Конда́к 1.

Взбра́нный во́ине Царя́ Небе́снаго и Христо́ва ста́да наста́вниче, до́брый и изря́дный па́стырю священному́чениче Гермоге́не возсия́вый на земли́ Сиби́рстей я́ко звезда́ Богосве́тлая те́м же я́ко име́я дерзнове́ние ко Го́споду, просвеще́ние на́м да́руй, да зове́м ти́:

Ра́дуйся, священному́чениче Гермоге́не, Сиби́рския земли́ свети́льниче.

И́кос 1.

А́нгелов Творе́ц, в Тро́ице сла́вимый, предуве́девый чи́стаго се́рдца твоего́ изволе́ние, показа́ тя́ ми́рови бы́ти и́стиннаго ревни́теля благоче́стия и любви́ Христо́вой воплоще́ние. Ве́дуще тя́ и́нока сла́вна и па́стыря предо́бра, дарова́ тебе́ по́двигом до́брым подвиза́тися и тече́ние жи́зни вре́менныя му́жественно сконча́ти, на́с же науча́я тебе́ воспева́ти такова́я:

Ра́дуйся, Бо́гом избра́нный на́ш па́стырю; ра́дуйся, увенча́нный архиере́йской благода́тию.

Ра́дуйся, чи́стым ра́зумом Бо́га возлюби́вый; ра́дуйся, Го́споду усе́рдно послужи́вый.

Ра́дуйся, се́рдце твое́ в незло́бии храни́вый; ра́дуйся, и́го Христо́во от ю́ности восприя́вый.

Ра́дуйся, земли́ Сиби́рстей благода́тное дарова́ние; ра́дуйся, со все́ми святы́ми не́ба Церко́внаго украше́ние.

Ра́дуйся, священному́чениче Гермоге́не, Сиби́рския земли́ свети́льниче.

Конда́к 2.

Ви́дя благопромысли́тель Госпо́дь души́ твоея́ добро́ту, напра́вил тво́й по́мысл ко иска́нию еди́наго на потре́бу; ты́ же спасе́ние души́ возжела́в, навы́кл еси́ взыва́ти Бо́гу: Аллилу́иа.

И́кос 2.

Ра́зум боже́ственный име́я, всю́ суету́ привре́менныя жи́зни презре́л еси́, те́м же оста́вив ми́р и вся́ я́же в ми́ре, прия́л еси́ чи́н а́нгельский, возра́довав и роди́теля своего́ в иере́йстем чи́не Бо́гу служи́вшаго, сие́ изволе́ние твое́ восхваля́юще глаго́лем ти́ та́ко:

Ра́дуйся, путе́м пра́вым ше́ствовал еси́; ра́дуйся, Ца́рствие Бо́жие обре́л еси́.

Ра́дуйся, до́м роди́тельский оста́вивый; ра́дуйся, за Христо́м после́довавый.

Ра́дуйся, о́бразе кро́тости и смире́ния; ра́дуйся, восприе́мниче Христо́ва терпе́ния.

Ра́дуйся, я́ко Исаа́к в ру́це Бо́жий себе́ отда́вый; ра́дуйся, любо́вию к небеси́ воспари́вый.

Ра́дуйся, священному́чениче Гермоге́не, Сиби́рския земли́ свети́льниче.

Конда́к 3.

Си́лою Бо́жиею укрепля́ем, в и́ноческом по́двизе потща́лся еси́ Христу́ Бо́гу непоро́чным житие́м благоугоди́ти, в Тро́ице пева́емому Бо́гу, я́ко орга́н златостру́нный, взыва́л еси́: Аллилу́иа.

И́кос 3.

Име́я благода́ть свяще́нства, до́бре носи́му в благоуха́ющем сосу́де души́ твоея́, во гра́де Тифли́се нра́ву чи́стому и благоче́стию церко́вному, отроко́в ю́ных науча́л еси́, те́м же ви́дя тя́, ре́вностию учи́тельства пламене́ющаго, вопие́м ти́ сицева́я:

Ра́дуйся, по́мощи Бо́жией непреста́нное призыва́ние; ра́дуйся, отроко́в уча́щихся до́брое воспита́ние.

Ра́дуйся, ю́ности при́сное вразумле́ние; ра́дуйся, бу́йства ея́ прему́дрое исправле́ние.

Ра́дуйся, стра́ху Бо́жию науча́яй; ра́дуйся, ю́ныя сердца́ благода́тию исполня́яй.

Ра́дуйся, к жи́зни ве́чной руково́дствуяй; ра́дуйся, от сме́рти грехо́вныя спаса́яй.

Ра́дуйся, священному́чениче Гермоге́не, Сиби́рския земли́ свети́льниче.

Конда́к 4.

Боре́ния серде́чныя и печа́ль душе́вную претерпе́л еси́, священному́чениче Гермоге́не, в по́двизе учи́тельстем неле́ностно пребыва́я, ю́ноши к церко́вному служе́нию уготовля́я и преуспева́ти в житии́ благонра́вием, оте́чески наставля́я, они́ же в гряду́щее жития́ своего́ вре́мя, с благода́рностью пе́ли Бо́гу: Аллилу́иа.

И́кос 4.

Ви́дя премно́гия труды́ твоя́, Предве́чный Архиере́й на́ш, Госпо́дь Иису́с Христо́с, же́зл архипа́стырский и па́ству Сара́товскую смотре́нию твоему́ вручи́. Мы́ же о се́м веселя́щеся, глаго́лем ти́ такова́я:

Ра́дуйся, вся́ степе́ни и́ночества проше́дый; ра́дуйся, на престо́ле святи́тельском возсе́дый.

Ра́дуйся, стра́же Це́ркви неустраши́мый; ра́дуйся, де́лателю виногра́да Христо́ва неутоми́мый.

Ра́дуйся, словеса́м жи́зни науча́ющий; ра́дуйся, о́вцы заблу́ждшия ко Христу́ призыва́ющий.

Ра́дуйся, во тьме́ седя́щия просвети́вый; ра́дуйся, от поги́бели и́х сохрани́вый.

Ра́дуйся, священному́чениче Гермоге́не, Сиби́рския земли́ свети́льниче.

Конда́к 5.

Боготе́чную звезду́ показа́ тя́ на небесе́х в со́нме священному́чеников, Госпо́дь Вседержи́тель, зане́ и на земли́ бы́л еси́ звезда́ све́тлая, осиява́ющая ца́рство правосла́вное и путево́дствуя ко угожде́нию Еди́ному Бо́гу, во е́же воспева́ти Ему́: Аллилу́иа.

И́кос 5.

Ви́девше тя́ Росси́я, я́ко дерзнове́ннаго служи́теля в годи́ну тя́жкую для Це́ркви и наро́да правосла́внаго, возвыша́ющаго гла́с сво́й за ве́ру и Оте́чество и сохране́ние в чистоте́ заве́тов апо́стольских, диви́шася по́двигу твоему́, сего́ ра́ди и мы́ до сего́ дне́ озаря́еми све́том твои́м, взыва́ем ти́:

Ра́дуйся, моли́твами се́рдце свое́ освяти́вый; ра́дуйся, у́мныя очеса́ твоя́ к небесе́м возводи́вый.

Ра́дуйся, ве́чное спасе́ние возвести́вый; ра́дуйся, до́брый во́ине Христо́в яви́выйся.

Ра́дуйся, сла́ву небе́сную па́че всего́ возлюби́вый; ра́дуйся, в Еди́ном Бо́зе спасе́ние улучи́вый.

Ра́дуйся, уста́ми твои́ми прему́дрость глаго́лавый; ра́дуйся, свети́льниче, во тьме́ ве́ка сего́ возсия́вый.

Ра́дуйся, священному́чениче Гермоге́не, Сиби́рския земли́ свети́льниче.

Конда́к 6.

Пропове́дник Ева́нгелия и ревни́тель благоче́стия, сло́вом и житие́м твои́м бы́л еси́ святи́телю Гермоге́не. Не устраши́лся еси́ поноше́ния челове́ческаго и нападе́ний вра́жиих. С кро́тостию и долготерпе́нием принима́л еси́ и́х я́ко из руки́ Бо́жии, Ему́ же и взыва́л еси́: Аллилу́иа.

И́кос 6.

Возсия́л еси́ на тве́рди церко́вней я́ко свети́льниче Бо́жий, о́тче Гермоге́не, в па́стве твое́й яви́лся еси́ наста́вниче ве́ры, высоты́ ду́ха и кре́посте благоче́стия. Во гра́де Сара́тове и Цари́цыне во всенаро́дном пе́нии, хо́ды Кре́стныя и Богослуже́ния непреста́нныя, соверша́л еси́, предъуве́див времена́ сму́тныя. Те́м же досто́йно сла́вим тя́:

Ра́дуйся, па́стырю не себе́ угожда́яй; ра́дуйся, ста́до Христо́во до́бре сохраня́яй.

Ра́дуйся, жезло́м пра́вды нече́стие сокруши́вый; ра́дуйся, враго́в це́ркви ре́вностно обличи́вый.

Ра́дуйся, огра́да кре́пкая непра́ведно оби́димым; ра́дуйся, защище́ние, пра́вды ра́ди ненави́димым.

Ра́дуйся, меча́ духо́внаго в но́жны не вложи́вый; ра́дуйся, вене́ц му́ченичества от Го́спода получи́вый.

Ра́дуйся, священному́чениче Гермоге́не, Сиби́рския земли́ свети́льниче.

Конда́к 7.

Хотя́ Человеколю́бец Госпо́дь, испыта́ти тя́ я́ко зла́то в горни́ле, разлучи́в тя́ от па́ствы Сара́товския и в оби́тель Жиро́вицкую всели́, иде́же всеце́ло преда́вшись по́двигу и моли́тве, бра́тиею возлю́блен бы́л еси́, за вся́ благодаря́ Бо́га и ра́достно вопия́ Ему́: Аллилу́иа.

И́кос 7.

Но́вая и необори́мая стена́ и огражде́ние неруши́мое оби́тели Жиро́вицкия дарова́ тя́ Госпо́дь, я́ко подви́жника благоче́стия, преподо́бне Гермоге́не. В моли́тве и пла́че о неве́дущих и заблу́ждших, непоколеби́мо подвиза́лся еси́, и в подо́бие Христо́во обле́клся еси́. Сего́ ра́ди моли́твами твои́ми свободи́ на́с от рабо́ты вра́жия и научи́ на́с Еди́ному Бо́гу служи́ти, восхваля́ющих тя́ си́це:

Ра́дуйся, А́нгелов житие́м удиви́вый; ра́дуйся, от страсте́й себя́ свободи́вый.

Ра́дуйся, го́рняя му́дрствовати научи́вый; ра́дуйся, челове́чество во Христе́ просла́вивый.

Ра́дуйся, Христо́вых за́поведей исполни́телю; ра́дуйся, благоче́стия ревни́телю.

Ра́дуйся, непрекло́нный Правосла́вия испове́дниче; ра́дуйся, и́ноческих уста́вов защи́тниче.

Ра́дуйся, священному́чениче Гермоге́не, Сиби́рския земли́ свети́льниче.

Конда́к 8.

Сму́тное вре́мя бе́д и скорбе́й попусти́ Госпо́дь наро́ду Ру́сскому, хотя́ отдели́ти пшени́цу от пле́вел и просла́вити рабо́в свои́х, мы́ же терпе́нию и́х непоколеби́мому за ве́ру Правосла́вную науча́емся, сла́вяще Христа́ Бо́га, ди́внаго во святы́х Свои́х, пою́ще Ему́: Аллилу́иа.

И́кос 8.

Вся́ прему́дро устроя́я, Госпо́дь, дарова́ тя́ архипа́стыря земли́ Сиби́рския, бы́ти уста́вом церко́вным храни́телю и в дни́ сму́ты для все́х покрови́телю, ра́дующеся о твое́м к на́м прише́ствии, воспева́ем ти́ такова́я:

Ра́дуйся, ве́ры утвержде́ние; ра́дуйся, наде́жды вселе́ние.

Ра́дуйся, любо́вь Христо́ву явля́яй; ра́дуйся, Богому́дрыя умы́ услажда́яй.

Ра́дуйся, Боголюби́вых ду́ш увеселе́ние; ра́дуйся, теле́с на́ших исцеле́ние.

Ра́дуйся, об оте́честве на́шем печа́льниче; ра́дуйся, Тобо́льския ка́федры священнонача́льниче.

Ра́дуйся, священному́чениче Гермоге́не, Сиби́рския земли́ свети́льниче.

Конда́к 9.

Вси́ лю́ди па́ствы Тобо́льския ви́девши тя́, святи́телю, немо́лчнаго пропове́дника и ще́драго благотвори́теля, любо́вию Христо́вою, я́ко отца́ о ча́дех свои́х испо́лненнаго, и пред престо́лом Бо́жиим о на́с предста́теля, единогла́сно воспе́ша Бо́гу: Аллилу́иа.

И́кос 9.

Вити́йство пе́сненное на́ше не возмо́жет по достоя́нию изрещи́ труды́ твоя́, святи́телю Гермоге́не, по́двигом бо до́брым подвиза́лся, слу́жбы Боже́ственныя соверша́я, благоче́стие пропове́дал и любо́вию ко Го́споду Иису́су горя́, сего́ ра́ди приими́ от на́с похвалы́ сия́:

Ра́дуйся, святы́я моли́твы соверша́яй; ра́дуйся, в труда́х неле́ностных пребыва́яй.

Ра́дуйся, я́ко во бде́ниих усе́рдствовал еси́; ра́дуйся, я́ко безстра́стие Христо́во стяжа́л еси́.

Ра́дуйся, смире́ния и незло́бия учи́телю; ра́дуйся, терпе́ния и миролю́бия храни́телю.

Ра́дуйся, враги́ своя́ люби́ти науча́яй; ра́дуйся, любо́вию вражду́ побежда́яй.

Ра́дуйся, священному́чениче Гермоге́не, Сиби́рския земли́ свети́льниче.

Конда́к 10.

Спасе́ние ве́чное все́м устроя́я, определи́ тебе́ Госпо́дь кра́ткое вре́мя святи́тельства твоего́ на земли́ Сиби́рстей, иде́же во́лны нестрое́ний и междуусо́бныя бра́ни воздвиза́емыя враго́м спасе́ния бы́ша. Ты́ же, я́ко адама́нт ве́ры непоколеби́мо пребы́л еси́, поя́ Бо́гу: Аллилу́иа.

И́кос 10.

Стена́ тве́рда и гра́д необори́мь пребыва́я преще́ния мучи́телей не убоя́лся еси́, святи́телю, кре́стным хо́дом гра́д Тобо́льск освяща́я и ца́рственных у́зников с высоты́ Кремля́ благословля́я. Мы́ же дивя́щеся кре́пости ду́ха твоего́ пое́м тебе́ такова́я:

Ра́дуйся, Царя́ Небе́снаго до́брый вои́телю; ра́дуйся, царя́ земна́го ве́рный служи́телю.

Ра́дуйся, мирска́го мяте́жа укроще́ние; ра́дуйся, христиа́нскаго по́двига возвыше́ние.

Ра́дуйся, мучи́телем посмея́вшийся; ра́дуйся, за по́двиг испове́дничества кре́пко взя́вшийся.

Ра́дуйся, сие́ до конца́ претерпе́вший; ра́дуйся, ве́рным ча́дам о́браз до́брый яви́вший.

Ра́дуйся, священному́чениче Гермоге́не, Сиби́рския земли́ свети́льниче.

Конда́к 11.

По́двиг му́ченический, око́вы тя́жкие, изгна́ние да́льнее и заключе́ние темни́чное претерпе́л еси́, святи́телю, егда́ на му́ченичество взя́т бы́л еси́ людьми́ злонра́вными и неве́рными и во еди́нем гра́де, во еди́но вре́мя с ца́рственными страстоте́рпцами пребыва́л еси́, до́ндеже дости́гл еси́ восхо́да на Голго́фу страда́ний твои́х, поя́ укрепля́ющему тебя́ Бо́гу: Аллилу́иа.

И́кос 11.

Слы́шавши, ве́рныя ча́да твоя́ о у́зах твои́х во Екатериногра́де, потща́шася о освобожде́нии твое́м, но не возмого́ша преодоле́ти кова́рство мучи́телей и от ни́х пострада́вши побе́дными почестьми́ от Го́спода венча́лися есте́, положи́вше ду́ши своя́ вку́пе с па́стырем свои́м. Мы́ же по́двиг ва́ш восхваля́ющее вопие́м ва́м си́це:

Ра́дуйтеся, священному́ченицы: Ефре́ме, Пе́тре, Михаи́ле, по́двиг сво́й соверши́вшии; ра́дуйтеся, мучи́телевым обма́ном пренебре́гши.

Ра́дуйся, му́чениче Константи́не, на по́двиг себе́ отда́вый; ра́дуйся, священному́чениче Гермоге́не, за Го́спода пострада́вый.

Ра́дуйся, за Ка́мень ве́ры, Христа́, в во́ду вве́рженный; ра́дуйся, с ка́менем на пе́рсех твои́х обре́тенный.

Ра́дуйся, я́ко те́ло твое́ нетле́нно яви́ся; ра́дуйтеся, я́ко Ца́рствие Бо́жие ва́м ве́рно даде́ся.

Ра́дуйся, священному́чениче Гермоге́не, Сиби́рския земли́ свети́льниче.

Конда́к 12.

Благодаре́ние возсыла́я Бо́гу и пу́ть земна́го жития́ му́ченически скончава́я, кро́тко моли́лся еси́ с пострада́вшими с тобо́ю в реце́ Туре́ и по ма́ле вре́мени, нетле́нно обрета́ется на бре́зе ре́чнем те́ло твое́ и че́стне во гра́д Тобо́льск прино́сится и во гро́бе святи́теля Иоа́нна погреба́ется, и ны́не прославля́ется от христиа́нских родо́в, вопию́щих Бо́гу: Аллилу́иа.

И́кос 12.

Пе́ние у гро́ба твоего́, уго́дниче Бо́жий святи́телю Гермоге́не, приими́ от на́с, соверша́ющих па́мять твою́, а́ще и на мно́гая ле́та сокры́та бы́сть па́мять твоя́, но невозмо́жно е́сть укры́тися свети́льнику под спу́дом. Бо́гу же вся́ му́дро устроя́ющему и свети́льник ве́ры твое́й на све́щнице поставля́ющий и ско́раго помо́щника на́м явля́ющаго, да вопие́м тебе́ такова́я:

Ра́дуйся, до́брый по́двиг соверши́вший; ра́дуйся, те́ло нетле́нное благода́тию яви́вший.

Ра́дуйся, я́ко сие́ че́стне в це́ркви погребе́ся; ра́дуйся, я́ко о́ное на исцеле́ние ве́рным даде́ся.

Ра́дуйся, я́ко си́лу воскресе́ния Христо́ва явля́еши; ра́дуйся, я́ко зарю́ всео́бщаго воскресе́ния показу́еши.

Ра́дуйся, и́стины Правосла́вия несомне́нное увере́ние; ра́дуйся, ве́ры благода́тней нело́жное извеще́ние;

Ра́дуйся, священному́чениче Гермоге́не, Сиби́рския земли́ свети́льниче.

Конда́к 13.

О свяще́нная главо́, святы́й священному́чениче Гермоге́не, ты́ бо Го́спода Иису́са Христа́ все́ю душе́ю возлюби́л еси́ и за ве́ру Правосла́вную и Це́рковь святу́ю пострада́ти изво́лил еси́ и на небесе́х мзду́ трудо́в твои́х восприя́л еси́, но и на́с на земли́ тебе́ чту́щих не оста́вил еси́, услы́ши на́с прославля́ющих и моля́щих Тя́: да умно́жится в на́с благода́ть Бо́жия очища́ющая и освяща́ющая ду́ши на́ша, да улучи́вши спасе́ние ве́чное благода́рственная вопие́м Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов Творе́ц, в Тро́ице сла́вимый, предуве́девый чи́стаго се́рдца твоего́ изволе́ние, показа́ тя́ ми́рови бы́ти и́стиннаго ревни́теля благоче́стия и любви́ Христо́вой воплоще́ние. Ве́дуще тя́ и́нока сла́вна и па́стыря предо́бра, дарова́ тебе́ по́двигом до́брым подвиза́тися и тече́ние жи́зни вре́менныя му́жественно сконча́ти, на́с же науча́я тебе́ воспева́ти такова́я:

Ра́дуйся, Бо́гом избра́нный на́ш па́стырю; ра́дуйся, увенча́нный архиере́йской благода́тию.

Ра́дуйся, чи́стым ра́зумом Бо́га возлюби́вый; ра́дуйся, Го́споду усе́рдно послужи́вый.

Ра́дуйся, се́рдце твое́ в незло́бии храни́вый; ра́дуйся, и́го Христо́во от ю́ности восприя́вый.

Ра́дуйся, земли́ Сиби́рстей благода́тное дарова́ние; ра́дуйся, со все́ми святы́ми не́ба Церко́внаго украше́ние.

Ра́дуйся, священному́чениче Гермоге́не, Сиби́рския земли́ свети́льниче.

Конда́к 1.

Взбра́нный во́ине Царя́ Небе́снаго и Христо́ва ста́да наста́вниче, до́брый и изря́дный па́стырю священному́чениче Гермоге́не возсия́вый на земли́ Сиби́рстей я́ко звезда́ Богосве́тлая те́м же я́ко име́я дерзнове́ние ко Го́споду, просвеще́ние на́м да́руй, да зове́м ти́:

Ра́дуйся, священному́чениче Гермоге́не, Сиби́рския земли́ свети́льниче.

Моли́тва ко священному́ченику Гермоге́ну.

О, па́стырю до́брый, святы́й священному́чениче Гермоге́не, от ю́ности твоея́ Го́споду Иису́су Христу́ усе́рдно после́дуя, все́ю душе́ю Того́ возлюби́л еси́; в учи́тельстве до́бре подвиза́яся и епи́скопство досто́йно восприя́в, Це́ркви Правосла́вней послужи́л еси́, мно́гия ско́рби претерпе́в, ве́ру сохрани́в и Бо́га просла́вив, напосле́док же му́ченическим венце́м венча́лся еси́: и ны́не в Небе́сных оби́телех пребыва́яй, па́ству свою́ назира́еши и духо́вно окормля́еши. Услы́ши моле́бный гла́с ча́д свои́х, пред святы́ми твои́ми моща́ми [пред свято́ю ико́ною твое́ю] предстоя́щих и ме́сто погребе́ния твоего́ чту́щих, засту́пника и хода́тая тя́ пред Го́сподем ве́дущих. Умоли́ Го́спода Бо́га, да утверди́т в стране́ Росси́йстей ве́ру правосла́вную, да да́рует па́стырем и па́стве ре́вность о благоче́стии и спасе́нии, отроко́м уча́щимся — нау́к разуме́ние, все́м же — дру́г ко дру́гу любо́вь и согла́сие, заблу́ждших да обрати́т и соедини́т Це́ркви Свое́й Святе́й, е́реси и раско́лы да упраздни́т, и вся́ правосла́вныя христиа́ны да спасе́т и поми́лует, и сподо́бит Небе́снаго Ца́рствия, иде́же ты́ ра́достно по труде́х и по́двизех ны́не почива́еши, прославля́я со все́ми святы́ми Бо́га, в Тро́ице сла́вимаго, Отца́ и Сы́на и Свята́го Ду́ха, в безконе́чныя ве́ки. Ами́нь.