Акафистник

Помочь сайту
·
·
·
·

Акафист святой благоверной княгине Иулиании Вяземской

Память: 3 января (21 декабря), 15 (2) июня

Не утвержден для общецерковного использования.

Конда́к 1.

Избра́нную от великоимени́таго боя́рскаго ро́да, же́нскую сла́бость му́жески попра́вшую и разжже́ннаго по́хотию мучи́теля чистото́ю свое́ю посрами́вшую, Иулиани́ю сла́вную, ве́рнии, пе́сньми почти́м, то́чит бо на́м неоску́дно исцеле́ния и мо́лит о спасе́нии все́х, зову́щих е́й:

Ра́дуйся, Иулиани́е, благове́рная княги́ня целому́дренная.

И́кос 1.

А́нгелов сожи́тельница и страстоте́рпцем соприча́стница бы́ти сподо́билася еси́, всечестна́я Иулиани́е, а́нгельскую бо чистоту́ от пеле́н сохрани́ла еси́ и тоя́ ра́ди му́ченическую кончи́ну до́блественно восприя́ла еси́: и ны́не со а́нгельскими ли́ки и му́чеников со́нмы Престо́лу Всесвяты́я Тро́ицы предстоя́щи, моли́ о поми́ловании на́с, принося́щих ти́ похва́льная сия́:

Ра́дуйся, даро́в духо́вных испо́лненная; ра́дуйся, венце́м му́ченическим украше́нная.

Ра́дуйся, непоколеби́мый во искуше́ниях терпе́ния сто́лпе; ра́дуйся, тве́рдое во обстоя́ниях му́жества основа́ние.

Ра́дуйся, доброде́тели неувяда́емый цве́те; ра́дуйся, лозы́ Христо́вой многострада́льная розго́.

Ра́дуйся, благоче́стия честно́е прозябе́ние; ра́дуйся, чистоты́ добро́то и похвале́ние.

Ра́дуйся, голуби́це, крила́ позлаще́нная иму́щая; ра́дуйся, те́ми в ра́йская оби́тели возлете́вшая.

Ра́дуйся, Иулиани́е, благове́рная княги́ня целому́дренная.

Конда́к 2.

Ви́дящи ма́ти твоя́, благове́рная Иулиани́е, всю́ ско́рбь и тяготу́ вдовства́ своего́, еще́ малоле́тней ти́ су́щей моля́ще Всеси́льнаго Бо́га, да возрасти́т и усоверши́т тя́ Свое́ю благода́тию, и ку́пно с тобо́ю поя́ше Ему́: Аллилу́иа.

И́кос 2.

Ра́зумом непомраче́нным грехо́вными страстьми́ изде́тска разуме́вши необуме́ннаго Бо́га, Иулиани́е богому́драя, несумне́нно в Того́ ве́ровала еси́, и неизрече́нныя и спаси́тельныя повеле́ния Его́ соблю́дши, подвиза́еши пе́ти тебе́ зва́нии си́ми:

Ра́дуйся, у́м сво́й к Боже́ственней высоте́ впери́вшая; ра́дуйся, одея́ние души́ твое́й чистото́ю украси́вшая.

Ра́дуйся, си́лу Бо́жию в немощно́м естестве́ свое́м показа́вшая; ра́дуйся, вене́ц побе́дный от Десни́цы Живоно́сныя прия́вшая.

Ра́дуйся, цве́те чистоты́, среди́ ка́ла грехо́внаго проро́сший; ра́дуйся, кри́не целому́дрия, посреди́ те́рния похоте́й душегуби́тельных процве́тший.

Ра́дуйся, чи́стая ла́стовице; ра́дуйся, кра́сная го́рлице.

Ра́дуйся, я́ко в моли́тве та́йно бде́ла еси́; ра́дуйся, я́ко писа́ньми богодухнове́нными наслади́лася еси́.

Ра́дуйся, Иулиани́е, благове́рная княги́ня целому́дренная.

Конда́к 3.

Си́лою благода́ти Бо́жией сохраня́ема, блаже́нная княги́ня Иулиани́е, во благоче́стии от ю́ных ле́т возраста́ла еси́, и от си́лы в си́лу, и от сла́вы в сла́ву восходи́ла еси́, воспева́ющи укрепля́ющему тя́ Бо́гу благода́рственную пе́снь: Аллилу́иа.

И́кос 3.

Иму́щи в се́рдце свое́м о́гнь любви́ ко Христу́ Бо́гу, гре́х и на́с ра́ди челове́к распе́ншагося Го́спода, вы́ну помышля́ла еси́, прехва́льная Иулиани́е: те́мже ко страсте́м себе́ от младе́нства приугото́вила еси́ и научи́ла еси́ все́х вопи́ти тебе́ си́це:

Ра́дуйся, любо́вь ко Христу́ в себе́ возже́гшая; ра́дуйся, тоя́ ра́ди любве́ тягча́йшия му́ки претерпе́вшая.

Ра́дуйся, я́ко Жениха́ Безсме́ртнаго возжела́ла еси́; ра́дуйся, я́ко Тому́ в да́р страда́ния своя́ принесла́ еси́.

Ра́дуйся, я́ко красото́ю страда́ний твои́х Прекра́сному Жениху́ Христу́ уподо́билася еси́; ра́дуйся, я́ко Кре́ст Госпо́день на ра́мо взе́мши, воздержа́нием Сему́ после́довала еси́.

Ра́дуйся, благоче́стия ревни́тельнице; ра́дуйся, на врага́ до́бляя победи́тельнице.

Ра́дуйся, я́ко тобо́ю от нечи́стых похоте́й избавля́емся; ра́дуйся, я́ко тобо́ю от па́губных страсте́й свобожда́емся.

Ра́дуйся, Иулиани́е, благове́рная княги́ня целому́дренная.

Конда́к 4.

Бу́рю жития́ до́лу влеку́щаго, и наслажде́ния красоты́, и сла́ву цвету́щую, я́ко вре́менну оста́вльши, блаже́нная Иулиани́е, добро́тою кра́сною целому́дрия распаля́ема, ко Христу́ прилепи́лася еси́, пою́щи Ему́: Аллилу́иа.

И́кос 4.

Слы́шавши богоимени́тая Иулиани́е иере́я не́коего сказа́ния о по́двизех му́чеников, Христа́ Го́спода бо́льши живота́ своего́ возлю́бльших и за и́мя Христо́во сме́рть ра́достно прия́вших, ре́вностию о по́двизех си́х воспламеня́шеся и к свя́тости и чистоте́ христиа́нстей понужда́шеся. Мы́ же, ве́дуще сия́, восхваля́ем ю́ си́це:

Ра́дуйся, я́ко о по́двизех му́ченических возревнова́ла еси́; ра́дуйся, я́ко сла́ву маловре́менную презре́ла еси́.

Ра́дуйся, добро́тами боже́ственныя красоты́ украше́нная; ра́дуйся, красоту́ духо́вную и добро́ту теле́сную в себе́ сочета́вшая.

Ра́дуйся, благоуха́ния духо́внаго на́с исполня́ющая; ра́дуйся, тьму́ бесо́вскую дале́че отгоня́ющая.

Ра́дуйся, бла́г духо́вных и теле́сных пода́тельнице; ра́дуйся, у Престо́ла Бо́жия за на́с при́сная хода́таице.

Ра́дуйся, я́ко о Го́споде лику́еши; ра́дуйся, я́ко луча́ми благода́ти Бо́жией исполня́ешися.

Ра́дуйся, Иулиани́е, благове́рная княги́ня целому́дренная.

Конда́к 5.

Богосия́нную звезду́, от гра́да Торжка́ возше́дшую и небе́сными светлостьми́ возсия́вшую, ви́дим тя́, всехва́льная княги́ня Иулиани́е: и ны́не во све́тлостех му́чеников святы́х пребыва́еши, ку́пно с ни́ми восхваля́ющи Светопода́теля вся́ческих и пою́щи Тому́: Аллилу́иа.

И́кос 5.

Ви́дев тя́ беззако́нный кня́зь Ю́рий, ели́ко душе́вною красото́ю сия́ющую, та́ко и теле́сным добро́тством блиста́ющу, и по́хотию нечи́стою распаля́емь, восхоте́ обольсти́ти тя́. Ты́ же, всечестна́я Иулиани́е, раче́ние пло́ти превозмо́гши, я́ко вои́стину кре́пкий адама́нт целому́дрия яви́лася еси́. Сего́ ра́ди любо́вию вопие́м ти́:

Ра́дуйся, чистоты́ забра́ло богови́дное; ра́дуйся, естества́ цве́те благоро́днейший.

Ра́дуйся, еле́ем благоче́стия преукраше́нная; ра́дуйся, чистоту́ душе́вную и теле́сную соблю́дшая.

Ра́дуйся, в же́нстем естестве́ му́жескую добро́ту яви́вшая; ра́дуйся, неви́димую держа́ву проти́вных си́л победи́вшая.

Ра́дуйся, па́че си́льных муже́й крепча́йшая; ра́дуйся, прему́дрых ве́ка сего́ мудре́йшая.

Ра́дуйся, я́ко врага́ льсти́ваго кре́пкая сопротивобо́рница яви́лася еси́; ра́дуйся, я́ко му́жески по́двиг претерпе́ла еси́.

Ра́дуйся, Иулиани́е, благове́рная княги́ня целому́дренная.

Конда́к 6.

Пропове́дник твое́й чистоты́ и пра́ведности яви́ся мучи́тель тво́й, свята́я княги́ня Иулиани́е, ты́ бо добро́те кра́сней души́ твоея́ страстьми́ оскверни́тся не стерпе́ла еси́, добро́ту несказа́нную честна́го Жениха́ твоего́ уразуме́вши и плотску́ю любо́вь тве́рдо отве́ргла еси́, воспева́юще Христу́ Бо́гу побе́дную пе́снь: Аллилу́иа.

И́кос 6.

Возсия́ла еси́ светлостьми́ доброде́телей твои́х, пресла́вная Иулиани́е, и по́двигом му́ченическим украси́лася еси́. Те́мже па́че со́лнца сия́еши и просвеща́еши все́х, твою́ светоно́сную па́мять соверша́ющих ве́рно и принося́щих ти́ хвале́ния сия́:

Ра́дуйся, му́жественная му́ченице; ра́дуйся, плотски́х страсте́й цели́тельнице.

Ра́дуйся, я́ко кри́н доброде́тельми твои́ми процве́тшая; ра́дуйся, целому́дренным путе́м ше́ствовавшая.

Ра́дуйся, а́дскую го́рдость отве́ргшая; ра́дуйся, небе́сную сла́дость возлюби́вшая.

Ра́дуйся, пла́мень по́хоти разжже́нныя мудрова́нием угаси́вшая; ра́дуйся, свещу́ душе́вную неугаси́мую соблю́дшая.

Ра́дуйся, я́ко стремле́ние нечистоты́ опали́ла еси́; ра́дуйся, я́ко на высоту́ доброде́телей взошла́ еси́.

Ра́дуйся, Иулиани́е, благове́рная княги́ня целому́дренная.

Конда́к 7.

Хотя́ ласкосе́рдый мучи́тель по́хоти своея́ жела́ние улучи́ти, ласка́тельными словесы́ и мольбы́ мно́гими и кова́рством и преще́нии гро́зными соблазни́ти тя́ покуша́шеся: ты́ же, всесла́вная, пло́ти мудрова́ние отве́ргши, боле́зненне вопия́ла еси́: не разлучи́т мене́ любве́ Христо́вой ни сла́вы обеща́ние, ни му́к преще́ние, и ра́достно взыва́ла еси́ Ему́: Аллилу́иа.

И́кос 7

Но́вую безчелове́чия я́рость показа́ неи́стовый мучи́тель тво́й, досточу́дная Иулиани́е, егда́ слуга́м повеле́ сотвори́ти но́г твои́х отъя́тие и ру́к отсече́ние и в реку́ Тве́рцу воврещи́ бездыха́нное те́ло твое́. Мы́ же таково́му зверонра́вию содрага́ющеся, твоя́ стра́сти восхваля́юще, вопие́м ти́ си́це:

Ра́дуйся, му́чеников ра́дование; ра́дуйся, целому́дренных похвале́ние.

Ра́дуйся, струя́ми крове́й твои́х зе́млю ороси́вшая; ра́дуйся, отсече́ние удо́в теле́сных претерпе́вшая.

Ра́дуйся, к ли́ку му́ченическому сопричте́нная; ра́дуйся, оде́ждою чистоты́ испещре́нная.

Ра́дуйся, кро́вию свое́ю освяти́вшаяся; ра́дуйся, тли́теля целому́дрия попра́вшая.

Ра́дуйся, я́ко серде́чным раче́нием твои́м А́нгелы удиви́ла еси́; ра́дуйся, я́ко му́жеским сплете́нием врага́ неви́димаго низложи́ла еси́.

Ра́дуйся, Иулиани́е, благове́рная княги́ня целому́дренная.

Конда́к 8.

Стра́нствия земна́го тече́ния му́ченически сконча́вши, ко Христу́, Непристу́пному Све́ту, взошла́ еси́, достохва́льная Иулиани́е. Ему́ же ны́не предстои́ши духо́вно ликовству́ющи и воспева́ющи ра́достную пе́снь: Аллилу́иа.

И́кос 8.

Всю́ ле́сть змии́ну низложи́ла еси́, и А́нгельския ли́ки возвесели́ла еси́, преблаже́нная Иулиани́е, на ка́мени бо тве́рдо целому́дрия утверди́вшеся, уби́йцу врага́ посрами́ла еси́ и вене́ц побе́дный от Христа́ Царя́ досто́йно восприя́ла еси́. Сего́ ра́ди слы́шиши от на́с похвалы́ сия́:

Ра́дуйся, ду́хом свои́м безпло́тныя удиви́вшая; ра́дуйся, му́жеством свои́м те́х возвесели́вшая.

Ра́дуйся, в же́ртву себе́ Бо́гу преда́вшая; ра́дуйся, же́ртва благоприя́тная Тому́ яви́вшаяся.

Ра́дуйся, я́ко стра́сти мно́гих му́к претерпе́ла еси́; ра́дуйся, я́ко к сия́нию незаходи́маго све́та преста́вилася еси́.

Ра́дуйся, те́ла ме́ртвеннаго не пощади́вшая; ра́дуйся, безсме́ртие неиждива́емое насле́довавшая.

Ра́дуйся, я́ко престу́пнаго мучи́теля сове́ты избе́гла еси́; ра́дуйся, я́ко страда́льческим путе́м во оби́тели Небе́сныя взошла́ еси́.

Ра́дуйся, Иулиани́е, благове́рная княги́ня целому́дренная.

Конда́к 9.

Всеце́лу себе́ са́мою Бо́гу принесла́ еси́, богому́драя Иулиани́е, и Боже́ственную си́лу в не́мощи свое́й соверши́ла еси́, в же́нстем естестве́ неви́димую держа́ву и си́лы ея́ победи́вши. Те́м же у́бо во дворы́ Го́спода твоего́, я́ко де́ва му́дра свещу́ нося́щи вошла́ еси́, пою́щи Тому́ хвале́бную пе́снь: Аллилу́иа.

И́кос 9.

Вити́й красноглаго́ливых ли́к не возмо́жет досто́йно восхвали́ти тя́, всехва́льная Иулиани́е, ка́ко бо ты́ чудоде́тельне яви́ла еси́ те́ло твое́, проти́ву быстри́н ре́чных плыву́щи, разсла́бленному не́коему, по бре́гу Тве́рцы иду́щему. Таково́му промышле́нию о тебе́ Бо́жию чудя́щеся, во умиле́нии серде́ц на́ших прино́сим ти́ похва́льная сия́:

Ра́дуйся, заря́ми чуде́с твои́х сия́ющая; ра́дуйся, бога́тно на́м чудесы́ источа́ющая.

Ра́дуйся, я́ко ка́плями крове́й твои́х души́ твое́й багряни́цу многоце́нну истка́ла еси́; ра́дуйся, я́ко те́ми в ри́зу нетле́ннаго весе́лия оде́ялася еси́.

Ра́дуйся, еле́й Бо́жия Благода́ти иска́пающая; ра́дуйся, я́ко благово́нный фимиа́м ко Христу́ Бо́гу возне́сшаяся.

Ра́дуйся, тле́нную сла́ву презре́вшая; ра́дуйся, венце́м нетле́ния венча́вшаяся.

Ра́дуйся, я́ко страда́ньми твои́ми, я́ко зла́то в горни́ле, искуси́лася еси́; ра́дуйся, я́ко честно́е жили́ще Спа́су Христу́ соде́лалася еси́.

Ра́дуйся, Иулиани́е, благове́рная княги́ня целому́дренная.

Конда́к 10.

Спасти́ся хотя́ все́м челове́ком Щедрода́тель Госпо́дь дарова́ на́м свято́е те́ло твое́, блаже́нная Иулиани́е, я́ко сосу́д избра́нный и исто́чник благода́тный, от него́же вси́ ве́рнии то́ки исцеле́ний че́рплюще, вы́ну вопию́т просла́вльшему тя́ Бо́гу: Аллилу́иа.

И́кос 10.

Стена́ еси́ тве́рдая и кре́пкое забра́ло гра́ду на́шему, свята́я му́ченице Иулиани́е, и все́х, с ве́рою и любо́вию прибега́ющих к тебе́, зна́мений ди́вных исполня́еми о вели́чии я́вльшагося в тебе́ Бо́га веща́ющих. Сего́ ра́ди приими́ от на́с пе́ния сия́:

Ра́дуйся, чудеса́ возсия́вшая; ра́дуйся, цельбы́ на́м источа́ющая.

Ра́дуйся, страсте́й лю́тых утоле́ние; ра́дуйся, в ско́рбех су́щих заступле́ние.

Ра́дуйся, неду́ги неисце́льныя врачу́ющи; ра́дуйся, о́гненное опале́ние уставля́ющи.

Ра́дуйся, исто́чниче исцеле́ний неоскудева́емый; ра́дуйся, сокро́вище Бо́жиих дарова́ний неиждива́емое.

Ра́дуйся, я́ко ду́хи лука́выя отгоня́еши; ра́дуйся, я́ко в печа́лех все́м помога́еши.

Ра́дуйся, Иулиани́е, благове́рная княги́ня целому́дренная.

Конда́к 11.

Пе́нию на́шему похва́льному вонми́, уго́днице Бо́жия Иулиани́е, а́ще бо и ни еди́ноже на́ше сло́во дово́льно бы́ло, во е́же по достоя́нию воспева́ти тя́, упова́ем бо тобо́ю проще́ние согреше́ний на́ших получи́ти и ми́лость от Благоде́ющаго вся́ческих улучи́ти, да вку́пе с тобо́ю воспое́м Ему́: Аллилу́иа.

И́кос 11.

Светоза́рными сия́ньми Христа́, Невече́рняго Со́лнца, ду́шу и се́рдце свое́ озари́ла еси́, богому́драя Иулиани́е, и к Нему́ у́треневала еси́: те́мже и к Све́ту присночу́дному преложи́лася еси́. И́м же просвеща́еши все́х, любо́вию почита́ющих тя́ и принося́щих ти́ сицева́я:

Ра́дуйся, в черто́ги Небе́сныя всели́вшаяся; ра́дуйся, к ве́чным оби́телем преста́вившаяся.

Ра́дуйся, к Све́ту невеще́ственному возше́дшая; ра́дуйся, целому́дрия любо́вию в го́рняя ски́ния возне́сшаяся.

Ра́дуйся, я́ко благода́ти Христо́вы благоуха́нием в небе́снем вертогра́де ны́не исполня́ешися; ра́дуйся, я́ко Боже́ственныя сла́вы зре́нием во оби́телех светоза́рных ны́не утеша́ешися.

Ра́дуйся, до́блественная страстоте́рпице; ра́дуйся, ве́чнаго блаже́нства насле́днице.

Ра́дуйся, я́ко мра́к страсте́й разгоня́еши; ра́дуйся, я́ко сла́вою Бо́жиею исполня́ешися.

Ра́дуйся, Иулиани́е, благове́рная княги́ня целому́дренная.

Конда́к 12.

Благода́ть прия́ла еси́ стра́сти плотски́я цели́ти, прехва́льная му́ченице Иулиани́е, и на́с, усе́рдно воспева́ющих тя́, душе́вных и теле́сных боле́зней изба́ви твои́ми я́же к Бо́гу моли́твами, да дерзнове́нно вопие́м Ему́: Аллилу́иа.

И́кос 12.

Пою́ще по́двиги твоего́ преди́внаго жития́, твоя́ пресла́вная и богатода́тельная благодея́ния, тобо́ю на́м дарова́нная, ублажа́ем тя́, блаже́нная княги́не Иулиани́е, блаже́нна бо вои́стину яви́лася еси́ и в житии́ твое́м, и в сме́рти, и по сме́рти твое́й. Сего́ ра́ди воспева́ем тя́ блаже́ньми си́ми:

Ра́дуйся, нищету́ духо́вную возлюби́вшая; ра́дуйся, вся́ кра́сная ми́ра сего́ презре́вшая.

Ра́дуйся, в пла́че о Го́споде слеза́ми о́чи своя́ ороси́вшая; ра́дуйся, пра́вды небе́сныя возжада́вшая.

Ра́дуйся, земли́ кро́тких насле́днице; ра́дуйся, преудобре́нная страстоте́рпице.

Ра́дуйся, ми́лость от Бо́га восприя́вшая; ра́дуйся, чистото́ю серде́чною Того́ узре́вшая.

Ра́дуйся, я́ко ми́ром духо́вным облагоуха́еши; ра́дуйся, я́ко мзду́ небе́сную досто́йно восприя́ла еси́.

Ра́дуйся, Иулиани́е, благове́рная княги́ня целому́дренная.

Конда́к 13.

О свята́я му́ченице, благове́рная княги́ня Иулиани́е! Тебе́, у Престо́ла Го́спода Сла́вы моля́щейся за ны́, мы́, гре́шнии, на земли́ живу́щии, прино́сим хвале́бное сие́ благодаре́ние и усе́рдно про́сим тя́: моли́ Всеще́драго Бо́га проба́вити ми́лость Свою́ на зе́млю Росси́йскую, утверди́ти ны́ в правосла́вии и благоче́стии, дарова́ти на́м проще́ние согреше́ний, изба́вится на́м от напра́сныя сме́рти и бу́дущия му́ки, да с тобо́ю во ве́ки пое́м Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов сожи́тельница и страстоте́рпцем соприча́стница бы́ти сподо́билася еси́, всечестна́я Иулиани́е, а́нгельскую бо чистоту́ от пеле́н сохрани́ла еси́ и тоя́ ра́ди му́ченическую кончи́ну до́блественно восприя́ла еси́: и ны́не со а́нгельскими ли́ки и му́чеников со́нмы Престо́лу Всесвяты́я Тро́ицы предстоя́щи, моли́ о поми́ловании на́с, принося́щих ти́ похва́льная сия́:

Ра́дуйся, даро́в духо́вных испо́лненная; ра́дуйся, венце́м му́ченическим украше́нная.

Ра́дуйся, непоколеби́мый во искуше́ниях терпе́ния сто́лпе; ра́дуйся, тве́рдое во обстоя́ниях му́жества основа́ние.

Ра́дуйся, доброде́тели неувяда́емый цве́те; ра́дуйся, лозы́ Христо́вой многострада́льная розго́.

Ра́дуйся, благоче́стия честно́е прозябе́ние; ра́дуйся, чистоты́ добро́то и похвале́ние.

Ра́дуйся, голуби́це, крила́ позлаще́нная иму́щая; ра́дуйся, те́ми в ра́йская оби́тели возлете́вшая.

Ра́дуйся, Иулиани́е, благове́рная княги́ня целому́дренная.

Конда́к 1.

Избра́нную от великоимени́таго боя́рскаго ро́да, же́нскую сла́бость му́жески попра́вшую и разжже́ннаго по́хотию мучи́теля чистото́ю свое́ю посрами́вшую, Иулиани́ю сла́вную, ве́рнии, пе́сньми почти́м, то́чит бо на́м неоску́дно исцеле́ния и мо́лит о спасе́нии все́х, зову́щих е́й:

Ра́дуйся, Иулиани́е, благове́рная княги́ня целому́дренная.

Моли́тва.

О всехва́льная му́ченице, свята́я уго́днице Бо́жия, благове́рная княги́ня Иулиани́е! Ты́ супру́жеския ра́ди чистоты́ ду́шу свою́ положи́ла еси́ и за целому́дрие да́же до кро́ви подвиза́лася еси́, и сего́ ра́ди, а́ще и жена́ была́ еси́, оба́че к ли́ку пра́ведных де́в сопричте́на бы́ти сподо́билася еси́. К тебе́, ве́лие дерзнове́ние ко Влады́це стяжа́вшей, смире́нно притека́ем и уми́льно про́сим тя́: пода́ждь на́м отра́ду и свобожде́ние от плотски́я бра́ни, житие́ целому́дренное и благоче́стное в супру́жестве, де́встве пребыва́ние, се́ бо страстьми́ плотски́ми обурева́емся, и грехо́в мно́гих пучи́на объя́ла е́сть ны́. Те́мже и не́сть мы́ досто́йны ниже́ взира́ти на высоту́ Небе́сную, ниже́ Го́спода в по́мощь свою́ призыва́ти. Бу́ди на́м помо́щница во спасе́ние ско́рая и от зо́л и обстоя́ний изба́вительница неодоли́мая. Все́х, с ве́рою несумне́нною к Бо́гу приходя́щих и моли́твенно к тебе́ притека́ющих, от вся́ких бе́д душе́вных и теле́сных свободи́, скорбя́щия обра́дуй, тружда́ющимся помози́, пла́чущия уте́ши, изнемога́ющия поддержи́, напа́дствуемым бу́ди засту́пница, вдови́цам и си́рым защи́тница, младе́нцем пита́тельница. Помози́ на́м, да не поги́бнем со страстьми́ и похотьми́ на́шими, но да упра́вим живо́т на́ш во вся́ком благоче́стии и чистоте́, я́ко да соде́лаем телеса́ на́ша хра́м живу́щаго в на́с Ду́ха Свята́го и просла́вим благода́ть и ми́лость Триеди́наго Бо́га во ве́ки веко́в. Ами́нь.

Yandex Metrika