Конда́к 1.

Избра́нная уго́днице Христо́ва, свята́я ма́ти Досифе́е, избра́вшая по́двигом твои́м терпе́ние и Бо́га ра́ди злострада́ние, хвале́бное пе́ние прино́сим ти́, чту́щии святу́ю па́мять твою́. Ты́ же заступи́ на́с от вра́г ви́димых и неви́димых, да зове́м ти́:

Ра́дуйся, ма́ти на́ша Досифе́е, моли́твеннице о душа́х на́ших.

И́кос 1.

А́нгелы с младе́нчества от суеты́ ми́ра охраня́ема, в сто́льнем гра́де Москве́ у ба́бки твое́й ста́рицы Порфи́рии в монастыре́ роди́тельми оста́влена была́ еси́. Мы́ же, промышле́нию Бо́жию дивя́щеся, вопие́м ти́ сицева́я:

ра́дуйся, охране́нием черто́гов монасты́рских изде́тска осене́нная; ра́дуйся, ду́х доброде́тели с млады́х ле́т восприи́мшая.

Ра́дуйся, в креще́нии твое́м и́менем си́лы и побе́ды Да́рией нарече́нная; ра́дуйся, по и́мени твоему́ и житие́ твое́ проводи́вшая.

Ра́дуйся, сла́дость послуша́ния ра́нее собла́знов ми́ра сего́ позна́вшая; ра́дуйся, огне́м боже́ственныя любве́ просвеще́нная.

Ра́дуйся, безмо́лвие все́м се́рдцем возлюби́вшая; ра́дуйся, блага́я уте́шительнице все́х в моли́тве к тебе́ прибега́ющих;

Ра́дуйся, ма́ти на́ша Досифе́е, моли́твеннице о душа́х на́ших.

Конда́к 2.

Ви́дяще твое́ к благоче́стию устремле́ние, поче́т тя́ Ду́х Святы́й охране́нием свои́м измла́да да́же до престаре́ния. Мы́ же, чудя́щеся таково́му о тебе́ промышле́нию, взыва́ем Ему́: Аллилу́иа.

И́кос 2

Разуме́ние и́стинное возыме́ла еси́, Досифе́е богому́драя, о ничто́жности жития́ сего́ и уте́х мирски́х; узре́ла бо очи́ма се́рдца твоего́ блаже́нство и́щущих на потре́бу еди́наго. Просвети́ моли́твами твои́ми и на́ша омраче́нная сердца́, да зове́м ти́:

Ра́дуйся, тве́рдость в доброде́тели сохрани́вшая; ра́дуйся, в ба́рстем до́ме на досце́ спа́вшая.

Ра́дуйся, преподо́бной Евфроси́нии в о́трочестве подража́вшая; ра́дуйся, шестьна́десяти ле́т до́м оте́ческий оста́вившая.

Ра́дуйся, стопы́ своя́ в мона́хов приста́нице напра́вившая; ра́дуйся, Досифе́ем себе́ в Тро́ице-Се́ргиевой оби́тели наименова́вшая.

Ра́дуйся, ра́ди Бо́га и сию́ Ла́вру оста́вившая, и по се́м в Ки́ев пу́ть сво́й упра́вившая; ра́дуйся, пеще́рным житие́м пло́ть свою́ ду́ху покори́вшая.

Ра́дуйся, ма́ти на́ша Досифе́е, моли́твеннице о душа́х на́ших.

Конда́к 3.

Си́ла Вы́шняго осени́ тя́, деви́це свята́я, егда́ оста́вила еси́ до́м роди́тельский, жития́ в не́м су́етнаго ра́ди. Душа́ же твоя́ устремлена́ бы́сть вы́ну к Жениху́ твоему́ Небе́сному, Его́же возжеле́ла еси́, и Ему́же моли́твы о роди́вших тя́ возноси́ла еси́, всегда́ вопия́: Аллилу́иа.

И́кос 3.

Име́я жела́ние укры́тися от ми́ра и сете́й его́ злоко́зненных, прибе́гла еси́ под кро́в уго́дников пече́рских, от поработи́ти тя́ ми́ру тща́щихся скрыва́яся. И не прия́та в Ла́вру бы́вше, со упова́нием Христо́вым в горе́ Кита́евской пеще́ру ископа́ла еси́, да моли́тву де́еши о все́х, вопию́щих ти́:

ра́дуйся, с кро́тостию во́лю Бо́жию испо́лнившая; ра́дуйся, преподо́бному Анто́нию Пече́рскому поревнова́вшая.

Ра́дуйся, в Кита́еву го́ру всели́вшаяся; ра́дуйся, суро́вую жи́знь избра́вшая.

Ра́дуйся, в хла́де и гла́де с Еди́ным Бо́гом пребы́вшая; ра́дуйся, све́та веще́ственнаго в пеще́ре себе́ лиши́вшая и о́ком ума́ све́т ве́чный узре́вшая.

Ра́дуйся, умиле́нным се́рдцем в ве́чной любви́ пребы́вшая; ра́дуйся, лю́бящих тя́ под сво́й моли́твенный покро́в прие́млющая.

Ра́дуйся, ма́ти на́ша Досифе́е, моли́твеннице о душа́х на́ших.

Конда́к 4.

Бу́рею злоко́зненных ухищре́ний ополчи́ся на тя́ вра́г вселука́вый, ви́дя твое́ к Бо́гу устремле́ние, Досифе́е всехва́льная, поколеба́ти тя́ дмя́ся. Ты́ же, у́м сво́й к Бо́гу возводя́, я́ко скала́ непристу́пная все́м сопроти́вным си́лам яви́лася еси́, не́мощь же́нскую презира́я, укрепля́ющему тя́ Христу́ вопия́: Аллилу́иа.

И́кос 4.

Слы́шание по́двигов твои́х простре́ся да́же до престо́ла ца́рскаго, богому́драя.

Императри́ца же Елисаве́та на поклоне́нии в Ки́еве бы́вшая, возжела́ше ви́дети тя́, Христа́ па́че ми́ра возлюби́вшую. И посети́в пеще́рное жили́ще твое́, дивя́ся му́дрости слове́с твои́х, умиле́нием преиспо́лнена бы́сть. Мы́ же чту́ще тя́ любо́вию, вопие́м:

Ра́дуйся, по повеле́нию императри́цы в рясофо́р постри́женная; ра́дуйся, и́ноческий чи́н, я́ко ма́нну нежда́нно обре́тшая.

Ра́дуйся, преподо́бному Ага́питу подража́вши, узельца́ со зла́том не прие́мшая; ра́дуйся, я́ко благослове́нием твои́м на зла́то сие́ в Пирого́ве це́рковь устро́ена бы́сть.

Ра́дуйся, да́р прозорли́вости име́вшая; ра́дуйся, ю́наго Про́хора, серафи́мски ко Христу́ пламене́ющаго, на по́двиг в Саро́в благослови́вшая.

Ра́дуйся, в Ла́вру Пече́рскую на пеще́ры да́льния веле́нием игу́мена приведе́нная; ра́дуйся, и та́мо по́двигов свои́х не оста́вившая.

Ра́дуйся, ма́ти на́ша Досифе́е, моли́твеннице о душа́х на́ших.

Конда́к 5.

Ви́дяще по́двиги твоя́, просла́вим Бо́га за да́нную тебе́ благода́ть окормля́ти ду́ши ко спасе́нию. И́нока Феофа́на, служа́щаго бо тебе́ все́м се́рдцем, к Паи́сию Величко́вскому напра́вила еси́, да науче́н бу́дет непреста́нной моли́тве, и навы́кнет пе́ти Бо́гу: Аллилу́иа.

И́кос 5.

Восходя́щую звезду́ на небосво́де Це́ркве Ру́сския в прише́дшем к тебе́ ю́ноше Про́хоре узре́ла еси́: стопы́ его́ напра́вив в Саро́вскую оби́тель, наставле́ние в моли́тве препо́дала еси́. О́н же, го́ры Кита́евския благослове́нием заруче́нный, я́коже не́когда Анто́ний, Афо́на благода́тию укрепле́нный, нача́т восхожде́ние к го́рнему Иерусали́му, взыва́я ти́:

Ра́дуйся, в моли́тве неотхо́дно пребы́вшая; ра́дуйся, умо́м к небеси́ непреста́нно пари́вшая.

Ра́дуйся, та́йно твори́ти доброде́тели на́с науча́ющая; ра́дуйся, к благоче́стия по́двигам на́с призыва́ющая.

Ра́дуйся, труды́ на́ши на пути́ спасе́ния моли́твами твои́ми облегча́ющая;

ра́дуйся, к тебе́ прибега́ющих ско́рая помо́щнице.

Ра́дуйся, все́х скорбя́щих благода́тная уте́шительнице; ра́дуйся, моли́твенников твои́х не оставля́ющая твои́ми пред Бо́гом хода́тайствы.

Ра́дуйся, ма́ти на́ша Досифе́е, моли́твеннице о душа́х на́ших.

Конда́к 6.

Пропове́дуют лю́дие ки́евскии тебе́ моли́твенницу и хода́таицу пред Бо́гом о ни́х бы́ти, егда́ спасе́ни бы́вше от я́звы моровы́я приня́тием от тебе́ ла́дана на благослове́ние. И изба́влени от сего́ неду́га лю́таго, жи́зней пожира́нием свире́пеющаго, благода́рно о тебе́ Бо́гу возопи́ша: Аллилу́иа.

И́кос 6.

Возсия́ гра́ду Ки́еву богопросвеще́нность ума́ твоего́, преподо́бная ма́ти, да́ром бо прозорли́вости предзре́ла еси́ приближе́ние ги́бели сея́ за грехи́ людски́я. Умилостивля́я же Христа́ Бо́га смире́нным житие́м и покая́ния слеза́ми, испроси́ла у Него́ спасе́ние от напа́сти сея́, вопию́щим ти́ та́ко:

Ра́дуйся, вся́ напа́сти Христа́ ра́ди доброво́льно претерпе́вшая; ра́дуйся, сла́дость ра́йскую го́рестию жития́ твоего́ вкуси́вшая.

Ра́́дуйся, я́ко богообще́ния ра́ди, тобо́ю всегда́ жела́ннаго, вся́ уте́хи ми́ра сего́ отве́ргшая; ра́дуйся, я́ко все́м существо́м свои́м в Бо́зе пребы́вшая.

Ра́дуйся, пу́ть Христо́в все́м се́рдцем возлюби́вшая; ра́дуйся, кре́ст сво́й любве́ ра́ди Бо́жия ра́достне поне́сшая.

Ра́дуйся, даро́в Ду́ха Свята́го преиспо́лненная; ра́дуйся, напита́тися си́ми дара́ми приходя́щих к тебе́ не отверга́ющая.

Ра́дуйся, ма́ти на́ша Досифе́е, моли́твеннице о душа́х на́ших.

Конда́к 7.

Хотя́ще слы́шати сло́во спасе́ния из у́ст твои́х, наро́да тьмы́ окружа́ше смире́нную ке́ллию твою́, блаже́нная, я́ко не́кую кре́пость. Но ты́, си́м тяготя́ся, проси́ла игу́мена Ла́вры Пече́рския отпусти́ти тя́ в го́ру Кита́евскую, тобо́ю возлю́бленную, дабы́ в тишине́ пеще́рней угото́вити ду́шу ко исхо́ду в ве́чность, открове́нием свы́ше тебе́ возвеще́нному. Мы́ же, дивя́щеся таково́му о тебе́ Бо́га попече́нию, вопие́м Ему́ усе́рдно: Аллилу́иа.

И́кос 7.

Ди́вную показу́я любо́вь к Бо́гу, бли́жняго своего́ па́че себе́ возлюби́ла еси́, ра́ди за́поведи Его́, блаже́нная. При возвеще́нии же отше́ствия твоего́ в го́рния оби́тели, умо́м и се́рдцем та́мо неотхо́дно пребыва́ющи, не забы́ла и при́сных твои́х. Сего́ ра́ди послу́шника твоего́ Феофа́на на по́двиг под покро́в Зоси́мы и Савва́тия Солове́цких благослови́ла еси́, явля́я си́м забо́ту твою́ о ча́дех твои́х. Мы́ же тебе́ вопие́м:

ра́дуйся, свеще́ неугаси́мая, в моли́тве к Бо́гу я́рко пламене́ющая; ра́дуйся, предста́тельнице на́ша в беда́х и напа́стех.

Ра́дуйся, страстьми́ одержи́мых от ги́бели спаса́ющая; ра́дуйся, клевето́ю уя́звленных от отча́яния избавля́ющая.

Ра́дуйся, на суде́ непра́веднем ско́рая защи́тнице; ра́дуйся, сле́зы пла́чущих отира́вшая.

Ра́дуйся, благода́тию Ду́ха Свята́го во тьме́ пеще́рней чуде́сно просвеща́емая; ра́дуйся, теплото́ю любве́ твоея́ олядене́вшыя ду́шы согрева́ющая.

Ра́дуйся, ма́ти на́ша Досифе́е, моли́твеннице о душа́х на́ших.

Конда́к 8.

Стра́нное чу́до яви́ся воо́чию бра́тии Пече́рския Ла́вры, егда́ ви́дяще тя́, изше́дшую из затво́рнаго пребыва́ния в ми́р, его́же бе́гала еси́ все́ житие́ твое́. Но ты́ Ду́хом Святы́м о ско́ром отше́ствии из юдо́ли пла́ча извеще́нная, пожела́ла от все́х прия́ти проще́ние, сре́тения с Женихо́м Христо́м ожида́я, Ему́же обручи́лася еси́, во умиле́нии взыва́ющи: Аллилу́иа.

И́кос 8.

Вся́ бра́тия удивля́шеся а́нгельскому смире́нию, егда́ ви́де ста́рицу, труды́ ве́лиими затво́ра пеще́рнаго изможде́нную и почте́нную дара́ми Ду́ха, ни́ц па́дшую и проще́ния грехо́в испроша́вшую. Мы́ же си́м умиля́яся, поуча́емся духо́вне, похва́льныя ти́ вопию́ще:

ра́дуйся, бре́мя скорбе́й людски́х облегча́ющая; ра́дуйся, боля́щих исцеля́ющая.

Ра́дуйся, на́ша сердца́ огне́м боже́ственныя ре́вности воспламеня́ющая; ра́дуйся, в го́рних оби́телях пребыва́ющая.

Ра́дуйся, о на́с гре́шных та́мо моля́щаяся; ра́дуйся, благи́й о́браз служе́ния Бо́гу яви́вшая.

Ра́дуйся, уничиже́нных и гони́мых ми́ром покрови́тельнице; ра́дуйся, о моля́щихся тебе́ неусы́пная пред Бо́гом хода́таице.

Ра́дуйся, ма́ти на́ша Досифе́е, моли́твеннице о душа́х на́ших.

Конда́к 9.

Вся́кое естество́ а́нгельское удиви́ся вели́кому по́двигу твоему́, ма́ти блаже́нная, я́ко жена́ су́щи, дерзнове́нно среди́ муже́й пребыва́ла еси́. Но не возже́глася еси́ по́хотне, я́ко се́но от огня́, и́бо невозмо́жно е́сть пла́мени теле́сному затми́ти о́гнь любве́ Боже́ственныя, и́мже объя́то бы́ло се́рдце твое́. И на́с, ча́д твои́х, научи́ огреба́тися ни́зменных страсте́й и пе́ти Бо́гу: Аллилу́иа.

И́кос 9.

Вети́я суему́дреныя твои́м житие́м посра́мленныя умолка́ют я́ко ры́бы безгла́сныя. Возлюби́ла бо еси́, преподо́бная ма́ти, па́че молча́ние, и богомы́слием к Спа́су Христу́ умо́м воспари́ла еси́, безпло́тным подо́бяся. Помяни́ и на́с у Престо́ла Спа́сова, тебе́ вопию́щих:

ра́дуйся, Боже́ственнаго Ду́ха носи́тельнице; ра́дуйся, красоту́ ве́ка сего́ спасе́ния ра́ди отве́ргшая.

Ра́дуйся, ревну́ющих о пра́вой ве́ре моли́твами твои́ми охраня́ющая; ра́дуйся, неве́рных и глуми́телей посрамля́ющая.

Ра́дуйся, пу́ть у́зкий, к простра́нству ра́йскому веду́щий возлюби́вшая; ра́дуйся, к сему́ пути́ спасе́ния и на́с призыва́ющая.

Ра́дуйся, ду́ши омраче́нныя ми́ра сего́ суето́ю, сло́вом твои́м просвеща́ющая; ра́дуйся, тяготы́ и ско́рби притека́ющих к тебе́ на ра́мена своя́ любо́вно возлага́ющая.

Ра́дуйся, ма́ти на́ша Досифе́я, моли́твеннице о душа́х на́ших.

Конда́к 10.

Спасе́ние хотя́щи улучи́ти, ты́ пло́ть свою́ со страстьми́ и похотьми́ распя́ла еси́, и невозвра́тно себе́ отве́ргши, кре́ст сво́й на ра́мена своя́ возложи́ла еси́ и Христу́ все́м се́рдцем после́довала еси́, поя́ Ему́: Аллилу́иа.

И́кос 10.

Царю́ Небе́сный, Уте́шителю мо́й, на вся́кий ча́с и вре́мя, та́ко взыва́ла еси́ к возлю́бленному тобо́ю и возлюби́вшему тя́ Христу́, ма́ти блаже́нная, Ему́же и ду́х сво́й предала́ еси́, в моли́тве предстоя́. На́с же, чту́щих па́мять твою́, сподо́би моли́твами твои́ми христиа́нския кончи́ны и ча́сти спаса́емых досто́йны бы́ти, да со умиле́нием зове́м ти́:

Ра́дуйся, на тру́д духо́вный на́с подвиза́ющая; ра́дуйся, от сете́й вра́жиих избавля́ющая.

Ра́дуйся, фимиа́м моли́твы твоея́, я́ко кади́ло богоприя́тное, к небеси́ вознося́щая; ра́дуйся, ми́р Бо́жий в сердца́ привнося́щая.

Ра́дуйся, пла́мень зло́бный струя́ми любве́ твоея́ угаша́ющая; ра́дуйся, де́тем благопослу́шливым благослове́ние подаю́щая.

Ра́дуйся, та́йными моли́твами на волна́х жите́йскаго мо́ря ча́да твоя́ охраня́ющая; ра́дуйся, ми́ру до́льнему пу́ть горе́ указу́ющая.

Ра́дуйся, ма́ти на́ша Досифе́е, моли́твеннице о душа́х на́ших.

Конда́к 11.

Пе́ние хвале́бное принося́ще твоему́ Христа́ ра́ди мироотрече́нию, диви́мся чу́дному смотре́нию Боже́ственному о тебе́, блаже́нная, и́же охраня́ше тя́ на все́х путе́х жи́зни твоея́, явля́я на тебе́ ди́вная и та́йная чуде́с Свои́х, понужда́ет на́с пе́ти Ему́, я́ко Творцу́ и Промысли́телю на́шему: Аллилу́иа.

И́кос 11.

Светоза́рными осиява́еми луча́ми жития́ твоего́ богоуго́днаго, блаже́нная, просвеща́емся душа́ми и телесы́, и на покая́ние подвиза́еми, мо́лим тя́: огради́ на́ша сердца́ от ненави́стнаго мра́ка страсте́й, вою́ющих на на́с, да со упова́нием зове́м ти́:

Ра́дуйся, люде́й правосла́вных Боже́ственным све́том просвеща́ющая; ра́дуйся, приходя́щих к тебе́ от ра́бства диа́воля свобожда́ющая.

Ра́дуйся, труды́ мно́гими ве́лию благода́ть стяжа́вшая; ра́дуйся, во тьме́ ми́ра сего́ благода́тиею Бо́жиею сия́вшая.

Ра́дуйся, отча́явшимся на пути́ спасе́ния ру́ку по́мощи подаю́щая; ра́дуйся, немощны́х в ве́ре укрепля́ющая.

Ра́дуйся, ду́хи зло́бы посрами́вшая; ра́дуйся, житие́м твои́м а́нгелов удиви́вшая.

Ра́дуйся, ма́ти на́ша Досифе́е, моли́твеннице о душа́х на́ших.

Конда́к 12.

Благода́тию почте́нная Христо́вою на земли́, указа́ла еси́ мно́гим пу́ть ко спасе́нию, и по сло́ву Его́: иде́же А́з е́смь, та́мо и слуга́ Мо́й бу́дет, ны́не ликовству́еши со а́нгелы на небеси́, Святу́ю Тро́ицу поя́. На́с же ду́хом немощны́х испо́лни си́л духо́вных, да досто́йни бу́дем пе́ти Бо́гу: Аллилу́иа.

И́кос 12.

Пою́ще чудеса́ твоя́, восхваля́ем ве́лии по́двиги затво́ра твоего́ и диви́мся бога́тству благода́ти, бы́вшей на тебе́. Те́мже и на́с, убо́гих сло́вом и ра́зумом, научи́ вопи́ти тебе́ си́це:

Ра́дуйся, сострада́ти стра́ждущым на́с науча́ющая; ра́дуйся, не́мощи на́ша всеусе́рдно врачу́ющая.

Ра́дуйся, е́же не ослабе́ти на пути́ кре́стнем о на́с всегда́ моля́щаяся; ра́дуйся, чту́щих па́мять твою́ от вся́ких зо́л охраня́ющая.

Ра́дуйся, ско́рбный пу́ть проше́дшая; ра́дуйся, спасе́ние ве́чное улучи́вшая.

Ра́дуйся, ко гро́бу твоему́ притека́ющым отра́ду подаю́щая; ра́дуйся, любо́вию Боже́ственною всегда́ храни́мая.

Ра́дуйся, ма́ти на́ша Досифе́е, моли́твеннице о душа́х на́ших.

Конда́к 13.

О всеблаже́нная ма́ти Досифе́е, в житии́ твое́м кре́ст тя́жкий поне́сшая, приими́ от на́с гре́шных моле́ние сие́, к тебе́ приноси́мое. Огради́ на́с моли́твами твои́ми от наве́тов духо́в тьмы́ и все́х мы́слящих на́м зла́я. Умоли́ Всеще́драго Бо́га пода́ти на́м си́лу и кре́пость, да ки́йждо во́змет кре́ст сво́й и всле́д Христу́ гряде́т, с тобо́ю вопия́ Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелы с младе́нчества от суеты́ ми́ра охраня́ема, в сто́льнем гра́де Москве́ у ба́бки твое́й ста́рицы Порфи́рии в монастыре́ роди́тельми оста́влена была́ еси́. Мы́ же, промышле́нию Бо́жию дивя́щеся, вопие́м ти́ сицева́я:

ра́дуйся, охране́нием черто́гов монасты́рских изде́тска осене́нная; ра́дуйся, ду́х доброде́тели с млады́х ле́т восприи́мшая.

Ра́дуйся, в креще́нии твое́м и́менем си́лы и побе́ды Да́рией нарече́нная; ра́дуйся, по и́мени твоему́ и житие́ твое́ проводи́вшая.

Ра́дуйся, сла́дость послуша́ния ра́нее собла́знов ми́ра сего́ позна́вшая; ра́дуйся, огне́м боже́ственныя любве́ просвеще́нная.

Ра́дуйся, безмо́лвие все́м се́рдцем возлюби́вшая; ра́дуйся, блага́я уте́шительнице все́х в моли́тве к тебе́ прибега́ющих;

Ра́дуйся, ма́ти на́ша Досифе́е, моли́твеннице о душа́х на́ших.

Конда́к 1.

Избра́нная уго́днице Христо́ва, свята́я ма́ти Досифе́е, избра́вшая по́двигом твои́м терпе́ние и Бо́га ра́ди злострада́ние, хвале́бное пе́ние прино́сим ти́, чту́щии святу́ю па́мять твою́. Ты́ же заступи́ на́с от вра́г ви́димых и неви́димых, да зове́м ти́:

Ра́дуйся, ма́ти на́ша Досифе́е, моли́твеннице о душа́х на́ших.

Моли́тва.

О прекра́сная неве́сто Христо́ва, чи́стая голуби́це, позлаще́нная Ду́хом Святы́м, де́вственная похвало́ и пеще́рная собесе́днице а́нгелов, под спу́дом ми́ра сего́ скры́вшаяся, но на све́щнице церко́внем высо́це сами́м Бо́гом поста́вленная, преподо́бная ма́ти Досифе́е! Что́ досто́йное в да́р тебе́ принесе́м кро́ме смире́нных и гре́шных моле́ний на́ших, я́же прии́мши, очи́сти я́ святы́ми твои́ми моли́твами и принеси́ к Жениху́ твоему́, Христу́ Бо́гу на́шему. Ублажа́ем тя́, оби́тели Кита́евския украше́ние, на́ша засту́пнице и храни́тельнице во тьме́ грехо́вней блужда́ющым, я́ко звезда́ путево́дная пу́ть ко Христу́ указу́ющая. Ты́ я́ко хра́брый во́ин Христо́в в борьбу́ с ду́хом зло́бы вступи́ла еси́, не́мощь же́нскую презира́я, и му́жеством от Бо́га укрепля́ема, сохрани́ла еси́ цве́т де́вства и чистоту́ целому́дрия твоего́, между́ мужа́ми житие́ провожда́я и Досифе́ем ра́ди сокры́тия от ми́ра наре́кшаяся. Моли́ Бо́га о на́с, о преподо́бная ма́ти, да не я́ростию свое́ю обличи́т на́с Госпо́дь, ниже́ гне́вом Свои́м нака́жет на́с за премно́гия грехи́ на́ша, но ми́лостию свое́ю да огради́т на́с и да да́рует на́м вре́мя на покая́ние и исправле́ние.

О преподо́бная Досифе́е! Все́х собра́вшихся во хра́ме се́м и с любо́вию чту́щих святу́ю па́мять твою́, твои́м заступле́нием осени́, и испроси́ у Царя́ си́л, Ему́же со а́нгелы предстои́ши, коему́ждо благоприя́тная во вре́менней жи́зни се́й, па́че же помози́ на́м Небе́снаго Ца́рствия дости́гнути твои́ми те́плыми моли́твами и хода́тайством ко Го́споду на́шему Иису́су Христу́, Ему́же подоба́ет вся́кая сла́ва, че́сть и поклоне́ние, со Отце́м и Святы́м Ду́хом, ны́не и при́сно, и во ве́ки веко́в. Ами́нь.