Конда́к 1.

Избра́нная уго́днице Бо́жия, преподо́бная ма́ти на́ша Алекса́ндро! Велича́юще просла́вльшаго тя́ Го́спода, воспева́ем ти́ похва́льная. Ты́ же, име́ющи ве́лие дерзнове́ние ко Го́споду и Пречи́стей Его́ Ма́тери, от вся́ких искуше́ний и бе́д свободи́ тебе́ вопию́щих:

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

И́кос 1.

А́нгелов вы́шшая Всеми́лостивая Влады́чица на́ша Пресвята́я Богоро́дица избра́ тя, Алекса́ндро чу́дная, я́ко рабу́ Свою́ и́стинную и воздви́же тя́ просла́вити и́мя Сы́на Своего́ в земли́, четве́ртым уде́лом Ея́ нарече́нней. Мы́ же, ви́дяще Бо́жие о тебе́ благоволе́ние, со умиле́нием глаго́лем ти́ такова́я:

Ра́дуйся, доброде́лание от ю́ности возлюби́вшая; ра́дуйся, блаже́нство ева́нгельское стяжа́вшая.

Ра́дуйся, в ско́рбех к тебе́ прибега́ющим поможе́ние; ра́дуйся, в печа́лех ско́рое утеше́ние.

Ра́дуйся, де́в диве́евских благоти́шное приста́нище; ра́дуйся, жена́м ти́хое прибе́жище.

Ра́дуйся, вмести́лище благода́ти Бо́жия; ра́дуйся, земли́ Ру́сския пресла́вное украше́ние.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 2.

Ви́дяще избра́нничество твое́ в ди́вном о тебе́ Бо́жии промышле́нии, земна́го бо обру́чника лиши́вшися, и всю́ печа́ль на Го́спода возложи́вши, пу́ть сво́й в Ки́ев упра́вила еси́ и та́мо во оби́тели Фло́ровской под покро́вом Пресвяты́я Богоро́дицы Небе́сному Жениху́ обручи́лася еси́, благода́рно взыва́ем Бо́гу: Аллилу́иа.

И́кос 2

Ра́зум свы́ше прии́мши сло́ва Бо́жия: «И́го бо Мое́ бла́го и бре́мя Мое́ легко́ е́сть», – преподо́бная ма́ти, благо́е и́го Христо́во на себе́ подъя́ла еси́, бога́тство и сла́ву вре́менную презре́вши, вои́стину Бо́гу после́довала еси́; те́мже и мы́, прославля́юще Ди́внаго во святы́х Свои́х, воспева́ем тебе́ си́це:

Ра́дуйся, свеще́, любо́вию Христо́вою горя́щая; ра́дуйся, нищету́ Христо́ву возлюби́вшая.

Ра́дуйся, путе́м преподо́бных же́н ше́ствовавшая; ра́дуйся, свя́тости и му́дрости духо́вныя испо́лненная.

Ра́дуйся, иере́ев ти́хая ра́досте; ра́дуйся, мона́шествующих пра́вило.

Ра́дуйся, призыва́ющих тя́ в моли́твах защи́тнице; ра́дуйся, о на́с пред Бо́гом хода́таице.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 3.

Си́ла Вы́шняго вои́стину осени́ тя, егда́ Небесе́ и земли́ Цари́ца яви́ся ти́ и повеле́ изы́ти из оби́тели Фло́ровския в зе́млю избра́нную Свою́, ю́же обеща́ указа́ти тебе́. И мы́, слы́шаще о чу́дном повеле́нии се́м, пое́м Бо́гу: Аллилу́иа.

И́кос 3.

Име́ющи тща́ние о по́двизе и́ноческаго равноа́нгельнаго жития́, преподо́бная Алекса́ндро, я́ко и́стинный во́ин Христо́в на стра́жи се́рдца своего́ стоя́щи, не ве́ровала еси́ а́бие виде́нию сему́, а́ки преле́стну могу́щу бы́ти, прише́дши же ко отце́м Пече́рским, вся́ сия́ пове́дала еси́ и́м. Усмотри́вше у́бо ти́и ди́вную на тебе́ Бо́жию ми́лость, и Цари́цу Небе́сную я́ко я́зву бесово́м пропове́давше, благослови́ша испо́лнити вся́ повеле́нная ти́, на́с же научи́ша пе́ти тебе́ такова́я:

Ра́дуйся, я́ко яви́ся тебе́ Воево́да Взбра́нная; ра́дуйся, я́ко сподо́билася еси́ слы́шати повеле́ния Честне́йшия Херуви́м.

Ра́дуйся, я́ко сла́вила еси́ Сла́внейшую без сравне́ния Серафи́м; ра́дуйся, святы́ни чи́стое и честно́е жили́ще.

Ра́дуйся, по́двига стра́нничества не убоя́вшаяся; ра́дуйся, Небе́снаго Оте́чества пла́менне возжеле́вшая.

Ра́дуйся, доброде́телей вели́ких вмести́лище; ра́дуйся, отцы́ Пече́рскими нарече́нная преблаже́нною.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 4.

Бу́рю помышле́ний сумни́тельных утиша́ющи, тве́рдую ве́ру и упова́ние на Бо́га возложи́вши, преподо́бная ма́ти, вся́ глаго́лы Цари́цы Небе́сныя в се́рдце твое́м сохрани́ла еси́. И оста́вивши оби́тель, иде́же помышля́ла еси́ до конца́ дни́й свои́х подвиза́тися, во ино́е ме́сто востекла́ еси́. Мы́ же, ше́ствию твоему́ ра́дующеся, пое́м Всеблаго́му Бо́гу: Аллилу́иа.

И́кос 4.

Слы́шащи о свя́тости жития́ и́ноков Саро́вских, ма́ти Алекса́ндро, востече́ ко оби́тели то́й. На пути́ же, бли́з хра́ма ве́си Диве́евския па́ки удосто́илася еси́ слы́шати пресла́дкий гла́с Преблагослове́нныя Богоро́дицы, указу́ющия на ме́сто сие́, Е́ю возлю́бленное. И обеща́ ти́ Пречи́стая умно́жити зде́ Го́споду Бо́гу служа́щих, тебе́ же ве́рою воспева́ющих такова́я:

Ра́дуйся, возлю́бленная Цари́цею Небе́сною; ра́дуйся, избра́нная в Христо́вы неве́сты.

Ра́дуйся, прише́дшая в зе́млю обетова́нную; ра́дуйся, послу́шная во́ли Пречи́стыя.

Ра́дуйся, ру́це свои́ о на́с к Бо́гу простира́ющая; ра́дуйся, ве́ру правосла́вную утвержда́ющая.

Ра́дуйся, свя́тости ревни́тельнице; ра́дуйся, преподо́бных ра́досте.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 5.

Боготе́чную звезду́ ви́дим тя́, на Небеси́ сия́ющу в со́нме святы́х, зе́млю Ру́сскую освеща́ющу и на пу́ть пра́вый на́с, во тьме́ грехо́вней заблу́ждших, направля́ющу, приводя́щу пе́ти Творцу́ в Тро́ице: Аллилу́иа.

И́кос 5

Ви́дяще тя́, ма́ти преподо́бная, к наста́вником оби́тели Саро́вския послуша́ния ра́ди прише́дшую и во́ли своея́ совле́кшуюся, путе́м многотру́дным и ско́рбным ше́ствующую, Ду́ха Свята́го дара́ми обогати́вшуюся, о́браз смиренному́дрия зри́м и пое́м тебе́ си́це:

Ра́дуйся, все́ свое́ име́ние обнища́вшему на́с ра́ди Бо́гу преда́вшая; ра́дуйся, в ве́лиих труде́х житие́ провожда́вшая.

Ра́дуйся, в посте́ и моли́тве Бо́гу угожда́ющая; ра́дуйся, в ми́лости твое́й не оскудева́ющая.

Ра́дуйся, хра́мы мно́гия устроя́ющая; ра́дуйся, су́щим в ну́ждах помога́ющая.

Ра́дуйся, о и́ноцех Саро́вских попече́ние и промышле́ние; ра́дуйся, ни́щих и убо́гих наде́ждо и утеше́ние.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 6.

Пропове́дует житие́ твое́, ка́ко невозвра́тным жела́нием Христу́ после́довала еси́, блаже́нная ма́ти Алекса́ндро: егда́ дщи́ твоя́ в ра́нних ле́тех преста́вися, в се́м Бо́жие изволе́ние усмотри́вши, пе́ти научи́ла еси́ на́с и в ско́рби Творцу́ все́х: Аллилу́иа.

И́кос 6.

Возсия́ в тебе́ просвеще́ние и́стины, егда́ ра́зумом свои́м удивля́ла еси́ все́х к тебе́ приходя́щих, кро́тостию и́х на пу́ть пра́вый наставля́ющи и и́стины ве́ры правосла́вныя разъясня́ющи, да вси́ у́зрят све́т уче́ния Христо́ва; мы́ же с любо́вию взыва́ем ти́:

Ра́дуйся, ма́ти Алекса́ндро, Бо́гом науче́нная; ра́дуйся, да́ром разсужде́ния от Него́ почте́нная.

Ра́дуйся, в милосе́рдии святи́телю Никола́ю подо́бная; ра́дуйся, в де́лех благи́х стезя́ми его́ ше́ствующая.

Ра́дуйся, немощны́м земледе́льцем в по́ли хле́бы пожина́ющая; Ра́дуйся, во вре́мя жа́твы младе́нцы посеща́ющая.

Ра́дуйся, в де́лех жите́йских прему́драя упра́вительнице; ра́дуйся, тепло́м и любо́вию ду́ши согрева́ющая.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 7.

Хотя́щи положи́ти нача́ло устрое́нию оби́тели, преподо́бная ма́ти, три́ ке́ллии поста́вила еси́: еди́ную моли́твы ра́ди и уедине́ния, ину́ю сестра́м, прише́дшим Бо́гу угожда́ти, и тре́тию странноприи́мну, да вси́ пою́т Еди́ному Бо́гу в Тро́ице: Аллилу́иа.

И́кос 7.

Но́ваго хра́ма во сла́ву Преблагослове́нныя Богоро́дицы строи́тельница яви́лася еси́, ма́ти Алекса́ндро, и от Каза́ни спи́сок явле́нныя чудотво́рныя ико́ны Ея́ Каза́нския принесла́ еси́, да просла́вится и́мя Присноде́вы Мари́и на ме́сте се́м, Е́ю возлю́бленнем, мы́ же благода́рственно зове́м ти́:

Ра́дуйся, оби́тели Диве́евския тве́рдое основа́ние; ра́дуйся, я́ко тобо́ю на милосе́рдие Бо́жие все́ на́ше упова́ние.

Ра́дуйся, в Ки́еве мо́щи преподо́бных Пече́рских испроси́вшая; ра́дуйся, во оби́тели Диве́евской я́ко благослове́ние сия́ поста́вльшая.

Ра́дуйся, в годи́ну гла́да лю́таго о́крест живу́щих пита́вшая; ра́дуйся, моли́твою твое́ю на́с от бе́д сохраня́ющая.

Ра́дуйся, кро́ткая и му́драя в хра́ме Бо́жием распоряди́тельнице; ра́дуйся, уста́ва церко́внаго усе́рдная храни́тельнице.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 8.

Стра́нное явле́ние ви́димо бы́сть, егда́ в нощи́ коленопреклоне́нно Го́споду моли́лася еси́, да ука́жет во́лю Свою́ на освяще́ние приде́ла хра́ма Каза́нския ико́ны Бо́жия Ма́тере. Сего́ ра́ди явле́н ти́ бы́сть незри́мою руко́ю о́браз первому́ченика и архидиа́кона Стефа́на. И мы́, почита́юще его́, воспева́ем Всеблаго́му Бо́гу: Аллилу́иа.

И́кос 8.

Все́м се́рдцем свои́м, все́ю душе́ю и мы́слию Бо́га возлюби́вшая, ма́ти Алекса́ндро, первонача́льница непреста́нной моли́твы в Диве́еве яви́лася еси́ и, да́р благода́тных сле́з стяжа́вши, при́сно в трезве́нии пребыва́ла еси́. Мы́ же, ве́дуще духо́вныя по́двиги твоя́, глаго́лем такова́я:

Ра́дуйся, у ико́ны Бо́жия Ма́тере Живоно́сный Исто́чник сле́зы умиле́ния пролива́ющая; ра́дуйся, о заблу́ждших и скорбя́щих Бо́га умоля́ющая.

Ра́дуйся, преподо́бным Серафи́мом вели́кою и свято́ю нарече́нная; ра́дуйся, в по́двизех до́брых благослове́нная.

Ра́дуйся, стезю́ пра́вую на́м указу́ющая; ра́дуйся, во обстоя́ниих тя́ зову́щим помога́ющая.

Ра́дуйся, о жи́тельствующих во оби́тели твое́й я́ко о ча́дех попечи́тельнице; ра́дуйся, оби́дящим и́х стро́гая наказа́тельнице.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 9.

А́нгелов ликостоя́ния дивя́тся твоему́ милосе́рдию, ка́ко ле́гкими стопа́ми селе́ние обходи́ла еси́ и, во смире́нии и́стиннем лю́дем по́мощь подава́ющи, о ни́х усе́рдно Бо́гу моли́лася еси́; та́ко и на́с научи́ ми́лости твори́ти, воздви́гни от ле́ности и нераде́ния, да вси́ ра́достно пое́м Бо́гу: Аллилу́иа.

И́кос 9.

Вети́и многосло́внии не возмо́гут изрещи́ си́лу Бо́жию, в не́мощи телесе́ твоего́ я́вльшуюся, егда́ в ча́с отдохнове́ния от трудо́в и бде́ния, главу́ свою́ на ка́мень приклоня́ла еси́ и оде́ждею ве́тхою в зно́й и стужу́ те́ло покрыва́ла еси́; мы́ же, дивя́щеся сему́, вопие́м ти́ такова́я:

Ра́дуйся, все́м призыва́ющим тебе́ ско́рая помо́щнице; ра́дуйся, о лю́дех к тебе́ приходя́щих моли́твеннице.

Ра́дуйся, в беда́х и го́рестех николи́же оставля́ющая; ра́дуйся, к ра́йским селе́нием призыва́ющая.

Ра́дуйся, кла́дязь целе́бныя воды́ ископа́вшая; ра́дуйся, еще́ жива́ су́щи, да́р чудоде́йственныя по́мощи стяжа́вшая.

Ра́дуйся, неисчерпа́емая глубино́ любве́ и милосе́рдия; ра́дуйся, о́бразе вели́каго к Бо́гу усе́рдия.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 10.

Спасти́ хотя́ все́х притека́ющих во оби́тель Диве́евскую, о отше́ствии в ве́чныя оби́тели извести́ тя Госпо́дь, да попече́ние о сестра́х диве́евских преподо́бному Серафи́му запове́дуеши. И мы́ недосто́йнии, покрови́телей таковы́х на Небеси́ улучи́вше, благода́рственно воспева́ем Бо́гу: Аллилу́иа.

И́кос 10.

Стена́ все́м святы́м, Пресвята́я Де́ва, ди́вно упра́ви отше́ствие твое́ от жития́ сего́ вре́меннаго: в схи́му бо вели́кую облече́нная, ты́ в ча́с кончи́ны Святы́х Христо́вых Та́ин приобщи́лася еси́ и, ду́шу святу́ю в ру́це Бо́жии преда́вши, ны́не с ли́ки же́н преподо́бных зри́ши Пресвяту́ю Тро́ицу. Мы́ же, восхваля́юще житие́ твое́, глаго́лем ти́ си́це:

Ра́дуйся, сестра́м Диве́евским преподо́бнаго Серафи́ма во отца́ испроси́вшая; ра́дуйся, свети́ло земли́ Ру́сския в не́м прозре́вшая.

Ра́дуйся, чуде́сную по́мощь и по успе́нии твое́м прося́щим подаю́щая; ра́дуйся, у Престо́ла Бо́жия на́с помина́ющая.

Ра́дуйся, о во́инех, на по́ли бра́ни живо́т сво́й полага́ющих, Бо́га умоля́ющая; ра́дуйся, рыда́ния ма́терей о ча́дех утоля́ющая.

Ра́дуйся, пла́чущих и скорбя́щих уте́шительнице; ра́дуйся, о ро́де христиа́нстем пред Бо́гом предста́тельнице.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 11.

Пе́ние вознося́ все́м святы́м, в земли́ Ру́сстей просия́вшим, страстоте́рпец ца́рь Никола́й ревнова́ше о прославле́нии твое́м, ма́ти Алекса́ндро, но пре́жде са́м венце́м му́ченическим увенча́ся. Мы́ же, зря́ще ди́вное исполне́ние ча́яния его́, уми́льно вопие́м Бо́гу: Аллилу́иа.

И́кос 11.

Светопода́тельная луча́, ко Христу́ устремле́нная, яви́ся житие́ твое́, и мно́жество и́нок ко оби́телем го́рним ты́ привела́ еси́, и вси́ ча́ющии благода́тныя по́мощи твоея́ с любо́вию глаго́лют та́ко:

Ра́дуйся, от земли́ челове́ки возвыша́ющая; ра́дуйся, кро́тости и незло́бию науча́ющая.

Ра́дуйся, из во́лн жите́йских утопа́ющих изыма́ющая; ра́дуйся, свеще́, но́щь грехо́в разгоня́ющая.

Ра́дуйся, мона́шествующих укрепле́ние; ра́дуйся, сле́з го́рьких осуше́ние.

Ра́дуйся, исто́чник целе́бныя воды́ подаю́щая; ра́дуйся, больны́я и неду́жныя исцеля́ющая.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 12.

Благода́ть и ми́лость излива́еши, преподо́бная ма́ти на́ша Алекса́ндро, на все́х к тебе́ приходя́щих и к моще́м твои́м припа́дающих, и проще́ние на́м у Го́спода прося́щи, науча́еши на́с пе́ти Ему́: Аллилу́иа.

И́кос 12.

Пою́ще тебе́, ма́ти преподо́бная, восхваля́ем чудеса́ и ми́лости Бо́жия, явле́нныя ро́ду челове́ческому святы́ми Его́ уго́дники, и притека́юще во святу́ю оби́тель твою́, благода́рно взыва́ем ти́ такова́я:

Ра́дуйся, ка́меню драги́й, Христо́ву Це́рковь украша́яй; ра́дуйся, оби́тель Диве́евскую от бе́д огражда́ющая.

Ра́дуйся, святу́ю во́лю Пречи́стыя Богоро́дицы испо́лнившая; ра́дуйся, да́р сле́з благода́тных стяжа́вшая.

Ра́дуйся, я́ко смире́ние твое́ бы́сть неисповеди́мо; ра́дуйся, я́ко любы́ твоя́ бы́сть ко все́м нелицеме́рна.

Ра́дуйся, ко христиа́нскому житию́ наставля́ющая; ра́дуйся, с ве́рою к тебе́ притека́ющим помога́ющая.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 13.

О преди́вная уго́днице Бо́жия, преблаже́нная ма́ти на́ша Алекса́ндро! Приими́ сие́ ма́лое тебе́ возноси́мое моле́ние на́ше и не отступи́ от на́с моли́твами твои́ми, но я́ко иму́щи дерзнове́ние у Христа́ Бо́га на́шего, испроси́ на́м ми́лости и проще́ния в де́нь су́дный, да проше́дше пу́ть земна́го стра́нствия, невозбра́нно дости́гнем поко́я Ца́рствия Небе́снаго и со все́ми святы́ми воспое́м Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов вы́шшая Всеми́лостивая Влады́чица на́ша Пресвята́я Богоро́дица избра́ тя, Алекса́ндро чу́дная, я́ко рабу́ Свою́ и́стинную и воздви́же тя́ просла́вити и́мя Сы́на Своего́ в земли́, четве́ртым уде́лом Ея́ нарече́нней. Мы́ же, ви́дяще Бо́жие о тебе́ благоволе́ние, со умиле́нием глаго́лем ти́ такова́я:

Ра́дуйся, доброде́лание от ю́ности возлюби́вшая; ра́дуйся, блаже́нство ева́нгельское стяжа́вшая.

Ра́дуйся, в ско́рбех к тебе́ прибега́ющим поможе́ние; ра́дуйся, в печа́лех ско́рое утеше́ние.

Ра́дуйся, де́в диве́евских благоти́шное приста́нище; ра́дуйся, жена́м ти́хое прибе́жище.

Ра́дуйся, вмести́лище благода́ти Бо́жия; ра́дуйся, земли́ Ру́сския пресла́вное украше́ние.

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Конда́к 1.

Избра́нная уго́днице Бо́жия, преподо́бная ма́ти на́ша Алекса́ндро! Велича́юще просла́вльшаго тя́ Го́спода, воспева́ем ти́ похва́льная. Ты́ же, име́ющи ве́лие дерзнове́ние ко Го́споду и Пречи́стей Его́ Ма́тери, от вся́ких искуше́ний и бе́д свободи́ тебе́ вопию́щих:

Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Моли́тва.

О свята́я уго́днице Бо́жия, преподо́бная ма́ти на́ша Алекса́ндро! Приими́ усе́рдныя моли́твы на́ша, с ве́рою и любо́вию к тебе́ возноси́мыя, и помози́ на́м христиа́нския доброде́тели стяжа́ти, ве́ру кре́пкую и любо́вь к Бо́гу и к бли́жним име́ти, кре́ст скорбе́й и боле́зней в терпе́нии носи́ти. О госпоже́ на́ша и ма́ти! Прости́, благослови́, помоли́ся за на́с, да и мы́ проще́ни бу́дем, и помяни́ на́с у Престо́ла Бо́жия, да твои́ми моли́твами спаса́еми в ны́нешнем ве́це и в бу́дущем, сподо́бимся хвали́ти и воспева́ти всесвято́е и́мя Отца́, и Сы́на, и Свята́го Ду́ха, во ве́ки веко́в. Ами́нь.