Конда́к 1.

Избра́нный уго́дниче Христо́в, святи́телю о́тче Зино́вие, па́стырским служе́нием свои́м мно́гия лю́ди к ве́ре Христо́вей приведы́й, я́ко име́яй ве́лие дерзнове́ние ко Го́споду, моли́ о на́с, любо́вию зову́щих ти́:

Ра́дуйся, святи́телю о́тче Зино́вие, ди́вный моли́твенниче о душа́х на́ших.

И́кос 1.

А́нгела Бо́жия предста́тельство прие́мый, я́ко от млады́х ле́т, блаже́нне Зино́вие, сиро́тство испыта́л еси́, но земна́го роди́теля лиши́выйся, обре́л еси́ предве́чнаго Небе́снаго Отца́, сего́ ра́ди тебе́, избра́нниче Бо́жий, вопие́м си́це:

Ра́дуйся, благолюби́вое устрое́ние души́ име́вый; ра́дуйся, проро́чество Бо́жие от све́рстник в де́тстве о себе́ услы́шавый.

Ра́дуйся, я́ко о́троцы проро́чество Бо́жие о тебе́ изреко́ша; ра́дуйся, я́ко све́рстницы мона́ха тя́ в ю́ности нареко́ша.

Ра́дуйся, во оби́тели Рождества́ Богоро́дицы водвори́выйся; ра́дуйся, та́мо вся́кому рукоде́лию обучи́выйся.

Ра́дуйся, от ю́ности Го́спода Христа́ возлюби́вый; ра́дуйся, ду́ши бра́тий от го́рести свобожда́вый.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 2.

Ви́дя Всеве́дущий Госпо́дь души́ твоея́ чистоту́, напра́ви жела́ние твое́ ко взыска́нию равноа́нгельнаго жития́. Ты́ же и́ноческий о́браз прия́в, и мно́гими искуше́ньми испы́тан бы́в, навы́кл еси́ непреста́нно взыва́ти к Бо́гу: Аллилу́иа.

И́кос 2.

Ра́зум неразуме́нный жития́ вышеесте́ственнаго от ю́ности уразуме́в, а́нгельский о́браз пла́менно поне́сл еси́, блаже́нне, смире́нием высоту́ дости́гнувый и в по́двизех послуша́ние соблюды́й, сего́ ра́ди вопие́м ти́ си́це:

Ра́дуйся, от мла́да во́зраста Це́ркви рабо́тати приступи́вый; ра́дуйся, во мно́гих испыта́ниих ду́шу свою́ укрепи́вый.

Ра́дуйся, от ю́ности покро́вом Богоро́дицы храни́мый; ра́дуйся, а́нгелом подража́тель на земли́ яви́выйся.

Ра́дуйся, призва́ние Бо́жие по́двигом свои́м оправда́вый; ра́дуйся, смире́нием свою́ жи́знь освяти́вый.

Ра́дуйся, наста́вником свои́м послуша́ние ве́лие име́вый; ра́дуйся, све́тлостию своего́ жития́ пу́ть на Небеса́ освети́вый.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 3.

Си́ле, свы́ше да́нней му́дрым наста́вником, измла́да вве́рил еси́ себе́, преподо́бне о́тче, и положи́л еси́ в се́рдце свое́м зако́н непрело́жный вопроша́ти о все́м ста́рца, и бы́сть сло́во его́ тебе́, я́ко сло́во Сама́го Бо́га, Ему́же воспева́ем при́сно: Аллилу́иа.

И́кос 3.

Име́я жела́ние рабо́тати Го́сподеви, угото́вал еси́ ду́шу твою́ во искуше́ния; те́мже егда́ вра́г ополча́ше нача́льствующия на тя́, ты́, святи́телю, во смире́нии слеза́ми мно́гими се́рдце облива́л еси́, не престава́я проси́ти у Бо́га ми́лости. Мы́ же вопие́м ти́ си́це:

Ра́дуйся, смире́ние в основа́ние по́двига положи́вый; ра́дуйся, незло́бием льсти́выя уста́ загради́вый.

Ра́дуйся, суро́вости наста́вничей не устраши́выйся; ра́дуйся, побие́ния тро́стию от ста́рца не убоя́выйся.

Ра́дуйся, у наста́вника Гера́сима в послуша́нии пребы́вый; ра́дуйся, из при́тчи юро́диваго о высо́цем призва́нии услы́шавый.

Ра́дуйся, в де́нь Благове́щения Де́вы Мари́и мона́шеское постриже́ние прия́вый; ра́дуйся, мно́гими страда́нии а́ки венцы́ украше́нный.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 4.

Бу́ря возмути́ся помышле́ний сумни́тельных во все́х лю́дех, егда́ татьбо́ю и разбо́ем ми́р озло́бися. Бра́т на бра́та восста́, ты́ же, без стра́ха исполня́я вся́кое послуша́ние, не престава́л еси́ упова́ти на Пречи́стую Ма́терь и взыва́ти ко Го́споду: Аллилу́иа.

И́кос 4.

Услы́ша игу́мен Некта́рий о твое́м смире́нии, богому́дре Зино́вие, и призва́в тя́, повеле́ совлещи́ с тя́ а́нгельския оде́жды, и власы́ твои́ острищи́. Ты́ же, о́тче, поко́рно во оде́жду мирску́ю обле́клся еси́, отсе́к во́лю свою́ и ничесо́же вопроша́я. Мы́ же, дивя́ся сему́, вопие́м ти́ си́це:

Ра́дуйся, а́гнче, пред стригу́щими безгла́сный; ра́дуйся, у́ст свои́х в противоре́чия не отве́рзый.

Ра́дуйся, архиере́я от и́щущих взя́ти живо́т его́ свободи́вый; ра́дуйся, от него́ о гряду́щем епи́скопстве услы́шавый.

Ра́дуйся, чи́стою муко́ю оби́тель снабдева́вый; ра́дуйся, чи́стую любо́вь ко все́м явля́вый.

Ра́дуйся, святи́телю, во Иве́рии са́ном епи́скопским венча́нный; ра́дуйся, апо́столов прее́мниче во избра́ннем уде́ле Богоро́дицы.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 5.

Боготе́чная звезда́ яви́лся еси́ среди́ бу́ри беззако́ния и людска́го мяте́жа. Уви́дев бо Гли́нския оби́тели разоре́ние, исше́л еси́ отту́да, взе́м с собо́ю святы́й антими́нс, и не престава́л еси́ служи́ти Бо́гу, хра́мом име́я зе́млю, а покро́вом не́бо, вы́ну вопия́ ко Го́споду: Аллилу́иа.

И́кос 5.

Ви́дев ми́ра лю́тую не́нависть, среди́ гоне́ний стезе́ю мона́шескою те́кл еси́, и ски́т в гора́х Абха́зии та́йно устро́ив, в не́м насе́льником духо́вный наста́вник яви́лся еси́. По разоре́нии же и сия́ ма́лыя пу́стыни скита́ния и беды́ прия́в, не утра́тил еси́ све́тлыя наде́жды на ми́лость Бо́жию, те́мже и мы́ вопие́м ти́ си́це:

Ра́дуйся, иере́йское служе́ние в годи́ну гоне́ний прия́вый; ра́дуйся, в скита́ниих Бо́гу и лю́дем служи́ти не преста́вый.

Ра́дуйся, де́лы свои́ми за́поведи Бо́жии исполня́ти научи́вый; ра́дуйся, святи́телю Никола́ю весьма́ подража́вый.

Ра́дуйся, лю́таго зве́ря моли́твою укроти́вый; ра́дуйся, на медве́жием ло́же обнощева́вый.

Ра́дуйся, иску́снаго охо́тника си́м удиви́вый; ра́дуйся, я́вно по́мощь святи́теля Никола́я прия́вый.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 6.

Пропове́дник и́стинныя ве́ры Христо́вы, заточе́ние темни́чное ты́ претерпе́л еси́, еди́но обвине́ние имы́й, я́ко но́сиши одея́ние иере́я Бо́жия. Облече́н же в пра́вду и дерзнове́ние, при́сно гото́в бы́л еси́ за Христа́ и до сме́рти пострада́ти, с ве́рою вопия́ Ему́: Аллилу́иа.

И́кос 6.

Воссия́л еси́ я́ко свети́льник для соу́зник твои́х, преподо́бне, со смире́нием в темни́це пребыва́я. Кре́ст сво́й на ра́мо взе́м, поне́сл еси́ вку́пе с ре́кшими: се́ мы́ оста́вихом вся́ и всле́д Христу́ идо́хом. Сего́ ра́ди почита́ем святы́я страда́ния твоя́ и усе́рдно вопие́м ти́:

Ра́дуйся, среди́ гоне́ний небоя́зненно пропове́давый; ра́дуйся, поноше́ние за ве́ру и благоче́стие прия́вый.

Ра́дуйся, темни́цу и у́зы за Христа́ претерпе́вый; ра́дуйся, незло́бием и смире́нием мучи́телей свои́х посрами́вый.

Ра́дуйся, любо́вию нелицеме́рною ве́ру Правосла́вную утверди́вый; ра́дуйся, кро́тостию свое́ю сердца́ стра́жей умягчи́вый.

Ра́дуйся, в пра́здники из темни́цы на е́зеро моли́тися ходи́вый; ра́дуйся, бла́гостию свое́ю су́щих в темни́це ко Го́споду обрати́вый.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 7.

Хотя́ соу́зник свои́х от жа́жды изба́вити, с любо́вию потруди́лся еси́, и сквозе́ ма́лое око́нце лжи́цею во́ду дожде́вную уловля́я, всю́ бра́тию напои́л еси́. Та́ко в стесне́нии служе́ние иере́йское соверша́я, духо́вную жа́жду стра́ждущих утоля́ше, непреста́нно к Бо́гу и Творцу́ вся́ческих взыва́я: Аллилу́иа.

И́кос 7.

Но́ваго тя́ испове́дника ве́мы, о́тче святы́й Зино́вие, испо́лнена любве́ Христо́вы, спасе́ние бо ве́чное соу́зникам свои́м устроя́яй, мно́гия тя́жкия труды́ и ско́рби претерпе́л еси́. Оба́че не́мощи теле́сныя си́лою ду́ха превозмога́яй, вся́ принима́л еси́, я́ко от руки́ Бо́жия. Те́мже и мы́, сострада́я муче́ниям твои́м, вопие́м си́це:

Ра́дуйся, па́стырю до́брый, пу́ть к Небеси́ указа́вый; ра́дуйся, в ве́ре Правосла́вней пасо́мыя своя́ наста́вивый.

Ра́дуйся, от Бо́га просвеще́нный и умудре́нный; ра́дуйся, по па́мяти мно́гия слу́жбы соверша́вый.

Ра́дуйся, муче́ния лю́тым хла́дом претерпе́вый; ра́дуйся, теплото́ю духо́вною все́х в студе́ном бара́це согре́вый.

Ра́дуйся, среди́ сне́га обреты́й жи́ву гро́здь виногра́дную; ра́дуйся, чу́дный пло́де Лозы́ Животво́рныя.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 8.

Стра́нное чу́до на тебе́ яви́ся в де́нь Успе́ния Пресвяты́я Влады́чицы на́шея Богоро́дицы: я́ко О́ная не удержа́на бы́сть во гро́бе земне́м, та́ко и ты́ от у́з темни́чных разреше́н бы́л еси́, вопия́ с благодаре́нием: воскресни́, Го́споди, в поко́й Тво́й, Ты́ и киво́т святы́ни Твоея́, Аллилу́иа.

И́кос 8.

Ве́сь бе́ все́м, богоно́се Зино́вие, упова́ние все́ на Бо́га возлага́я и на Засту́пницу ро́да христиа́нскаго, под Ея́ покро́вом и в Ея́ уде́ле, И́верстей земли́, служе́ние свое́ соверша́я. Егда́ земни́и вра́чеве ско́рую кончи́ну твою́ предреко́ша и в неиску́сстве свое́м пред лю́тым твои́м неду́гом отступи́ша, ко Пречи́стей пред чу́дною ико́ною Ея́ «Цели́тельницею» возне́сл еси́ те́плыя моли́твы, и явле́ния Пренепоро́чныя Цели́тельницы в ке́лии твое́й сподо́бился еси́. Мы́ же, зря́ще сицево́е зна́мение любви́ Ея́ и ра́дующися, вопие́м ти́ си́це:

Ра́дуйся, исцеле́ние от Ма́тере Бо́жия чу́дно прия́вый; ра́дуйся, ди́вную ико́ну Ея́ «Цели́тельница» при́сно почита́вый.

Ра́дуйся, Гли́нскую ико́ну Рождества́ Бо́жия Ма́тере в ке́лии храни́вый; ра́дуйся, Пречи́стую Де́ву чти́ти науча́вый.

Ра́дуйся, благослове́ние от Преблагослове́нныя прия́вый; ра́дуйся, си́лу чуде́сную благослове́нием преподава́вый.

Ра́дуйся, па́ству духо́вную во мно́жестве собра́вый; ра́дуйся, жезло́м кро́тости лю́ди Бо́жия пасы́й.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 9.

Вся́ доброде́тели твоя́ ве́дый и непоро́чное служе́ние твое́ прови́дя, патриа́рх грузи́нский Каллистра́т во архимандри́та тя́, о́тче Зино́вие, поста́ви и на высоту́ служе́ния церко́внаго возведе́. Ты́ же, послуша́ние исполня́яй, мно́жайшими труды́ воструди́лся еси́, при́сно взыва́я к Бо́гу: Аллилу́иа.

И́кос 9.

Вети́и многовеща́ннии пребыва́ют безгла́сны, ви́дя исполне́ние проро́чества о тебе́: Бо́жиим бо смотре́нием поста́влен бы́л еси́ на архиере́йское служе́ние, святи́телю о́тче Зино́вие, мы́ же гла́сы хвале́бными тя́ сла́вим:

Ра́дуйся, во архиере́йстем служе́ниии Бо́гу угоди́вый; ра́дуйся, любвеоби́льным се́рдцем мно́гия ско́рби людски́я вмести́вый.

Ра́дуйся, Гли́нския оби́тели све́т ми́ру яви́вый; ра́дуйся, послуша́нием на духо́вную высоту́ воспари́вый.

Ра́дуйся, разу́мнейших превосходи́вый богопросвеще́нною му́дростию; ра́дуйся, от Бо́га украше́нный да́ром прозорли́вости.

Ра́дуйся, по́стриг и́нока Илии́ соверша́я, патриа́ршее служе́ние его́ предсказа́вый; ра́дуйся, Александри́йскаго Патриа́рха от сме́рти чу́дно изба́вивый.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 10.

Спасти́ хотя́ ду́шу, бо́дренно храни́л еси́ обе́ты и́ноческия и те́плую любо́вь ко святе́й оби́тели по́стрига твоего́. Те́мже ра́дость бы́сть ве́лия, егда́ срето́шася три́ свети́льника в пу́стыни Гли́нстей: ты́, святи́телю Зино́вие, и ста́рцы преподо́бнии Андрони́к и Серафи́м, пою́ще вку́пе Бо́гу: Аллилу́иа.

И́кос 10.

Стена́ еси́ все́м, с ве́рою и любо́вию к тебе́ притека́ющим, богоно́се Зино́вие, ты́ бо вене́ц собо́ра ста́рцев гли́нских еси́. С ди́вным Серафи́мом и благосе́рдым Андрони́ком ча́шу ра́дости и го́ря ты́ испи́л еси́, сего́ ра́ди Бо́г наве́ки соедини́ сердца́ ва́ша боголюби́вая. Сего́ ра́ди воспева́ем ти́ си́це:

Ра́дуйся, Гли́нския пу́стыни сто́лп и утвержде́ние; ра́дуйся, гли́нских ста́рцев в рассе́янии су́щих едине́ние.

Ра́дуйся, любо́вию ве́лиею укрепля́яй во и́стине; ра́дуйся, носи́телю Боже́ственныя благода́ти.

Ра́дуйся, нестяжа́ние и нищету́ во́льно прие́мый; ра́дуйся, митрополи́те почте́нне, в те́сней ке́лии жи́вый.

Ра́дуйся, Серафи́м, а́нгел о́гненный, в схи́ме святе́й нарече́нный; ра́дуйся, по постриже́нии моли́тву умно́живый и по́ст усугу́бивый.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 11.

Пе́ние ко Пресвяте́й Тро́ице вы́ну возноси́вый, ди́вный наста́вниче, святи́телю о́тче Зино́вие, виде́ния мно́гих дете́й в ке́лии во утеше́ние пред исхо́дом свои́м сподо́бился еси́. Спасе́ние все́м ча́дом духо́вным устроя́я, ве́рою, наде́ждою и любо́вию учи́л еси́ прославля́ти в Тро́ице Еди́наго Бо́га и взыва́ти: Аллилу́иа.

И́кос 11.

Свети́льник светоза́рен, стра́нник и пришле́ц в ми́ре се́м бы́л еси́, святи́телю о́тче Зино́вие, от Бо́га о дне́ исхо́да своего́ извеще́нный и в моли́тве ду́шу Бо́гу преда́вый, сего́ ра́ди вку́пе со все́ю па́ствою твое́ю взыва́ем: не преста́й моли́тися о на́с, усе́рдно вопию́щих ти́:

Ра́дуйся, че́стию от ру́сских Патриа́рхов венча́нный; ра́дуйся, любо́вию грузи́нских Католико́сов согре́тый.

Ра́дуйся, Це́рквей Ру́сския и Грузи́нския едине́ние; ра́дуйся, душа́м ве́рных Боже́ственныя благода́ти исполне́ние.

Ра́дуйся, па́стырю до́брый, ду́шу свою́ за о́вцы полага́вый; ра́дуйся, до после́дних дне́й Бо́гу священноде́йствовавый.

Ра́дуйся, посто́м и моли́твой Го́споду послужи́вый; ра́дуйся, вене́ц пра́вды по кончи́не свое́й прия́вый.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 12.

Благода́ть ди́вную, почи́вшую на Небе́снем покрови́тели твое́м, священному́ченике Зино́вии Еге́йском, ве́дел еси́, сего́ ра́ди и подража́л еси́ тому́: я́ко то́й ще́дро ми́ловаше, та́кожде и ты́ ми́лостыню неоскудева́ему и утеше́ние неистоща́емо до после́дних дне́й твои́х пасо́мым подава́л еси́. Ны́не же от Бо́га да́нную ти́ благода́ть все́м раздае́ши, посему́ приле́жно мо́лим ти́ ся́: не забу́ди и на́с, зову́щих Бо́гу: Аллилу́иа.

И́кос 12

Пою́ще вели́чие чуде́с твои́х, воспева́ем твое́ богоуго́дное житие́, святи́телю о́тче Зино́вие, но́ваго засту́пника на Небеси́ обре́тше, велича́ем любви́ твоея́ преизоби́лие: ско́рое бо в ско́рбех душе́вных врачева́ние от тебе́ прие́млем. Сего́ ра́ди не престае́м взыва́ти к тебе́, на неусы́пныя моли́твы твоя́ наде́ющися:

Ра́дуйся, от ю́ности все́м се́рдцем Христа́ возлюби́вый; ра́дуйся, любве́ Его́ ра́ди мно́гия ско́рби претерпе́вый.

Ра́дуйся, пастыренача́льниче смире́нный; ра́дуйся, во вла́сти архие́рейстей Го́споду слуга́ послушли́вый.

Ра́дуйся, да́ра ста́рчества кро́ткий сонасле́дниче; ра́дуйся, до́брых па́стырей му́дрый воспита́телю;

Ра́дуйся, ми́лостивый да́телю, мно́гия оби́тели та́йно украси́вый; ра́дуйся, в Собо́ре преподо́бных отце́в Гли́нских просла́вленный.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 13

О пресла́вный и преподо́бный уго́дниче Бо́жий, ди́вный па́стырю на́ш, святи́телю о́тче Зино́вие! Приими́ сие́ от серде́ц на́ших приноси́мое тебе́ хвале́ние и твои́м чу́дным заступле́нием изба́ви на́с от вся́ких бе́д и напа́стей, стра́х Бо́жий всели́ в сердца́ на́ша, научи́ ны́ во все́м повинова́тися во́ли Бо́жией, да изба́вимся от ве́чныя сме́рти и бу́дущих му́к, и ку́пно с тобо́ю при́сно воспое́м Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгела Бо́жия предста́тельство прие́мый, я́ко от млады́х ле́т, блаже́нне Зино́вие, сиро́тство испыта́л еси́, но земна́го роди́теля лиши́выйся, обре́л еси́ предве́чнаго Небе́снаго Отца́, сего́ ра́ди тебе́, избра́нниче Бо́жий, вопие́м си́це:

Ра́дуйся, благолюби́вое устрое́ние души́ име́вый; ра́дуйся, проро́чество Бо́жие от све́рстник в де́тстве о себе́ услы́шавый.

Ра́дуйся, я́ко о́троцы проро́чество Бо́жие о тебе́ изреко́ша; ра́дуйся, я́ко све́рстницы мона́ха тя́ в ю́ности нареко́ша.

Ра́дуйся, во оби́тели Рождества́ Богоро́дицы водвори́выйся; ра́дуйся, та́мо вся́кому рукоде́лию обучи́выйся.

Ра́дуйся, от ю́ности Го́спода Христа́ возлюби́вый; ра́дуйся, ду́ши бра́тий от го́рести свобожда́вый.

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Конда́к 1.

Избра́нный уго́дниче Христо́в, святи́телю о́тче Зино́вие, па́стырским служе́нием свои́м мно́гия лю́ди к ве́ре Христо́вей приведы́й, я́ко име́яй ве́лие дерзнове́ние ко Го́споду, моли́ о на́с, любо́вию зову́щих ти́:

Ра́дуйся, святи́телю о́тче Зино́вие, ди́вный моли́твенниче о душа́х на́ших.

Моли́тва.

О вели́кий уго́дниче Бо́жий, пресла́вный па́стырю на́ш, святи́телю о́тче Зино́вие! При́зри ми́лостивно на предстоя́щих и моля́щих ти́ ся́: не престава́й на́м явля́ти любо́вь твою́ о́тчую, пред исхо́дом свои́м обеща́вый моли́тися о на́с. Ве́руем, я́ко ве́лию ми́лость и́маши у Го́спода и твои́м до́брым заступле́нием ми́лость Бо́жию на на́с, гре́шных, призыва́еши. Испо́лни вся́ проше́ния на́ша во бла́го, испроси́ упова́ние кре́пкое с ве́рою к тебе́ припа́дающим, наде́жду несумне́нную на тя́ наде́ющимся, любо́вь нелицеме́рную с любо́вию почита́ющим тя́. Чу́дным твои́м благослове́нием от вся́ких на́с бе́д и напа́стей охраня́й, успе́шное заверше́ние вся́кому до́брому де́лу подава́й, да все́ю на́шею жи́знию, уста́ми и умо́м прославля́ем Отца́ и Сы́на и Свята́го Ду́ха во ве́ки веко́в. Ами́нь.