ние, возра́довашася и возблагодари́ша Бо́га. И мы́, лику́юще о се́м, побе́дная возглаша́ем ти́:

Ра́дуйся, послуша́ние власте́м предержа́щим яви́вый; ра́дуйся, по во́ле и́х на словопре́ние изше́дый.

Ра́дуйся, моли́твою в си́лу Бо́жию облеки́йся; ра́дуйся, уста́ и прему́дрость от Го́спода прия́вый.

Ра́дуйся, си́ми проти́вящихся ти́ победи́вый; ра́дуйся, мно́гажды и́х к молча́нию приводи́вый.

Ра́дуйся, ве́рных сердца́ сло́вом твои́м возвесели́вый; ра́дуйся, му́жественному стоя́нию в ве́ре и́х научи́вый.

Ра́дуйся, Се́ргие Испове́дниче / Тро́ице Святе́й о на́с моли́твенниче.

Конда́к 5.

Бо́жией во́ле всего́ себе́ преда́вый, роди́телю твоему́ послуша́ние яви́л еси́ и во гра́д Каси́мов ко хра́му Святы́я Тро́ицы пресели́лся еси́, да бу́деши помога́яй в труда́х отцу́ твоему́ и ку́пно с ни́м воспое́ши Бо́гу: Аллилу́иа.

И́кос 5.

Ви́деша свяще́нницы и лю́дие гра́да твоего́ тя́, свя́те Се́ргие, о́браз до́браго па́стыря и́м явля́юща, в сла́дость послу́шаша му́дрыя и кро́ткия словеса́ твоя́ и та́ко ти́ возгласи́ша:

Ра́дуйся, пастыренача́льника Христа́ подража́телю; ра́дуйся, уче́ния Его́ усе́рдный изъясни́телю.

Ра́дуйся, ма́лаго ста́да Христо́ва ве́рный блюсти́телю; ра́дуйся, о́ное от неве́рия и раско́лов охраня́яй.

Ра́дуйся, священнонача́лие от клеве́т защища́яй; ра́дуйся, в послуша́нии ему́ бы́ти ве́рныя лю́ди науча́яй.

Ра́дуйся, еди́нства церко́внаго ревни́телю; ра́дуйся, ло́жных побо́рников чистоты́ церко́вныя обличи́телю.

Ра́дуйся, Се́ргие Испове́дниче, Тро́ице Святе́й о на́с моли́твенниче.

Конда́к 6.

Про́поведию твое́ю, свя́те Се́ргие, отсту́пльшаго от ве́ры сы́на отцу́ его́, скорбя́щему ста́рцу пресви́теру, в ло́но Це́ркви Христо́вы возврати́л еси́, и о́бщею моли́твою пред ико́ной Бо́жией Ма́тери «Взыска́ние поги́бших» мно́гия коле́блющияся ду́ши в правове́рии укрепи́л еси́ и научи́л еси́ и́х с несумне́нною ве́рою пе́ти Бо́гу, Аллилу́иа.

И́кос 6.

Возсия́ во мра́це неве́рия и развраще́ния ти́хий и кро́ткий све́т ве́ры и доброде́тели ве́рных рабо́в Бо́жиих. Его́же погаси́ти жела́юще безбо́жнии власти́тели жесто́кое и мно́го хи́тростное гоне́ние воздвиго́ша на Це́рковь Бо́жию и мно́гих ду́ши устраши́ша и поколеба́ша. Оба́че ве́рнии, взира́юще на твое́, о́тче Се́ргие, му́жество и терпе́ние, благода́рно воспе́ша ти́:

Ра́дуйся, безбоя́зненный испове́дниче ве́ры Христо́вы; ра́дуйся, мно́гия на испове́дание ве́ры подви́гнувый.

Ра́дуйся, расхище́ние име́ний со благоду́шием прия́вый; ра́дуйся, не име́вый, где́ главу́ подклони́ти.

Ра́дуйся, я́ко ра́ди Христа́ в темни́цу заключа́ем бы́л еси́; ра́дуйся, я́ко та́мо поноше́ние и му́ки терпе́л еси́.

Ра́дуйся, вопроше́ния мучи́телей му́дростию побежда́вый; ра́дуйся, ко́зни и́х молча́нием и терпе́нием низлага́вый.

Ра́дуйся, Се́ргие Испове́дниче, Тро́ице Святе́й о на́с моли́твенниче.

Конда́к 7.

Хотя́ свети́льник ве́ры угаси́ти безбо́жнии власти́телие на ле́та мно́га изгна́ша тя́ и бра́та и сы́на твоего́ на о́строва Солове́цкия и по́слежде в де́бри лесны́я, и та́мо под стра́жею содержи́мых хотя́ху гла́дом и тя́жкими труда́ми умори́ти. Но ты́, свя́те Се́ргие, изнемога́я под тя́жестию ско́рби сея́ не преста́л еси́ укрепля́ти бра́тию твою́ и Бо́гу взыва́ти: Аллилу́иа.

И́кос 7.

Но́ваго чудотво́рца яви́ в себе́ Всеми́лостивый Госпо́дь во утеше́ние и ободре́ние стра́ждущих с тобо́ю. И мы́, благодаре́ние Бо́гу принося́ще о ми́лостех Его́ вели́цых, уми́льно вопие́м ти́:

Ра́дуйся, терпе́нием ско́рби побежда́вый; ра́дуйся, всеце́ло на по́мощь Бо́жию упова́ние полага́вый.

Ра́дуйся, о спасе́нии блужда́ющих во мра́це бу́рнаго мо́ря усе́рдно моли́выйся; ра́дуйся, све́т, указу́ющий и́м спаси́тельный пу́ть, у Бо́га испроси́вый.

Ра́дуйся, го́рдаго гада́теля отврати́выйся; ра́дуйся, си́лою Бо́жиею де́йствия его́ прекрати́вый.

Ра́дуйся, ко́зни неви́димаго ду́ха зло́бы уве́девый; ра́дуйся, при́сных твои́х от ко́зней его́ огради́вый.

Ра́дуйся, Се́ргие Испове́дниче, Тро́ице Святе́й о на́с моли́твенниче.

Конда́к 8.

Стра́нно и го́рестно бе́ ви́дети хра́мы Бо́жия без пе́ния стоя́щия и разоре́нию предава́емыя. Во вре́мя сие́ ты́, о́тче Се́ргие, из изгна́ния возвраще́нный, в потае́нных ме́стех слу́жбу Бо́жию соверша́л еси́, скорбя́ о разоре́нии хра́мов Бо́жиих. Оба́че святи́тель Никола́й укрепи́ рабу́ Бо́жию Анастаси́ю презре́ти преще́ния враго́в Христо́вых и хра́м его́ от разоре́ния изба́вити, да возгласи́тся в не́м во вре́мя благопотре́бно хвале́бная пе́снь: Аллилу́иа.

И́кос 8.

Всего́ себе́ и при́сных твои́х Христу́ Бо́гу преда́л еси́, преблаже́нне о́тче на́ш Се́ргие. По возвраще́нии бо твое́м из изгна́ния и нищету́ и па́ки темни́чное заключе́ние претерпе́л еси́. Последи́ же сподо́би тя́ ми́лостивый Госпо́дь пре́жде заключе́нный хра́м святи́теля и чудотво́рца Никола́я откры́ти и в не́м пе́рвым священнослужи́телем бы́ти. Сего́ ра́ди приими́ от на́с похвалы́ сия́:

Ра́дуйся, я́ко во все́х жите́йских обстоя́ниих во́ле Бо́жией покоре́н бы́л еси́; ра́дуйся я́ко и при́сных твои́х вся́ ско́рби благоду́шно терпе́ти призыва́л еси́.

Ра́дуйся, но́вое темни́чное заключе́ние претерпе́вый; ра́дуйся, и в после́дняя дни́ жития́ твоего́ си́м не устраши́выйся.

Ра́дуйся, ра́дость предстоя́ния престо́лу Бо́жию от Го́спода прия́вый; ра́дуйся, хра́м святи́теля Никола́я па́ки освяти́вый.

Ра́дуйся, ви́дяй, я́ко и по дне́сь в не́м славосло́вие Бо́гу прино́сится; ра́дуйся, о моля́щихся в не́м пред Бо́гом хода́таю.

Ра́дуйся, Се́ргие Испове́дниче, Тро́ице Святе́й о на́с моли́твенниче.

Конда́к 9.

Вся́кия ско́рби и многоразли́чная страда́ния до́блественне претерпе́л еси́ о́тче на́ш Се́ргие. Не могу́щии бо терпе́ти твоего́ в хра́ме святи́теля Никола́я служе́ния безбо́жнии власти́телие тя́, темни́чными труда́ми изморе́на, к во́инскому зва́нию причто́ша, да труда́ми во́инскими уморе́н бу́деши. Ты́ же, гото́вый за Христа́ и в темни́цу, и в сме́рть ити́, благода́рно воспе́л еси́ мно́гими скорбьми́ спаса́ющему тя́ Бо́гу: Аллилу́иа.

И́кос 9.

Вити́йская ухищре́ния небре́гл еси́, егда́ у вра́т сме́ртных предстоя́, стра́хом о спасе́нии ча́д твои́х содержи́мь, написа́л еси́ и́м предсме́ртное назида́ние твое́, е́же последи́, Бо́гу ти́ соде́йствующу и еще́ седми́цу ле́т дарова́вшу ти́, простра́ннее изложи́л еси́. О не́мже благодари́м тя́ си́це:

Ра́дуйся, учи́телю терпе́ния; ра́дуйся, в ско́рби по́льзу духо́вную иска́ти внуша́яй.

Ра́дуйся, уста́вов Це́ркве Правосла́вныя ревни́телю; ра́дуйся, по́стнаго по́двига наста́вниче.

Ра́дуйся, посту́ теле́сному по́ст духо́вный прилага́ти науча́яй; ра́дуйся, приступа́ти ко прича́стию Святы́х Христо́вых Та́ин побужда́яй.

Ра́дуйся, Па́схою де́нь причаще́ния имену́яй; ра́дуйся, в сло́ве Бо́жием усе́рдно поуча́тися наставля́яй.

Ра́дуйся, Се́ргие Испове́дниче, Тро́ице Святе́й о на́с моли́твенниче.

Конда́к 10.

Спасы́й тя́, свя́те Се́ргие, от внеза́пныя сме́рти Госпо́дь, всели́ тя́ в ме́сто ти́хое и уедине́нное, иде́же ты́, пустынножи́телем подража́я и в творе́ниих те́х поуча́яйся, в та́йне же Богослуже́ния соверша́я, непреста́нно пе́л еси́ Бо́гу, Аллилу́иа.

И́кос 10.

Стена́ и забра́ло, свя́те Се́ргие, от Бо́га ти́ даде́ся святи́тель и чудотво́рец Никола́й, бли́з бо его́ па́мяти ты́ от сме́рти спасе́н бы́л еси́, и четы́рем ле́том мину́вшим в па́мять его́ приведе́ тя́ Бо́г в после́днее ме́сто твоего́ служе́ния, и еще́ трие́м ле́том проше́дшим пред па́мятию святи́теля Никола́я свята́я твоя́ душа́ в ра́йская пресели́ся селе́ния. Удивля́ющеся сему́ зове́м ти́:

Ра́дуйся, дру́же святы́х; ра́дуйся, святи́теля Никола́я послу́шниче.

Ра́дуйся, священному́чеников и му́ченика сы́не и бра́те; ра́дуйся, Арка́дия, епи́скопа и священному́ченика собесе́дниче и сотаи́нниче.

Ра́дуйся, Ма́тери Бо́жией всегда́ служи́вый; ра́дуйся, ту́ю о взыска́нии мно́гих поги́бших умоли́вый.

Ра́дуйся, Ца́рствия Небе́снаго насле́дниче; ра́дуйся, ра́дости все́х святы́х соприча́стниче.

Ра́дуйся, Се́ргие Испове́дниче, Тро́ице Святе́й о на́с моли́твенниче.

Конда́к 11.

Пе́ние благода́рственное прине́сл еси́ Бо́гу вся́ческих, егда́, свя́те Се́ргие, сы́на, с ни́мже пре́жде в изгна́нии ку́пно страда́л еси́, сослужа́ща ти́ у престо́ла Бо́жия узре́л еси́, пою́ща с тобо́ю: Аллилу́иа.

И́кос 11.

Све́том Христо́вым просвеще́н, я́ко свети́льник возсия́л еси́ в после́днем ме́сте земна́го служе́ния твоего́. И та́мо су́щии ве́рнии раби́ Бо́жии та́ко ти́ возгласи́ша:

Ра́дуйся, ра́спри и нестрое́ния в при́чте церко́вном кро́тостию ути́шивый; ра́дуйся, клеветы́, досажде́ния, укоре́ния за сие́ до конца́ дне́й твои́х терпе́вый.

Ра́дуйся, уста́вов церко́вных рачи́телю; ра́дуйся, небре́гших о се́м с пожда́нием и терпе́нием увещава́вый.

Ра́дуйся, посты́ соблюда́ти ре́вностно учи́вый; ра́дуйся, оправда́ющих наруше́ние поста́ кро́тко обличи́вый.

Ра́дуйся, богослуже́ний усе́рдный соверши́телю; ра́дуйся, си́м лю́ди к церко́вной моли́тве привлеки́й.

Ра́дуйся, Се́ргие Испове́дниче, Тро́ице Святе́й о на́с моли́твенниче.

Конда́к 12.

Благода́ть ти́ даде́ся, преблаже́нне о́тче Се́ргие, служи́телем бы́ти Святы́я Тро́ицы. Я́коже бо пре́жде во хра́мех Святы́я Тро́ицы служи́л еси́, та́ко и на но́вом ме́сте служе́ния твоего́ в три́ после́дняя ле́та пред чудотво́рным, реко́мым «я́блоневым» о́бразом Святы́я Тро́ицы воспева́л еси́ Триипоста́сному Бо́гу, Аллилу́иа.

И́кос 12.

Пою́ще святы́я по́двиги твоя́, сла́вяще многотру́дное и многоско́рбное житие́ твое́, торжеству́ем сие́, я́ко святы́ми твои́ми моща́ми во оте́чество твое́, отону́дуже пре́жде изгна́н бы́л еси́, с че́стию возврати́лся еси́. Предстоя́ ны́не престо́лу Бо́жию, моли́ся о та́ко сла́вящих тя́:

Ра́дуйся, от у́тра до ве́чера жития́ твоего́ ве́рен Бо́гу бы́вый; ра́дуйся, Це́ркви Его́ усе́рдно послужи́вый.

Ра́дуйся, пропове́дниче и защи́тниче Правосла́вия; ра́дуйся, де́лом сло́во твое́ испо́лнивый.

Ра́дуйся, поноше́ния и́мене ра́ди Христо́ва прия́вый; ра́дуйся, мно́гажды на сме́рть ра́ди Христа́ гото́вый.

Ра́дуйся, пра́вды ра́ди из гра́да твоего́ изгна́нный; ра́дуйся, ны́не во сла́ве святы́х в него́ возврати́выйся.

Ра́дуйся, Се́ргие Испове́дниче, Тро́ице Святе́й о на́с моли́твенниче.

Конда́к 13.

О, Тро́ице, Бо́же на́ш, О́тче, Сы́не и Ду́ше Святы́й! Моли́твами ве́рнаго раба́ Твоего́ свята́го испове́дника Се́ргия сподо́би на́с по́двигом до́брым подвиза́тися и к све́ту сла́вы Ца́рствия Твоего́ дойти́ и ку́пно с ни́м и со все́ми святы́ми а́нгельское славосло́вие Ти́ вознести́, при́сно поя́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгели и пра́ведных ду́си возра́довашася, сре́тив на небесе́х ве́лий со́нм новому́чеников и испове́дников Росси́йских. И мы́, немощни́и и гре́шнии, оба́че небе́сную ра́дость улучи́ти жела́ющии, тебе́, свя́те Се́ргие, я́ко еди́ному от со́нма и́х ра́достно глаго́лем:

Ра́дуйся, до́брая о́трасле роди́телей благочести́вых; ра́дуйся, гра́ду твоему́ ра́дость и утвержде́ние.

Ра́дуйся, Богосло́вию усе́рдно учи́выйся; ра́дуйся, сло́во Бо́жие до сме́ртнаго часа́ пропове́давый.

Ра́дуйся, себе́ сама́го всеце́ло в во́лю Бо́жию преда́вый; ра́дуйся, и при́сных твои́х Го́споду Бо́гу поручи́вый.

Ра́дуйся, безро́потному терпе́нию и́х учи́вый; ра́дуйся, мно́гажды темни́чное заключе́ние со благодаре́нием Го́споду терпе́вый.

Ра́дуйся, Се́ргие Испове́дниче, Тро́ице Святе́й о на́с моли́твенниче.

Конда́к 1.

Избра́нный слуго́ Царя́ Небе́снаго, Бо́гом да́нный покрови́телю гра́да твоего́, преблаже́нне о́тче на́ш Се́ргие, Правосла́вия изря́дный пропове́дниче, со́нма испове́дников Росси́йских соприча́стниче, приими́ от на́с сие́ благодаре́ние и, предстоя́ Престо́лу сла́вы Бо́жия, не преста́й моля́ся о чту́щих па́мять твою́ и зову́щих ти́:

Ра́дуйся, Се́ргие Испове́дниче, Тро́ице Святе́й о на́с моли́твенниче.

Моли́тва.

О, Святы́й уго́дниче Бо́жий и испове́дниче Се́ргие! По́двигом до́брым подвиза́вся на земли́, восприя́л еси́ на небесе́х вене́ц пра́вды, его́ же угото́вал Госпо́дь все́м лю́бящим его́. Сего́ ра́ди и мы́, духо́вная ча́да твоя́, ра́дуемся о пресла́вном сконча́нии жи́тельства твоего́ и чти́м святу́ю па́мять твою́. Ты́ же, предстоя́ престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти на́м вся́кое прегреше́ние и по́мощи на́м ста́ти проти́ву ко́знем диа́вольским, да изба́вльшеся от скорбе́й, боле́зней, бе́д и напа́стей и вся́каго зла́, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.