Конда́к 1.

Избра́нный уго́дниче Христо́в, честны́й служи́телю Престо́ла Госпо́дня, до́блий страда́льче Пе́тре, первоверхо́вному апо́столу тезоимени́тый, кре́постию ве́ры и благоче́стия в житии́ несокруши́м яви́лся еси́, и по кончи́не му́ченичестей чудесы́ просия́л еси́, сего́ ра́ди похва́льная воспису́ем ти́ пе́ния. Ты́ же, име́яй дерзнове́ние ко Го́споду, от вся́ких на́с бе́д свободи́, зову́щих:

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

И́кос 1.

А́нгел земны́й и челове́к небе́сный в житии́ твое́м бы́л еси́, преблаже́нне Пе́тре, в преподо́бии и пра́вде, да́же до ста́рости, неосла́бне Го́сподеви служа́. Те́мже и Христо́с от ми́ра многомяте́жнаго во оби́тели ве́чныя пресели́ тя, я́ко ве́рнаго Своего́ раба́, иере́я же и му́ченика, сла́вою нетле́нною венча́ и мно́гими чудесы́ на земли́ просла́ви. Ты́ же, предстоя́ Престо́лу Тро́ицы Пресвяты́я, моли́твами твои́ми от вся́ких зо́л и напа́стей огради́ ны, зову́щия ти́ такова́я:

Ра́дуйся, и́го Христо́во на ра́мо твое́ взе́мый; ра́дуйся, путе́м служе́ния па́стырскаго досто́йно ше́ствовавый.

Ра́дуйся, пра́вды Бо́жия неосла́бный провозве́стниче; ра́дуйся, Це́ркве Христо́вы ре́вностный защи́тниче.

Ра́дуйся, испове́дником сла́вное сопричте́ние; ра́дуйся, му́чеником всехва́льное ликостоя́ние.

Ра́дуйся, христиа́н правосла́вных тве́рдое в Бо́зе заступле́ние; ра́дуйся, отсту́пников ве́ры устраше́ние и посрамле́ние.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 2.

Ви́дя тя́ Госпо́дь от ю́ности по стези́ благоче́стия теку́ща, святы́й Пе́тре, избра́ в служи́теля Себе́ и удобри́ тя благода́тию Свята́го Ду́ха. Ты́ же мно́гая ле́та чи́стым се́рдцем и усты́ непреста́нно Го́спода прославля́л еси́, Же́ртву безкро́вную соверша́я, по́слежде же и са́м в же́ртву Бо́гу, я́ко да́р чи́стый, прине́слся еси́, благода́рне вопия́ Ему́: Аллилу́иа.

И́кос 2.

Ра́зум и се́рдце в и́стинней ве́ре утвержда́я, Пе́тре богому́дре, за́поведи Госпо́дни в житии́ непоро́чно соблю́л еси́. И, я́ко ве́рный во́ин Христо́в, стра́хом Бо́жиим и ре́вностию вооружи́вся, враго́в ве́ры правосла́вныя, во оте́чество твое́ земно́е прише́дших, не устраши́лся еси́ и на защи́ту хра́ма Бо́жия подви́глся еси́. Сего́ ра́ди восхваля́ем тя́ си́це:

Ра́дуйся, Еди́наго Бо́га, в Тро́ице сла́вимаго, и́стинный чти́телю; ра́дуйся, во́ли Бо́жия всеусе́рдный исполни́телю.

Ра́дуйся, вся́ кра́сная ми́ра сего́ Христа́ ра́ди презре́вый; ра́дуйся, нелицеме́рною любо́вию к Бо́гу и па́стве твое́й испо́лненный.

Ра́дуйся, о́браз благоче́стия лю́дем яви́вый; ра́дуйся, ду́шу твою́ за ве́ру и Оте́чество положи́вый.

Ра́дуйся, правове́рия му́жественный побо́рниче; ра́дуйся, прельще́нием неве́рных неустраши́мый противобо́рче.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 3.

Си́лою, да́нною ти́ свы́ше за до́брое и богоуго́дное житие́ твое́ укрепля́ем, страда́ния лю́тая Христа́ ра́ди му́жественне претерпе́л еси́. Си́лою же безслове́снаго коня́, мучи́тельми неи́стовно води́маго, же́стоко влачи́м, свиде́тель непрекло́нный И́стины, да́же до кро́ве, яви́лся еси́. Те́мже, я́ко му́ченик непобеди́м, венце́м добропобе́дным от Бо́га увенча́лся еси́, поя́ Ему́: Аллилу́иа.

И́кос 3.

Име́я в души́ твое́й любо́вь ко Го́споду, Пе́тре достоблаже́нне, о́браз чи́стаго и непоро́чнаго жития́ показа́л еси́, та́кожде и па́стырь до́брый и наста́вник и́стинный лю́дем бы́л еси́. Мы́ же, восхваля́юще житие́ твое́, воспева́ем ти́ та́ко:

Ра́дуйся, доброде́тели ева́нгельския в се́рдце твое́м вкорени́вый; ра́дуйся, в за́поведех Госпо́дних во вся́ дни́ живота́ твоего́ ходи́вый.

Ра́дуйся, от ю́ности Ца́рства Небе́снаго возжела́вый; ра́дуйся, в ста́рости масти́те добропло́дие души́ твоея́ показа́вый.

Ра́дуйся, милосе́рдия к лю́дем усе́рдный рачи́телю; ра́дуйся, ни́щих и убо́гих безме́здный пита́телю.

Ра́дуйся, немощны́м и оби́димым благосе́рдный помо́щниче; ра́дуйся, тя́гот и скорбе́й па́ствы твоея́ веледу́шный восприе́мниче.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 4.

Бу́ря испыта́ний и бе́д, во дни́ лихоле́тия на Це́рковь и Оте́чество на́ше земно́е наше́дшая, не поколеба́ упова́ния твоего́ на Го́спода, крепкоду́шне о́тче Пе́тре. А́ще и ста́р лета́ми бы́в, хра́м Бо́жий от поруга́ния и разоре́ния огради́л еси́, враго́в законопресту́пных небоя́зненно обличи́л еси́, и я́ко ка́мень преткнове́ния во́ли вра́жии яви́лся еси́. Сего́ ра́ди с му́ченики на небесе́х ны́не пое́ши Бо́гу: Аллилу́иа.

И́кос 4.

Недоумева́ху лю́дие черевко́встии, егда́ по мно́зех ле́тех погребе́ния твоего́, святы́й иере́е Пе́тре, слы́шаша, я́ко гро́б не́кий от земли́ показа́ся одесну́ю олтаря́ це́ркве Нико́льския и я́ко ста́рец благообра́зен во оде́ждах иере́йских во сне́ мно́гим явля́шеся, прося́ пе́ние панихи́дное по не́м соверша́ти. Ны́не же мы́, ве́дуще тя́, я́ко моли́твенника и чудотво́рца сла́вна, вопие́м ти́ си́це:

Ра́дуйся, пра́ведным житие́м твои́м Го́споду угоди́вый; ра́дуйся, в дому́ Отца́ Небе́снаго оби́тель себе́ насле́довавый.

Ра́дуйся, со́нму священному́чеников сопричте́нный; ра́дуйся, венце́м нетле́нным от Бо́га украше́нный.

Ра́дуйся, се́верных преде́л страны́ на́шея свети́льниче; ра́дуйся, Краснобо́рския земли́ Бо́гом да́нный моли́твенниче.

Ра́дуйся, неве́рующих и заблу́ждших ко И́стине направля́яй; ра́дуйся, все́х зна́ющих и почита́ющих тя́ ко спасе́нию путеводя́й.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 5.

Неботе́чною мо́лниею це́рковь Нико́льская запали́ся и погоре́, оба́че гро́б тво́й, святы́й о́тче Пе́тре, во огни́ ника́коже опали́ся, зна́менуя я́ве, я́ко свы́ше на исцеле́ния лю́дем дарова́н бы́сть. Сего́ ра́ди ти́и просла́виша Бо́га, ди́внаго во святы́х Свои́х, пою́ще Ему́: Аллилу́иа.

И́кос 5.

Ви́деша свяще́нницы черевко́встии, Пе́тре досточу́дне, я́ко гро́б тво́й, от огня́ сохране́нный, исто́чник Бо́жия благода́ти и врачевство́ неду́гов неисце́льных яви́ся, и уразуме́вше тя́ уго́дника Бо́жия бы́ти, а́бие раска́яшася, поне́же забве́нию тя́ на до́лгая ле́та преда́ша. Сего́ ра́ди воспе́ша ти́ та́ко:

Ра́дуйся, Пресвяты́я Тро́ицы благогове́йный служи́телю; ра́дуйся, лико́в а́нгельских на Небесе́х досто́йный сожи́телю.

Ра́дуйся, Христа́ Спаси́теля ве́рный учениче́; ра́дуйся, пресла́вный и доблему́дрый му́чениче.

Ра́дуйся, ре́вность по Бо́зе, я́ко проро́к Илия́, стяжа́вый; ра́дуйся, ве́ру несумне́нную, я́ко апо́стол Пе́тр, име́вый.

Ра́дуйся, кро́тостию Мирлики́йскому святи́телю подража́вый; ра́дуйся, смире́нием подо́бне Се́ргию Ра́донежскому благоуха́вый.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 6.

Пропове́дник и́стины все́м сумня́щимся, я́ко Бо́жиею во́лею гро́б тво́й, святы́й Пе́тре, от огня́ неопале́н бы́сть, яви́ся сто́лп светоно́сный, от земли́ до небесе́ над гро́бом твои́м сия́яй, его́же ви́дя нощны́й стра́ж церко́вный Лавре́нтий зело́ диви́ся и, пове́дав о се́м чу́дном виде́нии лю́дем, просла́ви Бо́га, вопия́ Ему́: Аллилу́иа.

И́кос 6.

Возсия́л еси́ во все́х конце́х Краснобо́рския земли́ богодарова́нным ти́ чуде́с де́йством, Пе́тре достохва́льне, мно́гия бо лю́ди, бли́жния и да́льния, све́том чуде́с озари́л еси́, врачу́я неду́ги и́х душе́вныя и теле́сныя, в со́нном виде́нии явля́яся и́м и запове́дуя па́мять о тебе́ твори́ти и Бо́гу моли́тися. Сего́ ра́ди не оста́ви и на́с, почита́ющих тя́ и воспева́ющих такова́я:

Ра́дуйся, в благода́ти Бо́жией при́сно пребыва́яй; ра́дуйся, неду́ги и боле́зни на́ша благода́тию врачу́яй.

Ра́дуйся, ве́рныя от искуше́ний и бе́д избавля́яй; ра́дуйся, все́м призыва́ющим тя́ по́мощь ско́ро подава́яй.

Ра́дуйся волхво́в и чароде́ев пра́ведный обличи́телю; ра́дуйся, ду́ш и теле́с на́ших нело́жный цели́телю.

Ра́дуйся, от вра́г ви́димых и неви́димых стено́ и огражде́ние; ра́дуйся, Це́ркве земны́я и небе́сныя сла́во и украше́ние.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 7.

Хотя́й Госпо́дь все́м челове́ком спасти́ся и в ра́зум и́стины приити́, избра́ тя, святы́й Пе́тре, уго́дника Своего́, и дарова́ ти си́лу мно́гих чуде́с творе́ния: слепы́я просвеща́ти, хромы́я врачева́ти, разсла́бленныя от одра́ боле́зни возставля́ти, бесны́я от де́монов свобожда́ти. Те́мже лю́дие, к тебе́ притека́ющии и моля́щиися, пе́рсть от гро́ба твоего́ взе́млюще, по́мощь в ско́рбех ско́ро обрета́ху и в ве́ре па́че утвержда́хуся, с ра́достию пою́ще Бо́гу: Аллилу́иа.

И́кос 7.

Но́ваго благове́стника Христо́ва и чудотво́рца тя́ велича́ем, святы́й иере́е Пе́тре: ты́ бо в житии́ тезоиме́нному апо́столу подража́я, неосла́бный пропове́дник ве́ры и пра́вды в се́верных граде́х и ве́сех яви́лся еси́. Ны́не же на Небеси́ пребыва́я, на земли́ чудоде́йствуеши и ко спасе́нию руково́дствуеши вопию́щия ти́ такова́я:

Ра́дуйся, ка́меню ве́ры доброзра́чный и многоце́нный; ра́дуйся, сосу́де избра́нный, благода́тию Ду́ха Свята́го освяще́нный.

Ра́дуйся, исто́чниче, вода́ми благода́ти ду́ши жа́ждущия напоя́яй; ра́дуйся, неради́выя и гре́шныя к покая́нию и исправле́нию жития́ приводя́й.

Ра́дуйся, я́ко моли́твами твои́ми от страсте́й душевре́дных избавля́емся; ра́дуйся, я́ко хода́тайством твои́м даро́в духо́вных от Бо́га сподобля́емся.

Ра́дуйся, скорбя́щих и уныва́ющих благоуте́шное попече́ние; ра́дуйся, ду́ш ле́ностных к жи́зни во Христе́ пробужде́ние.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 8.

Стра́шное зна́мение показа́л еси́ лю́дем, сумня́щимся и не ве́рующим чудесе́м твои́м, Пе́тре блаже́нне: иере́я черевко́вскаго Бори́са, ху́лившаго чудеса́, от свята́го гро́ба твоего́ бы́вшая, в виде́нии гро́зном укори́л еси́, да пока́ется и просла́вит Бо́га, во святы́х Свои́х де́йствующаго, поя́ Ему́: Аллилу́иа.

И́кос 8.

Ве́сь в Бо́зе пребыва́яй, все́м вои́стину путево́ждь ко спасе́нию показа́лся еси́, святы́й небожи́телю Пе́тре. Лю́дем бо, исцеле́вшим моли́твами твои́ми и забве́нию тя́ преда́вшим, па́ки явля́лся еси́, повелева́я ко гро́бу твоему́ свято́му приходи́ти и да́нных и́ми пред Го́сподем обе́тов не отмета́тися, да от грехо́в свои́х отвратя́тся и жи́зни ве́чныя сподо́бятся. Мы́ же, благодаря́ще тя́ за толи́кое ми́лостивое и многотерпели́вое попече́ние о на́с гре́шных, со умиле́нием зове́м ти́:

Ра́дуйся, я́ко со а́нгелы Престо́лу Бо́жию на Небеси́ предстои́ши; ра́дуйся, ты́ бо я́ко А́нгел с Небесе́ на зе́млю лю́дем низпосыла́ешися.

Ра́дуйся, де́ющих зло́ и беззако́ния гро́зный вразуми́телю; ра́дуйся, ве́рным во́ли Бо́жия та́йный возвести́телю.

Ра́дуйся, покая́ния и́стинный пропове́дниче; ра́дуйся, доброде́лания святы́й наста́вниче.

Ра́дуйся, взыску́ющим твоея́ по́мощи благопоспе́шный пода́телю; ра́дуйся, все́х с любо́вию почита́ющих тя́ небе́сный покрови́телю.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 9.

Вся́кую чудоде́йствия си́лу стяжа́л еси́, свя́тче Бо́жий, лю́дем в беда́х су́щим помога́ти, а́ще и издале́ча тя́ на по́мощь призыва́ют. Жену́ не́кую, Глике́рию, мно́гия дни́ в разслабле́нии лежа́щую и моля́щуюся ти́, исцели́л еси́, во сне́ я́влься е́й и глаго́ля: сие́ на тя́ Бо́гом попу́щено бы́сть, за е́же ни́щих не ми́ловала еси́. Она́ же тогда́ не то́кмо теле́сное, но наипа́че душе́вное здра́вие обре́тши, просла́ви тя́, с благодаре́нием взыва́ющи Бо́гу: Аллилу́иа.

И́кос 9.

Вети́и многовеща́ннии не возмо́гут досто́йно изрещи́ си́лу любве́ твоея́ к земно́му оте́честву, сла́вне Пе́тре: еще́ бо на земли́ сы́й, о держа́ве Росси́йстей со слеза́ми моли́лся еси́, ве́ру отце́в и хра́м от поруга́ния му́жественно защити́л еси́. Та́кожде и по кончи́не твое́й в земне́й юдо́ли су́щих ника́коже оставля́еши, ве́рныя от вся́каго зла́ незри́мо огражда́еши, вопию́щих к тебе́ такова́я:

Ра́дуйся, ду́шу твою́ не обину́яся за дру́ги преда́вый; ра́дуйся, бли́жняя твоя́ я́ко себе́ сама́го возлюби́вый.

Ра́дуйся, о́бразе и́стиннаго в Бо́зе лю́дем служе́ния; ра́дуйся, де́лателю соверше́ннаго терпе́ния.

Ра́дуйся, обурева́емым страстьми́ ти́хое приста́нище; ра́дуйся, отча́янных и ско́рбных све́тлая наде́ждо.

Ра́дуйся, осла́бленных в ве́ре укрепле́ние; ра́дуйся, все́м чту́щим тя́ хода́таю спасе́ния.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 10.

Все́х, предста́тельства пред Го́сподем прося́щих у тебе́, святы́й о́тче Пе́тре, ми́лостивным попече́нием твои́м не оставля́еши: селя́нину не́коему, Васи́лию, в боле́зни изнемо́гшему и моля́щуся тебе́, во сне́ яви́лся еси́ и а́бие здра́ва сотвори́л еси́, повелева́я ему́ о́браз тво́й написа́ти и на святы́й гро́б возложи́ти во утеше́ние ве́рных, да вси́ уве́дят тя́ помо́щника и засту́пника чу́дна, воспева́ющаго: Аллилу́иа.

И́кос 10.

Стена́ еси́ все́м челове́ком, свя́те Пе́тре, к заступле́нию твоему́ прибега́ющим, небесе́ бо и земли́ Творе́ц дарова́ ти благода́ть все́х притека́ющих к тебе́ от боле́зней и неду́г избавля́ти, от скорбе́й и ну́жд свобожда́ти, от наве́тов бесо́вских и ко́зней диа́вольских огражда́ти. Сего́ ра́ди, а́ще и тща́хуся неве́рующии чудесе́м твои́м забве́нию тя́ преда́ти, оба́че не возмого́ша. Мы́ же с любо́вию вопие́м ти́ сицева́я:

Ра́дуйся, свиде́телю пра́выя ве́ры благодерзнове́нный и непоколеби́мый; ра́дуйся, во́ине Царя́ Небе́снаго благоору́жный и непобори́мый.

Ра́дуйся, мечу́ духо́вный, посеца́яй нече́стие; ра́дуйся, щи́те небе́сный, огражда́яй благоче́стие.

Ра́дуйся, па́дающих и пла́чущих о гресе́х ско́рое воста́ние; ра́дуйся, пра́во стоя́щих во упова́нии на Бо́га утвержде́ние.

Ра́дуйся, доброде́телей боже́ственных све́тлое зерца́ло; ра́дуйся, все́х с ве́рою приходя́щих к тебе́ кре́пкое забра́ло.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 11.

Пе́ние и моле́ние всеумиле́нное Пресвяте́й Тро́ице о все́х и за вся́ на земли́ во святе́й Литурги́и возноси́л еси́, святы́й иере́е Пе́тре, си́це и на Небеси́ моли́твы твоя́ прино́сиши, и со а́нгелы и все́ми святы́ми Бо́га восхваля́еши, поя́ Ему́: Аллилу́иа.

И́кос 11.

Я́ко светоза́рная звезда́, в преде́лех се́верных земли́ Ру́сския просия́л еси́, священному́чениче Пе́тре, све́том бо чуде́с озаря́еши и ны́не притека́ющих к тебе́. Ни дни́ сму́тнии дре́вле, ниже́ ле́та гоне́ний от безбо́жных возмого́ша па́мять твою́ во тьме́ неве́рия скры́ти, но я́коже пре́жде све́том благода́ти Бо́жия ду́ши люде́й освеща́еши, вопию́щих к тебе́ такова́я:

Ра́дуйся, све́та ева́нгельскаго доброзра́чное облиста́ние; ра́дуйся, я́ко тобо́ю и ны́не прино́сится ра́дование.

Ра́дуйся, ми́лостей премно́гих сокро́вище; ра́дуйся, всеусе́рднаго промышле́ния о лю́дех прия́телище.

Ра́дуйся, су́щих во тьме́ неве́рия просвети́телю; ра́дуйся, чистоты́ жития́ на́шего неусы́пный блюсти́телю;

Ра́дуйся, Це́ркве Христо́вы негаси́мый свети́льниче; ра́дуйся, у Престо́ла Госпо́дня добросе́рдый о на́с печа́льниче.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 12.

Благода́ть, да́нную ти́ свы́ше, ве́дуще, воспева́ем тя́, уго́дниче Христо́в иере́е Пе́тре, и почита́ем чудотво́рный о́браз тво́й, его́же ми́лостивый Госпо́дь благоизво́лил е́сть сохрани́ти до ны́не и ди́вно яви́ти на́м. Те́мже припа́даем к нему́ и благогове́йно я́ко святы́ню лобыза́ем, благода́рно взыва́юще Бо́гу: Аллилу́иа.

И́кос 12.

Пою́ще всера́достное прославле́ние твое́, священному́чениче Пе́тре, ублажа́ем тя́ вси́, я́ко па́стыря до́бра и пра́ведника достохва́льна; велича́ем, я́ко побо́рника ве́ры кре́пка и му́ченика добропобе́дна; сла́вим, я́ко моли́твенника те́пла и чудотво́рца преди́вна; чти́м святу́ю па́мять твою́ и уми́льно вопие́м сицева́я:

Ра́дуйся, спасе́ние ве́чное от Го́спода улучи́вый; ра́дуйся, благи́й и ве́рный ра́бе Христо́в, в ра́дость Го́спода твоего́ вше́дый.

Ра́дуйся, я́ко свети́ло пресве́тлое с Небесе́ лю́дем, су́щим на земли́, сия́яй; ра́дуйся, я́ко луча́ Со́лнца Пра́вды Христа́, бла́гость Бо́жию неисчерпа́емую на́м, гре́шным, открыва́яй.

Ра́дуйся, милосе́рдию и любви́ Отца́ Небе́снаго подража́телю; ра́дуйся, неоскудева́емых даро́в у Бо́га прося́щим пода́телю.

Ра́дуйся, благоче́стия и добронра́вия в душа́х ре́вностных вкорени́телю; ра́дуйся, все́х притека́ющих к тебе́ му́дрый упра́вителю.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 13.

О святы́й уго́дниче Христо́в и чудотво́рче священному́чениче Пе́тре! Приими́ сие́ хвале́ние на́ше и услы́ши ны́, благоприя́тными же твои́ми к Бо́гу моли́твами изба́ви на́с от страсте́й па́губных, бе́д и обстоя́ний, да сподо́бимся с тобо́ю и все́ми святы́ми в небе́сных селе́ниих воспева́ти Бо́гу побе́дную пе́снь: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел земны́й и челове́к небе́сный в житии́ твое́м бы́л еси́, преблаже́нне Пе́тре, в преподо́бии и пра́вде, да́же до ста́рости, неосла́бне Го́сподеви служа́. Те́мже и Христо́с от ми́ра многомяте́жнаго во оби́тели ве́чныя пресели́ тя, я́ко ве́рнаго Своего́ раба́, иере́я же и му́ченика, сла́вою нетле́нною венча́ и мно́гими чудесы́ на земли́ просла́ви. Ты́ же, предстоя́ Престо́лу Тро́ицы Пресвяты́я, моли́твами твои́ми от вся́ких зо́л и напа́стей огради́ ны, зову́щия ти́ такова́я:

Ра́дуйся, и́го Христо́во на ра́мо твое́ взе́мый; ра́дуйся, путе́м служе́ния па́стырскаго досто́йно ше́ствовавый.

Ра́дуйся, пра́вды Бо́жия неосла́бный провозве́стниче; ра́дуйся, Це́ркве Христо́вы ре́вностный защи́тниче.

Ра́дуйся, испове́дником сла́вное сопричте́ние; ра́дуйся, му́чеником всехва́льное ликостоя́ние.

Ра́дуйся, христиа́н правосла́вных тве́рдое в Бо́зе заступле́ние; ра́дуйся, отсту́пников ве́ры устраше́ние и посрамле́ние.

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Конда́к 1.

Избра́нный уго́дниче Христо́в, честны́й служи́телю Престо́ла Госпо́дня, до́блий страда́льче Пе́тре, первоверхо́вному апо́столу тезоимени́тый, кре́постию ве́ры и благоче́стия в житии́ несокруши́м яви́лся еси́, и по кончи́не му́ченичестей чудесы́ просия́л еси́, сего́ ра́ди похва́льная воспису́ем ти́ пе́ния. Ты́ же, име́яй дерзнове́ние ко Го́споду, от вся́ких на́с бе́д свободи́, зову́щих:

Ра́дуйся, о́тче Пе́тре, иере́ев похвало́ и страстоте́рпцев соприча́стниче.

Моли́тва.

О священному́чениче Пе́тре, па́стырю на́ш до́брый, Черевко́вская похвало́, земли́ Краснобо́рския и се́вера росси́йскаго украше́ние! Ты́ от ю́ности твоея́, очи́стив себе́ от мирска́го пристра́стия и се́рдце удобри́в благода́тию Свята́го Ду́ха, во свяще́нный са́н иере́я Бо́жия обле́клся еси́, и мно́гая ле́та, попече́ние духо́вное, та́ко же и теле́сное о па́стве твое́й име́я, Же́ртву Безкро́вную досто́йно соверша́л еси́. Егда́ же прии́де на зе́млю Ру́сскую наше́ствие люде́й беззако́нных и злове́рных, я́ко па́стырь и́стинный, в же́ртву жи́ву Христу́ Бо́гу прине́слся еси́, и ны́не на Небесе́х лику́еши с со́нмы священному́чеников Це́ркве Ру́сския. Сего́ ра́ди мо́лим тя́: я́ко име́яй дерзнове́ние ко Го́споду, моли́ся о держа́ве на́шей, да в ми́ре и благоде́нствии пребыва́ет, сердца́ же люде́й правосла́вных вя́щшею любо́вию ко Христу́ Бо́гу да озаря́тся. И на́с, твои́ми моли́твами, да сподо́бит Госпо́дь досто́йныя плоды́ покая́ния приноси́ти и Святы́х Христо́вых Та́ин неосужде́нно причаща́тися. Хода́тайством твои́м да укрепи́тся ве́ра на́ша, да изба́вимся от вся́ких скорбе́й, неду́гов и напа́стей, враго́в ви́димых и неви́димых. А́ще же и пости́гнет на́с искуше́ние тя́жкое за грехи́ на́ша, да устои́м, я́коже не́когда ты́, святы́й Пе́тре, пред беззако́нным мучи́тельством, прославля́юще Триеди́наго Бо́га, Отца́ и Сы́на и Свята́го Ду́ха, во ве́ки веко́в. Ами́нь.