Конда́к 1.

Взбра́нный воево́до во́инства Христо́ва, ли́ка святи́телей Моско́вских честно́е украше́ние, но́вых му́чеников Це́ркве Ру́сския зна́мя побе́дное, по́двиг тво́й первосвяти́тельский воспева́юще, со дерзнове́нием тебе́, испове́дниче, взыва́ем:

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

И́кос 1.

А́нгельским лико́м му́чеников дре́вних и но́вых сочета́вый Бо́г тя́, святи́телю Ти́хоне, а́нгела Це́ркве Ру́сския жре́бием указу́ет и равностоя́теля лико́в му́ченических предызбира́ет, те́мже благода́рно воспева́ем ти́ такова́я:

Ра́дуйся, пра́вду провозгласи́вый; ра́дуйся, ве́ру в сердца́х утверди́вый.

Ра́дуйся, все́м простото́ю возсия́вый; ра́дуйся, пра́вду Бо́жию все́м показа́вый.

Ра́дуйся, зло́бы и льсти́ победи́телю; ра́дуйся, па́ствы духо́вныя храни́телю.

Ра́дуйся, любо́вию наде́жду ражда́яй; ра́дуйся, кро́тостию вражду́ побежда́яй.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 2.

Ви́дя, святе́йший о́тче, Росси́ю во мра́це греха́, ре́кл еси́ му́жественне: Иезеки́илев гла́с «рыда́ние и жа́лость и го́ре» во избра́нии Бо́жии мне́ явля́ется, но вседне́вное за Це́рковь умира́ние прие́мля, Бо́гу помога́ющу, вопию́: Аллилу́иа.

И́кос 2.

Ра́зум Христо́в стяжа́вый, ре́кл еси́, святи́телю, Богоро́дицу велича́я: пред Влади́мирским о́бразом Твои́м во́ля Бо́жия о жре́бии мое́м открыва́ется. Те́мже таково́му о тебе́ попече́нию Бо́жия Ма́тере дивя́щеся, лю́дие усе́рдно тебе́ воспева́ют:

Ра́дуйся, в де́нь Успе́ния Богома́тере труды́ Собо́ра Всеросси́йскаго нача́вый; ра́дуйся, пред ико́ною Влади́мирскою жре́бием Бо́жиим ука́занный.

Ра́дуйся, к Де́ве Чи́стей моли́твенниче смире́нный; ра́дуйся, Цари́цы Небе́сныя ча́до богоизбра́нное.

Ра́дуйся, ико́ны Держа́вныя почита́телю; ра́дуйся, ца́рственным страстоте́рпцем сострада́телю.

Ра́дуйся, святы́х апо́стол прее́мниче; ра́дуйся, но́вых му́чеников Росси́йских вдохнови́телю.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 3.

Си́лою Госпо́днею в дре́внем и сла́внем собо́ре Успе́ния Богома́тере на престо́л патриа́рший возведе́н бы́л еси́, пресла́вне Ти́хоне, главо́ю Це́ркве Ру́сския поставля́емь, да среди́ сму́ты, в годи́ну гне́ва Бо́жия, све́т наде́жды возсия́ет па́стве твое́й, пою́щей: Аллилу́иа.

И́кос 3.

Име́я послуша́ние во́ли Бо́жией, подъя́л еси́ кре́ст патриа́ршества, и с ре́вностию окормля́ше па́ству церко́вную, сего́ ра́ди слы́шиши, я́ко архипа́стыри, собра́тия твои́, свяще́нницы, мона́си и мирсти́и вопию́т ти́:

Ра́дуйся, роди́тели благочести́выми Васи́лию Вели́кому посвяще́нный; ра́дуйся, и́менем смире́ннаго Ти́хона Задо́нскаго в мона́шестве нарече́нный.

Ра́дуйся, святи́телем дре́вним подо́бный; ра́дуйся, ко святи́телем Моско́вским досто́йно причте́нный.

Ра́дуйся, престо́ла святы́х Петра́, Алекси́я и Ио́ны насле́дниче; ра́дуйся, священнострада́льцев Фили́ппа, И́ова и Ермоге́на прее́мниче.

Ра́дуйся, красото́ю духо́вною просия́вый; ра́дуйся, си́лы благода́тныя испо́лненный.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 4.

Бу́рю гоне́ний предве́дый Госпо́дь, се́рдце твое́ возжже́ огне́м любве́ Боже́ственныя, да бу́деши в де́нь лю́т лю́дем путево́ждь, Моисе́ю подо́бен, я́ко изде́тска роди́тели твои́ми иере́ем Иоа́нном и А́нною науче́нный благода́рно пе́ти Бо́гу: Аллилу́иа.

И́кос 4.

Слы́шавше вси́ концы́ земли́ Ру́сския на престо́л патриа́рший восхожде́ние твое́, Тро́ицу Святу́ю просла́виша; мы́ же, труды́ твоя́ на ни́ве церко́вней помина́юще, за Христа́ подъя́тыя, благода́рне возглаша́ем тебе́ си́це:

Ра́дуйся, в Хо́лме па́стырей воспита́телю; ра́дуйся, в Лю́блине и́стины пропове́дниче.

Ра́дуйся, Аме́рики апо́столе и просвети́телю; ра́дуйся, во стране́ чужде́й оби́тели Ти́хоновския основа́телю.

Ра́дуйся, в Ви́ленском кра́и и на Бе́лой Руси́ Правосла́вие утверди́вый; ра́дуйся, на по́ли бра́ни во́ины росси́йския ободри́вый.

Ра́дуйся, во дни́ сму́тныя окормля́ти люде́й твои́х не отреки́йся; ра́дуйся, ве́рою пла́менною противуста́ти и́гу безбо́жному не устраши́выйся.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 5.

Боготе́чную звезду́ яви́ тя Госпо́дь, ве́рным пу́ть указу́ющую, егда́ повсю́ду не́нависть, татьба́ и уби́йства умно́жишася, ты́ же, беззако́ние облича́я, Победи́телю сме́рти Христу́ воспева́л еси́: Аллилу́иа.

И́кос 5.

Ви́дяще тя́ свети́льника, во Святе́й Руси́ возсия́вша, не устраши́шася ве́рнии безбо́жных гоне́ний, егда́ дре́вния святы́ни росси́йския разоре́ны бе́ша и слу́х пе́рвых новому́чеников в бра́тию изы́де, и вси́, иму́щии тя́ свята́го засту́пника и вождя́, воспе́ша тебе́ си́це:

Ра́дуйся, ве́рныя лю́ди на пу́ть испове́дный призва́вый; ра́дуйся, пострада́ти до кро́ве за ве́ру правосла́вную благослови́вый.

Ра́дуйся, му́ченически сконча́вшихся собо́рне просла́вивый; ра́дуйся, о цари́ убие́ннем моли́тву безбоя́зненно сотвори́вый.

Ра́дуйся, первому́ченику Иоа́нну Царскосе́льскому духо́вно спострада́вый; ра́дуйся, святи́теля первострада́льна Влади́мира Ки́евскаго опла́кавый.

Ра́дуйся, Петра́, Петрогра́дския ла́вры защи́тника, чти́ти призва́вый; ра́дуйся, подража́ти му́чеником но́вым, и́же по все́й Руси́, возжела́вый.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 6.

Пропове́дники богоно́сныя Креста́ Христо́ва, до кро́ве пострада́вшия, я́ко му́ченики возвели́чил еси́: царя́ вку́пе с его́ сострада́льцы, богому́друю Елисаве́ту, архипа́стыри Андрони́ка, Гермоге́на и ины́х, ка́зни лю́тыя претерпе́вшия, с ни́миже мно́гих свяще́нников, мона́хов и бельце́в по́двиг воспе́л еси́, взыва́я Бо́гу: Аллилу́иа.

И́кос 6.

Возсия́в в нощи́ гоне́ний я́ко свети́льник и́стины, разгоня́яй серде́ц помраче́ние, увещава́л еси́ безбо́жия бе́гати, я́ко огня́ гее́нскаго, бра́ту же на бра́та не востава́ти, хра́мы защища́ти и ве́ру храни́ти, те́мже ве́рнии, и ны́не сло́во твое́ соблюда́ющии, воспева́ют тя́ си́це:

Ра́дуйся, Та́ин Христо́вых служи́телю и́стовый; ра́дуйся, наро́да Бо́жия утеше́ние те́плое.

Ра́дуйся, проти́ву междоусо́бныя бра́ни вооружи́выйся моли́твою усе́рдною; ра́дуйся, зло́бе бесо́встей противуста́вый любо́вию Христо́вою.

Ра́дуйся, благода́ть стяжа́вый смире́нием и́стинным; ра́дуйся, стра́ждущия исцели́вый любо́вию оте́ческою.

Ра́дуйся, святы́нь поруга́ние дерзнове́нно облича́вый; ра́дуйся, уго́дников мо́щи сло́вом защища́вый.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 7.

Хотя́ огради́ти мо́щи святы́х от поруга́ния вла́сти безбо́жныя, воста́л еси́ на защи́ту святы́нь, поревнова́в, да не пога́снет в ла́вре Тро́ицкой лампа́да у моще́й игу́мена земли́ Ру́сския. Те́мже а́ще и мра́к на вре́мя огусте́, ве́рнии лю́дие лобыза́ху мо́щи, на позо́рище поставля́емыя, воспева́юще Бо́гови: Аллилу́иа.

И́кос 7.

Но́вое дея́ние беззако́нное к беззако́нию прилага́юще, вла́сти безбо́жныя тебе́ на подво́рии Тро́ицком затвори́ша, суди́ще же тебе́ уготовля́юще, свиде́теля на собра́тий тя́ сотвори́ти мня́ху, но во дни́ Рождества́ Своего́ па́ки Христо́с к лю́дем Свои́м тя́ возврати́, науча́я воспева́ти тебе́ си́це:

Ра́дуйся, во́ли Бо́жией себе́ и па́ству свою́ вручи́вый; ра́дуйся, со́весть чи́сту во искуше́ниих мно́гих сохрани́вый.

Ра́дуйся, я́ко со́лнце среди́ ту́ч, на Руси́ возсия́вый; ра́дуйся, зло́бу вра́жию любо́вию побежда́вый.

Ра́дуйся, корабля́ церко́внаго до́брый ко́рмчий; ра́дуйся, оби́телей и́ноческих ве́рный защи́тниче.

Ра́дуйся, науча́яй люби́ти по́двиг во и́мя Христо́во; ра́дуйся, укрепи́вый ю́зники, стра́ждущия во сла́ву Бо́жию.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 8.

Стра́нно гони́телем ве́ры тща́ние о обновле́нии жи́зни церко́вныя, но ти́и хи́тростию бесо́вскою рука́ми лжеобнови́телей раско́л устроя́ют, суды́ и гоне́ния на тя́ воздвиза́юще во дни́ гла́да лю́таго. Ты́ же, ми́р ве́сь на по́мощь стра́ждущим призыва́я, сосу́ды святы́я возбрани́л еси́ гони́телем отда́ти, те́мже и в темни́цу заключе́н бы́в, взыва́л еси́ Бо́гу: Аллилу́иа.

И́кос 8.

Ве́сь бе́ в ско́рбех сме́ртных за Це́рковь Христо́ву, за судьбы́ бра́тий осужде́нных го́рько страда́л еси́, и́же лю́дем запове́даша послу́шными бы́ти гла́су Патриа́рха своего́. Те́мже узре́вше архипа́стыри и па́стыри своя́ я́ко новому́ченики и испове́дники святы́я, с ни́ми воспева́ем тебе́ си́це:

Ра́дуйся, сосу́де благода́ти Бо́жия; ра́дуйся, подража́телю терпе́ния Христо́ва.

Ра́дуйся, враго́м Креста́ гро́зное и́мя; ра́дуйся, огра́ды Це́ркве ве́рный храни́телю.

Ра́дуйся, стоя́ти за ве́ру ча́д церко́вных благослови́вый; ра́дуйся, пяточи́сленных новому́чеников Моско́вских в по́двизе укрепи́вый.

Ра́дуйся, святи́телю Вениами́ну, в Петрогра́де уму́ченному, сострада́вый; ра́дуйся, Се́ргия, Ю́рия и Иоа́нна, сподви́жников того́, похвали́вый.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 9.

Вся́кое тща́ние о благодаре́нии Бо́га на вся́к де́нь прилага́л еси́, егда́ врази́ заключи́ша тя́ во у́зы во оби́тель Донску́ю. Притека́ющии же ве́рнии ви́деша тя́, со сте́н и́х благословля́юща, со слеза́ми о тебе́ моли́твы возноша́ху, взыва́юще: Аллилу́иа.

И́кос 9.

Вети́и нечести́вии, на собо́р разбо́йничий собра́вшиися, вину́ тебе́ измышля́ющии, всу́е тружда́хуся, святи́телю Ти́хоне, и́бо моли́твами ве́рных в де́нь погребе́ния Алекси́я, блаже́ннаго ста́рца Моско́вскаго, от у́з изба́влен бы́сть и па́ки предста́л еси́ олтарю́ Госпо́дню. Мы́ же, зря́ще о тебе́ такова́я быва́емая, вопие́м тебе́:

Ра́дуйся, оби́тель Богома́тере Донску́ю возлюби́вый; ра́дуйся, во у́зах ра́дость благода́тную сохрани́вый.

Ра́дуйся, от преда́телей лука́вых Це́рковь огради́вый; ра́дуйся, немощно́е и́х словопре́ние моли́твою расточи́вый.

Ра́дуйся, избра́вый во прее́мники корми́ла Це́ркве архипа́стыри досто́йныя; ра́дуйся, указа́вый лю́дем Кири́лла, Агафа́нгела и Петра́, святи́тели изря́дныя.

Ра́дуйся, Иларио́на, Фадде́я, Неофи́та и ины́х на му́ченичество вдохнови́вый; ра́дуйся, жена́м, но́вым мироно́сицам Це́ркве Ру́сския, пу́ть указа́вый.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 10.

Спаса́я духо́вное ста́до твое́, собра́тий архипа́стырей и па́стырей, мона́хов и миря́н, от волко́в, губя́щих е́, са́м гото́в бы́л еси́ за ни́х поги́бнути и погуби́ти и́мя свое́, Патриа́рше Ти́хоне, оба́че непоколеби́мо соблюда́л еси́ чистоту́ Це́ркве Христо́вы и по́льзу ея́. Те́мже лю́дие твои́, несумне́нно ве́ровавшии сло́ву твоему́, воспева́ху Бо́гу: Аллилу́иа.

И́кос 10.

Стена́м темни́чным и рабо́там го́рьким мучи́телие вда́ша лю́ди безчи́сленныя по все́й Руси́, и правосла́вныя христиа́ны Ти́хоновы после́дователи нареко́ша, и глаго́лаша: что́ сотвори́м Ти́хону несокруши́мому? Ве́сь ми́р по не́м и́дет, и во ине́х страна́х лю́дие Патриа́рху состра́ждуще взыва́ют:

Ра́дуйся, сто́лпе вели́каго терпе́ния; ра́дуйся, презри́телю су́етныя сла́вы.

Ра́дуйся, я́ко обрати́л еси́ заблу́ждшия от прельще́ния; ра́дуйся, я́ко показа́л еси́ лю́дем пу́ть ко спасе́нию.

Ра́дуйся, ко́зни преда́телей упраздни́вый; ра́дуйся, испове́дники ве́ры воспита́вый.

Ра́дуйся, сокро́вище любве́ и оте́ческаго попече́ния; ра́дуйся, вмести́лище кро́тости и нело́жнаго смире́ния.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 11.

Пе́ния многоле́тная ве́рнии лю́дие тебе́ возглаша́ху, гони́телие же посыла́ху тебе́ уби́йцы кова́рныя, но ве́рный Иа́ков собо́ю тебе́ загради́ и жи́знь свою́ за тя́ положи́, о не́мже Це́рковь Ру́сская воспева́ет надгро́бную пе́снь: Аллилу́иа.

И́кос 11.

Светоприе́мную свещу́, Петра́ крепча́йшаго приугото́вив на по́двиг кре́стнаго за Це́рковь стоя́ния, в де́нь Благове́щения Де́вы Пречи́стыя преста́вился еси́ к све́ту невече́рнему, но́щь те́мную и до́лгую земли́ Ру́сской провозвеща́я, лю́дие же, уве́девше пра́ведную кончи́ну твою́ и во оби́тель Донску́ю прите́кше, со слеза́ми вопия́ху та́ко:

Ра́дуйся, в житии́ дерзнове́ние ве́лие к Бо́гу стяжа́вый; ра́дуйся, по упокое́нии сла́ву мно́гу от Него́ обреты́й.

Ра́дуйся, треволне́ния мяте́жная отложи́вый; ра́дуйся, ловле́ния лука́вых избежа́вый.

Ра́дуйся, я́ко исполня́еши все́х умиле́ния духо́внаго; ра́дуйся, я́ко источа́еши на́м благода́ть Боже́ственную.

Ра́дуйся, сокро́вище, испо́лнь дарова́ний Небе́сных; ра́дуйся, со́лнце, возвеща́ющее побе́ду Христо́ву.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 12.

Благода́ть Бо́жия и ны́не излива́ется на зе́млю Ру́сскую моли́твами твои́ми, о́тче Ти́хоне, свобожда́ющи ве́рныя от плене́ния де́монскаго и рабо́ты духово́м нечи́стым, ника́я бо вла́сть на земли́ возмо́же связа́ти сло́во святи́теля, его́же во святы́х ра́достно сла́вим, восклица́юще: Аллилу́иа.

И́кос 12.

Пою́ще твое́ избра́ние и и́стовое служе́ние, земно́е упокое́ние, и честны́х моще́й чуде́сное обре́тение чрез ма́лаго хра́ма Донски́я оби́тели о́гненное запале́ние, ликовству́ем в ли́це святы́х твое́ прославле́ние и, чудеса́ мно́га помина́юще, си́це возглаша́ем:

Ра́дуйся, добропобе́дный новому́чениче и испове́дниче; ра́дуйся, моле́ний на́ших ско́рый услы́шателю.

Ра́дуйся, чудесы́ ми́лости Христо́вы все́м подава́яй; ра́дуйся, нетле́нием телесе́ Воскресе́ние пропове́давый.

Ра́дуйся, я́ко роди́тели до́брому воспита́нию ча́д Бо́жиих науча́еши; ра́дуйся, я́ко архипа́стырем и па́стырем о́браз попече́ния о Це́ркви Христо́вой явля́еши.

Ра́дуйся, уча́щим и наста́вником мы́сль благу́ю в се́рдце влага́яй; ра́дуйся, уча́щимся пу́ть служе́ния Бо́гу указу́яй.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 13.

О святы́й Патриа́рше на́ш Ти́хоне, ве́рный святи́телю Христо́в, о́бразе кро́тости и смире́ния, Це́ркве чистоту́ и едине́ние сохрани́вый! Помози́ и ны́не правосла́вным лю́дем в ве́ре и́стинней устоя́ти, да оте́ческою твое́ю любо́вию согрева́еми, Бо́гу порабо́таем нело́жно и Ца́рствия Небе́снаго сподо́бимся, пою́ще: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельским лико́м му́чеников дре́вних и но́вых сочета́вый Бо́г тя́, святи́телю Ти́хоне, а́нгела Це́ркве Ру́сския жре́бием указу́ет и равностоя́теля лико́в му́ченических предызбира́ет, те́мже благода́рно воспева́ем ти́ такова́я:

Ра́дуйся, пра́вду провозгласи́вый; ра́дуйся, ве́ру в сердца́х утверди́вый.

Ра́дуйся, все́м простото́ю возсия́вый; ра́дуйся, пра́вду Бо́жию все́м показа́вый.

Ра́дуйся, зло́бы и льсти́ победи́телю; ра́дуйся, па́ствы духо́вныя храни́телю.

Ра́дуйся, любо́вию наде́жду ражда́яй; ра́дуйся, кро́тостию вражду́ побежда́яй.

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Конда́к 1.

Взбра́нный воево́до во́инства Христо́ва, ли́ка святи́телей Моско́вских честно́е украше́ние, но́вых му́чеников Це́ркве Ру́сския зна́мя побе́дное, по́двиг тво́й первосвяти́тельский воспева́юще, со дерзнове́нием тебе́, испове́дниче, взыва́ем:

Ра́дуйся, святи́телю о́тче на́ш Ти́хоне, Бо́гом избра́нный Патриа́рше.

Моли́тва пе́рвая.

О свяще́нная главо́, святи́телю о́тче на́ш Ти́хоне, избра́нниче и испове́дниче Христо́в, кро́тостию сниска́вый духо́вный пло́д ми́ра и ра́дости о Ду́се Свя́те, Цари́цы Небе́сныя возлю́бленный служи́телю, па́стырю ди́вный, любо́вию озари́вый ду́ши и сердца́ слове́снаго ста́да Христо́ва! Со умиле́нием прекло́ньше коле́на и припа́дающе ко святе́й ико́не твое́й [или́: к ра́це моще́й твои́х], мо́лим тя́: принеси́ моли́тву на́шу ко вся́ содержа́щему и спаса́ющему Человеколю́бцу Го́споду, Ему́же ны́не с ли́ки А́нгелов и со все́ми святы́ми предстои́ши, да утверди́т во Святе́й Свое́й Правосла́вней Це́ркви живы́й ду́х пра́выя ве́ры и благоче́стия, па́стырем же ея́ да да́ст святу́ю ре́вность о спасе́нии вве́ренных и́м люде́й. Умоли́ Го́спода сла́вы, да укрепи́т, умудри́т и сохрани́т наро́ды на́ша от зла́го наси́лия, обстоя́ний и обма́на. Поста́вленным для управле́ния и суда́ низпо́слет усе́рдие, му́дрость и нелицеприя́тие, да та́ко поживе́м ти́хое и безмо́лвное житие́. О святи́телю Ти́хоне, ве́руем, я́ко ты́, на Небесе́х живы́й, лю́биши ны́ то́ю же любо́вию, е́юже вся́ бли́жния твоя́ возлюби́л еси́, внегда́ пребыва́ти тебе́ на земли́. Испроси́ у Всеми́лостиваго Го́спода все́м на́м пода́ти да́р коему́ждо благопотре́бен и вся́, я́же к животу́ вре́менному и ве́чному поле́зная: ми́ру умире́ние, градо́м утвержде́ние, земли́ плодоно́сие, от гла́да и па́губы избавле́ние, от наше́ствия иноплеме́нных сохране́ние; скорбя́щим утеше́ние, неду́гующим исцеле́ние, па́дшим воста́ние, заблужда́ющим на пу́ть и́стины возвраще́ние, подвиза́ющимся в де́лех благи́х укрепле́ние, благоде́лающим преспе́яние; роди́телем благослове́ние, ча́дом в стра́се Госпо́днем воспита́ние и науче́ние, наста́вником ве́дение и благоче́стие, неве́дущим вразумле́ние; си́рым, неиму́щим и убо́гим по́мощь и заступле́ние; отходя́щим от сего́ вре́меннаго жития́ к ве́чному благо́е уготовле́ние и напу́тствование, отше́дшим блаже́нное упокое́ние. О свя́тче Ти́хоне, не оста́ви на́с твои́ми моли́твами. Да́руй на́м спаси́тельно пожи́ти в ве́це се́м и просла́вити великоле́пое и́мя Отца́, и Сы́на, и Свята́го Ду́ха, во ве́ки веко́в. Ами́нь.

Моли́тва втора́я.

О па́стырю до́брый, святи́телю о́тче на́ш Ти́хоне, Патриа́рше Це́ркве Ру́сския! Ты́ мно́гия труды́ в жи́зни вре́менней подъя́л еси́. Простота́ и любы́ твоя́, ду́х ми́рен и кро́ток, та́кожде и сло́во, благода́ти испо́лненное, по се́рдцу бы́ша лю́дем земли́ на́шея, и́же и предложи́ша тя́ Бо́гу на по́двиг вели́кий и многотру́дный. Егда́ же богобо́рцы и хули́телие воздвиго́ша на Це́рковь Христо́ву гоне́ние, ему́же не бе́ ра́внаго от ве́ка, Са́м Госпо́дь Вседержи́тель избра́ и соде́ла тя́ Патриа́рха. Ты́ же, святи́телю, сраспина́яся Христу́ и Це́ркви Его́, со ско́рбию лю́ди к покая́нию призыва́л еси́. И кто́ изочте́т страда́ния твоя́? Заточе́ние бо темни́чное, клеветы́ и суды́ гони́телей со смире́нием претерпева́я, враго́м Христо́вым моли́твою сле́зною и кро́ткою противуста́л еси́, и архиере́и, пресви́теры, мона́хи и мирски́я на по́двиг му́ченический благослови́л еси́. Те́мже мо́лим тя́, святи́телю Христо́в, бу́ди на́м дерзнове́нный засту́пник и не оста́ви ны́, немощна́я ча́да твоя́. Испроси́ у Го́спода на́м грехо́в проще́ние, ве́ры утвержде́ние, скорбе́й осла́бу, по́мыслов чистоту́, да в покая́нии и моли́тве пребыва́юще, украси́м себе́ целому́дрием, любо́вию и смире́нием, и та́ко Ца́рствия Небе́снаго дости́гнем, иде́же с тобо́ю сподо́бимся прославля́ти Святу́ю Тро́ицу, Отца́, и Сы́на, и Свята́го Ду́ха. Ами́нь.