Конда́к 1.

Избра́нный чудотво́рче и изря́дный уго́дниче Христо́в, Росто́ва просвети́телю, и усе́рдный о душа́х на́ших моли́твенниче, святи́телю о́тче Лео́нтие! Восхваля́ем тя́ с любо́вию, засту́пника на́шего: ты́ же, я́ко име́яй дерзнове́ние ко Го́споду, моли́ся вы́ну о спасе́нии на́с гре́шных и от вся́ких бе́д избавля́й зову́щих ти́:

Ра́дуйся, Лео́нтие, Росто́вский чудотво́рче.

И́кос 1.

Ангелонра́вное житие́ возлюби́в, о́тче Лео́нтие, в оби́тель Ки́ево-Пече́рскую прише́л еси́, и от преподо́бных оте́ц Анто́ниа и Феодо́сиа во и́ночество прия́в постриже́ние, свя́то и богоуго́дно пожи́л еси́, подвиза́яся в посте́, бде́нии и моли́твах непреста́нных. Те́мже слы́шиши от на́с благохвале́ния такова́я:

Ра́дуйся, земны́й а́нгеле, во пло́ти небе́сно пожи́вый; ра́дуйся, небе́сный челове́че, о го́рних вы́ну помышля́вый.

Ра́дуйся, во мра́це пеще́рнем све́т боговиде́ния сниска́вый; ра́дуйся, по́двиги вели́кими пло́ть твою́ обузда́вый.

Ра́дуйся, смире́нием высо́кая стяжа́вый; ра́дуйся, терпе́нием вся́ искуше́ния диа́вольския победи́вый.

Ра́дуйся, посто́м ду́шу твою́ просвети́вый; ра́дуйся, моли́твами непреста́нными се́рдце твое́ освяти́вый.

Ра́дуйся, сосу́де избра́нный Бо́жия благода́ти; ра́дуйся, селе́ние непоро́чное Ду́ха Свята́го.

Ра́дуйся, свети́льниче, сия́яй да́ры боже́ственными; ра́дуйся, луче́ пресве́тлаго Со́лнца Пра́вды Христа́.

Ра́дуйся, Лео́нтие, Росто́вский чудотво́рче.

Конда́к 2.

Ви́дев Госпо́дь ду́шу твою́, святи́телю Лео́нтие, доброде́тельми благоукраше́нну, благоволи́ поста́вити тя́ во епи́скопа гра́ду Росто́ву, идолослуже́нием язы́ческим потемне́нному: да пра́во пра́виши в не́м сло́во и́стины, и приво́диши ко Христу́ заблу́ждшыя челове́ки, неве́дущыя пе́ти Триипоста́сному Бо́гу: Аллилу́иа.

И́кос 2.

Ра́зум небе́сный тебе́ дарова́ся, свя́тче Бо́жий, от Христа́ Бо́га, И́же посла́ тя́ в страну́ Росто́вскую пропове́дати лю́дем Ева́нгелие Христо́во, и приводи́ти к позна́нию ве́ры и́стинныя идолослуже́нием одержи́мыя челове́ки. Мы́ же тя́, равноапо́стольнаго пропове́дника ве́дуще, приве́тствуем ра́достно си́ми достодо́лжными хвале́нии:

Ра́дуйся, первопресто́льниче святы́я Росто́вския Це́ркве; ра́дуйся, Правосла́вия сто́лпе непоколеби́мый.

Ра́дуйся, кра́сныя но́зе твои́ напра́вивый к боре́нию со враги́ спасе́ния челове́ческаго; ра́дуйся, апо́стольски подвиза́выйся во гра́де Росто́ве.

Ра́дуйся, терпели́во преноси́вый гоне́ние ве́лие от идолослужи́телей; ра́дуйся, любо́вию оте́ческою зло́бу и́х побежда́вый.

Ра́дуйся, му́жеством души́ твоея́ вся́ злохи́трости и́х посрами́вый; ра́дуйся, благовре́менно и безвре́менно па́ству твою́ благоче́стию поуча́вый.

Ра́дуйся, ста́рцев идолослужи́тельных богому́дрый обличи́телю; ра́дуйся, младе́нцев благи́й научи́телю.

Ра́дуйся, неутоми́мо подвиза́выйся о спасе́нии ду́ш челове́ческих; ра́дуйся, просвети́вый Росто́в све́том позна́ния Христо́ва.

Ра́дуйся, Лео́нтие, Росто́вский чудотво́рче.

Конда́к 3.

Си́лою Христо́вою преиспо́лненный, святи́телю Лео́нтие, не убоя́лся еси́ противуста́ти со́нмищу идолослужи́телей, со ору́жием и дреко́льми на тя́ прише́дшему, к ни́мже, в святи́тельския ри́зы облече́нный, из хра́ма Бо́жия кро́тко изше́л еси́, и с любо́вию и́х увещава́л еси́, обрати́тися ко Христу́ Бо́гу, и вку́пе с тобо́ю пе́ти Ему́: Аллилу́иа.

И́кос 3.

Име́л еси́ лице́, я́ко а́нгельское, све́том небе́сным сия́ющее, святи́телю Лео́нтие, его́же не терпя́ще зре́ти идолослужи́тели, о́ви ослепо́ша, о́ви же разсла́блени на земли́ падо́ша, и зело́ устраше́ннии не дерзну́ша озло́бити тя́, пропове́дника боже́ственныя и́стины, вои́стинну досто́йнаго похва́л таковы́х:

Ра́дуйся, светоза́рный Бо́жия благода́ти таи́нниче; ра́дуйся, ангелоподо́бный челове́че.

Ра́дуйся, безору́жный вооруже́нных победи́вый; ра́дуйся, небоя́зненно сло́во Бо́жие пропове́давый.

Ра́дуйся, я́ко лице́ адама́нтово свы́ше тебе́ дарова́ся; ра́дуйся, я́ко тобо́ю ли́ца идолослужи́телей посрами́шася.

Ра́дуйся, я́ко а́нгел Бо́жий, све́том лица́ твоего́ идолослужи́телей устраши́вый; ра́дуйся, я́ко со зло́бою на тя́ устреми́вшихся кро́тостию твое́ю смири́вый.

Ра́дуйся, осле́пших и разсла́бленных моли́твою твое́ю исцели́вый; ра́дуйся, бла́гостию зло́бу победи́вый.

Ра́дуйся, апо́столе земли́ Росто́вския; ра́дуйся, па́стырю до́брый ста́да Христо́ва.

Ра́дуйся, Лео́нтие, Росто́вский чудотво́рче.

Конда́к 4.

Бу́ря гоне́ния язы́ческаго па́ки возшуме́ на тя́, святи́телю Лео́нтие, и изгна́ тя́ из гра́да Росто́ва на предгра́дие его́, иде́же ты́ посели́лся еси́, и хра́м Бо́жий во и́мя Архистрати́га Си́л Небе́сных та́мо созда́в, при не́м подвиза́лся еси́ в труде́х апо́стольских, зовы́й еди́ному могу́щему спасти́ заблу́ждшыя челове́ки Христу́, Царю́ и Бо́гу: Аллилу́иа.

И́кос 4.

Слы́шавше благи́я твоя́ глаго́лы, святи́телю Христо́в, ма́лыя де́ти прихожда́ху к тебе́, на предгра́дии Росто́ва живу́щему, и́хже ты́ пшени́цею с ме́дом пита́я, насажда́л еси́ в ни́х уче́ние Христо́во, да от у́ст младе́нцев соверши́ши хвалу́ Бо́гу, внуша́ющему на́м зва́ти тебе́:

Ра́дуйся, озари́вый све́том Христо́вым лю́ди во тме́ и се́ни сме́ртней седя́щыя; ра́дуйся, призва́вый ко Христу́ о́вцы заблу́ждшыя.

Ра́дуйся, гоне́ние и изгна́ние Христа́ ра́ди мно́гажды претерпе́вый; ра́дуйся, терпе́нием твои́м гони́телей твои́х препобеди́вый.

Ра́дуйся, христоподража́тельно младе́нцы возлюби́вый; ра́дуйся, сердца́ и́х неви́нныя Христо́вым позна́нием украси́вый.

Ра́дуйся, сла́дким бра́шном и́х пита́я, ду́шы и́х в любо́вь Пресла́дкаго Иису́са плени́вый; ра́дуйся, му́дро и́х в мре́жу Ева́нгелиа Христо́ва улови́вый.

Ра́дуйся, чрез ча́да роди́телей ко спасе́нию призва́вый; ра́дуйся, мно́гих ко Христу́ обрати́вый.

Ра́дуйся, де́лателю до́брый виногра́да небе́снаго; ра́дуйся, сла́дкия плоды́ де́лания твоего́ Христу́ принесы́й.

Ра́дуйся, Лео́нтие, Росто́вский чудотво́рче.

Конда́к 5.

Боготе́чное свети́ло бы́в, святи́телю о́тче Лео́нтие, мра́к идолослуже́ния во гра́де Росто́ве просвети́л еси́, сия́нием немерца́ющим Со́лнца Пра́вды Христа́, и мре́жею про́поведи ева́нгельския улови́л еси́ во спасе́ние мно́гия челове́ки, научи́в и́х правосла́вно ве́ровати во еди́наго Бо́га, в Тро́ице Святе́й сла́вимаго и покланя́емаго, и благоприя́тно пе́ти Ему́: Аллилу́иа.

И́кос 5.

Ви́девше тя́ лю́дие Росто́встии, святи́телю Лео́нтие, терпели́во поуча́ющаго и́х Ева́нгелию Христо́ву, и ни во что́ же вменя́ющаго гоне́ние, изгна́ние и ско́рби, нача́ша приходи́ти к тебе́ и послу́шати твои́х поуче́ний душеспаси́тельных: ты́ же, свя́те, хвалу́ о се́м Бо́гу возда́в, от предгра́дия во гра́д Росто́в возврати́лся еси́, и при собо́рнем его́ хра́ме водвори́вся, неле́ностно учи́л еси́ лю́ди твоя́ благоче́стию христиа́нскому. О се́м тя́ хва́лим и зове́м:

Ра́дуйся, те́рние неве́рия язы́ческаго в Росто́ве посека́вый; ра́дуйся, лозу́ позна́ния Христо́ва та́мо насади́вый.

Ра́дуйся, де́нь и но́щь труди́выйся на ни́ве Госпо́дней; ра́дуйся, приведы́й Го́сподеви лю́ди пакибытие́м обновле́нныя.

Ра́дуйся, во и́мя Отца́, и Сы́на, и Свята́го Ду́ха крести́вый язы́чники ожесточе́нныя; ра́дуйся, тро́ическою благода́тию укроти́вый идолослужи́тели озло́бленныя.

Ра́дуйся, первопа́стырю Росто́вския Це́ркве; ра́дуйся, звездо́ немерца́ющая, све́том Христо́вым все́х просвеща́ющая.

Ра́дуйся, моли́твенниче усе́рдный о па́стве твое́й земне́й; ра́дуйся, Бо́га зело́ просла́вивый по́двиги твои́ми равноапо́стольными.

Ра́дуйся, от Бо́га просла́вленный мно́гими чудесы́; ра́дуйся, си́ми утверди́вый и́стину твоея́ про́поведи боже́ственныя.

Ра́дуйся, Лео́нтие, Росто́вский чудотво́рче.

Конда́к 6.

Пропове́дником ева́нгельския и́стины, апо́столом Христо́вым, ве́рно подража́л еси́, святи́телю о́тче на́ш Лео́нтие, и подо́бно и́м труди́лся еси́ во благове́стии Христо́ве, лю́ди Росто́вския поуча́я правосла́вно ве́ровати во Святу́ю Тро́ицу и Боже́ственную Еди́ницу, Творца́ и Созда́теля вся́ческих, Ему́же при́сно пе́л еси́ а́нгельскую пе́снь: Аллилу́иа.

И́кос 6.

Возсия́л еси́ во гра́де Росто́ве све́том до́брых де́л твои́х, святи́телю приснопа́мятне, о ни́хже прославля́ху лю́ди Отца́ Небе́снаго Бо́га, укрепи́вшаго тя́ на по́двиги апо́стольския, и дарова́вшаго ти́ си́лу и вла́сть на ду́хи нечи́стыя, от и́хже влия́ния па́губнаго свобожда́л еси́ челове́ки, тебе́ зову́щыя и глаго́лющыя:

Ра́дуйся, Христу́ уневе́стивый мно́гия ду́шы челове́ческия; ра́дуйся, от Христа́ обогаще́нный мно́гими благода́тными да́ры.

Ра́дуйся, кри́не благоуха́нный небе́снаго прозябе́ния; ра́дуйся, ма́слино благопло́дная са́да Иису́сова.

Ра́дуйся, гра́да Росто́ва сла́во и похвало́; ра́дуйся, ве́ры Христо́вой в не́м кре́пкое утвержде́ние.

Ра́дуйся, благоче́стия учи́телю; ра́дуйся, правосла́вия наста́вниче.

Ра́дуйся, неду́гов душе́вных и теле́сных цели́телю; ра́дуйся, ни́щих и убо́гих пита́телю.

Ра́дуйся, свяще́нников рукополага́телю; ра́дуйся, и́ноков покрови́телю.

Ра́дуйся, Лео́нтие, Росто́вский чудотво́рче.

Конда́к 7.

Хоте́ние еди́но име́л еси́, свя́тче Бо́жий, е́же Бо́гу угожда́ти и спасе́нию люде́й твои́х служи́ти: те́мже не да́л еси́ сна́ очи́ма твои́ма, ни ве́ждома дрема́ния, но при́сно подвиза́лся еси́ во бла́го святы́я Росто́вския Це́ркве, стяжа́вшия тя́, столпа́ Правосла́вия непоколеби́маго, и стра́жа до́му Бо́жию ве́рнаго, приме́ром твои́м и на́с поуча́ющаго неле́ностно возноси́ти пе́снь хвалы́ Христу́ Бо́гу: Аллилу́иа.

И́кос 7.

Но́ваго тя́ Никола́а Мирлики́йскаго, стяжа́ гра́д Росто́в, святи́телю о́тче Лео́нтие, чудесы́ твои́ми зело́ и́мя Христо́во в не́м просла́вльшаго, и ко Христо́ву позна́нию лю́ди заблу́ждшыя приве́дшаго, твои́м уче́нием боже́ственным, ему́же внима́юще, лю́ди Росто́встии научи́шася пе́ти тебе́:

Ра́дуйся, благи́й ра́бе и ве́рный, да́нный тебе́ от Го́спода тала́нт не сокры́вый; ра́дуйся, мно́гу ку́плю духо́вную и́м приобреты́й.

Ра́дуйся, сотвори́вый и научи́вый, и ве́лий нарече́нный в Ца́рствии Небе́снем; ра́дуйся, вели́чием чуде́с на земли́ просла́вленный.

Ра́дуйся, зна́мения ди́вная рука́ма твои́ма соверши́вый; ра́дуйся, ту́не прия́вый, ту́не подава́вый.

Ра́дуйся, исполне́ние обетова́ний ева́нгельских получи́вый; ра́дуйся, милосе́рдия Спа́сова подража́телю.

Ра́дуйся, щедрода́тельный ми́лостыни пода́телю; ра́дуйся, любвеоби́льный скорбя́щих уте́шителю.

Ра́дуйся, орга́не Ду́ха Свята́го; ра́дуйся, ми́ро Христо́ва благоуха́ния на земли́.

Ра́дуйся, Лео́нтие, Росто́вский чудотво́рче.

Конда́к 8.

Стра́нствие земно́е му́ченическою кончи́ною соверши́л еси́, святи́телю Лео́нтие, Христа́ ра́ди от идолослужи́телей ожесточе́нных да́же до кро́ве пострада́в, пе́рвый священному́ченик Росси́йския Земли́ я́влься, гра́д Росто́в освяти́л еси́ излия́нием кро́ве твоея́, и Христу́ приусво́ил еси́, да просвеще́ннии тобо́ю лю́ди, честву́юще по́двиг тво́й апо́стольский, зову́т Бо́гу: Аллилу́иа.

И́кос 8.

Ве́сь в же́ртву Бо́гу прине́слся еси́, святи́телю достоблаже́нный, и со дерзнове́нием мно́гим Христу́ предста́л еси́ во сла́ве Ца́рствия Небе́снаго, иде́же не забу́ди и на́с, земны́х, усе́рдно с любо́вию тя́ почита́ющих, но при́сно моли́ся о спасе́нии на́шем, да тебе́ зове́м хвале́бно:

Ра́дуйся, пе́рвый священному́чениче земли́ Росси́йския; ра́дуйся, кро́ве обагре́нием украси́вый ри́зу твою́ святи́тельскую.

Ра́дуйся, со страстоте́рпцы вше́дый в ра́дость Го́спода твоего́; ра́дуйся, А́гнцу Бо́жию по́двигом земны́м подража́вый.

Ра́дуйся, за о́вцы твоя́ слове́сныя ду́шу твою́ положи́вый; ра́дуйся, и́мя Христо́во кончи́ною твое́ю просла́вивый.

Ра́дуйся, сме́рть му́ченическую прия́вый, но тле́ния не позна́вый; ра́дуйся, чудесы́ мно́гими свя́тость твою́ ознаменова́вый.

Ра́дуйся, во гро́б соше́дый и от него́ заре́ю безсме́ртия возсия́вый; ра́дуйся, во оде́жду благода́тнаго нетле́ния облече́нный.

Ра́дуйся, воскресе́ния Христо́ва си́лу в ме́ртвенном телеси́ твое́м прояви́вый; ра́дуйся, во благоуха́нии святы́ни опочи́вый.

Ра́дуйся, Лео́нтие, Росто́вский чудотво́рче.

Конда́к 9.

Все́м те́лом це́л и неруши́мь, с лице́м сия́ющим, лежа́щ во гро́бе я́ко жи́в, по ле́тех мно́зех в земли́ обре́тен бы́л еси́, святи́телю Лео́нтие, и чуде́с мно́жество от нетле́нных и многоцеле́бных моще́й твои́х источи́л еси́, и́ми свя́тость твою́ зна́менуя, и подвиза́я ве́рныя благода́рственно взыва́ти Ди́вному во святы́х свои́х Бо́гу: Аллилу́иа.

И́кос 9.

Вети́йство челове́ческое не довле́ет к прославле́нию мно́гих и пресла́вных чудотворе́ний твои́х, святи́телю Лео́нтие, и́миже Це́рковь Росто́вская благоукраси́ся, и сего́ ра́ди гла́сы хвале́бными усе́рдно тя́ сла́вим, я́ко своего́ первосвяти́теля, просвети́теля и предста́теля ко Го́споду, зову́ще к тебе́ благода́рственно и хвале́бно:

Ра́дуйся, алава́стре целе́бный ми́ра Христо́ва преиспо́лненный; ра́дуйся, реко́ чуде́с многово́дная.

Ра́дуйся, исто́чниче кипя́й исцеле́ньми; ра́дуйся, кла́дезю, от него́же боля́щии здра́вие почерпа́ют.

Ра́дуйся, нетле́ния цве́те благоуха́нный и прекра́сный; ра́дуйся, безсме́ртия заре́ присносия́ющая.

Ра́дуйся, би́сере драги́й Бо́жия благода́ти, в не́дрех земны́х обре́тенный; ра́дуйся, со сла́вою и че́стию во хра́ме Бо́жием положе́нный.

Ра́дуйся, я́ко к тебе́ слепи́и приходя́ще, зря́щии возвраща́хуся; ра́дуйся, я́ко к тебе́ хро́мии и нича́щия ползу́ще, прямоходя́ще отхожда́ху.

Ра́дуйся, разсла́бленных благода́тный укрепи́телю; ра́дуйся, беснова́тых от наси́лия диа́вольскаго свободи́телю.

Ра́дуйся, Лео́нтие, Росто́вский чудотво́рче.

Конда́к 10.

Спасе́ния душе́внаго хода́тай явля́ешися ве́рным, святи́телю Лео́нтие, и при́сно мо́лишися Бо́гу о па́стве твое́й земно́й, усе́рдно тя́ почита́ющей. Сие́ уверя́я в чу́дном виде́нии яви́лся еси́ в нощи́, в собо́рнем хра́ме Росто́ва, с подъя́тыми горе́ дла́ньми у престо́ла Бо́жия усе́рдно моля́йся и све́том небе́сным сия́яй, е́же ви́дев му́ж, такова́го виде́ния досто́йный, возопи́ ко Го́споду: Аллилу́иа.

И́кос 10.

Царя́ Небе́снаго Христа́ ве́рный ра́бе и уго́дник бы́л еси́, святи́телю Лео́нтие, и от Него́ нетле́нием и чудесы́ просла́вленный, от вели́каго кня́зя Андре́а Боголю́бскаго по́честь посме́ртную восприя́л еси́ в моще́х твои́х святы́х, и́мже покланя́ющеся с ве́рою и любо́вию, пе́сненно тебе́ вопие́м:

Ра́дуйся, Правосла́вия утвержде́ние; ра́дуйся, архиере́ев красото́.

Ра́дуйся, в со́ниих и виде́ниих ве́рныя посеща́яй; ра́дуйся, явле́нием твои́м больны́м нездра́вие во здра́вие претворя́яй.

Ра́дуйся, ско́рый помо́щниче моли́твенно тя́ призыва́ющих; ра́дуйся, усе́рдный засту́пниче тя́ почита́ющих.

Ра́дуйся, правове́рных благонаде́жное прибе́жище; ра́дуйся, по Бо́зе и Богоро́дице кре́пкое на́ше упова́ние.

Ра́дуйся, врачу́ безме́здный, еди́ныя ве́ры то́кмо тре́буяй; ра́дуйся, бли́жним и да́льним щедро́ты целе́бныя подава́яй.

Ра́дуйся, Росто́ва храни́телю неотсту́пный; ра́дуйся, всея́ Росси́и предста́телю, Бо́гом да́нный.

Ра́дуйся, Лео́нтие, Росто́вский чудотво́рче.

Конда́к 11.

Пе́ние моле́бное от ле́т дре́вних и доны́не не умолче́ у гро́ба твоего́, святи́телю о́тче на́ш Лео́нтие, и свеща́ неугаси́мо пребыва́ет та́мо, ея́же погаше́ние еди́ным от кли́рик собо́рныя це́ркве ты́ гро́зно покара́л еси́, разслабле́нием теле́сным вино́внаго наказа́в, до́ндеже не вразуми́ся, и с покая́нием не обрати́ся к тебе́ целе́бнику благода́тному, зовы́й тя́ прославля́ющему Бо́гу: Аллилу́иа.

И́кос 11.

Све́тлостию чуде́с сия́яй, святи́телю преподо́бне, благода́тно озаря́еши ду́шы на́ша, страстьми́ грехо́вными потемне́нныя, и вся́ ны́ приво́диши на стезю́ покая́ния и спасе́ния. Сего́ ра́ди ублажа́ем тя́, наста́вника душеспаси́тельнаго и по сме́рти, от гро́ба твоего́ чуде́сно на́с поуча́ющаго, и во умиле́нии глубо́цем воспева́ем в похвалу́ тебе́:

Ра́дуйся, дру́же Христо́в, до конца́ ве́рен Ему́ пребы́вый; ра́дуйся, уго́дниче Бо́жий, на небеси́ и земли́ просла́вленный.

Ра́дуйся, в со́нме святи́телей сия́ющая звездо́; ра́дуйся, со святи́тели моско́вскими в виде́нии, во дни́ обложе́ния тата́рами Москвы́, та́инственно предста́вый.

Ра́дуйся, Пресвяте́й Влады́чице Богоро́дице, в друго́м виде́нии, спу́тник бы́вый; ра́дуйся, Ея́ во́лю святу́ю в жи́зни и по сме́рти усе́рдно творя́й.

Ра́дуйся, свеще́, в моли́твах к Бо́гу возжже́нная; ра́дуйся, вождю́, пу́ть ко спасе́нию все́м показу́ющий.

Ра́дуйся, па́ству твою́ моли́твенно назира́яй; ра́дуйся, с ве́рою к тебе́ прибега́ющих проше́ния исполня́яй.

Ра́дуйся, Це́ркве Правосла́вныя благода́тная ле́пото; ра́дуйся, лю́бящих и чту́щих тя́ при́сное ра́дование.

Ра́дуйся, Лео́нтие, Росто́вский чудотво́рче.

Конда́к 12.

Благода́ти Бо́жией сокро́вище, свята́я и всечестна́я ра́ка твоя́, святи́телю о́тче на́ш Лео́нтие, но́вая купе́ль Силоа́мская для неду́жных яви́ся: к не́й бо не еди́ножды то́кмо в ле́то, но на вся́кое вре́мя, с ве́рою приходя́щии, исцеле́ние боле́знем свои́м прие́млют, и тя́ прославля́ют, ми́лостиваго и безме́зднаго цели́теля, зову́ще благи́х пода́телю Бо́гу: Аллилу́иа.

И́кос 12.

Пою́ще по́двиги твоя́ равноапо́стольныя, и мно́гая пресла́вная чудотворе́ния твоя́, чудотво́рче святы́й Лео́нтие, мо́лим тя́, ми́лостиваго предста́теля на́шего: моли́ся с на́ми и о на́с ко Христу́ Бо́гу, да проба́вит к на́м ми́лость свою́, и яви́т на́м вели́кия своя́ щедро́ты, да возмо́жем благоприя́тно приноси́ти тебе́ от усе́рдия на́шего сия́ пе́сненныя похвалы́:

Ра́дуйся, Пресвяты́я Тро́ицы ве́рный испове́дниче; ра́дуйся, Пресвяты́я Богоро́дицы досто́йный избра́нниче.

Ра́дуйся, а́нгельских во́инств собесе́дниче; ра́дуйся, все́х святы́х сожи́телю.

Ра́дуйся, в ра́йских оби́телех пребыва́яй; ра́дуйся, от го́рних высо́т к земноро́дным ми́лостивно приника́яй.

Ра́дуйся, любо́вь к па́стве твое́й неизме́нно сохрани́вый; ра́дуйся, чуде́с мно́жеством и по сме́рти ча́да твоя́ озари́вый.

Ра́дуйся, в вы́шних живы́й и о ни́жних промышля́яй; ра́дуйся, гра́д Росто́в от вся́каго зла́ соблюда́яй.

Ра́дуйся, теле́с на́ших немздоприи́мный целе́бниче; ра́дуйся, о душа́х на́ших благоприя́тный к Бо́гу моли́твенниче.

Ра́дуйся, Лео́нтие, Росто́вский чудотво́рче.

Конда́к 13.

О пресвяты́й и преди́вный чудотво́рче, святи́телю о́тче Лео́нтие, Росто́ва первопа́стырю и все́х ве́рных предста́телю! Приими́ ми́лостиво сие́ ма́лое моле́ние на́ше в похвалу́ тебе́ приноси́мое, и благоприя́тными моли́твами твои́ми ко Го́споду Бо́гу, сотвори́ на́с насле́дники бы́ти всесве́тлаго Ца́рствия Христо́ва: да предста́тельством твои́м муче́ний ве́чных изба́вльшеся, сподо́бимся в ра́дости святы́х, вку́пе с тобо́ю пе́ти ве́чно Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Ангелонра́вное житие́ возлюби́в, о́тче Лео́нтие, в оби́тель Ки́ево-Пече́рскую прише́л еси́, и от преподо́бных оте́ц Анто́ниа и Феодо́сиа во и́ночество прия́в постриже́ние, свя́то и богоуго́дно пожи́л еси́, подвиза́яся в посте́, бде́нии и моли́твах непреста́нных. Те́мже слы́шиши от на́с благохвале́ния такова́я:

Ра́дуйся, земны́й а́нгеле, во пло́ти небе́сно пожи́вый; ра́дуйся, небе́сный челове́че, о го́рних вы́ну помышля́вый.

Ра́дуйся, во мра́це пеще́рнем све́т боговиде́ния сниска́вый; ра́дуйся, по́двиги вели́кими пло́ть твою́ обузда́вый.

Ра́дуйся, смире́нием высо́кая стяжа́вый; ра́дуйся, терпе́нием вся́ искуше́ния диа́вольския победи́вый.

Ра́дуйся, посто́м ду́шу твою́ просвети́вый; ра́дуйся, моли́твами непреста́нными се́рдце твое́ освяти́вый.

Ра́дуйся, сосу́де избра́нный Бо́жия благода́ти; ра́дуйся, селе́ние непоро́чное Ду́ха Свята́го.

Ра́дуйся, свети́льниче, сия́яй да́ры боже́ственными; ра́дуйся, луче́ пресве́тлаго Со́лнца Пра́вды Христа́.

Ра́дуйся, Лео́нтие, Росто́вский чудотво́рче.

Конда́к 1.

Избра́нный чудотво́рче и изря́дный уго́дниче Христо́в, Росто́ва просвети́телю, и усе́рдный о душа́х на́ших моли́твенниче, святи́телю о́тче Лео́нтие! Восхваля́ем тя́ с любо́вию, засту́пника на́шего: ты́ же, я́ко име́яй дерзнове́ние ко Го́споду, моли́ся вы́ну о спасе́нии на́с гре́шных и от вся́ких бе́д избавля́й зову́щих ти́:

Ра́дуйся, Лео́нтие, Росто́вский чудотво́рче.

Моли́тва.

О свяще́нная главо́, пресла́вный чудотво́рче, первопа́стырю святы́я Росто́вския Це́ркве, святи́телю о́тче на́ш Лео́нтие! К тебе́ припа́даем и мо́лимся мы́ смире́ннии и гре́шнии, и я́ко отца́ чадолюби́ваго про́сим: всели́ в сердца́ на́ша любо́вь твою́, е́юже к Бо́гу и бли́жним твои́м, при жи́зни твое́й преиспо́лнен бы́л еси́, я́ко и ду́шу твою́ за па́ству твою́ положи́л еси́, му́ченически пострада́в от идолослужи́телей. Научи́ на́с, о́тче, тебе́ подража́ти ве́рно, Бо́га и бли́жних на́ших люби́ти и́скренно, и за́поведи Госпо́дни соверша́ти непогреши́тельно: да бу́дем и мы́ ча́да твоя́, не по и́мени то́кмо, но са́мым де́лом и все́м житие́м на́шим. Моли́ся, уго́дниче Бо́жий, ко Христу́ Бо́гу о святе́й правосла́вней Це́ркви и Держа́ве Росси́йстей: да пребу́дут в ми́ре и благостоя́нии, и процвета́ют в благоче́стии христиа́нстем непоколеби́мы. Влады́ку все́х умоли́: стра́ждущую страну́ Росси́йскую от лю́тых безбо́жник и вла́сти и́х да свободи́т, и да возста́вит престо́л правосла́вных прави́телей; ве́рных рабо́в Его́, в ско́рби и печа́ли де́нь и но́щь вопию́щих к Нему́, многоболе́зненных во́пль да услы́шит и да изведе́т от поги́бели живо́т на́ш. Соблюди́ гра́д тво́й Росто́в, и вся́ гра́ды и ве́си страны́ Росси́йския невреди́мы от вся́каго зла́. При́зри благоутро́бно на вся́ку ду́шу христиа́нскую, ми́лости и по́мощи от тебе́ и́щущую: бу́ди все́м на́м в боле́знех цели́тель, в ско́рбех уте́шитель, в печа́лех изба́витель, в беда́х помо́щник, в ча́с сме́ртный покрови́тель; да при по́мощи моли́тв твои́х святы́х, сподо́бимся и мы́ гре́шнии спасе́ние ве́чное получи́ти и Ца́рствие Небе́сное унасле́довати. Е́й, святи́телю Христо́в! Не посрами́ упова́ния на́шего, е́же по Бо́зе и Пресвяте́й Богоро́дице на тя́ кре́пко возлага́ем, но яви́ на́м твое́ многомо́щное заступле́ние: да хва́лим, сла́вим и велича́ем вели́кое человеколю́бие ди́внаго во святы́х свои́х Бо́га, Отца́, и Сы́на, и Свята́го Ду́ха, во ве́ки веко́в. Ами́нь.