Конда́к 1.

Избра́нный от Царя́ си́л, Го́спода Иису́са, преди́вный в житии́ и чудеса́х, уго́дниче Христо́в Лавре́нтие! Восхваля́ем тя́ с любо́вию, ми́лостиваго предста́теля на́шего; ты́ же, блаже́нне, я́ко име́яй дерзнове́ние ко Го́споду, моли́твами твои́ми от вся́ких на́с бе́д и скорбе́й свобожда́й, да зове́м ти́:

Ра́дуйся, блаже́нне Лавре́нтие, Калу́жский чудотво́рче.

И́кос 1.

А́нгел земны́й и челове́к небе́сный бы́л еси́, блаже́нне Лавре́нтие, от ю́ности твое́й юро́дство Христа́ ра́ди себе́ усво́ивый, да в жи́зни вре́менней от все́х оскорбля́емь и поруга́емь бу́деши, во блаже́нней ве́чности мзду́ небе́сную да обря́щеши. Те́мже я́ко и́стинный уго́дник Бо́жий от ве́рных слы́шиши благохвале́ния такова́я:

Ра́дуйся, от благочести́вых роди́телей рожде́нный; ра́дуйся, от ю́ности на служе́ние Бо́гу предъизбра́нный.

Ра́дуйся, ми́ру и все́м пре́лестем его́ поруга́выйся; ра́дуйся, страсте́м грехо́вным не повину́выйся.

Ра́дуйся, му́дрый стра́нниче, еди́наго Христа́ любо́вию усе́рдно взыска́вый; ра́дуйся, и́стинный нищелю́бче, во еди́ней раздра́нней ри́зе ходи́вый.

Ра́дуйся, я́ко поруга́ния и бие́ния сла́дце Христа́ ра́ди претерпе́вый; ра́дуйся, я́ко бу́йством о Христе́ соверше́нство духо́вное стяжа́л еси́.

Ра́дуйся, алка́вый и жажда́вый на земли́; ра́дуйся, досто́йно насы́тивыйся бра́шна нетле́ннаго на небеси́.

Ра́дуйся, пра́ведниче, сия́яй я́ко со́лнце во Ца́рствии Небе́снем; Ра́дуйся, уго́дниче Бо́жий, просла́вленный мно́гими дара́ми благода́тными.

Ра́дуйся, блаже́нне Лавре́нтие, Калу́жский чудотво́рче.

Конда́к 2.

Ви́дев непостоя́нство ми́ра сего́, Лавре́нтие блаже́нне, юро́дственное Христа́ ра́ди житие́ возлюби́л еси́, и среди́ ми́ра пребыва́я, чу́жд мирски́х страсте́й яви́лся еси́, и я́ко до́брый во́ин Христо́в победоно́сно проти́ву враго́в спасе́ния челове́ческаго ра́товал еси́, немо́лчно воспева́я Подвигополо́жнику Го́споду Иису́су: Аллилу́иа.

И́кос 2.

Разуме́л еси́ до́бре, Лавре́нтие блаже́нне, вся́ ко́зни врага́ диа́вола, и́миже от злы́х челове́к поруга́ньми и бие́ньми до́брое твое́ произволе́ние сокруши́ти хотя́ще. Те́мже тому́ кре́пце противуста́л еси́ и за досади́теля твоя́ моли́лся еси́, и на́с вопи́ти тебе́ научи́л еси́:

Ра́дуйся, терпе́ния сто́лпе непоколеби́мый; ра́дуйся, незло́бия о́бразе преди́вный.

Ра́дуйся, и́стинный Христо́в после́дователю; ра́дуйся, бие́ния благоду́шно претерпе́вый.

Ра́дуйся, о укоре́ниях и осмея́ниях небреги́й; ра́дуйся, любо́вию свято́ю зло́бу челове́ческую победи́вый.

Ра́дуйся, в ми́ре преми́рно пожи́вый; ра́дуйся, во пло́ти А́нгелом подража́телю.

Ра́дуйся, бу́йством о Христе́ прему́дрости небе́сныя стяжа́телю; ра́дуйся, смире́нием высо́кая прия́вший.

Ра́дуйся, я́ко по́двиги твои́ми ми́ру свети́льник яви́лся еси́; ра́дуйся, я́ко страннообра́зным твои́м житие́м Бо́га просла́вил еси́.

Ра́дуйся, блаже́нне Лавре́нтие, Калу́жский чудотво́рче.

Конда́к 3.

Си́ла Бо́жия осени́ тя́, свя́те Лавре́нтие, и ратобо́рца кре́пкаго христиа́ном проти́ву по́лчищ ага́рянских яви́ тебе́, егда́ благове́рнаго кня́зя Симео́на от поги́бели сме́ртныя явле́нием твои́м изба́вил еси́, секи́рою супоста́ты поража́юща и в бе́гство неве́рныя обраща́юща, ве́рныя же побужда́юща побе́дную пе́снь Христу́ Бо́гу возноси́ти: Аллилу́иа.

И́кос 3.

Име́л еси́ о́гнь любве́ Боже́ственныя в се́рдце твое́м, Лавре́нтие богоблаже́нне, и я́ко не́кий пламеннообра́зный Серафи́м, непреста́нно в моли́тве у́мной пребыва́л еси́, се́рдцем и душе́ю твое́ю вы́ну ко Го́споду Иису́су Христу́ возноша́яся. Те́мже и Госпо́дь ди́вными дара́ми духо́вными тя́ обогати́, да вси́ тебе́ вопию́т ра́достно:

Ра́дуйся, во́ине Христо́в, не обя́зываяйся ку́плями жите́йскими; ра́дуйся, прозорли́вче ди́вный, бу́дущее, я́ко настоя́щее, созерца́вый.

Ра́дуйся, я́ко люби́маго ти́ кня́зя Симео́на от посече́ния сме́ртнаго изба́вил еси́; ра́дуйся, я́ко от псо́в слове́сных того́ защити́л еси́.

Ра́дуйся, я́ко явле́нием твои́м ага́рян неве́рных устраши́вый и в бе́гство обрати́вый; ра́дуйся, си́лою Го́спода си́л побе́ду ве́рным дарова́вый.

Ра́дуйся, оте́чества твоего́ земна́го Бо́гом да́нный засту́пниче; ра́дуйся, правосла́вному во́инству до́брый сора́таю.

Ра́дуйся, воево́до победоно́сный лю́дем христоимени́тым; ра́дуйся, враго́в Це́ркве Христо́вы гро́зный кара́телю.

Ра́дуйся, смире́нным и благочести́вым ти́хое приста́нище; ра́дуйся, подвиза́ющимся до́брый помо́щниче.

Ра́дуйся, блаже́нне Лавре́нтие, Калу́жский чудотво́рче.

Конда́к 4.

Бу́ря ага́рянскаго наше́ствия на гра́д Калу́гу тобо́ю, свя́те Лавре́нтие, умири́ся, и нечести́вые полцы́ ага́рян злове́рных от ста́да Христо́ва тобо́ю со студо́м отгна́ни бы́ша; та́ко бо дарова́ тя́ Госпо́дь засту́пника изря́днаго оте́чествию твоему́, в не́м же до ны́не сла́вится и́мя твое́, и по́двиги твои́ благода́рственным честву́ются пе́нием Бо́гу: Аллилу́иа.

И́кос 4.

Слы́шим мно́гая и чу́дная исправле́ния твоя́, о пра́ведниче, ка́ко уедине́нное о Бо́зе житие́ твое́ при хра́ме Рождества́ Христо́ва проходи́л еси́, пеще́рную стезю́ от ке́ллии твоея́ к тому́ ископа́в, да незри́мый челове́ки Бо́гу моли́твы твои́ соверша́еши. Сему́ у́бо смиренному́дрию и на́с научи́, преподо́бне, да зове́м тебе́ хвале́бно:

Ра́дуйся, уедине́ния люби́телю; ра́дуйся, многосле́зный моли́твенниче.

Ра́дуйся, вся́кую горды́ню от се́рдца своего́ отгна́вый; ра́дуйся, христоподража́тельное смире́ние и́скренно возлюби́вый.

Ра́дуйся, по́двиги твоя́ моли́твенныя от челове́к утаи́вый; ра́дуйся, юро́дством Христа́ ра́ди сия́ благоиску́сно сокры́вый.

Ра́дуйся, таи́нниче Пресвяты́я Тро́ицы; ра́дуйся, созерца́телю А́нгельских си́л.

Ра́дуйся, пеще́рною стезе́ю во хра́м Бо́жий ходи́вый; ра́дуйся, путе́м те́сным простра́нство Ца́рствия Христо́ва стяжа́вый.

Ра́дуйся, я́ко дни́ в юро́дстве, а но́щи в моли́тве препровожда́л еси́; ра́дуйся, я́ко посто́м и бде́нием ду́шу свою́ просвети́л еси́.

Ра́дуйся, блаже́нне Лавре́нтие, Калу́жский чудотво́рче.

Конда́к 5.

Боготе́чное свети́ло бы́в, согра́жданы твоя́ благоче́стию христиа́нскому поуча́л еси́, Лавре́нтие всеблаже́нне, о́браз равноа́нгельнаго жития́ те́м показу́я. Кто́ у́бо, о твое́м вели́ком терпе́нии слы́ша, не умили́тся и соверше́нное смире́ние твое́ воспомина́я, ка́ко оби́дящим, по за́поведи Христа́ Бо́га, вся́ проща́л еси́ и Тому́ во умиле́нии глубо́цем воспева́л еси́: Аллилу́иа.

И́кос 5.

Ви́дим бы́л еси́ от челове́к, я́ко юро́д и безу́мен, по сто́гнам гра́да в раздра́нней оде́жде ходя́й, от все́х поруга́емь, Лавре́нтие пра́ведне, оба́че му́др о Христе́ пребы́л еси́ и сие́ чудесы́ мно́гими прояви́л еси́. Те́мже от люде́й благочести́вых, я́ко и́стинный уго́дник Бо́жий почита́ем, слы́шал еси́ похвалы́ таковы́я:

Ра́дуйся, слове́с Апо́стола Па́вла, е́же о Христе́ юро́дства, до́брый после́дователю; ра́дуйся, ева́нгельских Христо́вых за́поведей ве́рный исполни́телю.

Ра́дуйся, хла́д и зно́й любве́ ра́ди Бо́жия претерпе́вый; ра́дуйся, вся́кое упокое́ние плотско́е возненави́девый, да поко́й ве́чный насле́диши.

Ра́дуйся, в ми́ре страннообра́зно пожи́вый, да оте́чествие го́рнее приобря́щеши; ра́дуйся, бие́ния те́лу твоему́ ра́достно прия́вый, да безсме́ртныя сла́вы сподо́бишися.

Ра́дуйся, му́жу жела́ний духо́вных; ра́дуйся, де́лателю благи́й виногра́да небе́снаго.

Ра́дуйся, плоды́ сла́дкия де́лания твоего́ Христу́ принесы́й; ра́дуйся, вре́менными лише́ньми бога́тство небе́сное стяжа́вый.

Ра́дуйся, изря́дный пра́веднаго жития́ рачи́телю; ра́дуйся, преподо́бия и чистоты́ ревни́телю.

Ра́дуйся, блаже́нне Лавре́нтие, Калу́жский чудотво́рче.

Конда́к 6.

Пропове́дник бы́л еси́ покая́ния гре́шником и обличи́тель прозорли́вый беззако́ний челове́ческих, Лавре́нтие преблаже́нне; сло́во бо твое́ мно́гих ко спасе́нию приведе́ и на пу́ть исправле́ния наста́ви, и́х же с любо́вию облича́л еси́ и к покая́нию и́стинному призыва́л еси́, Бо́гу же учи́л еси́ воспева́ти: Аллилу́иа.

И́кос 6.

Возсия́л еси́, я́ко звезда́ пресве́тлая, во гра́де Калу́ге, уго́дниче Бо́жий, и чуде́с благода́тию согра́жданы твоя́ просвети́л еси́ и мно́гия боля́щия пресла́вно моли́твами твои́ми исцели́л еси́, и вся́ ве́рныя подвиза́л еси́ зва́ти тебе́:

Ра́дуйся, ве́рующим врачу́ безме́здный; ра́дуйся, моли́твенниче всеси́льный ко Го́споду Бо́гу.

Ра́дуйся, ру́це твои́ святы́я цельбопода́тельно на неду́жныя полага́вый; ра́дуйся, еди́ным прикоснове́нием к оде́жде твое́й больны́м здра́вие подава́вый.

Ра́дуйся, я́ко чудотворе́ния твоя́ юро́дством сокры́ти тща́лся еси́; ра́дуйся, я́ко те́м искуше́ния де́монския победоно́сно отгна́л еси́.

Ра́дуйся, сострада́тельный и ми́лостивый стра́ждущим помо́щниче; ра́дуйся, любвеоби́льный и благосе́рдный скорбя́щих уте́шителю.

Ра́дуйся, Бо́гу все́й душе́ю твое́ю прилепи́выйся; ра́дуйся, бли́жняя твоя́ зело́ возлюби́вый.

Ра́дуйся, при́сно о оби́дящих тя́ моли́твы возноси́вый; ра́дуйся, кро́тость соверше́нную себе́ усво́ивый.

Ра́дуйся, блаже́нне Лавре́нтие, Калу́жский чудотво́рче.

Конда́к 7.

Хоте́ние при́сное име́л еси́, свя́те Лавре́нтие, да богоуго́дное и пра́ведное житие́ твое́ от челове́к утаи́тся. Те́мже вся́ко тща́лся еси́ от люде́й юро́дством сие́ сокры́ти и ра́довался еси́ безче́стиям и бие́ниям, тебе́ наноси́мым, я́ко да́ром вели́ким, при́сно зовы́й во смире́нии ду́ха пе́снь Бо́гу: Аллилу́иа.

И́кос 7.

Но́ваго тя́ Андре́я Царегра́дскаго позна́ем, Лавре́нтие блаже́нне, гра́д Калу́гу ди́вным юро́дственным житие́м твои́м просвети́вшаго: даде́ся бо тебе́ благода́ть от Бо́га по́мыслы челове́ческия познава́ти и согреше́ния та́йныя облича́ти, согра́жданом же твои́м духо́вно свети́ти и на стези́ покая́ния и спасе́ния те́х приводи́ти. О се́м тебе́ восхваля́юще, пое́м:

Ра́дуйся, я́ко пра́вда твоя́ в ми́ре возсия́ немерца́емым Бо́жия благода́ти све́том; ра́дуйся, я́ко та́йнии по́двизи твои́ от Бо́га я́вно чудесы́ просла́вишася.

Ра́дуйся, дре́вним проро́ком подража́вый; ра́дуйся, прозорли́вец вои́стину нело́жный яви́выйся.

Ра́дуйся, прия́вый вла́сть на ду́хи нечи́стыя; ра́дуйся, смире́нием твои́м вся́ ко́зни и́х разруши́вый.

Ра́дуйся, посто́м и моли́твою си́льно на диа́вола вооружи́выйся; ра́дуйся, нището́ю и уничиже́нием всю́ горды́ню его́ попра́вый.

Ра́дуйся, на земли́ небе́сный граждани́не; ра́дуйся, среди́ молвы́ наро́дныя безмо́лвия до́брый храни́телю.

Ра́дуйся, зе́млю одро́м упокое́ния име́вый; ра́дуйся, безче́стие в че́сть вмени́вый.

Ра́дуйся, блаже́нне Лавре́нтие, Калу́жский чудотво́рче.

Конда́к 8.

Страннообра́зное юро́дственное житие́ твое́, Лавре́нтие пра́ведне, свято́ю кончи́ною заверши́л еси́, я́ко и́стинный уго́дник Бо́жий, о Го́споде почи́в, душе́ю же твое́ю в небе́сныя ски́нии Ца́рствия Христо́ва восше́л еси́, и та́мо со святы́ми Пресвято́й Тро́ице сподо́бился еси́ воспева́ти приснохвале́бную пе́снь: Аллилу́иа.

И́кос 8.

Ве́сь гра́д Калу́га благоуха́ния духо́внаго в ча́с сконча́ния твоего́ испо́лнился, Лавре́нтие блаже́нне, и ке́ллиа твоя́, иде́же о Го́споде почи́л еси́, мирополо́жница благоуха́ния Христо́ва яви́ся, ему́же благове́рнии лю́дие ра́дующеся, тебе́ похва́льныя сия́ словеса́ воспева́ти научи́шася:

Ра́дуйся, вели́чием чуде́с в житии́ и по сме́рти просия́вый; ра́дуйся, пра́ведно и свя́то житие́ твое́ соверши́вый.

Ра́дуйся, я́ко кончи́ну твою́ благоуха́нием чу́дным озна́меновал еси́; ра́дуйся, я́ко арома́ты ра́йскими свя́тость души́ твоея́ показа́л еси́.

Ра́дуйся, в сла́дкую воню́ Христо́ву ра́достно востеки́й; ра́дуйся, нетле́нное те́ло твое́, а́ки ма́сть духо́вную, ве́рным оста́вивый.

Ра́дуйся, гра́д Калу́гу святы́ми моща́ми твои́ми освяти́вый; ра́дуйся, ра́дости мно́гим пода́телю.

Ра́дуйся, неду́гов душе́вных и теле́сных цели́телю; ра́дуйся, бли́жним и да́льним да́ры целе́бныя подава́яй.

Ра́дуйся, чту́щих тя́ проше́ния исполня́яй.

Ра́дуйся, блаже́нне Лавре́нтие, Калу́жский чудотво́рче.

Конда́к 9.

Все́м лю́дем во утеше́ние и освяще́ние яви́ся свято́е ме́сто уедине́ния твоего́, иде́же во хра́ме Рождества́ Христо́ва гро́б тво́й честны́й чудеса́ мно́га и преди́вна си́лою Христо́вою соверша́ет и вся́ ве́рныя науча́ет твоя́ богоуго́дный по́двиги чествова́ти. Бо́гу же, просла́вльшему тя́, пе́ти: Аллилу́иа.

И́кос 9.

Вити́йство мирско́е не довле́ет к прославле́нию чуде́с, по моли́тве блаже́ннаго Лавре́нтия соверша́емых и разуме́ние челове́ческое превосходя́щих, о ни́хже мы́, смире́ннии, благохвали́ти уго́дника по достоя́нию недоуме́ем, но от усе́рдия на́шего прино́сим ему́ ма́лыя нехи́тростныя похвалы́ сия́:

Ра́дуйся, уго́дниче Бо́жий, со святы́ми почива́яй; ра́дуйся, избра́нниче Христо́в, земноро́дным милосе́рдие твое́ явля́яй.

Ра́дуйся, разсла́бленныя те́лом здра́вы возставля́яй; ра́дуйся, бесны́я от наси́лия диа́вольскаго свобожда́яй.

Ра́дуйся, глухи́м слу́хи отверза́яй; ра́дуйся, немы́м уста́ разреша́яй.

Ра́дуйся, хромы́м пра́во ходи́ти устроя́яй; ра́дуйся, бе́дствующих скоропредста́тельный помо́щниче.

Ра́дуйся, скорбя́щих благода́тный уте́шителю; ра́дуйся, гра́да Калу́ги небе́сный покрови́телю.

Ра́дуйся, святы́я оби́тели твоея́ неуста́нный храни́телю; ра́дуйся, всея́ земли́ на́шея засту́пниче.

Ра́дуйся, блаже́нне Лавре́нтие, Калу́жский чудотво́рче.

Конда́к 10.

Спаси́тельную Бо́жию благода́ть подае́ши все́м, свя́те Лавре́нтие, с неду́гами челове́ческими и с ве́рою кре́пкою моли́твенно притека́ющим к цельбоно́сному твоему́ о́бразу. Те́мже и мы́, припа́дающе, мо́лим тя́ неду́ги на́ша исцели́ти, грехо́м же на́шим отпуще́ние испроси́ти, да зове́м ди́вному во святы́х Свои́х Бо́гу: Аллилу́иа.

И́кос 10.

Царя́ Небе́снаго Христа́ Бо́га и́стинный ра́б и уго́дник бы́л еси́, Лавре́нтие блаже́нне, и от Него́ чудесы́ просла́вленный, оте́чествию твоему́ земно́му благотворе́ния мно́гая явля́еши, больны́я исцеля́я, разсла́бленныя укрепля́я, слепы́я просвеща́я. О не́мже ра́дующеся, прино́сим ти́ сия́ ра́достныя пе́ния:

Ра́дуйся, звездо́ немерца́ющая, чуде́с заре́ю ве́рныя озаря́ющая; ра́дуйся, пра́вды со́лнца Христа́ луче́ пресве́тлая.

Ра́дуйся, милосе́рдия Спа́сова подража́телю; ра́дуйся, ми́лость твою́ боля́щим челове́ком явля́яй.

Ра́дуйся, ве́рныя ду́ши благода́тию посеща́яй; ра́дуйся, в со́ниих и виде́ниих земноро́дныя зра́ком лица́ твоего́ просвеща́яй.

Ра́дуйся, от го́рних высо́т к и́щущим заступле́ния твоего́ ми́лостивно принима́яй; ра́дуйся, от оче́с стра́ждущих сле́зы отира́яй.

Ра́дуйся, о́бласти Калу́жския духо́вная красото́; ра́дуйся, Це́ркви Христо́вы све́тлая похвало́.

Ра́дуйся, на небеси́ со а́нгелы и святы́ми сла́вою нетле́нною укра́шенный; ра́дуйся, на земли́ от правове́рных по до́лгу ублажа́емый.

Ра́дуйся, блаже́нне Лавре́нтие, Калу́жский чудотво́рче.

Конда́к 11.

Пе́ние моле́бное у гро́ба твоего́ с ве́рою не́кий разсла́бленный приноша́ше, ру́це и но́зе недви́жими и язы́к немы́й име́яй, но егда́ к целе́бней ра́це моще́й твои́х прикосну́лся, а́бие здра́в соде́лася, ру́це свои́ простре́ и нога́ми ходи́ти нача́ и язы́ком свои́м я́сно проглаго́ла; те́мже ве́лию твою́ к нему́ ми́лость прославля́ше и благода́рственно взыва́ше ко Го́споду: Аллилу́иа.

И́кос 11.

Све́тлостию чуде́с твои́х, уго́дниче Бо́жий Лавре́нтие пра́ведне, помраче́нныя грехми́ ду́ши на́ша озаря́еши и вся́ ны́ от сна́ ле́ности возбужда́еши, да плоды́ покая́ния принесе́м Христу́, тебе́ в по́двизех богоугожде́ния подража́юще, я́ко да возмо́жем неосужде́нно благохвали́ти тя́, предста́теля на́шего, си́ми пе́сненными глаго́лы:

Ра́дуйся, лампа́до, све́том Христо́вым все́х просвеща́ющая; ра́дуйся, еле́ем ми́лости твоего́ се́рдца боле́зненная умаща́яй.

Ра́дуйся, ру́це согбе́нныя и недви́жимая це́лы и де́йственны устро́ивый; ра́дуйся, но́зе неходя́щия к ско́рому и пра́вому тече́нию претвори́вый.

Ра́дуйся, язы́к, немото́ю свя́занный, благода́тно разреши́вый; ра́дуйся, разсла́бленнаго все́ми у́ды кре́пка и здра́ва возста́вивый.

Ра́дуйся, алава́стре целе́бный, на вся́кия неду́ги врачевство́ содержа́яй; ра́дуйся, боля́щим ми́лость сострада́ния твоего́ явля́яй.

Ра́дуйся, по Бо́зе и Пресвяте́й Богоро́дице упова́ние на тя́ возлага́ющих не посрамля́яй; ра́дуйся, лю́бящим тя́ и честву́ющим па́мять твою́ предста́тельством небе́сным воздава́яй.

Ра́дуйся, моли́твенно призыва́ющим свято́е и́мя твое́ на по́мощь ускоря́яй; ра́дуйся, поклоня́ющимся с ве́рою честны́м моще́м твои́м да́ры целе́бныя незави́стно подава́яй.

Ра́дуйся, блаже́нне Лавре́нтие, Калу́жский чудотво́рче.

Конда́к 12.

Благода́ть Бо́жию многоцеле́бную, от гро́ба твоего́ источа́емую, не́кий му́ж уве́дев, сы́на своего́, нога́ми боле́зновавша и отню́дь ходи́ти не могу́ща, на плеща́х свои́х к целе́бней ра́це твое́й, свя́те Лавре́нтие, принесе́ и со слеза́ми о его́ исцеле́нии к тебе́ моля́шеся; и се́ моли́тве еще́ су́щей во усте́х его́, больно́й на но́зе свои́ ста́ и ходи́ти нача́, скача́ и благодаря́ Бо́га, в тебе́ сла́вно просла́вльшагося, благода́рными усты́ взыва́я к Нему́: Аллилу́иа.

И́кос 12.

Пою́ще по́двиги твоя́ преди́вныя и чудеса́ твоя́ пресла́вная, Лавре́нтие пра́ведне, мо́лим тя́, засту́пника на́шего: приклони́ся ми́лостивно к на́шим моли́твам смире́нным и вознеси́ о на́с ко Го́споду твоя́ благоприя́тныя моли́твы, прося́ на́м от бла́гости Его́ да́ры благопотре́бныя душе́вному спасе́нию на́шему, да возмо́жем и мы́ гре́шнии не то́кмо по́двиги твоя́ прославля́ти, но и доброде́телем твои́м подража́ти, зову́ще и глаго́люще:

Ра́дуйся, све́тлый о́бразе богоугожде́ния в ми́ре жи́тельствующим; ра́дуйся, преди́вный наста́вниче в и́ночестве подвиза́ющимся.

Ра́дуйся, де́вствующим подража́ния о́бразе; ра́дуйся, нищелю́бцем преуспе́яния пра́вило.

Ра́дуйся, му́дрости су́етныя мирски́я посрами́телю; ра́дуйся, бу́йства о Христе́ благода́тнаго прояви́телю.

Ра́дуйся, ева́нгельских обетова́ний насле́дниче; ра́дуйся, апо́стольских целе́бных даро́в прее́мниче.

Ра́дуйся, а́нгельских во́инств собесе́дниче; ра́дуйся, все́х святы́х сожи́телю.

Ра́дуйся, телеса́ на́ша безме́здно врачу́яй; ра́дуйся, о душа́х на́ших Го́спода умоля́яй.

Ра́дуйся, блаже́нне Лавре́нтие, Калу́жский чудотво́рче.

Конда́к 13.

О преди́вный чудотво́рче и засту́пниче все́м на́м преми́лостивый, свя́те блаже́нне Лавре́нтие! Приими́ с любо́вию сие́ ма́лое, в похвалу́ тебе́ приноси́мое моле́ние на́ше и помоли́ся ко Го́споду Бо́гу о е́же изба́вится на́м гее́нны о́гненныя и муче́ний ве́чных, Ца́рствие же Небе́сное вку́пе с тобо́ю унасле́довати, да в ра́дости святы́х воспое́м и мы́, гре́шнии, Бо́гу Спаси́телю на́шему: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел земны́й и челове́к небе́сный бы́л еси́, блаже́нне Лавре́нтие, от ю́ности твое́й юро́дство Христа́ ра́ди себе́ усво́ивый, да в жи́зни вре́менней от все́х оскорбля́емь и поруга́емь бу́деши, во блаже́нней ве́чности мзду́ небе́сную да обря́щеши. Те́мже я́ко и́стинный уго́дник Бо́жий от ве́рных слы́шиши благохвале́ния такова́я:

Ра́дуйся, от благочести́вых роди́телей рожде́нный; ра́дуйся, от ю́ности на служе́ние Бо́гу предъизбра́нный.

Ра́дуйся, ми́ру и все́м пре́лестем его́ поруга́выйся; ра́дуйся, страсте́м грехо́вным не повину́выйся.

Ра́дуйся, му́дрый стра́нниче, еди́наго Христа́ любо́вию усе́рдно взыска́вый; ра́дуйся, и́стинный нищелю́бче, во еди́ней раздра́нней ри́зе ходи́вый.

Ра́дуйся, я́ко поруга́ния и бие́ния сла́дце Христа́ ра́ди претерпе́вый; ра́дуйся, я́ко бу́йством о Христе́ соверше́нство духо́вное стяжа́л еси́.

Ра́дуйся, алка́вый и жажда́вый на земли́; ра́дуйся, досто́йно насы́тивыйся бра́шна нетле́ннаго на небеси́.

Ра́дуйся, пра́ведниче, сия́яй я́ко со́лнце во Ца́рствии Небе́снем; Ра́дуйся, уго́дниче Бо́жий, просла́вленный мно́гими дара́ми благода́тными.

Ра́дуйся, блаже́нне Лавре́нтие, Калу́жский чудотво́рче.

Конда́к 1.

Избра́нный от Царя́ си́л, Го́спода Иису́са, преди́вный в житии́ и чудеса́х, уго́дниче Христо́в Лавре́нтие! Восхваля́ем тя́ с любо́вию, ми́лостиваго предста́теля на́шего; ты́ же, блаже́нне, я́ко име́яй дерзнове́ние ко Го́споду, моли́твами твои́ми от вся́ких на́с бе́д и скорбе́й свобожда́й, да зове́м ти́:

Ра́дуйся, блаже́нне Лавре́нтие, Калу́жский чудотво́рче.

Моли́тва.

О, святы́й и Богопросла́вленный пра́ведниче и чудотво́рче Лавре́нтие, ско́рый помо́щниче и усе́рдный засту́пниче все́х с ве́рою и любо́вию моли́твенно к тебе́ прибега́ющих! Се́ и мы́, смире́ннии и гре́шнии, обремене́ннии и́гом тя́жким мно́гих беззако́ний на́ших, во умиле́нии глубо́цем к тебе́ прибега́ем и, припа́дающе к многоцеле́бней ра́це святы́х моще́й твои́х, мо́лим и про́сим тя́: помоли́ся за на́с ко Го́споду Бо́гу, да не погуби́т на́с со беззако́нии на́шими, но обрати́т на́с на стезю́ покая́ния и спасе́ния. Ве́мы бо, ве́мы, я́ко мно́го мо́жет пред Ни́м моли́тва пра́веднаго. Тебе́ же, вои́стинну пра́ведника су́ща, на умоле́ние к Нему́ предлага́ем со упова́нием кре́пким, я́ко твоего́ ра́ди Небе́снаго предста́тельства пред Ни́м и мы́, недосто́йнии, поми́ловани бу́дем. Испроси́ на́м у Созда́теля на́шего вели́кия и бога́тыя да́ры бла́гости Его́: земли́ плодоно́сие, возду́ха благорастворе́ние, дожди́ благовре́менны, ми́р во дне́х на́ших, благоче́стия умноже́ние, боля́щим здра́вие, скорбя́щим утеше́ние, уныва́ющим ободре́ние, сиро́тствующим призре́ние, убо́гим снабде́ние, подвиза́ющимся преуспе́яние, умира́ющим благу́ю христиа́нскую кончи́ну и все́м пра́во ве́рующим ве́чное спасе́ние. Страну́ на́шу сохрани́ святы́ми моли́твами твои́ми в благоде́нствии невреди́му от вся́каго зла́, гра́д же тво́й и святу́ю оби́тель твою́ соблюди́ в ми́ре и благоустрое́нии, я́ко стра́ж и храни́тель и́х неотсту́пный. Е́й, уго́дниче Бо́жий! Не посрами́ упова́ния на́шего, но яви́ на́м свято́е твое́ заступле́ние, да велича́ем тя́ немо́лчно, я́ко вели́каго предста́теля на́шего, и прославля́ем неизрече́нное человеколю́бие ди́внаго во святы́х Свои́х Триеди́наго Бо́га, Отца́ и Сы́на и Свята́го Ду́ха, во ве́ки веко́в. Ами́нь.