Конда́к 1.

Избра́нной уго́днице Христо́вой, звездо́ю богосве́тлою на небосво́де оби́тели Пю́хтицкой возсия́вшей, да́ром прозорли́вости и чудотворе́ния одаре́нной, Престо́лу Царя́ Сла́вы ны́не со а́нгелы и все́ми святы́ми предстоя́щей, благода́рственная пе́ния прино́сим ти́, блаже́нная ма́ти, ты́ же я́ко иму́щая дерзнове́ние ко Го́споду, от вся́ких на́с бе́д и скорбе́й свобожда́й да зове́м ти́ хвале́бно:

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

И́кос 1.

А́нгелов Творе́ц произрасти́ тя́, прехва́льная ма́ти, в после́дняя времена́ сия́ в предéлех земли́ Балти́йстей, идéже бе́ рожденá, воспитáна и в де́лании и́ночестем до конца́ дне́й подвиза́лася еси́. Мы́ же, взира́юще на равноа́нгельное житие́ твое́, возвыша́емся душáми и доброде́телем твои́м подражáти тща́шеся, вопие́м ти́:

Ра́дуйся, ро́да зна́тнаго, бла́гу Росси́и мно́го послужи́вшаго о́трасле пречестнáя; ра́дуйся, роди́тельми благочести́выми в Правосла́вии воспитáнная.

Ра́дуйся, от святы́я купе́ли «Екатери́ною», си́речь, «всегда́ чи́стою», наречéнная;

ра́дуйся, мно́гими добродéтельми Бо́гом одарéнная.

Ра́дуйся, ми́лости и сострада́ния к лю́дям и вся́кому творе́нию Бо́жию от млады́х ле́т преиспо́лненная; ра́дуйся, и на́с дела́ми милосе́рдия служи́ти Бо́гу и лю́дям науча́ющая.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 2.

Ви́дя Госпо́дь ду́шу твою́, я́ко ни́ву ко плодоно́сию духо́вному возде́ланную, от ю́ности напра́ви у́м тво́й к иска́нию еди́наго на потре́бу, да принесе́ши стори́чный пло́д, непреста́нно вопию́ще Бо́гу: Аллилу́иа.

И́кос 2.

Ра́зум иму́ще свы́ше просвеще́нный, Екатери́но богому́драя, скороги́бнущих бла́г ми́ра сего́ отве́рглася еси́ и угожде́ние Бо́гу па́че всего́ возлюби́вше, неле́ностно Тому́ во все́м житии́ твое́м послужи́ла еси́, сего́ ра́ди ублажа́ем тя́, зову́ще си́це:

Ра́дуйся, от младéнства по предувéдению Бо́гом избрáнная; ра́дуйся, моли́твеннице те́плая Бо́гом на́м даровáнная.

Ра́дуйся, се́верных преде́лов росси́йския страны́ стро́гое и све́тлое воспита́ние; ра́дуйся, земли́ Эсто́нстей похвало́ и украше́ние.

Ра́дуйся, в житии́ твое́м Ева́нгельския за́поведи испо́лнившая; ра́дуйся, сестро́ю милосе́рдия во дни́ бра́ни кровопроли́тныя послужи́вшая.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 3.

Си́ла Вы́шняго укрепля́ше ду́х тво́й, егда́ ты́, в бурено́сныя го́ды лихоле́тия, от сто́льнаго гра́да Петро́ва изше́дше, пресе́льница была́ еси́ в земли́ Эсто́нстей и притекла́ еси́ во оби́тель Пю́хтицкую, идéже мно́гия по́двиги и́ночестии и кре́ст юро́дства подъя́ла еси́: мы́ же, прославля́юще терпе́ние и труды́ твоя́, ди́вная ма́ти, вопие́м о тебе́ Бо́гу: Аллилу́иа.

И́кос 3.

Иму́ще всегда́ пред очи́ма свои́ма Го́спода ре́кшаго: «А́ще за́поведи Моя́ соблюде́те, пребу́дете в любви́ Мое́й», ты́, прехва́льная ма́ти, за́поведи Христо́вы в житии́ опа́сно храня́ще, любо́вь к Бо́гу и бли́жним стяжа́ла еси́. Приведи́ моли́твами твои́ми, и на́с, хла́дных, но призыва́ющих тя́ в по́мощь, к Бо́жией любви́, да во умиле́нии зове́м ти́:

Ра́дуйся, серафи́мскою плáменною любо́вию к Бо́гу горéвшая; ра́дуйся, бли́жних свои́х па́че себе́ возлюби́вшая.

Ра́дуйся, ми́лостивым се́рдцем твои́м стра́ждущим и немощны́м сострада́вшая; ра́дуйся, вся́ ско́рби и́х в се́рдце свое́ широ́кое вмести́вшая.

Ра́дуйся, и́нокиням наста́внице богому́драя; ра́дуйся, о́бразе мона́шескаго воздержа́ния и целому́дрия.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 4.

Бу́ря искуше́ний и ко́зней вра́жиих не возмо́же поколеба́ти хрáмины души́ твоея́, блаже́нная ма́ти, основанá бо бé на тве́рдем ка́мене ве́ры во Христа́. Укрепля́ема же Боже́ственною благода́тию и моли́твами непреста́нными храни́ма, непреткнове́нно востекла́ еси́ ко а́нгельскому житию́ по стезя́м доброде́телей, до́ндеже дости́гла еси́ вечноблаже́ннаго приста́нища спасе́ния, идéже со а́нгелы и все́ми святы́ми пое́ши Бо́гу: Аллилу́иа.

И́кос 4.

Слы́шаша мно́зи, я́ко чу́дный прозре́ния да́р от Бо́га прия́ла еси́, уже́ при жи́зни твое́й лю́дие Бо́жии называ́ше тя́ Екатери́ною Пю́хтицкой, и потеко́ша отвсю́ду к тебе́ с недоуме́ньми, скорбьми́ и печáльми свои́ми и по́мощь благовре́менну прии́мше, просла́виша Го́спода и тя́ благодари́ша, зовýще:

Ра́дуйся, от ю́ности ра́зум сво́й Христу́ покори́вшая; ра́дуйся, равноа́нгельное житие́ на земли́ яви́вшая.

Ра́дуйся, све́тлостию жития́ Бо́гу угоди́вшая; ра́дуйся, вопроша́вших тя́ богому́дренно наставля́вшая.

Ра́дуйся, я́ко тобо́ю по ме́ре ве́ры подаю́тся благода́тныя исцеле́ния; ра́дуйся, я́ко везде́ призыва́ющия тя́ ско́ро предваря́еши.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 5.

Боготе́чная пресве́тлая звезда́ яви́лася еси́ в земли́ Эсто́нстей, блаже́нная ма́ти, озаря́юще го́ру Пю́хтицкую луча́ми твои́х доброде́телей и дарова́ний боже́ственных. Те́мже ны́не сия́еши на небесе́х сла́вою ве́чною с ли́ки пра́ведник и наставля́еши все́х, к тебе́ с ве́рою притека́ющих, на пу́ть к небе́сному оте́честву веду́щий, вопию́щих Бо́гу: Аллилу́иа.

И́кос 5.

Вéдая, я́ко жи́знь зде́ дана́ на́м для благоугожде́ния Бо́гу, ты́, богому́драя ма́ти, вся́ кра́сная ми́ра сего́ презрéвши, Еди́ному Го́споду неле́ностно послужи́ла еси́ и от Того́ да́р благода́тныя по́мощи содева́ти зна́мения и чудеса́ прия́ла еси́ и те́м бли́жним послужи́ла еси́. Сего́ ра́ди восхваля́ем Бо́га, дарова́вшаго тебе́ благода́ть такову́ю и уми́льно зове́м ти́:

Ра́дуйся, Еди́наго Христа́ от всего́ се́рдца возлюби́вшая; ра́дуйся, Тому́ Еди́ному с му́дрыми де́вами после́довавшая.

Ра́дуйся, я́ко моли́твами твои́ми все́х к Бо́гу приво́диши; ра́дуйся, я́ко пра́вый пу́ть ко спасе́нию указýеши.

Ра́дуйся, я́ко чи́стая се́рдцем Бо́га всегда́ зре́вшая; ра́дуйся, все́х утеша́ти, а себя́ не жале́ти та́ко учи́вшая.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 6.

Пропове́дницы чýдных дея́ний твои́х, блаже́нная ма́ти, яви́шася мно́зи: поспеша́ти бо на по́мощь стра́ждущим во все́м житии́ твое́м навы́кла еси́, о немощны́х же и от Це́ркви отпа́дших во дни́ обстоя́ния, наипа́че попече́ние име́ла еси́. Сего́ ра́ди зове́м ти́: утверди́ и на́с в ве́ре правосла́вней всегда́ пребыва́ти да вопие́м с тобо́ю Бо́гу: Аллилу́иа.

И́кос 6.

Возсия́ла еси́ во оби́тели Пю́хтицкой я́ко богосве́тлое свети́ло, во дни́ оскудéния ве́ры и отступле́ния от Бо́га: сердца́, неве́рием омраче́нныя, све́том Бо́жиим просвеща́юще и к Бо́гу приводя́ще. Те́мже воспева́ем ти́ сия́ похва́льныя словесá:

Ра́дуйся, усе́рдно призыва́ющим тя́ помога́ющая; ра́дуйся, гне́в Бо́жий ско́ро на ми́лость прелага́ющая.

Ра́дуйся, я́ко твоя́ моли́твы си́льны и многомо́щны Бо́га умилостивля́ти; ра́дуйся, я́ко вся́ ко́зни вра́жии смире́нием побежда́ла еси́.

Ра́дуйся, покрови́тельнице на́ша Бо́гом дарова́нная и моли́твеннице; ра́дуйся, оби́тели на́шея неотсту́пная храни́тельнице.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 7.

Восхоте́вшу безбо́жным святу́ю оби́тель на горе́ Пю́хтицкой разори́ти и ме́сто сие́ поруга́нию преда́ти, не оста́ви Госпо́дь в печа́ли су́щих ра́б Свои́х: воздви́же бо тя́, уго́дницу Свою́, прехва́льная ма́ти, да возло́жше на ся́ сугу́бый по́ст и моли́твы, в затво́ре вся́ дни́ Святы́я Четыредеся́тницы пребыва́еши. Сего́ ра́ди прославля́юще по́двиги твоя́ и терпе́ние мно́гое, благода́рне вопие́м о тебе́ Бо́гу: Аллилу́иа.

И́кос 7.

Но́вую тя́ ви́дим избра́нницу Бо́жию, дерзнове́нную хода́таицу пред Престо́лом Госпо́дним и ско́рую в бедáх помо́щницу: испове́дуем ди́вное заступле́ние твое́, прехва́льная ма́ти, егда́ оби́тель сию́, в беде́ и бра́ни от безбо́жных сýщей, моли́твою непрестáнною и зéльным пощéнием от закры́тия сохрани́ла еси́, и мину́вше беде́, па́ки всера́достный пасха́льный трезво́н огласи́ окре́стности Куремя́э. Те́мже от ве́рных приими́ благохвале́ния такова́я:

Ра́дуйся, злы́х богобо́рцев, ча́ющих упраздни́ти святу́ю оби́тель, посрами́вшая; ра́дуйся, оби́тель в Пю́хтице чуде́сно от закры́тия сохрани́вшая.

Ра́дуйся, самоотверже́ние всеце́лое яви́вшая; ра́дуйся, на уедине́нную моли́тву в ле́с мно́гажды уходи́вшая и в посте́ та́мо пребыва́вшая.

Ра́дуйся, ло́жем свои́м зе́млю в лесу́ избра́вшая; ра́дуйся, за по́двиги твоя́ на Небеси́ венча́нная.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 8.

Стрáнницею во юдо́ли земно́й бы́вше, блаже́нная ма́ти, все́ жела́ние ко Влады́це Христу́ впери́ла еси́, вся́ тле́нная за уме́ты вмени́вши, пусты́нное блаже́нное житие́ возлюби́ла еси́, и насле́днице Иерусали́ма Небе́снаго яви́лася еси́, в не́мже со А́нгелы и все́ми святы́ми ны́не пое́ши Бо́гу: Аллилу́иа.

И́кос 8.

Всю́ себе́ преда́вши в во́лю Бо́жию, испо́лнилася еси́ даро́в Свята́го Ду́ха, и вмести́лище вели́кой любви́ была́ еси́. Толи́ко распространи́ла еси́ се́рдце свое́ любо́вию Христо́вою, я́ко нете́сно вмеща́лося в него́ мно́жество почита́вших тя́ челове́к и вся́ и́х ско́рби, я́коже и сама́ рекла́ еси́: «Когда я отдала ум свой Господу, сердце мое стало широким-широким». Сего́ ра́ди хвале́бно зове́м ти́:

Ра́дуйся, в се́рдце свое́ широ́кое всю́ бо́ль чужу́ю вмести́вшая; ра́дуйся, многообрáзныя ко́зни лука́ваго си́лою Бо́жиею победи́вшая.

Ра́дуйся, кре́ст юро́дства во́лею на себя́ подъя́вшая и мно́гия лише́ния Христа́ ра́ди претерпе́вшая; ра́дуйся, ке́ллии не име́вшая, я́коже и Христо́с не име́ где́ главу́ подклони́ти.

Ра́дуйся, наставле́ния в де́лании духо́вном от богому́дренныя ста́рицы Еле́ны восприя́вшая; ра́дуйся, сугу́бую благода́ть тоя́ ста́рицы унасле́довавшая.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 9.

Вся́кия утоли́ боле́зни, блаже́нная ма́ти Екатери́но, ско́рая бо в бедáх и напа́стех помо́щнице и дерзнове́нная моли́твеннице пред престо́лом Бо́жиим еси́. Сего́ ра́ди на твое́ хода́тайство наде́ющеся, Бо́гу в тебе́ ди́вно прославля́емому, непреста́нно вопие́м: Аллилу́иа.

И́кос 9.

Вити́йство челове́ческое не довле́ет изрещи́ оби́лие ра́дости духо́вныя, е́юже преиспо́лнилася еси́, ма́ти всехва́льная, егда́ в виде́нии светоза́рнем, Влады́чицу ми́ра на исто́чнице святе́м но́щию в пургу́ и мра́з мно́гажды зре́ти сподо́билася еси́. Те́мже у́бо дивя́щеся сему́ пречу́дному виде́нию зове́м ти́:

Ра́дуйся, в ти́хое приста́нище спасе́ния на го́ру Богоро́дицкую в Пю́хтицу прите́кшая; ра́дуйся, оби́тель Пю́хтицкую, Бо́жией Ма́терию в жре́бий Сво́й земны́й избра́нную, все́м се́рдцем возлюби́вшая.

Ра́дуйся, я́ко лицезре́ти Пречи́стую Богома́терь на святе́м исто́чнице мно́гажды сподо́бившаяся; ра́дуйся, благода́тию Свята́го Ду́ха зимо́ю чуде́сно согрева́емая.

Ра́дуйся, я́ко моли́твенным твои́м предста́тельством от все́х бе́д оби́тель огражда́еши; ра́дуйся, засту́пнице и упова́ние на́ше.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 10.

Спасти́ хотя́ще ду́шу свою́ и чистоту́ душе́вную и теле́сную возлюби́вше, мно́гия доброде́тели в себе́ совокупи́ла еси́, ма́ти всехва́льная: многотру́дныя бо по́двиги и́ночества и юро́дства Христа́ ра́ди на ся́ подъя́ла еси́. Те́мже ны́не в черто́зех небе́сных со святы́ми водворя́яся, помина́й все́х на́с, чту́щих па́мять твою́ и Бо́гу вопию́щих: Аллилу́иа.

И́кос 10.

Стена́ и покро́в была́ еси́ при жи́зни, блаже́нная ма́ти, все́м к твоему́ ско́рому заступле́нию прибега́ющим, те́мже и ны́не в бедáх, боле́знех и ско́рбех сýщим помога́й, да с ве́рою и любо́вию зове́м ти́:

Ра́дуйся, суету́ ми́ра сего́ и вся́ благá его́ презре́вшая; ра́дуйся, мни́мым безу́мием сия́ние благода́ти в се́рдце свое́м сокры́вшая.

Ра́дуйся, вся́кое о себе́ отве́ргшая попече́ние; ра́дуйся, подви́жнице, не да́вшая на ло́же себе́ отдохнове́ния.

Ра́дуйся, я́ко мно́гия искуше́ния претерпе́вши, мно́гим искуша́емым помога́еши; ра́дуйся, в бедáх и ско́рбех ско́рая помо́щнице.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 11.

Пе́ние хвале́бное возглаша́ем ти́, богому́драя ма́ти, небе́сное бо на земли́ стяжа́вше жи́тельство, до конца́ жития́ твоего́ живу́ю, в юро́дстве сокры́тую, не́жно лю́бящую люде́й ду́шу соблюла́ еси́. Да́р прозре́ния, да́р исцеле́ний стяжа́вши, мно́гими чудотворе́ньми Бо́га просла́вила еси́. Мы́ же дивя́щеся твои́м чудесе́м, де́йствием Свята́го Ду́ха явля́емым, вопие́м Го́споду си́л: Аллилу́иа.

И́кос 11.

Светоза́рную свещу́, во мра́це жития́ су́щим, зри́м тя́, преподо́бная ма́ти. Те́мже помина́юще блаже́нное успе́ние твое́, и ве́чное твое́ на небеси́ и на земли́ прославле́ние, с ра́достию прино́сим ти́ такова́я:

Ра́дуйся, под покро́вом Бо́жией Ма́тери по́двиги твоя́ твори́вшая; ра́дуйся, Оте́чества небе́снаго Иерусали́ма го́рняго при́сно взыска́вшая.

Ра́дуйся, почита́тельницу твою́ из Кроншта́дта, си́лою и де́йствием Свята́го Ду́ха от лю́таго неду́га изба́вльшая; ра́дуйся, сло́во с благода́тию: «Бо́г да́ст и про́йдет» е́й изрéкшая.

Ра́дуйся, я́ко после́довательнице была́ еси́ же́н святы́х и в неде́лю же́н-мироно́сиц во оби́тели Го́рния отше́дшая; ра́дуйся, я́ко и по преставле́нии твое́м на́с не оставля́еши.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 12.

Благода́ть свы́ше ти́ да́нную, излива́еши оби́льно все́м чту́щим па́мять твою́ и к заступле́нию твоему́ чýдному притека́ющим, блаже́нная ма́ти Екатери́но. Те́мже и мы́, гре́шнии, припáдаем ко святы́м моще́м твои́м, преклоня́юще коле́на серде́ц на́ших, мо́лимся тебе́ усе́рдно: от вся́ких на́с бе́д, неду́гов, скорбе́й и ко́зней вра́жиих изба́ви, вопию́щих Бо́гу: Аллилу́иа.

И́кос 12.

Пою́ще равноа́нгельное житие́ твое́, ди́вная же и пресла́вная чудеса́, восхваля́ем тя́, преподо́бная ма́ти, оба́че не могýще досто́йно изобрази́ти сла́ву твою́ и вели́чие твое́, со умиле́нием зове́м ти́ си́це:

Ра́дуйся, мо́щи твоя́ я́ко драгоце́нную святы́ню на́м оста́вившая; ра́дуйся, мно́гих чуде́с пода́тельнице к ра́це твое́й с ве́рою и любо́вию притека́ющим.

Ра́дуйся, высо́кими доброде́тельми и пресла́вными чудесы́ преукрашéнная; ра́дуйся, я́ко оби́тель Пю́хтицкая и́менем твои́м красу́ется.

Ра́дуйся, я́ко монáхов ли́цы покрови́тельницу тя́ свою́ имену́ют; ра́дуйся, я́ко ны́не предстои́ши престо́лу Все́х Царя́, Христа́ Бо́га и за ны́ мо́лишися.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 13.

О, свята́я блаже́нная ма́ти Екатери́но, в бедáх и ско́рбех су́щим ско́рая помо́щнице и оби́тели Пю́хтицкия неусы́пная моли́твеннице! Приими́ от на́с недосто́йных хвале́бное сие́ пе́ние, и благоприя́тными твои́ми к Бо́гу моли́твами, изба́ви на́с от все́х бе́д вре́менных и ве́чных: да сподо́бимся с тобо́ю в Ца́рствии Небе́снем ве́чно воспева́ти Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов Творе́ц произрасти́ тя́, прехва́льная ма́ти, в после́дняя времена́ сия́ в предéлех земли́ Балти́йстей, идéже бе́ рожденá, воспитáна и в де́лании и́ночестем до конца́ дне́й подвиза́лася еси́. Мы́ же, взира́юще на равноа́нгельное житие́ твое́, возвыша́емся душáми и доброде́телем твои́м подражáти тща́шеся, вопие́м ти́:

Ра́дуйся, ро́да зна́тнаго, бла́гу Росси́и мно́го послужи́вшаго о́трасле пречестнáя; ра́дуйся, роди́тельми благочести́выми в Правосла́вии воспитáнная.

Ра́дуйся, от святы́я купе́ли «Екатери́ною», си́речь, «всегда́ чи́стою», наречéнная;

ра́дуйся, мно́гими добродéтельми Бо́гом одарéнная.

Ра́дуйся, ми́лости и сострада́ния к лю́дям и вся́кому творе́нию Бо́жию от млады́х ле́т преиспо́лненная; ра́дуйся, и на́с дела́ми милосе́рдия служи́ти Бо́гу и лю́дям науча́ющая.

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Конда́к 1.

Избра́нной уго́днице Христо́вой, звездо́ю богосве́тлою на небосво́де оби́тели Пю́хтицкой возсия́вшей, да́ром прозорли́вости и чудотворе́ния одаре́нной, Престо́лу Царя́ Сла́вы ны́не со а́нгелы и все́ми святы́ми предстоя́щей, благода́рственная пе́ния прино́сим ти́, блаже́нная ма́ти, ты́ же я́ко иму́щая дерзнове́ние ко Го́споду, от вся́ких на́с бе́д и скорбе́й свобожда́й да зове́м ти́ хвале́бно:

Ра́дуйся, свята́я блаже́нная ма́ти Екатери́но, оби́тели Пю́хтицкия похвало́ и утвержде́ние.

Моли́тва.

О, свята́я блаже́нная ма́ти Екатери́но! Душе́ю на Небеси́ Престо́лу Бо́жию ны́не предстои́ши и да́нною ти́ свы́ше благода́тию, вся́ на́ша ну́жды и проше́ния зри́ши и мно́гая чудеса́ источа́еши!

Умоли́ Всеще́драго Бо́га на́шего, проще́ние на́м во гресе́х дарова́ти, боля́щия исцеля́ти, печа́льныя утеша́ти и везде́ те́пле призыва́ющия тя́ и к ра́це честны́х и многоцеле́бных моще́й твои́х усе́рдно припа́дающих и моля́щих ти́ ся́ от вся́ких напа́стей и бе́д моли́твами твои́ми избавля́ти.

Ты́, блаже́нная ма́ти, любо́вию Христо́вою преиспо́лненная, во все́м житии́ твое́м, себе́ забыва́ющи, бли́жним послужи́ла еси́ и мно́гия ко Христу́ моли́твами твои́ми обрати́ла еси́.

Преста́вленная от сего́ вре́меннаго жития́ во ино́е, ве́чное, ра́дуешися ны́не, уго́днице Бо́жия, в ли́це святы́х сла́вимая. Ве́мы, я́ко ве́лие дерзнове́ние и́маши ко Влады́це Христу́ и, ели́ко а́ще испро́сиши от Него́, да́стся на́м, я́ко ты́ не мертва́ еси́, но жива́ в Бо́зе.

Вонми́ глáсу молéбному, смире́нно тебе́ ны́не возноси́мому, исцели́ неду́ги лю́тыя и боле́зни на́ша. Е́й, уго́днице Бо́жия, пода́й на́м по́мощь в труде́х на́ших, в нераде́нии су́щим, и от тя́жкаго сна́ ле́ности грехо́вныя моли́твами твои́ми возста́ви.

О, свята́я блаже́нная ма́ти, укрепи́ на́с, малоду́шных в ве́ре, да во обновле́нии ду́ха и любви́ Бо́жии пребыва́ющи, Го́споду и бли́жним служа́ще, по отше́ствии из жития́ сего́, дости́гнем Ца́рствия Небе́снаго – го́рняго Иерусали́ма, его́же вожделе́ла еси́ и иде́же ны́не пребыва́еши со все́ми угоди́вшими Бо́гу. Ами́нь.