Конда́к 1.
Избра́нной пра́веднице, ди́вной предста́тельнице пред Бо́гом, пресве́тлому свети́льнику страны́ Уфи́мския и Оренбу́ргския, боголюби́вой и боголюбе́зной ма́ти Зоси́ме, благоде́тельными чудотворе́ньми утеша́ющей и наставля́ющей поклоня́ющихся с ве́рою святе́й ра́це Твое́й, ты́ на́с омраче́нных грехо́вными страстьми́, просвети́ и Твои́ми моли́твами от все́х бе́д изба́ви, да зове́м ти́:
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
И́кос 1.
А́нгельский нра́в и ду́шу непоро́чную име́я от святы́е купе́ли креще́ния, избе́гла еси́ обы́чных све́та сего́ су́етств и собла́знов, в та́йне чи́стым се́рдцем моля́ся ко Еди́ному и Всеблаго́му Бо́гу, ми́лостивно взира́ющему на кро́тких и смире́нных, сего́ ра́ди вопие́м ти́:
Ра́дуйся, ди́вное явле́ние святы́ни; ра́дуйся, Отцу́ Небе́сному возлю́бленная.
Ра́дуйся, Сы́ну Бо́жию вожделе́нная; ра́дуйся, Свято́му Ду́ху сосу́де други́й и чи́стый.
Ра́дуйся, Цари́цы Небе́сныя пла́менная почита́тельнице; ра́дуйся, пра́ведником святы́м все́м слико́внице.
Ра́дуйся, Тро́ическаго све́та зри́тельнице; ра́дуйся, в Ца́рство Небе́сное путеводи́тельнице.
Ра́дуйся, Це́ркви Христо́вой украше́ние; ра́дуйся, земны́х упова́ние.
Ра́дуйся, вене́ц нетле́ния нося́щая; ра́дуйся, наде́жда на́ша непосты́дная.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 2.
Ви́дящи наро́д жития́ твоего́ о́браз стра́нный и чу́дный, преподо́бная ма́ти Зоси́мо, вельми́ удиви́ся; те́м же и мы́, размышля́я о твои́х по́двигах, пое́м Бо́гу: Аллилу́иа.
И́кос 2.
Ра́зуму пода́тися на́м Боже́ственному помоли́ся, преподо́бная ма́ти Зоси́мо, ты́ бо, Боже́ственным сия́ющи све́том, со А́нгелы водворя́яся, приими́ от на́с хвале́ние сицева́я:
Ра́дуйся, мирски́й страсте́й не прии́мшая; ра́дуйся, от младе́нчества моли́тву ко Го́споду устна́ми твори́вшая.
Ра́дуйся, роди́телей твои́х почита́тельнице; ра́дуйся, безмо́лвия люби́тельнице.
Ра́дуйся, стра́ха Бо́жия стяжа́тельнице; ра́дуйся, све́рстников твои́х приме́р благонра́вия.
Ра́дуйся, благоче́стия ревни́тельнице; ра́дуйся, высото́ послуша́ния.
Ра́дуйся, Небе́сныя испове́днице; ра́дуйся, Бо́жиих дарова́ний исполне́ние.
Ра́дуйся, в челове́цех чу́дное удивле́ние; ра́дуйся, Сла́ва Небе́сная.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 3.
Си́лою Боже́ственной любви́ дви́жима, стопы́ ко Свято́му гра́ду Иерусали́му напра́вила еси́, ви́дя Боже́ственный о́гнь благода́тный на Гро́бе Госпо́днем в Вели́кую Суббо́ту чуде́сно возгара́емый, и си́м огне́м освяще́нная, всехва́льная ма́ти Зоси́мо, устреми́лася соверше́нно во сле́д Христа́ Спаси́теля на́шего, та́мо блаже́нный Андре́й, на ру́ки тебя́ подъя́вши, предсказа́л по́стриг в схи́му епи́скопом Андре́ем Уфи́мским. Ты́ же во умиле́нии се́рдца воспева́ла Бо́гу: Аллилу́иа.
И́кос 3.
Име́я по́мысл чи́ст, вооружи́вшися кре́пкою ве́рою в Бо́га, пути́ спаси́тельнаго держа́ся, преподо́бная ма́ти Зоси́мо, его́ соверши́ пресла́вно; наро́д же земли́ Уфи́мския и Оренбу́ргския нача́ благогове́йно тебе́ почита́ти, и мы́, удивле́нием объя́ты, возно́сим к тебе́ хвале́бныя пе́сни:
Ра́дуйся, пла́мень любве́ к Бо́гу име́вшая; ра́дуйся, не еди́ножды в Иерусали́м ходи́вшая.
Ра́дуйся, на го́ру Елео́нскую восходи́вшая; ра́дуйся, во́ду из Иорда́на приноси́вшая.
Ра́дуйся, водо́ю то́ю но́жки младе́нца Михаи́ла исцели́вшая; ра́дуйся, мона́шеский пу́ть ему́ предсказа́вшая.
Ра́дуйся, в о́трочестве Его́ кресто́м из Иерусали́ма благослови́вшая; ра́дуйся, пред Гро́бом Госпо́дним моли́твеннице преди́вная.
Ра́дуйся, о все́х ве́рных хода́таице неусы́пная; ра́дуйся, по́стников благода́тное удобре́ние.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 4.
Бу́рю страсте́й многомяте́жнаго ми́ра возненави́девшая, преподо́бная ма́ти Зоси́мо, устрани́лася еси́ суе́т, ны́не же к Бо́гу предстои́ши с Небе́сными си́лами и пое́ши ку́пно с ни́ми: Аллилу́иа.
И́кос 4.
Слы́шаще лю́ди ве́рнии о твое́м свято́м житии́, о ма́ти Зоси́мо, про́сят тя́: просвети́ и вразуми́ на́ши сердца́, мы́ же с благогове́нием вопие́м ти́ си́це:
Ра́дуйся, те́сный пу́ть спасе́ния возлюби́вшая; ра́дуйся, младе́нческое незло́бие име́вшая.
Ра́дуйся, благода́тию на́с озари́вшая; ра́дуйся, и́мя Иису́са в се́рдце свое́м при́сно носи́вшая.
Ра́дуйся, яре́м Госпо́день на вы́ю возложи́вшая; ра́дуйся, кре́ст Христо́в ра́достно поне́сшая.
Ра́дуйся, сла́ву Бо́жию умножа́ющая; ра́дуйся, А́нгельскую чистоту́ явля́ющая.
Ра́дуйся, мона́шескаго послуша́ния красото́; ра́дуйся, Уфи́мския и Оренбу́ргския страны́ свяще́нное добро́то.
Ра́дуйся, все́х благочести́во жи́ти хотя́щих наста́внице; ра́дуйся, де́лательнице блага́я.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 5.
Боже́ственным лучеза́рным све́том яви́лася преподо́бная ма́ти на́ша Зоси́мо все́м притека́ющим к тебе́. Вся́кия претерпе́ла боле́зни, ско́рби, лише́ния, гоне́ния; свое́й жи́знию показу́еши приме́р благоче́стия, взыва́я к Бо́гу: Аллилу́иа.
И́кос 5.
Ви́дя ре́вность твою́, Госпо́дь призва́ Тя́ упасти́ о́вцы своя́ в годи́ну гоне́ний от безбо́жней вла́сти; избра́нница Бо́жия в земли́ Уфи́мской и Оренбу́ргской яви́лася еси́. Сего́ ра́ди и мы́, лику́юще, воспое́м ти́:
Ра́дуйся, стро́гой и́ноческой жи́зни держа́лася еси́; ра́дуйся, за твои́ моли́твы гра́ды и ве́си сохраня́ются.
Ра́дуйся, и́стинная Бо́жия уго́днице; ра́дуйся, А́нгелом собесе́днице.
Ра́дуйся, долголе́тием от Бо́га одаре́нная; ра́дуйся, Бо́гом укрепле́нная.
Ра́дуйся, об изгна́нии из оби́тели предсказа́вшая; ра́дуйся, сокро́вищ себе́ на земле́ не стяжа́вшая.
Ра́дуйся, вра́жию ле́сть не боя́тися на́с науча́ющая; ра́дуйся, за зе́млю ру́сскую, попира́емую, вои́тельнице.
Ра́дуйся, му́драя сестра́м сове́тнице; ра́дуйся, Покрово-Енна́тския оби́тели храни́тельнице.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 6.
Пропове́днице смире́ния и покая́ния была́ еси́ ма́ти; приме́ром жития́ твоего́ незло́бие и всепроще́ние показу́я, я́ко же свеще́ неугаси́мая тьму́ неве́дения и уны́ния от приходя́щих к тебе́ отгоня́ла еси́ и все́х увещава́ла пло́ть покоря́ти и чи́стым се́рдцем пе́ти Бо́гу: Аллилу́иа.
И́кос 6.
Возсия́ла еси́ на гора́х Ура́льских, я́ко сто́лп утвержде́ния ве́рных, свята́я ма́ти Зоси́мо, во мра́ке бытия́ сего́ свети́вый лю́дям. Прие́мшая от Го́спода благода́ть разуме́ния о Святе́й Тро́ице во Иерусали́ме, преподо́бная ма́ти Зоси́мо, изба́вила еси́ ско́ро населе́ние градо́в Уфы́, Стерлитама́ка, да́льних стра́н и ве́сей от вра́жиих наве́тов и просвети́ла еси́ сия́нием благоде́тельных чуде́с твои́х. И ны́не никто́ же умолчи́т вопи́ти тебе́:
Ра́дуйся, стране́ твое́й Ура́льской сла́ва и утвержде́ние; ра́дуйся, ве́ры правосла́вныя среди́ неве́рных пропове́днице.
Ра́дуйся, да́ры Ду́ха Свята́го в се́рдце твое́ прии́мшая; ра́дуйся, благода́ти Бо́жией чи́стая струя́.
Ра́дуйся, и́менем Иису́са враги́ неви́димыя отража́вшая; ра́дуйся, чи́стая пти́ца, в гне́зда небе́сныя прия́тая.
Ра́дуйся, я́блоко благово́нное, ве́рных души́ благоуха́ющее; ра́дуйся, прекра́сная ли́лие, ве́рных сердца́ услажда́ющая.
Ра́дуйся, ра́йскаго дре́ва ве́твь млада́я; ра́дуйся, ди́вный еле́й ми́лости Бо́жией на́м источа́ющая.
Ра́дуйся, ме́ч духо́вный подъя́вшая; ра́дуйся, моли́тися за ны́ ко Го́споду дерзнове́ние обре́тшая.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 7.
Хотя́ человеколю́бец Госпо́дь яви́ти в тебе́, преподо́бная, свое́ неизрече́нное к лю́дям милосе́рдие, показа́ тя́ я́ко вои́стину свети́ло Богосве́тлое: ско́рым твои́м хода́тайством чудеса́ мно́гия пресла́вно соверша́ются. Ты́ же, ста́рице богому́драя, и при жи́зни дости́гла посеще́ния небе́сных служи́телей, благода́рне прославля́я Всевы́шняго Бо́га: Аллилу́иа.
И́кос 7.
Но́вую ви́дяще тя́ подви́жницу и чудотво́рицу в земли́ Уфи́мския и Оренбу́ргския, издале́че притека́ху к тебе́ ве́рнии в ско́рбех и боле́знех, егда́ исто́чник бли́з оби́тели ископа́ла ты́ еси́, ста́рице Зоси́мо, и благода́ть на во́ду сию́ у Святе́й Тро́ицы испроси́ла еси́ исцеля́ти теле́сныя и душе́вныя неду́ги. Сего́ ра́ди взыва́ем ти́:
Ра́дуйся, ста́рице, раба́ Госпо́дня; ра́дуйся, я́ко при жи́зни забо́ты Цари́цы Небе́сной сподо́бившаяся.
Ра́дуйся, я́ко благослове́нием и сове́тами лю́дям ве́рующим помога́ющая; ра́дуйся, я́ко из у́ст твои́х ве́рных благода́тно напоя́ющая.
Ра́дуйся, прекра́сный гро́зде, на трапе́зе Царе́вой положе́нная; ра́дуйся, от Го́спода Бо́га да́ром исцеле́ния и прозорли́вости просла́вленная.
Ра́дуйся, и святы́ми небожи́телями не оста́вленная; ра́дуйся, я́ко те́ло посто́м умертви́ла еси́.
Ра́дуйся, я́ко ду́шу бде́нными моли́твами оживи́ла еси́; ра́дуйся, на мы́сленныя враги́ по́ст и моли́тву употреби́вшая.
Ра́дуйся, духо́вною пи́щею а́лчущия пита́ющая; ра́дуйся, свято́ю водо́ю из исто́чника твоего́ жа́жду утоля́ющая.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 8.
Стра́нное и пресла́вное чу́до дарова́л ти́ Госпо́дь, ма́ти Зоси́мо: боля́щих исцеля́ти и от а́да спаса́ти, от напа́сти охраня́ти. Исцеле́нныя же тобо́ю пе́ли Бо́гу: Аллилу́иа.
И́кос 8.
Вся́ была́ в вы́шних и горе́ о́ком твоея́ души́ взира́ла еси́ непреста́нно. И ны́не заступа́еши все́х вопию́щих сицева́я:
Ра́дуйся, прови́дице ди́вная; ра́дуйся, Христу́ угоди́вшая.
Ра́дуйся, пе́рсте Бо́жий, го́рняя на́м указу́ющий; ра́дуйся, гла́с небе́сный, на по́двиги все́х зову́щий.
Ра́дуйся, чи́стая голуби́це, ве́твь ра́йскую иму́щая; ра́дуйся, прегреше́ния сокрове́нныя прозорли́во облича́еши.
Ра́дуйся, я́ко благода́ти все́м про́сиши; ра́дуйся, я́ко моли́тву о все́х прино́сиши.
Ра́дуйся, я́ко равноа́нгельно пожи́вшая; ра́дуйся, свиде́тельнице не́м жи́зни безсме́ртныя.
Ра́дуйся, гре́шников к исправле́нию приводя́щая; ра́дуйся, на пу́ть спасе́ния наставля́ющая.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 9.
Всю́ си́лу а́нгельскую, да́нную ти́ свы́ше, прия́ла еси́, преподо́бная ма́ти Зоси́мо, изгоня́ти си́лу вра́жию, и того́ ра́ди, с кро́тостию и смире́нием врачева́ла одержи́мых бесо́м, да сие́ чу́до ви́дяще, вси́ лю́дие, просла́виша Бо́га, воспева́ют хвалу́ Ему́: Аллилу́иа.
И́кос 9
Вети́и многовеща́ннии не мо́гут разуме́ти, ка́ко ты́ облича́ла безу́мие ми́ра. Иму́ще тя́, изря́дная уго́днице Христо́ва Зоси́мо, вои́тельницу проти́ву си́лы бесо́вския, те́плую моли́твенницу и предста́тельницу пред Го́сподом о на́с недосто́йных, любо́вию твое́ю побежда́емии взыва́ем ти́ си́це:
Ра́дуйся, плотски́я по́хоти умертви́вшая; ра́дуйся, доброде́тель укрепи́вшая.
Ра́дуйся, Святы́х Ду́хом селе́ние; ра́дуйся, скорбя́щим утеше́ние.
Ра́дуйся, си́лу чуде́с от Бо́га яви́вшая; ра́дуйся, одержи́мых бесо́м исцеля́ющая.
Ра́дуйся, бесо́вския си́лы прогоня́ющая; ра́дуйся, ко́зни диа́вольския побежда́ющая.
Ра́дуйся, боля́щих здра́вие и врачева́ние; ра́дуйся, бе́дствующих защи́тительнице.
Ра́дуйся, ко спасе́нию предводи́тельнице; ра́дуйся, Небе́снаго Царя́ избра́ннице преди́вная.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 10.
Спасти́ся все́м хотя́й преблаги́й Госпо́дь, яви́ тя́, ма́ти Зоси́мо помо́щницу правосла́вным лю́дям во вре́мя богобо́рных гоне́ний. Ви́дя твое́ безме́рное ко все́м благосе́рдие, кто́ не умили́тся, поя́ Бо́гу: Аллилу́иа.
И́кос 10.
Стена́ еси́ и тве́рдое прибе́жище на́м, на земли́ Ура́льской живу́щим и к заступле́нию твоему́ прибега́ющим, чудотво́рице Зоси́мо. Те́м же в беда́х, ско́рбех, обстоя́ниих и лише́ниих мно́гие пребыва́юще, ра́дуяся твоему́ о ни́х заступле́нию, благода́рне возглаша́ют ти́:
Ра́дуйся, ми́ра и все́х его́ пре́лестей презри́тельнице; ра́дуйся, тружда́ющихся по́моще.
Ра́дуйся, уны́лых бо́дросте; ра́дуйся, немощны́х укрепле́ние.
Ра́дуйся, молчали́вых и кро́тких ра́досте; ра́дуйся, о́браз Бо́гу пре́данности.
Ра́дуйся, наста́вников на́ших от па́губы охрани́тельнице; ра́дуйся, Бо́жиих повеле́ний исполни́тельнице.
Ра́дуйся, броня́ пра́вды враго́в отража́ющая; ра́дуйся, на враго́в стре́лы стра́ха испуска́ющая.
Ра́дуйся, щи́те тве́рдый па́че ме́дянаго; ра́дуйся, защи́тнице на́ша неусы́пная.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 11.
Пе́ние хвале́бное прино́сим ти́, ма́ти Зоси́мо, по сме́рти возше́дшая в Го́рний Иерусали́м. Егда́ приспе́ вре́мя разлучи́тися от телеси́, о ди́вная ма́ти, с благода́рностью возопи́ла еси́ Бо́гу: Аллилу́иа.
И́кос 11.
Свети́ло была́ земли́ Уфи́мской и Оренбу́ргской и все́х о́крест лежа́щих земе́ль, ты́ бо, ма́ти на́ша Зоси́мо, пресе́льшися на Не́бо душе́ю свое́ю, показу́еши пу́ть и́стинному спасе́нию. Сего́ ра́ди, прославля́ющи Тя́, глаго́лем:
Ра́дуйся, де́нь сме́рти свое́й прови́девшая; ра́дуйся, все́х бли́зких к себе́ собра́вшая.
Ра́дуйся, погребсти́ себя́ не веле́вшая, доко́ле не услы́шат а́нгельскаго пе́ния; ра́дуйся, наслажда́ющаяся Небе́снаго весе́лия.
Ра́дуйся, благоуха́нием и све́том невеще́ственным по сме́рти озаре́нная; ра́дуйся, нетле́нною диади́мою Ца́рствия Христо́ва украше́нная.
Ра́дуйся, я́ко кончи́ну твою́ ко́локола чуде́сно извести́ли еси́; ра́дуйся, гро́б тво́й А́нгелами сопровожда́лся еси́.
Ра́дуйся, Херуви́мской пе́снею твое́ успе́ние А́нгели воспе́ша; ра́дуйся, я́ко на моги́ле твое́й сто́лп о́гненный мно́гим яви́лся еси́.
Ра́дуйся, я́ко от гро́ба твоего́ ве́рнии получа́ют исцеле́ние; ра́дуйся, теле́с на́ших здра́вие и ду́ш спасе́ние.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 12.
Благода́ть Боже́ственную испроси́ на́м, свята́я уго́днице Бо́жия, да научи́т ны́ подража́ти тебе́ в чистоте́ а́нгельстей и незло́бии, да напра́вит се́рдца на́ша к смире́нию, покая́нию и неосла́бному исполне́нию за́поведей Христо́вых: да да́рует на́м христиа́нскую кончи́ну и безбе́дно проведе́т на́с чрез возду́шныя мыта́рства, да сподо́бимся та́мо узре́ти Вели́каго Бо́га и ве́чно пе́ти Ему́: Аллилу́иа.
И́кос 12.
Пою́ще твое́ житие́, восхваля́ем по́двиги твои́: по́ст, моли́твы, всено́щныя бде́ния, пло́ти умерщвле́ние, ду́ха сокруше́ние, смире́ние, кро́тость, безмо́лвие. Ты́ на́м, ма́ти преподо́бная, на пути́ пра́вом лу́ч еси́ указу́ющий. Сего́ ра́ди приими́ пе́ние похва́льное:
Ра́дуйся, безро́потно пу́ть земно́й соверши́вшая; ра́дуйся, по кончи́не оби́тель Покрово-Енна́тскую прише́ствием свои́м благослови́вшая.
Ра́дуйся, взо́ром неви́димо в не́й пребыва́ющая; ра́дуйся, я́ко в не́й ны́не моща́ми твои́ми почива́ющая.
Ра́дуйся, я́ко подвиза́ющимся и́нокам благода́ть подаю́щая; ра́дуйся, ду́ши на́ши к стопа́м Го́спода поверга́ющая.
Ра́дуйся, страны́ Ура́льския но́вый щи́т и огражде́ние; ра́дуйся, лю́дям ея́ от искуше́ний вра́жиих схи́мнице непресту́пная.
Ра́дуйся, твои́ми чудотворе́ньми И́мя Го́спода прославля́ется; ра́дуйся, я́ко и́мя твое́ во все́х преде́лах земли́ воспева́ется.
Ра́дуйся, Це́рковь Святу́ю от раско́ла и неве́рия сохраня́ющая; ра́дуйся, похвало́ оби́тели мона́хов и всея́ страны́ на́шея.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 13.
О, всехва́льная и преди́вная преподо́бная ма́ти Зоси́мо, мо́лимся и вопие́м ти́ всеусе́рдно: приими́ ма́лое сие́ от на́с моле́ние, умоли́ Ми́лостиваго Бо́га, да изба́вит на́с от вся́ких бе́д и бу́дущих му́к, вопию́щих: Аллилу́иа.
И́кос 1.
А́нгельский нра́в и ду́шу непоро́чную име́я от святы́е купе́ли креще́ния, избе́гла еси́ обы́чных све́та сего́ су́етств и собла́знов, в та́йне чи́стым се́рдцем моля́ся ко Еди́ному и Всеблаго́му Бо́гу, ми́лостивно взира́ющему на кро́тких и смире́нных, сего́ ра́ди вопие́м ти́:
Ра́дуйся, ди́вное явле́ние святы́ни; ра́дуйся, Отцу́ Небе́сному возлю́бленная.
Ра́дуйся, Сы́ну Бо́жию вожделе́нная; ра́дуйся, Свято́му Ду́ху сосу́де други́й и чи́стый.
Ра́дуйся, Цари́цы Небе́сныя пла́менная почита́тельнице; ра́дуйся, пра́ведником святы́м все́м слико́внице.
Ра́дуйся, Тро́ическаго све́та зри́тельнице; ра́дуйся, в Ца́рство Небе́сное путеводи́тельнице.
Ра́дуйся, Це́ркви Христо́вой украше́ние; ра́дуйся, земны́х упова́ние.
Ра́дуйся, вене́ц нетле́ния нося́щая; ра́дуйся, наде́жда на́ша непосты́дная.
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Конда́к 1.
Избра́нной пра́веднице, ди́вной предста́тельнице пред Бо́гом, пресве́тлому свети́льнику страны́ Уфи́мския и Оренбу́ргския, боголюби́вой и боголюбе́зной ма́ти Зоси́ме, благоде́тельными чудотворе́ньми утеша́ющей и наставля́ющей поклоня́ющихся с ве́рою святе́й ра́це Твое́й, ты́ на́с омраче́нных грехо́вными страстьми́, просвети́ и Твои́ми моли́твами от все́х бе́д изба́ви, да зове́м ти́:
Ра́дуйся, преподо́бная ма́ти Зоси́мо, те́плая о на́с к Бо́гу моли́твеннице.
Моли́тва пе́рвая.
О, вели́кая уго́днице и пресла́вная чудотво́рице преподо́бная ма́ти Зоси́мо, душе́ю на Небеси́ Престо́лу все́х Царя́ предстоя́щая, те́лом же во святе́й оби́тели се́й почива́ющая! Разли́чныя чудеса́ повсю́ду твои́ми моли́твами соверша́ются. При́зри ми́лостивно на предстоя́щия и твоего́ ко Го́споду Бо́гу хода́тайства в обдержа́щих ну́ждах лю́ди прося́щия: вси́ бо мы́, по мно́жеству грехо́в на́ших, не то́чию не сме́ем принести́ когда́ моле́бный гла́с, но и возвести́ оче́с свои́х на не́бо; ты́ же, я́ко стяжа́вшая дерзнове́ние, принеси́ за все́х, к честне́й ра́це твое́й притека́ющих, те́плыя моли́твы ко Го́споду, во е́же изба́витися на́м от гла́да, пото́па, тру́са, огня́ и бра́ни, от люде́й от диа́вола быва́ющих, и от вся́кия душе́вныя и теле́сныя боле́зни. Да изба́вльшися от си́х и рабо́тая Го́споду, Ему́же предстои́ши, вни́дем в несконча́емый поко́й и просла́вим та́мо с тобо́ю все́х благи́х пода́теля Бо́га всегда́, ны́не и при́сно и во ве́ки веко́в. Ами́нь.
Моли́тва втора́я.
О, преизя́щная и вели́кая уго́днице Госпо́дня преподо́бная ма́ти Зоси́мо! Похваля́ем твоя́ сла́вная чудотворе́ния, прославля́ем житие́ твое́ свято́е; никто́же возмо́жет исчести́ терпе́ние и по́двиги твоя́ святы́я. Не еди́ножды ходи́ла ты́ на святу́ю Иерусали́мскую зе́млю ко Гро́бу Госпо́дню и та́м соверша́ла усе́рдныя моле́ния за страну́ на́шу, за Це́рковь Правосла́вную и за наро́д ру́сский. Егда́ же пости́гло еси́ Ру́сь святу́ю лихоле́тие безбо́жия, не оста́вила оби́тель Покрово-Енна́тскую, разделя́я горе́ и страда́ния наро́да и Це́ркви на́шей Свято́й, мона́хинею пребыва́я да́же до выдворе́ния. Ве́ра твоя́, кро́тость, смире́ние, терпе́ние умиля́ли сердца́ с тобо́ю су́щих во оби́тели.
В го́ды бра́ни ты́, ма́ти Зоси́мо, спаса́ла мно́гих от го́ря, уны́ния и отча́яния жи́знь свою́ самово́льне оста́вити хоте́вших. Ты́ зна́еши ну́жды и печа́ли на́ши, преподо́бная ма́ти Зоси́мо, зна́еши и жела́ние на́ше со Христо́м пребыва́ти.
Воспомяни́ о на́с, преподо́бная ма́ти, у Престо́ла Госпо́дня, я́коже обеща́ла помога́ти все́м обрати́вшимся к тебе́. И поны́не не оскудева́ет о тебе́ па́мять на земле́ Уфи́мской и Оренбу́ргской, с ве́рою и упова́нием притека́ют лю́дие правосла́вныя к ме́сту упокое́ния твоего́. Про́сим же тя́, свята́я пра́веднице, помози́ на́м в тру́дный ча́с жи́зни, в мину́ту скорбе́й и страда́ний, умоли́ Нача́льника ми́ра Го́спода, да умягчи́т злы́я сердца́ челове́ческия, да умири́т наро́ды, да разори́т нечести́выя сове́ты раско́льников и еретико́в, возстаю́щих на Це́рковь Ру́сскую. Твои́ми моли́твами, свята́я избра́ннице Бо́жия, да прости́т на́м Госпо́дь вся́кия прегреше́ния, да мину́ют на́с стре́лы вра́жия и ко́зни диа́вольския. Испроси́ у Творца́ и Промысли́теля жи́зни на́шея Го́спода вре́мя на покая́ние, от па́губы избавле́ние, боля́щим здра́вие, па́дшим возста́ние, скорбя́щим утеше́ние, ча́дом в стра́се Бо́жием воспита́ние и Небе́снаго Ца́рствия насле́дование.
Бу́ди, ма́ти Зоси́мо, покрови́тельницею и помо́щницею все́м ве́рным земли́ Уфи́мской и Оренбу́ргской. Да укрепи́тся и умно́жится в не́й и во все́й вели́кой Руси́ Свято́е Правосла́вие. Мы́ же, укрепля́еми твои́ми моли́твами, просла́вим Живонача́льную Тро́ицу ны́не и при́сно и во ве́ки веко́в. Ами́нь.
