Конда́к 1.
Избра́ннаго Бо́гом от ро́да служи́телей Це́ркве Христо́вы и прия́вшаго му́ченический вене́ц за испове́дание ве́ры правосла́вныя, Бе́лыя и Вели́кия Руси́ свети́льника, священному́ченика Яросла́ва похва́льными пе́сньми почти́м; ты́ же, я́ко име́яй дерзнове́ние ко Го́споду, от вся́ких на́с бе́д сохраня́й, да любо́вию зове́м ти́:
Ра́дуйся, священному́чениче Яросла́ве, земли́ на́шея но́вое свети́ло и украше́ние.
И́кос 1.
А́нгелов мно́жество сла́вят Собо́р новому́чеников и испове́дников Росси́йских, с ни́миже и ты́, о́тче Яросла́ве, ны́не престо́лу Го́спода Сла́вы предстоя́ и ликовству́я непреста́нно, славосло́вия возсыла́еши и проше́ниям на́с гре́шных вне́млеши. Дне́сь со́браннии и па́мять твою́ пра́зднующии, тебе́, о́тче ми́лостивый, моле́ния возно́сим и с любо́вию глаго́лем:
Ра́дуйся, от ю́ности все́м се́рдцем свои́м Бо́га возлюби́вый; ра́дуйся, благода́тию Бо́жиею просвеще́нный.
Ра́дуйся, самоотверже́ние ди́вное в служе́нии Бо́гу и бли́жним яви́вый; ра́дуйся, за́поведи Ева́нгельския де́лом испо́лнивый.
Ра́дуйся, па́стырю, во оби́тели Рождества́ Пресвяты́я Богоро́дицы Бо́гу послужи́вый; ра́дуйся, в ве́ре и благоче́стии сесте́р ея́ укрепи́вый.
Ра́дуйся, земли́ Моско́вския духо́вное сокро́вище; ра́дуйся, ве́си Ямски́я небе́сный покрови́телю.
Ра́дуйся, за пра́вду гоне́ния и ско́рби претерпе́вый; ра́дуйся, любо́вь ко Христу́ кро́вию свое́ю запечатле́вый.
Ра́дуйся, ве́ру и́стинную да́же до сме́рти сохрани́вый; ра́дуйся, насле́дие жи́зни ве́чныя получи́вый.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 2.
Ви́дя Госпо́дь благо́е се́рдца твоего́ изволе́ние, призва́ тя́ по стези́ благоче́стия после́довати. Ты́ же ве́ру и́стинную от ма́лых ле́т восприя́л еси́ и воспита́н бы́л еси́ при хра́ме святе́м, иде́же роди́тель тво́й диа́кон Исаа́кий служа́ше, поуча́яся от него́ непреста́нно воспева́ти Бо́гу пе́снь: Аллилу́иа.
И́кос 2
Ра́зум име́я Бо́гом просвеще́нный, о́тче Яросла́ве, напра́вил еси́ стопы́ своя́ на уче́ние духо́вное, уготовля́яся к служе́нию па́стыря Христо́ва ста́да, и, зако́ну Бо́жию усе́рдно поуча́яся, душеполе́зное кни́жное сокро́вище восприя́л еси́. Мы́ же, воспомина́юще доброде́тельное житие́ твое́, воспева́ем ти́ си́це:
Ра́дуйся, роди́телей благочести́вых досто́йный сы́не; ра́дуйся, ра́досте и́х и утеше́ние.
Ра́дуйся, от ю́ности всего́ себе́ Бо́гу преда́вый; ра́дуйся, за́поведи Его́ ве́рно сохрани́вый.
Ра́дуйся, от ма́лых ле́т Бо́гом возлю́бленный; ра́дуйся, сосу́де Бо́жий избра́нный.
Ра́дуйся, доброде́тели христиа́нския стяжа́вый; ра́дуйся, цве́те благоуха́нный до́браго воспита́ния.
Ра́дуйся, церко́вному служе́нию от де́тства науче́нный; ра́дуйся, приле́жныя моли́твы Бо́гу приноси́вый.
Ра́дуйся, кни́жную му́дрость возлюби́вый; ра́дуйся, плоды́ Христо́ва уче́ния вкуси́вый.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 3.
Си́ла Боже́ственныя благода́ти осия́ тя́, и́стинный па́стырю ду́ш христиа́нских, егда́ диа́конскаго и иере́йскаго са́на удосто́ился еси́ и Про́мыслом Бо́жиим напра́влен бы́л еси́ в Рождество́-Богоро́дицкий Красносто́кский монасты́рь, иде́же труды́ к. трудо́м прилага́я и ве́ру Христо́ву лю́дем Гро́дненския земли́ пропове́дуя, науча́л еси́ и́х пе́ти Бо́гу: Аллилу́иа.
И́кос 3.
Име́я неусы́пное попече́ние о спасе́нии ду́ш сесте́р оби́тели Красносто́кския, о́тче Яросла́ве, наставля́л еси́ и́х на пу́ть по́двига духо́внаго и миссионе́рскаго служе́ния посреде́ раско́льников, иносла́вных и неве́рных. Сего́ ра́ди тя́, я́ко пропове́дника Христо́ва ублажа́ем, со умиле́нием зову́ще:
Ра́дуйся, пасти́ ста́до Христо́во избра́нный; ра́дуйся, Пастыренача́льнику Христу́ подража́вый.
Ра́дуйся, олтаря́ Госпо́дня благогове́йный служи́телю; ра́дуйся, Безкро́вныя Же́ртвы досто́йный соверши́телю.
Ра́дуйся, ве́ры правосла́вныя пропове́дниче; ра́дуйся, па́стырю ми́лостивый и благода́тный.
Ра́дуйся, в любви́ и благоче́стии с супру́гою свое́ю пожи́вый; ра́дуйся, в ве́ре ча́д свои́х воспита́вый.
Ра́дуйся, мирски́х люде́й учи́телю богому́дрый; ра́дуйся, боголюби́вых и́нокинь красносто́кских ра́досте.
Ра́дуйся, под покро́вом чудотво́рнаго Красносто́кскаго о́браза Бо́жия Ма́тере послужи́вый; ра́дуйся, к Богома́тери моли́твенниче на́ш неусы́пный.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 4.
Бу́рею искуше́ний и бе́д обурева́емыя во времена́ бра́ни всеми́рныя, сестры́ оби́тели Красносто́кския пресели́шася в Свя́то-Екатери́нинскую пу́стынь земли́ Моско́вския. Ты́ же, о́тче Яросла́ве, я́ко па́стырь до́брый, не оста́вил еси́ слове́сное ста́до свое́, поуча́я его́ ше́ствовати путе́м Христо́вых за́поведей, се́рдцем же и усты́ непреста́нно воспева́я Бо́гу побе́дную пе́снь: Аллилу́иа.
И́кос 4.
Слы́шавше и ви́девше, свя́те Яросла́ве, души́ твоея́ добро́ту и ве́рность в испове́дании ве́ры правосла́вныя во дни́ лю́тых скорбе́й и гоне́ний на Це́рковь Бо́жию, святе́йший оте́ц и испове́дник Патриа́рх всея́ Росси́и Ти́хон благослови́ награди́ти тя́ па́лицею за ве́рную слу́жбу. Те́мже ра́дующеся сему́, из глубины́ серде́ц вопие́м ти́:
Ра́дуйся, благо́е и́го Христо́во на себе́ восприя́вый; ра́дуйся, оте́ческих преда́ний нело́жный защи́тниче.
Ра́дуйся, во оби́тели Свя́то-Екатери́нинстей ра́достно Бо́гу послужи́вый; ра́дуйся, сесте́р ея́ в стоя́нии за ве́ру укрепи́вый.
Ра́дуйся, о оби́тели и сестра́х ея́ неусы́пный попечи́телю; ра́дуйся, уста́ва церко́внаго ревни́телю.
Ра́дуйся, гоне́ния за ве́ру не устраши́выйся; ра́дуйся, во сла́ву Христо́ву потруди́выйся.
Ра́дуйся, усе́рдный ко спасе́нию на́ш наста́вниче; ра́дуйся, призыва́ющим тя́ ско́рый помо́щниче.
Ра́дуйся, пропове́дниче покая́ния; ра́дуйся, ра́бе Бо́жий, благи́й и ве́рный.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 5.
Боготе́чней звезде́ подо́бен бы́л еси́, о́тче Яросла́ве, егда́ вра́г ро́да челове́ческаго ве́ру Христо́ву восхоте́ истреби́ти в земли́ Росси́йстей. Ты́ бо и́нокиням оби́тели и все́м к тебе́ приходя́щим бы́л еси́ па́стырь до́брый, в ве́ре и́х укрепля́я, в ско́рбех утеша́я и пу́ть к Го́рнему Иерусали́му показу́я. Те́мже и ны́не на Небесе́х сия́еши сла́вою неизрече́нною и ку́пно с ли́ки страда́льцев и му́чеников Свя́то-Екатери́нинския пусты́ни воспева́еши Бо́гу хвале́бную пе́снь: Аллилу́иа.
И́кос 5.
Ви́дев вра́г спасе́ния ро́да челове́ческаго богоуго́дное житие́ сесте́р Свя́то-Екатери́нинския оби́тели, гоне́ние воздви́же на все́х тружда́ющихся и подвиза́ющихся в не́й. Приидо́ша бо во оби́тель нечести́вии лю́дие, хра́мы разори́ша и Бо́гом вруче́нное тебе́, о́тче Яросла́ве, ста́до разгна́ша. Те́мже призва́ тя́ Госпо́дь на но́вое служе́ние во хра́ме святы́х му́чеников Фло́ра и Ла́вра ве́си Ямски́я. Сего́ ра́ди с любо́вию возглаша́ем ти́ такова́я:
Ра́дуйся, звездо́, тьму́ нече́стия просвеща́ющая; ра́дуйся, све́та Христо́ва носи́телю.
Ра́дуйся, ре́вностию по Бо́зе ча́д свои́х духо́вных воспламени́вый; ра́дуйся, оте́чество свое́ люби́ти и́х научи́вый.
Ра́дуйся, побо́рниче ве́ры непоколеби́мый; ра́дуйся, пра́вды служи́телю нелицеприя́тный.
Ра́дуйся, на по́двиг стоя́ния за ве́ру вдохнови́телю; ра́дуйся, гони́мых пра́вды ра́ди уте́шителю.
Ра́дуйся, малоду́шных тве́рдый ободри́телю; ра́дуйся, ми́ра и незло́бия учи́телю.
Ра́дуйся, служе́нием свои́м мно́гих стра́ждущих ча́д Бо́жиих уте́шивый; ра́дуйся, к по́двигу духо́вному все́х ве́рных призыва́вый.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 6.
Пропове́дник уче́ния Христо́ва вои́стину яви́лся еси́, о́тче Яросла́ве, я́коже бо дре́вле во времена́ гоне́ний на христиа́ны, ве́ру правосла́вную в сердца́х ве́рных укрепля́л еси́, да вси́ еди́нем се́рдцем и еди́ными усты́ воспева́ют Подвигополо́жнику на́шему и Спаси́телю побе́дную пе́снь: Аллилу́иа.
И́кос 6.
Возсия́л еси́ в душа́х мно́гих люде́й правосла́вных све́т благода́тнаго утеше́ния, егда́ обрето́ша в тебе́, священному́чениче Яросла́ве, богому́драго и до́браго отца́ все́м стра́ждущим, уничиже́нным и гони́мым от безбо́жных. Сего́ ра́ди благода́рственно воспева́ем тебе́ такова́я:
Ра́дуйся, возвеща́ти и́стину пред гони́телями ве́ры не убоя́выйся; ра́дуйся, в го́ды лихоле́тия моли́твы ве́рных к Бо́гу приноси́вый.
Ра́дуйся, стра́же неусы́пный, от волко́в хи́щных ста́до свое́ слове́сное охраня́вый; ра́дуйся, в житии́ твое́м мно́гими богоуго́дными де́лы Бо́гу послужи́вый.
Ра́дуйся, ча́д Це́ркве Христо́вы в ве́ре утверди́вый; ра́дуйся, в ско́рбех и беда́х долготерпе́нию и́х научи́вый.
Ра́дуйся, ско́рый помо́щниче все́м за ве́ру и́стинную гони́мым; ра́дуйся, любве́ и сострада́ния к лю́дем преиспо́лненный.
Ра́дуйся, па́стырю, благовеству́яй на́м глаго́лы жи́зни; ра́дуйся, я́ко к ве́ре и́стинней мно́гих напра́вил еси́.
Ра́дуйся, ча́дом твои́м духо́вным благи́й сове́тник бы́вый; ра́дуйся, к венце́м испове́дническим и́х приугото́вивый.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 7.
Хотя́й все́м челове́ком спасти́ся, премилосе́рдый Госпо́дь, посла́ во хра́м святы́х му́чеников Фло́ра и Ла́вра па́стыря до́браго, ду́шу свою́ за па́ству полага́ющаго, да вси́ с ве́рою моля́щиися и приходя́щии в хра́м се́й, прии́мут по́мощь кре́пкую и ра́достно из глубины́ серде́ц сокруше́нных воспою́т благи́х Пода́телю Бо́гу: Аллилу́иа.
И́кос 7.
Но́ваго тя́ моли́твенника, засту́пника и помо́щника в беда́х стяжа́ша лю́дие ве́си Ямски́я: ты́ бо во мно́ги до́мы ве́рных: приходи́л еси́, боля́щих ободря́я, все́х в ско́рбех и печа́лех су́щих утеша́я, усо́пших в жи́знь ве́чную провожа́я. Сего́ ра́ди и мы́, прибега́я к твоему́ заступле́нию, усе́рдно мо́лим тя́ и воспева́ем си́це:
Ра́дуйся ве́си Ямски́я Бо́гом да́нный покрови́телю; ра́дуйся, земли́ Моско́вския благослове́ние.
Ра́дуйся, в хра́ме святы́х му́чеников Фло́ра и Ла́вра Бо́гу и лю́дем послужи́вый; ра́дуйся, все́м служа́щим в хра́ме се́м помо́щниче благода́тный.
Ра́дуйся, ду́ши ве́рных благода́тию напита́вый; ра́дуйся, мзды́ и воздая́ний за труды́ своя́ от челове́к не иска́вый.
Ра́дуйся, я́ко на́м гре́шным о́браз доброде́телей житие́м свои́м яви́вый; ра́дуйся, Го́споду своему́ до конца́ послужи́вый.
Ра́дуйся, пред чудотво́рною Иерусали́мскою ико́ною Бо́жия Ма́тере о ча́дех свои́х духо́вных моле́ния возноси́вый; ра́дуйся, сто́лпе Правосла́вия непоколеби́мый.
Ра́дуйся, ни́щих защи́тителю и оби́димых предста́телю; ра́дуйся, я́ко и ны́не все́х с ве́рою к тебе́ приходя́щих ми́лостивый уте́шителю.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 8.
Стра́нника и прише́льца в ми́ре се́м себе́ помышля́я, о́тче священному́чениче Яросла́ве, во дни́ гоне́ний на Це́рковь Бо́жию я́ве без стра́ха пропове́дывал еси́ Христа́, си́лою любве́ твоея́ и сло́вом му́дрости мно́гих в ве́ре и́стинней укрепля́я и наставля́я ко спасе́нию, да вси́ ча́да твоя́ духо́вная ви́дяще ре́вность твою́ о сла́ве Бо́жией вопию́т Ему́: Аллилу́иа.
И́кос 8.
Ве́сь испо́лнь любве́ к Бо́гу и к лю́дем, страстоте́рпче Христо́в, раздава́л еси́ достоя́ние свое́ ни́щим, си́рым, вдови́цам и все́м в ну́жде су́щим, непреста́нно па́мятуя, я́ко расточи́в бога́тство земно́е, собере́ши на Небеси́ бога́тство нетле́нное. Мы́ же, науча́емии тобо́ю та́кожде твори́ти, вопие́м ти́ си́це:
Ра́дуйся, бли́жних свои́х любо́вию Христо́вою возлюби́вый; ра́дуйся, и на́с люби́ти бли́жних наставля́яй.
Ра́дуйся, к неиму́щим и вдова́м сострада́ние име́вый; ра́дуйся, за́поведь Госпо́дню о милосе́рдии испо́лнивый.
Ра́дуйся, тре́бующим по́мощи до́брый попечи́телю; ра́дуйся, серде́ц скорбя́щих уте́шителю.
Ра́дуйся, о́тче благосе́рдый, о спасе́нии мно́гих ревнова́вый; ра́дуйся, и на́с ревнова́ти о свое́м спасе́нии призыва́яй.
Ра́дуйся, ми́лостыни пода́телю преди́вный; ра́дуйся, безсре́брениче всехва́льный.
Ра́дуйся, о́браз жития́ пра́веднаго на́м показа́вый; ра́дуйся, и на́с исполня́ти за́поведи Госпо́дни науча́яй.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 9.
Вся́кое естество́ а́нгельское удиви́ся, зря́ще му́жество твое́, кро́тость и упова́ние на си́лу Бо́жию, егда́ приведо́ша тя́ на суди́лище нечести́вии слуги́ миродержи́теля тьмы́ ве́ка сего́. Ты́ же, о́тче Яросла́ве, не убоя́лся еси́ муче́ний и на сове́те и́х непра́веднем ве́ру и́стинную испове́дал еси́ и сме́рть за Христа́ приобре́тением почита́я, взыва́л еси́ укрепи́вшему тя́ Бо́гу: Аллилу́иа.
И́кос 9.
Вети́я многовеща́нныя не возмо́гут изрещи́ тебе́ досто́йныя хвалы́, о́тче Яросла́ве, ты́ бо жи́знь свою́ за Христа́ и Це́рковь Бо́жию отда́л еси́. Егда́ бо на сме́рть осуди́ша тя́ беззако́ннии мучи́тели, с ра́достию преда́л еси́ ду́шу твою́ Бо́гу и воспари́л еси́ во оби́тели Небе́сныя. Те́мже помина́юще по́двиг ве́ры твоея́, ублажа́ем тя́, страстоте́рпче Бо́жий, та́ко:
Ра́дуйся, темни́чное заточе́ние Христа́ ра́ди претерпе́вый; ра́дуйся, Сы́ном Бо́жиим на по́двиг страда́льческий укрепле́нный.
Ра́дуйся, непра́ведному суди́щу дерзнове́нно предста́вый; ра́дуйся, служи́телем Христа́ Бо́га себе́ испове́давый.
Ра́дуйся, угро́з мучи́телей не устраши́выйся; ра́дуйся, сове́том нечести́вых не покори́выйся.
Ра́дуйся, пред враги́ ве́ры Христо́вы му́жество и́стинное показа́вый; ра́дуйся, я́ко вся́ обвине́ния мучи́телей отве́ргл еси́.
Ра́дуйся, кро́вию свое́ю торжество́ ве́ры правосла́вныя утверди́вый; ра́дуйся, в ру́це Го́спода ду́шу свою́ пра́ведную преда́вый.
Ра́дуйся, я́ко тобо́ю сатана́ посрами́ся; ра́дуйся, я́ко тобо́ю Христо́с Бо́г просла́вися.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 10.
Спасти́ хотя́й люде́й росси́йских от поги́бели, дарова́ Человеколю́бец Госпо́дь на́м земны́м в по́мощь, покро́в и защи́ту со́нм новому́чеников и испове́дников Росси́йских, к нему́же Про́мыслом Бо́жиим и ты́, о́тче Яросла́ве, причи́слен бы́л еси́. Те́мже ублажа́юще святу́ю па́мять твою́, пое́м Бо́гу, прославля́ющему святы́х Свои́х: Аллилу́иа.
И́кос 10.
Стена́ тве́рдая бы́л еси́ правосла́вным лю́дем росси́йским проти́ву враго́в ве́ры Христо́вы ви́димых и неви́димых. И ны́не, уго́дниче Бо́жий Яросла́ве, моли́твами твои́ми проти́вящихся и́стине обрати́ к покая́нию, во́лны неве́рия и лжеуче́ний отврати́ от на́с, ве́сь Ямску́ю и всю́ зе́млю на́шу сохрани́ от вся́ких бе́д и напа́стей, да зове́м ти́ си́це:
Ра́дуйся, ве́ру, наде́жду и любо́вь до конца́ сохрани́вый; ра́дуйся, по́двигом твои́м христиа́н в ве́ре утверди́вый.
Ра́дуйся, я́ко А́нгелы тя́ ра́достно срето́ша; ра́дуйся, вене́ц пра́вды от руки́ Го́спода прия́вый.
Ра́дуйся, я́ко тобо́ю ли́к му́ченический приумно́жися; ра́дуйся я́ко во все́й Це́ркви Ру́сстей и́мя твое́ ны́не прославля́ется.
Ра́дуйся, я́ко о тебе́ вси́ ве́рнии просла́виша Отца́ Небе́снаго; ра́дуйся, я́ко и на́с хла́дных по́двигом любве́ твоея́ возгрева́еши.
Ра́дуйся, призыва́ющим тя́ ско́рый помо́щниче; ра́дуйся, и по сме́рти ча́д твои́х духо́вных не оста́вивый.
Ра́дуйся, пред Престо́лом Госпо́дним неусы́пный на́ш моли́твенниче; ра́дуйся, в де́нь су́дный кре́пкий на́ш защи́тниче.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 11.
Пе́ние моле́бное пред ико́ною твое́ю приноси́мое ми́лостивно услы́ши, священному́чениче Христо́в Яросла́ве, и бу́ди при́сный за ны́ ко Го́споду моли́твенник, возбуди́ на́с от сна́ грехо́внаго и напра́ви к покая́нию, да о тебе́ ра́дующеся и Бо́га сла́вяще воспое́м Ему́ пе́снь: Аллилу́иа.
И́кос 11.
Свети́льника доброде́телей ви́деша тя́ вси́ ве́рнии, ми́лостиве о́тче на́ш Яросла́ве, я́ко испо́лнил еси́ за́поведь Госпо́дню: «Бо́льши сея́ любве́ никто́же и́мать, да кто́ ду́шу свою́ положи́т за дру́ги своя́», и пресели́лся еси́ в Ца́рствие Небе́сное. Те́мже и мы́ коле́на серде́ц на́ших преклоня́ем и усе́рдная моле́ния о просвеще́нии и спасе́нии ду́ш на́ших возсыла́ем, зову́ще ти́ с любо́вию такова́я:
Ра́дуйся, звездо́ пресве́тлая в ли́це новому́чеников и испове́дников Росси́йских; ра́дуйся, неувяда́емый цве́те земли́ на́шея.
Ра́дуйся, свети́льниче, любо́вию к бли́жним горя́щий; ра́дуйся, све́том ве́чности на Небеси́ осия́нный.
Ра́дуйся, терпя́щим поноше́ние и му́ки за Христа́ сострада́телю; ра́дуйся, вше́дый в ра́дость Го́спода своего́.
Ра́дуйся, с му́ченики и все́ми святы́ми ликовству́яй; ра́дуйся, я́ко па́мять твою́ вся́ Це́рковь све́тло торжеству́ет.
Ра́дуйся, я́ко моли́твою пред ико́ною твое́ю прие́млем душе́вное утеше́ние; ра́дуйся, я́ко се́рдца на́ша исполня́ются благода́тнаго сокруше́ния.
Ра́дуйся, сосу́де Бо́жия благода́ти; ра́дуйся, све́тлым покро́вом моли́твы твоея́ и ны́не на́с озаря́яй.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 12.
Благода́ть Бо́жию прия́л еси́, пресла́вне о́тче Яросла́ве, я́ко при жи́зни твое́й помо́щник и уте́шитель бы́л еси́ приходя́щим к тебе́ ча́дом Бо́жиим, та́ко и по кончи́не свое́й страда́льчестей возсия́л еси́. я́ко страстоте́рпец и моли́твенник на́ш пред Бо́гом, да вси́ живу́щии в земли́ на́шей взыва́ют о тебе́ благода́рно Бо́гу: Аллилу́иа.
И́кос 12.
Пою́ще твое́ сла́вное стоя́ние за ве́ру и́стинную, ублажа́ем му́ченическую твою́ кончи́ну, о́тче священному́чениче Яросла́ве, е́юже на земли́ и на Небеси́ просла́вился еси́. Ве́руем, я́ко и на́с гре́шных ны́не не оставля́еши и ду́хом с на́ми пребыва́еши. Те́мже от серде́ц умиле́нных прино́сим ти́ похвалы́ сия́:
Ра́дуйся, оби́тели Рождество́-Богоро́дицкия Гро́дненския святы́й покрови́телю; ра́дуйся, о сестра́х ея́ усе́рдный моли́твенниче.
Ра́дуйся, Свя́то-Екатери́нинския пусты́ни ве́рный засту́пниче; ра́дуйся, в не́й обита́ющих храни́телю.
Ра́дуйся, я́ко оби́тели сия́, от безбо́жных разоре́нныя, моли́твами твои́ми возроди́шася; ра́дуйся, я́ко все́м почита́ющим в ни́х святу́ю па́мять твою́ поле́зная да́руеши.
Ра́дуйся, ве́сь Ямску́ю моли́твами твои́ми освяти́вый; ра́дуйся, я́ко моли́твами твои́ми хра́м во и́мя святы́х му́чеников Фло́ра и Ла́вра в не́й обновля́ется.
Ра́дуйся, я́ко в прославле́нии твое́м наро́ди Бе́лыя и Вели́кия Руси́ духо́вно соединя́ются; ра́дуйся, я́ко вспомина́я по́двиг тво́й вся́ земля́ Ру́сская весели́тся.
Ра́дуйся, лю́бящих и почита́ющих тя́ пред Бо́гом хода́таю; ра́дуйся, покро́ве все́х песносло́вящих тя́.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 13.
О преди́вный уго́дниче Христо́в, священному́чениче Яросла́ве, услы́ши на́с, гре́шных ча́д твои́х; приими́ сие́ ма́лое приноше́ние на́ше и моли́твами твои́ми испроси́ у Всеми́лостиваго Бо́га, да изба́вит на́с от вся́ких бе́д и напа́стей, от вра́г ви́димых и неви́димых, от напра́сныя сме́рти и от бу́дущих му́к, и сподо́бит Своего́ Небе́снаго Ца́рствия, иде́же вси́ святи́и воспева́ют Бо́гу ра́достную пе́снь: Аллилу́иа.
И́кос 1.
А́нгелов мно́жество сла́вят Собо́р новому́чеников и испове́дников Росси́йских, с ни́миже и ты́, о́тче Яросла́ве, ны́не престо́лу Го́спода Сла́вы предстоя́ и ликовству́я непреста́нно, славосло́вия возсыла́еши и проше́ниям на́с гре́шных вне́млеши. Дне́сь со́браннии и па́мять твою́ пра́зднующии, тебе́, о́тче ми́лостивый, моле́ния возно́сим и с любо́вию глаго́лем:
Ра́дуйся, от ю́ности все́м се́рдцем свои́м Бо́га возлюби́вый; ра́дуйся, благода́тию Бо́жиею просвеще́нный.
Ра́дуйся, самоотверже́ние ди́вное в служе́нии Бо́гу и бли́жним яви́вый; ра́дуйся, за́поведи Ева́нгельския де́лом испо́лнивый.
Ра́дуйся, па́стырю, во оби́тели Рождества́ Пресвяты́я Богоро́дицы Бо́гу послужи́вый; ра́дуйся, в ве́ре и благоче́стии сесте́р ея́ укрепи́вый.
Ра́дуйся, земли́ Моско́вския духо́вное сокро́вище; ра́дуйся, ве́си Ямски́я небе́сный покрови́телю.
Ра́дуйся, за пра́вду гоне́ния и ско́рби претерпе́вый; ра́дуйся, любо́вь ко Христу́ кро́вию свое́ю запечатле́вый.
Ра́дуйся, ве́ру и́стинную да́же до сме́рти сохрани́вый; ра́дуйся, насле́дие жи́зни ве́чныя получи́вый.
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Конда́к 1.
Избра́ннаго Бо́гом от ро́да служи́телей Це́ркве Христо́вы и прия́вшаго му́ченический вене́ц за испове́дание ве́ры правосла́вныя, Бе́лыя и Вели́кия Руси́ свети́льника, священному́ченика Яросла́ва похва́льными пе́сньми почти́м; ты́ же, я́ко име́яй дерзнове́ние ко Го́споду, от вся́ких на́с бе́д сохраня́й, да любо́вию зове́м ти́:
Ра́дуйся, священному́чениче Яросла́ве, земли́ на́шея но́вое свети́ло и украше́ние.
Моли́тва.
О святы́й страстоте́рпче священному́чениче Яросла́ве, ты́ от ю́ности Христа́ возлюби́л еси́ и по благода́ти Его́ свяще́нство восприя́в, я́ко свети́льник ве́ры и благоче́стия просия́л еси́! В годи́ну искуше́ний, внегда́ обыше́дше обыдо́ша страну́ на́шу врази́ ве́ры Христо́вы, яви́ тя́ Госпо́дь па́стыря до́браго, ду́шу свою́ за ча́д Бо́жиих положи́вша. Ны́не у́бо при́зри на ны́, приими́ от на́с усе́рдныя моли́твы и вознеси́ я́ ко престо́лу Святы́я Тро́ицы, иде́же ты́ в ли́це святы́х новому́чеников и испове́дников Росси́йских предстои́ши, я́ко да твои́м хода́тайством утверди́т Госпо́дь страну́ на́шу, да укрепи́т ду́х ве́ры и благоче́стия в лю́дех правосла́вных, в па́стырех Це́ркви да утверди́т ре́вность в служе́нии Бо́гу и бли́жним и да при́зрит ми́лостивым о́ком на на́с, предстоя́щих и прибега́ющих к твое́й по́мощи. Испроси́ у́бо у Всеми́лостиваго Го́спода ми́ра умире́ние, земли́ плодоно́сие, от гла́да и па́губы избавле́ние, скорбя́щим утеше́ние, неду́гующим исцеле́ние, па́дшим возставле́ние, заблужда́ющимся на пу́ть и́стины возвраще́ние, подвиза́ющимся в де́лех благи́х укрепле́ние, си́рым, неиму́щим, убо́гим и бездо́мным по́мощь и заступле́ние.
Споспешеству́й, священному́чениче Яросла́ве, святы́ми твои́ми моли́твами настоя́телю и бра́тии свята́го хра́ма, иде́же ты́ соверша́л еси́ служе́ние свое́ во времена́ лю́тых гоне́ний на ве́ру правосла́вную, просвети́ умы́ и сердца́ на́ша све́том Боже́ственнаго уче́ния, научи́ во е́же Бо́га и бли́жняго на́шего люби́ти и за́поведи Госпо́дни соблюда́ти, да не по и́мени то́кмо, но все́м житие́м на́шим ча́да Бо́жия яви́мся. Не забу́ди, о́тче Яросла́ве, оби́тели святы́я Гро́дненскую Рождество́-Богоро́дицкую и Свя́то-Екатери́нинскую, но соблюди́ от вся́каго зла́ все́х живу́щих и подвиза́ющихся в ни́х и на поклоне́ние в ни́х приходя́щих. Осени́ все́х на́с небе́сным твои́м благослове́нием и в ско́рбех, боле́знех утеше́ние, избавле́ние и исцеле́ние на́м пода́ждь, да возблагодари́м просла́вившаго тя́ Го́спода на́шего Иису́са Христа́, Ему́же подоба́ет вся́кая сла́ва, че́сть и поклоне́ние со Безнача́льным Отце́м и Пресвяты́м Ду́хом во ве́ки веко́в. Ами́нь.