Конда́к 1.
Избра́нной земли́ Уфи́мския ди́вной уго́днице ны́не ра́достно прино́сим ти́, о ма́ти, хвале́бныя пе́ния, ты́ же, я́ко име́я дерзнове́ние ко Христу́ Бо́гу, от вся́ких на́с бе́д свободи́, да зове́м ти́:
Ра́дуйся, всехва́льная Варва́ро, затво́рнице блаже́нная.
И́кос 1.
А́нгели на небеси́ ра́довахуся, егда́ ви́деша, я́ко звезда́ у́тренняя возсия́ла еси́ над преде́лами Уфи́мския земли́, прогоня́я тьму́ грехо́вную светоза́рным твои́м житие́м, блаже́нная ма́ти, и приводя́ к све́ту Христо́ву мно́гия лю́ди, те́мже приими́ от на́с хвале́ния сицева́я:
Ра́дуйся, в небе́сней сла́ве А́нгелом уподо́бившаяся; ра́дуйся, в чи́не проро́ков, я́ко да́р прозорли́вости иму́щая, впи́санная.
Ра́дуйся, к ли́ку апо́столов, я́ко сло́вом и де́лом Христа́ благовести́вшая, сопричте́нная; ра́дуйся, в со́нме му́чеников, я́ко Христа́ ра́ди претерпе́вшая, восприя́тая.
Ра́дуйся, к собо́ру испове́дников причте́нная; ра́дуйся, с де́вствующими я́ко де́ва возвели́ченная.
Ра́дуйся, бла́г преподо́бных от ве́ка угото́ванных насле́дия удосто́енная; ра́дуйся, со все́ми святы́ми, Бо́гу угоди́вшими, уча́стие обре́тшая.
Ра́дуйся, му́драя стра́ннице, Оте́чествия го́рняго иска́вшая; ра́дуйся, но́зе твои́ в пу́ть спаси́тельный для мно́гих напра́вившая.
Ра́дуйся, в по́двизех и труде́х твои́х несконча́емо наслажда́ющаяся; ра́дуйся, Ца́рствия Небе́снаго о́бщницею явля́ющаяся.
Ра́дуйся, всехва́льная Варва́ро, затво́рнице блаже́нная.
Конда́к 2.
Ви́дяще вели́чие духо́вныя красоты́ и прему́дрости твоея́, блаже́нная Варва́ро, мы́ я́ко земни́и удивле́нием, ра́достию и благодаре́нием ко Творцу́ вся́ческих исполня́емся, зову́ще: Аллилу́иа.
И́кос 2.
Ра́зум подава́я лю́дем Госпо́дь, отве́рзе тво́й у́м, блага́го иере́я Васи́лия о́трасле блага́я, пре́жде ко́сней ко изуче́нию кни́жныя прему́дрости тебе́ бы́вшей, да яви́тся, я́ко не от челове́к, но от Бо́га прия́ла еси́ ра́зум, те́мже, обра́дованная, приими́ от на́с ра́достное пе́ние сие́:
Ра́дуйся, навы́кшая храни́ти стра́х Бо́жий, прему́дрости нача́ло; ра́дуйся, все́м уча́щимся у тебе́ бы́вшая доброде́телей зерца́ло.
Ра́дуйся, на скрижа́ли се́рдца своего́ зако́н Бо́жий написа́вшая; ра́дуйся, уче́ние сие́ все́м слу́шающим тя́ подаю́щая.
Ра́дуйся, высокоу́мныя вра́жия уче́ния отме́тшая; ра́дуйся, му́дрых ве́ка сего́ ра́зумом превосходя́щая.
Ра́дуйся, на по́двиг юро́дства Христа́ ра́ди Свы́ше призва́нная; ра́дуйся, го́рькую же́стокость юро́дства па́че все́х возлюби́вшая.
Ра́дуйся, юро́дствовшая пред челове́ки, да ликовству́еши со А́нгелы; ра́дуйся, вели́ким пра́ведником Андре́ю Царегра́дскому, Верхоту́рскому Симео́ну и про́чим Христа́ ра́ди юро́дивым подража́вшая.
Ра́дуйся, людсти́и поруга́ния и осмея́ния в че́сть себе́ вмени́вшая; ра́дуйся, все́м оби́дящим тя́ вседу́шно прегреше́ния прости́вшая.
Ра́дуйся, всехва́льная Варва́ро, затво́рнице блаже́нная.
Конда́к 3.
Си́лою благода́ти Бо́жией дви́жимая, потща́лася еси́, богому́драя Варва́ро, ве́сь ма́лую, ме́сто по́двигов твои́х, дости́гнути, иде́же распаля́лася еси́ все́м се́рдцем твои́м в любо́вь Христо́ву, благода́рственно вопию́щи Ему́: Аллилу́иа.
И́кос 3.
Име́я по́мысл чи́ст, кре́пкою ве́рою в Бо́га вооружи́вшися, пути́ спаси́тельнаго держа́лася еси́, ма́ти всехва́льная, его́же и соверши́ пресла́вно; те́мже и на́м, хотя́щим твоему́ житию́ подража́ти, Боже́ственную по́мощь испроси́, предстоя́ Престо́лу Всевы́шняго, да благода́рно зове́м ти́:
Ра́дуйся, в помраче́нии страсте́й пребыва́ющих просвети́тельнице; ра́дуйся, в суете́ и самозабве́нии жи́тельствующих вразуми́тельнице.
Ра́дуйся, в недоуме́нии и заблужде́нии су́щих руководи́тельнице; ра́дуйся, благо́е житие́ ше́ствовати начина́ющих управи́тельнице.
Ра́дуйся, малоду́шием и уны́нием коле́блемых укрепи́тельнице; ра́дуйся, в небреже́нии спя́щих возбуди́тельнице.
Ра́дуйся, бо́дрости и трезве́ния предо́брая учи́тельнице; ра́дуйся, нераде́ния и пра́здности изве́стная прогони́тельнице.
Ра́дуйся, трудолю́бия, е́же вся́кому бла́гу утвержде́ние, рачи́тельнице. ра́дуйся, чи́стаго и непоро́чнаго жития́ неусыпа́ющая храни́тельнице.
Ра́дуйся, все́х ко спасе́нию ве́рная путеводи́тельнице; ра́дуйся, все́х благоче́стно жи́ти хотя́щих му́драя наста́внице.
Ра́дуйся, всехва́льная Варва́ро, затво́рнице блаже́нная.
Конда́к 4.
Бу́ри жите́йских напа́стей бежа́вше, блаже́нная, па́че бра́ка че́стна житие́ де́вственное возлюби́ла еси́ и от земна́го жениха́ уклони́лася еси́, да еди́ному Небе́сному Жениху́ порабо́таеши, пою́щи Ему́: Аллилу́иа.
И́кос 4.
Слы́ша, блаже́нная, я́же апо́стол рече́: не пося́гшая пече́тся о Госпо́дних, да е́сть свя́та и те́лом и ду́хом, сему́ поревнова́ла еси́, те́мже тя́ велича́ем:
Ра́дуйся, я́ко призва́вшему тя́ Свято́му Ду́ху и сама́ те́лом и ду́хом свя́та еси́; ра́дуйся, от скве́рны пло́ти и ду́ха непоро́чну себя́ соблюла́ еси́.
Ра́дуйся, великому́ченицы Варва́ры де́вству и по́двигу поревнова́ла еси́; ра́дуйся, рожде́нному от Де́вы Жениху́ Христу́ де́ву себе́ чи́сту вручи́ла еси́.
Ра́дуйся, ли́лие, произра́стшая в земне́м Христо́вом са́де; ра́дуйся, процве́тшая в Небе́снем Его́ вертогра́де.
Ра́дуйся, в ли́ке де́вственных после́довавшая Бо́жиему А́гнцу на Небеса́; ра́дуйся, непоро́чная а́гнице, от Христа́ венце́м блаже́нства увенча́нная.
Ра́дуйся, а́нгельскую чистоту́ явля́ющая; ра́дуйся, целому́дрию наставля́ющая.
Ра́дуйся, непоро́чностию враги́ побежда́ющая; ра́дуйся, я́ко за чистоту́ души́ и те́ла мно́гих даро́в сподо́билася еси́.
Ра́дуйся, всехва́льная Варва́ро, затво́рнице блаже́нная.
Конда́к 5.
Боготе́чною звездо́ю яви́ тя́ ми́ру житие́ твое́, блаже́нная ма́ти Варва́ро, я́ко па́че всего́ возлюби́ла еси́ Христа́ и, претерпе́в му́ки вре́менныя, изба́влена еси́ му́к ве́чных, благода́рне воспева́еши Ему́: Аллилу́иа.
И́кос 5.
Ви́деша тя́ лю́дие Уфи́мския земли́, ма́ти Варва́ро, все́ми доброде́тельми укра́шену и равноа́нгельное житие́ в стесне́нии тя́жцем провожда́вшую, прихожда́ху к тебе́, о́ви благослове́ния, о́ви наставле́ния, о́ви утеше́ния от тебе́ и́щуще: ты́ же спасе́нию челове́ческому ре́вностно служи́ла еси́ и ны́не слы́шиши от все́х пе́сни таковы́я:
Ра́дуйся, я́ко яви́лася еси́ в земле́ Уфи́мстей кре́пкая защи́тница проти́ву ху́льников Христо́вы Це́ркве; ра́дуйся, я́ко и ны́не борю́щимся с ни́ми усе́рдная посо́бнице обрета́ешися.
Ра́дуйся, проти́вников святы́ни посрами́тельнице; ра́дуйся, злы́х волко́в от ста́да Христо́ва отгна́тельнице.
Ра́дуйся, звездо́, во тьме́ су́щим сия́ющая; ра́дуйся, в годи́ну бу́иих дне́й ди́вно процве́тшая.
Ра́дуйся, от беззако́нных слу́г анти́христовых му́ченная; ра́дуйся, си́лою необори́маго Креста́ вооружи́вшаяся.
Ра́дуйся, све́те, мра́к нече́стия разгоня́ющая; ра́дуйся, Христа́ ра́ди гоне́ниям удосто́ившаяся;
Ра́дуйся, испове́дничеством твои́м лю́ди Уфи́мския земли́ в ве́ре утверди́вшая; ра́дуйся, любви́ же́ртвенней, ве́чней на́с науча́ющая.
Ра́дуйся, всехва́льная Варва́ро, затво́рнице блаже́нная.
Конда́к 6.
Пропове́дницею бы́вши житие́м твои́м ева́нгельских доброде́телей, ма́ти блаже́нная, пло́ть твою́ посто́м и моли́твою изнури́ла еси́, свои́ми по́двигами всезло́бнаго врага́ посрами́ла еси́ и во све́те Христо́вой и́стины лю́ди земли́ Уфи́мския утверди́ла еси́, поуча́я непреста́нно моли́тися, за вся́ благодари́ти и славосло́вити Го́спода, поя́ ему́: Аллилу́иа.
И́кос 6.
Возсия́ла еси́ на гора́х Ура́льских я́ко сто́лп утвержде́ния ве́рных, Варва́ро богому́драя, и из затво́ра те́снаго востекла́ еси́ на го́ру Небе́сную, отону́дуже озаря́еши хра́мы Уфи́мския земли́, в ни́хже почита́ешися по достоя́нию среди́ со́нма новому́чеников и испове́дников, и слы́шиши от ве́рных пе́ние сицево́е:
Ра́дуйся, к церко́вней слу́жбе усе́рдно с де́тства прилежа́вшая; ра́дуйся, измы́вшая ду́шу свою́ то́ками сле́зными.
Ра́дуйся, моли́тися за ны́ ко Го́споду дерзнове́ние обре́тшая; ра́дуйся, да́ры Ду́ха Свята́го в се́рдце твое́ прии́мшая.
Ра́дуйся, ме́ч духо́вный подъя́вшая; ра́дуйся, и́менем Иису́совым враги́ неви́димыя отража́вшая.
Ра́дуйся, моли́твы усе́рдная де́лательнице; ра́дуйся, язы́ком молчали́вая, умо́м хвали́вшая Бо́га.
Ра́дуйся, земли́ Уфи́мския хода́таице; ра́дуйся, я́ко заступле́нием твои́м ве́чныя сме́рти упова́ем избежа́ти.
Ра́дуйся, я́ко твои́ми моли́твами расточе́нныя ча́да церко́вныя собира́ются; ра́дуйся, я́ко Всемогу́щему Го́споду со Пречи́стою Де́вою Богоро́дицею о все́х лю́дех ру́це свои́ воздева́еши.
Ра́дуйся, всехва́льная Варва́ро, затво́рнице блаже́нная.
Конда́к 7.
Хотя́ Госпо́дь зе́млю Уфи́мскую благода́тию Свое́ю обогати́ти и да́ти о́браз хотя́щим спасти́ся, подви́же тя́, о ма́ти, на ско́рбное и богоуго́дное житие́, ты́ же усе́рдно в теплоте́ се́рдца воспева́ла еси́ Ему́ пе́снь: Аллилу́иа.
И́кос 7.
Но́вую тя́ подви́жницу яви́ Госпо́дь, блаже́нная ма́ти, я́ко по́двиги твои́ми и чудесы́ всю́ зе́млю Уфи́мскую облиста́ла еси́, мы́ же, после́довавше душеспаси́тельным стезя́м твои́м, та́ко зове́м:
Ра́дуйся, вме́сто избра́нныя пи́щи посто́м себе́ пита́вшая; ра́дуйся, вме́сто сла́дкаго пития́ слеза́ми себе́ напоя́вшая.
Ра́дуйся, на мы́сленныя враги́ по́ст и моли́тву ору́жием употреби́вшая; ра́дуйся, сицевы́ми твои́ми по́двигами Бо́жию сла́ву в ми́ре яви́вшая.
Ра́дуйся, жития́ безпло́тных возжела́вшая; ра́дуйся, в по́стничестве дре́вним пустынножи́телем поревнова́вшая.
Ра́дуйся, по́двигами пло́ть свою́ ду́ху покори́вшая; ра́дуйся, по́стников благода́тное удобре́ние.
Ра́дуйся, я́ко те́ло посто́м умертви́ла еси́; ра́дуйся, я́ко ду́шу бде́нными моли́твами оживи́ла еси́.
Ра́дуйся, я́ко поще́ния ра́ди и немо́лчнаго славосло́вия Бо́гу ра́йских сла́достей вкуша́еши; ра́дуйся, я́ко пресла́дким Пресвяты́я Тро́ицы лицезре́нием вы́ну насыща́ешися.
Ра́дуйся, всехва́льная Варва́ро, затво́рнице блаже́нная.
Конда́к 8.
Стра́нник кро́в узре́в ра́дуется и прише́д поко́й прие́млет, и ты́, блаже́нная, ра́дости испо́лнилася еси́, в хра́мине ма́лой при сельце́ водвори́вшися, отню́дуже Бо́гови вы́ну возноси́ла еси́ пе́снь: Аллилу́иа.
И́кос 8.
Вся́ теле́сне в затво́ре пребыва́я, ду́хом Престо́лу Царя́ Сла́вы предстоя́ла еси́, блаже́нная, и ны́не на́с земноро́дных моли́твою твое́ю не оставля́еши, те́мже вси́ упова́я то́ю Оте́чествия Небе́снаго дости́гнути, тебе́ зове́м:
Ра́дуйся, проро́ка Бо́жия Илии́, в пеще́ре жи́вшаго, блага́я подража́тельнице; ра́дуйся, Крести́теля Христо́ва Иоа́нна, в пусты́не обита́вшаго, ре́вностная после́довательнице.
Ра́дуйся, подви́жническаго отше́льническаго жития́ усе́рдная люби́тельнице; ра́дуйся, из ме́ст те́мных свети́вшая лю́дем равноа́нгельным твои́м житие́м.
Ра́дуйся, в ско́тьем хлеву́, я́ко а́гница ма́лая, всели́лася еси́; ра́дуйся, хра́мину те́мную и те́сную све́тлым и простра́нным пала́там предпочла́ еси́.
Ра́дуйся, Христа́ ра́ди труды́, гла́д и мра́з в затво́ре подъя́ла еси́; ра́дуйся, та́мо, я́ко в хра́ме Триипоста́снаго Бо́га, ду́шу свою́ освяти́ла еси́.
Ра́дуйся, в затво́ре многоле́тно подвиза́вшаяся; ра́дуйся, в тесноте́ главу́ глуби́ннаго зми́я сокруши́вшая.
Ра́дуйся, богомы́слием непреста́нным небе́сная бла́га созерца́вшая; ра́дуйся, в жили́ща Небе́сная вше́дшая.
Ра́дуйся, всехва́льная Варва́ро, затво́рнице блаже́нная.
Конда́к 9.
Все́ естество́ челове́ческое удиви́ся, ма́ти Варва́ро, сия́нию в тебе́ благода́ти Христо́вой и мно́гому сострада́нию к лю́дем, я́ко твори́ши пресла́вная чудеса́, во е́же пе́ти: Аллилу́иа.
И́кос 9.
Вити́йствовати жела́я, убо́гий, ка́ко возмогу́ воспе́ти ди́вная чудеса́ твоя́, блаже́нная ма́ти, а́ще не ты́ сама́ вразуми́ши мя́, оба́че побужда́ем усе́рдием, дерза́ю венча́ти тя́ си́ми похвалы́:
Ра́дуйся, прозорли́вице ди́вная, бу́дущая я́ко настоя́щая зре́вшая; ра́дуйся, я́ко лю́ди земли́ Уфи́мския спаси́тельным глаго́лам у́ст твои́х внима́ют.
Ра́дуйся, прегреше́ния сокрове́нная прозорли́во облича́ющая; ра́дуйся, скорбя́щих и не иму́щих наде́жды утеша́ющая.
Ра́дуйся, не́мощей на́ших цели́тельнице милосе́рдная; ра́дуйся, в беда́х и обстоя́ниях помо́щнице ско́рая.
Ра́дуйся, преиспо́лненная вся́кия благосты́ни; ра́дуйся, удосто́енная А́нгельскаго собесе́дования.
Ра́дуйся, в су́се ме́сте исто́чник водны́й тещи́ у Бо́га испроси́вшая; ра́дуйся, я́ко та́яжде вода́ моли́твою твое́ю чудоде́йствует.
Ра́дуйся, свеще́ неугаси́мая, моли́твою пламене́ющая; ра́дуйся, в благода́ти Бо́жией, а́ки во огни́, стоя́щая.
Ра́дуйся, всехва́льная Варва́ро, затво́рнице блаже́нная.
Конда́к 10.
Спасе́ния зало́г, Правосла́вную ве́ру, унасле́довахом от тебе́, блаже́нная Варва́ро, те́мже мо́лим тя́: от вся́ких ересе́й и раско́лов соблюди́ ны́ и помози́ на́м в Правосла́вии непоколеби́мо пребыва́ти, и ве́рно пе́ти Бо́гу: Аллилу́иа.
И́кос 10.
Стено́ю тве́рдою бу́ди на́м, всехва́льная ма́ти, с те́плою ве́рою, усе́рдием и любо́вию к тебе́ прибега́ющим, огражда́юще на́с проти́ву чу́вственных и мы́сленных враго́в на́ших, да не убои́мся и́х, но да побежда́ем моли́твами твои́ми ко Христу́ Бо́гу, зову́ще со благодаре́нием си́це:
Ра́дуйся, все́ твое́ утеше́ние и блаже́нство в нищете́ полага́вшая; ра́дуйся, всеце́ло себе́ Про́мыслу Бо́жию вручи́вшая.
Ра́дуйся, ми́ра и все́х его́ пре́лестей до́блестная презри́тельнице; ра́дуйся, нестяжа́ния тепле́йшая люби́тельнице.
Ра́дуйся, мя́гких и све́тлых оде́жд на ся́ ника́коже возложи́вшая; ра́дуйся, ру́бища, а́ки драгоце́нныя украше́ния, во все́м житии́ твое́м вы́ну носи́вшая.
Ра́дуйся, житие́м твои́м Христу́ после́довавшая; ра́дуйся, оде́жды и кро́ва лише́нным в не́драх милосе́рдия Бо́жия покро́в и убе́жище открыва́ющая.
Ра́дуйся, умерщвле́нием те́ла диа́вольскую пре́лесть низложи́вшая; ра́дуйся, я́ко за труды́ твоя́ от Христа́ Бо́га Ца́рство Небе́сное восприя́вшая.
Ра́дуйся, а́лчущих ми́лостивая корми́тельнице; ра́дуйся, в ско́рбной нищете́ су́щих всеще́драя обогати́тельнице.
Ра́дуйся, всехва́льная Варва́ро, затво́рнице блаже́нная.
Конда́к 11.
Пе́ние умиле́нное прино́сим ти́ недосто́йнии и вопие́м: хода́тайствуй за ны́ при́сно пред Бо́гом, от страсте́й неду́гующих, и пода́ждь на́м исцеле́ние и грехо́в избавле́ние, да и мы́ в ра́дости воспое́м прославля́ющему тя́ Го́споду пе́снь: Аллилу́иа.
И́кос 11.
Све́т незаходи́мый возсия́ ти́, возненави́девшей страсте́й тьму́, уго́днице Бо́жия, весе́лие же несконча́емое восприя́т тя́, до́брый по́двиг со тща́нием соверши́вшую. Те́мже, предстоя́ ны́не Престо́лу Христо́ву, помина́й на́с, пою́щих ти́ си́це:
Ра́дуйся, о кончи́не свое́й за две́ седми́цы Бо́гом извеще́нная; ра́дуйся, та́инственнаго Собесе́дника посеще́ния удосто́енная.
Ра́дуйся, се́й бесе́дою обра́дованная; ра́дуйся, я́ко сия́ бесе́да от на́с не утаи́ся.
Ра́дуйся, пред са́мою кончи́ною о́гненное искуше́ние претерпе́вшая; ра́дуйся, и тогда́ ми́ра серде́чнаго не оста́вившая.
Ра́дуйся, в затво́ре земны́й пу́ть сво́й проше́дшая; ра́дуйся, я́ко и ко Го́споду отошла́ еси́ в уедине́нии.
Ра́дуйся, десятию́ отрокови́цами на погребе́ние несо́мая; ра́дуйся, голубьми́ до ме́ста упокое́ния сопровожда́емая.
Ра́дуйся, я́ко ла́стовица легкокры́лая вознесла́ся еси́ от на́с на Не́бо; ра́дуйся, я́ко от моще́й твои́х исцеле́ния излива́ются.
Ра́дуйся, всехва́льная Варва́ро, затво́рнице блаже́нная.
Конда́к 12.
Благода́ть ве́лию даде́ тебе́ Госпо́дь боле́зни врачева́ти, де́моны прогоня́ти и стра́сти цели́ти, те́мже не забу́ди и на́с, призыва́ющих тя́, и моли́твами твои́ми от напа́стей изба́ви, да благода́рно вопие́м к Бо́гу: Аллилу́иа.
И́кос 12.
Пою́ще твое́ житие́, похваля́ем по́двиги твоя́: по́ст, моли́твы, сле́зы, коленопреклоне́ния, всено́щныя бде́ния, пло́ти умерщвле́ние, ду́ха сокруше́ние, долулега́ния, смире́ние, кро́тость, молча́ние, терпе́ние, нищету́, нестяжа́ние, и вся́ та́ чти́м, я́же любве́ ра́ди Христо́вы подъя́ла еси́, та́ко воспева́юще:
Ра́дуйся, я́ко моги́льный затво́р оста́вила еси́; ра́дуйся, я́ко оби́тель на́шу прише́ствием твои́м благослови́ла еси́.
Ра́дуйся, я́ко в не́й ны́не святы́ми моща́ми твои́ми почива́еши; ра́дуйся, я́ко подвиза́ющимся и́ноком спасе́ния упова́ние и хода́таица.
Ра́дуйся, земли́ Уфи́мския кре́пкое огражде́ние; ра́дуйся, лю́дем ея́ от искуше́ний диа́вольских хране́ние.
Ра́дуйся, я́ко тебе́ ра́ди и́мя Госпо́дне во все́х преде́лех земли́ на́шея прославля́ется; ра́дуйся, я́ко и твое́ и́мя от все́х градо́в и ве́сей воспева́ется.
Ра́дуйся, я́ко телеса́ на́ша прикоснове́нием к ра́це моще́й твои́х врачу́еши; ра́дуйся, я́ко ду́ши на́ша моли́твами твои́ми к ра́йскому блаже́нству возво́диши.
Ра́дуйся, все́м на́м наста́внице и ма́ти; ра́дуйся, исто́чник благослове́ний и ми́лостей Бо́жиих ча́дом твои́м.
Ра́дуйся, всехва́льная Варва́ро, затво́рнице блаже́нная.
Конда́к 13.
О, пречу́дная блаже́нная ма́ти на́ша Варва́ро, но́вая пра́веднице земли́ Уфи́мския, приими́ ны́не ма́лое моле́ние на́ше и принеси́ е́ ко Христу́, да сохрани́т на́с от вся́кия ско́рби и внеза́пныя сме́рти и ве́чнаго муче́ния изба́вит, да с тобо́ю воспева́ем к Нему́: Аллилу́иа.
И́кос 1.
А́нгели на небеси́ ра́довахуся, егда́ ви́деша, я́ко звезда́ у́тренняя возсия́ла еси́ над преде́лами Уфи́мския земли́, прогоня́я тьму́ грехо́вную светоза́рным твои́м житие́м, блаже́нная ма́ти, и приводя́ к све́ту Христо́ву мно́гия лю́ди, те́мже приими́ от на́с хвале́ния сицева́я:
Ра́дуйся, в небе́сней сла́ве А́нгелом уподо́бившаяся; ра́дуйся, в чи́не проро́ков, я́ко да́р прозорли́вости иму́щая, впи́санная.
Ра́дуйся, к ли́ку апо́столов, я́ко сло́вом и де́лом Христа́ благовести́вшая, сопричте́нная; ра́дуйся, в со́нме му́чеников, я́ко Христа́ ра́ди претерпе́вшая, восприя́тая.
Ра́дуйся, к собо́ру испове́дников причте́нная; ра́дуйся, с де́вствующими я́ко де́ва возвели́ченная.
Ра́дуйся, бла́г преподо́бных от ве́ка угото́ванных насле́дия удосто́енная; ра́дуйся, со все́ми святы́ми, Бо́гу угоди́вшими, уча́стие обре́тшая.
Ра́дуйся, му́драя стра́ннице, Оте́чествия го́рняго иска́вшая; ра́дуйся, но́зе твои́ в пу́ть спаси́тельный для мно́гих напра́вившая.
Ра́дуйся, в по́двизех и труде́х твои́х несконча́емо наслажда́ющаяся; ра́дуйся, Ца́рствия Небе́снаго о́бщницею явля́ющаяся.
Ра́дуйся, всехва́льная Варва́ро, затво́рнице блаже́нная.
Конда́к 1.
Избра́нной земли́ Уфи́мския ди́вной уго́днице ны́не ра́достно прино́сим ти́, о ма́ти, хвале́бныя пе́ния, ты́ же, я́ко име́я дерзнове́ние ко Христу́ Бо́гу, от вся́ких на́с бе́д свободи́, да зове́м ти́:
Ра́дуйся, всехва́льная Варва́ро, затво́рнице блаже́нная.
Моли́тва.
О, свята́я блаже́нная ма́ти Варва́ро! По́двигом до́брым подвиза́лася на земли́, восприя́ла еси́ на небесе́х вене́ц пра́вды, его́же угото́вал Госпо́дь все́м лю́бящим Его́. Те́мже предстоя́ще ра́це честны́х моще́й твои́х, ра́дуемся о пресла́внем сконча́нии земна́го жития́ твоего́ и чти́м святу́ю па́мять твою́. Ты́ же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти на́м вся́кое прегреше́ние и по́мощи на́м ста́ти проти́ву ко́зней диа́вольских, да изба́вльшеся от скорбе́й, боле́зней, бе́д и напа́стей и вся́каго зла́, благоче́стно и пра́ведно поживе́м в ны́нешнем ве́це и сподо́бимся предста́тельством твои́м ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
