Конда́к 1.

Избра́нный Бо́гом из земны́х князе́й в небе́сное пресве́тлое му́ченическое во́инство, от земны́я сея́ юдо́ли в Ца́рство Небе́сное пресели́лся еси́: положи́л бо еси́ ду́шу твою́ за лю́ди твоя́. Те́мже, я́ко име́яй дерзнове́ние ко Го́споду, моли́ за держа́ву Росси́йскую, за гра́д тво́й и лю́ди, тебе́ зову́щия:

Ра́дуйся, благове́рный кня́же Михаи́ле, Тферски́й пресла́вный чудотво́рче.

И́кос 1.

А́нгелов и всея́ тва́ри Созда́тель, ангелонра́вна тя́ прови́дев и вои́теля за Христа́ непобеди́ма, архистрати́гу небе́сных во́инств тезоиме́нне тебе́ нарещи́ся благоустро́и. Те́мже сла́вяще Бо́жие о тебе́ промышле́ние, я́ко избра́нну сосу́ду Христо́вы благода́ти, вопие́м ти́:

Ра́дуйся, равноапо́стольнаго Влади́мира благослове́нная о́трасле; ра́дуйся, благове́рных и благочести́вых Яросла́ва и Ксе́нии ча́до.

Ра́дуйся, я́ко во утро́бе ма́тере осироте́в, все́х Бо́га во отца́ ме́сто обре́л еси́; ра́дуйся, я́ко под кро́вом кри́л Его́ прему́дростию и во́зрастом преспева́л еси́.

Ра́дуйся, я́ко отроча́ доброу́мно и благонра́вно бы́л еси́; Ра́дуйся, я́ко от ю́ности твоея́ па́че вся́каго сокро́вища Христа́ возлюби́л еси́.

Ра́дуйся, я́ко от Бо́га и челове́к досто́йне возлю́блен бы́л еси́; Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 2.

Ви́девши тя́ благове́рная ма́терь твоя́ Ксе́ния, я́ко А́нна Самуи́ла, преспева́юща во́зрастом и прему́дростию, стра́хом Бо́жиим и все́ми доброде́тельми украша́ема, ра́довашеся о тебе́, благода́рно поя́ прему́дрости наста́внику и смы́сла пода́телю Бо́гу: Аллилу́иа.

И́кос 2.

Ра́зум богому́дрый име́я, я́ко Соломо́н, все́м се́рдцем возлюби́л еси́, блаже́нне, прему́дрость Бо́жию, ю́же и поиска́л еси́ приле́жно от ю́ности твоея́; те́мже от Бо́га дарова́ние прие́м, храмозда́нием Царю́ прему́дрому поревнова́л еси́. Сего́ ра́ди сла́вяще, зове́м ти́:

Ра́дуйся, я́ко хра́м прекра́сен Преображе́ния Госпо́дня воздви́гл еси́; ра́дуйся, я́ко от име́ний твои́х ще́дро о́ный украси́л еси́.

Ра́дуйся, я́ко все́м се́рдцем благоле́пие до́му Бо́жия возлюби́л еси́; ра́дуйся, я́ко пребыва́ти в не́м па́че все́х уте́х мирски́х изво́лил еси́.

Ра́дуйся, я́ко и са́м хра́м Бо́жий живы́й, духо́вный бы́л еси́; ра́дуйся, моли́твы бо твоя́, я́ко кади́ло благово́нное, Бо́гу прине́сл еси́.

Ра́дуйся, зане́ усе́рдие моли́тв и де́л твои́х, я́ко всесожже́ние ту́чное и же́ртву непоро́чную, прия́т Госпо́дь; ра́дуйся, я́ко и ны́не па́че зла́та многоце́ннаго святы́я мо́щи твоя́ украша́ют це́рковь сию́.

Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 3.

Си́ла Вы́шняго осени́ тя́, и Ду́х Бо́жий ноша́шеся над тобо́ю, я́коже над Дави́дом, егда́ возведе́ тя́ Госпо́дь на прароди́тельный престо́л вели́ким князе́м сла́внаго гра́да Влади́мира. Те́мже священнонача́льницы и кня́зи, и вси́ лю́дие согла́сно ра́довахуся, благодаря́ще Бо́га, вознося́щаго смире́нныя Своя́, и пою́ще Ему́: Аллилу́иа.

И́кос 3.

Име́я ду́шу боголюби́ву и се́рдце ми́лостиво, егда́ вла́сть прия́л еси́ великокня́жую, не измени́л еси́ нра́ва твоего́ смиренному́драго и любвеоби́льнаго: потща́лся бо еси́ вся́ку сле́зу отъя́ти от лица́ стра́ждущих и бы́л еси́ все́м в ну́ждах помо́щник. Те́мже не оста́ви и на́с, наде́ющихся на тя́ и вопию́щих такова́я:

Ра́дуйся, святи́телей и свяще́нников люби́телю и богому́дрых и́ноков собесе́дниче; ра́дуйся, вдо́в и сиро́т пита́телю и оби́димых засту́пниче.

Ра́дуйся, отроко́м и ю́ношам чи́стым житие́м твои́м благоче́стия и целому́дрия учи́телю; ра́дуйся, ста́рцев и убо́гих приста́нище, и неду́гующих и стра́ждущих упокои́телю.

Ра́дуйся, доброде́тельми па́че, не́же порфи́рою и ви́ссом, укра́шенный; ра́дуйся, благоче́стием па́че многоце́нныя диади́мы увенча́нный.

Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 4.

Бу́рею властолю́бия обурева́емь, кня́зь Гео́ргий ласка́нием и да́ры испроси́ себе́ у ха́на великокняже́ние Влади́мирское; ты́ же, смиренному́дро, отда́в тому́ зако́нное твое́ владе́ние, во оте́ческий гра́д Тфе́рь отше́л еси́. Не хотя́ бо проли́тия кро́ве христиа́нския, де́ло твое́ Бо́гу, судя́щему пра́ведно, пре́дал еси́, воспева́я Ему́: Аллилу́иа.

И́кос 4.

Слы́шав, я́ко сро́дник тво́й, неудовли́вся отъя́тием у тебе́ великокняже́ния, в преде́лы Тферски́я со мно́гою ра́тию тата́рскою вни́де, разоря́я оби́тели и хра́мы, ве́си огне́м и мече́м истребля́я, и Бо́гом вруче́нное ти́ ста́до распужа́я и расхища́я, я́ко Авраа́м, домоча́дцы твоя́ собра́л еси́, и совеща́вся с ни́ми, ду́шу твою́ за святы́ню Госпо́дню и за лю́ди твоя́ положи́ти восхоте́л еси́. Сего́ ра́ди и ны́не мы́ благода́рно тебе́ вопие́м:

Ра́дуйся, кня́же по се́рдцу Бо́жию, ско́рбь твою́ Бо́гу пове́давый; ра́дуйся, воево́до благове́рный и смиренному́дрый, печа́ль твою́ на Бо́га возве́рзый.

Ра́дуйся, за́поведь Христо́ву, е́же возлюби́ти бли́жняго, я́ко себе́, де́лы оправда́вый; ра́дуйся, Моисе́ю и Па́влу в ре́вности о бла́ге и спасе́нии люде́й твои́х поревнова́вый.

Ра́дуйся, во бра́ни не сла́вы земны́я, но огражде́ния святы́ни Госпо́дней поруга́емыя иска́вый; ра́дуйся, бу́йство тата́рское си́лою Бо́жиею укроти́вый.

Ра́дуйся, лю́ди твоя́ от разоре́ния, пле́на и лю́тыя сме́рти по́мощию Вы́шняго огради́вый.

Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 5.

Боготе́чная звезда́ во́ем твои́м яви́лся еси́, благове́рный Михаи́ле, предыдя́ бо пред полки́ твои́ми, десни́цею твое́ю, Бо́гом укрепля́емою, разруши́л еси́ врага́ и ме́стника. Те́мже, победи́в сопроти́вных Бо́гу, чудоде́йствующему мы́шцею высо́кою, сокруши́вшему бра́ни и спа́сшему лю́ди Своя́, воспе́л еси́: Аллилу́иа.

И́кос 5.

Ви́девше жи́телие гра́да Тфе́ри и всея́ Тферски́я о́бласти Бо́гом да́нную ти́ побе́ду пресла́вную, я́ко царе́вну Конча́ку и злоко́зненнаго воево́ду Кавгады́я плени́л еси́, сла́ву и благодаре́ние Бо́гу приноша́ху и тебе́, засту́пника своего́, похвала́ми венча́ша. Те́мже и мы́ дне́сь, побе́дныя по́чести тебе́ воспису́юще, вопие́м:

Ра́дуйся, архистрати́гу си́л небе́сных тезоимени́те и подража́телю, вра́жия си́лы сокруши́вый; ра́дуйся, вождю́ богохрани́мый, тата́рския по́лчища, я́ко ханане́и, разсе́явый.

Ра́дуйся, Авраа́ме но́вый, благослове́нный Бо́гом вы́шним, И́же покори́ враги́ твоя́ под но́ги твоя́; ра́дуйся, Дави́де росси́йский, ору́жием благоволе́ния Бо́жия венча́нный на земли́.

Ра́дуйся, кня́же благове́рный и благочести́вый, сла́вою и че́стию превознесе́нный на небеси́; ра́дуйся, я́ко даде́ тебе́ Госпо́дь благослове́ние во ве́к ве́ка и возвесели́ тя́ ра́достию неизрече́нною пред лице́м Свои́м.

Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 6.

Пропове́дник правосла́вныя ве́ры яви́лся еси́, благове́рный кня́же, пред сы́ны ага́рянскими; Христа́ бо, Сы́на Бо́жия, еди́но спасе́ние и утеше́ние челове́ков бы́ти пропове́дуя словесы́ богому́дрыми и терпе́нием твои́м до́блим, неве́дущих науча́л еси́ пе́ти Ему́: Аллилу́иа.

И́кос 6.

Возсия́л еси́ во све́тлостех святы́х, я́ко со́лнце, венце́м сла́вы увязе́н на небеси́ и нетле́нием телесе́ просла́влен на земли́: ве́ры бо ра́ди Христо́вы пострада́в. Ца́рствия благоле́пие и вене́ц добро́ты от руки́ Госпо́дни прия́л еси́. Те́мже, предстоя́ престо́лу сла́вы, помина́й на́с, похваля́ющих тя́ и глаго́лющих:

Ра́дуйся, страстоте́рпче Христо́в, во все́м житии́ твое́м ве́рный Бо́жий служи́телю; ра́дуйся, Бо́га вы́ну сла́вивый на земли́, и ны́не а́нгелом и арха́нгелом сожи́телю.

Ра́дуйся, за тру́д любве́ и по́двиги благоче́стия с преподо́бными и пра́ведными просла́вленный; ра́дуйся, за страда́ния твоя́ и терпе́ние кре́пкое му́чеником сопричте́нный.

Ра́дуйся, испове́дниче Христо́в тве́рдый и неустраши́мый; ра́дуйся, помо́щниче все́м пречу́дный и храни́телю от Бо́га на́м да́нный.

Ра́дуйся, моли́твенниче о чту́щих тя́ те́плый и богоуго́дный.

Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 7.

Хотя́й дни́ ви́дети бла́ги, не мще́нием, но любо́вию возда́л еси́ враго́м твои́м: Кавгады́я бо и ины́я пле́нники с дарми́ в зе́млю и́х отпусти́л еси́ и, ми́р кня́зю Гео́ргию дарова́в, не губи́ти Христиа́ны, па́че же защища́ти от пога́ных увеща́л еси́. Помози́ у́бо и на́м, свя́те, стезя́м ми́ра и любве́ твоея́ после́довати, да благоприя́тно Бо́гу ми́ра пое́м: Аллилу́иа.

И́кос 7.

Но́ваго тя́ Ио́сифа незло́биваго и Дави́да кро́ткаго разумева́ем, богому́дре Михаи́ле: о́в бо бра́тиям свои́м, се́й же Сау́лу мсти́ти за озлобле́ния и́х не хотя́ху. И ты́ у́бо, име́я во вла́сти твое́й и́щущия погуби́ти тя́, не я́ко пле́нныя, но я́ко посети́тели име́л еси́ и́х, благотворя́ враго́м твои́м. Сего́ ра́ди, похваля́юще тя́, вопие́м:

Ра́дуйся, росси́йский Ио́сифе, от бра́тии твоея́ изма́ильтяном на плене́ние и сме́рть обрече́нный; ра́дуйся, те́х зло́бу не мече́м то́кмо, но любо́вию укроти́ти поиска́вый.

Ра́дуйся, се́ятеля вражды́ и мще́ния диа́вола, я́ко Дави́д Голиа́фа, кро́тостию и ми́лостию ко враго́м победи́вый; ра́дуйся, враги́ твоя́ плене́нныя сло́вом уте́шивый и пи́щею удовли́вый.

Ра́дуйся, лю́ди твоя́, бра́нию расточе́нныя, любо́вию собра́вый; ра́дуйся, разоре́нныя и бе́дствующия уте́шивый и благопотре́бным снабди́вый.

Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 8.

Стра́нна не́кая, но прелюбе́зна Бо́гу и челове́ком ви́дим о тебе́, свя́те Михаи́ле. Ве́дый бо оклевета́ния враго́в твои́х и непра́вду суде́й твои́х, не убоя́лся еси́ гне́ва ха́нскаго; но да сохрани́ши в ми́ре оте́чество твое́, ду́шу твою́ положи́ти за лю́ди твоя́ возжеле́л еси́, взира́я на нача́льника ве́ры и соверши́теля Иису́са, Ему́же и вопия́л еси́: Аллилу́иа.

И́кос 8.

Всего́ себе́ Бо́гу преда́в, я́ко а́гнец незло́бивый на заколе́ние те́кл еси́, блаже́нне; не восхоте́л бо еси́ подо́битися нае́мнику, и́же оставля́ет о́вцы, ви́дя во́лка гряду́ща, и бе́гает, но я́ко па́стырь до́брый, бежа́ти сове́тующим отвеща́л еси́: а́ще и сохрани́т бе́гство живо́т мо́й, но погуби́т лю́ди моя́ непови́нныя. Те́мже сла́вяще благоприя́тное твое́ о лю́дех попече́ние, вопие́м ти́:

Ра́дуйся, па́стырю до́брый, Пастыренача́льнику Христу́ подража́вый; ра́дуйся, лю́ди своя́ па́че при́сных твои́х и па́че себе́ сама́го возлюби́вый.

Ра́дуйся, вся́ претерпе́ти, то́кмо да лю́ди твоя́ от разоре́ния и напра́сныя сме́рти изба́вити изво́ливый; ра́дуйся, от убива́ющих те́ло и немогу́щих ли́шше что́ сотвори́ти не убоя́выйся.

Ра́дуйся, тле́нную сла́ву земну́ю ни во что́же вмени́вый; ра́дуйся, вся́ ле́стныя сове́ты злочести́ваго Кавгады́я презре́вый.

Ра́дуйся, сохране́ние ве́ры Христо́вы все́м кра́сным и сла́вным ми́ра сего́, тебе́ обеща́нным, предпочты́й; ра́дуйся, е́же пострада́ти и умре́ти за Христа́, да с Ни́м ве́чно ца́рствуеши, предъизбра́вый.

Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 9.

Все́ естество́ челове́ческое кро́тостию и смире́нием удиви́л еси́, благове́рный кня́же: зло́бныя бо клеветы́ враго́в твои́х кро́ткими словесы́ отвраща́я, непра́вду суде́й ни еди́ным же сло́вом обличи́л еси́, но я́ко и́стинный ра́б Христа́ Бо́га, после́довал еси́ Влады́це твоему́, и́же укоря́емь проти́ву не укоря́ше, стражда́ не преща́ше, Ему́же, судии́ все́х и мздовоздая́телю, и вопия́л еси́: Аллилу́иа.

И́кос 9.

Вети́и многовеща́нныя не возмо́гут изрещи́ вели́каго страда́ния твоего́, страстоте́рпче: отсла́вше бо врази́ твои́ дру́ги твоя́ и при́сныя, кла́ду ве́лию на вы́ю твою́ возложи́ша, и недово́льни су́ще, я́ко тягото́ю кла́ды, гла́дом, жа́ждею и хожде́нием мно́гим за ха́ном дне́м до истоща́ния тя́ изнуря́ху, но́щию ру́це и но́зе твои́ в кла́ду забива́ху, да нико́ея же осла́бы име́еши чле́ном твои́м. Те́мже, помина́юще по́двиги твоя́, вопие́м ти́:

Ра́дуйся, за ве́ру и оте́чество твое́ безче́стие претерпе́вый; ра́дуйся, бо́с и гла́ден, свя́зан и поруга́емь все́ми, я́ко пле́нник, за ха́ном влеко́мый.

Ра́дуйся, псалмопе́ний ра́ди всено́щных очесе́м твои́м сна́ и ве́ждома дрема́ния не да́вый; ра́дуйся, в ско́рби твое́й и злострада́ниях пла́чущия боля́ры и дру́ги твоя́ уте́шивый.

Ра́дуйся, твое́ утеше́ние в еди́ном Го́споде и моле́ниих Ему́ положи́вый; ра́дуйся, за гряду́щая страда́ния и лю́тую сме́рть, и́хже прови́дел еси́, Бо́га благодари́вый.

Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 10.

Спасти́ хотя́ ду́шу твою́, я́ко христиа́нин и́стинный к сме́рти себе́ приугото́вил еси́. Ве́дый бо, я́ко бли́з е́сть сме́рть, при две́рех, покая́нием те́плым и сле́зным пред отце́м духо́вным ду́шу очи́стил еси́ и, приобще́нием те́ла и кро́ве Христо́вы соедини́вся Христу́, воспева́л еси́ Ему́, все́м да́рующему живо́т ве́чный: Аллилу́иа.

И́кос 10.

Царя́ нечести́ваго повеле́ние испроси́вше, врази́ твои́ посла́ша во́ины уби́ти тя́, и я́ко во́лцы хи́щницы, я́ко ти́гри, жа́ждущии кро́ве, нападо́ша зли́и на тя́, а́гнца незло́биваго, и кла́дою терза́ху вы́ю твою́, и главо́ю тя́ о ве́жу уда́риша, и на зе́млю пове́ргше, пястьми́ тя бия́ху неща́дно, до́ндеже люте́йший все́х Рома́нец ноже́м уда́ри в ре́бра твоя́ и исто́рже любвеоби́льное се́рдце твое́. Те́мже тебе́, я́ко а́гнца, за Христа́ закла́ннаго, похваля́юще, вопие́м:

Ра́дуйся, я́ко А́велю, за́вистию бра́тнею погубле́нному, уподо́бился еси́; ра́дуйся, я́ко вене́ц тво́й кня́жеский кро́вными ка́плями, я́ко ка́мением чу́дным, украси́л еси́.

Ра́дуйся, я́ко ру́бище твое́, в не́мже убие́н бы́л еси́, красне́йше багряни́цы ца́рския златотка́нныя соде́лал еси́; ра́дуйся, я́ко се́рдце твое́ чи́сто и смире́нно в же́ртву Христу́, за ны́ пострада́вшему, прине́сл еси́.

Ра́дуйся, я́ко му́чеником подража́вый, ли́ку и́х сопричте́н еси́; ра́дуйся, за Христа́ сме́рть прие́мый, со Христо́м ве́чно жи́ти сподо́бился еси́.

Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 11.

Пе́ние благода́рственное Го́споду прино́сим о тебе́ чту́щии тя́, святы́й благове́рный кня́же Михаи́ле, я́ко дарова́ Госпо́дь нетле́нное те́ло твое́ Тферско́й о́бласти во утеше́ние и огражде́ние, гра́ду Тфе́ри в сла́ву и защище́ние, скорбя́щим во утеше́ние, бе́дствующим во отра́ду и по́мощь, боля́щим во исто́чник исцеле́ний, и все́м, ве́рою притека́ющим к тебе́, во спасе́ние. Те́мже Бо́гу, ди́вному во святы́х, вопие́м: Аллилу́иа.

И́кос 11.

Све́та невече́рняго прича́стника яви́ тя́ Госпо́дь а́бие по преставле́нии твое́м, блаже́нне: о́блаки бо све́тлыми те́ло твое́, лежа́щее на земли́, огради́в от звере́й ди́виих, столпо́м о́гненным показа́ тя́ все́м столпа́ бы́вша ве́ры и пра́вды, и те́ло твое́ нетле́нно сохрани́в, чудесы́ просла́ви тя́. Те́мже вопие́м ти́:

Ра́дуйся, сто́лпе ве́ры, к земли́ обетова́ния пу́ть на́м показу́яй; ра́дуйся, о́блаче духо́вный, от бе́д и напа́стей лю́ди твоя́ покрыва́яй.

Ра́дуйся, сосу́де благода́ти, со́нмы ве́рных на поклоне́ние моще́м твои́м привлека́яй; ра́дуйся, исто́чниче неоску́дный, все́м приходя́щим с ве́рою исцеле́ния подава́яй.

Ра́дуйся, воево́до непобеди́мый, я́коже в животе́, и по сме́рти враги́ на́ша от на́с прогоня́яй; ра́дуйся, сла́во и упова́ние гра́да Тфе́ри, в моли́твах твои́х вы́ну на́с помина́яй.

Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 12.

Благода́ть, да́нную ти́ от Бо́га, ве́дуще, лю́дие гра́да твоего́, и помина́юще, я́ко возлюби́л еси́ и́х в животе́ твое́м да́же до сме́рти, вы́ну к тебе́, я́ко ско́рому и кре́пкому помо́щнику во обстоя́ниих и ско́рбех, находя́щих на гра́д, притека́ху. И не посрами́л еси́ упова́ния и́х, ско́ро от бе́д избавля́я моли́твами твои́ми. Те́мже Бо́гу, спаса́вшему и спаса́ющему тебе́ ра́ди на́с недосто́йных, вопие́м: Аллилу́иа.

И́кос 12.

Пою́ще страда́ния твоя́, ублажа́ем святу́ю па́мять твою́, с ве́рою и любо́вию притека́ем к ра́це моще́й твои́х, и я́ко предстоя́ща с ли́ки а́нгел и со все́ми святы́ми Животворя́щей Тро́ице, смире́нно мо́лим тя́: не забу́ди, кня́же благове́рный, лю́ди твоя́, спаса́й гра́д тво́й и ве́си твоя́, я́коже и пре́жде, да́руй все́м, притека́ющим к тебе́, я́же к житию́ вре́менному, па́че же к жи́зни ве́чней благопотре́бная. Ми́лостив бу́ди на́м, восхваля́ющим тя́ недосто́йными усты́ и пою́щим:

Ра́дуйся, го́рняго гра́да дости́гнувый и гра́д сво́й земны́й любо́вию назира́яй; ра́дуйся, мно́гажды гра́д Тфе́рь от смертоно́сныя я́звы ди́вно спаса́вый.

Ра́дуйся, со а́нгелы сликовству́яй и лю́ди твоя́ в ско́рбех и́х не забыва́яй; ра́дуйся, с пра́ведными Бо́гу сла́вы предстоя́й и на́с гре́шных, моля́щихся ти́, не презира́яй.

Ра́дуйся, бла́гами ве́чными и неизрече́нными наслажда́яйся и ле́пту вдови́цы, тебе́ зде́ приноси́мую, любе́зно прие́мляй; ра́дуйся, на земли́ и на небеси́ от Бо́га просла́вленный и на́ша недосто́йная хвале́ния не отверга́яй.

Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 13.

О преди́вный во страда́льцех, святы́й благове́рный вели́кий кня́же Михаи́ле! При́зри ми́лостивно на смире́нныя рабы́ твоя́ и умоли́ Го́спода Бо́га, да сохрани́т гра́д тво́й и лю́ди твоя́, и вся́ гра́ды и ве́си христиа́нския от гла́да, губи́тельства, тру́са, пото́па, огня́ и вся́каго зла́, и да́рует все́м на́м во́льных и нево́льных грехо́в оставле́ние, да просла́вльшему тебе́ Бо́гу пое́м: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов и всея́ тва́ри Созда́тель, ангелонра́вна тя́ прови́дев и вои́теля за Христа́ непобеди́ма, архистрати́гу небе́сных во́инств тезоиме́нне тебе́ нарещи́ся благоустро́и. Те́мже сла́вяще Бо́жие о тебе́ промышле́ние, я́ко избра́нну сосу́ду Христо́вы благода́ти, вопие́м ти́:

Ра́дуйся, равноапо́стольнаго Влади́мира благослове́нная о́трасле; ра́дуйся, благове́рных и благочести́вых Яросла́ва и Ксе́нии ча́до.

Ра́дуйся, я́ко во утро́бе ма́тере осироте́в, все́х Бо́га во отца́ ме́сто обре́л еси́; ра́дуйся, я́ко под кро́вом кри́л Его́ прему́дростию и во́зрастом преспева́л еси́.

Ра́дуйся, я́ко отроча́ доброу́мно и благонра́вно бы́л еси́; Ра́дуйся, я́ко от ю́ности твоея́ па́че вся́каго сокро́вища Христа́ возлюби́л еси́.

Ра́дуйся, я́ко от Бо́га и челове́к досто́йне возлю́блен бы́л еси́; Ра́дуйся, благове́рный кня́же Михаи́ле, Тферски́й пресла́вный чудотво́рче.

Конда́к 1.

Избра́нный Бо́гом из земны́х князе́й в небе́сное пресве́тлое му́ченическое во́инство, от земны́я сея́ юдо́ли в Ца́рство Небе́сное пресели́лся еси́: положи́л бо еси́ ду́шу твою́ за лю́ди твоя́. Те́мже, я́ко име́яй дерзнове́ние ко Го́споду, моли́ за держа́ву Росси́йскую, за гра́д тво́й и лю́ди, тебе́ зову́щия:

Ра́дуйся, благове́рный кня́же Михаи́ле, Тферски́й пресла́вный чудотво́рче.

Моли́тва.

Ди́вный во страда́льцех святы́й благове́рный вели́кий кня́же Михаи́ле! Ве́лия по́двиги и труды́ твоя́, я́же за правове́рие, за Це́рковь Бо́жию и за оте́чество твое́ гра́д Тфе́рь положи́л еси́. Ты́, возжела́в вы́шних, оста́вил еси́ тле́нную сла́ву земну́ю, и ревну́я подви́жником Христо́вым, до́блественно противуста́л еси́ я́рости царя́ нечести́ваго и преще́нию зломы́шленнаго его́ воево́ды. Ты́, прие́м непра́ведное осужде́ние и заколе́ние, восприя́л еси́ Небе́сное Ца́рствие, и кро́вными ка́плями, я́ко пречу́дным ка́менем, украси́в на главе́ свое́й вене́ц, предстои́ши ны́не на небесе́х престо́лу все́х Влады́ки с ли́ки а́нгел и со все́ми святы́ми Его́. Сего́ ра́ди, притека́юще к ра́це моще́й твои́х, лобыза́ем о́ныя серде́чными устна́ми и уми́льно к тебе́ взыва́ем: о тезоимени́те небе́сному воево́де вы́шних си́л, вели́кий кня́же Михаи́ле! Моли́ся непреста́нно Христу́ Бо́гу за гра́д тво́й, за лю́ди и за вся́ правосла́вныя Христиа́ны. Бу́ди спобо́рник кре́пок на враго́в правосла́вия Це́ркви Христо́вой. Бу́ди и на́м помо́щник улучи́ти вся́, к по́льзе на́шей и ко спасе́нию благопотре́бная, охраня́й на́с от искуше́ний и напа́стей, приходя́щих во вре́менней жи́зни, и не лиши́ на́с хода́тайства твоего́ ко Христу́ Бо́гу, во е́же получи́ти на́м прегреше́ний проще́ние и сподо́битися небе́снаго селе́ния со избра́нными Его́, я́ко да и в се́м сла́вится пречестно́е и великоле́пое и́мя Его́ во ве́ки. Ами́нь.