Конда́к 1.

Избра́нный святи́телю Христо́в и преди́вный чудотво́рче, о́тче на́ш Арсе́ние! Похва́льное пе́ние воспису́ем ти́ с ве́рою и любо́вию, я́ко те́плому моли́твеннику и предста́телю на́шему: ты́ же, свя́тче Бо́жий, я́ко име́яй дерзнове́ние к Пресвяте́й Тро́ице, от вся́ких бе́д и скорбе́й моли́твами твои́ми свободи́ ны́, тебе́ зову́щия:

Ра́дуйся, святи́телю Арсе́ние, усе́рдный моли́твенниче о душа́х на́ших.

И́кос 1.

А́нгел земны́й и челове́к небе́сный бы́л еси́, святи́телю Арсе́ние, жития́ твоего́ чистото́ю и пра́ведностию; сего́ ра́ди а́нгелов Творе́ц во вре́менней жи́зни поста́ви тя́ во архиере́я Тверски́я па́ствы, по блаже́нней же кончи́не сопричте́ тя́ со́нму святы́х небожи́телей, с ни́миже све́тло водворя́яся ны́не во оби́телех ра́йских, слы́шиши от на́с сия́ хвале́бныя глаго́лы:

Ра́дуйся, Пресвяты́я Тро́ицы ве́рный служи́телю; ра́дуйся, а́нгельския чистоты́ ревни́телю.

Ра́дуйся, от пеле́н ма́терних избра́нный сосу́де Бо́жия благода́ти; ра́дуйся, от ю́ности твоея́ все́м се́рдцем и душе́ю возлюби́вый Го́спода.

Ра́дуйся, рачи́телю доброде́телей, пожи́вый в ми́ре а́ки безпло́тный; ра́дуйся, всего́ себе́ принесы́й в же́ртву жи́ву, свя́ту и благоуго́дну Бо́гови.

Ра́дуйся, я́ко свети́ло светоза́рное осия́вый па́ству Тверску́ю сия́нием до́брых де́л твои́х; ра́дуйся, просвети́вый лю́ди сло́вом и приме́ром равноа́нгельнаго жития́ твоего́.

Ра́дуйся, правосла́вия тве́рдый храни́телю; ра́дуйся, благоче́стия сто́лпе непоколеби́мый.

Ра́дуйся, благи́й ра́бе и ве́рный, вше́дый в ра́дость Го́спода твоего́; Ра́дуйся, со А́нгелы и все́ми святы́ми предстоя́й Престо́лу Христо́ву.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 2.

Ви́дя суету́ ми́ра сего́ вре́меннаго, от ю́ности восхоте́л еси́ служи́ти Го́сподеви в де́встве и чистоте́; те́мже роди́телей твои́х погребе́нию до́бре послужи́в, а́бие все́ име́ние твое́ ни́щим расточи́л еси́, и до́м и гра́д тво́й оста́вив, вы́шняго гра́да взыска́л еси́ Иерусали́ма небе́снаго, иде́же от лико́в а́нгельских и все́х святы́х пое́тся немо́лчная пе́снь Бо́гу: Аллилу́иа.

И́кос 2.

Ра́зум богопросвеще́нный стяжа́л еси́, свя́тче Бо́жий, чте́нием писа́ний Боже́ственных, от ю́ности бо напита́л еси́ ду́шу твою́ сла́дкою пи́щею слове́с Бо́жиих и соде́лался еси́ ве́рным исполни́телем за́поведей Христо́вых. Те́мже ублажа́ем тя́ и глаго́лем:

Ра́дуйся, до́брый учениче́ небе́снаго учи́теля Христа́; ра́дуйся, богому́дрый изсле́дователю та́инств, в зако́не Бо́жием сокрове́нных.

Ра́дуйся, вся́ кра́сная ми́ра сего́ возненави́девый; ра́дуйся, горе́ устреми́вый вся́ по́мыслы души́ твоея́.

Ра́дуйся, ни́щия и стра́нныя удовли́вый от име́ний твои́х; ра́дуйся, утверди́вый се́рдце твое́ в любо́вь Бо́жию.

Ра́дуйся, самоотверже́ния и пре́данности Бо́гу о́бразе соверше́нный; ра́дуйся, самоосужде́ния и покая́нных сле́з люби́телю.

Ра́дуйся, я́ко насади́л еси́ в души́ твое́й стра́х Госпо́день; ра́дуйся, я́ко прилежа́л еси́ моли́твам усе́рдным и коленопреклоне́нным.

Ра́дуйся, умиле́ния исто́чниче; ра́дуйся, кро́тости пра́вило.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 3.

Си́ла Христо́ва осени́ тя́, святи́телю, и дарова́ тебе́ кре́пость му́жественно претерпе́ти искуше́ния неви́димаго врага́, его́же стре́лы разжже́нныя угаси́л еси́ сле́зными твои́ми к Бо́гу моли́твами; сего́ ра́ди я́ко победи́тель воспева́еши ны́не со безпло́тными си́лами пе́снь побе́дную Христу́ Бо́гу: Аллилу́иа.

И́кос 3.

Услы́шав гла́с небе́сный, повелева́ющь тебе́, да и́деши в до́м Пречи́стыя Богоро́дицы нарица́емыя Пече́рския, я́ко еле́нь на исто́чники водны́я, устреми́лся еси́ во оби́тель Пече́рскую, я́же в Ки́еве, иде́же преподо́бнии и богоно́снии отцы́ Анто́ний и Феодо́сий со ученики́ свои́ми Христу́ благоугоди́ша, и бы́л еси́ о́ныя оби́тели святы́я постри́женник и подви́жник до́брый. Те́мже ны́не в го́рних оби́телех пребыва́я со все́ми преподо́бными Пече́рскими, слы́шиши от на́с такова́я:

Ра́дуйся, ма́слино благопло́дная, на па́жити го́р Ки́евских насажде́нная; ра́дуйся, ла́вры Пече́рския све́тлая похвало́.

Ра́дуйся, вели́ких уго́дников Бо́жиих Анто́ниа и Феодо́сиа подража́телю; ра́дуйся, все́х преподо́бных пече́рских соревнова́телю.

Ра́дуйся, вся́ послуша́ния и́ноческая неле́ностно проше́дый; ра́дуйся, для бра́тии оби́тели потруди́выйся, де́нь и но́щь рабо́тая свои́ма рука́ма.

Ра́дуйся, ропта́ние и праздносло́вие возненави́девый; ра́дуйся, терпе́ние кре́пкое и молчали́вая уста́ стяжа́вый.

Ра́дуйся, по́мыслы го́рдости и превозноше́ния попра́вый; ра́дуйся, свято́е смире́ние Христо́во себе́ усво́ивый.

Ра́дуйся, по́стниче неизнемога́ющий; ра́дуйся, подви́жниче непоколеби́мый.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 4.

Бу́рею уны́ния непоколеби́м пребы́л еси́, о́тче: впери́в бо у́м тво́й в Боже́ственная, вся́ по́мыслы до́лу влеку́щия низложи́л еси́, и неле́ностно прилежа́л еси́ трезве́нию и моли́твам непреста́нным, восходя́ от си́лы в си́лу к соверше́нству духо́вному. Те́мже досто́йно воспева́л еси́ еще́ на земли́ небе́сную пе́снь Триипоста́сному Бо́гу: Аллилу́иа.

И́кос 4.

Ви́дев благопло́дную добро́ту души́ твоея́ первосвяти́тель Киприа́н, возлюби́ тя зело́, Арсе́ние смиренному́дре, и поста́ви тя́ во архидиа́кона себе́ и сове́тника при́снаго, я́ко да послу́жиши ку́пно с ни́м Престо́лу Госпо́дню и бу́деши ему́ помо́щник ве́рен в управле́нии па́ствы всеросси́йския. Те́мже я́ко избра́нника Бо́жия честву́ем тя́ похвала́ми си́ми:

Ра́дуйся, олтаря́ Госпо́дня благогове́йный предстоя́телю; ра́дуйся, та́ин Христо́вых досто́йный служи́телю.

Ра́дуйся, первосвяти́теля Киприа́на собесе́дниче и сослужи́телю; ра́дуйся, того́ по́двигов и доброде́телей после́дователю.

Ра́дуйся, в управле́нии, тебе́ вве́реннем, пра́вду и ми́лость возлюби́вый; ра́дуйся, суды́ пра́ведны и нелицеприя́тны твори́вый.

Ра́дуйся, ти́хостию нра́ва украси́выйся; ра́дуйся, безкоры́стие и нищету́ духо́вную стяжа́вый.

Ра́дуйся, помо́щниче безпомо́щным; ра́дуйся, засту́пниче си́рым.

Ра́дуйся, хода́таю оби́димым; ра́дуйся, защи́тниче напа́ствуемым.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 5.

Во гра́д Тве́рь при́был еси́ ку́пно с первосвяти́телем Киприа́ном, богому́дре Арсе́ние, и зде́, во оте́чествии твое́м, яви́лся еси́ я́ко звезда́ многосве́тлая, сия́ющая све́том богоразу́мия и луча́ми доброде́телей, я́ко диви́тися все́м согра́жданом твои́м и воспева́ти за тя́ хвале́бную пе́снь Пресвяте́й Тро́ице: Аллилу́иа.

И́кос 5.

Ви́девше тя́ кня́зь и лю́дие Тверсти́и богоно́сна и все́ми доброде́тельми укра́шена, проси́ша первосвяти́теля Киприа́на, да поста́вит тя́ во архиере́а гра́ду Тве́ри, да иде́же рожде́н бы́л еси́ пло́тию, та́мо и духо́вную па́ству обря́щеши от пастыренача́льника Христа́. Приими́ у́бо, иера́рше Христо́в, и от на́с, ча́д и согра́ждан твои́х, сия́ хвале́бныя пе́сни:

Ра́дуйся, гра́да Тве́ри благопло́дная о́трасле и украше́ние; ра́дуйся, па́ствы Тверски́я свети́ло и удобре́ние.

Ра́дуйся, Ева́нгелиа Христо́ва усе́рдный благове́стниче; ра́дуйся, апо́стольских преда́ний тве́рдый храни́телю.

Ра́дуйся, сло́ва Бо́жия сладковеща́нный учи́телю; ра́дуйся, зако́на Госпо́дня одушевле́нныя скрижа́ли.

Ра́дуйся, нището́ю вре́менною бога́тство ве́чное стяжа́вый; ра́дуйся, моли́твами и поще́ньми блаже́нство го́рнее улучи́вый.

Ра́дуйся, прини́кий во глубину́ смире́ния; ра́дуйся, возше́дый на высоту́ безстра́стия.

Ра́дуйся, вдо́в и сиро́т благосе́рдый пита́телю; ра́дуйся, оби́димых и гони́мых многомо́щный засту́пниче.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 6.

Боготе́чней звезде́, дре́вле путеводи́вшей волхво́в к возсия́вшему Со́лнцу пра́вды Христу́, уподо́бити тя́ дерза́ем, святи́телю Бо́жий Арсе́ние. Сло́вом бо твои́м и доброде́тельным житие́м пу́ть пра́вый ко Христу́ слове́сней па́стве твое́й указа́л еси́, и бы́л еси́ путеводи́тель ко спасе́нию мно́гих, и́же наставля́еми тобо́ю, научи́шася богоприя́тно пе́ти все́х Творцу́ а́нгельскую пе́снь: Аллилу́иа.

И́кос 6.

Возсия́л еси́ я́ко богосве́тлое свети́ло на святи́тельстем престо́ле па́ствы Тверски́я, просвеща́я ду́ши все́х прибега́ющих к тебе́, я́ко архиере́ю богоприя́тному, его́же моли́тва мно́го мо́жет пред лице́м Вседержи́теля Бо́га. Те́мже и мы́, охраня́еми твои́ми святы́ми моли́твами, благода́рно тебе́ зове́м:

Ра́дуйся, па́стырю на́ш и учи́телю; ра́дуйся, те́плый о на́с гре́шных пред Бо́гом предста́телю.

Ра́дуйся, умиротвори́вый в па́стве твое́й раздо́ры и нестрое́ния; ра́дуйся, бо́дренными твои́ми моли́твами посрами́вый врага́ спасе́ния челове́ческаго.

Ра́дуйся, правосла́вия и благоче́стия насади́телю; ра́дуйся, лжи́ и вся́каго нече́стия истреби́телю.

Ра́дуйся, Христу́ уневе́стивый мно́гия души́ челове́ческия; ра́дуйся, руководи́вый в Ца́рствие Небе́сное твоя́ ученики́.

Ра́дуйся, до́брый и неусы́пный де́лателю виногра́да Христо́ва; ра́дуйся, му́дрый и богоприя́тный строи́телю та́ин Бо́жиих.

Ра́дуйся, иера́рше всеблаги́й; ра́дуйся, архиере́ю пречу́дный.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 7.

Хоте́нием возжеле́л еси́, святи́телю о́тче Арсе́ние, име́ти в па́стве твое́й подо́бие святы́я ла́вры Ки́ево-Пече́рския; те́мже устро́ил еси́ бли́з гра́да Тве́ри оби́тель во и́мя Честна́го Успе́ния Пресвяты́я Богоро́дицы и Преподо́бных оте́ц Анто́ниа и Феодо́сиа Пече́рских, иде́же со́нм и́ноков благогове́йных собра́л еси́ му́дре и научи́л еси́ и́х сло́вом и благи́м приме́ром твои́м в преподо́бии и святы́ни пе́ти Бо́гу: Аллилу́иа.

И́кос 7.

Новосозда́нная тобо́ю оби́тель, я́ко вертогра́д духо́вный яви́ся, святи́телю богому́дре, его́же возде́лал еси́ трудолю́бно, бра́тию твою́ назида́я к по́двигом по́стническим и ко вся́кому доброде́ланию, да бу́дут соверше́ни и непоро́чни, и да возно́сят немо́лчныя хвалы́ Христу́ Бо́гу. О се́м по до́лгу тя́ велича́ем и зове́м:

Ра́дуйся, и́ноков люби́телю; ра́дуйся, до́брый наста́вниче подвиза́ющимся во бра́ни духо́вней.

Ра́дуйся, ве́рный руководи́телю ше́ствующих ко Го́споду путе́м те́сным и́ноческаго жития́; ра́дуйся, му́дрый учи́телю христиа́нскаго соверше́нства.

Ра́дуйся, ле́ствице, возводя́щая богому́дрых и́ноков на высоту́ соверше́нства духо́внаго; ра́дуйся, в по́двизех неутоми́мый.

Ра́дуйся, на престо́ле святи́тельстем житие́ и́ноческое проводи́вый; ра́дуйся, хра́м Бо́жий чу́дный во и́мя Пресвяты́я Богома́тере во оби́тели твое́й созда́вый.

Ра́дуйся, и себе́ сама́го хра́м одушевле́нный сотвори́вый Триипоста́сному Бо́гу; ра́дуйся, всено́щныя моли́твы и бде́ния всеусе́рдно соверша́вый.

Ра́дуйся, преподо́бнеи ру́це твои́ со мно́гим дерзнове́нием к Бо́гу воздвиза́вый; ра́дуйся, еще́ при жи́зни твое́й да́ром чуде́с обогаще́нный.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 8.

Стра́нника и прише́льца в жи́зни се́й скороте́чней помышля́я себе́ бы́ти, о́тче на́ш Арсе́ние, гро́б рука́ма свои́ма из ка́мене устро́ил еси́ и над ни́м го́рце пла́кал еси́, помышля́я сме́рть и су́д Бо́жий нелицеприя́тный и гро́зный вся́кому земноро́дному. Те́мже и на́с воздви́гни от сна́ грехо́внаго, да подража́ем пла́чу твоему́ умиле́нному, и покая́нием очи́стившеся от вся́кия зло́бы, сподо́бимся ку́пно с тобо́ю на небеси́ взыва́ти Созда́телю на́шему: Аллилу́иа.

И́кос 8.

Ве́сь жела́нием боже́ственным объя́т бы́л еси́, святи́телю богоблаже́нне, го́рняя му́дрствуя, а не земна́я, и богомы́сленным умо́м твои́м вы́ну предстоя́ Бо́гу в моли́твах непреста́нных, яви́лся еси́ вели́кий уго́дник Бо́жий и чудотво́рец, и при́сно предста́тельствующий о па́стве твое́й, тебе́ принося́щей сия́ похвалы́:

Ра́дуйся, свяще́нная главо́, вы́ну го́рняя му́дрствующая; Ра́дуйся, досто́йный носи́телю Бо́жия благода́ти.

Ра́дуйся, врачу́ безме́здный, ту́не врачева́ния расточа́яй; Ра́дуйся, сосу́де драгоце́нный, целе́бное ми́ро все́м ве́рным бога́тно излива́яй.

Ра́дуйся, многотеку́щая реко́, напои́вшая сердца́ люде́й твои́х уче́ньми спаси́тельными; ра́дуйся, ча́ше всезлата́я, че́рплющая оби́лие дарова́ний от даропода́теля Христа́ и ороша́ющая души́ к плодоноше́нию духо́вному.

Ра́дуйся, о́тче благосе́рдый, подража́яй бла́гости Отца́ Небе́снаго; ра́дуйся, ми́лости струе́ неизсяка́емая.

Ра́дуйся, ра́дости мно́гим хода́таю; ра́дуйся, печа́лей и скорбе́й утоли́телю.

Ра́дуйся, многообра́зне укра́шенный доброде́тельми; ра́дуйся, све́тло блиста́ющий луча́ми пресла́вных чуде́с.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 9.

А́нгели небе́снии и со́нмы святы́х ра́достно восприя́ша тя́, егда́ свята́я душа́ твоя́, ми́рно разреши́вшися от у́з пло́ти, восхожда́ше в го́рняя, иде́же сподо́бился еси́ ве́чныя сла́вы в невече́рнем дни́ Ца́рствия Христо́ва, ю́же и на́м улучи́ти умоли́ Христа́ Бо́га, да с тобо́ю на земли́ живы́х воспое́м Ему́: Аллилу́иа.

И́кос 9.

Вити́йствующий язы́к челове́ческий не мо́жет изрещи́ оби́лие чуде́с твои́х, святи́телю Бо́жий, я́же при жи́зни и по сме́рти твое́й источи́л еси́ и до ны́не источа́еши стра́ждущим и неду́жным, враче́бница бо вои́стинну неоску́дная яви́ся свяще́нная твоя́ ра́ка, к не́йже притека́я, никто́же то́щь и неуте́шен от тебе́ исхо́дит, ю́же благогове́йне обстоя́ще, и мы́ с любо́вию к тебе́ вопие́м:

Ра́дуйся, бесну́емых от томле́ния диа́вольскаго свободи́вый; ра́дуйся, неисце́льно боля́щих уврачева́вый.

Ра́дуйся, слепы́м зре́ние дарова́вый; ра́дуйся, немы́м да́р сло́ва возврати́вый.

Ра́дуйся, разсла́бленных укрепи́вый; ра́дуйся, и мертвеца́ пресла́вно воскреси́вый.

Ра́дуйся, святота́тца гро́зно наказа́вый; ра́дуйся, покая́ние того́ ми́лостиво прие́мый.

Ра́дуйся, без стра́ха Бо́жия жи́вших вразуми́вый; ра́дуйся, лише́нным смы́сла у́м здра́вый ниспосла́вый.

Ра́дуйся, от страхова́ний вра́жиих мно́гия изба́вивый; ра́дуйся, и и́на мно́га чудеса́ сотвори́вый.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 10.

Подо́бно вели́кому святи́телю и чудотво́рцу Никола́ю явля́ешися во сне́ и я́ве, по свое́м преставле́нии, святи́телю о́тче на́ш Арсе́ние, известву́я ве́лию благода́ть, да́нную тебе́ от Христа́ Бо́га, и неусы́пное промышле́ние твое́ о спасе́нии жи́тельствующих во святе́й оби́тели твое́й и все́х с ве́рою притека́ющих к твоему́ оте́ческому покро́ву. Яви́лся бо еси́ во сне́ не́коему кли́рику и увещава́л его́ не удаля́тися из твоея́ оби́тели, и я́ве предста́л еси́ благогове́йному епи́скопу Алекси́ю, я́ко а́нгел Бо́жий, две́рем затворе́нным, вше́д в его́ ке́ллию и помоли́вся ико́не Спа́совой, кро́тко вопроси́л его́ о ме́сте пребыва́ния архимандри́та твоея́ оби́тели. О се́м прославля́ем ди́внаго во святы́х Свои́х Бо́га на́шего и вопие́м: Аллилу́иа.

И́кос 10.

Стена́ и тве́рдое огражде́ние гра́да Твери́ и оби́тели твоея́ яви́лся еси́, святи́телю о́тче Арсе́ние. Егда́ бо лю́тии и злонра́внии литвины́, разоря́юще гра́ды и ве́си росси́йския, доидо́ша до оби́тели твоея́, и восхоте́вше о́ную расхи́тити, взя́ша покро́в со святы́х и многоцеле́бных моще́й твои́х, зла́том и сребро́м укра́шенный, и́мже еди́н от ни́х дерзну́ покры́ти коня́ своего́, но а́бие на высоту́ взе́мшеся, о́ба падо́ша ме́ртвы, покро́в же си́лою Бо́жиею обре́теся на кресте́ верху́ хра́ма твоего́, про́чий же, ве́лиим объя́ти стра́хом, бежа́ша, оста́вльше оби́тель твою́ и гра́д Тве́рь невреди́мы. Помина́юще у́бо сие́ чу́дное твое́ заступле́ние, ра́достно взыва́ем к тебе́:

Ра́дуйся, избра́нный воево́до, при́сно гото́вый отража́ти враги́ ви́димыя и неви́димыя от па́ствы твоея́ земны́я; ра́дуйся, гра́да Тве́ри и оби́тели твоея́ забра́ло несокруши́мое.

Ра́дуйся, щи́те защища́яй ве́рныя; ра́дуйся, стено́ огражда́ющая благочести́выя.

Ра́дуйся, я́ко не попусти́л еси́ би́серу святы́ни попра́ну бы́ти; ра́дуйся, я́ко прогна́л еси́ ди́ких ве́прей от виногра́да Христо́ва.

Ра́дуйся, я́ко святу́ю оби́тель твою́ нерасхи́щену от враго́в сохрани́л еси́; ра́дуйся, я́ко правосла́вный гра́д оте́чествия твоего́ невреди́мым соблю́л еси́.

Ра́дуйся, во бра́нех христолюби́вому во́инству вели́кий посо́бниче; ра́дуйся, подвиза́ющимся в посте́ и безмо́лвии до́брый споспе́шниче.

Ра́дуйся, неду́жных благода́тный целе́бниче; ра́дуйся, преди́вный чудотво́рче.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 11.

Пе́ние хвале́бное со а́нгельскими чи́ны и все́ми святы́ми возно́сиши горе́ у Престо́ла Бо́жия, святи́телю о́тче на́ш Арсе́ние, и та́мо наслажда́яся блаже́нства неизрече́ннаго, не престае́ши ми́лостивно призира́ти на па́ству твою́ земну́ю, на гра́д Тве́рь и на оби́тель твою́; зри́ши бо на́ши ско́рби и ну́жды, боле́знуеши о на́ших не́мощех и гресе́х, и те́пле мо́лишися о все́х на́с ко Го́споду, подвиза́я и на́с недосто́йных во умиле́нии глубо́цем пе́ти Ему́: Аллилу́иа.

И́кос 11.

Свети́льник светоза́рный бы́л еси́, святи́телю Христо́в Арсе́ние, в жи́зни земне́й, свети́вый па́стве твое́й сло́вом уче́ния и приме́ром свята́го жития́ твоего́; но и ны́не, по сме́рти твое́й, не престае́ши просвеща́ти на́с чудесы́ твои́ми и нетле́нием честны́х моще́й твои́х, наипа́че же святы́ми и богоприя́тными моли́твами твои́ми, и́миже огражда́еми, невреди́мы от вся́каго зла́ пребыва́ем и глаго́лем:

Ра́дуйся, избра́нниче Бо́жий, его́же моли́тва мно́го мо́жет пред благосе́рдием Влады́ки; ра́дуйся, архиере́ю Госпо́день, чу́дне подража́вый в житии́ вели́кому архиере́ю Иису́су Христу́.

Ра́дуйся, слуго́ Всевы́шняго равноа́нгельный; ра́дуйся, я́ко кончи́на твоя́ сла́вна и успе́ние во святы́х.

Ра́дуйся, осия́нный в го́рних оби́телех сла́вою све́та невече́рняго; ра́дуйся, просла́вленный ди́вным нетле́нием святы́х моще́й твои́х и мно́гими чудесы́.

Ра́дуйся, благоуха́нием святы́ни твоея́ удобри́вый святу́ю Христо́ву Це́рковь; ра́дуйся, всея́ Росси́йския страны́ ра́дование и утеше́ние.

Ра́дуйся, покро́ве Бо́гом да́нный, и́мже покрыва́ются ве́рнии; ра́дуйся, све́тлый о́блаче, зно́й страсте́й на́ших утоля́ющий.

Ра́дуйся, роса́ благода́тная, ороша́ющая и веселя́щая на́ша се́рдца; ра́дуйся, гра́де прибе́жища, не кры́ющийся от на́шего притека́ния.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 12.

Богоблагода́тныя струи́ исцеле́ний источа́ет свяще́нная ра́ка моще́й твои́х, святи́телю Христо́в Арсе́ние: сию́ бо дарова́ на́м всеблаги́й Бо́г, я́ко но́вую купе́ль Силоа́мскую, к не́йже не еди́ножды в ле́то, но во вся́кое вре́мя притека́юще, неду́гующии духо́вне и теле́сне оби́льныя почерпа́ют исцеле́ния. Те́мже с любо́вию припа́даем к не́й, и прославля́юще ве́лию ми́лость и неизрече́нное человеколю́бие Бо́га на́шего, зове́м Ему́: Аллилу́иа.

И́кос 12.

Пою́ще твое́ богоуго́дное житие́, вели́кий уго́дниче Бо́жий, о́тче на́ш Арсе́ние, сла́вим святу́ю кончи́ну твою́, испове́дуем мно́гая чудеса́ твоя́ и вели́кое милосе́рдие твое́ к лю́дем, благогове́йно лобыза́ем нетле́нныя и цельбоно́сныя мо́щи твоя́, и мо́лим ти ся приле́жно: не пре́зри, па́стырю на́ш до́брый и о́тче милосе́рдый, ма́лаго усе́рдия на́шего и любве́, и́миже подвиза́еми, вопие́м ти́ си́це:

Ра́дуйся, арха́нгелов и а́нгелов сослужи́телю; ра́дуйся, все́х небе́сных си́л сожи́телю.

Ра́дуйся, проро́ком равноче́стне; ра́дуйся, апо́столом единонра́вне.

Ра́дуйся, му́чеников сонасле́дниче; ра́дуйся, святи́телей красото́.

Ра́дуйся, преподо́бных удобре́ние; ра́дуйся, пра́ведных похвало́.

Ра́дуйся, ко Пресвяте́й Богоро́дице бли́жний предста́телю; ра́дуйся, все́х святы́х дру́же.

Ра́дуйся, ду́ш и теле́с на́ших благода́тное врачева́ние; ра́дуйся, по Бо́зе и Богоро́дице кре́пкое на́ше упова́ние.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 13.

О вели́кий святи́телю и пресла́вный чудотво́рче, о́тче на́ш Арсе́ние! Приими́ ма́лое сие́ моле́ние на́ше, от любве́ те́плыя на́ми тебе́ приноси́мое, и умоли́ Вседержи́теля Го́спода изба́витися на́м от вся́кия ско́рби и боле́зни во вре́менней жи́зни се́й, и от ве́чных муче́ний по сконча́нии на́шем, да унасле́дуем Ца́рство Небе́сное, и сподо́бимся вку́пе с тобо́ю пе́ти Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел земны́й и челове́к небе́сный бы́л еси́, святи́телю Арсе́ние, жития́ твоего́ чистото́ю и пра́ведностию; сего́ ра́ди а́нгелов Творе́ц во вре́менней жи́зни поста́ви тя́ во архиере́я Тверски́я па́ствы, по блаже́нней же кончи́не сопричте́ тя́ со́нму святы́х небожи́телей, с ни́миже све́тло водворя́яся ны́не во оби́телех ра́йских, слы́шиши от на́с сия́ хвале́бныя глаго́лы:

Ра́дуйся, Пресвяты́я Тро́ицы ве́рный служи́телю; ра́дуйся, а́нгельския чистоты́ ревни́телю.

Ра́дуйся, от пеле́н ма́терних избра́нный сосу́де Бо́жия благода́ти; ра́дуйся, от ю́ности твоея́ все́м се́рдцем и душе́ю возлюби́вый Го́спода.

Ра́дуйся, рачи́телю доброде́телей, пожи́вый в ми́ре а́ки безпло́тный; ра́дуйся, всего́ себе́ принесы́й в же́ртву жи́ву, свя́ту и благоуго́дну Бо́гови.

Ра́дуйся, я́ко свети́ло светоза́рное осия́вый па́ству Тверску́ю сия́нием до́брых де́л твои́х; ра́дуйся, просвети́вый лю́ди сло́вом и приме́ром равноа́нгельнаго жития́ твоего́.

Ра́дуйся, правосла́вия тве́рдый храни́телю; ра́дуйся, благоче́стия сто́лпе непоколеби́мый.

Ра́дуйся, благи́й ра́бе и ве́рный, вше́дый в ра́дость Го́спода твоего́; Ра́дуйся, со А́нгелы и все́ми святы́ми предстоя́й Престо́лу Христо́ву.

Ра́дуйся, святи́телю Арсе́ние, усе́рдный моли́твенниче о душа́х на́ших.

Конда́к 1.

Избра́нный святи́телю Христо́в и преди́вный чудотво́рче, о́тче на́ш Арсе́ние! Похва́льное пе́ние воспису́ем ти́ с ве́рою и любо́вию, я́ко те́плому моли́твеннику и предста́телю на́шему: ты́ же, свя́тче Бо́жий, я́ко име́яй дерзнове́ние к Пресвяте́й Тро́ице, от вся́ких бе́д и скорбе́й моли́твами твои́ми свободи́ ны́, тебе́ зову́щия:

Ра́дуйся, святи́телю Арсе́ние, усе́рдный моли́твенниче о душа́х на́ших.

Моли́тва пе́рвая.

О вели́кий уго́дниче Бо́жий, святи́телю о́тче Арсе́ние! Се́ прино́сим тебе́ хвале́бное пе́ние мы́, гре́шнии и недосто́йнии ча́да твоя́, и велича́ем по́двиги и доброде́тели твоя́, и мно́гую ми́лость твою́ ко все́м с ве́рою притека́ющим к оте́ческому твоему́ покро́ву. Приими́ с любо́вию приноше́ние ве́ры и любве́ на́шея, и принеси́ е́ Вседержи́телю Бо́гу, от Него́же нисхо́дит вся́кое дая́ние бла́го и вся́кий да́р соверше́нный, и я́коже благоде́тельствовал еси́ в земне́м житии́ твое́м все́м иска́вшим твоея́ по́мощи, та́ко и ны́не не лиши́ на́с, о́тче благосе́рдый, твоего́ пред Бо́гом многомо́щнаго заступле́ния. Се́ бо нетле́нныя и многоцеле́бныя мо́щи твоя́ дарова́ на́м Госпо́дь во увере́ние, я́ко ве́лие дерзнове́ние и́маши к Нему́ и я́ко мно́го мо́жет предста́тельство твое́ пред Престо́лом бла́гости Его́. Те́мже не оста́ви на́с си́рых и безпомо́щных, но при́сно помина́й на́с во святы́х небе́сных твои́х моли́твах. Укрепи́ на́ша стопы́ тве́рдо и непоколеби́мо ходи́ти путе́м за́поведей Госпо́дних, утверди́ ру́це на́ша к воздея́нию моли́твенному и к соверше́нию до́брых де́л, согре́й сердца́ на́ша любо́вию ко Го́споду и к жи́зни ве́чней. Испроси́ у Царя́ Небе́снаго гра́ду Тве́ри и святе́й оби́тели твое́й благостоя́ние и все́й стране́ Росси́йстей ми́лость Бо́жию и сохране́ние от вся́каго зла́. Испроси́, святи́телю Бо́жий, и все́м, с ве́рою прибега́ющим к ра́це святы́х моще́й твои́х и и́мя твое́ благогове́йно призыва́ющим, коему́ждо да́р благопотре́бен: неду́гующим исцеле́ние, бе́дствующим избавле́ние, печа́льным утеше́ние, заблу́ждшим и́стины позна́ние, гре́шным исправле́ние, подвиза́ющимся преспе́яние, и все́м вся́ к жи́зни вре́менней и ве́чней потре́бная, во сла́ву ди́внаго во святы́х Свои́х Бо́га, в Тро́ице сла́вимаго и покланя́емаго, Отца́ и Сы́на и Свята́го Ду́ха. Ами́нь.

Моли́тва втора́я.

При́зри от го́рних высо́т, святи́телю о́тче Арсе́ние, на на́с смире́нных и гре́шных, во умиле́нии ду́ш и серде́ц к тебе́ прибега́ющих, ве́рою кре́пкою на тя́ упова́ющих, любо́вию нелицеме́рною прося́щих у тебе́ заступле́ния. Тебе́ бо моли́твенника благоприя́тнаго ве́мы ко Всеми́лостивому Бо́гу. Проле́й о на́с твоя́ святы́я моли́твы и умоли́ Человеколю́бца Го́спода не погуби́ти на́с со беззако́нии на́шими, но обрати́ти на́с к покая́нию и исправле́нию, да про́чее вре́мя жития́ на́шего земна́го, не в рабо́те греху́ и страсте́м, но в де́лании за́поведей Его́ святы́х и в благоче́стии провожда́ем и со благо́ю наде́ждою дости́гнем кончи́ны на́шея. В ча́с же сме́ртный наипа́че яви́ся на́м, о́тче, засту́пник благи́й, ускори́ тогда́ на моли́тву о на́с безпомо́щных и помози́ на́м со прича́стием Та́инств Боже́ственных ми́рную и благу́ю кончи́ну улучи́ти, гро́зная мыта́рства возду́шныя безбе́дно прейти́ и унасле́довати Го́рнее Ца́рство. Е́й, святи́телю Бо́жий, не пре́зри на́с и не посрами́ упова́ния на́шего, но бу́ди о на́с предста́тель немо́лчный к Бо́гу. О па́стырю на́ш до́брый, упаси́ на́с бо́дренными твои́ми моли́твами и сохрани́ ненаве́тны от вся́каго зла́, да сла́вим неизрече́нное человеколю́бие Бо́га на́шего, Отца́ и Сы́на и Свята́го Ду́ха, и твое́ оте́ческое заступле́ние, во ве́ки веко́в. Ами́нь.

Моли́тва тре́тья.

О всехва́льный святи́телю Христо́в и чудотво́рче, о́тче Арсе́ние! Не забу́ди на́с, ча́д святы́я оби́тели твоея́ и все́х с ве́рою и любо́вию прибега́ющих к ра́це честны́х и многоцеле́бных моще́й твои́х, но помина́й на́с во святы́х твои́х и благоприя́тных моли́твах к Бо́гу. Моли́ за вся́ христиа́ны, о́тче святи́телю Арсе́ние, и за святу́ю сию́ оби́тель, ю́же вручи́ тебе́ Пречи́стая Влады́чица Богоро́дица, мни́м бо тя́ вы́ну предстоя́ща Христу́ Бо́гу на́шему и Пречи́стей Его́ Ма́тери и иму́ща ве́лие к Ни́м дерзнове́ние. А́ще бо те́лом и преста́вился еси́ от на́с, но душе́ю жи́в сы́й, неотсту́пен пребыва́еши с на́ми ду́хом. Сохраня́й на́с твои́м предста́тельством пред Престо́лом Небе́снаго Царя́ от ко́зней вра́жиих, от собла́знов ми́ра, во зле́ лежа́щаго, и от вся́кия ско́рби и ну́жды. О преблаги́й па́стырю и учи́телю на́ш, о́тче Арсе́ние! К тебе́ припа́даем и тебе́ мо́лимся, моли́ся всеси́льному Бо́гу о по́льзе ду́ш на́ших, и испроси́ на́м вре́мя на покая́ние, да очи́стившеся от вся́кия скве́рны грехо́вныя, Небе́сному Ца́рствию насле́дники сподо́бимся бы́ти со все́ми пра́ведными, от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, че́сть и поклоне́ние со Безнача́льным Его́ Отце́м и с Пресвяты́м Ду́хом, ны́не и при́сно и во ве́ки веко́в. Ами́нь.