Конда́к 1.

Я́ко свети́льница яви́лася еси́ всесве́тлая, доброде́телей све́тлостию озаря́еши ве́рных исполне́ния, всея́ Го́мельския земли́ моли́твенница, хвале́бное пе́ние ти́ прино́сим, преподо́бная ма́ти на́ша Мане́фо, во вся́ких беда́х и напа́стех заступа́й на́с, гре́шных, вопию́щих к тебе́:

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

И́кос 1.

А́нгельски пожи́вшая на земли́ и А́нгелом равностоя́тельница яви́лася еси́ на Небеси́, с те́ми же и неизрече́нныя о́ныя наслажда́ешися добро́ты, преподо́бная ма́ти, помо́щнице и те́плая засту́пнице на́ша, восхваля́ем тя́ пе́сньми сицевы́ми:

Ра́дуйся, роди́телей благочести́вых пло́д целому́дренныя чистоты́; ра́дуйся, сла́во и заступле́ние гра́ду на́шему.

Ра́дуйся, на́шея земли́ прозябе́ние свято́е; ра́дуйся, Го́мелю похвало́.

Ра́дуйся, я́ко из мла́да Бо́гу послужи́ла еси́; ра́дуйся, я́ко гла́су Бо́жию в со́вести внима́вшая.

Ра́дуйся, Ца́рствия Небе́снаго насле́днице; ра́дуйся, ве́чныя сла́вы соприча́стнице.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 2.

От ю́ности твоея́ сосу́д избра́нный себе́ Бо́гу яви́ла еси́, преподо́бная ма́ти на́ша Мане́фо, до́брыми твои́ми дея́нии: воздержа́нием, моли́твою и ми́лостынею, чистото́ю душе́вною и теле́сною, любо́вию же и смиренному́дрием. Те́мже Небе́сному Царю́ и Влады́це все́х угоди́ла еси́ и, пресве́тлым Небе́сным венце́м украси́вшися, воспева́еши пе́снь: Аллилу́иа.

И́кос 2.

Ра́йскую жи́знь и та́мо святы́х селе́ние всегда́ во уме́ свое́м помина́ющи, преподо́бная, в слеза́х и воздыха́ниих серде́чных всю́ свою́ жи́знь прешла́ еси́. Сего́ ра́ди и по сме́рти Христо́с просла́ви тя́ пе́сньми сицевы́ми:

Ра́дуйся, Мане́фо, свети́льнице со́лнцу подо́бная; ра́дуйся, зерца́ло и о́бразе все́м правосла́вным лю́дем.

Ра́дуйся, пе́щь страсте́й ю́ности угаси́вшая воздержа́нием; ра́дуйся, посто́м и бде́нием пло́ть свою́ сокруши́вшая.

Ра́дуйся, до́бре преуспе́вшая ко прия́тию а́нгельскаго о́браза; ра́дуйся, ева́нгельскаго по Бо́зе жития́ ревни́тельнице.

Ра́дуйся, за́поведей Госпо́дних стро́гая исполни́тельнице; ра́дуйся, преступа́ющих о́ныя ско́ро облича́ющая.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 3.

От духо́внаго наста́вника, схиигу́мена Мака́рия, наставля́ема, послуша́ния до́брая рачи́тельнице, преподо́бная Мане́фо, от мирска́го мяте́жа удали́вшися и и́нокиня бы́вши изря́дная, до́брым по́двигом подвиза́лася еси́; и ны́не, вку́пе со ста́рцем твои́м предстои́ши у Престо́ла Влады́ки Христа́, воспева́еши пе́снь: Аллилу́иа.

И́кос 3.

Егда́ обе́ты и́ночества Го́сподеви воздала́ еси́, все́ твое́ у́мное жела́ние к Бо́гу напра́вила еси́. Мы́ же позна́вше по Бо́зе житие́ твое́, прославля́ем Бо́га, укрепи́вшаго тя́, и прино́сим тебе́ такова́я:

Ра́дуйся, Ду́ха Свята́го вселе́ние; ра́дуйся, свети́ло благоче́стия.

Ра́дуйся, оби́тели твоея́ при́сное ра́дование; ра́дуйся, преподо́бных украше́ние.

Ра́дуйся, Богому́драя ма́ти Мане́фо; ра́дуйся, и́ночествующих сла́во и похвало́.

Ра́дуйся, о́бразе терпе́ния и незло́бия; ра́дуйся, преподо́бных сонасле́днице.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 4.

Боже́ственный све́т осия́ жили́ще твое́, преподо́бная, егда́ в ча́с моли́твы твоея́ Сама́ Пречи́стая Де́ва, прише́дши к тебе́ со схимона́хом Арте́мием, рече́: Мне́ моли́ся. Сего́ ра́ди мы́ ве́руем, я́ко Де́ва Мари́я вне́млет проше́нием призыва́ющих и́мя свято́е Ея́ и Сы́ну Ея́ зову́щих: Аллилу́иа.

И́кос 4.

Слы́шаще и ви́дяще свято́е жили́ще твое́, преподо́бная, лю́дие устреми́шася вси́ к тебе́, поуча́хуся о словесе́х твои́х и по́двизех, прославля́ху Бо́га и тебе́ велича́ху, зову́ще ти́:

Ра́дуйся, Пречи́стыя Богоро́дицы ве́рная служи́тельнице; ра́дуйся, при́сно сла́вительнице и́мени Ея́ преблагослове́ннаго.

Ра́дуйся, я́ко Влады́чицею храни́мая, грехо́вных паде́ний избе́гла еси́; ра́дуйся, покро́ву Ея́ себя́ преда́вшая.

Ра́дуйся, оби́тель Ея́ я́ко ти́хое приста́нище избра́вшая; ра́дуйся, я́ко та́мо отве́ргшаяся во́ли своея́.

Ра́дуйся, Небесе́ и земли́ Цари́цу лице́зревшая; ра́дуйся, о се́м преиспо́лнившаяся ра́дости духо́вныя.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 5.

Воздержа́ние, моли́тву и любо́вь стяжа́вши, преподо́бная, о́браз и́ноческаго жития́ яви́лася еси́, в не́мже преуспе́ти посо́бствуй хода́тайством твои́м и на́м, вопию́щим пе́снь Бо́гу: Аллилу́иа.

И́кос 5.

Я́ко фи́никс процвете́ те́ло твое́ нетле́нием, преподо́бная, и, я́ко ке́др, и́же в Лива́не, умно́жишася чудеса́, принося́ще благода́тную по́мощь все́м с ве́рою приходя́щим. Мы́ же, дивя́щеся таково́му о тебе́ Бо́жию промышле́нию, со умиле́нием вопие́м ти́:

Ра́дуйся, испо́лненная Христо́вы красоты́; ра́дуйся, до́ме доброде́телей.

Ра́дуйся, благоутро́бия сокро́вище; ра́дуйся, благоче́стия сто́лпе непоколеби́мый.

Ра́дуйся, хра́ме Всесвяты́я Тро́ицы; ра́дуйся, все́х святы́х сожи́тельнице.

Ра́дуйся, смире́ния и незло́бия учи́тельнице; ра́дуйся, терпе́ния и миролю́бия наста́внице.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 6.

Услы́шана была́ еси́, ма́ти Мане́фо, от Бо́га, я́ко моли́тва твоего́ смире́ния о́блаки про́йде. Те́мже моли́твенныя воздыха́ния твоя́ Вы́шний прие́мля, даде́ уби́йце не́коему ду́х пра́в, и́мже умили́вся, в покая́ние прии́де. Вси́ же, дивя́ся чу́ду сицево́му, воспе́ша Бо́гу ди́вную пе́снь: Аллилу́иа.

И́кос 6.

Да́р Бо́жий прия́т моли́тв твои́х кре́пость, вся́ соверша́еши, преподо́бная, му́дре и пресла́вно. Мы́ же гре́шнии, любо́вию к тебе́ подвиза́еми, дерза́ем ублажа́ти тя́ си́це:

Ра́дуйся, я́ко чудесы́ Бо́г тя́ прославля́ет; ра́дуйся, я́ко твои́ми моли́твами сопроти́внии побежда́ются.

Ра́дуйся, притека́ющим к тебе́ спасе́ния хода́таице; ра́дуйся, христоимени́тым лю́дем похвало́ и утвержде́ние.

Ра́дуйся, доброде́телей украше́ние; ра́дуйся, си́рым прибе́жище.

Ра́дуйся, благоче́стия наста́внице; ра́дуйся, гре́шников испра́вительнице.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 7.

Преподо́бная ма́ти на́ша Мане́фо, вся́ су́щия с тобо́ю учи́ла еси́, глаго́ля: ча́да, никто́же, в ле́ности пребыва́й, досто́ин бу́дущих бла́г, но зако́нно зде́ стра́ждущии, та́мо зако́нно увенча́ются пра́ведными венцы́ и воспою́т Бо́гу а́нгельскую пе́снь: Аллилу́иа.

И́кос 7.

Ви́дяще, я́ко мзда́ твоя́ мно́га на небеси́, мы́ ве́рнии, житие́ твое́ земно́е разсмотре́вше, от сего́ научи́хомся, коли́ко мо́жет ве́ра, дея́ньми споспешеству́ема. Сего́ ра́ди приими́, благосе́рдая, похвалы́ сия́:

Ра́дуйся, прия́тельнице дарова́ний; ра́дуйся, хода́таице все́х ко спасе́нию.

Ра́дуйся, скорбя́щим утеше́ние; ра́дуйся, исполня́ющая ра́дости притека́ющих к тебе́.

Ра́дуйся, я́ко моли́твою и богомы́слием укрепи́лася еси́; ра́дуйся, я́ко ра́зум духо́вный прия́ла еси́.

Ра́дуйся, ми́лостиву ду́шу иму́щая; ра́дуйся, я́ко ни́щим была́ еси́ пита́тельница неоску́дная.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 8.

Се́ вои́стину испо́лнишася словеса́ Госпо́дня: Ко́сти твоя́ утучне́ют и бу́дут, я́ко вертогра́д напое́нный, и я́ко исто́чник, ему́ же не оскуде́ вода́. По Госпо́дню сему́ словеси́ и ты́, преподо́бная ма́ти, пред Отце́м Небе́сным просла́влена еси́ и со все́ми святы́ми вы́ну зове́ши Святе́й Тро́ице: Аллилу́иа.

И́кос 8.

Те́сным путе́м в житии́ свое́м ше́ствовала еси́ и Небе́сных селе́ний ра́достне дости́гла еси́, иде́же предстои́ши Престо́лу Пресвяты́я Тро́ицы, дарова́ньми чуде́с обогаща́ема. Мы́ же мы́сленно спосле́дствующе ти́, взыва́ем с любо́вию такова́я:

Ра́дуйся, си́рым и вдови́цам кре́пкая помо́щнице; ра́дуйся, гра́да на́шего стено́ необори́мая.

Ра́дуйся, все́м прибега́ющим к тебе́ во благо́е разреше́ние; ра́дуйся, все́х ка́ющихся с Бо́гом примири́тельнице.

Ра́дуйся, ми́лости пучи́но неисчерпа́емая; ра́дуйся, го́рдости прогони́тельнице.

Ра́дуйся, вражду́ющих примиря́ющая; ра́дуйся, со́вести пробужда́ющая.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 9.

Ко́ль вели́ко, преподо́бная ма́ти, человеколю́бие твое́, ве́мы вси́, и́бо пре́жде сме́рти своя́ вся́ христоимени́тыя лю́ди учи́ла еси́ разу́мно жи́ти и за́поведи Госпо́дни блюсти́, сла́ву же Ему́ возноси́ти, вопию́ще: Аллилу́иа.

И́кос 9.

Ка́ко у́бо воспое́м твое́ пресве́тлое житие́ и премно́гия твоя́ доброде́тели, преподо́бная ма́ти на́ша, зна́мения же и чудеса́, и́миже вся́ просвеща́еши, я́ко со́лнце? Того́ ра́ди ны́не во све́те святы́х пребыва́ющи, помина́й творя́щия па́мять твою́ пе́сньми сицевы́ми:

Ра́дуйся, су́щим в беда́х ско́рая помо́щнице; ра́дуйся, оби́дящих стро́гая наказа́тельнице.

Ра́дуйся, оби́димых кре́пкая защи́тнице; ра́дуйся, во успе́нии свое́м на́с не оставля́ющая.

Ра́дуйся, телеса́ на́ша безме́здне врачу́ющая; ра́дуйся, ду́ши на́ша моли́твами твои́ми спаса́ющая.

Ра́дуйся, исполни́тельнице неисповеди́мых Бо́жиих суде́б; ра́дуйся, все́м послужи́вшая до после́дняго дне́ живота́ своего́.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 10.

Коне́ц боле́зней обрела́ еси́, преподо́бная, наслажде́ние е́же в Раи́, от те́снаго бо пути́ дости́гла еси́ к простра́нству Ца́рствия Бо́жия, всему́драя, благословя́щи Бо́га пе́снию: Аллилу́иа.

И́кос 10.

Иму́щи ду́шу ми́лостиву, и чи́ст по́мысл, и се́рдце бо́дро, ве́ру небла́зненну и любо́вь вои́стину нелицеме́рну, от земли́ преста́вилася еси́ к Небе́сным и с ли́ки пра́ведных водворя́ешися. Те́мже тя́ благоче́стно сла́вим вси́ и почита́ем свяще́нными пе́сньми сицевы́ми:

Ра́дуйся, все́х преподо́бных Белору́сских сподви́жнице; ра́дуйся, ре́вностию по Бо́зе преподо́бной Евфроси́нии подража́вшая.

Ра́дуйся, Софи́и Слу́цкия великоду́шие стяжа́вшая; ра́дуйся, Валенти́не Ми́нской равноче́стная.

Ра́дуйся, цве́те нетле́ния, зе́млю Го́мельскую облагоуха́вшая; ра́дуйся, Це́ркви Бо́жия украше́ние.

Ра́дуйся, ми́ру свети́льнице всесве́тлая; ра́дуйся, жи́тельнице рая́ Небе́снаго.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 11.

Егда́ приидо́ша свяще́нницы к моги́ле твое́й, преподо́бная, хотя́щи прия́ти те́ло твое́, тогда́, гро́б откры́вше, ви́деша лежа́щия твоя́ мо́щи святоле́пно, и ра́дующися воспе́ша Бо́гу ди́вную пе́снь: Аллилу́иа.

И́кос 11.

Доброде́тели твоя́, я́ко цве́ты благоуха́нныя и я́ко ка́мение драгоце́нныя, и́миже и угоди́ла еси́ нетле́нному Царю́ и Влады́це все́х. Те́мже любо́вию пое́м тя́ и ве́рно ублажа́ем, взыва́юще тебе́ сицева́я:

Ра́дуйся, я́ко пчела́ цве́т доброде́телей му́дро изыска́вшая; ра́дуйся, да́р прозре́ния стяжа́вшая.

Ра́дуйся, дете́й моли́тве науча́ющая; ра́дуйся, от неду́га пия́нства мно́ги избавля́ющая.

Ра́дуйся, проли́тие дарова́ний духо́вных; ра́дуйся, ми́лостиво свы́ше на на́с призира́ющая.

Ра́дуйся, терпе́нием дре́внему И́ову уподо́бившаяся; ра́дуйся, святоле́пне сконча́вшаяся.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 12.

Мо́щи твоя́ положе́нныя в це́ркви, преподо́бная, благоуха́ние испуща́ют притека́ющим с ве́рою, и па́мять твоя́ весели́т сердца́ на́ша. Те́м, Влады́це предстоя́щи, помина́й на́с, с любо́вию прославля́ющих Его́ а́нгельскою пе́снию: Аллилу́иа.

И́кос 12.

Житие́ на земли́ благоче́стно сконча́вши, чи́стое селе́ние Свято́му Ду́ху яви́лася еси́, преподо́бная, просвеща́ющи с ве́рою приходя́щия к честны́м моще́м твои́м. Те́м и мы́, честну́ю твою́ обстоя́ще ра́ку, тя́ прославля́ем пе́сньми сицевы́ми:

Ра́дуйся, сокро́вище многоце́нное от земли́ возсия́вшее; ра́дуйся, мо́щи твоя́ во благослове́ние гра́ду на́шему да́вшая.

Ра́дуйся, я́ко мо́щи сия́ то́ки чуде́с источа́ют; ра́дуйся, я́ко чудеса́ от ни́х восхваля́ти тя́ благода́рне подвиза́ют.

Ра́дуйся, я́ко тле́ние не прикосну́ся косте́м твои́м; ра́дуйся, и́миже оздравля́ются бога́тии и убо́зии.

Ра́дуйся, и́миже смире́нно преклоня́ются сла́внии и имени́тии; ра́дуйся, о не́й же спаса́емся вси́.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 13.

О, преподо́бная ма́ти на́ша Мане́фо, па́мять твоя́ сла́вна и успе́ние со святы́ми! Ны́нешнее на́ша моле́ние прие́мши, моли́ Всеми́лостиваго Бо́га изба́вити гра́д на́ш от бе́д вре́менных и ве́чных, умоли́ Го́спода в де́нь стра́шнаго суда́ Его́ поми́ловати на́с и изба́вити осужде́ния ве́чнаго, да сподо́бимся воспева́ти Ему́ пе́снь хвалы́ и благодаре́ния: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельски пожи́вшая на земли́ и А́нгелом равностоя́тельница яви́лася еси́ на Небеси́, с те́ми же и неизрече́нныя о́ныя наслажда́ешися добро́ты, преподо́бная ма́ти, помо́щнице и те́плая засту́пнице на́ша, восхваля́ем тя́ пе́сньми сицевы́ми:

Ра́дуйся, роди́телей благочести́вых пло́д целому́дренныя чистоты́; ра́дуйся, сла́во и заступле́ние гра́ду на́шему.

Ра́дуйся, на́шея земли́ прозябе́ние свято́е; ра́дуйся, Го́мелю похвало́.

Ра́дуйся, я́ко из мла́да Бо́гу послужи́ла еси́; ра́дуйся, я́ко гла́су Бо́жию в со́вести внима́вшая.

Ра́дуйся, Ца́рствия Небе́снаго насле́днице; ра́дуйся, ве́чныя сла́вы соприча́стнице.

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Конда́к 1.

Я́ко свети́льница яви́лася еси́ всесве́тлая, доброде́телей све́тлостию озаря́еши ве́рных исполне́ния, всея́ Го́мельския земли́ моли́твенница, хвале́бное пе́ние ти́ прино́сим, преподо́бная ма́ти на́ша Мане́фо, во вся́ких беда́х и напа́стех заступа́й на́с, гре́шных, вопию́щих к тебе́:

Ра́дуйся, преподо́бная ма́ти на́ша Мане́фо, но́вая похвало́ и земли́ на́шея утвержде́ние.

Моли́тва.

О, преподо́бная ма́ти на́ша Мане́фо, чи́стою душе́ю твое́ю в Небе́сных оби́телех в ли́ке святы́х водвори́лася еси́, на земли́ же с на́ми телесе́м нетле́нным пребыва́еши! Ки́ими досто́йными похвалы́ просла́вим Тя́ или́ ка́ко нарече́м Тя́? Ты́ бо все́м се́рдцем возлюби́ла еси́ на́с, сама́ же па́че все́х в Зако́не Госпо́дне де́нь и но́щь поуча́лася еси́, жела́я во служе́нии бли́жним до́брым приме́ром бы́ти. Сла́вим у́бо тя́ я́ко уте́шительницу скорбя́щим, врача́ неду́гующим и предста́тельницу у престо́ла Бо́жия о спасе́нии ду́ш во ве́ки веко́в. Ами́нь.