Конда́к 1.

Избра́нный чудотво́рче и пресла́вный уго́дниче Христо́в, святи́телю о́тче Мака́рие, при́сно от лю́тых и напа́стей моли́твами твои́ми избавля́еми прино́сим ти́ похва́льная. Ты́ же, я́ко име́яй дерзнове́ние ко Го́споду, не преста́й от все́х бе́д свобожда́ти любо́вию тебе́ зову́щих:

Ра́дуйся, Мака́рие, архиере́ом честно́е украше́ние.

И́кос 1.

А́нгела земна́го зва́нием и челове́ка небе́снаго житие́м, яви́ тя́ небесе́ и земли́ Созда́тель: Ему́же предстоя́ и ликовству́я непреста́нно с небе́сными чи́нми, славосло́вие возсыла́еши и моле́нием гре́шных люде́й от земли́ вне́млеши, услы́ши и на́с ко предста́тельству твоему́ усе́рдно взыва́ющих:

Ра́дуйся, я́ко по и́мени твоему́ и житие́ твое́ блаже́нное; ра́дуйся, Тро́ическим еди́нством священнота́йне просвеща́яйся.

Ра́дуйся, к Триипоста́сному Све́ту и на́ши ду́ши возводя́яй; ра́дуйся, во́лю избра́вшаго тя́ Го́спода Христа́ твори́вый.

Ра́дуйся, и на́с твори́ти во́лю Его́ свои́м житие́м науча́яй; ра́дуйся, Спаси́теля Бо́га любве́ и́скренний подража́телю.

Ра́дуйся, и на́ши ду́ши любо́вию Креста́ Его́ просвеща́яй; ра́дуйся, Ду́ха Пресвята́го сосу́де избра́нный.

Ра́дуйся, и на на́с благода́ть Его́ призыва́яй; ра́дуйся, с Цари́цей Небе́сной пред Спаси́телем на́шим предста́телю.

Ра́дуйся, непреста́нный А́нгелов собесе́днице; ра́дуйся, о ро́де челове́честем усе́рдный моли́твенниче.

Ра́дуйся, Мака́рие, архиере́ом честно́е украше́ние.

Конда́к 2.

Ви́дяще святы́я мо́щи твоя́, мно́гая чудеса́ источа́ющия, и покланя́ющеся и́м, я́ко ди́вному зна́мению ми́лости Госпо́дней в земли́ на́шей, ра́достно благодари́м Бо́га, благогове́йно пою́ще Ему́: Аллилу́иа.

И́кос 2.

Ра́зумом просвеще́нным свы́ше вразумля́я заблу́ждшия, си́льный побо́рник бы́л еси́ и́стины Христо́вой, святи́телю Мака́рие, егда́ в стране́ Лито́встей ца́рие зе́мстии и кня́зи лю́дстии собра́шася вку́пе на ве́рных ча́д Це́ркви Христо́вой, мы́ же труда́ми и моли́твами твои́ми от иноплеме́ннаго и инове́рнаго и́га изба́вльшеся, вопие́м ти́ си́це:

Ра́дуйся, гра́да Ви́льны сла́вное прозябе́ние; ра́дуйся, ве́рный храни́телю апо́стольских преда́ний.

Ра́дуйся, и́стины Правосла́вия стра́же неусы́пный; ра́дуйся, сто́лпе благоче́стия несокруши́мый.

Ра́дуйся, святи́телей дре́вних подража́телю; ра́дуйся, кре́посте на́ша духо́вная.

Ра́дуйся, тве́рдое ве́ры и пра́вды охране́ние; ра́дуйся, па́стырем и пасо́мым о́бразе благоче́стия.

Ра́дуйся, Це́ркви пресла́вная красото́; ра́дуйся, архиере́ев добро́то.

Ра́дуйся, правосла́вия свети́ло; ра́дуйся, я́ко духо́вную же́ртву непреста́нно ко Го́споду возно́сиши.

Ра́дуйся, Мака́рие, архиере́ом честно́е украше́ние.

Конда́к 3.

Си́ла свы́ше осени́ тя́, и́стинный па́стырю ду́ш христиа́нских, егда́ проти́ву волко́в злы́х, и́щущих ста́до Христо́во расхи́тити, тве́рдо стоя́л еси́, и духо́вныя ча́да твоя́ и благове́рную княги́ню в Правосла́вии укрепи́л еси́, и ны́не на Небесе́х предстоя́ Христу́ Бо́гу, моли́ Го́спода Сла́вы, да умно́жит в земли́ на́шей благоче́стие и единомы́слие: отступи́вшия же от правосла́вныя Це́ркви све́том позна́ния Своего́ да озари́т, да и ти́и с на́ми воззову́т Ему́: Аллилу́иа.

И́кос 3.

Име́я вои́стинну, блаже́нне Мака́рие, вели́кую любо́вь ста́ду своему́, лю́дем Ру́сским яви́лся еси́ наста́вник му́дрый ко спасе́нию, на́м же моли́твенник те́плый и ско́рый помо́щник показа́лся еси́, вся́ подвиза́я благода́рно взыва́ти тебе́:

Ра́дуйся, от ру́к ага́рянских сме́ртную испи́вый ча́шу; ра́дуйся, от у́ст ве́рных сего́ ра́ди при́сно восхваля́емый.

Ра́дуйся, му́чениче, к небе́сным селе́нием ду́х на́ш при́сно возводя́яй; ра́дуйся, подви́жниче, на́с, от ю́ности страстьми́ обурева́емых, безстра́стию поуча́яй.

Ра́дуйся, па́стырю, благовеству́яй на́м глаго́л Христо́в си́лою мно́гою; ра́дуйся, о́тче, ча́дом свои́м пу́ть ко спасе́нию показа́вый.

Ра́дуйся, гра́да Ки́ева небе́сный покрови́телю; ра́дуйся, священнослужи́телем до́брый наста́вниче.

Ра́дуйся, мона́хов и мирски́х люде́й му́дрый учи́телю; ра́дуйся, страны́ на́шей пресла́вный свети́льниче.

Ра́дуйся, все́х моля́щихся прибе́жище; ра́дуйся, скорбя́щих уте́шителю.

Ра́дуйся, Мака́рие, архиере́ом честно́е украше́ние.

Конда́к 4.

Бу́рею лати́нскаго ерети́ческаго неи́стовства и блужда́ния обурева́еми ру́сскии лю́дие обрето́ша в тебе́, священному́чениче Мака́рие, ко́рмчаго изря́дна во спасе́ние, те́мже и мы́, зря́ жите́йское мо́ре, воздвиза́емое бу́рею страсте́й и неве́рия, притека́ем к ти́хому приста́нищу моли́тв твои́х и к Бо́гу, возводя́щему от тли́ живо́т на́ш, вопие́м: Аллилу́иа.

И́кос 4.

Слы́шавше и ви́девше, свя́те Мака́рие, бли́жнии и да́льнии души́ твоея́ добро́ту и свя́тость жития́ твоего́, избра́ тя́ в архипа́стыря Це́ркве литовско-ру́сския и обрето́ша в тебе́ па́стыря до́браго, за о́вцы свою́ ду́шу положи́ти гото́ваго, с весе́лием взыва́ху:

Ра́дуйся, избра́нниче Бо́жий, пресла́вный; ра́дуйся, сосу́де чистоты́ и ре́вности испо́лненный.

Ра́дуйся, церко́вная похвало́; ра́дуйся, ле́сти лати́нския посрами́телю.

Ра́дуйся, Правосла́вия догма́тов уясни́телю; ра́дуйся, гони́мых пра́вды ра́ди защи́тниче.

Ра́дуйся, любому́дрствующих в Бо́зе благи́й сове́тниче; ра́дуйся, лука́ваго мудрова́ния обличи́телю.

Ра́дуйся, воздержа́ния учи́телю; ра́дуйся, в простоте́ се́рдца ве́рующим све́тлое ве́ры пра́вило.

Ра́дуйся, в уничиже́нии житие́ свое́ проводя́щим о́бразе кро́тости и смире́ния; ра́дуйся, спаса́ющихся ободре́ние.

Ра́дуйся, Мака́рие, архиере́ом честно́е украше́ние.

Конда́к 5.

Боготе́чною звездо́ю восте́кл еси́, святи́телю Мака́рие, ко свято́му гра́ду Ки́еву, ре́вностию снеда́ем о до́ме Бо́жием и о спасе́нии вруче́нных ти́ ду́ш, а́ще и ве́дал еси́ о наше́ствии ага́рян, с мече́м сме́рти ожида́вших тя́ на пути́, оба́че вся́ презре́л еси́ во е́же испо́лнити до́лжная. И соверша́я хоте́ние твое́, в собо́рной це́ркви гра́да Ки́ева ны́не нетле́нно почива́еши и ча́дам твои́м вы́ну предстои́ши, научи́, о блаже́нне, и на́с, разсла́бленных ду́хом, пу́ть спасе́нию в Бо́зе соверша́ти и на се́м пути́ вся́ препо́ны моли́твами твои́ми препобежда́ти, да ни сме́рть, ни живо́т не разлуча́т ны́ от любве́ Бо́жия, ниже́ заключа́т усте́н на́ших, вопию́щих Спаси́телю Бо́гу: Аллилу́иа.

И́кос 5.

Уви́девше ве́си скрыголо́встии лю́дие, в це́ркви су́щия, ага́рян нечести́вых губи́тельное наше́ствие, сме́ртным у́жасом одержи́ми бы́вше, бежа́ху. Ты́ же, о досточу́дне, я́ко до́блий во́ин Христо́в, на стра́же служе́ния твоего́ пребы́л непоколеби́м, и та́ко мече́м нечести́вых от служе́ния вре́меннаго преста́влен еси́ к славосло́вию ве́чному пред Го́сподом вся́ческих, Ему́ же с го́рними чи́нми сослужа́, приими́ на́ша хвале́ния такова́я:

Ра́дуйся, с безкро́вною же́ртвою кро́вь свою́ в же́ртву уго́дную Бо́гу принесы́й; ра́дуйся, с херуви́мы Животворя́щей Тро́ице Трисвяту́ю пе́снь при́сно припева́яй.

Ра́дуйся, небе́сными чи́нми неви́димо дориноси́мо, к Бо́гу вознесе́нный; ра́дуйся, с пра́ведными ве́чное Аллилу́иа воспева́яй.

Ра́дуйся, до кро́ве испове́давый Тро́ицу единосу́щную; ра́дуйся, горе́ име́яй пламене́ющий ду́х.

Ра́дуйся, досто́йно возблагодари́вый Го́спода; ра́дуйся, с шестокрила́тыми и многоочи́тыми побе́дную пе́снь пою́щий.

Ра́дуйся, Пречи́стых Та́ин Христо́вых вои́стинну в жи́знь ве́чную причасти́выйся; ра́дуйся, свята́я во освяще́ние вкуси́вый.

Ра́дуйся, апо́стольския вла́сти в че́сти прее́мниче; ра́дуйся, чуде́с исто́чниче.

Ра́дуйся, Мака́рие, архиере́ом честно́е украше́ние.

Конда́к 6.

Пропове́дник и́стины Правосла́вия яви́лся еси́, богому́дре Мака́рие, я́коже бо дре́вле во святе́м гра́де равноапо́стольная Еле́на с патриа́рхом Мака́рием честны́й Кре́ст Христо́в воздвиза́ше лю́дям взыва́вшим: «Го́споди, поми́луй», си́це и ты́, ру́сскаго Сио́на первосвяти́телю, с княги́нею Еле́ною в сердца́х ве́рных о́ный Кре́ст утвержда́л еси́, да вси́ еди́ным се́рдцем и еди́ными усты́ взыва́ют на не́м пригвожде́нному Бо́гу: Аллилу́иа.

И́кос 6.

Возсия́ в хра́ме прему́дрости Госпо́дней чу́дный све́т от пречи́стых моще́й твои́х, преди́вный чудотво́рче, его́ же ви́девше два́ му́жа, пове́даста благогове́йнейшему первосвяти́телю И́ову и все́м лю́дем прославля́юще Бо́га, такову́ю благода́ть ти́ да́вшаго, ро́ди же ру́сскии от ле́т дре́вних навыко́ша воспева́ти ти́:

Ра́дуйся, свети́льниче, огне́м боже́ственныя благода́ти возжже́нный; ра́дуйся, благовести́телю све́та Христо́ва.

Ра́дуйся, а́нгельское житие́ явля́яй; ра́дуйся, гре́шником наста́вниче покая́ния.

Ра́дуйся, я́ко твои́м хода́тайством благода́ть спасе́ния все́м да́руется; ра́дуйся, я́ко твои́ми моли́твами расточе́нная ча́да церко́вная собира́ются.

Ра́дуйся, я́ко твои́м моле́нием зло́ба и кова́рство посрамля́ются; ра́дуйся, я́ко предста́тельством твои́м ми́ром огражда́емся.

Ра́дуйся, пода́телю ми́лости тоя́ тре́бующим; ра́дуйся, хода́таю небе́сных и земны́х бла́г почита́ющим па́мять твою́.

Ра́дуйся, о лю́дех те́плое моле́ние вознося́й; ра́дуйся, все́х моля́щихся прибе́жище.

Ра́дуйся, Мака́рие, архиере́ом честно́е украше́ние.

Конда́к 7.

Хотя́й предста́вити Го́споду о́вцы своя́ лю́ди избра́нны, потща́лся еси́ всеме́рно княги́ню Еле́ну и лю́ди утверди́ти в правове́рии, все́х наставля́яй к житию́ богоуго́дному. Не преста́й, святи́телю, и ны́не о ста́де твое́м моли́тися Вседержи́телю Бо́гу, да пода́ст народоправи́телем му́дрость и си́лу, па́стырем ре́вность о до́ме Госпо́днем и все́м вся́, я́ко же спасе́ния поле́зная, о ни́х же благодаря́ще Бо́га, да вопию́т: Аллилу́иа.

И́кос 7.

Но́вое зна́мение ми́лости твоея́ яви́ щедрода́тель Госпо́дь, гра́ду Ки́еву мно́жае четы́реста ле́т нетле́нны сохраня́я честны́я мо́щи твоя́, священному́чениче блаже́нне Мака́рие, о се́м благодаря́ще ди́внаго во святы́х Го́спода, с любо́вию ублажа́ем тя́:

Ра́дуйся, я́ко кро́вию твое́ю, а́ки багряни́цею, Це́рковь украси́ся; ра́дуйся, я́ко нетле́нным те́лом твои́м, а́ки алма́зом безце́нным, хра́м прему́дрости Госпо́дней просвети́ся.

Ра́дуйся, я́ко тобо́ю ли́к му́ченический приумно́жися; ра́дуйся, я́ко кро́вию твое́ю се́мена ве́ры в земли́ на́шей возрасти́шася.

Ра́дуйся, я́ко тобо́ю Небеса́ возвесели́шася; ра́дуйся, я́ко о тебе́ и земля́ ра́дуется.

Ра́дуйся, о Ду́се Свя́те ду́ши благочести́выя возвеселя́яй; ра́дуйся, печа́ль по Бо́зе ка́ющимся подава́яй.

Ра́дуйся, в терпе́нии кре́ст скорбе́й несу́щих утвержда́яй; ра́дуйся, бо́дросте во обстоя́нии су́щих.

Ра́дуйся, напу́тствуемым му́жеством снабде́ние.

Ра́дуйся, Мака́рие, архиере́ом честно́е украше́ние.

Конда́к 8.

Стра́нное ку́пно же и ди́вное виде́ние яви́ся обре́тшим тя́ в це́ркви скрыголо́встей магомета́ном, егда́ узре́вша тя́, святи́телю Христо́в, еди́наго то́кмо безтре́петно престо́лу Госпо́дню предстоя́ща и моле́ние о соедине́нии все́х возсыла́юща, оба́че си́м не вразуми́шася, нечести́вии, христиа́нски воспе́ти Влады́це все́х: Аллилу́иа.

И́кос 8.

Ве́сь в Бо́зе живе́ши, преблаже́нне о́тче на́ш, но и на́с гре́шных не оставля́еши, сла́ву в вы́шних Бо́гу воспева́еши, и зде́ пречи́стыми моща́ми твои́ми пребыва́еши, те́мже я́ко жи́ву су́щу с на́ми от всего́ се́рдца гла́с хвалы́ прино́сим ти́:

Ра́дуйся, я́ко по сло́ву апо́стольскому, все́м вся́ бы́л еси́; ра́дуйся, я́ко спасе́ния ра́ди ча́д твои́х себе́ на сме́рть преда́л еси́.

Ра́дуйся, посеща́вый ста́до твое́ не ну́ждою, но во́лею и по Бо́зе; ра́дуйся, ра́бе Госпо́день благи́й и ве́рный.

Ра́дуйся, вше́дый в ра́дость Го́спода твоего́; ра́дуйся, да́нный тебе́ тала́нт преумно́живый.

Ра́дуйся, в мзду́ прия́вый благода́ть исцеле́ний; ра́дуйся, боля́щих здра́вие.

Ра́дуйся, скорбя́щих утеше́ние; ра́дуйся, явле́нием моще́й твои́х в Правосла́вии на́с утвержда́яй.

Ра́дуйся, я́ко твоего́ нетле́ннаго телесе́ де́моны трепе́щут; ра́дуйся, и на́с пред гро́бом твои́м стоя́щих умиле́ния исполня́еши.

Ра́дуйся, Мака́рие, архиере́ом честно́е украше́ние.

Конда́к 9.

Все́ естество́ а́нгельское удиви́ся пресла́вней кончи́не твое́й, е́юже житие́ твое́ досто́йно венча́л еси́, ли́к страстоте́рпцев с любо́вию тя́ преуспева́яй, та́кожде и Це́рковь Ру́сская, ку́пно со Влади́миром и О́льгою, со страстоте́рпцы Бори́сом и Гле́бом, с Михаи́лом святи́телем, с Анто́нием и Феодо́сием и все́ми чудотво́рцы Пече́рскими в моли́твенники тя́ прие́мше, благода́рно о тебе́ вопию́т: Аллилу́иа.

И́кос 9.

Вети́йства на́шего не́мощь, восхвали́ти тя́ хотя́ще, до́бре ве́мы, оба́че да не отри́нет на́с благосты́ня твоя́, из глубины́ се́рдца вопию́щих:

Ра́дуйся, архиере́ю Бо́га вы́шняго; ра́дуйся, па́стырю на́м до́брый.

Ра́дуйся, пра́вды служи́телю нелицеприя́тный; ра́дуйся, в безве́стности нача́ло жития́ свое́ю сохрани́вый.

Ра́дуйся, те́м пастыренача́льнику Христу́ подража́вый; ра́дуйся, я́ко тебе́ безве́стная и та́йная прему́дрости Бо́жия явле́на бы́ша.

Ра́дуйся, я́ко кра́я жела́ний дости́гл еси́; ра́дуйся, я́ко в тебе́ му́дрствовася, е́же и во Христе́ Иису́се.

Ра́дуйся, я́ко послушли́в бы́л Ему́ да́же до сме́рти, сме́рти же му́ченическия; ра́дуйся, я́ко вся́ко коле́но небе́сных и земны́х восхваля́ет тя́.

Ра́дуйся, во сла́ву Христо́ву потруди́выйся; ра́дуйся, любве́ боже́ственныя испо́лненный.

Ра́дуйся, Мака́рие, архиере́ом честно́е украше́ние.

Конда́к 10.

Спасти́ хотя́ от ве́чныя ги́бели ста́до твое́, злоухищре́нии лати́нскими прельща́емое, подъя́л еси́, блаже́нне, труды́ мно́гия и боле́зни, обходя́ бо гра́ды и ве́си, кня́зи и лю́ди утеша́л еси́, па́стыри поуча́л еси́, проти́вящихся и́стине облича́л еси́, вся́ко тща́ние прилага́я, да вси́ правосла́внии воспева́ют Бо́гу согла́сную пе́снь: Аллилу́иа.

И́кос 10.

Стена́ тве́рдая бы́л еси́ правосла́вным россия́ном проти́ву враго́в ви́димых и неви́димых, и ны́не, уго́дниче Христо́в, моли́твами твои́ми, во́лны неве́рия и лжеуче́ний отврати́ от на́с, оте́чество твое́ сохрани́ от гла́да, губи́тельства, наше́ствия иноплеме́нников и междуусо́бныя бра́ни, и от вся́ких бе́д да благода́рно зове́м ти́:

Ра́дуйся, на Це́рковь святу́ю возстаю́щим си́льный противобо́рниче; ра́дуйся, провозве́стником Ева́нгелия неутоми́мый споспе́шниче.

Ра́дуйся, во тьме́ заблужде́ний седя́щих све́том Христо́вым просвеща́яй; ра́дуйся, сто́лпе Це́ркви, его́ же утверди́ Прему́дрость Бо́жия.

Ра́дуйся, на язы́ки, бра́ни хотя́щи, гне́в Бо́жий пролива́яй; ра́дуйся, миротво́рцем ми́лость Госпо́дню посыла́яй.

Ра́дуйся, сла́во и благопоспеше́ние прави́телем на́шим; ра́дуйся, на враги́ побе́ды во́инству на́шему хода́таю.

Ра́дуйся, устраше́ние ага́рянских по́лчищ; ра́дуйся, злоче́стия и неприя́зни искорени́телю.

Ра́дуйся, ми́ра и незло́бия учи́телю; ра́дуйся, на по́двиг бра́ни духо́вныя вдохнови́телю.

Ра́дуйся, Мака́рие, архиере́ом честно́е украше́ние.

Конда́к 11.

Пе́снь Трисвяту́ю с херуви́мы и серафи́мы Животворя́щей Тро́ице припева́я, о́тче на́ш Мака́рие, посо́бствуй и на́м, жите́йския попече́ния отлага́юще во вся́ времена́ гла́сы преподо́бными воспева́ти на херуви́мех Седя́щему: Аллилу́иа.

И́кос 11

Свети́льник горя́й и святя́й, показа́лся еси́, святи́телю Христо́в, егда́ из под спу́да смире́ннаго и́ноческаго жи́тельства поста́влен бы́л еси́ на све́щнице митропо́лии Ки́евския, да све́тиши все́м ча́дом Це́ркве ру́сския су́щим, благода́рно тебе́ зову́щим:

Ра́дуйся, я́ко све́т тво́й просвети́ся пред ве́рными и неве́рными; ра́дуйся, я́ко о тебе́ вси́ ве́рнии просла́виша Отца́ Небе́снаго.

Ра́дуйся, све́те, его́ же не объя́т тьма́ лати́нская; ра́дуйся, я́ко тобо́ю ма́ти градо́в ру́сских Ки́ев хва́лится.

Ра́дуйся, я́ко тебе́ ра́ди и вся́ Ру́сская земля́ весели́тся; ра́дуйся, единокро́вных учи́телю едине́ния.

Ра́дуйся, в междоусо́бии су́щим ми́ра пропове́дниче; ра́дуйся, взыску́ющим Ца́рствия Бо́жия незри́мый наста́вниче.

Ра́дуйся, я́ко все́м тружда́ющимся и обремене́нным о́браз по́двига сего́ явля́еши; ра́дуйся, я́ко на́с хла́дных по́двигом любве́ твоея́ возгрева́еши.

Ра́дуйся, ревнова́ти о свое́м спасе́нии на́с науча́еши; ра́дуйся, Бо́жий избра́нниче.

Ра́дуйся, Мака́рие, архиере́ом честно́е украше́ние.

Конда́к 12.

Благода́ть Пресвята́го Ду́ха испроси́ на́м, предста́телю на́ш, да вся́ немощна́я в на́с уврачу́ется, и оскудева́ющая восполня́ется; неве́рнии и заблу́ждшии к ве́ре Христо́вой да обратя́тся, подража́юще ве́ре твое́й; малоду́шнии и отча́янии наде́ждою несумне́нною да утвердя́тся, упова́нием на моли́твы твои́ укрепля́емы; жестоковы́йнии и неми́лостивии любо́вию неоскудева́ющей да воспла́менятся и твое́ю любо́вию распаля́еми вси́ согла́сно да воззову́т к Исто́чнику вся́кия благосты́ни: Аллилу́иа.

И́кос 12.

Пою́щим вели́кия доброде́тели твои́ и честны́м моща́м твои́м покланя́ющимся, достохва́льне о́тче Мака́рие, умоли́ Го́спода си́л дарова́ти коему́ждо потре́бная и возбуди́ на́с те́пло взыва́ти ти́:

Ра́дуйся, от Го́спода досто́йно венча́нный; ра́дуйся, а́нгелы ра́достно восхваля́емый.

Ра́дуйся, чудесы́ от честны́х моще́й твои́х па́че сло́ва прославля́емый; ра́дуйся, Михаи́ла, Иларио́на и про́чих святи́телей ки́евских досто́йный прие́мниче.

Ра́дуйся, а́ще и внеза́пную, но пресла́вную кончи́ну прия́вый; ра́дуйся, пред престо́лом Госпо́дним неусы́пный на́ш моли́твенниче.

Ра́дуйся, на небе́сную высоту́ воспари́вый; ра́дуйся, му́дрость змии́ну и кро́тость голуби́ну сочета́вый.

Ра́дуйся, заблу́ждшия о́вцы на ра́менах свои́х ко Отцу́ принесы́й; ра́дуйся, кре́пкая па́лица Христо́ва.

Ра́дуйся, и́стинная зако́на Бо́жия скрижа́ль и исто́чник чи́стыя благода́ти; ра́дуйся, я́ко па́мять твоя́ при́сно с похвала́ми.

Ра́дуйся, Мака́рие, архиере́ом честно́е украше́ние.

Конда́к 13.

О преди́вный и преблаже́нный уго́дниче Христо́в, святы́й священному́чениче, услы́ши на́с гре́шных ча́д твои́х и приими́ сие́ ма́лое благохвале́ние на́ше, многомо́щным предста́тельством твои́м, отврати́ гне́в Бо́жий, пра́ведно за грехи́ на́ши на ны́ дви́жимый, и испроси́ на́м проще́ния мно́жества беззако́ний на́ших, умоли́ дарова́ти христиа́нскую кончи́ну живота́ на́шего, да по вели́цей ми́лости Госпо́дней му́ки ве́чныя изба́вльшеся, сподо́бимся улучи́ти небе́сных благи́х, и́х же ты́ ны́не наслажда́ешися, поя́ Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгела земна́го зва́нием и челове́ка небе́снаго житие́м, яви́ тя́ небесе́ и земли́ Созда́тель: Ему́же предстоя́ и ликовству́я непреста́нно с небе́сными чи́нми, славосло́вие возсыла́еши и моле́нием гре́шных люде́й от земли́ вне́млеши, услы́ши и на́с ко предста́тельству твоему́ усе́рдно взыва́ющих:

Ра́дуйся, я́ко по и́мени твоему́ и житие́ твое́ блаже́нное; ра́дуйся, Тро́ическим еди́нством священнота́йне просвеща́яйся.

Ра́дуйся, к Триипоста́сному Све́ту и на́ши ду́ши возводя́яй; ра́дуйся, во́лю избра́вшаго тя́ Го́спода Христа́ твори́вый.

Ра́дуйся, и на́с твори́ти во́лю Его́ свои́м житие́м науча́яй; ра́дуйся, Спаси́теля Бо́га любве́ и́скренний подража́телю.

Ра́дуйся, и на́ши ду́ши любо́вию Креста́ Его́ просвеща́яй; ра́дуйся, Ду́ха Пресвята́го сосу́де избра́нный.

Ра́дуйся, и на на́с благода́ть Его́ призыва́яй; ра́дуйся, с Цари́цей Небе́сной пред Спаси́телем на́шим предста́телю.

Ра́дуйся, непреста́нный А́нгелов собесе́днице; ра́дуйся, о ро́де челове́честем усе́рдный моли́твенниче.

Ра́дуйся, Мака́рие, архиере́ом честно́е украше́ние.

Конда́к 1.

Избра́нный чудотво́рче и пресла́вный уго́дниче Христо́в, святи́телю о́тче Мака́рие, при́сно от лю́тых и напа́стей моли́твами твои́ми избавля́еми прино́сим ти́ похва́льная. Ты́ же, я́ко име́яй дерзнове́ние ко Го́споду, не преста́й от все́х бе́д свобожда́ти любо́вию тебе́ зову́щих:

Ра́дуйся, Мака́рие, архиере́ом честно́е украше́ние.

Моли́тва.

О вели́кий уго́дниче Христо́в, святи́телю о́тче Мака́рие! В житии́ твое́м ча́д твои́х любо́вию сме́рти крепча́йшею возлюби́вый и за ни́х ду́шу свою́ преда́вый, при́зри от Го́рних Оби́телей на на́с, вонми́ воздыха́ниям на́шим серде́чным, и помози́ на́м недосто́йным и смире́нным. Моли́ся, святи́телю ми́лостивый, да рече́т О́н ми́р на лю́ди Своя́ и на преподо́бныя Своя́ и на обраща́ющия сердца́ к Нему́. Да́руй на́м, о́тче на́ш, ду́х любве́ твоея́ ко святе́й ма́тери на́шей Це́ркви Христо́вой, укрепи́ ны́, разсла́бленныя ду́хом, оте́ческия преда́ния храни́ти и о мимоше́дших напа́стех па́мять спаси́тельную име́ти и всегда́ благода́рственная благоде́телю Бо́гу воспева́ти научи́. Предста́тельством твои́м у престо́ла Го́спода си́л испроси́ Це́ркви Христо́вой от ересе́й и раско́лов огражде́ние; к честны́м моща́м твои́м притека́ющим и чту́щим святу́ю па́мять твою́ исполне́ние благи́х и́х проше́ний, и все́м христиа́ном вся́ ко вре́менней и ве́чней жи́зни потре́бная, да прославля́ется о тебе́ пречестно́е и великоле́пное И́мя Отца́ и Сы́на и Свята́го Ду́ха и ны́не и при́сно и во ве́ки веко́в. Ами́нь.