Конда́к 1.

Избра́нный во иере́ех уго́дниче Бо́жий и ди́вный житие́м благоче́стия подви́жниче; терпе́нием мно́гим прило́ги вра́жия разори́л еси́ и стоя́нием в ве́ре дерзнове́ние обре́л еси́, страда́нием да́же до сме́рти небе́сным венце́м украси́лся еси́; вы́ну моли́ся за ны́, от те́плыя любве́ благогове́йно тебе́ пою́щия:

Ра́дуйся, священному́чениче Па́вле, земли́ Поле́сския честно́е украше́ние.

И́кос 1.

А́нгелов Творе́ц предуве́дев неукло́нное се́рдца твоего́ изволе́ние, все́ житие́ свое́ на служе́ние Бо́гу и бли́жним посвяти́ти, избра́ тя в па́стыри ча́дом Це́ркве Своея́; мы́ же зря́ще ве́рность Христу́ да́же до по́двига му́ченичества непоколеби́мо явле́нную, ублажа́ем тя́ благохвале́нии си́ми:

Ра́дуйся, ко́рене благочести́ваго до́брое насажде́ние; ра́дуйся, гра́да Ра́домышля свято́е прозябе́ние.

Ра́дуйся, кро́тких роди́телей пло́д благослове́нный; ра́дуйся, сла́вных небожи́телей дру́же новопросла́вленный.

Ра́дуйся, в ве́чнем блаже́нстве со святы́ми упокое́нный; ра́дуйся, лицезре́ния красо́т нетле́нных удосто́енный.

Ра́дуйся, священному́чениче Па́вле, земли́ Поле́сския честно́е украше́ние.

Конда́к 2.

Ви́дя благопромысли́тель Госпо́дь благонра́вие души́ Твоея́ и раче́ние; я́ко изде́тска моли́тве и слу́жбе Бо́жией усе́рдно прилежа́л еси́, и у́м богомы́слием возвыша́л еси́; от ю́ности упра́ви по́мысл Тво́й в селе́ния го́рняя, иде́же дне́сь ра́достно пое́ши Бо́гу. Аллилу́иа.

И́кос 2.

Разуме́я промышле́ние о ча́де богода́нном, роди́тели твоя́ тишино́ю благоче́стия семе́йнаго окружа́я, моли́твою огражда́я и в ве́ре наставля́я под се́нь хра́ма Святы́я Тро́ицы приведо́ша тя́, в не́мже последи́ моли́тися вы́ну возлюби́л еси́, сего́ ра́ди приими́ от на́с словеса́ похва́льная сия́:

Ра́дуйся, в че́сть апо́стола язы́ков нарече́нный; ра́дуйся, в купе́ли креще́ния А́нгела во храни́теля прие́мый.

Ра́дуйся, дара́ми Ду́ха Свята́го запечатле́нный; ра́дуйся, благода́тию Пресвяты́я Тро́ицы осене́нный.

Ра́дуйся, чте́нию Боже́ственных писа́ний изде́тска науче́нный; ра́дуйся, жития́ святы́х и поуче́ния и́х возлюби́вый.

Ра́дуйся священному́чениче Па́вле, земли́ Поле́сския честно́е украше́ние.

Конда́к 3.

Си́лою Вы́шняго уготовля́емый во спасе́ние мно́гих, я́ко ча́до послуша́ния, чистото́ю и кро́тостию ю́ная ле́та украси́л еси́; к моли́тве приле́жней труды́ благоче́стия прилага́я, все́м се́рдцем Бо́гови прилепи́ся еси́, при́сно поя́ Ему́: Аллилу́иа.

И́кос 3.

Иму́ще вои́стинну нехла́дное се́рдце, любо́вию ко оте́честей Христо́вей Ве́ре уязви́лся еси́; глубину́, красоту́ и вели́чие Правосла́вия познава́я, тща́лся еси́ сохраня́ти ми́р в се́рдце свое́м; дивя́щеся же таково́му твоему́ раче́нию со умиле́нием зове́м ти́:

Ра́дуйся, цве́те благоуха́нный до́браго воспита́ния; ра́дуйся, сосу́де кре́пкий Боже́ственнаго избра́ния.

Ра́дуйся, во благода́ти Бо́жией непреста́нно возраста́вый; ра́дуйся, своево́лие во́ле Бо́жией покори́вый.

Ра́дуйся, чистоту́ душе́вную усе́рдно храни́вый; ра́дуйся, приле́жно моли́твы к Бо́гу возноси́вый.

Ра́дуйся, священному́чениче Па́вле, земли́ Поле́сския честно́е украше́ние.

Конда́к 4.

Бу́рею помышле́ний сумни́тельных не возмуща́емь бы́л еси́, егда́ возжела́л струя́ми живото́чными богосло́вия напита́ти ду́шу свою́; во оби́тель Богома́тери прите́кл еси́, преподо́бным Пече́рским моля́ся, прему́дрость Бо́жию всеусе́рдно познава́л еси́, ны́не же водвори́ся со все́ми тружда́ющимися Бо́гу, воспева́я Ему́: Аллилу́иа.

И́кос 4.

По слы́шанному тобо́ю сло́ву Ева́нгельскому, я́ко от Бо́га прия́тыя тала́нты многоде́ятельнаго плодоприноше́ния потре́бны, напра́ви стопы́ твоя́ в духо́вную шко́лу пресла́внаго гра́да Ки́ева; таково́е твое́ душеспаси́тельное и богоуго́дное начина́ние ви́дяще, дерза́ем воспева́ти ти́:

Ра́дуйся, к зна́нием спаси́тельным неле́ностно устреми́выйся; ра́дуйся, в учи́лище благоче́стия зако́ну Госпо́дню научи́выйся.

Ра́дуйся, от богому́дрых наста́вников догма́ты ве́ры позна́вый; ра́дуйся, от благода́ти преподо́бных глубины́ прему́дрости Бо́жией прия́вый.

Ра́дуйся, в ра́зуме Бо́гом утвержде́нный; ра́дуйся, се́рдцем в Бо́зе просвеще́нный.

Ра́дуйся, священному́чениче Па́вле, земли́ Поле́сския честно́е украше́ние.

Конда́к 5.

Подви́жником благоче́стия подо́бяся, я́ко еле́нь на исто́чники водны́я, устреми́лся еси́ к позна́нию Свяще́ннаго писа́ния и оте́ческих преда́ний, восприя́л еси́ оби́льно во́ду живу́ю Ду́ха Свята́го; мо́лим тя́ сподо́бити и на́с бы́ти прича́стниками сея́ живи́тельныя струи́, востека́я ко Го́споду Вседержи́телю и поя́ Ему́: Аллилу́иа.

И́кос 5.

Ви́дяще тя́, ше́ствующа стезе́ю пропове́дника Сло́ва Бо́жия, законоучи́телем поста́влен бы́л еси́, душеполе́зным уче́нием ду́ши о́троческия к чистоте́ духо́вней устремля́я, си́м ста́ я́ко оте́ц чадолюби́вый; сего́ ра́ди с ра́достию зове́м ти́ си́це:

Ра́дуйся, семена́ Сло́ва Бо́жия оби́льно се́явый; ра́дуйся, уче́нием кни́жным сердца́ де́тския напая́вый.

Ра́дуйся, зако́ну Бо́жию усе́рдно поуча́вый; ра́дуйся, о́браз благонра́вия ученико́м свои́м подава́вый.

Ра́дуйся, приле́жно назида́вый ду́ши благоче́стию; ра́дуйся, наста́вниче пути́, вводя́щаго в живо́т ве́чный.

Ра́дуйся, священному́чениче Па́вле, земли́ Поле́сския честно́е украше́ние.

Конда́к 6.

Про́поведь целому́дреннаго и богоуго́днаго семе́йнаго жития́ бы́сте еси́, егда́ восприе́м на бра́к че́стен супру́жницу свою́ О́льгу; благове́рному Петру́ со прему́дрою Февро́ниею подо́бящеся, любо́вь и милосе́рдие яви́сте и оби́димым засту́пницы бы́сте; да подража́юще ти́ в хране́нии чистоты́ сою́за бра́чнаго, воспева́ем законополо́жнику Христу́: Аллилу́иа.

И́кос 6.

Возсия́ све́т пра́веднаго жития́ твоего́ в та́инстве бра́ка с доброде́тельною О́льгою; я́ко бу́ря скорбе́й и напа́стей воздвиза́емая зло́бою ми́ра сего́ не осла́би ве́ры ва́шея; и́бо щедро́ты твоея́ богопросвеще́нныя души́ обогати́ и це́рковь ма́лую, и та́ко приме́ром ве́рных назида́я, научи́л еси́ благодари́ти тя́:

Ра́дуйся, за́поведей Госпо́дних ве́рный исполни́телю; ра́дуйся, ева́нгельских и́стин пла́менный ревни́телю.

Ра́дуйся, чи́на и уста́вов Святы́я Це́ркви рачи́телю; ра́дуйся, святооте́ческих преда́ний и благи́х обы́чаев храни́телю.

Ра́дуйся, бла́гость и милосе́рдие явля́яй; ра́дуйся, сострада́нием и любо́вию утеша́яй.

Ра́дуйся, священному́чениче Па́вле, земли́ Поле́сския честно́е украше́ние.

Конда́к 7.

Хоте́ние еди́но име́л еси́ бы́ти па́стырем до́брым, ему́же су́ть о́вцы своя́, егда́ прия́л еси́ се́рдцем зва́ние Христо́во: «жа́тва у́бо мно́га, де́лателей же ма́ло», пропове́дник богоно́сный показа́лся еси́ не то́чию сло́вом, но па́че житие́м; незло́бием свои́м а́гнцу прорече́нному Иса́ием подража́вый; зане́же сподо́бился еси́ со все́ми без поро́ка после́довавшими А́гнцу Бо́жию пе́ти Ему́: Аллилу́иа.

И́кос 7.

Но́вое зна́мение благоволе́ния Бо́жия дарова́ся ти́, егда́ всесоверши́тельная благода́ть Свята́го Ду́ха поста́ви тя́ на стезю́ свяще́нства, я́ко неле́ностна служи́теля алтаря́ Госпо́дня и му́дра путеводи́теля ду́ш пасо́мых, Кро́вию Христо́вою искупле́нных; сего́ ра́ди на по́двизе се́м срета́ем тя́ приве́тствии си́ми:

Ра́дуйся, правосла́вия златослове́сный учи́телю; ра́дуйся, глаго́лов ми́ра нетле́ннаго возвести́телю.

Ра́дуйся, в де́лании трудо́в духо́вных назида́телю усе́рдный; ра́дуйся, и́скренняго покая́ния глаша́таю приле́жный.

Ра́дуйся, от ересе́й, раско́ла и суеве́рий ста́до Христо́во оберега́яй; ра́дуйся, у престо́ла Бо́жия моли́твенным предста́тельством ве́рных охраня́яй.

Ра́дуйся, священному́чениче Па́вле, земли́ Поле́сския честно́е украше́ние.

Конда́к 8.

Стра́нствия земна́го тече́ние соверша́я, име́л еси́, о́тче Па́вле, похваля́емо и́мя твое́; я́ко пресви́тер бы́л еси́ о́браз ве́рным сло́вом и житие́м, любо́вию о Христе́ не́мощи челове́ческия покрыва́я и пу́ть и́стинный к Го́рнему Иерусали́му указу́я, иде́же ны́не сия́еши сла́вою ве́чною и с ли́ки а́нгельскими воспева́еши Бо́гови хвале́бную пе́снь: Аллилу́иа.

И́кос 8.

Всего́ себе́ отда́ на служе́ние Бо́гу и бли́жним, обоя́ за́поведи сочета́, па́стырь неусы́пный от чи́стаго исто́чника Еди́ныя Святы́я Собо́рныя и Апо́стольския Це́ркве уче́нием и моли́твою вруче́нное тебе́ насле́дие от волко́в огражда́я, не убоя́лся зло́бы и́х воздвиза́емыя, но обле́кшеся во броню́ ве́ры; все́м бы́л еси́ вся́; моли́ся при́сно о спасе́нии и на́с гре́шных, возглаша́ющих ти́:

Ра́дуйся, хра́мов Бо́жиих благоиску́сный украси́телю; ра́дуйся, ка́ющихся гре́шников с Бо́гом примири́телю.

Ра́дуйся, оби́димым кре́пкое заступле́ние; ра́дуйся, отча́янным благода́тное утеше́ние.

Ра́дуйся, в смяте́нии пребыва́ющих умиротворя́яй; ра́дуйся, нужда́ющимся ми́лостыню неоску́дно подава́яй.

Ра́дуйся, священному́чениче Па́вле, земли́ Поле́сския честно́е украше́ние.

Конда́к 9.

Вся́кую та́йну души́ челове́ческия зря́ Госпо́дь, хотя́ яви́ти тя́ му́жа соверше́нна, попусти́ врагу́ последи́ искуси́ти тя́, я́ко зла́то в горни́ле; егда́ де́нь от дне́ ле́ствицу незы́блему доброде́телей утвержда́яй к небесе́ ду́шу свою́, поя́ укрепля́ющему тя́ Бо́гу: Аллилу́иа.

И́кос 9.

Вети́йственных слове́с плете́ние не довле́ет восхвали́ти досто́йно кре́пость и кро́тость твою́, егда́ клеветницы́ лука́выя, та́тие и хи́щницы, вся́кия испо́лньшеся я́рости, на тя́ возста́ша; ты́ же отве́рстым се́рдцем прия́л еси́ призы́в Боже́ственныя любве́: «и́же хо́щет по Мне́ ити́ да отве́ржется себе́, и во́змет кре́ст сво́й, и по Мне́ гряде́т», Тому́ невозвра́тно после́довал еси́, подвиза́я ны́ согла́сно зва́ти ти́:

Ра́дуйся, клевету́ и поруга́ние с кро́тостию прия́вый; ра́дуйся, ди́вную кре́пость ду́ха в заточе́нии показа́вый.

Ра́дуйся, бие́ние лю́тое от зверонра́вных претерпе́вый; ра́дуйся, в муче́нии огне́м от безбо́жных несокруше́нный.

Ра́дуйся, сто́лпе терпе́ния, зло́бою челове́ческою неуязвле́нный; ра́дуйся, адама́нте ве́ры, ко́зни диа́вольския посрами́вый.

Ра́дуйся, священному́чениче Па́вле, земли́ Поле́сския честно́е украше́ние.

Конда́к 10.

Спасе́ния иски́й я́ко би́сера многоце́ннаго, в смиренному́дрии му́жески всего́ себе́ в ру́це Вседержи́теля вручи́л еси́, егда́ изы́де на тя́ осужде́ние сме́рти, в боле́зни се́рдца те́пле моля́ся, соприча́стник яви́лся еси́ Си́л Небе́сных, восклица́я с ни́ми спаса́ющему тя́ Бо́гу: Аллилу́иа.

И́кос 10.

Сте́ну необори́мую, от дре́вняго врага́, име́я в несумне́ннем упова́нии и пла́менней любве́ ко Го́споду, тече́ние жития́ му́ченически сконча́л еси́; да не сокрове́н бу́дет свети́льник доброде́телей твои́х, но да све́тит все́м, сего́ ра́ди неуста́нно взыва́ем ти́ похвала́ми си́ми:

Ра́дуйся, Христу́ сораспя́тися о лю́дех вседу́шно вожделе́вый; ра́дуйся, кро́вию му́ченическою во свиде́тельство ве́ры обагре́нный.

Ра́дуйся, терпе́нием свои́м гони́телей Це́ркве посрами́вый; ра́дуйся, всепоглоща́ющую сла́дость небе́сную вкуси́вый.

Ра́дуйся, би́сере драги́й, в не́дрех земны́х Го́сподом обре́тенный; ра́дуйся, в Ца́рствии Небе́снем в ри́зу нетле́нную Ду́хом Святы́м облече́нный.

Ра́дуйся, священному́чениче Па́вле, земли́ Поле́сския честно́е украше́ние.

Конда́к 11.

Пе́ние всеумиле́нное прине́сл еси́ Бо́гу, егда́ узре́л еси́ красоты́ нетле́нныя и благода́ти неисповеди́мую си́лу прия́л еси́, созерца́яй от дне́ преставле́ния твоего́ и до ны́не Царя́ Небе́снаго, Его́же славосло́вят во́и а́нгельстии и святы́х собо́ри, восклица́я Созда́телю своему́: Аллилу́иа.

И́кос 11.

Светоза́рныя благода́ти носи́теля яви́ тя Госпо́дь во дне́х на́ших, обре́тением честны́х моще́й твои́х и с ни́ми нетле́ннаго Ева́нгелия, его́ же ве́рный служи́тель бы́л еси́; и прославле́нием в ли́це новому́ченик ве́лия ра́дости на́с испо́лнивый, да па́мятствующе явле́нныя до́блести твоя́, моле́ния такова́я прино́сим ти́:

Ра́дуйся, непоколеби́мое Правосла́вия основа́ние; ра́дуйся, верши́но добропобе́днаго в по́двизех подража́ния.

Ра́дуйся, со́ль земли́ от тле́на греха́ охраня́яй; ра́дуйся, гро́зде виногра́да Христо́ва, вино́м новозаве́тныя благода́ти напая́ющий.

Ра́дуйся, о ми́ре неусы́пный моли́твенниче; ра́дуйся, иере́ем в труде́х ве́рный сподви́жниче.

Ра́дуйся, священному́чениче Па́вле, земли́ Поле́сския честно́е украше́ние.

Конда́к 12.

Благода́ть цельбоно́сную подая́ всеще́дрый Бо́г от Свои́х неистощи́мых сокро́вищ; и́бо благода́тную по́мощь оби́льно почерпа́ем от честны́х моще́й твои́х. Испове́дуя ве́лие твое́ пред Бо́гом дерзнове́ние, мо́лим тя́, сподо́би и на́с в Ца́рствии Небе́снем вку́пе с тобо́ю пе́ти даропода́телю Бо́гу: Аллилу́иа.

И́кос 12.

Пою́ще сла́вное и необори́мое стоя́ние твое́ в ве́ре, ублажа́ем тя́, священному́чениче Па́вле, на тебе́ бо сбы́стся сло́во Апо́стола: «и́хже предуста́ви, те́х и призва́: а и́хже призва́, си́х и оправда́: а и́хже оправда́, си́х и просла́ви»; ви́дя, я́ко избра́н еси́ сосу́д Бо́жией благода́ти, сотвори́ чрез тя́ Госпо́дь сла́вна чудесы́; ны́не же стоя́ще в хра́ме и чту́ще па́мять твою́, в благогове́нии испове́дуем тя́:

Ра́дуйся, гра́ду Жито́миру преве́лие украше́ние; ра́дуйся, оте́честву на́шему незы́блемое огражде́ние.

Ра́дуйся, ка́меню ве́ры во Христа́ не сокруше́нный; ра́дуйся, небожи́телю, Трисо́лнечным сия́нием Святы́я Тро́ицы озаре́нный.

Ра́дуйся, я́ко му́ченическая кончи́на твоя́ яви́ся ве́рным назида́ние; ра́дуйся, я́ко мо́щи твоя́ су́ть, чистоты́ небе́сныя благоуха́ние.

Ра́дуйся, священному́чениче Па́вле, земли́ Поле́сския честно́е украше́ние.

Конда́к 13.

О пресла́вный о́тче на́ш, священному́чениче Па́вле, приими́ ма́лое сие́ моле́ние, и твои́м дерзнове́нным пред Бо́гом предста́тельством умоли́ дарова́ти ми́р Це́ркви Святе́й и жи́тельству на́шему. Напра́ви на́с во вре́менней жи́зни тве́рдо сле́довати стезя́ми во́ли Бо́жией, и в ве́чней жи́зни насле́дники бы́ти Ца́рствия Христо́ва, воспева́я вку́пе с тобо́ю Спаси́телю на́шему хвале́бную пе́снь: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов Творе́ц предуве́дев неукло́нное се́рдца твоего́ изволе́ние, все́ житие́ свое́ на служе́ние Бо́гу и бли́жним посвяти́ти, избра́ тя в па́стыри ча́дом Це́ркве Своея́; мы́ же зря́ще ве́рность Христу́ да́же до по́двига му́ченичества непоколеби́мо явле́нную, ублажа́ем тя́ благохвале́нии си́ми:

Ра́дуйся, ко́рене благочести́ваго до́брое насажде́ние; ра́дуйся, гра́да Ра́домышля свято́е прозябе́ние.

Ра́дуйся, кро́тких роди́телей пло́д благослове́нный; ра́дуйся, сла́вных небожи́телей дру́же новопросла́вленный.

Ра́дуйся, в ве́чнем блаже́нстве со святы́ми упокое́нный; ра́дуйся, лицезре́ния красо́т нетле́нных удосто́енный.

Ра́дуйся, священному́чениче Па́вле, земли́ Поле́сския честно́е украше́ние.

Конда́к 1.

Избра́нный во иере́ех уго́дниче Бо́жий и ди́вный житие́м благоче́стия подви́жниче; терпе́нием мно́гим прило́ги вра́жия разори́л еси́ и стоя́нием в ве́ре дерзнове́ние обре́л еси́, страда́нием да́же до сме́рти небе́сным венце́м украси́лся еси́; вы́ну моли́ся за ны́, от те́плыя любве́ благогове́йно тебе́ пою́щия:

Ра́дуйся, священному́чениче Па́вле, земли́ Поле́сския честно́е украше́ние.

Моли́тва.

О, святы́й уго́дниче Бо́жий, священному́чениче Па́вле! по́двигом до́брым подвиза́лся еси́ на земли́. Сего́ ра́ди восприя́л еси́ на небесе́х вене́ц пра́вды, его́же угото́ва Госпо́дь все́м лю́бящим Его́. Мы́ же, чту́щия святу́ю па́мять твою́, ра́дуемся о терпе́нии и смире́нии твое́м. Ты́ же, предстоя́ престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти на́м вся́кое прегреше́ние, и помози́ на́м претерпе́ти вся́ искуше́ния и ко́зни диа́вольския без ропта́ния, да изба́вльшеся от скорбе́й, боле́зней, бе́д и напа́стей и вся́каго зла́, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х свои́х Бо́га, Отца́ и Сы́на и Свята́го Ду́ха во ве́ки веко́в. Ами́нь.