Конда́к 1.

Избра́нный чудотво́рче и изря́дный уго́дниче Христо́в, Иоа́нне странничезе́мный и к Небесе́м пресе́льниче, похва́льная воспису́ем ти́, со́браннии в па́мять твою́. Ты́ же, все́м се́рдцем глаго́л Бо́жий о любви́ к бли́жнему восприя́вый, и не сло́вом то́чию, но де́лом се́й испо́лнивый, научи́ и на́с любви́ соверше́нней, да зове́м ти́:

Ра́дуйся, Иоа́нне, подви́жниче Христо́в преди́вный.

И́кос 1.

А́нгельски на земли́ пожи́вый, и в сла́ве Небе́сней ны́не пребыва́яй, блаже́нне Иоа́нне, ника́коже оставля́еши на́с, ча́д твои́х, оба́че предста́тельствуеши о на́с, моли́твами твои́ми от бе́д покрыва́юще, и ко спасе́нию наставля́еши, пою́щих ти́ си́це:

Ра́дуйся, я́ко земна́я отри́нул еси́; ра́дуйся, я́ко Небе́сная восприя́л еси́.

Ра́дуйся, земны́й А́нгеле; ра́дуйся, челове́че Небе́сный.

Ра́дуйся, вре́менная преоби́девый; ра́дуйся, ве́чная возлюби́вый.

Ра́дуйся, Лице́ Бо́жие при́сно зря́щий; ра́дуйся, ча́д твои́х на земли́ николи́же оставля́ющий.

Ра́дуйся, Иоа́нне, подви́жниче Христо́в преди́вный.

Конда́к 2.

Ви́де Госпо́дь усе́рдие твое́ ко спасе́нию, воздви́же тя́ на све́щник доброде́лания. Ты́ же, в смире́нии и кро́тости пребы́вый и сла́ву то́кмо Еди́ному Бо́гу воздава́ти повеле́вый, науча́еши и на́с пе́ти Творцу́ и Спаси́телю на́шему: Аллилу́иа.

И́кос 2.

Ра́зум Боже́ственный взыска́л еси́, о́тче Иоа́нне, те́мже все́м се́рдцем Го́спода возлюби́л еси́, и о исполне́нии во́ли Бо́жией возревнова́л еси́. Сего́ ра́ди слы́шиши от на́с сицева́я:

Ра́дуйся, Предте́чи Госпо́дню тезоимени́тый; ра́дуйся, Крести́телеву ско́рбному житию́ подража́телю.

Ра́дуйся, глаго́л Бо́жий прия́вый; ра́дуйся, де́лом За́поведь испо́лнивый.

Ра́дуйся, бли́жняго, я́ко сама́го себе́, возлюби́вый; ра́дуйся, вся́кому нужда́ющемуся ра́достно послужи́вый.

Ра́дуйся, хра́м Бо́жий себе́ сотвори́вый; ра́дуйся, от хра́ма Бо́жия никогда́же отлуча́яйся.

Ра́дуйся, Иоа́нне, подви́жниче Христо́в преди́вный.

Конда́к 3.

Си́лою свы́ше от Го́спода укрепля́емый, ле́тний зно́й и зи́мнюю сту́жу претерпева́л еси́, босы́м святы́ни гра́да Ки́ева обходя́й, не име́я, где́ главу́ подклони́ти. Вре́мени мину́вшу, в пеще́ру всели́лся еси́, да в по́двизех теле́сных ду́хом воспева́еши: Аллилу́иа.

И́кос 3.

Име́яй, Иоа́нне блаже́нне, не́бо покро́в и зе́млю ло́же, вся́кое жите́йское попече́ние отложи́л еси́. Ни́щей же бра́тии, я́ко Самому́ Христу́, усе́рдно послужи́л еси́. Сего́ ра́ди слы́шиши от на́с сицева́я:

Ра́дуйся, облеки́йся во вся́ ору́жия Бо́жия; ра́дуйся, ста́вый проти́ву ко́зней диа́вольских.

Ра́дуйся, препоя́савый чре́сла твоя́ и́стиною; ра́дуйся, облеки́йся в броню́ пра́вды.

Ра́дуйся, восприи́мый щи́т ве́ры; ра́дуйся, мече́м сло́ва Бо́жия вся́ку зло́бу разруши́вый.

Ра́дуйся, босы́ми нога́ми по земли́ походи́вый; ра́дуйся, обу́вый но́зе во угото́вание благовествова́ния ми́ра.

Ра́дуйся, Иоа́нне, подви́жниче Христо́в преди́вный.

Конда́к 4.

Бу́рю страсте́й си́лою Бо́жиею превозмо́гл еси́, стра́нниче преди́вный, незло́бием и кро́тостию суету́ ми́ра победи́л еси́, оба́че побе́дная от Го́спода прие́мый, вся́ко помога́л еси́ немощны́м, да и ти́и с тобо́й воспева́ют Промысли́телю Бо́гу: Аллилу́иа.

И́кос 4.

Слы́шаша бли́жнии и да́льнии о житии́ твое́м, и благода́тная дарова́ния души́ твоея́ ви́дяще, я́ко не то́кмо са́м спаса́ешися, но и бли́жним слу́жиши все́ми си́лами твои́ми, потща́шася воспе́ти тебе́:

Ра́дуйся, нестяжа́нием ду́шу очи́стивый; ра́дуйся, смире́нием кра́йним укра́шенный.

Ра́дуйся, сла́вою от Христа́ увенча́нный; ра́дуйся, свя́тость жития́ покро́вом юро́дства сокры́ти тща́выйся.

Ра́дуйся, на ни́ве Христо́вой де́лателю приле́жный; ра́дуйся, слеза́ми зе́млю се́рдца твоего́ ороси́вый оби́льно.

Ра́дуйся, да́нный тебе́ Бо́гом тала́нт умно́живый; ра́дуйся, пло́д стори́чный Го́сподеви твоему́ принесы́й.

Ра́дуйся, Иоа́нне, подви́жниче Христо́в преди́вный.

Конда́к 5.

Боготе́чною звездо́ю яви́лся еси́, свя́те Иоа́нне, над гора́ми Ки́евскими све́том святы́м возсия́вшею, и мра́к грехо́в разгоня́ющею. Мы́ же, ча́да твоя́, любо́вию прославля́ем Бо́га, дарова́вшаго тебе́ таковы́я дарова́ния, поя́ Ему́: Аллилу́иа.

И́кос 5.

Ви́де благочести́вец не́кий житие́ твое́, даде́ тебе́ обита́лище, иде́же бы ты́ не то́кмо са́м всели́тися возмо́гл, но и ни́щим послужи́ти потща́лся бы. Ты́ же от дне́ того́ сугу́быя по́двиги служе́ния бли́жним подъя́л еси́, подвиза́я на́с пе́ти тебе́:

Ра́дуйся, благи́х де́л о Го́споде свети́льниче; ра́дуйся, и́стинныя любви́ к бли́жнему научи́телю.

Ра́дуйся, це́ркве Десяти́нныя украше́ние; ра́дуйся, я́ко от хра́ма и по сме́рти не отлуча́ешися.

Ра́дуйся, в хра́м от Небе́сныя сла́вы прише́дый; ра́дуйся, моли́твами твои́ми богомо́льцев при́сный защи́тниче.

Ра́дуйся, исправи́телю злы́х нра́вов; ра́дуйся, насади́телю добра́ и пра́ведности.

Ра́дуйся, Иоа́нне, подви́жниче Христо́в преди́вный.

Конда́к 6.

Пропове́дуют ни́щия и больны́я труды́ и по́двиги твоя́, блаже́нне, я́ко под кро́в тво́й собира́л еси́ бездо́мных, а́лчущих пита́л еси́, немощны́м служи́л еси́ в боле́знех, все́х же на пу́ть спасе́ния наставля́л еси́. Те́мже вся́к, от тебе́ вспоможе́ние прия́вый, в ра́дости Бо́гови воспева́ет: Аллилу́иа.

И́кос 6.

Возсия́ све́т разуме́ния Боже́ственнаго в се́рдце твое́м, Иоа́нне пра́ведне, сего́ ра́ди неве́домых ты́ именова́л еси́, бу́дущая я́ко настоя́щая провещава́л еси́, гре́шников ко спасе́нию призыва́л еси́. Мы́ же, во мра́це грехо́внем блужда́ющии, воспева́ем тебе́:

Ра́дуйся, све́том Христо́вым просвеще́нный; ра́дуйся, ве́рных сия́нием свя́тости просвеща́яй.

Ра́дуйся, мра́ка жития́ разгони́телю; ра́дуйся, и́стинный просвети́телю ду́ш.

Ра́дуйся, во све́те лица́ Бо́жия житие́ преше́дый; ра́дуйся, сладча́йшаго Иису́са на Небесе́х зря́й.

Ра́дуйся, све́тлым умо́м во́лю Бо́жию уве́девый; ра́дуйся, и на́м, гре́шным, богове́дения учи́телю.

Ра́дуйся, Иоа́нне, подви́жниче Христо́в преди́вный.

Конда́к 7.

Хотя́й всеме́рно Го́сподеви угоди́ти, Иоа́нне сла́вный, странноприи́мницу сотвори́л еси́ при хра́ме свята́го апо́стола Андре́я, да вси́ стра́ждущии упокое́ние в Бо́зе обрету́т, поя́ Ему́: Аллилу́иа.

И́кос 7.

Но́выя лю́ди Го́сподеви сочета́л еси́, блаже́нне Иоа́нне, явля́я все́м о́браз и́стиннаго благоче́стия. Та́ко и боголю́бец не́кий Дамиа́н, доброде́телем от тебе́ научи́вся, Бо́гови всего́ себе́ повину́в и в мона́шестве Вонифа́тием нарече́н бы́в, ста́ до́брый па́стырь и́нокующым и все́м нужда́ющымся усе́рдный помо́щник. Мы́ же, такова́я сла́вная ви́дяще, пое́м:

Ра́дуйся, доброде́тельному житию́ научи́выйся; ра́дуйся, боголю́бцев житие́м свои́м научи́вый.

Ра́дуйся, му́дрость Боже́ственную обреты́й; ра́дуйся, я́ко учи́тель и́щущим спасе́ния яви́выйся.

Ра́дуйся, Еди́наго Бо́га благи́й ра́бе; ра́дуйся, рабо́в Бо́жиих усе́рднейший служи́телю.

Ра́дуйся, ра́йское благоуха́ние доброде́тели; ра́дуйся, свя́тости боже́ственная све́тлосте.

Ра́дуйся, Иоа́нне, подви́жниче Христо́в преди́вный.

Конда́к 8.

Стра́нное и неизрече́нное ви́дим о тебе́, Иоа́нне пра́ведне: гра́моты не ве́дый, кни́ги для моли́твы употребля́л еси́; ничто́же имы́й, мно́гия лю́ди богати́л еси́; не́мощен сы́й, к тебе́ приходя́щым помо́щник бы́л еси́. Сего́ ра́ди вопие́м Пода́телю чуде́с Бо́гу: Аллилу́иа.

И́кос 8.

Ве́сь любо́вию Христо́вою горя́й, Иоа́нне свя́те, не себе́ угожда́л еси́, оба́че бли́жним служи́л еси́ в ну́ждах теле́сных и духо́вных. Вси́ же, от тебе́ по́мощь получи́вшии, согла́сно пою́т та́ко:

Ра́дуйся, те́ло свое́ вери́гами удручи́вый; ра́дуйся, ду́х твое́ моли́твою к Бо́гу вознесы́й.

Ра́дуйся, о себе́ небреги́й Го́спода ра́ди; ра́дуйся, о бли́жних пеки́йся ра́ди Христа́.

Ра́дуйся, лю́дем бу́дущая провеща́вый; ра́дуйся, к ве́чности все́х зовы́й.

Ра́дуйся, те́сным путе́м в Ца́рство вше́дый; ра́дуйся, от Царя́ Христа́ увенча́нный.

Ра́дуйся, Иоа́нне, подви́жниче Христо́в преди́вный.

Конда́к 9.

Вси́ ве́рни удиви́шася пресла́вному преставле́нию твоему́, блаже́нне Иоа́нне. И нена́стие оты́де, со́лнцу возсия́вшу, егда́ ты́, по прича́стии Святы́х Та́ин, ду́х тво́й преда́л еси́ Бо́гови, Ему́же во все́м житии́ твое́м воспева́л еси́ неуста́нно: Аллилу́иа.

И́кос 9.

Вети́я многовеща́нныя не дово́льни су́ть изъясни́ти, ка́ко ме́ртвое те́ло твое́, свя́те Иоа́нне, в те́пле ме́сте лежа́ще, тле́ния не уви́де. Мы́ же, ди́вному де́йствию Бо́жию дивя́щеся, пое́м ти́:

Ра́дуйся, тле́ния грехо́внаго избе́гший; ра́дуйся, по сме́рти нетле́нен пребы́вый.

Ра́дуйся, А́нгелов блаже́нным преставле́нием твои́м возвесели́вый; ра́дуйся, я́ко сле́зы ни́щих, о тебе́ рыда́ющих, осуши́л еси́.

Ра́дуйся, от земны́х к небе́сным ра́достно преше́дый; ра́дуйся, от Небе́сныя сла́вы на ча́да твоя́ призира́яй.

Ра́дуйся, Ми́лостивому Бо́гу послужи́вый; ра́дуйся, ми́лости Бо́жия на на́с излива́яй.

Ра́дуйся, Иоа́нне, подви́жниче Христо́в преди́вный.

Конда́к 10.

Спасти́ хотя́ ду́шу твою́, о те́ле небре́гл еси́, свя́тче Бо́жий. Те́мже, пло́ть ду́хови покори́л еси́ вои́стинну, по́двигом смире́ние раствори́в, в ра́дости вы́ну воспева́л еси́ Бо́гу: Аллилу́иа.

И́кос 10.

Стена́ еси́ тве́рда и прибе́жище бы́л еси́ все́м нужда́ющимся, Иоа́нне ми́лостивый и ще́дрый. Те́мже и мы́, обремене́ннии грехми́ мно́гими, притека́ем к тебе́, прося́ще твоего́ заступле́ния и воспева́ющее та́ко:

Ра́дуйся, преподо́бных Фео́фила и Парфе́ния пра́ведный совреме́нниче; ра́дуйся, доброде́телем святы́х всеусе́рдный подража́телю.

Ра́дуйся, нача́льствующих к доброде́ланию подви́гнувый; ра́дуйся, бога́тых к нищелю́бию обрати́вый.

Ра́дуйся, неми́рных умири́телю; ра́дуйся, пла́мень зло́бы моли́твами угаси́вый.

Ра́дуйся, в зно́и греха́ су́щим се́не, Бо́гом зда́нная; ра́дуйся, жа́ждущым спасе́ния исто́чниче неизсяка́емый.

Ра́дуйся, Иоа́нне, подви́жниче Христо́в преди́вный.

Конда́к 11.

Пе́ние всеумиле́нное слы́шиши, блаже́нне, на ме́сте погребе́ния твоего́. Вси́ бо, от Го́спода твои́ми моли́твами по́мощь и исцеле́ние получи́вшии, в ра́дости ду́ха воспева́ют Еди́ному Ще́дрому Бо́гу: Аллилу́иа.

И́кос 11.

Све́том Боже́ственным возсия́л еси́, Иоа́нне, и я́ко не́кий свети́льник многосве́тлый на гора́х Ки́евских пребы́л еси́, мра́к грехо́вный просвеща́юще. Те́мже и мы́, ча́да твоя́, те́пле тебе́ воспева́ем:

Ра́дуйся, апо́столов сонасле́дниче; ра́дуйся, му́чеников сподви́жниче.

Ра́дуйся, преподо́бных сомоли́твенниче; ра́дуйся, пра́ведных соприча́стниче.

Ра́дуйся, доброде́телей Ева́нгельских исполни́телю; ра́дуйся, вся́каго добра́ взыска́телю.

Ра́дуйся, любо́вию Бо́жией озаря́яй сердца́; ра́дуйся, к любви́ подвиза́яй вся́каго, тебе́ моля́щагося.

Ра́дуйся, Иоа́нне, подви́жниче Христо́в преди́вный.

Конда́к 12.

Благода́ть от Бо́га даде́ся ти́, блаже́нне, неду́жныя исцеля́ти, бе́дствующыя утеша́ти, гла́дныя пита́ти, все́м же ве́рным бы́ти о́браз сло́вом и житие́м, да вся́к земноро́дный в го́рняя устремля́ется, науча́яся Бо́гови пе́ти: Аллилу́иа.

И́кос 12.

Пою́ще мно́гия по́двиги твоя́, воспева́ем доброде́тельное и смиренному́дренное житие́ твое́, блаже́нне Иоа́нне, сла́вим дела́ любви́, я́же к Бо́гу и бли́жним твои́м, почита́ем стра́нное твое́ пребыва́ние, и умиле́нно пое́м ти́:

Ра́дуйся, при́сно моля́йся о спасе́нии на́шем; ра́дуйся, от хра́ма Десяти́ннаго не отлуча́яйся.

Ра́дуйся, явле́нии твои́ми ча́да твоя́ утеша́яй; ра́дуйся, предста́тельством твои́м тебе́ моля́щыяся спаса́яй.

Ра́дуйся, красото́ Ки́евских святы́х; ра́дуйся, диади́мы церко́вныя ка́меню драги́й.

Ра́дуйся, услы́шателю проше́ний; ра́дуйся, исполни́телю я́же ко спасе́нию моле́ний.

Ра́дуйся, Иоа́нне, подви́жниче Христо́в преди́вный.

Конда́к 13.

О, пресла́вный уго́дниче Христо́в, блаже́нне Иоа́нне! Ны́не со́браннии Го́спода ра́ди в па́мять твою́, почита́ем Еди́наго И́стиннаго Бо́га, дарова́вшаго на́м тебе́ сицева́го засту́пника, моли́твенника и помо́щника. Те́мже про́сим, да сподо́бит Спаси́тель и на́с, моли́твами уго́дника Своего́ Иоа́нна, предстоя́ти пред све́тлым Лице́м Бо́жиим, вы́ну воспева́юще: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельски на земли́ пожи́вый, и в сла́ве Небе́сней ны́не пребыва́яй, блаже́нне Иоа́нне, ника́коже оставля́еши на́с, ча́д твои́х, оба́че предста́тельствуеши о на́с, моли́твами твои́ми от бе́д покрыва́юще, и ко спасе́нию наставля́еши, пою́щих ти́ си́це:

Ра́дуйся, я́ко земна́я отри́нул еси́; ра́дуйся, я́ко Небе́сная восприя́л еси́.

Ра́дуйся, земны́й А́нгеле; ра́дуйся, челове́че Небе́сный.

Ра́дуйся, вре́менная преоби́девый; ра́дуйся, ве́чная возлюби́вый.

Ра́дуйся, Лице́ Бо́жие при́сно зря́щий; ра́дуйся, ча́д твои́х на земли́ николи́же оставля́ющий.

Ра́дуйся, Иоа́нне, подви́жниче Христо́в преди́вный.

Конда́к 1.

Избра́нный чудотво́рче и изря́дный уго́дниче Христо́в, Иоа́нне странничезе́мный и к Небесе́м пресе́льниче, похва́льная воспису́ем ти́, со́браннии в па́мять твою́. Ты́ же, все́м се́рдцем глаго́л Бо́жий о любви́ к бли́жнему восприя́вый, и не сло́вом то́чию, но де́лом се́й испо́лнивый, научи́ и на́с любви́ соверше́нней, да зове́м ти́:

Ра́дуйся, Иоа́нне, подви́жниче Христо́в преди́вный.

Моли́тва.

О блаже́нне о́тче Иоа́нне, ве́рный ра́бе Христа́ Бо́га и все́м стра́ждущим ско́рый помо́щниче! Ты́ Небе́снаго оте́чества взыску́я, до́м и вся́ сро́дники твоя́ оста́вил еси́, хла́д и зно́й претерпева́я, пло́ть свою́ посто́м и нището́ю смиря́я, да́р любви́ и прозорли́вости стяжа́л еси́. Услы́ши на́с, многогре́шных, ны́не к тебе́ вопию́щих, и моли́твами твои́ми исцели́ вся́к неду́г ду́ш и теле́с на́ших, защити́ на́с от вра́г ви́димых и неви́димых, сподо́би на́с тече́ние жи́зни сея́ непреткнове́нно прейти́, христиа́нскую непосты́дную кончи́ну на́м у Го́спода испроси́ и Небе́сное Ца́рствие унасле́довати сподо́би. Мо́лим тя́, о́тче блаже́нне, обрати́ сердца́ на́ша к любви́ нелицеме́рней и и́стинному благотворе́нию, помози́ воздви́гнути святы́я хра́мы в душа́х на́ших и доброде́тельми и́х украси́ти. Наипа́че мо́лим тя́, испроси́ у Го́спода па́ки сия́ти де́тищу свята́го равноапо́стольнаго кня́зя Влади́мира, хра́му Десяти́нному во и́мя Пресвято́й Влады́чицы на́шей Богоро́дицы и Присноде́вы Мари́и, иде́же ты́ во дни́ жития́ своего́ моли́лся еси́, да ку́пно с тобо́ю просла́вим Святу́ю Тро́ицу, Отца́ и Сы́на и Свята́го Ду́ха во ве́ки веко́в. Ами́нь.