Конда́к 1.

Избра́нная уго́днице и неве́сто Христо́ва, при́сная о душа́х на́ших моли́твеннице, благода́рственныя песнопе́ния прино́сим ти́, богоно́сная ма́ти на́ша Серафи́мо, велича́я пресла́вныя труды́ твоя́ в Леу́шинстем уде́ле Пресвяте́й Богоро́дицы и му́ченическую кончи́ну твою́ в оби́тели Ферапо́нтовстей, про́сим у́бо тя́ о дарова́нии на́м о́браза жития́ благочести́ваго, ве́рующе, я́ко ты́ предста́тельством твои́м от вся́ких бе́д свобожда́еши и насле́дники Ца́рствия Бо́жия на́с сотворя́еши, зову́щих ти́ си́це:

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

И́кос 1.

А́нгельскою любо́вию Христа́ Спаси́теля от ю́ности возлюби́вшая, свята́я ма́ти на́ша Серафи́мо, нелицеме́рно в богообще́нии, бла́гости и чистоте́ пожи́вше, житие́ твое́ с неземно́ю ра́достию в о́браз подража́ния на́м оста́вльшая, ему́ же чудя́щеся и кончи́ну твою́ му́ченическую воспева́юще, зове́м ти́ гла́сы хвале́бными си́це:

Ра́дуйся, благу́ю ча́сть от у́тра жития́ твоего́ избра́вшая;

Ра́дуйся, се́мя Христо́ва уче́ния в се́рдце свое́м возрасти́вшая.

Ра́дуйся, святу́ю ду́шу твою́ за и́мя Иису́сово положи́вшая;

Ра́дуйся, благода́ть моли́твы за ны́ ко Святе́й Тро́ице улучи́вшая.

Ра́дуйся, я́ко тобо́ю прие́млем теле́сных боле́зней исцеле́ние;

Ра́дуйся, я́ко твои́м за ны́ хода́тайством упова́ем прия́ти грехо́в проще́ние.

Ра́дуйся, я́ко тобо́ю разли́чных искуше́ний избега́ем;

Ра́дуйся, я́ко предста́тельством твои́м в разли́чных беда́х скоре́йшую по́мощь обрета́ем.

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 2.

Ви́дящи, избра́ннице Бо́жия, во Святе́м Креще́нии Елисаве́тою нарече́нная, те́плую любо́вь твою́ ко Го́споду, а́ки ма́ти Предте́чи Христо́ва, яви́ла еси́ от дне́й де́тства твоего́, благочести́выми роди́тели твои́ма в ве́ре и зако́не Госпо́днем наставля́ема, я́ко па́че всего́ земна́го Иису́са Сладча́йшаго возлюби́ла еси́, преуспева́ла еси́ во́зрастом и благода́тию у Бо́га и челове́к, о чесо́м роди́тели твои́ и ю́жики ра́дующеся, Бо́гу же о тебе́ взыва́ху: Аллилу́иа.

И́кос 2.

Ра́зум тво́й, уго́днице Христо́ва, духо́вным ве́дением Милосе́рдный Госпо́дь озари́, я́ко ты́, богому́драя дщи́ купе́ческая, не накопле́нию бла́г земны́х, а стяжа́нию сокро́вищ нетле́нных, обрати́ла еси́ взо́ры души́ твое́й, и еще́ отрокови́ца су́ще, в новоучрежде́нную оби́тель Леу́шинскую удали́лася еси́, иде́же усе́рдно подвиза́лася еси́, вся́ творя́ще во сла́ву Бо́жию. Мы́ же сия́ ны́не помина́юще про́сим тя́: утверди́ на́с в де́лании духо́внем и приими́ ра́достно возноси́мыя ти́ похвалы́ сия́:

Ра́дуйся, спасе́ния ра́ди ве́чнаго во оби́тель святу́ю под кро́в Пречи́стыя Богоро́дицы прите́кшая;

Ра́дуйся, целому́дрия храни́тельнице и душе́вныя и теле́сныя чистоты́ рачи́тельнице.

Ра́дуйся, посто́м и моли́твою житие́ богоуго́дное стяжа́вшая;

Ра́дуйся, ду́шу твою́ и те́ло во оби́тель Ду́ха Свята́го угото́вившая.

Ра́дуйся, пло́ть твою́ со страстьми́ и похотьми́ Христа́ ра́ди распя́вшая;

Ра́дуйся, благоволе́ние и ра́дость Отца́ Небе́снаго си́це стяжа́вшая.

Ра́дуйся, кро́тости и досто́йному почита́нию Бо́га науча́ющая;

Ра́дуйся, в благо́м де́лании моли́твеннем ны́ укрепля́ющая.

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 3.

Си́ла благода́ти Бо́жия оби́льно излия́ся на тя́, богоно́сная ма́ти на́ша Серафи́мо, ты́ бо и по се́й де́нь святы́ми моли́твами в наде́жде и любви́ на́с утвержда́еши, прему́дростию духо́вней на́с обогаща́еши, в милосе́рдии и нищетолю́бии возраста́ти науча́еши ве́ру живу́ю и де́йственную в сердца́х возгрева́я, умножа́ти, умиле́ния да́р подае́ши на́м и ожесточе́ние серде́чное ми́лостивно угаша́еши, наставля́я ны́ Верхо́вному Врачу́ ду́ш и теле́с о тебе́ воспева́ти: Аллилу́иа.

И́кос 3.

Име́ющи любо́вь Боже́ственную в се́рдце твое́м, о богоблаже́нная Серафи́мо, с осо́бым тща́нием сове́ты благи́я у богоно́сных наста́вников твои́х, пресла́внаго Иоа́нна Кроншта́дскаго и преподо́бней ма́тери Таи́сии испра́шивала еси́, и́ми же руководи́мая от си́лы в си́лу восходи́ла еси́, наставле́нием ева́нгельским до́бре после́дуя, кро́тость и незло́бие от ю́ности храня́, еще́ же и благогове́ние к до́му Бо́жию и усе́рдие преи́скреннее, в си́х доброде́телех и на́с наста́ви, да зове́м ти́ си́це:

Ра́дуйся, доброде́тели высо́кая в се́рдце твое́м вкорени́вшая;

Ра́дуйся, в за́поведех Госпо́дних вся́ дни́ живота́ твоего́ ходи́вшая.

Ра́дуйся, чистото́ю се́рдца твоего́ Небе́снаго Жениха́ созерца́вшая;

Ра́дуйся, ю́ность твою́ непоро́чностию жития́ украси́вшая.

Ра́дуйся, бо́дренным трезве́нием от злы́х по́мыслов се́рдце свое́ охраня́вшая;

Ра́дуйся, бу́ри ра́спрей в тишину́ прелага́ющая.

Ра́дуйся, долженствова́ниями земны́ми не пренебрега́ти науча́ющая;

Ра́дуйся, стези́ на́ша к небесе́м пречу́дно обраща́ющая.

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 4.

Бу́рю вну́трь по́мыслов и страсте́й во́лны безбе́дно преше́дше, преподо́бная ма́ти, обрела́ еси́ ти́хое приста́нище Христа́, Ему́же неле́ностно во мно́зе долготерпе́нии порабо́тала еси́; отню́дуже Боже́ственною благода́тию Христо́вою восходя́ от си́лы в си́лу от дея́ния к боговиде́нию, ве́рна Спаси́телю, не взира́я на наше́ствие богобо́рцев, пребыла́ еси́ до конца́, и та́ко Небе́снаго Иерусали́ма дости́гла еси́, иде́же со А́нгелы и все́ми святы́ми пое́ши Тро́ице Святе́й пе́снь: Аллилу́иа.

И́кос 4.

Слы́шаша, преподо́бная ма́ти Серафи́мо, бли́жнии и да́льнии равноа́нгельное житие́, ви́девше смире́ния твоего́ глубину́, моли́твы неотсту́пность, воздержа́ния тве́рдость и ве́лию ре́вность ду́ха твоего́ о чистоте́, удиви́шася и просла́виша Человеколю́бца Бо́га, укрепля́ющаго немощно́е естество́ челове́ческое. Мы́ же ублажа́ем тя́ и зове́м:

Ра́дуйся, Бо́га Отца́ Безнача́льнаго служи́тельнице преcлавная;

Ра́дуйся, благода́ть Свята́го Ду́ха во спасе́ние стяжа́вшая.

Ра́дуйся, пу́ть ве́рнаго ко Христу́ восхожде́ния показу́ющая;

Ра́дуйся, в уде́ле Пресвяте́й Богоро́дицы ра́дость моли́твеннаго богообще́ния позна́вшая.

Ра́дуйся, по́мыслы на́ша от злы́х прираже́ний и су́етных мечта́ний оберега́ющая;

Ра́дуйся, вся́ на́ша жела́ния во бла́го всегда́ направля́ющая.

Ра́дуйся, добро́ та́йно твори́ти во сла́ву Бо́жию на́с наставля́ющая;

Ра́дуйся, о́блаки сомне́ний и раздо́ров разгоня́ющая.

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 5.

Богоявле́ннаго све́та еще́ на земли́ прича́стнице яви́лася еси́, свята́я Серафи́мо, егда́ на подво́рии Леу́шинстем пребыва́я, исцеле́ние от боле́зни десни́цы твоея́ по предста́тельству свята́го му́ченика Вонифа́тия сподо́билася еси́. Си́це мо́лим тя́, ны́не со му́ченики в черто́зех Отца́ Небе́снаго торжеству́ющу, приклони́ и к на́м Его́ вели́кое и неизрече́нное милосе́рдие, да освободи́мся от неду́г теле́сных и скорбе́й душе́вных и воспои́м Го́споду, ми́лующему и спаса́ющему ны́, песнопе́ние а́нгельское: Аллилу́иа.

И́кос 5.

Ви́девши тя́ благоче́стия устрои́тельницу и многомо́щную пред Бо́гом моли́твенницу, ма́ти Серафи́мо, пра́ведный оте́ц Иоа́нн Кроншта́дтский наста́ви си́лою любве́ утвержда́тися в ве́ре. Поревнова́ла еси́, неве́сто Христо́ва, ева́нгельское житие́ стяжа́ти по о́бразу преподо́бных оте́ц Це́ркви дре́вния. Егда́ же даде́ ти́ Госпо́дь разуме́ние сего́ благоугожде́ния, уви́дела еси́, я́ко бла́го е́сть и́го Христо́во и бре́мя Его́ легко́ е́сть. Си́це мо́лим тя́: пода́ждь на́м от еле́я милосе́рдия и сострада́ния твоего́, да научи́мся тяготы́ дру́г дру́га носи́ти и не себе́ угожда́ти, но Бо́гу и бли́жнему во благо́е к созда́нию, тебе́ же, наста́внице на́шей небе́сней, воспева́я си́це:

Ра́дуйся, заре́ пресве́тлая смире́ния, души́ гре́шных озаря́ющая;

Ра́дуйся, теплото́ любве́ боже́ственныя, на́с согрева́ющая.

Ра́дуйся, сла́достию моли́тв твои́х ско́рби на́ша разтворя́ющая;

Ра́дуйся, сокро́вище ми́ра духо́внаго на́м открыва́ющая.

Ра́дуйся, безу́мства, ле́ности и страсте́й си́лою любве́ Твоея́ на́с ми́лостивно спаса́ющая;

Ра́дуйся, бе́дныя души́ на́ша на по́двиг любве́ согрева́ющая и укрепля́ющая.

Ра́дуйся, ко све́ту Христо́ву заблу́дшия наставля́ющая;

Ра́дуйся, в простоте́ душе́вней призыва́ющим тя́ ми́лостивно помога́ющая.

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 6.

Пропове́дница и возвести́тельница во́ли Бо́жией яви́ся преподо́бная и богоно́сная ма́ти на́ша Таи́сия, ея́ же глаго́лам внима́я, ты́, всехва́льная Серафи́мо, оста́вила еси́ гра́д Петро́в и удали́лася еси́ в се́верныя преде́лы держа́вы на́шея, дабы́ дре́вний и достосла́вный монасты́рь Ферапо́нтовский возроди́ти, и благочи́ние по уста́ву святы́х оте́ц в не́м утверди́ти, я́ко да и ны́не сла́вится тобо́ю свята́я оби́тель, мона́шествующия же и мирсти́и лю́дие в не́й моля́щеся духо́вне возраста́ют и от си́лы в си́лу преходя́ще, воспева́ют Христу́ Бо́гу: Аллилу́иа.

И́кос 6.

Возсия́ла еси́, я́ко свети́ло многосве́тлое, во оби́тели Ферапо́нтовстей, егда́ нача́льство во о́ной восприя́ла еси́, преподо́бному́ченице Серафи́мо, не устраши́лася бо еси́ вели́каго бре́мене правле́ния, но во все́м о́браз до́брыя жи́зни подава́я, наставля́ла еси́ насе́льницы по́двигом и́ноческим и лю́дем о́крест живу́щим усе́рдно благотвори́ла еси́, ча́дом же поселя́н в прему́дрости и благоче́стии возраста́ти сподобля́ла еси́. Сего́ ра́ди воспису́ем ти́ похвалу́ сицеву́ю:

Ра́дуйся, упова́ние на Про́мысл Бо́жий всеце́ло возложи́вшая;

Ра́дуйся, в служе́нии Бо́гу дарова́нные ти́ тала́нты зело́ умно́жившая.

Ра́дуйся, наставле́ниями сесте́р и все́х жа́ждущих спасе́ния духо́вно укрепля́вшая;

Ра́дуйся, стро́гость вла́сти матери́нскою любо́вию умиря́вшая.

Ра́дуйся, кре́пкою моли́твою неви́димыя стре́лы вра́жеския от оби́тели отража́вшая;

Ра́дуйся, му́дрыми поря́дки вне́шния собла́зны ми́ра от се́стр отвраща́вшая.

Ра́дуйся, те́плыми попече́нии земну́ю оби́тель в ра́й претвори́вшая;

Ра́дуйся, а́лчущия ве́дения ду́ши ма́нною Боже́ственных и́стин пита́вшая.

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 7.

Хотя́ще прему́дрый Госпо́дь просла́вити тя́, богоблаже́нная ма́ти на́ша Серафи́ма, яви́ тя́ му́жества сте́ну и ве́ры утвержде́ние, любве́ горо́ вои́стину ту́чную. Сего́ ра́ди, мо́лим тя́ ны́не: пода́ждь на́м от еле́а твоего́, свети́льницы бо на́ша угаса́ют, да не пости́гнет на́с тьма́ кроме́шная, но да предста́тельством твои́м снабдева́емы, вни́дем на бра́к нетле́нный с пе́нием а́нгельским: Аллилу́иа.

И́кос 7.

Новоявле́нную звезду́, путеводя́щую на́с по пути́ ко спасе́нию, ны́не возсия́вшую на тве́рди церко́вней, ви́дим тя́, всехва́льная ма́ти, и све́том по́двига твоего́ озаря́еми, тве́рдо ве́руем, и упова́ем на предста́тельство твое́ пред Го́сподом за на́с недосто́йных, и зове́м ти́ сицева́я:

Ра́дуйся, пред Бо́гом, я́ко дщи́ пред отце́м, я́ко учени́ца пред учи́телем ше́ствовавшая;

Ра́дуйся, во вся́ дни́ живота́ твоего́ Его́ иска́вшая и в Не́м наме́рение полага́вшая.

Ра́дуйся, реко́, наводне́нная водо́ю Бо́жия благода́ти;

Ра́дуйся, разуме́ния Боже́ственных писа́ний сподо́бившаяся прия́ти.

Ра́дуйся, я́ко тобо́ю поуча́емся непреле́стным путе́м спасе́ния ходи́ти;

Ра́дуйся, я́ко твои́м за ны́ хода́тайством наде́емся спасе́ния получи́ти.

Ра́дуйся, я́ко тебе́ призыва́ющия благода́тною по́мощию ущедря́еши;

Ра́дуйся, я́ко лю́бящих тя́ от разли́чных бе́д и напа́стей изыма́еши.

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 8.

Стра́нницу и прише́лицу в ми́ре се́м помышля́я себе́ бы́ти, богоблаже́нная Серафи́мо, от ю́ности бо твоея́ де́вственное житие́ возлюби́ла еси́, в посте́ и моли́твах пребыва́я, и благоугожда́я Бо́гу благоугожде́нием вся́ческим, во е́же бы́ти тебе́ освяще́нному сосу́ду Ду́ха Свята́го, все́льшагося в непоро́чное се́рдце твое́, и воздыха́нии неизглаго́ланными научи́вшаго тя́ благоприя́тно пе́ти Пресвяте́й Тро́ице: Аллилу́иа.

И́кос 8.

Всю́ себе́ в же́ртву Го́сподеви прине́сши, Серафи́мо преди́вная, благоуха́ние прия́тное непоро́чным житие́м Влады́це твоему́ яви́лася еси́: приходя́щим к тебе́ с ве́рою вспоможе́ние безме́здно подаю́щи и не́мощи немощны́х нося́щи, и та́ко Зако́н Христо́в испо́лнила еси́, те́мже вопие́м ти́:

Ра́дуйся, Влады́чицу Пречи́стую путеводи́тельницею име́вшая;

Ра́дуйся, Го́спода серафи́мскою любо́вию возлюби́вшая;

Ра́дуйся, в по́двизех дре́вним отце́м и жена́м поревнова́вшая;

Ра́дуйся, я́ко в неве́стнике Иису́сове при́сно живе́ши;

Ра́дуйся, та́мо, я́ко в зерца́ле, в Бо́зе вся́ ему́ любе́зная созерца́еши.

Ра́дуйся, я́ко и на́с предста́тельством твои́м не оставля́еши;

Ра́дуйся, неизрече́нное милосе́рдие Бо́жие на на́с ско́ро призыва́ющая;

Ра́дуйся, ве́ру на́шу во спасе́ние во Христе́ укрепля́ющая;

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 9.

Вси́ а́нгели Бо́жии и ли́цы святы́х Бо́жиих на не́бе ку́пно с тобо́ю торжеству́ют, избра́ннице Бо́жия Серафи́мо, вене́ц нетле́нный стяжа́вшая, я́ко подви́жническую жи́знь вела́ еси́, лю́дем земли́ Кири́лловстей и все́м бли́жним твои́м по́мощь разнообра́зную источа́я, по́двигами твои́ми труды́ сесте́р оби́тели Ферапо́нтовстей превосходя́, непреста́нную моли́тву трапе́зою для души́ твоея́ боголюби́вей име́я, и му́ченически ве́рность твою́ Жениху́ Небе́сному яви́ла еси́. Мы́ же, просла́вльше Го́спода, со слеза́ми благода́рности вопие́м Ему́: Аллилу́иа.

И́кос 9.

Вити́йство земноро́дных не довле́ет досто́йно восхвали́ти твоя́ по́двиги, всесла́вная ма́ти на́ша Серафи́мо. Кто́ бо дово́льно мо́жет изрещи́ сле́зныя то́ки, я́же в моли́твах к Бо́гу пролия́ла еси́, кто́ боле́зни твоя́ изочте́т? Кто́ испове́ст всено́щныя бде́ния, со враго́м ви́димыя и неви́димыя боре́ния и всю́ тесноту́ жития́ твоего́? Кто́ возмо́жет досто́йно и справедли́во восхвали́ти му́ченическую кончи́ну твою́, какову́ю от ру́к злочести́вых и бесоподо́бных большевико́в прия́ла еси́? Кто́ же возмо́жет достодо́лжно воспе́ти небе́сную сла́ву твою́, всепобе́дная преподо́бному́ченице? Те́м у́бо мо́лим тя́: озари́ луча́ми све́та твоего́ и на́ша сердца́, испроси́ оставле́ние грехо́в все́м, вопию́щим тебе́ сицева́я:

Ра́дуйся, я́ко свети́ло светоза́рное в Небе́снем Ца́рстве Со́лнца Пра́вды блиста́ющая;

Ра́дуйся, све́том благода́ти твоея́ все́х чту́щих па́мять твою́ просвеща́ющая.

Ра́дуйся, рая́ Иису́сова дре́во чудото́чное, мно́гий пло́д в посо́бие христиа́ном творя́щее;

Ра́дуйся, виногра́да Христо́ва розго́ благопло́дная, пита́ющая на́с и веселя́щая.

Ра́дуйся, многотеку́щая реко́, ду́ши на́ша спаси́тельным уче́нием напоя́ющая;

Ра́дуйся, в мо́ре многоразли́чных напа́стей погиба́ющим наде́жное приста́нище.

Ра́дуйся, и́щущим Ца́рствия Небе́снаго спаси́тельнаго пути́ пропове́днице;

Ра́дуйся, изнемога́ющим от уны́ния, ско́рби и печа́ли благоприя́тная уте́шительнице.

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 10.

Спасти́ хотя́ мно́гие лю́ди от оскуде́ния ре́вности духо́вней, богоно́сная ма́ти Серафи́мо, трина́дцать ле́т в оби́тели прожила́ еси́ и всегда́ к труда́м ревнова́ла еси́: поновле́нию хра́мов стари́нных и устрое́нию жития́ благочести́ваго. Мы́ же, воспомина́ющи труды́ твоя́, про́сим тя́: предста́тельством твои́м небе́сным помози́ на́м в душа́х на́ших хра́мы Триипоста́сному Творцу́ на́шему возви́гнути, удали́тися от вся́ческия скве́рны грехо́вныя и суеты́, в забве́ние Царя́ Небе́снаго преводя́щей, я́ко да с тобо́ю ку́пно сподо́бимся во ве́ки Го́сподеви воспева́ти: Аллилу́иа.

И́кос 10.

Стена́ еси́ все́м прибега́ющим к тебе́, богопросвеще́нная ма́ти на́ша Серафи́мо, во дни́ бо лю́тых гоне́ний призыва́ла еси́ сесте́р оби́тели твоея́ и люде́й мирски́х ве́рными бы́ти Христу́ да́же до сме́рти, да жи́тельствуют по словеси́ ева́нгельскому: не убо́йтеся от убива́ющих те́ло, души́ же не могу́щих уби́ти. Укрепи́ же и на́с ны́не с наде́ждою зову́щих ти́ такова́я:

Ра́дуйся, кади́ло, фимиа́м моли́тв богоприя́тных Бо́гу о на́с при́сно вознося́щее;

Ра́дуйся, воздвиза́емых от ми́ра, пло́ти и диа́вола искуше́ний хода́тайством твои́м свобожда́ющая.

Ра́дуйся, нераска́янных гре́шников к соверше́нному покая́нию побужда́ющая;

Ра́дуйся, сия́нием благода́ти Бо́жия души́ на́ша озаря́ющая.

Ра́дуйся, от тяготы́ тоски́ и уны́ния приходя́щих к тебе́ спаса́ющая;

Ра́дуйся, милосе́рдие к ста́рым и немощны́м в душа́х на́ших возгрева́ющая.

Ра́дуйся, хво́рым и стра́ждущим по́мощь твою́ небе́сную источа́ющая;

Ра́дуйся, пле́велы зло́бы огне́м небе́сныя любви́ твоея́ изпепеля́ющая.

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 11.

Пе́ние моле́бное прино́сим ти́, богоно́сная ма́ти на́ша Серафи́мо, в чу́днем житии́ твое́м о́браз благода́тнаго богообще́ния на́м дарова́вшая. Те́м же и на́м, святу́ю па́мять твою́ почита́ющим, тве́рдую ру́ку по́мощи твоея́ пода́ждь, да и мы́ устрани́мся ми́ра су́етнаго и преле́стнаго, возмо́жем безбе́дно жите́йскую преплы́ти пучи́ну и в ти́хое приста́нище спасе́ния дости́гнути хода́тайством твои́м, во ве́ки благода́рственно воспева́юще о тебе́ Го́сподеви: Аллилу́иа.

И́кос 11.

Свети́ло благосве́тлое еси́, всеблага́я ма́ти на́ша Серафи́мо, сия́ющая в Це́ркви Христо́вей, в вели́цем со́нме свиде́телей ве́ры, я́ко еди́на от пострада́вших за Христа́ в годи́ну мра́чнаго безбо́жия сове́тскаго. Ты́ бо, Еди́наго Бо́га Небе́снаго боя́ся, проти́ву крамо́льник тве́рдо ста́ла еси́, егда́ же приступи́ша ко оби́тели кара́тели большеви́стския изведо́ша тя́ из монастыря́ твоего́, вся́ко бия́ше, поноша́ху; и на горе́ Золоту́ха ку́пно со святи́телем Варсоно́фием и ины́ми страстоте́рпцы всечестны́ми лю́тей сме́рти преда́ша. Мы́ же, велича́я страда́ния твоя́, взыва́ем со умиле́нием:

Ра́дуйся, му́ченическое тече́ние твое́ ме́чною кончи́ною до́бре заверши́вшая;

Ра́дуйся, во гла́се пе́ния а́нгельскаго на не́бо душе́ю твое́ю воспари́вшая.

Ра́дуйся, му́ченический по́лк на небесе́х возвесели́вшая;

Ра́дуйся, преподо́бныя и пра́ведныя ли́ки возра́довавшая.

Ра́дуйся, сердца́ на́ша от скве́рн грехо́вных очища́ющая;

Ра́дуйся, суето́ю помраче́нный на́ш у́м просвеща́ющая.

Ра́дуйся, ча́ше, многоце́нныя да́ры Бо́жии преизоби́льно излива́ющая;

Ра́дуйся, вся́ко благополе́зно проше́ние исполня́ющая.

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 12.

Благода́ть Госпо́дню и благовре́менну по́мощь испроси́ на́м, уго́днице Бо́жия, во дни́ безпомо́щия на́шего и бу́ди на́м в ско́рбех уте́шительница, в беда́х засту́пница, в неду́зех врачева́тельница, ту́не подава́яй на́м да́ры целе́бныя, а́ще не ве́мы, чи́м возда́ти ти́, но то́чию: а́ще начне́м себе́ исправля́ти, быва́юще но́выя вме́сто ве́тхих, сея́ благода́ти обновле́ния бу́ди на́м хода́таицею, не то́щи отхо́дим, но уще́дреннии тобо́ю, вопие́м Бо́гу хвале́бно: Аллилу́иа.

И́кос 12.

Пою́ще чудеса́ твоя́ и мно́гое сострада́ние твое́ к лю́дем, ма́ти на́ша Серафи́мо, усе́рдно про́сим твоего́ многомо́щнаго ко Го́споду предста́тельства: ве́мы бо, я́ко моли́тва твоя́, подо́бно фимиа́му, восхо́дит пред Вседержи́теля Бо́га и низво́дит на на́с Его́ благослове́ние, по́мощь и ми́лость. Те́мже и взыва́ем к тебе́:

Ра́дуйся, Пресвяты́я и Единосу́щныя Тро́ицы ве́рная испове́днице;

Ра́дуйся, Пресвяты́я Богоро́дицы изря́дная служи́тельнице.

Ра́дуйся, свята́я, со все́ми святы́ми на небесе́х торжеству́ющая;

Ра́дуйся, с вы́сшими чи́ны а́нгельскими пе́снь побе́дную Бо́гу воспева́ющая;

Ра́дуйся, во́инств арха́нгельских и Серафи́мов ли́ка собесе́днице.

Ра́дуйся, сердца́ злы́х люде́й, вражду́ющих проти́ву на́с, смягча́ющая;

Ра́дуйся, и́нокам и и́нокиням в борьбе́ с прило́гами ми́ра и пло́ти пособля́ющая.

Ра́дуйся, жела́ние к де́ланию доброде́телей внуша́ющая;

Ра́дуйся, плоды́ покая́ния ве́рным приноси́ти помога́ющая.

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 13.

О всехва́льная преподо́бному́ченице, ма́ти на́ша Серафи́мо, воспева́ем ти́ похва́льная и всеусе́рдно мо́лим тя́: испроси́ на́м вся́ потре́бная к житию́ на́шему и благоче́стию, изба́ви на́с от бе́дственных паде́ний, бесо́вских искуше́ний, боле́зненней печа́ли и Ца́рствия Небе́снаго насле́дники все́х сотвори́, да ку́пно с тобо́ю сподо́бимся во ве́ки воспева́ти Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельскою любо́вию Христа́ Спаси́теля от ю́ности возлюби́вшая, свята́я ма́ти на́ша Серафи́мо, нелицеме́рно в богообще́нии, бла́гости и чистоте́ пожи́вше, житие́ твое́ с неземно́ю ра́достию в о́браз подража́ния на́м оста́вльшая, ему́ же чудя́щеся и кончи́ну твою́ му́ченическую воспева́юще, зове́м ти́ гла́сы хвале́бными си́це:

Ра́дуйся, благу́ю ча́сть от у́тра жития́ твоего́ избра́вшая;

Ра́дуйся, се́мя Христо́ва уче́ния в се́рдце свое́м возрасти́вшая.

Ра́дуйся, святу́ю ду́шу твою́ за и́мя Иису́сово положи́вшая;

Ра́дуйся, благода́ть моли́твы за ны́ ко Святе́й Тро́ице улучи́вшая.

Ра́дуйся, я́ко тобо́ю прие́млем теле́сных боле́зней исцеле́ние;

Ра́дуйся, я́ко твои́м за ны́ хода́тайством упова́ем прия́ти грехо́в проще́ние.

Ра́дуйся, я́ко тобо́ю разли́чных искуше́ний избега́ем;

Ра́дуйся, я́ко предста́тельством твои́м в разли́чных беда́х скоре́йшую по́мощь обрета́ем.

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Конда́к 1.

Избра́нная уго́днице и неве́сто Христо́ва, при́сная о душа́х на́ших моли́твеннице, благода́рственныя песнопе́ния прино́сим ти́, богоно́сная ма́ти на́ша Серафи́мо, велича́я пресла́вныя труды́ твоя́ в Леу́шинстем уде́ле Пресвяте́й Богоро́дицы и му́ченическую кончи́ну твою́ в оби́тели Ферапо́нтовстей, про́сим у́бо тя́ о дарова́нии на́м о́браза жития́ благочести́ваго, ве́рующе, я́ко ты́ предста́тельством твои́м от вся́ких бе́д свобожда́еши и насле́дники Ца́рствия Бо́жия на́с сотворя́еши, зову́щих ти́ си́це:

Ра́дуйся, свята́я преподо́бному́ченице Серафи́мо, венце́м нетле́нным от Христа́ увенча́нная.

Моли́тва.

О свята́я досточу́дная богоно́сная ма́ти на́ша Серафи́мо! Мно́гими труда́ми, милосе́рдием и боголю́бием обрела́ ты́ с Бо́гом духо́вное едине́ние. Предстоя́щи Небе́сному Престо́лу вели́каго Царя́ и ве́лие дерзнове́ние к Нему́ иму́щая, моли́твами Пречи́стей Де́вы Богоро́дицы в проше́ниях твои́х не оставля́еми, усе́рдно мо́лим тя́: принеси́ за на́с гре́шных святы́е моли́твы твоя́ ко Го́споду Бо́гу и испроси́ вся́ благопотре́бная душа́м и телесе́м на́шим: ве́ру непосты́дну, к бли́жнему любо́вь нелицеме́рну, благоче́стие непоколеби́мое, те́плую моли́тву в богообще́нии смире́ннем, покая́ние глубо́кое, позна́ние грехопаде́ний жите́йских, в до́брых де́лех преуспе́яние, в церко́внем служе́нии ре́вность и ве́рность неодоли́мую, духо́вное возста́ние, душа́м и телесе́м здра́вие и ве́рное спасе́ние. Не пре́зри моли́тв на́ших, со умиле́нием тебе́ возноси́мых, но бу́ди о на́с при́сная засту́пница пред Го́сподом и сподо́би на́с по́мощию твое́ю благода́ть спасе́ния стяжа́ти и Ца́рствие Небе́сное с тобо́ю унасле́довати, да славосло́вим неизрече́нное человеколю́бие Отца́ и Сы́на и Свята́го Ду́ха в Тро́ице поклоня́емаго Бо́га, во ве́ки веко́в. Ами́нь.

Моли́тва ина́я.

О пресла́вная ма́ти Серафи́мо, ско́рая на́ша помо́щнице, и засту́пнице, и неусы́пная о на́с моли́твеннице. Предстоя́ще пред о́бразом твои́м, припа́дающе мо́лимся тебе́: приими́ проше́ния на́ша, и принеси́ я́ ко Престо́лу милосе́рдаго Отца́ Небе́снаго, я́ко дерзнове́ние к Нему́ иму́щая, испроси́ притека́ющим к тебе́ и все́м правосла́вным христиа́ном ве́чное спасе́ние и вре́менное благоде́нствие, на вся́ блага́я дела́ и начина́ния на́ша ще́дрое благослове́ние, от вся́ких бе́д и скорбе́й ско́рое избавле́ние. Е́й, чадолюби́вая ма́ти на́ша, тебе́, предстоя́щей Престо́лу Бо́жию, ве́домы ну́жды на́шя духо́вныя и жите́йския, при́зри на ны́ ма́терним о́ком, и твои́ми моли́твами отврати́ от на́с колеба́ние вся́ким ве́тром уче́ния, злы́х и богопроти́вных обы́чаев умноже́ние; утверди́ же во все́х ве́ры согла́сное ве́дение, взаи́мную любо́вь и единомы́слие, да все́м и словесы́, и писа́нии, и де́лы сла́вится среди́ на́с всесвято́е и́мя Отца́ и Сы́на и Свята́го Ду́ха, Еди́наго Бо́га, в Тро́ице покланя́емаго, Ему́же че́сть и сла́ва, во ве́ки веко́в. Ами́нь.