Конда́к 1.

Избра́нный уго́дниче Христо́в и прему́дрый архипа́стырю, в свя́тости ста́до Христо́во храни́вый, священному́чениче Анато́лие, восхваля́я ди́вное житие́ твое́, смире́нно мо́лим тя́: моли́ о на́с Человеколю́бца Го́спода, да поми́лует на́с, и́щущих твоего́ за на́с к Нему́ предста́тельства и зову́щих ти́:

Ра́дуйся, священному́чениче Анато́лие, Архиере́ю Небе́сному ве́рно послужи́вший.

И́кос 1.

А́нгелом небе́сным уподо́бился еси́, святи́телю Анато́лие, егда́ от млады́х ле́т, духо́вную нау́ку постига́я, во и́ночестве послужи́ти Бо́гу возжела́л еси́. Мы́ же, воспева́я а́нгельскую чистоту́ твою́, вопие́м ти́ си́це:

Ра́дуйся, све́том Христо́вым во свято́м креще́нии просвеще́нный; ра́дуйся, в че́сть свята́го Апо́стола Госпо́дня Андре́ем нарече́нный.

Ра́дуйся, ма́терию твое́ю благоче́стию науче́нный; ра́дуйся, со Христо́вою Це́рковию наве́ки обруче́нный.

Ра́дуйся, в ра́зуме Бо́гом просвеще́нный и умудре́нный; ра́дуйся, в ве́ре Правосла́вней се́рдцем и душе́ю утвержде́нный.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 2.

Ви́дя Госпо́дь непоро́чное житие́ твое́, плотски́ми страстя́ми не омраче́нное, сподо́би тя́, священному́чениче Христо́в, приня́тия а́нгельскаго о́браза. Ты́ же, с ре́вностию мона́шеския обе́ты исполня́я, Бо́гу воспева́л еси́ непреста́нно хвалу́: Аллилу́иа.

И́кос 2

Ра́зум чи́ст душе́ю восприя́ти сподо́бился еси́, богому́дре Анато́лие, в богосло́вских труде́х преуспева́я. Мы́ же, восхваля́я вся́, я́же ко прославле́нию Го́спода подъя́л еси́, воспева́ем тебе́ си́це:

Ра́дуйся, измла́да смире́ния и молча́ния храни́телю; ра́дуйся, за́поведей Бо́жиих усе́рдный исполни́телю.

Ра́дуйся, моли́твы и воздержа́ния ревни́телю; ра́дуйся, спасти́ся жела́ющим му́дрый учи́телю.

Ра́дуйся, челове́ческаго суему́дрия и непра́вды обличи́телю; ра́дуйся, ве́ры Правосла́вныя неуста́нный насади́телю.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 3.

Си́лою свы́ше облече́ тя́ Ду́х Святы́й, егда́ па́стве Каза́нстей во епи́скопа поставля́ем бы́л еси́. Ты́ же, я́ко до́брый па́стырь, слове́сныя о́вцы во дворы́ Госпо́дни приводя́, укрепля́ющему тя́ Иису́су воспева́л еси́: Аллилу́иа.

И́кос 3.

Име́яй в се́рдце свое́м све́т Христо́в, уго́дниче Бо́жий, соше́дый на тя́ в чу́днем явле́нии, ре́вностно храни́л еси́ его́ во все́м житии́ твое́м. Те́мже и претерпе́л еси́ до конца́ вся́ ско́рби и гоне́ния, кро́тостию и смире́нием свои́ми Христу́ уподобля́яся. Мы́ же, взира́я на доброде́тели твоя́, восхваля́ем тя́ та́ко:

Ра́дуйся, сосу́де Боже́ственнаго избра́ния; ра́дуйся, пло́д зре́лый до́браго воспита́ния.

Ра́дуйся, не уклони́выйся от Госпо́дняго призыва́ния; ра́дуйся, не посрамля́ющий на́шего на Него́ упова́ния.

Ра́дуйся, не отверга́ющий на́шего воздыха́ния; ра́дуйся, испо́лненный ра́йскаго благоуха́ния.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 4.

Бу́рею христоуби́йства ды́шуще, воздвиго́ша гоне́ние на Це́рковь Бо́жию лю́тии безбо́жницы. Ты́ же, испове́дниче Христо́в, не убоя́лся еси́ преще́ния и́х, но всегда́ гото́в бы́л еси́ за ве́ру Правосла́вную пострада́ти, воспева́я Го́сподеви: Аллилу́иа.

И́кос 4.

Слы́шавше правосла́внии лю́дие о ре́вностнем служе́нии твое́м Це́ркви Христо́вой, притека́ху к тебе́ в ну́ждах и ско́рбех, оте́ческаго наставле́ния твоего́ и́щуще. Ты́ же с любо́вию все́х прие́мля, поуча́л еси́ ве́рность Христу́ храни́ти и все́ упова́ние на Бо́га возлага́ти. Мы́ же, воспомина́я сие́, та́ко вопие́м ти́:

Ра́дуйся, о́бразе служе́ния неле́ностнаго; ра́дуйся, все́ю душе́ю взыска́вый Ца́рствия Небе́снаго.

Ра́дуйся, ча́дом твои́м спасе́ния пода́телю; ра́дуйся, и́стины утверди́телю.

Ра́дуйся, непра́вды обличи́телю; ра́дуйся, заблу́ждших вразуми́телю.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 5.

Боготе́чная звезда́ Правосла́вныя ве́ры бы́л еси́, священному́чениче Анато́лие, указу́ющая па́стве твое́й еди́ный наде́жный пу́ть ко спасе́нию, да вси́ еди́ным се́рдцем и еди́ными усты́ взыва́ют спаса́ющему Бо́гу: Аллилу́иа.

И́кос 5.

Ви́дя в тебе́ непоколеби́мую ве́ру и му́жество, боголюби́ве Анато́лие, я́ко и во у́зах темни́чных не престава́л еси́ о па́стве твое́й пещи́ся, восхваля́ем Бо́га, дарова́вшаго ти́ кре́пость и си́лу и тебе́, уго́днику Его́, та́ко взыва́ем:

Ра́дуйся, еди́наго Христа́ все́м се́рдцем возлюби́вый; ра́дуйся, ве́рность Ему́ до конца́ сохрани́вый.

Ра́дуйся, ду́шу свою́ Па́стырю Небе́сному всеце́ло покори́вый; ра́дуйся, вене́ц из руку́ Творца́ на небеси́ получи́вый.

Ра́дуйся, собо́ю о́браз па́стыря досто́йнаго яви́вый; ра́дуйся, я́ко безпло́тный а́нгел житие́ свое́ пожи́вый.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 6.

Пропове́дником и́стины Христо́вы яви́лся еси́, сла́вный священному́чениче Анато́лие, егда́ не терпя́щия безбоя́зненнаго служе́ния твоего́ богобо́рцы во у́зы тя́ заключа́ху. Ты́ же, на Го́спода все́ свое́ упова́ние возложи́в, сла́дко воспева́л еси́ Ему́: Аллилу́иа.

И́кос 6.

Возсия́л еси́, святи́телю Анато́лие, я́ко свети́льник, светя́й на све́щнице и́стинныя ве́ры Христо́вы, высото́ю ума́ твоего́ озаря́я ду́ши ве́рных и разгоня́я тьму́ нече́стия и неве́рия. Сего́ ра́ди притека́ху к тебе́ я́ко к и́стинному отцу́ и наста́внику вси́ жите́йскими бу́рями коле́блемии и, по́мощь от тебе́ получи́вше, та́ко ублажа́ху тя́:

Ра́дуйся, во́ли Бо́жией всеце́ло себе́ предава́вый; ра́дуйся, богомы́слием уны́ние неле́ностно отрева́вый.

Ра́дуйся, по́мыслы плотски́я моли́твою прогоня́вый; ра́дуйся, ча́дом духо́вным всепроще́ния у Го́спода умоля́вый.

Ра́дуйся, ко́зни богоме́рзкия при́сно побежда́вый; ра́дуйся, нетле́нное насле́дие в души́ свое́й стяжа́вый.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 7.

Хотя́й ста́до Христо́во це́лым и невреди́мым к па́житем небе́сным привести́, святи́телю Анато́лие, ве́лие попече́ние о Це́ркви име́л еси́, от раско́ла и ересе́й ве́рных ея́ сохраня́я и Христу́ во вся́ дни́ воспева́я: Аллилу́иа.

И́кос 7.

Ди́вное показа́л еси́ долготерпе́ние, священному́чениче Анато́лие, Христо́ву долготерпе́нию подража́я, егда́ в годи́ну тя́жких испыта́ний па́ству твою́ окормля́л еси́, бу́дучи е́й щито́м и огра́дою от вся́кия напа́сти вра́жия. Лю́дие же, умиле́нно на тя́ взира́юще, душа́ми умиротворя́яся, во благо́м упова́нии на Бо́га укрепля́хуся. Мы́ же, притека́я к тебе́, воздае́м ти́ похвалы́ сия́:

Ра́дуйся, я́ко пу́ть в Ца́рствие Небе́сное обре́л еси́; ра́дуйся, я́ко си́м путе́м невозвра́тно ше́ствовал еси́.

Ра́дуйся, я́ко небе́сная па́че земна́го возлюби́л еси́; ра́дуйся, я́ко А́нгелом житие́м свои́м уподо́бился еси́.

Ра́дуйся, я́ко Го́спода чи́стым се́рдцем зре́ти сподо́бился еси́; ра́дуйся, я́ко Пресвяте́й Тро́ице с благогове́нием поклоня́тися все́х науча́л еси́.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 8.

Стра́нно бы́сть малове́рным и малоду́шным зре́ти, святи́телю о́тче Анато́лие, ка́ко в лю́тых гоне́ниях пра́ведное житие́ провожда́я, утвержда́л еси́ слабе́ющих в ве́ре, укрепля́л еси́ немощны́х ду́хом, призыва́л еси́ к терпе́нию во испове́дании Христо́ве, помина́я слова́ Спаси́теля: «Не бо́йтеся убива́ющих те́ло, души́ же не могу́щих уби́ти», воспева́я ку́пно с ни́ми: Аллилу́иа.

И́кос 8.

Ве́сь бы́л еси́ в Бо́зе богомы́слием и, укрепля́емый Бо́жией благода́тию, непристу́пен яви́лся еси́ кова́рному врагу́, и́щущему поги́бели вся́кой душе́ челове́честей. Руководи́ у́бо и на́с непреткнове́нно ходи́ти путе́м за́поведей Христо́вых, да вопие́м ти́:

Ра́дуйся, стра́же Це́ркве Христо́вы неустраши́мый; ра́дуйся, исполни́телю за́поведей Его́ неутоми́мый.

Ра́дуйся, за Го́спода неве́рными гони́мый; ра́дуйся, Спаси́телем на все́х путе́х храни́мый.

Ра́дуйся, Пречи́стою Де́вою вы́ну покрыва́емый; ра́дуйся, А́нгелами и святы́ми на небесе́х прия́тый.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 9.

Вси́ ви́дящии тя́, святи́телю Христо́в Анато́лие, зело́ дивля́хуся твоему́ непоколеби́мому стоя́нию за ве́ру и́стинную, заве́ты бо оте́ческия соблюда́я, не то́кмо не страши́лся еси́ у́з и преще́ний, но му́жественно вся́ сия́ за Христа́ терпя́, и ины́х науча́л еси́ му́жественно подвиза́тися за ве́ру Правосла́вную, непреста́нно поя́: Аллилу́иа.

И́кос 9

Вети́и многовеща́ннии не возмо́гут по достоя́нию восхвали́ти вся́ страда́ния твоя́, за Христа́ и Це́рковь Его́ Святу́ю претерпе́нныя. Мы́ же, му́жество твое́ помина́я и ско́рби твоя́ серде́чныя ублажа́я, умиле́нно пое́м си́це:

Ра́дуйся, я́ко в ра́йских оби́телех ны́не пребыва́еши; ра́дуйся, я́ко с высоты́ небе́сныя на на́с призира́еши.

Ра́дуйся, я́ко свои́м заступле́нием на́м помога́еши; ра́дуйся, я́ко твои́ми моли́твами ми́лость Бо́жию на ны́ излива́еши.

Ра́дуйся, я́ко свои́м предста́тельством от бе́д ны́ избавля́еши; ра́дуйся, я́ко пла́чущих и стра́ждущих с любо́вию утеша́еши.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 10.

Спасти́ хотя́й ду́ши мно́гия от поги́бели ве́чныя, непреста́нно сло́во Бо́жие пропове́дал еси́, святи́телю богому́дре, тве́рдыми бы́ти в ве́ре науча́я и от Це́ркви Бо́жией в годи́ны бе́дствий и гоне́ний не отпа́дая. И та́ко приве́л еси́ к оте́честву Небе́сному мно́гия, жа́ждущия жи́зни ве́чныя, ны́не же пою́щия Бо́гу: Аллилу́иа.

И́кос 10.

Стено́ю тве́рдою и кре́пкою огра́дою па́стве твое́й яви́лся еси́, святи́телю Христо́в Анато́лие, богому́дрым води́тельством Це́рковь и слове́сныя о́вцы ста́да Христо́ва сохраня́я. И ны́не све́том Боже́ственныя му́дрости твоея́ тьму́ неве́рия отжени́ от на́с, да тобо́ю просвеща́еми, вопие́м си́це:

Ра́дуйся, я́ко тобо́ю Це́рковь Бо́жия благоукраша́ется; ра́дуйся, я́ко тобо́ю ве́ра Христо́ва утвержда́ется.

Ра́дуйся, я́ко тобо́ю кра́й на́ш просвеща́ется; ра́дуйся, я́ко тобо́ю ми́р во язы́цех укрепля́ется.

Ра́дуйся, я́ко тобо́ю ду́ши на́ша услажда́ются; ра́дуйся, я́ко тобо́ю ми́лость с небесе́ низпосыла́ется.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 11.

Пе́ние умиле́нное прино́сим ти́, святи́телю о́тче Анато́лие, прославля́юще твоя́ за Христа́ страда́ния и мо́лим тя́: испроси́ на́м у Го́спода на́шего Иису́са Христа́ вы́ну в Правосла́вии пребыва́ти, ко́зней лука́ваго избега́ти и с тобо́ю ку́пно воспева́ти: Аллилу́иа.

И́кос 11.

Со све́тлым и ра́достным лице́м после́довал еси́ на страда́ния, угото́ванныя ти́ от мучи́телей, священному́чениче Анато́лие, и вся́ безро́потно претерпева́я до конца́ ве́рен Христу́ пребы́л еси́. Мы́ же, воспомина́я му́ченическую кончи́ну твою́, со умиле́нием зове́м ти́:

Ра́дуйся, кра́я Таври́ческаго неме́ркнущая сла́во и украше́ние; ра́дуйся, градо́в на́ших кре́пкая защи́то и огражде́ние.

Ра́дуйся, па́ствы твоея́ от бе́д избавле́ние; ра́дуйся, путе́й непра́ведных и́стинное исправле́ние.

Ра́дуйся, ве́ры Правосла́вныя в земли́ на́шей утвержде́ние; ра́дуйся, си́рых и обездо́ленных покро́в и защище́ние.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 12.

Благода́ть свы́ше ти́ да́нную позна́вше, о́тче на́ш Анато́лие, тебе́, на́шего ми́лостиваго отца́, приле́жно про́сим: проле́й ны́не те́плую твою́ моли́тву о на́с, гре́шных, ко Го́споду, я́ко да укрепи́т Це́рковь Свою́ Святу́ю, от ра́спрей и раско́лов незы́блему да сохрани́т, и вся́ правосла́вныя христиа́ны в ми́ре и благоде́нствии соблюде́т, да ку́пно вси́ воспева́ем: Аллилу́иа.

И́кос 12.

Пою́ще твое́ прославле́ние, ублажа́ем тя́, священному́чениче Анато́лие, и, воспомина́я страда́льческую кончи́ну твою́, та́ко в похвалу́ вопие́м ти́:

Ра́дуйся, все́м с ве́рою приходя́щим то́ки чуде́с излива́яй; ра́дуйся, лише́нным смы́сла у́м здра́вый подава́яй.

Ра́дуйся, в со́ниих и виде́ниих по́мощь твою́ явля́яй; ра́дуйся, све́том и́стины Христо́вы на́с озаря́яй.

Ра́дуйся, Боже́ственною любо́вию ду́ши на́ша согрева́яй; ра́дуйся, страну́ на́шу правосла́вную от бе́д и напа́стей огражда́яй.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 13.

О святи́телю ди́вный, архипа́стырю Бо́жий Анато́лие, приими́ ны́не приноси́мое на́ми тебе́ моле́ние, и испроси́ у всеблага́го Бо́га на́шего дарова́ти ми́ру умире́ние и душа́м на́шим спасе́ние да во Ца́рствии Небе́снем вы́ну воспева́ем: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом небе́сным уподо́бился еси́, святи́телю Анато́лие, егда́ от млады́х ле́т, духо́вную нау́ку постига́я, во и́ночестве послужи́ти Бо́гу возжела́л еси́. Мы́ же, воспева́я а́нгельскую чистоту́ твою́, вопие́м ти́ си́це:

Ра́дуйся, све́том Христо́вым во свято́м креще́нии просвеще́нный; ра́дуйся, в че́сть свята́го Апо́стола Госпо́дня Андре́ем нарече́нный.

Ра́дуйся, ма́терию твое́ю благоче́стию науче́нный; ра́дуйся, со Христо́вою Це́рковию наве́ки обруче́нный.

Ра́дуйся, в ра́зуме Бо́гом просвеще́нный и умудре́нный; ра́дуйся, в ве́ре Правосла́вней се́рдцем и душе́ю утвержде́нный.

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Конда́к 1.

Избра́нный уго́дниче Христо́в и прему́дрый архипа́стырю, в свя́тости ста́до Христо́во храни́вый, священному́чениче Анато́лие, восхваля́я ди́вное житие́ твое́, смире́нно мо́лим тя́: моли́ о на́с Человеколю́бца Го́спода, да поми́лует на́с, и́щущих твоего́ за на́с к Нему́ предста́тельства и зову́щих ти́:

Ра́дуйся, священному́чениче Анато́лие, Архиере́ю Небе́сному ве́рно послужи́вший.

Моли́тва.

О священному́чениче святи́телю о́тче Анато́лие! К тебе́, моли́твеннику те́плому и пред Бо́гом предста́телю усе́рдно притека́ем. В лю́тую годи́ну гоне́ний и испыта́ний земли́ на́шея, внегда́ безбо́жныя врази́ преда́ша сме́рти ве́рныя рабы́ Бо́жия и хра́мы святы́я сокруши́ша, яви́ тя́ Госпо́дь Це́ркве Своея́ а́ки сто́лп непоколеби́м и лю́дем Бо́жиим па́стыря до́бра, ду́шу свою́ за о́вцы полага́юща и во́лки душепа́губныя дале́че отгоня́юща. Ны́не у́бо при́зри на на́с, со умиле́нием душе́ю и сокруше́нным се́рдцем тебе́ призыва́ющих, кре́пость бо на́ша в на́с оскуде́ и вра́жия ловле́ния и се́ти окружи́ша на́с. Моли́ся за на́с, да не поги́бнем до конца́ со беззако́ньми на́шими, но да обрати́т на́с Госпо́дь на стезю́ покая́ния и спасе́ния, да прости́т на́м вся́ согреше́ния на́ша и низпо́слет ми́р на гра́ды и ве́си на́ша, изба́вит на́с от наше́ствия иноплеме́нников, междоусо́бныя бра́ни и вся́ких раздо́ров и нестрое́ний. Утверди́, священному́чениче, ве́ру и благоче́стие во все́х ча́дех Правосла́вныя Це́ркве, испроси́ на́м от Го́спода му́жества да́р, да яви́мся насле́дницы Ца́рствия Небе́снаго, сохраня́я ве́рность до конца́ жи́зни на́шея Го́споду Бо́гу и Спа́су на́шему Иису́су Христу́, Ему́ же подоба́ет вся́кая сла́ва, че́сть и поклоне́ние, со Отце́м и Святы́м Ду́хом, ны́не и при́сно и во ве́ки веко́в. Ами́нь.