Конда́к 1.

Избра́нней Боже́ственным промышле́нием сла́вней подви́жнице земли́ Су́здальския преподо́бней ма́тери Софи́и досто́йную че́сть и похвалу́ воздади́м я́ко святе́й уго́днице Бо́жией и усе́рдней моли́твеннице о все́х почита́ющих ея́ пречестну́ю па́мять. И ны́не припа́дающе к ея́ святы́м моще́м со умиле́нием зове́м:

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

И́кос 1.

А́нгелов ли́цы возра́довашася, ви́дяще твое́ и́ноческое житие́ в по́двизех поста́, бде́ния и богомы́слия, и я́ко единонра́вную прия́ша ду́шу твою́, досто́йно венча́нную чи́ном а́нгельским в постриже́нии мона́шестем, да бу́деши о́браз жития́ во Христе́ все́м и́щущим спасе́ния; те́мже воспева́ем ти́:

Ра́дуйся, подви́жнице просла́вленная, Бо́гом избра́нная; ра́дуйся, к чи́ну мона́шескому и ли́ку а́нгельскому сопричте́нная.

Ра́дуйся, Подвигополо́жника Христа́ все́м се́рдцем возлюби́вшая; ра́дуйся, с небе́сными си́лы Го́спода Вседержи́теля воспева́ющая.

Ра́дуйся, Бо́га Творца́ му́дрость позна́вшая; ра́дуйся, чистоту́ душе́вную труды́ неуста́нными стяжа́вшая.

Ра́дуйся, промышле́ние Вы́шняго на себе́ во благи́х испыта́вшая; ра́дуйся, Его́ Боже́ственней во́ли себе́ преда́вшая.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 2.

Ви́дящи злострада́ния жи́тельства среди́ во́лн жите́йскаго мо́ря, оста́вила еси́ тле́нная блага́ земна́я: бога́тство и вла́сть, че́сть и сла́ву великокня́жескую, в наде́жде живота́ ве́чнаго благода́рне пою́щи Бо́гу: Аллилу́иа.

И́кос 2.

Разуме́ющи вся́ су́етная и скороте́чная ми́ра сего́, покори́ся, я́ко кро́ткая а́гница, во́ли Всемогу́щаго Бо́га и, взе́мши кре́ст на ра́мо свое́, понесе́ во сле́д Христа́ Жизнода́вца. Мы́ же, смире́нию твоему́ и послуша́нию дивя́щеся, во умиле́нии пое́м ти́:

Ра́дуйся, ми́ра сего́ красоту́ тле́нную соверше́нне отве́ргшая; ра́дуйся, сла́ву его́ и бога́тство нивочто́же вмени́вшая.

Ра́дуйся, земна́го жи́тельства пре́лести скороги́бнущия отве́ргшая; ра́дуйся, в оде́жды нетле́нныя равноа́нгельнаго жития́ обле́кшаяся.

Ра́дуйся, свеще́ негаси́мая, любо́вию к Бо́гу возжже́нная; ра́дуйся, росо́ небе́сная, благода́тию Бо́жией напое́нная.

Ра́дуйся, ми́ро благоуха́нное, доброде́тельми насыще́нное; ра́дуйся, розго́ многопло́дная, от лозы́, Христа́, взраще́нная.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 3.

Си́лою свы́ше вооружи́вшися, противоста́ла еси́ все́м ко́знем диа́вольским; непреста́нным поще́нием, псалмопе́нием и терпе́нием попра́ла еси́ дре́вняго зми́я, иму́щи в се́рдцы свое́м сладча́йшее и́мя Иису́са, и те́м обрела́ еси́ поко́й душе́ свое́й, в благодаре́нии Бо́гу зову́щи: Аллилу́иа.

И́кос 3.

Иму́щи боголюби́вую ду́шу, взыска́ла еси́ Ца́рствия Небе́снаго и пра́вды его́; неуста́нным исполне́нием пра́вил жития́ мона́шескаго восхожда́ше от си́лы в си́лу и дости́гла еси́ высоты́ соверше́нства в ме́ру по́лнаго во́зраста духо́внаго. Мы́ же, сла́вяще труды́ твоя́ и доброде́тели, пое́м тебе́ сицева́я:

Ра́дуйся, искуше́ния вра́жеская си́лою свы́ше победи́вшая; ра́дуйся, по́хоть пло́ти воздержа́нием усе́рдным умертви́вшая.

Ра́дуйся, по́хоть оче́с непреста́нною моли́твою угаси́вшая; ра́дуйся, го́рдость жите́йскую нелицеме́рным смире́нием искорени́вшая.

Ра́дуйся, взошла́ бо еси́ добропобе́дно на го́ру свя́тости; ра́дуйся, узре́ла бо еси́ очи́ма души́ оби́тели небе́сныя.

Ра́дуйся, го́рлице чи́стая, к Боже́ственным черто́зем возлете́вшая; ра́дуйся, голуби́це кро́ткая, к Бо́гу возне́сшаяся.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 4.

Бу́рю помышле́ний претерпе́ла еси́, преподо́бная ма́ти Софи́е, напра́вивши стопы́ своя́ путе́м и́ноческаго жития́, оба́че позна́ла еси́ ско́ро неизглаго́ланную ра́дость обще́ния со Христо́м в непреста́нных труде́х поста́, бде́ния и моли́твы, и в ми́ре се́рдца своего́ просла́ви Всеще́драго Бо́га, пою́щи Ему́: Аллилу́иа.

И́кос 4.

Слы́шавши о мно́зех беда́х и мяте́жах ми́ра су́етнаго, утеша́шеся Бо́жиим изволе́нием ти́ жре́бия бытия́ мона́шескаго. Те́мже сла́вяще житие́ твое́ благоче́стное в по́двизех послуша́ния, целому́дрия и нестяжа́ния, воспева́ем ти́ сицева́я:

Ра́дуйся, во́лею Бо́жиею во оби́тель благоути́шную пресе́льшаяся; ра́дуйся, сокро́вище нетле́нное себе́ та́мо стяжа́вшая.

Ра́дуйся, дра́хму изги́бшую ми́ра серде́чнаго смире́нием во Христе́ обре́тшая; ра́дуйся, бога́тство, че́сть и сла́ву на би́сер Ца́рства Небе́снаго премени́вшая.

Ра́дуйся, и́бо та́мо се́рдце твое́, иде́же сокро́вище твое́; ра́дуйся, и́бо и́маши о́ное на Небеси́, иде́же че́рвь не тли́т.

Ра́дуйся, зе́рно гору́шно ве́ры доброде́ланием в дре́во ве́лие возрасти́вшая; ра́дуйся, се́мя слове́с Христо́вых бога́те уплодоноси́вшая.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 5.

Бо́жий Про́мысл простре́ над тобо́ю свяще́нный омофо́р Богоро́дицы, и в оби́тель Покро́ва Ея́ все́льшися и води́тельству Цари́цы Небе́сныя вве́рившися, обрела́ еси́ поко́й и сла́дость душе́вную, и Христу́ Бо́гу пе́снь воспе́ благода́рственную, зову́щи: Аллилу́иа.

И́кос 5.

Ви́дящи пу́ть к Ца́рствию Небе́сному, начерта́нный Христо́м во Святе́м Ева́нгелии, непоколеби́мо ше́ствоваше стезя́ми богоуго́днаго жития́ и дости́гла еси́ неизрече́нных бла́г, угото́ванных Бо́гом лю́бящим Его́. Мы́ же, твои́м житие́м назида́еми, воспева́ем ти́:

Ра́дуйся, Ца́рствия Небе́снаго пре́жде всего́ иска́вшая; ра́дуйся, ча́яние жи́зни бу́дущаго ве́ка испове́довавшая.

Ра́дуйся, за́поведи Госпо́дни в жи́тельстве испо́лнившая; ра́дуйся, к ни́щим ду́хом себе́ присовокупи́вшая.

Ра́дуйся, с пла́чущими в покая́нии утеше́ние себе́ обре́тшая; ра́дуйся, преподо́бная, с кро́ткими блаже́нство унасле́дившая.

Ра́дуйся, я́ко с а́лчущими пра́вды Бо́жия насы́тилася еси́; ра́дуйся, я́ко с ми́лостивыми от Бо́га поми́лование получи́ла еси́.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 6.

Пропове́дает земля́ Су́здальская изря́дное житие́ твое́, в доброде́телех мно́зех процве́тшее; лю́дие мирсти́и теча́ху, да у́зрят тя́, духо́вне соверше́нную, и слы́шат душеспаси́тельныя глаго́лы богому́дрых у́ст твои́х, во благодаре́нии Бо́гу зову́ще: Аллилу́иа.

И́кос 6.

Возсия́ све́т благода́ти по́двиг твои́х, просвеща́яй вся́каго челове́ка, гряду́щаго ко святе́й оби́тели Покро́ва Бо́жией Ма́тери на поклоне́ние, да хотя́щии спасти́ся прии́мут зде́ моли́твами твои́ми по́мощь от Всеще́драго Бо́га, вне́млющаго гла́су моле́ния уго́дников Свои́х. Сего́ ра́ди возглаша́ем ти́:

Ра́дуйся, в труде́х и́ноческих Бо́гом Светода́вцем просвеще́нная; ра́дуйся, огне́м свя́тости лю́дем приходя́щим возсия́вшая.

Ра́дуйся, свеще́, не под спу́дом, но на све́щнице стоя́щая; ра́дуйся, луче́, све́том Со́лнца Пра́вды вся́ облиста́ющая.

Ра́дуйся, я́ко в нощи́ ми́ра сего́ тьму́ поги́бельную прогоня́еши; ра́дуйся, я́ко во тьме́ греха́ су́щим пу́ть спасе́ния освеща́еши.

Ра́дуйся, я́ко све́том спасе́ния ду́шу свою́ освяти́ла еси́; ра́дуйся, я́ко Отца́ ми́лости и щедро́т, су́щаго на Небесе́х, просла́вила еси́.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 7.

Хотя́щи после́довати Искупи́телю ро́да челове́ческаго, ре́кшему: А́ще кто́ хо́щет по Мне́ ити́, да отве́ржется себе́ и во́зьмет кре́ст сво́й и по Мне́ гряде́т, возненави́де вся́ кра́сная бла́г земны́х и все́ю кре́постию души́ своея́ возлюби́ла еси́ Сладча́йшаго Иису́са, пою́щи Ему́: Аллилу́иа.

И́кос 7.

Но́вое сокро́вище духо́вное земли́ Су́здальской яви́ тя́ Христо́с Бо́г, суди́вый ти́ а́нгельский чи́н прия́ти и нарещи́ся Софи́ею, тезоимени́тою Прему́дрости Бо́жией, во е́же бы́ти ти́ прича́стницей домострои́тельства Бо́жия та́йны, ве́дети блага́я ве́чная и Ца́рство Небе́сное насле́дити. Мы́ же, таково́му Бо́жию изволе́нию чудя́щеся, зове́м ти́:

Ра́дуйся, промышле́ния Боже́ственнаго досто́йная избра́ннице; ра́дуйся, све́та небе́снаго земно́е зерца́ло.

Ра́дуйся, печа́ти Прему́дрости Бо́жия ди́вная носи́тельнице; ра́дуйся, благода́ти Ду́ха Свята́го непоро́чное вмести́лище.

Ра́дуйся, сосу́де златы́й чистоты́ душе́вныя и теле́сныя; ра́дуйся, о́бразе честны́й жития́ и́ноческаго.

Ра́дуйся, славосло́вию а́нгельскому непреста́нными пе́сньми подража́вшая; ра́дуйся, степе́ньми благоче́стия на ле́ствицу духо́вную возше́дшая.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 8.

Стра́нно во́лею чужде́ю устране́на бы́сть сла́вы великокня́жеския, че́сти и похва́л мирски́х лише́на бы́сть, оба́че уны́ние грехо́вное отве́ргнувши, еди́но, е́же е́сть на потре́бу, возлюби́ла еси́, благода́рственно гла́сом ра́дования Бо́гови пою́щи: Аллилу́иа.

И́кос 8.

Всю́ себе́ Го́споду Христу́ я́ко Жениху́ преда́вши, уподо́билася еси́ му́дрым де́вам, еле́ем до́брых де́л свети́льник сво́й испо́лнивши и бо́дрствующи, в ра́дости сре́тила еси́ Спаси́теля. Сего́ ра́ди ублажа́ем тя́ си́це:

Ра́дуйся, Небе́сных черто́гов богоизбра́нная насле́днице; ра́дуйся, оби́тели го́рния пресла́вная насе́льнице.

Ра́дуйся, мно́гими доброде́тельми пу́ть сво́й к небеси́ угото́вившая; ра́дуйся, слеза́ми, скорбьми́ и покая́нием стези́ своя́ ороси́вшая.

Ра́дуйся, гла́с Жениха́ Небе́снаго всера́достно услы́шавшая; ра́дуйся, пи́ра бра́чнаго жи́зни ве́чныя приобщи́вшаяся.

Ра́дуйся, Боже́ственнаго рая́ сла́дость вкуси́вшая; ра́дуйся, све́та невече́рняго приснотеку́щую ра́дость восприя́вшая.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 9.

Вся́кое плотско́е мудрова́ние упраздни́ла еси́ в себе́ си́лою Боже́ственныя благода́ти, сораспя́вши себе́ Христу́ со страстьми́ и похотьми́. До́бре во и́ночестве пожи́вши, бы́сть я́ко дре́во, насажде́нное при исхо́дищих во́д, принося́щее пло́д мно́г Бо́гу Жизнода́вцу, пою́щи: Аллилу́иа.

И́кос 9.

Вети́и многоглаго́ливии не возмо́гут изрещи́ труды́ твоя́, по́двиги и благодея́ния, и́миже угоди́ла еси́ Бо́гу, Прославля́ющему просла́вльших Его́, И́же соде́ла тя́ наро́читым сосу́дом благода́ти Своея́, из него́же излива́ются чудеса́ все́м, тя́ воспева́ющим:

Ра́дуйся, Прему́дрости Бо́жия житие́м свои́м пропове́днице; ра́дуйся, бла́гости Бо́жия в челове́цех свиде́тельнице.

Ра́дуйся, любве́ Бо́жия невреди́мое храни́лище; ра́дуйся, милосе́рдия Бо́жия достохва́льное прия́телище.

Ра́дуйся, я́ко тобо́ю сла́вится Бо́г, ди́вный во святы́х Свои́х; ра́дуйся, я́ко тобо́ю посрамля́ется диа́вол, оте́ц вся́кия лжи́.

Ра́дуйся, смире́ния своего́ ра́ди Бо́гом вознесе́нная; ра́дуйся, чистоты́ се́рдца своего́ ра́ди Го́сподом просла́вленная.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 10.

Спасти́ хотя́й вся́каго челове́ка, великодарови́тый Госпо́дь упра́ви житие́ твое́, преподо́бная ма́ти Софи́е, ты́ же испра́вила еси́ стопы́ своя́ к де́ланию за́поведей Его́. Благопослу́шливая раба́ Госпо́дня су́щи, в смиренному́дрии во́лю Небе́снаго Домовлады́ки позна́ла еси́ и вся́, запове́данная И́м, испо́лнила еси́, воспе́вши с ра́достию: Аллилу́иа.

И́кос 10.

Стена́ необори́мая бы́сть ти́ всемогу́щий Покро́в Пресвяты́я Богоро́дицы, те́мже вся́ искуше́ния духо́в зло́бы препобеди́ла еси́, в броню́ пра́вды обле́кшися, и разже́нныя стре́лы лука́ваго угаси́ла еси́, взе́мши щи́т ве́ры. Сего́ ра́ди восхваля́ем тя́ си́це:

Ра́дуйся, Пресвяты́я Богоро́дицы усе́рдная почита́тельнице; ра́дуйся, всечестна́го Покро́ва Ея́ неумолка́емое хвале́ние.

Ра́дуйся, возлю́бленная дщи́ Цари́цы Небе́сныя; ра́дуйся, ре́вностная печа́льнице пред Не́ю за единове́рнии.

Ра́дуйся, смире́нию Де́вы Мари́и благоче́стне учи́вшаяся; ра́дуйся, Ея́ святе́йшему послуша́нию неле́ностно после́довавшая.

Ра́дуйся, всеблаже́нным Ея́ омофо́ром во и́ночестве утвержде́нная; ра́дуйся, ми́лостию Богоро́дицы вся́ обе́ты мона́шества соблю́дшая.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 11.

Пе́нием по́двиг твои́х, и́хже ноша́ше неосла́бно до после́дняго издыха́ния, преподо́бная ма́ти Софи́е, утеша́емся, ви́дяще по моли́твам твои́м чудеса́ ве́лии. Сконча́вшей же тебе́ по́прище живота́ земна́го, пресели́лася еси́ в жили́ща Небе́сная, иде́же Царю́ ца́рствующих хвале́бную пе́снь воспева́еши: Аллилу́иа.

И́кос 11.

Светоприе́мную свещу́ сла́вы Бо́жия зри́м тя́, во тьме́ грехо́в на́ших светя́щую, и ко святе́й ико́не твое́й, наде́ющеся на твое́ вспоможе́ние, притека́ем, [и к моще́м твои́м с ве́рою и любо́вию припа́даем,] воспева́юще ти́ такова́я:

Ра́дуйся, я́ко по́двигом до́брым подвиза́лася еси́; ра́дуйся, я́ко кончи́ну безболе́зненну, непосты́дну, ми́рну стяжа́ла еси́.

Ра́дуйся, я́ко ве́ру пра́вую нелицеме́рно соблюла́ еси́; ра́дуйся, я́ко в ра́дость Го́спода на́шего досто́йно взошла́ еси́.

Ра́дуйся, жи́зни ве́чныя красоту́ узре́вшая; ра́дуйся, добро́ту неизрече́нную в селе́ниих вы́шних обре́тшая.

Ра́дуйся, с чи́ны а́нгельскими немо́лчно лику́ющая; ра́дуйся, со все́ми святы́ми Бо́га Творца́ славосло́вящая.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 12.

Благода́ти чу́до яви́ла еси́, пра́ведная ма́ти Софи́е, твои́м бо предста́тельством Госпо́дь па́ки возроди́ оби́тель Покро́ва Богоро́дицы во гра́де Су́здале, е́йже попусти́л бе́ в запусте́нии многоле́тне бы́ти гре́х на́ших ра́ди; сего́ ра́ди вси́, спасе́ния и́щущии, благода́рственно пою́т Бо́гови: Аллилу́иа.

И́кос 12

Пою́ще твоя́ чудеса́, блаже́нная ма́ти Софи́е, почита́ем пречестну́ю па́мять твою́, твои́м бо непреста́нным тща́нием и моли́твами пред Престо́лом Бо́жиим свята́я оби́тель, в не́йже те́лом почива́еши, вно́вь созида́ется и ми́лостию Цари́цы Небе́сныя мона́шествующими оби́льно населя́ется. Помина́юще такова́я благодея́ния, прино́сим ти́ пе́снь сию́:

Ра́дуйся, попече́нием свои́м оби́тель Покро́вскую не оставля́ющая; ра́дуйся, дерзнове́нным хода́тайством пред Бо́гом о не́й боле́знующая.

Ра́дуйся, твои́м бо предста́тельством но́выя свещи́ и́ночества та́мо возгара́ются; ра́дуйся, и́бо благода́тию Бо́жиею по проше́нием твои́м заблу́ждшии к Це́ркви обраща́ются.

Ра́дуйся, оби́тели твоея́ при́сная храни́тельнице; ра́дуйся, и́ночествующих в не́й незри́мая наста́внице.

Ра́дуйся, моли́твенно притека́ющим к тебе́ ско́рая помо́щнице; ра́дуйся, чуде́с многоразли́чных неоскудева́емый исто́чниче.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 13.

О свята́я богому́драя уго́днице Бо́жия, преподо́бная ма́ти Софи́е, приими́ благода́рственную пе́снь, ны́не ти́ возноси́мую усты́ на́шими недосто́йными. Не преста́й моли́тися о все́х, чту́щих тя́ и с любо́вию ублажа́ющих пречестну́ю па́мять твою́; не оста́ви моли́твенным предста́тельством свои́м оби́тель, в не́йже равноа́нгельному житию́ приобщи́лася еси́, во е́же пе́ти вы́ну Спаси́телю: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов ли́цы возра́довашася, ви́дяще твое́ и́ноческое житие́ в по́двизех поста́, бде́ния и богомы́слия, и я́ко единонра́вную прия́ша ду́шу твою́, досто́йно венча́нную чи́ном а́нгельским в постриже́нии мона́шестем, да бу́деши о́браз жития́ во Христе́ все́м и́щущим спасе́ния; те́мже воспева́ем ти́:

Ра́дуйся, подви́жнице просла́вленная, Бо́гом избра́нная; ра́дуйся, к чи́ну мона́шескому и ли́ку а́нгельскому сопричте́нная.

Ра́дуйся, Подвигополо́жника Христа́ все́м се́рдцем возлюби́вшая; ра́дуйся, с небе́сными си́лы Го́спода Вседержи́теля воспева́ющая.

Ра́дуйся, Бо́га Творца́ му́дрость позна́вшая; ра́дуйся, чистоту́ душе́вную труды́ неуста́нными стяжа́вшая.

Ра́дуйся, промышле́ние Вы́шняго на себе́ во благи́х испыта́вшая; ра́дуйся, Его́ Боже́ственней во́ли себе́ преда́вшая.

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Конда́к 1.

Избра́нней Боже́ственным промышле́нием сла́вней подви́жнице земли́ Су́здальския преподо́бней ма́тери Софи́и досто́йную че́сть и похвалу́ воздади́м я́ко святе́й уго́днице Бо́жией и усе́рдней моли́твеннице о все́х почита́ющих ея́ пречестну́ю па́мять. И ны́не припа́дающе к ея́ святы́м моще́м со умиле́нием зове́м:

Ра́дуйся, богому́драя ма́ти Софи́е, прехва́льная моли́твеннице земли́ Су́здальския.

Моли́тва.

О прехва́льная и пра́ведная ма́ти Софи́е, Су́здальския страны́ досточу́дная подви́жнице! Сла́вим богоуго́дное житие́ твое́, чти́м ве́лия доброде́тели твоя́, [покланя́емся честны́м моще́м твои́м,] с любо́вию лобыза́ем о́браз тво́й святы́й и с ве́рою прино́сим ти́ приле́жныя мольбы́. Бу́ди щи́т и огражде́ние оби́тели [сея́], в не́йже ре́вностно подвиза́лася еси́, от вся́каго зла́. Помози́ на́м, я́ко стра́нным и прише́льцем в ми́ре се́м, ста́ти на пу́ть и́стинный жития́ христиа́нскаго, не отврати́ лица́ своего́ от прибега́ющих ко твоему́ покрови́тельству, духо́вне умудри́ подвиза́ющияся во и́ночестве позна́ти о́браз спасе́ния, наста́ви в по́двизех смире́ния, терпе́ния и покая́ния, поспе́шествуй стяжа́ти целому́дрие, послуша́ние и любо́вь. Вразуми́ лю́ди заблу́ждшия и обрати́ я́ на пу́ть пра́вый. Умоли́ Го́спода си́л пощади́ти ны́ и дарова́ти на́м вре́мя на покая́ние, да твои́м предста́тельством сподо́бимся без поро́ка прейти́ по́прище земна́го жития́ многоско́рбнаго и бы́ти прича́стники ве́чнаго блаже́нства в небе́сных оби́телех Бо́га и Спа́са на́шего, Ему́же подоба́ет вся́кая сла́ва, че́сть и поклоне́ние ны́не и при́сно и во ве́ки веко́в. Ами́нь.