Конда́к 1.

Избра́нный уго́дниче Христо́в, новоявле́нный свети́льниче земли́ Белгоро́дския, святи́телем сла́ва и му́чеником ра́дование, священному́чениче Никоди́ме, тя́, я́ко досто́йнаго прее́мника святи́теля Иоаса́фа почита́ем и по́мощи и предста́тельства у Престо́ла Бо́жия от тебе́ прося́ще, пе́сненными похвала́ми тя́ ублажа́ем:

Ра́дуйся, святи́телю Никоди́ме, земли́ Белгоро́дския сла́во и украше́ние.

И́кос 1.

А́нгеле земны́й и Небе́сный граждани́не, богому́дре святи́телю Христо́в Никоди́ме, ве́мы, я́ко мно́го мо́жет моли́тва твоя́, Влады́ку умилостивля́ющая. Те́мже па́мять твою́ све́тло пра́зднующе, мо́лим тя́, изба́ви на́с от вся́кия ско́рби и ну́жды, и сохрани́ от все́х ко́зней вра́жиих на́с неврежде́нными, да в умиле́нии се́рдца воспои́м тебе́ сицева́я:

Ра́дуйся, измла́да Го́спода возлюби́вый; ра́дуйся, а́нгельски на земли́ пожи́вый.

Ра́дуйся, в житии́ твое́м святи́телю Иоаса́фу поревнова́вый; ра́дуйся, в творе́ниих свои́х его́ просла́вивый.

Ра́дуйся, в по́двизех неуста́нно пребыва́яй; ра́дуйся, чистоту́ серде́чную стяжа́вый.

Ра́дуйся, христиа́н непосты́дное упова́ние; ра́дуйся, мона́шествующих наставле́ние.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 2.

Ви́деша тя́, богому́драго иера́рха, не то́чию сло́вом па́ству науча́юща, оба́че доброде́тельным житие́м по Бо́зе приме́р показу́юща и оте́ческою любо́вию вся́ покрыва́юща, лю́дие возблагодари́ша Всеми́лостиваго Бо́га, дарова́вшаго и́м такова́го до́браго па́стыря, с любо́вию поя́ху Ему́: Аллилу́иа.

И́кос 2.

Ра́зум просвеще́нный име́я, досто́йно Бо́гу в архиере́йстем са́не послужи́вый, любо́вь и́скреннюю па́ствы своея́ стяжа́л еси́, еди́на от ни́х живо́т сво́й за тя́ положи́ша, егда́ богобо́рцы заключи́ша тя́ в темни́цу, та́я, до́брая жена́ свяще́нника, прии́де умоли́ти за тя́ власти́теля, ничто́же успе́ша, то́кмо жи́зни лиши́шася. Такове́й любви́ па́ствы твоея́ умиля́емся и тебе́ пои́м:

Ра́дуйся, пра́вило ве́ры и о́браз благоче́стия; ра́дуйся, архиере́йскаго са́на в Бо́зе вели́чие.

Ра́дуйся, апо́столом ди́вный подража́телю; ра́дуйся, па́ствы неле́ностный учи́телю.

Ра́дуйся, а́нгельских лико́в сотаи́нниче; ра́дуйся, му́ченических полко́в соприча́стниче.

Ра́дуйся, святи́телей богодухнове́нное украше́ние; ра́дуйся, Це́ркви Христо́вой ве́лие похвале́ние.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 3.

Си́лою Ду́ха Бо́жия укрепля́емый, в мона́шестве жесто́кое житие́ поживе́, посто́м и моли́твою ве́тхаго челове́ка в себе́ умерщвля́я, в две́ри милосе́рдия Бо́жия неуста́нно толки́й, чистоту́ се́рдца стяжа́л еси́, боголюби́ве святи́телю Никоди́ме. Те́мже мо́лим тя́, испроси́ у Го́спода покая́ннаго жития́ на́м гре́шным, дабы́ и мы́, обретя́ чистоту́ серде́чную, вы́ну воспева́ли Бо́гу хвале́бную пе́снь: Аллилу́иа.

И́кос 3.

И́мамы тя́ моли́твенника те́пла и за Зе́млю Ру́сскую предста́теля ко Го́споду усе́рдна, святи́телю о́тче Никоди́ме, приме́ром до́браго жития́ твоего́ поуча́емся, в ве́ре утвержда́емся и по си́ле коего́ждо подража́ти тебе́ ма́ло ма́ло пыта́емся, учи́телю достосла́вный. Те́мже благода́рно тебе́ воспева́ем:

Ра́дуйся, те́ло свое́ воздержа́нием увяди́вый; ра́дуйся, пло́ть свою́ ду́хови покори́вый.

Ра́дуйся, посто́м Бо́гу послужи́вый; ра́дуйся, моли́твою Отца́ Небе́снаго ублажи́вый.

Ра́дуйся, се́рдце свое́ от страсте́й очи́стивый; ра́дуйся, жили́ще Ду́ху Свято́му та́мо угото́вавый.

Ра́дуйся, па́ству свою́ оте́чески возлюби́л еси́; ра́дуйся, я́ко ти́и за тя́ ду́шу полага́ли есте́.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 4.

Бу́ря тя́жкая гоне́ний, обру́шившаяся на Ру́сь Правосла́вную, не поколеба́ше тишины́ се́рдца твоего́, святи́телю Никоди́ме, пребыва́ у́бо та́мо Христо́с, Его́же ты́ все́м се́рдцем возлюби́л еси́, и хра́м ве́лий, мно́гими доброде́тельми укра́шенный, в глубине́ се́рдца твоего́ Го́сподеви устро́ил еси́, с любо́вию поя́ Ему́: Аллилу́иа.

И́кос 4.

Слы́ша о богоуго́днем житии́ твое́м, наро́д с ве́рою к тебе́ притека́ху, я́ко к па́стырю неле́стному, егда́ же богобо́рцы зло́бныя восхи́тиша тя́ от среды́ и́х, тогда́ в моли́тве сле́зней к Бо́гу обраща́хуся, воспева́ша тебе́ такова́я:

Ра́дуйся, архиере́е, Бо́гом храни́мый; ра́дуйся, святи́телю, наро́дом люби́мый.

Ра́дуйся, сыно́вне Бо́гу се́рдце свое́ отда́вый; ра́дуйся, Христа́ в хра́м серде́чный прия́вый.

Ра́дуйся, Та́ин Бо́жиих благогове́йный строи́телю; ра́дуйся, веле́ний Бо́жиих усе́рдный исполни́телю.

Ра́дуйся, за Христа́ в темни́це томи́выйся; ра́дуйся, живота́ своего́ за и́мя Христо́во с ра́достию лиши́выйся.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 5.

Боготе́чною звездо́ю сия́еши на тве́рди Це́ркви Христо́вой, от Петро́ва гра́да благоче́стием возсия́вый и до Белгоро́дстей земли́ све́т уче́ния Христо́ва донесы́й, богому́дре святи́телю Никоди́ме. Те́мже мо́лим тя́: да́руй на́м сердца́ люботру́дныя во взыска́ние Го́спода на́шего Иису́са Христа́, Ему́же вку́пе с тобо́ю ра́достно воспои́м: Аллилу́иа.

И́кос 5.

Ви́дяще тя́, любо́вию к Бо́гу горя́ща и вся́ во сла́ву Бо́жию творя́ща, лю́дие ублажи́ша житие́ твое́, боголюби́ве о́тче Никоди́ме, восклица́ша в ра́дости: тако́в на́м подоба́ше архиере́й. Те́мже па́мять твою́ све́тло пра́зднуем и с любо́вию тебе́ воспева́ем:

Ра́дуйся, звездо́ от Петро́ва гра́да в любви́ возсия́вшая; ра́дуйся, свеще́, благода́тию Белгоро́дскую зе́млю освети́вшая.

Ра́дуйся, ве́рный де́лателю виногра́да Христо́ва; ра́дуйся, цевни́це, сладкозву́чно воспева́ющая и́мя Иису́сово.

Ра́дуйся, до́брый се́ятелю сло́ва Бо́жия; ра́дуйся, ревни́телю чистоты́ Правосла́вия.

Ра́дуйся, смире́ние серде́чное возлюби́вый; ра́дуйся, кня́зя го́рдых те́м кре́пце уязви́вый.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 6.

Пра́веднику боже́ственному и моли́твеннику кре́пкому Иоа́нну Кроншта́дтскому подража́я, ве́лию любо́вь к Бо́гу показа́л еси́, егда́ в безбо́жное лю́тое гоне́ние на Це́рковь Христо́ву, не убоя́лся еси́ лука́вых слу́г нече́стия и гро́зно обновле́нческую е́ресь обличи́л еси́, ве́рно поя́ Бо́гу: Аллилу́иа.

И́кос 6.

Возсия́ Све́т Христо́в в чи́стой хра́мине души́ твоея́ и указа́ тебе́ и́стинный пу́ть спасе́ния. Те́мже ло́жными обновле́нческими ба́снями не соблазни́лся еси́ и па́ству свою́ от впаде́ния в злохи́трыя и́х се́ти сохрани́л еси́. Та́ко и ны́не спаси́ на́с, святи́телю Никоди́ме, от вся́кия е́реси и нече́стия, да с любо́вию пое́м ти́:

Ра́дуйся, па́стырю всеросси́йскому Иоа́нну досто́йный подража́телю; ра́дуйся, нече́стия му́жественный обличи́телю.

Ра́дуйся, в ве́ре и благоче́стии на́с утвержда́ющий; ра́дуйся, па́че всего́ люби́ти Бо́га на́с науча́ющий.

Ра́дуйся, неви́димых враго́в сокруши́телю; ра́дуйся, вся́ких ко́зней и́х разори́телю.

Ра́дуйся, архиере́е, грехо́вных у́з разреши́телю; ра́дуйся, ка́ющихся гре́шников с Бо́гом примири́телю.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 7.

Хотя́ще святи́и уго́дницы Бо́жии почти́ти, в писа́ниих твои́х по́двиги и труды́ о́ных просла́вивый и па́ки и́м в житии́ твое́м подража́вый, с ни́ми и са́м просла́вися. Те́мже к ли́ку избра́нных Бо́жиих сопричте́нный, вку́пе со все́ми святы́ми пое́ши Бо́гу: Аллилу́иа.

И́кос 7.

Но́вую богобо́рческую вла́сть се́рдцем свои́м не прия́вый, разруша́ша бо ти́и це́ркви и вельми́ озлобля́ша христиа́ны, му́чиша и убива́ша за и́мя Христо́во. Ты́, я́ко до́брый па́стырь на защи́ту па́ствы твоея́ воста́л еси́, святи́телю Никоди́ме, и живо́т сво́й за Христа́ положи́л еси́. Мы́ же по́двиг тво́й ублажа́ем и мо́лим тя́ прия́тии от на́с похвалу́ сицеву́ю:

Ра́дуйся, Це́ркви защи́тниче неустраши́мый; ра́дуйся, во́ине Христо́в непобеди́мый.

Ра́дуйся, кро́вь свою́ за Це́рковь Христо́ву ра́достно проли́вый; ра́дуйся, а́нгели Небе́сныя возвесели́вый.

Ра́дуйся, любо́вию зло́бу людску́ю победи́вый; ра́дуйся, человеконенави́стника в се́рдце порази́вый.

Ра́дуйся, Христа́ Ева́нгельски возлюби́вый; ра́дуйся, вся́ за́поведи Его́ испо́лнивый.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 8.

Си́рых пита́телю, вдо́в защи́тителю, убо́гих и немощны́х попечи́телю, страннолюби́вое исполня́л еси́ служе́ние, ми́лостиве святи́телю Никоди́ме, никто́же от тебе́ то́щ и неуте́шен оты́де и, я́ко на земли́ су́ще толи́ко ми́лостив бы́л еси́, коли́ко же ны́не, в Сла́ве Небе́сней сия́я, и́маши дерзнове́ние моли́ти за ны́, сро́дницы твоя́ земны́я, испроси́ на́м спасе́ния и ве́чнаго с Бо́гом пребыва́ния, да и мы́ вку́пе с тобо́ю воспое́м Ему́ с любо́вию: Аллилу́иа.

И́кос 8.

Все́ упова́ние на Бо́га возложи́вый и кре́ст страда́ний на ра́мена подъя́вый, за Христо́м невозвра́тно ше́л еси́, святи́телю Никоди́ме, и егда́ безбо́жныя слу́ги анти́христовы убива́ша тя́, с любо́вию и́х благослови́л еси́, рече́ Го́споду: О́тче, отпусти́ и́м, не ве́дают, что́ творя́т. Те́мже по́двиг тво́й ублажа́ше, дарова́ ти́ Христо́с все́ Ца́рство Свое́, иде́же ве́чно лику́я со святы́ми, моли́ Бо́га о на́с, пою́щих тебе́:

Ра́дуйся, Сло́ва Бо́жия ве́рный исполни́телю; ра́дуйся, о си́рых и убо́гих неусы́пный попечи́телю.

Ра́дуйся, любо́вию Самому́ Христу́ подража́вый; ра́дуйся, уби́йцы своя́ незло́биво прости́вый.

Ра́дуйся, за любо́вь свою́ Ца́рство ве́чныя любви́ стяжа́вый; ра́дуйся, моли́тися Бо́гу за ны́ дерзнове́ние прия́вший.

Ра́дуйся, сладча́йший ли́к Христо́в вы́ну зри́ши; ра́дуйся, Цари́цу все́х цари́ц со святы́ми при́сно прославля́еши.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 9.

Вся́кое име́я попече́ние о души́ свое́й, потща́лся еси́ ту́ю доброде́тельми украси́ти, а́лчущий и жа́ждущий пра́вды Бо́жия бы́л еси́, святи́телю Никоди́ме. Ны́не же нетле́нную пи́щу ра́йскую при́сно вкуша́еши и Незаходи́маго Све́та Христо́ва ра́достно приобща́ешися, с любо́вию сла́дце поя́ Ему́: Аллилу́иа.

И́кос 9.

Вети́ям суему́дренным не удо́бо е́сть разуме́ти, ка́ко челове́к во пло́ти возмо́же житие́ а́нгельское на земли́ проводи́ти. Те́мже, о́тче свяще́нне Никоди́ме, о душе́ твое́й ве́лие попече́ние име́я, не да́л еси́ сна́ скраниа́ма твои́ма и ве́ждома твои́ма дрема́ния, сле́зы умиле́ния, я́ко ро́су благоуха́нную, Бо́гу принося́ще за всю́ стра́ждущую Ру́сь Правосла́вную и несмы́сленых ча́д ея́, во гресе́х погиба́ющих. Та́ко и за ны́ возопи́й ко Го́споду, помози́ спасти́ся и в ра́зум и́стины приити́, все́м сла́вящим тя́:

Ра́дуйся, челове́че, а́нгельский нра́в име́вый; ра́дуйся, в доброде́телех вельми́ преуспе́вый.

Ра́дуйся, внима́тельное житие́ проводи́вый; ра́дуйся, умиле́ние драгоце́нное стяжа́вый.

Ра́дуйся, вся́ сла́дкая тле́нная презре́л еси́; ра́дуйся, на по́ле серде́чнаго покая́ния безце́нный би́сер Христа́ приобре́л еси́.

Ра́дуйся, в блаже́нстве ра́йстем Тро́ицу прославля́еши; ра́дуйся, с кро́ткими в Ца́рстве Бо́жии Христа́, блаже́нне, созерца́еши.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 10.

Спасе́ние от Бо́га улучи́вый в Невече́рнем Све́те, я́ко звезда́ небе́сная, све́том Христо́вым сия́еши, святи́телю блаже́нне Никоди́ме, и па́ки в обагре́нной кровьми́ твои́ми ри́зе, я́ко в ца́рской порфи́ре, пред очи́ма Бо́жиима предстои́ши и вку́пе с испове́дницы и новому́ченицы росси́йскими пое́ши Бо́гу: Аллилу́иа.

И́кос 10.

Стена́ и прибе́жище бы́л еси́ христиа́ном, на пра́вый пу́ть я́ наставля́ющий и от богобо́рческия зло́бы я́ защища́ющий, святи́телю о́тче Никоди́ме. Те́мже воззри́ ми́лостивно на гра́д на́ш и все́ гра́ды и ве́си Оте́чества на́шего, и моли́твами твои́ми огради́ на́с от все́х вою́ющих на ны́ и от вся́ких бе́д спаси́ любо́вию пою́щих ти́ сицева́я:

Ра́дуйся, свети́льниче пресве́тлый, Белгоро́дскую зе́млю освеща́ющий; ра́дуйся, сосу́де благода́ти неоскудева́ющий.

Ра́дуйся, храни́лище чу́дное Ду́ха Свята́го; ра́дуйся, хра́ме боголе́пный Бо́га Жива́го.

Ра́дуйся, до́брый де́лателю, на ни́ве Бо́жии ве́рно потруди́выйся; ра́дуйся, зре́лый кла́се, в жи́тницы Небе́сныя положи́выйся.

Ра́дуйся, неду́гов теле́сных цели́телю; ра́дуйся, поро́ков грехо́вных врачева́телю.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 11.

Пе́ние хвалы́ Бо́гу житие́ твое́ бе́, о́тче святи́телю Никоди́ме, та́ко мона́шеское и святи́тельское житие́ совокупи́, обре́те до́брый пло́д благоче́стия и ре́вности к богоугожде́нию. Та́ко и те́ло твое́ доброде́тельми украси́ и в же́ртву богоприя́тную Бо́гу принесе́, се́рдцем поя́ Ему́: Аллилу́иа.

И́кос 11.

Све́том Христо́вым просвети́ся и а́бие к по́двигу угото́вися, дави́дски ре́кл еси́: гото́во се́рдце мое́, Бо́же, гото́во се́рдце мое́ и па́ки а́з на ра́ны гото́в. Не то́кмо усты́ Христа́ испове́дал еси́, оба́че и страда́л по Не́м еси́, священному́чениче Никоди́ме, И́мже ны́не просла́вленый, побужда́еши ны́ воспева́ти тебе́ си́це:

Ра́дуйся, в посте́ и моли́тве житие́ проводи́вый; ра́дуйся, те́м Бо́гу прия́тное сотвори́вый.

Ра́дуйся, Све́том Христо́вым просвеще́нный; ра́дуйся, Ду́хом Святы́м осия́нный.

Ра́дуйся, фиа́ле, моли́тв благоуха́нных испо́лненый; ра́дуйся, ковче́же, Ду́хом Святы́м позлаще́нный.

Ра́дуйся, первосвяще́нниче, благода́ть сугу́бую прие́мший; ра́дуйся, ре́вность Моисе́ову име́вший.

Ра́дуйся, Финее́се, че́сть Це́ркви Христо́вой защища́ющий; ра́дуйся, я́ко Илия́, беззако́нников безстра́шно облича́ющий.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 12.

Благода́ть Боже́ственную испроси́ на́м, святи́телю Никоди́ме, архипа́стыри и па́стыри церко́вныя облагодати́ Ду́хом Святы́м и вси́ ве́рныя, чту́щия святу́ю па́мять твою́ и пе́сненно тя́ ублажа́ющия, сего́ Уте́шителя в се́рдце прия́ти сподо́би, да просвеще́ннии и очище́ннии, просла́вим Бо́га, ди́внаго во святы́х Свои́х, ра́достно пою́ще: Аллилу́иа.

И́кос 12.

Пои́м пе́снь хвалы́ и благодаре́ние Бо́гу, дарова́вшему на́м тя́, но́ваго свети́льника земли́ Белгоро́дския и всея́ Руси́, сла́вим Пресвяту́ю Богоро́дицу, ми́лостию Свое́ю на́с посеща́ющую и ико́ною Песча́нскою все́х на́с огражда́ющую, чти́м все́х святы́х, в Земли́ Росси́йстей просия́вших. Те́мже, в со́нме святы́х пребыва́юще, моли́ о на́с гре́шных и немощны́х ча́дех твои́х, святи́телю Никоди́ме, с любо́вию пою́щих ти́:

Ра́дуйся, ра́достный жи́телю Го́рняго Иерусали́ма; ра́дуйся, я́ко на главе́ твое́й сия́ет ца́рская диади́ма.

Ра́дуйся, я́ко победи́тель, вене́ц сла́вы от Го́спода восприя́вый; ра́дуйся, немощны́я бесо́вския де́рзости си́лою Бо́жиею сокруши́вый.

Ра́дуйся, святи́телей сла́во и му́чеников ра́дование; ра́дуйся, князе́й бесо́вских пла́ч и ве́лие рыда́ние.

Ра́дуйся, ра́йский цве́те благоуха́нный; ра́дуйся, досто́йный насле́дниче Земли́ Обетова́нныя.

Ра́дуйся, ра́тниче Бо́жий непобеди́мый; ра́дуйся, Це́ркви сто́лпе несокруши́мый.

Ра́дуйся, благода́ти приснотеку́щий исто́чниче; ра́дуйся, за зе́млю Ру́сскую дерзнове́нный моли́твениче.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 13.

О, свяще́нная главо́, иера́рше достоблаже́нный, богому́дре святи́телю Никоди́ме, услы́ши у́бо ма́лое моле́ние на́ше и Бо́гу благоутро́бному принеси́, да поми́лует на́с рабо́в Свои́х и не помяне́т грехо́в и беззако́ний на́ших. Те́мже вси́ испо́лнившись благодаре́ния за вся́ ми́лости Его́ безме́рныя, вку́пе с тобо́ю ве́чно бу́дем воспева́ти благоде́ющему Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгеле земны́й и Небе́сный граждани́не, богому́дре святи́телю Христо́в Никоди́ме, ве́мы, я́ко мно́го мо́жет моли́тва твоя́, Влады́ку умилостивля́ющая. Те́мже па́мять твою́ све́тло пра́зднующе, мо́лим тя́, изба́ви на́с от вся́кия ско́рби и ну́жды, и сохрани́ от все́х ко́зней вра́жиих на́с неврежде́нными, да в умиле́нии се́рдца воспои́м тебе́ сицева́я:

Ра́дуйся, измла́да Го́спода возлюби́вый; ра́дуйся, а́нгельски на земли́ пожи́вый.

Ра́дуйся, в житии́ твое́м святи́телю Иоаса́фу поревнова́вый; ра́дуйся, в творе́ниих свои́х его́ просла́вивый.

Ра́дуйся, в по́двизех неуста́нно пребыва́яй; ра́дуйся, чистоту́ серде́чную стяжа́вый.

Ра́дуйся, христиа́н непосты́дное упова́ние; ра́дуйся, мона́шествующих наставле́ние.

Ра́дуйся, святи́телю Никоди́ме, земли́ Белгоро́дския сла́во и украше́ние.

Конда́к 1.

Избра́нный уго́дниче Христо́в, новоявле́нный свети́льниче земли́ Белгоро́дския, святи́телем сла́ва и му́чеником ра́дование, священному́чениче Никоди́ме, тя́, я́ко досто́йнаго прее́мника святи́теля Иоаса́фа почита́ем и по́мощи и предста́тельства у Престо́ла Бо́жия от тебе́ прося́ще, пе́сненными похвала́ми тя́ ублажа́ем:

Ра́дуйся, святи́телю Никоди́ме, земли́ Белгоро́дския сла́во и украше́ние.

Моли́тва.

О, свяще́нная главо́, многострада́льне святи́телю Никоди́ме, ты́ по сла́ве Бо́жией святи́телем вселе́нским поревнова́, с ни́миже и досто́йную ча́сть прие́млеши. Те́мже с высоты́ Небе́сныя на ны́ ми́лостивно взира́юще, умоли́ Всеми́лостиваго Христа́ Бо́га на́шего дарова́ти на́м вся́ потре́бная ко спасе́нию, Це́рквам ми́р и благостоя́ние, священнослужи́телем благогове́ние и стра́х Бо́жий испроси́, на́ш ми́лостивый хода́таю, мона́шествующим в моли́тве пребыва́ние, наро́ду благоче́стие и в ве́ре кре́пкое стоя́ние, младе́нцем окормле́ние, ю́ным целому́дрие, от па́губных поро́ков и страсте́й я́вных и сокрове́нных изба́ви, се́рдце чи́стое и покая́ние и́стинное да́руй все́м, тебе́ моля́щимся. В темни́цех седя́щих посети́, путеше́ствующих сохрани́, в уны́нии и отча́янии находя́щихся обо́дри, от все́х вра́г ви́димых и неви́димых защи́ту и изба́ву на́м пода́ждь, на возду́шных мыта́рствах и на Стра́шнем Суде́ Бо́жии защити́, да вси́ просла́вим Бо́га Отца́ и Сы́на и Свята́го Ду́ха, Триипоста́сную Держа́ву, Еди́но Ца́рство и Госпо́дство и тя́, на́шего усе́рднаго моли́твенника, священному́чениче Никоди́ме пресла́вне. Ами́нь.