Конда́к 1.
Возбра́нный воево́до и засту́пниче на́ш тве́рдый, дре́вния Та́врии и́же на мо́ри сто́лпе све́тлый, гра́ду же Партени́ту стено́ неруши́мая и щи́те непобеди́мый, испроси́ на́м, чту́щым тя́, ду́х твоея́ ре́вности, да се́рдцем чи́стым и устны́ ве́рными зове́м ти́:
Ра́дуйся, святи́телю Иоа́нне, и́стины побо́рниче.
И́кос 1.
А́нгела тя́ земли́ Го́тфския от Бо́га испроси́ста Ле́в и Фоти́на, роди́тели твои́, проше́ние же улучи́вше, дивя́щеся и Бо́га благодаря́ще, у колыбе́ли младе́нческия возглаго́ласта о тебе́ си́це:
Ра́дуйся, седи́н отца́ и ма́тере утеше́ние; ра́дуйся, моли́твы неотсту́пныя исполне́ние.
Ра́дуйся, рожде́нием чу́дным вся́ непло́дныя возвесели́вый; ра́дуйся, Саму́ила и Иереми́и подо́бие прояви́вый.
Ра́дуйся, благоче́стием христиа́нским я́ко млеко́м пита́емый; ра́дуйся, та́инствы церко́вными от младе́нчества освяща́емый.
Ра́дуйся, доброхо́тный да́ре, Це́ркви ма́тери принесе́нный; ра́дуйся, обетова́ния пло́де, Небе́сному Царю́ посвяще́нный.
Ра́дуйся, святи́телю Иоа́нне, и́стины побо́рниче.
Конда́к 2.
Ви́дяще архиере́а своего́ в е́ресь укло́ньшася и во и́ну страну́ повеле́нием злочести́ваго царя́ отше́дша, согласи́шася лю́дие во главу́ це́ркве я́же в Го́тфии тя́ избра́ти, Иоа́нне преподо́бне, ско́рбь же тогда́ на ра́дость преложи́ся, и возда́ша ве́рнии Бо́гу хвалу́: Аллилу́иа.
И́кос 2.
Ра́зум Христо́в во млады́х ле́тех стяжа́л еси́, сего́ ра́ди моля́ху тя́ лю́дие омофо́р на ра́мена прия́ти, да огради́ши па́ству от еретико́в, проти́ву святы́х ико́н возстаю́щих, те́мже ве́рнии на по́двиг тя́ укрепля́ху, взыва́юще:
Ра́дуйся, высоты́ партени́тския рожде́ние све́тлое; ра́дуйся, По́нта Евкси́нскаго жемчу́жино чи́стая.
Ра́дуйся, Го́тфския страны́ ча́до Бо́жие светообра́зное; ра́дуйся, Та́врии доброзра́чныя благоуха́ние моли́твенное.
Ра́дуйся, небе́сное селе́ние, верху́ горы́ устроя́емое; ра́дуйся, свеще́ неугаси́мая, на све́щнице поставля́емая.
Ра́дуйся, даро́в духо́вных вмести́лище; ра́дуйся, всего́ наро́да избра́нниче.
Ра́дуйся, святи́телю Иоа́нне, и́стины побо́рниче.
Конда́к 3.
Си́лу свы́ше и во́ли Бо́жией позна́ние жела́я улучи́ти, во святу́ю зе́млю те́пле устреми́лся еси́, узре́в же сте́ны иерусали́мския, па́че сне́га беле́ющыя, возра́довался ду́хом и Спа́су Христу́ возопи́л еси́: Аллилу́иа.
И́кос 3.
Име́яй от ю́ности мы́сль кре́пку Христу́ рабо́тати, его́ ра́ди подвиго́м му́жески вда́лся еси́, То́й же призре́в на любо́вь твою́, во гра́де Иерусали́ме три́ ле́та жи́ти тебе́ сподо́би, по си́х же и́ноцы во оте́чествие провожда́юще тя́ ре́ша:
Ра́дуйся, я́ко ко гро́бу Госпо́дню сподо́бился еси́ прини́кнути; ра́дуйся, я́ко в вода́х иорда́нских потща́лся еси́ себе́ очи́стити.
Ра́дуйся, следы́ Христа́ воскре́сшаго в Галиле́и лобыза́вый; ра́дуйся, в пусты́нях и гора́х духоно́сцев святы́х лицезре́вый.
Ра́дуйся, я́ко прине́сл еси́ ико́нам досто́йное поклоне́ние; ра́дуйся, я́ко сверши́л еси́ ко архиере́йству досто́йное уготовле́ние.
Ра́дуйся, о Тавроски́фии, па́стыря не иму́щей, Бо́га умоли́вый; ра́дуйся, о Це́ркви ма́тери, ересьми́ терза́емей, сле́зы источи́вый.
Ра́дуйся, святи́телю Иоа́нне, и́стины побо́рниче.
Конда́к 4.
Бу́рею вра́жиею проти́ву святы́х ико́н гра́ду Константи́ну обдержи́му, в зе́млю И́верскую прите́кл еси́, Иоа́нне пра́ведне, во е́же са́н архиере́йский чи́сте прия́ти, ви́дев же кня́жества Ка́ртли непоколеби́мое благоче́стие, воспе́л еси́ Бо́гу: Аллилу́иа.
И́кос 4.
Слы́шавше прише́ствие твое́ во хра́м святы́х апо́стол, стеко́шася усе́рдно ивери́йстии жи́телие, иера́рх же картли́нский чистоту́ ве́ры сохрани́вый, ру́це честне́и на тя́ возложи́ и же́зл архиере́йский тебе́ вручи́, глаго́ля си́це:
Ра́дуйся, ко струя́м Ара́гвы и Куры́ от Иорда́на прише́дый; ра́дуйся, Мцхе́ты дре́вния благода́тную си́лу прие́мый.
Ра́дуйся, у столпа́ мироточи́ваго Святы́м Ду́хом освяще́нный; ра́дуйся, от лозы́ живоно́сныя Ни́ною прему́дрою напое́нный.
Ра́дуйся, апо́стольскаго престо́ла наме́стниче; ра́дуйся, святи́тельскаго собо́ра прее́мниче.
Ра́дуйся, ве́ру и́стинную сохра́ньших наста́вниче; ра́дуйся, Це́ркве ма́тере не преда́вших прича́стниче.
Ра́дуйся, святи́телю Иоа́нне, и́стины побо́рниче.
Конда́к 5.
Боготе́чная звезда́, ко Христу́ веду́щая, го́тфстей па́стве яви́лся еси́, архиере́ю Бо́жий Иоа́нне, те́мже па́стыря кре́пка, терпели́ва же и ми́лостива обре́тше, возра́довашася зело́ о́вцы твоя́, глаго́люще: Аллилу́иа.
И́кос 5.
Ви́дяще тебе́ на боже́ственней стра́жи стоя́ща, приидо́ша под омофо́р тво́й пресе́льницы, бе́гающии а́дския зло́бы ерети́ческия, заступле́ние же твое́, я́ко гони́мии за ве́ру, обре́тше, просла́виша Бо́га и ра́достно возгласи́ша ти́:
Ра́дуйся, бога́тством непра́вым и сла́вою земно́ю не прельсти́выйся; ра́дуйся, свире́пства ерети́ческаго проти́ву ико́н честны́х не убоя́выйся.
Ра́дуйся, догма́ты ве́ры усе́рдно усво́ивый; ра́дуйся, сия́ испо́лнити лю́ди наста́вивый.
Ра́дуйся, хра́мы в Го́тфии таври́честей устро́ивый и украси́вый; ра́дуйся, соверше́нныя жи́зни и́щущым оби́тели возобнови́вый.
Ра́дуйся, Константи́ну гра́ду яви́вый о́браз пра́ваго мудрова́ния; ра́дуйся, во хра́ме Софи́и прему́дрости Бо́жия пропове́давый ико́н почита́ние.
Ра́дуйся, святи́телю Иоа́нне, и́стины побо́рниче.
Конда́к 6.
Пропове́дают го́ры и уро́чища Та́врии ше́ствие твое́ я́ко апо́стольское, лю́ди бо в ве́ре утвержда́л еси́, ре́ки же и исто́чницы па́мять чуде́с твои́х прино́сят, и́менем бо твои́м запечатле́ннии, вопию́т Творцу́ и Бо́гу: Аллилу́иа.
И́кос 6.
Возсия́ ева́нгльское житие́ твое́, его́же свиде́телие су́ть го́ры непристу́пныя, нося́щыя це́ркви тобо́ю дре́вле созда́нныя, ны́не же гре́х ра́ди ро́да на́шего в запусте́ние прише́дшыя, в ни́хже иногда́ ча́да церко́вная освяща́еми, воспева́ху тебе́ си́це:
Ра́дуйся, пречи́стых Та́ин благогове́йный соверши́телю; ра́дуйся, ста́да твоего́ неустраши́мый храни́телю.
Ра́дуйся, сло́ва Христо́ва неутоми́мый пропове́дниче; ра́дуйся, сла́бых и отча́янных вели́кий засту́пниче.
Ра́дуйся, от го́р высо́ких вскра́й мо́ря стопа́ми зе́млю изме́ривый; ра́дуйся, собра́ти ча́да духо́вная вку́пе благоизво́ливый.
Ра́дуйся, а́нгелом це́ркви я́же в Го́тфии нарече́нный; ра́дуйся, си́лою Ду́ха Свята́го свы́ше окриле́нный.
Ра́дуйся, святи́телю Иоа́нне, и́стины побо́рниче.
Конда́к 7.
Хотя́щих во сле́д Христа́ тещи́ и́нок мно́жество собра́л еси́, о́тче, нра́вом бо украси́вся благоустро́енным подвиго́в ра́ди мона́шеских, возмо́гл еси́ искуша́емым от врага́ губи́теля помощи́, да чистоты́ се́ятелю Бо́гу де́нь и но́щь воспева́ют: Аллилу́иа.
И́кос 7.
Но́вую пе́снь Бо́гови воспе́ти жела́юще, приидо́ша под кро́в тво́й де́вства рачи́телие, зря́ще же лице́ твое́, благода́тно сия́ющее, укрепи́шася, и наставле́ния взыску́юще, воззва́ша тебе́ си́це:
Ра́дуйся, и́ноче кро́ткий и смире́нный; ра́дуйся, све́том фаво́рским озаре́нный.
Ра́дуйся, си́л безпло́тных подража́телю; ра́дуйся, духо́в зло́бы победи́телю.
Ра́дуйся, ми́р благода́тными дарова́нии удобри́вый; ра́дуйся, о́браз трезве́ния и смире́ния показа́вый.
Ра́дуйся, о ве́ре вопроша́ющым му́дрый сове́тниче; ра́дуйся, к послуша́нию прите́кшым ве́рный наста́вниче.
Ра́дуйся, святи́телю Иоа́нне, и́стины побо́рниче.
Конда́к 8.
Стра́нствие земно́е проходя́, естество́ пону́дил еси́, пло́ти же не пощади́л еси́, но за спасе́ние мно́гих себе́ отда́л еси́, ду́шу свою́ ве́ры ра́ди и́стинныя на вся́к де́нь полага́я, Христу́ же победи́телю благода́рно взыва́я: Аллилу́иа.
И́кос 8.
Ве́сь уде́л тво́й спасти́ хотя́ от хаза́р нечести́вых, не ми́р, но ме́чь предпоче́л еси́, пре́данный же ми́рствующими со враго́м, заточе́ние темни́чное претерпе́л еси́, те́мже взыва́ху тебе́ духо́вная ча́да твоя́ си́це:
Ра́дуйся, Го́тфския страны́ вождю́ духо́вный неустраши́мый; ра́дуйся, го́рдости инозе́мней не подкланя́тися лю́ди учи́вый.
Ра́дуйся, о свобо́де па́ствы пеки́йся, нача́льство над во́и прие́мый; ра́дуйся, о защище́нии святы́нь я́же во гра́де До́росе, поревнова́вый.
Ра́дуйся, от зна́емых преда́тельство, я́ко Христо́с от ученика́ лука́ваго, претерпе́вый; ра́дуйся, во у́зах пешеше́ствовавый и в темни́це безви́нно пострада́вый.
Ра́дуйся, я́ко изба́вленный ча́ды духо́вными, прия́л еси́ утеше́ние; ра́дуйся, я́ко во Амастри́ду всели́вся, сверши́л еси́ ко исхо́ду уготовле́ние.
Ра́дуйся, святи́телю Иоа́нне, и́стины побо́рниче.
Конда́к 9.
Вся́к чи́н и во́зраст приидо́ша прия́ти я́же от Амастри́ды мо́щи твоя́, ты́ бо, разлуче́ния не терпя́, к па́стве возврати́тися изво́лил еси́, по мо́рю ско́рое тече́ние соверши́в, а́нгели же провожда́вшии тя́, воспе́ша чуде́с пода́телю Бо́гу: Аллилу́иа.
И́кос 9.
Вети́я многовеща́нныя пропове́дуют прише́ствие твое́, е́же во хра́м святы́х апо́стол, тобо́ю созда́нный, гра́д же тво́й Партени́т фимиа́м и свещы́, и цветы́ тогда́ предугото́вив, в пе́сни ме́сто погреба́льныя, ра́достно возгласи́ тебе́:
Ра́дуйся, во оте́чествие твое́ мощьми́ возврати́выйся; ра́дуйся, во оби́тель твою́ в де́нь пра́здника тоя́ водвори́выйся.
Ра́дуйся, ча́д ве́рных си́м явле́нием уте́шивый; ра́дуйся, вино́вных к покая́нию наста́вивый.
Ра́дуйся, всемогу́щество Бо́жие прише́ствием твои́м пропове́давый; ра́дуйся, и по сме́рти позна́нием чуде́с твои́х ве́рныя укрепи́вый.
Ра́дуйся, гра́да твоего́ покрови́телю; ра́дуйся, всея́ Та́врии украси́телю.
Ра́дуйся, святи́телю Иоа́нне, и́стины побо́рниче.
Конда́к 10.
Спасти́ хотя́ от бе́д лю́ди твоя́, во все́х ну́ждах кро́тким помога́еши, никого́же отрева́я, те́мже ра́дуется дне́сь уде́л тво́й, святи́телю, в па́мяти чуде́с от тебе́ быва́емых, спасе́ние же в не́м тобо́ю прии́мшии, Бо́гу пою́т: Аллилу́иа.
И́кос 10.
Стена́ и щи́т гра́ду на́шему яви́лся еси́, чудеса́ в не́м непреста́нно содева́яй и ду́хом с на́ми пребыва́яй, те́мже в де́нь се́й прише́дше, дре́внии и но́вии свиде́телие де́л твои́х, от мно́гих у́ст пе́снь еди́ную тебе́ прино́сят, пою́ще:
Ра́дуйся, ученика́ в разбо́йники впа́дша изба́вивый; ра́дуйся, сомня́щася от во́лн спасы́й, прокаже́на очи́стивый.
Ра́дуйся, нечести́во солга́вшым Бо́жий су́д яви́вый; ра́дуйся, о име́нии вражду́ющих, того́ лиши́вый.
Ра́дуйся, си́лы мно́ги в Го́тфстей стране́ сотвори́вый; ра́дуйся, и́мя Бо́жие па́че все́х бла́г земны́х возлюби́вый.
Ра́дуйся, сосу́де чи́стый, я́ко благода́ть Бо́жию прия́л еси́; ра́дуйся, фа́росе огнесве́тлый, я́ко все́м конце́м мо́ря просия́л еси́.
Ра́дуйся, святи́телю Иоа́нне, и́стины побо́рниче.
Конда́к 11.
Пе́ние приими́, святи́телю Иоа́нне, соше́дшихся в па́мять твою́, я́же по мно́гих ве́цех не оскуде́ в земли́ на́шей, и́мя же твое́ забве́нию не бы́сть прича́стно, но сла́вно пред Бо́гом, Це́рковь бо Христо́ва де́нь тво́й пра́здновати повелева́ет на́м, пою́щым: Аллилу́иа.
И́кос 11.
Светоприе́мныя ду́шы взыску́я, Госпо́дь хра́м созда́ во и́мя твое́, се́й хра́м, и́же в предго́риих Та́врии, во о́браз Иерусали́ма на́м яви́ся, во́ньже не приити́, но то́чию взы́ти возмо́жно е́сть, в не́мже и мы́ в та́инствах церко́вных освяща́еми пое́м ти́:
Ра́дуйся, во хра́м тво́й обетова́нием по́мощи лю́ди призыва́яй; ра́дуйся, о́браз тво́й почита́ющым в ско́рбех и ну́ждах помога́яй.
Ра́дуйся, соверша́ющым слу́жбу Бо́жию споспе́шниче; ра́дуйся, моля́щымся и тружда́ющымся ве́рный наста́вниче.
Ра́дуйся, ке́дре вели́кий, ве́твьми о́блаки досяза́ющий; ра́дуйся, кипари́се ди́вный, высоту́ небе́с измеря́ющий.
Ра́дуйся, все́х оби́димых ско́рое заступле́ние; ра́дуйся, обнаже́нных от до́брых де́л к покая́нию возведе́ние.
Ра́дуйся, святи́телю Иоа́нне, и́стины побо́рниче.
Конда́к 12.
Благода́ть твою́, Иоа́нне преподо́бне, кра́й Таври́ческий испове́дует, я́ко еди́н от уде́л Бо́жиих, доброде́тельми же твои́ми, я́ко цветы́ тра́вными благоуха́я, Бо́гу в Тро́ице сла́вимому прино́сит пе́ние: Аллилу́иа.
И́кос 12.
Пою́ще па́мять твою́, просла́вим Бо́га, ле́ты влады́чествующаго и в ко́емждо ро́де хода́таи воздвиза́ющаго, и́же яви́ тебе́ ве́рнаго хода́тая не то́чию во вре́мя твое́, но и до дне́сь, те́мже в со́нме святы́х таври́ческих тя́ ублажа́ем си́це:
Ра́дуйся, уче́ние Первозва́ннаго Андре́а в се́рдце от ю́ности восприе́мый; ра́дуйся, терпе́нию Кли́мента Инкерма́нскаго во страда́нии поревнова́вый.
Ра́дуйся, Священному́чеником Херсоне́сским в горе́нии ду́ха подража́телю; ра́дуйся, Стефа́ну Суро́жскому подо́бен ико́н усе́рдный почита́телю.
Ра́дуйся, святи́телей земли́ на́шея наставле́ние; ра́дуйся, оби́телей го́рныя Та́врии утеше́ние.
Ра́дуйся, свяще́нников воспита́телю; ра́дуйся, все́х ве́рных святы́й предста́телю.
Ра́дуйся, святи́телю Иоа́нне, и́стины побо́рниче.
Конда́к 13.
О пла́менный ревни́телю святы́я на́шея ве́ры, и́ноков наста́вниче, святи́телю Иоа́нне, приими́ благодаре́ние сие́ на́ше, о все́х чудесе́х твои́х на на́с быва́емых, и предстоя́ ны́не престо́лу Христо́ву, в ли́це уго́дников и́же в Та́врии просия́ша, и ду́шы своя́ за лю́ди положи́ша, моли́ся, да сподо́бимся и на небесе́х пе́ти с тобо́ю: Аллилу́иа.
И́кос 1.
А́нгела тя́ земли́ Го́тфския от Бо́га испроси́ста Ле́в и Фоти́на, роди́тели твои́, проше́ние же улучи́вше, дивя́щеся и Бо́га благодаря́ще, у колыбе́ли младе́нческия возглаго́ласта о тебе́ си́це:
Ра́дуйся, седи́н отца́ и ма́тере утеше́ние; ра́дуйся, моли́твы неотсту́пныя исполне́ние.
Ра́дуйся, рожде́нием чу́дным вся́ непло́дныя возвесели́вый; ра́дуйся, Саму́ила и Иереми́и подо́бие прояви́вый.
Ра́дуйся, благоче́стием христиа́нским я́ко млеко́м пита́емый; ра́дуйся, та́инствы церко́вными от младе́нчества освяща́емый.
Ра́дуйся, доброхо́тный да́ре, Це́ркви ма́тери принесе́нный; ра́дуйся, обетова́ния пло́де, Небе́сному Царю́ посвяще́нный.
Ра́дуйся, святи́телю Иоа́нне, и́стины побо́рниче.
Конда́к 1.
Возбра́нный воево́до и засту́пниче на́ш тве́рдый, дре́вния Та́врии и́же на мо́ри сто́лпе све́тлый, гра́ду же Партени́ту стено́ неруши́мая и щи́те непобеди́мый, испроси́ на́м, чту́щым тя́, ду́х твоея́ ре́вности, да се́рдцем чи́стым и устны́ ве́рными зове́м ти́:
Ра́дуйся, святи́телю Иоа́нне, и́стины побо́рниче.
Моли́тва.
О до́брый на́ш па́стырю и богому́дрый наста́вниче, преподо́бне о́тче Иоа́нне! Услы́ши на́с моля́щихся тебе́ и на ско́рое предста́тельство твое́ упова́ющих.
При́зри на на́с гре́шных, в толи́цех обстоя́ниих су́щих, отвсю́ду уловля́емых и вся́каго бла́га духо́внаго за нераде́ние лише́нных. Потщи́ся уго́дниче Бо́жий, не оста́ви на́с в плену́ грехо́внем, да не бу́дем духо́вным враго́м на́шым ра́дование и да не у́мрем в лука́вых дея́ниих на́ших. Моли́ о на́с Христа́ Бо́га Спа́са на́шего, Ему́же ты́ со безпло́тными ли́ки предстои́ши. Ми́лостива к на́м сотвори́ соде́теля на́шего в ны́нешнем ве́це и в бу́дущем, да не возда́ст на́м по дело́м на́шым и по нечистоте́ серде́ц на́ших: но по свое́й бла́гости да возда́ст на́м. На твое́ бо хода́тайство наде́емся, твои́м предста́тельством хва́лимся. Дне́сь ико́не твое́й припа́дающе исцеле́ния ду́ш и теле́с на́ших про́сим, тве́рдое упова́ние на тебе́ иму́ще.
Е́й, уго́дниче Христо́в, о́тче святы́й и богодохнове́нный, правосла́вныя ве́ры све́тлый ве́стниче, боже́ственных и святы́х догма́тов храни́телю, воспомяни́ о на́с немощны́х. До́мы на́шя от вся́каго зла́ огради́, ча́д на́ших от собла́зн ми́ра сего́ защити́, младе́нцы воспита́й, ю́ныя в позна́ние уче́ния Христо́ва возрасти́, му́жы и жены́ правосла́вныя в ме́ру во́зраста Христо́ва приведи́, вдови́цы заступи́, ста́рцы во оскуде́нии кре́пости су́щыя поддержи́, все́м вся́ бу́ди, коего́ждо во́зраст и потре́бу ве́дый.
Укрепи́ на́с твои́м заступле́нием, испроси́ на́м от Го́спода твою́ пла́менную о богоугожде́нии ре́вность, ерети́ческая шата́ния низложи́ и наста́ви на́с на пу́ть спасе́ния, да сподо́бимся и мы́ ве́чныя жи́зни и ку́пно с тобо́ю просла́вим всесвято́е и́мя Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.